رواية زوجي يعشق اخري الفصل الثاني والعشرون بقلم ساره الخفاجي
طبيت للبيت مهجور قديم جان حارث وياه واحد ثاني اني خفت بس حارث طمني .
-تعالي سمر لتخافين هذا رئيسي بالشغل وموثوق.
جان رجال جبير گصير موكلش بس بالنسبة لحارث گصير راسة متروس شيب .
-شونج بابا سمر ،لتخافين احنه وياج .
-سكتت بس هزيت راسي .
-شوفي سمر راح ترحين لتركيا وتسوين الي يردو منج بس لازم نسجل دليل عليهم وترجعين عادي وحاولي تكسبين ثقتهم حتى نكدر نوصل للراس الجبير الي بيهم.
-بس شون حارث اني خوافة ماادبرهة .
-لتخافين شبيج ،احنه حنكون وياج أول باول .
-واللة مااعرف شكلكم بس اني گلبي ممرتاح.
-اطمئني احنه وياج .
رجعت للبيت بس چانت اكو بگلبي غصة خوف .
فتت للبيت علگت الاضوية قفلت الباب ذبيت الجنطة والمفتاح عالطاولة وگعدت عالقنفة صفنت عالسگف فوك النص ساعه صافنة ماافكر ولاارمش بس صافنة احس روحي وگعت بدوامة ومدااعرف اطلع منهة وكل مايمر الوقت اكثر تكبر هالدوامة وتجرني اكثر واكثر فزيت على صوت الموبايل.
_عادل وگمت ابجي.
_سمر ،شبيج احجي ليش تبجين منو وياج فهميني خرب لتخبليني بهالليل شون هسة راح اجيج هسة سمر جاوبي لتبجين مردتي گلبي .
_تعبت كلش ،بعد مااكدر اقاوم احس كلشي بهالحياة ضدي ماكو ولاشي يمشي صح شمسوية اني بحياتي وهيج داتعاقب لازم مسوية شي جبير .
_لتحجين هيج سمر انتي بس فهميني شكو شصاير وياج وآني اساعدج على حلهة سمر انتي من وافقتي عليه صرتي جزء مني وآني جزء منج احجيلي اني أقرب انسان الج وصدكيني ماكو شي بهالدنيا مالة حل.
_عادل اني راح اموت،احساسي يكلي راح تخلص حياتي .
_اسم الله عليج ياروحي يومي قبل يومج ،سمر حظري نفسج راح اجي اخذج.
_وين تاخذني بهالمغربية .
_مااكدر اجيج للبيت العالم إذا شافتني شيخلصج منهم اخذج لأي مكان بس أريد اشوفج واشوف شنو قصتج.
_لاعادل مااكدر .
_لخاطري سمر لترديني بعد مااكدر اتحمل للصبح على هذا حجيج..
جهزت نفسي شون مجان ورة نص ساعه دك التلفون عادل ،وصلت
نزلت من الشقة ورحت ركبت السيارة لااراديا حظنتة وهوة گاعد ردت احس بالامان ردت احس اكو احد وياية مااعرف شنو المشاعر الي بداخلي تولدت بهاللحظة بس الي متاكدة منة حسيت بحنان ابوية الله يرحمة .
_شبيج بس فهميني والله كلشي ينحل بس احجيلي .
_عادل اني ورطت نفسي بغبائي .
_بيش ورطتي نفسج.
_وية عصابة تكتل وتاجر بالاعضاء والمخدرات.
_شون صار هالشي وليش محجيتي لج انتي من كل عقلج واكعة بمشكلة هالكبرهة وساكته .
_بنية جنت اعتبرهة صديقة خانتني وورطتني وهسة يردوني اعبر مخدرات من تركيا للعراق .
_ليش ماتروحين للشرطة ،سمر ليش تصرفين بدون وعي اني مووياج ليش محجيتيلي.
_لتصيح عادل ،اني صوجي حجيت .
_ضجتي من صياحي ،صياحي خوف عليج فهميني رحتي للشرطة.
_لا.
_شنو لا شمتانية.
_افهمني رجل فاتن ضابط عرف وهسة يريدني اصير جاسوسة الهم يعني اشتغل وية العصابة حتى اكشف الروس الكبار بيهم .
_وانتي وافقتي.
_ماعندي غير حل اصلا مسألوني عن رأيي .
_وهسة شحسوين.
_راح اسافر واجيب الي يردو .
_كل عقلج هية دولتنة هم دولة إذا الزمتي بتركيا بعد ميطلعج لو رئيس الوزراء يدخل.
_اني خايفة عادل كلش داحس روحي مراح ارجع اكو خوف بگلبي .
_شوفي شراح اگلج ونفذي اوك بس أول لازم تقابلين امي .
_ليش.
_مالج دخل هية ساعه احجي وياهة وخلص.
_خوش .
_باجر اجيج العصر لوعدج دوام بالكلية.
_ياكلية انفصلت ورحت.
_خرب ببليسج سمر كل هذا صاير وآني آخر من يعلم هذا الي يمشي ورة مزاج النسوان ياكلهة.
وصلني للبيت ارتاحيت شوية من حجيت وية عادل خفف عني حمل كلش جبير ،طبيت سبحت ونمت ثاني يوم گعدت متأخرة سويت غدة لروحي شي بسيط اكلت ونظفت وگعدت افكر بام عادل شون ححجي وياهة وهية مرايدتني اصلا زين شون حقابلهة وآني بالي اصلا بغير مكان وخايفة باوعت للساعه بالاربعة العصر گمت سبحت وشسورت ومكيجت وجهزت نفسي وگعدت انتظر عادل.
اجاني مسج فتحته .
....الخميس انتي سافرين حظرنة ورتبنه كل الامور كوني عالموعد .....
ياربي ميخلوني لحظة انسة لازم ينغصون عليه حياتي .
دزيت رساله لحارث بالحجي الي اجاني وجاوبني انه كلشي تمام ومااخاف مجهزين كلشي .
دك التلفون عادل وصل .
اخذت جنطتي قفلت الباب وطلعت ركبت السيارة جان عادل قلق بشكل .
_شبيك اليوم.
_مابية شوفي راح اسافر وراج لتركيا الحكج يعني ومناك نسافر لأي دولة ترديهة .
_ليش شحسوي.
_شسوي يعني اشردج من هالمصايب الي وگعتي نفسج بيهة.
_وشون نعيش ،والشركة وشغلك.
_مالج دخل بكلشي اني راح ارتب الوضع.
_الخميس لازم اسافر.
_خوش عدي يومين اجهز روحي.
...وصلنة يلة نزلي لتخافين وكوني هادئة خوش.
نزلت فتحتلي الباب بنية عمرهة بالثلاثين عرفني عادل عليهة مرت اخو الجبير .
سلمت عليهة وبوستني وفتت لگيت مرة جبيرة من اهل گبل گاعدة عالقنفة ومبينه شخصية ومسيطرة عالكل سلمت عليهة وكعدت قدمولي المي والعصير الحجية تباوعلي من فوك ليجوة معاجبهة الوضع .
_اي يمة سولفلي عادل عليج بس مگلي سبب طلاگج .
_خالة ،لگيتة يخوني .
_وشكو بيهة يايمة اشو كل الزلم تخون.
_خالة كل الزلم تخون بس موكل النسوان تتحمل.
_اي اي والله زمن.
ظلت تسألني عن اهلي وعمامي بالمختصر المفيد شرحتني شرح خلال هالساعه دزيت رسالة لعادل حتى يطلعني واجة نقذني من التحقيق .
رجعت للبيت خابرت عادل أريد اعرف شكالت .
_لتخافين وافقت.
_شوشكلهة جان يگول غير شكل .
سمر .
_ها.
_احبج .
_تصبح على خير عادل ...
