رواية سواد الاثمد الفصل الثاني والعشرون بقلم نورس
فتحت عيوني على وسعها من شفته لو يمر دهر مستحيل أنسى ملامحه حاجبه المطبور الأثر مال جرح اللي نازل على عينه وجهه اللي طيرلي نومة عيني سنين طويلة ويجي بأحلامي
باوعلي مستغرب من فوك ليجوة عاقد حاجبه
عبد الكريم :- عبد الإله وين
ضليت صافنة بوجهه ممستوعبة وجوده گدامي بهاللحظة
عبد الكريم :- مو أحاجيج متردين
غير لو ينفتح حلگي وأنطق تحجرت بمكاني وحواسي كلها مشلولة وكأني بحلم ما أگدر أتحكم بيهم
كشر بوجهي متنرفز جاي يحجي قطع اللحظة علينا رنة تليفون مد ايده لجيبه طلعه باوع بالأسم رد بسرعة
عافني ودار وجهه ومشى نازل الدرج ضلت عيوني وراه
واني بقيت بمكاني أحاول أستوعب هو اني صدك شفته لو دا يتخايلي شكله ظشيت كعدت عالجرباية بفكر شارد
كل شوي أرفع عيني لنفس المكان الجان واگف بيه قبل ثواني لا مگاعد يتهيألي هذا هو جان گبالي قبل شوي
لحيته طويلة ويبين عليه الكبر متغير اي بس أعرفه أميزه من طبرة حاجبه وأثر الجرح اللي على وجهه
رفعت ايدي أباوع عليها ترجف
غمضت عيوني حيل ودنگت راسي بين ادية
گلبي گام يوجعني مديت ايدي أفرك صدري النفس ضاك
اختنگت حيل عبالك الهوى خلص بالغرفة ميوصلني
گمت من مكاني طلعت تمشيت على كيفي وگفت يم الدرج أباوع من فوك ما شفته بس أسمع صوته وهو يحجي جان عالي وأسمعه يضحك ويسولف
رجعت للغرفة گلبي مقبوض گعدت عالجرباية صار كلشي يرجع لذاكرتي وعقلي يعيدلي الموقف بتفاصيله
الدنيا جانت ليل واگفات يم باب بيتنا منتظرات جية بابا من شغله وصوت ماما وهي تصيح علينا حتى نفوت
اجتني بيدها لعابتها
نورجان :- ماما تگول ادخلي
شهربان :- هسه يجي بابا وأفوت
گعدت گدام الباب عيني بنهاية الشارع منتظرته
انداريت عنها دقيقتين ورجعت شفت رجال غريب مگاود ايدها يحجي وياها ومشوا مسافة من البيت
مشيت بسرعة وراهم عبروا شارعنا ودخلوا لغير فرع وگفوا گبال بيت هيكل شفت وجها من بعيد أحمر تريد تبجي خايفة وهو يحجي وياها يأشرلها تفوت مقبلت
باوع للشارع ونزل عليها سد حلگها شالها وفات بيها للبيت دخلت وراهم أسمع صوت بجيتها من جوة
المكان أظلم وموحش ما بيه حياة ما بيه روح ماكو ضوة غير أضوية الشارع اللي عاكسة على حيطانه
صوت بجيها زاد وصار عالي الصوت جاي من جوة وحدة من الغرف فجأة انگطع صوتها وگفت يم الباب خاتلة ورى الحايط ومادة جزء من راسي اباوعلهم
ظهره صاير عليَّ ميشوفني بس هي شافتني وفتحت عيونها دموعها تنزل ايده على حلگها كاتم صوتها
عبد الكريم :- اششش صيري حبابة لتطلعين صوت
شال ايده أول كلمة اجت بلسانها
شهگت :- أريد بابا
نومها للگاع ايده تتحرك على جسمها تجردها من ملابسها تنفض بروحها وتصرخ كتم صوتها دنك عليها باسها تراجعت بخوف جسمي يرجف عيني مرمشت
12 تعليق
غمضت عيني حيل نزلت دموعي أعصر بالفراش بيدي
شلون أنساه وهو الضيعني وضيع أهلي بسببه بابا مات بقهره على نورجان بسببه ضاعت طفولتنا
شردتنا من بيت خالو
حيرة ماما بينا من مكان لمكان
نورجان اللي صارت تخاف من خيالها
وزواجي من أخوه بالغصب
منين مدا أجيبها يطلع وجهه القذر گبالي
وسط شرودي جفلت على صوت الباب وهو ينفتح
گمت من مكاني صارت بوجهي يسر فاتت وسدت الباب
باوعتلي :- شبيج فزيتي
احس لساني ثگل مدا أگدر أنطق ضليت ساكتة
26 تعليق
مشت لميز تواليت خلت جنطتها وتليفونها وتحجي
يسر :- أول مدخلت طلع عبد الكريم بوجهي عزة غير اخترعت من شفته وگف گلبي من الخوف
جرت نفس ورجعت سألتني :- شوكت طلع هذا
گعدت عالجرباية سندت راسي مغمضة عيوني دايخة
حسيت عليها تحركت جرت جنطتها طلعت تليفونها وشالته تخابر لحظات ونزلته تأفأف متضايقة
- استغفر الله هذا عبد مجاي يرد
شافتني محجيت كملت على كلامها
- على أساس عبد يجي ياخذني ونرجع سوة لهنا بعدين خابرني گال دزيتلج واحد يوصلج اني اتأخر بس شو مجابلي طاري على طلعة أخوه من السجن
رجعت اتصلت عليه وهم ما رد عافت تليفونها واندارتلي
گالت :- شافج حجيتي وياه
هزيت راسي بـ لا وضليت ملتزمة السكوت طالعة روحي منا هذا صار بوجهي ومنا الدوخة لزمتني ومعدتي گامت تگلب متحملت ركضت طلعت للحمام أستفرغ
وگفت عالمغسلة أغسل وجهي اجت وراي
وگفت بالباب :- ها شلونج
باوعتلها بأنعكاس المراية هزيت راسي وجريت المنشفة
رجعنا للغرفة ضلينا گاعدات دقايق واجانا وگف بالباب
اثنينا فزينا نفس اللحظة باوعلنا وأشر براسه
عبد الكريم :- امشي انزلي سويلي أكل
باوعت ليسر جان موجه الكلام الي
نتر :- هنا مو جاي أحجي وياج
ولا تحركت لوما يسر مدت ايدها لظهري دفعتني على كيف حتى أمشي مشيت منه وتعديته سرعت مشيتي
نزلت بسرعة من الدرج وعالمطبخ وگفت ايدي عالكاونتر لازمة صدري ضيقة مو طبيعية تجيني أول ما أشوفه وجهه يذكرني بكلشي مو حلو صار بحياتي
صارت دموعي تنزل واني أتحرك بالمطبخ أدورله أكل
لگيت أكل مال بارحة باقي بالثلاجة طلعته أحميه اله
جريت كرسي وگعدت على ميز الطعام مدنگة راسي على ايدي ومغمضة عيوني حيل وأون بصوت خفيف
- شبيح تبجين
ايدها انمدت على ظهري فزيت بسرعة عبالي هوَ
15 تعليق
مسحت دموعي وعدلت خصلات شعري ورى اذني
طبطبت على چتفي :- اگعدي ارتاحي اني أحضرله الأكل
صارت تتحرك بالمطبخ وتحجي وياي
يسر :- عبد من نزلتي خابرني وگتله على طلعة كريم الظاهر حتى هو ميدري محد مبلغه گلي سويله اليريده ووصاني منحجي وياه حجي زايد لبين ميرجع
سوتله صينية أكل وأخذتها اله
أسمعه يگلها :- وهذيج وين
وهي ترده :- دايخة راسها مأذيها
دنگت راسي سادة اذني حتى صوته مرايدة أسمعه
شوي ورجعت يسر هزتني من چتفي
رفعت راسي باوعتلها
حجت متوترة :- گومي بان هذا حط راسه وراسج
- شيريد
- يگول خلي تسويلي چاي وتجيبه الي
باوعت للباب ورجعت گالت :- باعي اني راح أسوي الچاي وأصبه وانتِ اخذيه اله ماشي
حجتها واندارت عالكاونتر تدور بالخانت عالچاي
بان :- بدربج شوفيله سم مال فار خلصينا منه فد مرة
اندارت تضحك ونصت صوتها
- لتخافين هذا ميأثر بيه لا سم الفار ولا سم الثيران
- يعرفج
- يعرفني بالأسم ويدري من زمان عبد رايدني بس مشايفني من قبل قبل شوي من دخلت للبيت معباله اني نفسي يسر يباوع ويهز بيده معاجبه ملتهي يخابر يمكن عباله احنا صاحبات عبد
- هسه من شافج مسألج شي
- مسأل وضعه غريب يخوفني ونظراته مو راحة ديري بالج من تطلعين لتذبين حجاية عليه ترى مينحزر هذا
- حتى أرگع صينية الچاي براسه
- استغفر الله بابا شبيج مو دا أگلج عبد وصانا
سكتت عنها ودرت وجهي أعصابي تالفة
يعني فوك ممجبورة أطلع وأتحمل أشوف وجهه القذر لازم أسكت إذا بدر تحرش من عنده الي
سمعنا صوته من جوة وصوت واحد يمه يسولف وياه تنهدت بقلة حيلة گمت أخذت الصينية منها وطلعت
وصلتله شفت عمهم شاكر گاعد يحجون
شاكر :- غير تحجي تگول نجي نستقبلك هيج تخليها سكتة
- وانتو وين جنتو بيمن حايرين صار اسبوع من وصلكم الخبر محد كلف روحه يجي يشوف شنو الوضع
- والله محد گلي اليوم عبالي عالخميس وعبد هم ملتهي عنده شغل تلگاه ناسي
وصلت عندهم سكتوا اثنينهم خليت الصينية عالطبلة گدامه بدون لا أباوع عليه أشرله عليَّ
عبد الكريم :- لا يابة حقه عبد ينسى إذا لام گحابه عنده بالبيت وحاير بيهن وين يتذكر كريم يتذكر طلعته
باوعلي عمه ورده :- يمعود هاي مرته
شرب شوي من الچاي ورفع راسه متفاجئ
- لا يابة شوكت تزوج هذا
- صار سنة تتذكر بنت حارث والسالفة القديمة
فتح عيونه واندارلي بسرعة يباوعلي من فوك ليجوة
- هيَ هاي
يباوعلي عاقد حاجبه مركز حيل ايدي تعصر بملابسي متحملت اوگف أكثر دا أمشي صاح وراي وگفني
- بس هذيج أتذكرها جانت شگرة
- هاي التوم مالتها سجودة بدلت بينهن بالعقد وما عرفنا إلا ورى ما تزوجوا
- هاي انتوا شلاعبين شمصخمين شلون تخلون وحدة بربوك مثل سجودة تضحك عليكم
- هي صارت بعد وهذيج أصلاً طلعوا مزوجيها وعبد ما رضى يطلك هاي بقاها بدال اختها
اندارلي :- شسمج انتِ
ضليت ساكتة عيوني تحرگني من گد الدموع المتجمعة بيها ايدي ورجلي ترجف گوة مسيطرة واگفة على طولي
رجع ظهره عالتخم گله :- انخرست متحجي
أشرله وراي
عبد الكريم :- بلة هاي افتهمنا مرته هذيج اللخ شنو فلمها هم عود گلي مرته
اندار شاكر وين ما أشرله صارت بوجهه يسر فتح عينه
فز من مكانه :- لج اني مو وصيتج ذاك اليوم بالشقة بعد متوصلين لعبد شعندج هنا
خافت وتراجعت ليورة من شافته گاملها انهد عليها لزمها من شعرها وصار يعت بيها يجيبها منا ويوديها منا
وهي تبجي بصوت عالي وتتوسله حتى يعوفها
يسر :- والله هو دز عليَّ وجابني
جابها براشدي سطرها
صاح :- لج شوكت تجوزين چم مرة بمرة حذرت ووصيتج ما تخليني أشوف وجهج
استلمها دفرات برجله وهي بالگاع منتهية بالبجي والصريخ أخذت زاوية جسمي كله يرجف وعيني كل شوي تجي عليه يشرب بالچاي ويباوعلهم بكل برود
هو يضرب ويصيح وهي تصرخ انفتح الباب وفات عبد
أول مصار عمه بوجهه وهو لازم يسر يضرب بيها عيونه صارت بگصته مشاله بهمة جرها من ايدها خلاها وراه
عبد الإله :- شلون تمد ايدك عليها
- لتصيح اني مو گتلك هالساقطة تجوز منها ولتوصللها بعد ليمتى تبقى تلعب عليَّ عبد
- مرتي يسر عجبكم والما عجبكم انتوا والقندرة سوة محد اله شي يمي
فتح عيونه صاح :- تتجاوز على عمك لخاطر ساقطة مثل هاي
- تبقى أشرف من العندك وأكسر راس أكبر واحد يجيبها بلسانه غصبًا عليكم كلكم يسر مرتي سمعت لو أعيد
- تطلگها متبقى على ذمتك
- ارگعوا راسكم بالحيطان طلاك ما أطلك
- لتخليني أسوي شي ما يعجبك عبد
- شنو تهدد شتريد تسوي يعني
اندار لعبد الكريم اللي على گعدته ايده ورى راسه
- عاجبك الجاي يگوله أخوك
عبد الكريم :- خرخاشة صاير بيد النسوان
اندار عبد يباوع بالمكان لحد ما اجت عينه عليَّ
صاح :- تعاي اخذيها واصعدن فوك
مشيتله بسرعة جريت يسر واندارينا عنهم نصعد الدرج
صوتهم ورانا صار عالي وعبد منفعل صار أعصاب حيل ما خلى لا غلط لا فشار وطب بالهوسة صوت أخوه
صرنا منفتهم شي من صياحهم صعدنا للغرفة وسديت الباب گعدت عالجرابية لازمة ايدها وتون بوجع وتبجي
حالتها حاله شعرها تهلس بيده وجها ميتفسر صاير عبارة عن قطعة حمرة گد ما مختنگة وتبجي
حجيت بتردد :- بيج شي يسر
ضلت ساكتة وبجيها زاد ما قل ما لحيت أخذت زاوية بالغرفة وگرفصت على روحي لامة رجلي لصدري
مرت بالنص ساعة واحنا على وضعنا لخد ما انفتح باب الغرفة وفات عبد أول ما اجى على يسر وگف گبالها
جانت على حالها تبجي بصوت ناصي ومدنگة راسها
عبد الإله :- شبيج حبيبتي شو ارفعيلي راسج خلي أشوف وجهج
لزم وجها رفعه يباوع بيه ودموعها مستمرة بالنزول
گلتله :- عيني جاي تحرگني عبد
باوع بالغرفة يدور راسه بسرعة
- بان وين
لحد ما استقرت عينه عليّ گاعدة بالزاوية جر نفس
أشرلي براسه :- گومي جيبيلي ثلج من جوة
هزيت أكتافي معترضة بدون لا أحجي
نتر :- مو وكت عنادج امشي انزلي جيبيلي ثلج وتعاي
عدت الحركة تخبل وهو منا صاير أعصاب ما حسيت إلا صاير گدامي رفعني من تيشيرتي يصيح بوجهي
دموعي صارت تصب :- ما أنزل والله ما أنزل
- لج شنو هالعناد ليش تجبريني أمد ايدي عليج
يسر :- تخاف من عبد الكريم
سكت شوي من سمعها حجت هيج عافني ومسح وجهه بنفاذ صبر يحاول يهدئ نفسه وتخصر يباوعلي
- راحوا اثنينهم امشي انزلي جيبي الوصيتج عليه
حجاها ورجع على يسر تشكيله من عينها اليمنى وهو مگابلها يهفي عليها ويهدي بيها مسحت دموعي ومشيت
نزلت جوة صدك مجان أكو أحد بوجهي للمطبخ غسلت وجهي عالسنك طلعتله قالب ثلج من الفريز ورجعتلهم
انطيته اله أخذ قطعة ثلج وصار يمررها جوة عينها مورمة شكلها يخوف وهي منتهية لازمة بيده
اندارلي بنص التفاته :- انزلي للغرفة الجوة لتصعدين الدرج بعد المن فاتحها اني إذا كل شوي صاعدة نازلة
مجان إلي خلك أجادله نزلت لغرفتي جوة سديت الباب وطلعت التليفون من صدري خليته جوة الدوشك
تمددت خليت راسي عالمخدة وغمضت عيوني
دموعي نزلت عضيت على شفايفي بحرگة لهفته عليها وخوفه وهو يباوع لوجها مدا تروح من راسي
يحبها شكو مبقيني على ذمته ليش مخليني بديل عنها وكت الحاجة يعيش حياته مثل ميريد واني رابطني بيه بطفل غصب عني تعاي لو تبقين تربيه لو أكتلج
لو أخوه الصار بوجهي وكملها عليَّ كرهت روحي وكرهت الضعف الجنت بيه واني گدامه بس مو بيدي
الرجفة تلزمني غصب عني وما أسيطر على روحي
أخذت نفس طويل وايدي على عيوني سمعت صوت الباب وهو ينفتح وواحد يدخل وخرت ايدي أباوع
شفته هو
سده وعينه عليّ اجاني گعد بالگاع من جهتي
عبد الإله :- ليش البجي بانو
ما رديت عليه مسحت دموعي وعيني عالسگف
مد ايده لشعري :- راح أگله بعد ميوصل لهنا والله
دفعت ايده عني ونترت بيه
- وخر لتلزمني
حجيتها ودرت وجهي عنه انطيته ظهري
سمعته يتنهد ويجر نفس طويل بحسرة گام جاب غطة غطاني بيه وقلل الأضوية عاف إضاءة خافتة بالغرفة
عافني وطلع
خلصت اليوم بس نوم هالفترة صايرة جوعية مال نوم وين ما أشوف مخدة أذب نفسي مثل الميتة
ثاني يوم گعدت راسي يأذيني ودايخة حيل أخذتلي ملابس ودخلت للحمام أخذت شاور بارد أريد أصحصح
طلعت أتطوطح مثل السكرانة حتى السبح مفادني
والدوخة العندي فضيعة عفت شعري بدون تمشيط ومشيت للمطبخ أريد أسوي چاي لوجع راسي
لگيت يسر سابقتني واگفة دتحضر بالريوك
شافتني :- صح النوم اجيتي بوكتج عود جاية أگعدج حتى تجين تتريگين
جريت كرسي وگعدت عالميز لازمة راسي وهي كملت الريوك وصبته گعدت وياي انطتني چاي أخذته منها
صرت أسفت بس چاي يخلص گلاص أصب الثاني
يسر :- كافي يمعودة مو هيج ترى مو زين اكلي شي
- ماريد مجوعانة
- بان تغذيتج زفت ولا جنج وحدة حامل معقولة مدا تشتهين تاكلين شي
- بيدي يعني
- لعد أوصي عبد ياخذج للدكتورة صار فترة ممراجعين
أباوع لوجها رغم الضرب الأكلته البارحة وورم عينها گاعدة اليوم بكل نشاط متمكيجة مكياج خفيف وواگفة تحضر الريوك إلي وإلها
رجعت ظهري عالكرسي وباوعتلها
- يسر متغارين
رفعت راسها بسرعة بأتجاهي وعافت الكوب من ايدها
- من شنو قصدج منج يعني
ضليت أباوعلها ساكتة افتهمت قصدي
تنهدت وردت :- الصدك جانت تجيني أوقات اي أغار وهواي هم خاصة من رحنا لأربيل وشفته شلون يعاملج ومن شردتي مسوالج شي واني أعرف عبد لو غير واحد مسويها جان معداها إله على خير بس انتِ مسوالج شي
بالعكس شالج وأخذج گعدج بشقة ثانية وبيوم اللي جابج للشقة وردتي تشردين ثاني مرة وعمه يشحن بيه حتى يكتلج أخذج وجابج لهنا حتى لحد يتعرضلج
سكتت شوي وكملت :- بس من حبلتي تغير كُلشي
بللت شفايفي بقهر أحاول ألزم روحي
- وانتِ ليش محبلتي
- ما أدري راجعنا هواي أطباء واثنينا مجان بينا شي لحد آخر دكتورة راجعناها گالت النا حجاية ضلت تدك براسي
چتفت ايدي لصدري وركزت بكلامها باهتمام
كملت :- گالت انتوا اثنينكم سليمين ومتشوكن من شي بس مدامكم سوة مراح يصير عندكم أطفال اني ما اقتنعت بالحجي وجنت ذابه الصوج بيه هو لأن أخوه هم عنده نسبة عقم من الولادة عبالي عبد نفسه
باوعتلي عينها بعيني :- بس من حبلتي انتِ كُلشي تغير
- من هيج زعل منج زعلة طويلة ذيج المرة
هزت راسها :- اي على هالسالفة جان متحسس منه حيل جنت كلما أجيبله طاري الحمل لو الدكاترة يزمخ بوجهي ويسد الموضوع
- وعمه شعنده وياج ليش هيج كارهج وميريدج تبقين وياه
- مو بس عمه حتى مرة أبوه
عقدت حواجبي :- مرة أبوه
- اي تصير الأولى ام عبد الكريم وعنده بعد اختين منها
- مجنت أدري أبد ميسولف بأهله گدامي
- المهم أبوه جان عنده عقدة من البنات صار عنده بس عبد الكريم ولد وراها مرته سطرتهن اله بنتين وبالثالثة سقطتها ببطنها لأن نساوتها جانت تشبه نساوة خواتها
- عجيب
- حقها ترة هو مهددها إذا جابتله بعد بنية يكتلها وصدك حبلت بالرابعة وجابتها ومن عرف بيها بنية شالها وذبها بوحدة من الحاويات وليومج البنية ميدرون ميتة عدلة
- وأمه
- امه جانت الثانية عاد گام تزوجها وجابتله من أول بطن عبد الإله وجانت حامل بالثاني والأبو جان فرحان بعكس مرته الأولى شوفتها الويل لأم عبد لحد ما عزلهن
- وهسه وينها
- أبوه كتلها غسل عار
فتحت عيوني :- تشاقين
- والله شبيج وهو راجع من الشغل لگى واحد ببيتها بدون تفاهم جر سلاحه وحط طلقة براسها والرجال هذاك تصاوب بكتفه بس گدر يشرد منه
- جان صغير مو
- اي توة سنتين حتى ملحك عليها ومجان واعي أخذته مرة أبوه ربته وهاي حقدت عليه بگد حقدها على أمه
- ومن عرف أبوه كاتل أمه شسوى
- مو أبوه الكتلها أبوه بس جان سلاح يحركونه مرته الأولى هي جانت السبب ليومج عبد حاقد عليها ومقتنع يگول هي الدخلت الرجال على أمه وخلت أبوه يكتلها
- معقولة تسويها
- تسويها لأن هو سامع هالحجي من عمه وحتى أبوه عرف بالسالفة بس بعديش بعد مكتلها هي واللي ببطنها
- وهسه أبوه وينه
- بيوم تعارك ويَّ زوجته وعياط وصياح ووصلت بيه للضرب گام عبد الكريم جار سلاح ورامي على رجل أبوه لأن ضرب أمه رجله سگطت صار يعرج عليها وطرد ابنه من البيت وتبرى منه والأم طلگها وطردها ضل گدامه بس عبد الإله گام وحول كُلشي بأسمه بشهادة عمه شاكر
أم كريم جان البيت بأسمها رجعتله وكسرت عين زوجها ولأن حرم ابنها وبناتها من الورث گامت وصت جماعة ودزتهم على زوجها وبليلتها اختفى الرجال محد يدري بيه وين لحد ورى تلث أيام چلاب الشوارع نابشة مكانه طلع مكتول ومدفون ورى الجامع والناس التمت عليه
- وبعدها عايشة
- موجودة وحدة مشرانية اجتني مرة لبيت أهلي وياها اثنين من زبالتها هددتني اني وأهلي حتى ما أتواصل بعد ويَّ عبد وعبد من عرف گام تخبل عليها وعناد بيها عقد عليَّ وتزوجني بعقد شيخ وصرت مرته
- هم عرفوا هي ورى قتل زوجها
- عمه شاكر جان شاك إلها ايد بالصار بس الأنظار بوقتها توجهت على سجودة وزوجها وأخوتها لأن الجامع اللي انكتل بيه أبو عبد جان لزوج سجودة بمنطقتهم
بهت لوني وأحس رجلي نملوا من جابت طاريهم
بلعت ريگي :- اخوتها قصدج سالم وحارث
- اي
- وشمعنى هم شكوا بيهم من دون الناس
- لأن جانوا يشتغلون سوة قبل وبذيج الفترة صارت مشاكل بينهم وكلمن انفصل بحاله فصارت العيون عليهم المهم من هذا كله مات زوج سجودة وأخذت أطفالها وشردت للكويت خافت ليكتلون ابنها
ضليت أصفّن وعقلي يضرب أخماس بأسداس وهي گامت تشيل بالمواعين تنقلهم للسنك حتى تغسلهم
انداريت عليها :- مفهمت هسه سبب رفضهم لزواجكم انتِ وعبد شنو
اندارت وانتجت عالكاونتر ايدها ليورى
- شبيج بعدها موصلتج مو گتلج فلوسهم وأملاكهم كلها بأسم عبد والراح يتزوجها وتجيبله الولد تتحول بأسم ابنها فهم خايفين مرادوا غريبة تحط ايدها على ورثهم وحاولوا شگد وياه ياخذ وحدة من بنات شاكر مقبل
تنهدت وردت :- مو بعيني فلوسهم والله حبيته وحبني وشگد حاولوا يفرقوني عنه وهددوني مگدرت أبتعد
اندارت تكمل غسل مواعين واستمرت تحجي
- تدرين شگد جنت متمنية أول طفل يصير مني مو لخاطر الورث خليهم مگشرين بيه بس بعد حتى محد بيهم تصيرله حجة علينا ويعترض على زواجنا
بان :- هسه ديلا عاد هو شلون محسبلهم حساب يخاف منهم شو البارحة استلم عمه لسانه يذب فشار عليه ويرجع ليورى وهذاك واگف مسوى شي
ضحكت :- يخافون يمعودة فلوسهم وعماراتهم كلها بأسم عبد يديحون بس يعاندونه
- علاقته بأخوه شلونها
- مو هالگد دوم مشاكل وعرك عالشغل والفلوس خاصة عبد الكريم كم مرة بمرة يتداين دين جبير ويجي لعبد انطيني ومن يرفض يگوم عليه وتصير بينهم للضالين
- وين يودي فلوسه
- دمبلة نسوان شرب عبد يشتغل ويلم وكريم يطشر عاد جزع منه ومن مشاكله حتى كم مرة بمرة دخل للسجن ويطلعوه عاد بالأخيرة شال ايده منه حتى يتوبه
- سبحان الله هسه تأكدت هم اخوان صدك
باوعتلي :- لتظلمينه صح عنده مرات شغلات تضوج بس شلون متشوفينه أحسن من أخوه كريم
اختنگت وگمت منها وهي كملت شغلها طلعت من المطبخ رحت للغرفة گعدت عالجرباية أربط أحداث
معقولة سالفة نورجان إلها ايد بهذا كله
وعبد منتظر مني الولد شلون لو طلعت بنية وطلع هو مثل أبوه
مديت ايدي لبطني صابتني قشعريرة سرت بكل جسمي
بكل عقله أخليها اله حتى يكتلها
من تالي أخليه يطبق عرف الوأد بالجاهلية ببنتي
دنگت راسي أفركه حيل أحسه يريد ينفجر
للظهر اجى عبد گلنا نتحضر اثنينا وطلعنا وياه بالسيارة ماخذنا نتغدى برة هم منطلقين سوالف وضحك واني گاعدة ليورى راسي عالجامة أباوع للشارع
حاولت أرفض هواي حتى ما أجي مخلاني
دخلنا مطعم تغدينا وطلعنا نفتر بالسيارة لحد مصارت ساعة قريب 4 العصر
عبد :- يسر راح اوصلج لأهلج حاجز موعد عند الدكتورة لبان من نرجع أخابرج اطلعيلي
- لا اوگف هنا راح آخذ تكسي وأروح لصديقتي أشوفها لبين متكملون مراجعتكم
صدك وگف السيارة ونزلت اندارلي :- انزلي حولي
- ماريد مرتاحة هيج
- فضيني بلا عناد
جربت نفس متضايقة ونزلت رگعت الباب وصعدت يمه
سديت الباب حيل صاح :- وثول
- لتتجاوز
- لا والله وشتسوين يعني
حجاها بأستهزاء ومد ايده فر الستيرن دنگت عليه عضيته من ايده گمز بسرعة ونترها وخرني عنها
صاح :- بنت الكلب شبيج
- انتَ ابن الكلب لتغلط
سطرني براشدي رفعت راسي أباوعله عيوني تحرگني وهو خازرني حيل عدلت شعري رجعته ليورى
حرك السيارة وهو متنرفز أعصابه صايرة براسه واني عيني عالجامة ولا باوعتله مختنگة دموعي بعيني
ضربته تأذي الحيوان خدي يحرگني من قوة الراشدي
وصلنا للدكتورة نزلنا فحصتني وسوتلي سونر گالت جنس الطفل بعده ما مبين كتبتلي مقويات وطلعنا
من صعدنا للسيارة انداريتله
بان :- خلي ببالك إذا طلعت بنية آخذها وأشرد ولا أخليك تجيس شعره من راسها
اندارلي عاقد حاجبه :- شبيج بابا شتخرطين انتِ
- مثل مسمعت
- ومنو گلج إذا بنية اني ماريدها
ضليت ساكتة أباوعله درت وجهي منه خليت شعري ورى اذني شغل السيارة ومشينا
دموعي گامت تكت من وحدها وصوت النفس صار عالي حس عليَّ صار يباوعلي
- هسه هذا البجي عليمن
انداريتله بحرگة :- إذا ناوي تطلگني ورى ما أجيب شنو ذنبه هالطفل يصير متشتت بيناتنا
- وليش يتشتت أمه موجودة
عضيت شفتي ودموعي تنزل ورجعت انداريت عالجامة
سكت شوي وگال بهدوء :- حطي ببالج إذا رايدته ما أخلي أحد يوصله وياخذه من حضنج
- ويسر
- معليج بيسر انتِ غير رايدته انتِ أمه اولى بتربيته اكثر من أي أحد بس ساعتها تنسين شي اسمه طلاك
- انتَ مثل دتگول لسجين تريد مؤبد لو إعدام بالحالتين حياته معدومة ومنتهية
- عجبج ما عجبج هذا العندي
الدنيا صارت مغرب شفته رجع بطريقنا للبيت ويسر خابرها گلها راجعين للبيت وهي تروح تبات عند أهلها
وصلنا لهناك جانت دنيا الليل دخلت جوة للمطبخ غسلت وجهي وطلعت للغرفة أبدل ملابسي لبست لبس خفيف انام بيه أريد بس ألزم المخدة وأنام حيل تعبانة
ستوني مددت فتح الباب وفات باوع للغرفة شافني مطفية وأريد انام گال :- تتعشين ما جوعانة
گعدت على حيلي :- لا راح أنام
فتح الضوة واجاني وگف قريب مني
- بانو شبيج
سكتت ودرت وجهي عنه
گال :- لتسكتين شنو براسج احجي
- احجيلي الصدك قتل أبوك إلها ربط بحادثة اختي
عقد حاجبه :- ومنيلج هالحجي انتِ
- سألتك سؤال واضح جاوبني شعليك منين عرفت
صفن بوجهي شوي وعض شفته وهو يهز راسه
- يسر آخ منج يسر إذا لزمتج
- مراح تجاوب
- معليج بهالسوالف نامي
گمت صرت بوجهه
- ليش متحجيلي لويش تخليني أعرف بغير طريقة
- شتردين تعرفين
- أخوك ليش سوة هيج بأختي شمعنى نورجان ليش مو من بنات عمو سالم ليش مو من بنات عمتي سجود
- سالفة أبوي وثارنا ويَّ عمتج مالها علاقة بحادثة اختج
- لعد ليش سوة هيج
- جانت بينهم مشكلة فلوس وراد يكسر عين أبوج
- بس
- هذا الأعرفه وانتِ هم لتدوخين راسج زايد بهاي السالفة گتيلي سولفلي واني حجيت كافي بعد سدي الموضوع
- مو إذا عرفت ما راح تخلصون من ايدي وروح بابا
لزمني جرني من متني حيل
صاح :- شو انتِ رايحة زايد وتهددين لج لتخليني أهينج بختج باللي ببطنج جان لعبت الحزام عليج
دفعني عالجرباية
عبد :- انطمري يلا ماريد أسمع صوت
هزيت راسي وگتله :- بعيني اني الكم
طفى الضوة ورگع الباب وراه حيل وطلع
ضليت الليل كله أتگلب طارت النومة من عيني گمت فتحت الضوة وطلعت من الغرفة ماله صوت
صعدت أشوفه فوك دورته بكل الغرف بالحمام مموجود
رجعت نزلت لغرفتي مشيت للجرباية طلعت التليفون
فتحته كومة مكالمات منه وأرقام ثانية ما أعرفها
رحت على رقمه خابرته هو عبالك جان منتظر إتصالي بسرعة جاوب استلمني رزايل شلون قافلة التليفون
- مگدرت أفتحه والله مسكت من المكالمات طول ما هو مفتوح خفت ليدك واحد وأنلگف
تيم الله :- ول أبوية مو گتلج منگدر نشتغل عليه ونحدد الموقع إذا تقفلينو
- ما أدري
- شبيج انتِ صوتج ما يعجب
اختنگت :- تعبت أريد ماما والله جزعت روحي واني محبوسة هنا بعيدة عنها
سمعت صوت طگة الجداحة يمه مسحت دموعي
گتله :- شلونها هي زينة نورجان شلونها
- زينات اثنينهن ويسألن عليج منتظرات رجعتج
- شوكت
- بس دعوفيلي هالطرگاعة التليفون مفتوح منا لباجر وتلگيني واگفلج بالباب
بعده يحجي انسحب التليفون من ايدي انداريت بفزة لگيت عبد واگف وراي يباوع بالأسم وعاقد حواجبه
《 نورجان 《
خلصت العطلة وبديت أداوم خامس إعدادي
وهالسنة جانت صعبة عليَّ أكثر من القبلها
مو صعوبة مواد بس بسبب خواته اللي دگلي صفگة ووگفلي وگفة لأن شبير مخليني أكمل خاصة الجبيرة
رادن بكل وسيلة يگلبن شبير عليَّ حتى يبطلني بس هو جان ممهتم الهن يسمع منا ويطلع منا مياخذ بحجيهن
من شافنه ممعبرهن گامن خابرن عمهن الجبير بلغنه بالصار وگعدن يشكن من اخوهن شنو مرته تداوم
گام عمهن جاي لبيتنا جنت اني توني راجعة من دوامي
شبير جان بالشغل تلگته هيام سلمت عليه وباست راسه
گعد بالأستقبال وهيام يمه وصتني أسويله چاي
وگفت بالمطبخ وماما يمي سوت الچاي عني وصبته
اجتي هيام أخذته وقبل لتطلع گالت
هيام :- تعاي شدن عمي سلطان يريد يحاجيج
حجتها ومشت باوعت لماما عينها وراها
گتلها :- راح تطلعيله
شدن :- أطلعله ولويش ما أطلع امشي جيبيلي شال أخليه على راسي
ركضت جوة جبتلها ورجعت شمرته على راسها ومشت للأستقبال واني وراها
دخلت گالت :- السلام عليكم
جان گاعد ديشرب بالچاي نزل الاستكان وعينه صارت عليها سوالها فحص سريع رد السلام وأشرلها تگعد
سلطان :- تفضلي ام منو گتيلي
گعدت وردته :- ام بان عيني
- ايه الله بالخير عليج ام بان
- الله بالخير والعافية گالوا رايدني بحجاية
- اي والله جان المفروض أجي من زمان ونگعد بحضور أبو البيت بس بعد تريد تصير
- تفضل دا أسمعك
- دحگي انا ما جنت رايد أتدخل بس السالفة طلعت من ماعونها فدار صار ما يحشم أحد ولا ياخذ شور أحد يتصرف من راسو أول ما بداها گام زوج شبير لبنتج وطمطموها بيناتهم بدون لا يرجعلنا وسكتنا وبلعناها
عيني بعين ماما اللي گاعدة تسمعله
كمل كلامه :- رد وعمل الأكبر منها عقد عليج وجابج لهين حطج شريچة لحرمتو وأم ولدو وهم ما شاورنا بالسالفة أريد أعرف انتِ شرايدة وين تردين تصلين بهالزواج
- شنو يعني شرايدة شفتهم من هالكلام اني
- احجيلي من الأخير تردين فلوس ننطيج شگد رايدة بس خربي الزواج واطلعي من حياتهم
- شهالحجي هذا واني شنو ماخذته على طمع رجال إله وگفات وياي متنعد ولأنه زلمة وابن حمولة ما راد تطلع حجاية مو زينة عليَّ طلب ايدي للزواج واني قبلت
- هذا الحجي عبريه على فدار مو عليّ إذا هو معمي احنا عيوننا مفتحة ندليه الصح من الغلط وزواجو منج جان أكبر غلط هجمتي بيتو ودرتيه عن عايلتو وعيالو
- وهيج فدار بلا شخصية حتى يمشي بكلمتي ويعوف مرته وياخذني شو انتوا تدرون بزواجاته المنقطعة اللي ببغداد مشفت واحد بيكم فتح حلگه بس من أخذني دائمي واستقر وياي معجبكم وصرت هاجمة بيته
- عجل دورة وجهو عن عيالو شتسميها إذا مو هجمان بيوت
- مو هيج الحجي أخوية مو هيج علاقته بولده عين الله عليها هو يحبهم وهم يحترمونه ويحسبوله ألف حساب بس علاقته بمرته اني مالي دخل بيها والسمعته هو وياها من زمان مو صلح واحد عازل روحه عالثاني
- هالحجي ميصرفلي وگعدتج هين صارت ثگيلة بعد من يرد فدار للرمادي تفاتحينو بموضوع الطلاك منج إلو خاطر تطلع الحجاية منج انتِ ما راح أتدخل انا
- أخوية انتَ أحد دازك عليَّ موصينك شنو فلمك
- لا أحد دازني ولا غيرو ما نعرفج يا بنت الناس عجل هي گوة ما نريد الغريبة احنا عمام وگرابة وبيناتنا وهم أجيج من الأخير ولا تزعلين مني انتِ وبنتج مشكوك بأمرجن لا أهل لا دين لا بعاداتنا شعدجن بهالشمرة
- احترم نفسك شنو بلا دين دتكفرني انتَ
- عجل ما جذبت گاعدة عتتراددين ويَّ زلمة طول بعرض لسانج لسان دلالة منو التعملها غير البلا تربية
گامت وگفت :- اتخسى بلا تربية شنو شفتني جاية من الشارع لو مالي أصل خلي ببالك ترى بيوم العقد عليَّ فدار جان العقد بعلم أخوي مطالعة من فطر الگاع
- وإذا هيج أصلج مشرف عجل وين أهلج عمامج اليگعدون گعدة زلم ويحجون بزواجج من أبو مؤتمن عش هيج أخذج سكتة وجابج لهين بليلة ظلمة
- عقدي گعدوا بيه زلم حوك وناس كبار من السادة جانت شاهدة على زواجنا منو انتَ حتى تنكر وتشكك بأصلي وأصل بنتي
گام وگف على حيله :- دحگي يولي انا هالحجي ما يوكل خبز عندي تسوين الگتلج عليه بالحسنى لا تجبريني انا أتصرف من كيفي وأخربها
- اني يجي فدار وأگله بالحجي الگلته وأخليه هو يتصرف وياكم بعد
- عتهدديني ولج انا تالي عمري وحدة ساقطة مثلج تگف بوجهي وتهددني بفلان وعلان
- لحد هاللحظة اني دا أحجي وياك بكل إحترام ومتجاوزت عليك بكلمة ولا قللت من إحترامك وانتَ من أول مگعدت تطعن بشرفي بصورة غير مباشرة واني ساكتة إحتراماً لزوجي وزوج بنتي مو غير شي إلا جان عرفت شحجي وياك ولصمتك على حلگك
تخبل شلون حجت هيج هم عليها راد يضربها صارت بوجهه هيام وگفت گدامه تتوسله ولازمته
هيام :- عمي أندارلك فدوة استهدي بالرحمن وگول يا الله لا تلح وياها وتوصخ لسانك وياها وحدة ساقطة
- ولج تسمعيها عتهددني وتتجاوز عليَّ تالي عمري
- امسحها بوجهي فدوة لا تتگاون وتتخارب ويَّ خالي من وراها بس يجي لهين احجيلو الصار وهو ما راح يرضى على كلام حرمتو ويطلگها ونخلص
گوة لزم روحه عنها وصار يتوعدها
سلطان :- هين يشدن
- جنت ام بان وصرت شدن ميخالف سهلة هاي
لف عبايته وهَم يريد يمشي قبل ليندار اجت عينه عليَّ
صاح :- وبنتج هاي تردين تسترين عليها وما تهجمين بيتها تگعديها من دوامها لا تخليني أتصرف من كيفي
حجاها وطلع من البيت
شدن :- ها شحنتنه تكيفن يعني من تهجمن بيت أخوجن ومرته شنو هالحقد الشايلاته شسوتلجن
تخصرت :- نورجان مو حرمتو وعمرها ما عتصير چنة لبيت عزام حرمة شبير موجودة ذيج هي ببيت عمي منتظرة الساعة النروح تانطلبها إلو
- وشبير يدري بهالحجي
- يدري ما يدري لا تفرحن زايد زواجهم ما مطول مثل ما لفيناجن من الشارع نردجن للشارع بحجاية وحدة ما تدوم الجن
حجتها وفاتت جوة أباوع لماما حالها انگلب شفتها ترجف والوجه صار أصفر عيونها صارن دم
مشت للغرفة واني أمشي وراها تناوشت تليفونها وگعدت عالجرباية تخابر وتهز برجلها بأعصاب
رد گالت :- فدار شوكت تجي مبية شي بس گلي شوكت حتجي
جان مبين بنبرة صوتها مخنوگة سكتت شوي تسمع الطرف الثاني متحملت صارت تبجي وسولفتله الصار
هو من سامعها تبجي وشلون متجاوزين عليها مهديها وساده منها گلها :- انا أتصرف
مشيت للمطبخ ورجعتلها بيدي گلاص مَي انطيتهيا
شربت شوي وعافته عالميز گعدت يمها مدنگة ألعب بأظافري دمعتي بعيني محجيت كلمة انتبهتلي
جرتني لحضنها باست خدي :- معليج بيهم خليهم شيردون يحجون مراح يصير الموال البراسهم
باوعتلها :- ماما شوكت نرتاح
ضلت ساكتة تباوعلي تحسرت :- ما أدري ماما
- مليت وين مندور وجهنا بس مشاكل الكل مرايدنا كلهم مستثقلينا عندهم خالو فؤاد وعمو سالم وهسه هذولي
- الله كريم حبيبتي ربج ميگطع فدار ممقصر ويانا صار بوجه أهله علمودي وشبير مينطي بيج گدام أحد شعلينا بالباقين حجوا والما حجوا
خليت راسي بحضنها لازمة ايدها وهي تلعب بشعري
بهالأثناء عمو فدار مخابر عمهم سلطان ومعاتبه بالحجي اللي مسمعه لماما وهذاك گالب الحجي ومسويها هي المتجاوزة عليه وطاردته من البيت
مفتر راسه گام راجع مخابر هيام يتأكد من الحجي وهاي زايدة منها كلام وصايرة بصف عمها على ماما
لليل اجى الخال فدار للأنبار عيونه جانت بگصته صاح على ماما گاملته للأستقبال وصار صياح بينهم
فدار :- تطردينو ولج بيتج هو وتطردين انتِ
فتحت عيونها :- مطاردته منو موصلك هالحجي
- لا والله وسالفة التجاوز هذا شنو فلمو رجال طول بعرض شنو انتِ واگفة عتتلاسنين وياه كلمة بكلمة
- متجاوزت فدار لتگلب الحجي مصار كلام غير الگلته الك بالتليفون والموصلك غير هالحجي يريد يخرب
صاح :- هيام وينج
اجته تركض من جوة
هيام :- هلا خالي
- شلون تگليلي هي متلاغية وياه وطاردتو من البيت
باوعت لماما ردت :- اي ما جذبت هي لسانها گام عيشمر حجي على عمي لا احترمت عمرو لا احترمت شيبتو لا خلتلك الك إحترام واگفة ترادد وياه بالحجي
اندار لماما اللي اجت تنجلط من كلامها وكذبها
شدن :- اني حجيتلك الصار ومكذبت بكلمة
- عجل انا جذابة يعابيني الله لو جذبت عليك بكلمة خالي
فدار :- ها وتحلفين عالقرآن هي طاردتو من البيت
ارتبكت وضلت ساكتة وصله الجواب وهز راسه
اندار لماما :- امشي لمي ملابسج بعد مالج گعدة هين
باوعنا وحدة بوجه الثانية متفاجئات
- وين أروح لعد
- وين ترحين يعني يمي بالبيت يلا خلصيني بساع
- اي شبيك تصيح احجي على كيف أسمع ترى
باوعلها صفح طالعة روحه :- رايح ساعة ورادلج ألگاج مخلصة
حجاها وطلع من البيت هيام وگفت تخصرت عالباب تباوعلنا على وجها ابتسامة حقيرة مال وحدة متشمتة
راحت ماما لغرفتها متضايقة واني وراها وگفت بالباب
نورجان :- لترحين ماما
باوعتلي وهي تطلع بالجنطة خلتها عالجرباية
- مدتشوفيه شلون صاير أعصاب مالي خلك أعانده وتالي أطلع اني الخسرانة ادري بيه حطها براسه بعد
- وتعوفيني هنا أروح وياج
عافت الملابس من ايدها واجتني
- وتالي نورجان اكبري ماما انتِ مو صغيرة وأگعد أعلم غير ملزومة ببيت ورجال شلون آخذج وياي
- ما معلية
حجيتها ودموعي نزلت جرتني لحضنها تهدي بيَّ
- وين رايحة اني يا ماما على گولتهم گعدتي هنا من البداية غلط فدار رجلي مكاني يمه مدامني گاعدة ببيت مو بيته مجبورة أسمع وأعبر واني الممنونة
- خلي تولي اني أحجي لشبير أخليه يطردها بس لترحين عليج الله ابقي هنا يمي
- صعبة ماما والله گعدتي هنا صارت صعبة وهالمرة اجت من فدار هم مو هينة عليه يسمعونه حجي واني على ذمته ميتحمل أحسن متكبر خليني أروح وياه
كملت تسفط بملابسها بالجنطو واني على بجية وحدة مگاعد أتخيل البيت هذا بدونها تعودت على وجودها هنا
يا بشر والله مو بيدي
خابرت على شبير بالبداية انطاني رفض ورى شوي هو خابرني فتحت خط بسرعة سمعني أبجي حجيتله الصار
شهگت :- شُبير عليك النبي گول لخالك لياخذها والله ما أتحمل بدونها
شبير :- ما أگدر يولي حرمتو محد إلو كلمة عليها غيرو منو انا وأروح أعترضو وأگلو يخليها
- لخاطري حباب
سمعته يتنهد ويستغفر :- كافي حبيبتي كافي ول ابوية عش هالبجي هذا موتي روحج
- ما أگدر شُبير مو بيدي محد گاعد يفهمني اني مصدگت ترجعلي وتبقى وياي تالي تعوفني هيج
- فاهمج والله أعرف شگد معلگة روحج بيها بس انا شبيدي قابل حتى لو حجيت خالي ما راح يرد لكلامي
قبل ليسده گال :- كافي يلا غسلي وجهج لتخليها تطلع من البيت وانتِ بهالحالة جدامها تخلين بالها وياج وتروح وهي ما مرتاحة
سديته منه وسويت الگال عليه بس شيسكت دموعي
لشوي اجانا عمو فدار وگف منتظرها برة يم سيارته
سحبت جنطتها وطلعت للگراج شافها اجى أخذها منها وداها للسيارة صعدها ليورى عينها جانت وراه
شدن :- شوفيه شلون متنك ومطنگر تلگينه رايحله ومتعارك وياه وسامعله كم حجاية گالبته گلب
لزمت وجهي باست عيوني :- اروح فدوة لعيونج كافي بجي لتخلين گلبي معلك عليج ماماتي وين رايحة اني قابل والله اخلي شبير يجيبج لهناك كم يوم واني هم كل فترة اجي ويَّ فدار لهنا
- وعمو سالم وتهديده نسيتيه
- بكل عقلج فدار يخاف من سالم وتهديداته لتخافين مراح يخليه يوصلني لا هو ولا غيره
- هم ممرتاحة وراح أضل خايفة عليج مدامج هناك
فدار :- وتالي لج راح تعرضيلنا بروحتنا عليمن هالبجي
باوعت شفته واگف وراها تقرب گرص خدي
- كافي ول يالمزعط شنو بزر انتِ وتبجين ورى امج
مسحت دموعي شهگتي بصدري باوستني ووصتني هواي حتى أدير بالي على نفسي ودراستي وطلعوا
من حركوا وشفت سيارتهم ابتعدت متت بجي گعدت بنص الگراج نصبت مناحة اجتني هيام وگفت يم راسي
هيام :- دكافي عاد بلا عيارة اليدحك بجيج يگول امج ميتة
گمتلها بأنفعال من بين دموعي
- اسم الله عليها عليش مفاولتها بالموت
- عجل عش مگطعة روحج بالبجي
- معليج انتِ
شلت بزونتي من الگاع وعفتها ودخلت جوة
من اجى شبير جان تعبان واني فوك راسه أهذي حجي وأشكيله طلعله ملابس واجاني وگف گدامي
شبير :- وهاي انتِ من ساعة ما خابرتيني ولهساع على هالبجية
هزيت راسي وسحبت نفس جرني لصدره
- سودة عليَّ
هدأت شوي وهو يحجي وياي أخذ ملابسه ودخل للحمام يسبح طلع رأسًا ذب روحه عالجرباية تعبان
نام على بطنه فتح عيونه صرت گدامه عقد حاجبه
شبير :- يعني وتالي نورجان ترى ما گالوها هيج
- شعليكم انتوا اني أريد أبجي
صاح :- عجل ابجي منو گاضبج بس اكتمي صوتج لأن مسطور وراسي يريد ينفجر خلي أنام جم ساعة خيلي مهدود من الصبح ولهساع
من گمز بوجهي هيج متت قهر گمت منه
گتله :- حتى انتَ صاير مثلهم متتحملني
حجيتها وطلعت من الغرفة نزلت جوة طلعت للگراج مخنوگة أريد هوى گعدت على صبة ودنگت راسي
دقايق وحسيت بحركة وراي انداريت بسرعة
- الصفرة إذا انا ما أتحملج منو اليتحمل نغوصتج عجل
رفعني من ايدي مسح دموعي وباس خدي
نورجان :- مخنوگة
باوع لرجلي ولروحه گال :- امشينا تاطلعج أفررج بالسيارة بس البسيلج نعال برجلج وجيبيلي وياج السويچ وتيشيرت من جوة
مصدگت رحت طايرة طالعة روحي من البيت كُلش الجو بيه كئيب أخذتله تيشيرت وسويچه وطلعتله
الدنيا نص الليل والساعة قريب الوحدة
أخذني بالسيارة فاتح الشبابيك الهوى يلاعب شعري
الشارع فارغ وهو يمشي سريع أحس الهوى يريد يطيرني گد ما قوي وگف السيارة على جهة من الطريق
ارتاحيت شوي بس القهرة بعدها تحز بخاطري
فتحنا البيبان ونزل اجاني من جهتي اخذني فتح الجنطة وگعدنا اثنينا نسولف ونفضفض واحد للثاني
خليت راسي على كتفه وهو مال راسه على راسي
شبير :- يول طفيتي جن بيج نومة گومي نرجع لبيتنا
- هسه حباب بس شوي
- الباجر وراج دوام تأخر الوكت يلا ولج
گام ومدلي ايده صعدنا بالسيارة راجعين للبيت
نورجان :- شُبير عادي تخليني أروح أشوفها مو
- ميخالف سهلة إذا على هاي يمتى متصيرلي روحة آخذج وياي
- خالك بعد ميخليها تجينا
- نعلعلة روحو لخالي دخليني أگضبو إلا ألعب بسطالي على راسو
- قهرني شُبير
- أشعل أصلو والله كلشي إلا انتِ
باس ايدي وگال :- كافي حبيبتي كافي يعيوني مو سگطتي عيونج
رجعنا للبيت وبوجهنا لغرفتنا اثنينا ذبينا روحنا بتعب
ثاني يوم من رجعت من الدوام لگيت هيام مخبوصة بالمطبخ واگفة عالطباخ والمطبخ مگلوب صاير خبصة
سألتها :- شكو اليوم ليش كل هذا الطبخ
هيام :- عزمت خواتي وبنات عمومتي لهين عالغدة
حجتها والتليفون على اذنها ملتهية تخابر
عفتها وصعدت لغرفتي بدلت ملابسي وغسلت ونزلت أريد آكل أسد جوعة بطني أخذت ماعون ومشيت للگدر
توني مديت ايدي صاحت من وراي فززتني
- لا لتمدين ايدج على هذن طبختو للبنات
انداريت عليها :- لعد شآكل
- شدراني سويلج أي شي سريع واكليه انگسم ظهري من الصبح واگفة
- بس ماعون على گدي مراح آخذ هواي
حجيتها وانداريت فتحت الگدر محسيت إلا ايدي تنجر حيل وگع الماعون من ايدي صار طشار بالگاع
لزمت صدري مفزوعة باوعتلها بخوف :- شبيج جفلتيني
ضربتني على راسي بچف ايدها
گالت :- وعمى حتى عمى شبلاج انكفختي مو گتلج لا تگربين لذن الجدورة شنو هالنفس الدنية العندج
باوعت للگاع :- لمي الگزاز فضيني الجهال عتفتر هين لا تتجرح رجليهم
حجتها وطلعت من المطبخ
الغصة صارت بصدري دموعي صارت تنزل عشرة عشرة أريد بس أسيطر على روحي مگدرت متت قهر
جبت مكرافة ومكناسة صغيرة لميت الگزاز من الگاع وذبيته بالزبل غسلت وصعدت فوك مختنگة
دقايق وفتحت الباب عليَّ رفعت راسي أباوعلها
هيام :- شو انتِ هين دگومي حدري جوة عاونيني ايدج وياي تانكمل گبل بوكت البنات على جية
حجتها واندارت بسرعة نزلت منطتني مجال أردها
مسحت دموعي ونزلت وراها استلمتني تتأمر فوك راسي سوي هيج وحطي هيج اشتغلت وياها بلا صوت
اندك الجرس مسحت ايدها وطلعت تتلگاهن دخلتهن للصالة صار صوت بالبيت وسوالفهن وضحكهن
واني على ضلتي بالمطبخ الأكل مصبوب گامن بس ينقلن بيه عالسفرة وتجمعن كلهن بالصالة ياكلن
واني وگفتني عالچاي لا يحترك
طفيت النار وأخذتلي ماعون باوعت من الباب ما هيَ رجعت للطباخ صبيتلي أكل ووگفت آكل عالسريع
كملت وغسلت ومشيت صاعدة الدرج أريد أروح لغرفتي متعلمة بالصباحي بس أرجع انام للعصر يلا أگعد
صاحت وراي :- وين عيني حبيبة
انداريت عليها :- ها
- انزلي كفي المطبخ عجل هاي المواعين منو اليغسلها
- دايخة خليني بس انام ساعة وأگعد أغسلهم
- دنزلي تنام تايضل البيت بجيفتو
نزلت أباوع السنك متروس گدورة الكاونتر عليه تلال مال مواعين حصرتني البجية ردت بس أنام
كفيت رداني وبديت أغسل وأجلف وهن عشيرة محد بيهن كلفت نفسها تجي تعاوني بغسلهم
أسمع صوت ضحكهن جاي من الأستقبال حزت بخاطري
من ماما جانت هنا أرجع بس آكل وأبدل وأجرها نومة ألگى الأكل جاهز والبيت متنظف واني أجي عالحاضر
نزلت دموعي هاي بعدنا أول يوم ماما مو وياي وهيام استلمتني شلون حتخلص وياها على هالحال
فوك الساعة واني على وگفة الوحدة
دخت حيل صرت أشوف الواحد اثنين لأن منايمة
رتبت المطبخ ونظفته صار يلمع هن بعدهن على گعدتهن
دا أصعد وصاحن :- نورجان
111 تعليق
رحت أشوفهن وحدة من خواتها أشرتلي على ابنها
گالت :- فدواتج حبيبة بس اخذيه غسليلو دمر ملابسو
أخذته من ايده ووگفت عالمغسلة غسلتله ورجعته لأمه
دا أمشي رجعن صاحن :- نورجان
انداريت :- ها منو صاحت
بنت عمها رادت گلاص مَي رحت جبتلها واني بالمطبخ صاحن مرة اللخ وراي مشيتلهن أشوفهن
لگيت واحد من الجهال تالف التخم بالككو يردني أنظفه
وگفت بمكاني أخذتلي صفنة عليهن جريت نفس طويل ودرت وجهي وصعدت بوجهي لغرفتي تمددت عالجرباية
اجت عيني عالساعة لگيتها بـ5 گمزت من مكاني
غمضت وفتحت أحاول اتأكد شو بسرعة مر الوكت
باوعت على حالي هسه بس أنام ما أگعد لليل شوكت ألحك أكمل دروسي
أخذت ملابس ودخلت سبحت بمَي بارد ثلج
طلعت مصحصحة وگفت أنشف بشعري گبال المراية
اندك الباب رحت فتحته طلعت مريم الصغيرة بنت هيام
مريم :- ماما تريدج
- هسه أجي
مشطت شعري وضفرته نزلت جوة اجيت أنجلط من شفت البيت قايمة بيه حرب والمطبخ العفته يلمع لگيته على حاله الأول قبل التنظيف
خطارها راح فاتت للبيت صارت بوجهي
هيام :- اي نزلتي بوكتج لملي البيت ونظفيه منا ومنا أحس ظهري وگف من الصبح ولهساع أروح أمدد
عافتني وراحت دخلت لغرفتها ضليت صافنة وراها
صرت ألم بالهوسة وأبجي نظفته بالمكناسة الكهربائية ومسحته بالماسحة ونشفت الگاع لحد مخلصت اني طالعة روحي
طلعت كتبي طشرتهم الدنيا صارت ليل واني لهسه لا قارية ولا مرتاحة ولا نايمة ودا أحس حيلي مهدود
گابلت الكتب وگعدت أبجي تخربط روتيني من وراها
خابرت على شبير أشكيله گال :- لمي كتبج وتهيري روحي يم در اقري دروسج وغيري جو
سويت مثل مگال بس مخنوگة حيل
اجتني مريم گالت علي جوة يريدج
نزلتله أخذ مني كتبي واني شايلة البزونة صعدت وياه بالسيارة ومشينا لبيت عمو تيم
شافني ضايجة گام يشمر عليَّ بكلامه التافه حتى يضوجني وأرد عليه وصدك سواها وگمت أرادده
وصلنا لهناك دخل السيارة مال أبوه للگراج وفتنا للبيت
تلگتني عمة شيخة شمرت روحي بحضنها شبكتها حيل
شيخة :- اسم الله الرحمن شبلاج ولج
- مشتاقتلج عمة
باوعت لوجهي عگدت حواجبها :- شبلاها عيونج حمرة باجية ولج
ضليت ساكتة أخذت كتبي ورحت يم در گعدنا نسولف وحجيتلها عالصار اليوم وعمة گاعدة على جهة تتسمع وتستغفر معاجبها الكلام
طلعنا گعدنا بالحديقة وعمة شيخة حطتلنا رگي وخبز
استغربت :- خبز ورگي
در الزهراء :- طيب والله بس ضوگيه تدمنينو عمتي علمتنا عليه
سويت مثلها خليت رگية بالخبزة وأكلتها متت بيها مدري اني جنت جوعانة لو هي صدك جانت طيبة
اجانا علي
علي خيبر :- عمة شو عصرونيتج صارت بالليل
- لخاطر البنات اشتهيت الهن أكلة حالية اگعد ويانا
جر كرسي وگعد شاركنا أخذتنا السوالف والتهيت وياهم
علي جان المفروض هالسنة مرحلة أولى جامعة بس حسب ما فهمت من در مأخرينه سنة بالتسجيل
واني المفروض سادس بمكانه بس گعدونا من المدرسة من جنا ببيت عمو فدار وراحت علينا سنة اني وبان
علي :- يول سنوح
- ايع شنو سنوح شنو هالأسم
- والله يمتى ما أدحگلو ألگاه مسنح
- لا عفية لتخرب اسم ابني اسمه أليستر
- بزونج اسمو مثقف
- اي على أمه
باوعتلها صدك مسنحة عالحشيش رايحة روحها
گتله :- ما أدري شبيها صار كم يوم هيج متتفاعل وياي
- خاف طالب تزاوج
- شنو يعني
- عريس وعروسة
عمة خزرته وصاحت بيه گلها :- عجل شلون أفهمها
- عزة لا وين بعده صغير مو هسه أزوجه
- يمان عندو بزونة مربيها بس ذيج مال شارع مرگصتهم بالبيت عود مثل العندج خانس
- وآخذله بزونة مال شارع لا عيني أريدله وحدة مثقفة مال بيت بنت عالم وناس
- وتنظف وتسوي مندي وتعرف تخبز بتنور طين أدري شماخذتلج متگليلي
- أي أهم شي مترباية وهادئة لأن ابني مربى
- مربى تين
- شگد قديم وتافه
باوعت لدر خربانة ضحك گالت :- لا تدحگين هيج والله تضحك
حاولت أكتم ضحكتي مسيطرت ضحكت وياها عالواهس وعلي يباوعلنا ويهز بيده
خابر على يمان گله لگيتلكم عريس لبنتكم جيبها وتعال وهذاك مكذب خبر ربع ساعة واجانا شايل بزونته
سلم عالواگف وهو شايل بزونته
يمان :- وينو العريس لو عتضحك عليّ
- لا والله هذا شوفو رايد أجمع راسين بالحلال بزون بيت عمي طالب القرب منك ورايد بزونتك بالحلال
41 تعليق
يمان :- شو بلة
باوع عليه گال :- شو بزونكم حلو احنا ميصرفلنا بزونتنا تحب الوصخين
- النوب هو الما عاجبو غير بالگوة قنعتهم
- يلا ميخالف بس خما عندو سوابق
نورجان :- لا ترى مؤدب ابني
- نظراتو مو راحة
- لا والله مؤدب شوف شلون گاعد عاقل
علي خيبر :- هسع عش تخلينا نحجي شو بزونتك ماكو أسقط منها والمنطقة تشهد
- اي بالله كارثة النوب كل يومية عابرة على بيت تدور بزازين
- دسكت جان عدنا واحد بالحديقة يدور بس مطلقات
نورجان :- عزة حتى البزازين يطلگون
- دستلم
باوعوا واحد للثاني وضحكوا من جوة ليجوة صاحت بيهم عمة سكتتهم خلصت الگعدة وياهم تونست حيل
لحد ما اجاني شبير نزل من سيارته شافنا على گعدتنا
رفع ايده سلم وباس راس عمته وباوعلهم
شبير :- خيركم اليوم مجموعين هين
علي خيبر :- عالخير عمي يوم التدحك بزازينهم بحضنك
- غير يحجي عدل راح أكسر سنونو بحلگو
- خطبنا لبزونكم مرة
- منريد خربوا الخطبة مرة ومن يمان متنراد
يمان :- مع الأسف عليك خالي وانا اجيتكم متعني لهين
- دنطم وگوم توكل لبيتكم دحك الساعة امك وخواتك لوحدهن بالبيت
صدك گام سلم وراح وأشرلي حتى أگوم دخلت جوة أجيب كتبي من غرفة در لگيتها گاعدة لوحدها
37 تعليق
نورجان :- عود ليش دخلتي جوة من اجه يمان والله تونسنا
- لا هيج مرتاحة ما ردت أتقيد بالشال بوجودو
باوستها أخذت كتبي ودا أطلع استوقفني صوت عمة شيخة وهي واگفة تسولف ويَّ شبير يم باب المطبخ
تقربت عليهم وأسمعها تگله
شيخة :- ما يصير عمة مرتك صغيرة وفقيرة ما تگدر عليها انتَ اگضبها حاجيها گلها ما يجوز تعامل البنية هيج لو تدحك وجها ساعة الأجتنا مملوصة البنت
- شسويلها يا عمة أطردها
- هسع انا گتلك تطردها شبلاكم واحدكم ما ينطي بيهن هالگد لو جانن فرعون اختك غلطانة والغلط راكبها من راسها لحدر رجليها لتخليها تاخذ راحتها زايد ببيتك ترى كلها خلك خطار ومرجوعها لبيت رجلها
تنهد :- الله كريم
- والله تنهيدتك ما من وراها رجية عوفلي موضوع هيام عليَّ انا أحاجيها أعرفك ما ترضاها لأختك خاطر ما تشيل بخاطرها عليك
صاح من جوة :- يلا نورجان وين صرتي
طلعتله بسرعة سلمنا وطلعنا رجعنا لبيتنا
صعد قبلي للغرفة واني دخلت البزونة لقفصها وكت نومها سمعت صوته يصيح عليَّ من فوك رحت أركض
وصلت للغرفة وقبل لا أحجي اجت عيني على ملابسنا التارسة الگاع قمصانه ودشاديشه البيض وقمصاني اني مال مدرسة مكومات وفوگهم مكياجي متكسر
أشرلي عليهن :- هاي شنو
- ما أدري
- شنو المتدرين مكياجج شوصلو للملابس البيض عش هيج كل الملابس ملغمطة
- والنبي ما أدري من طلعت مجانوا هيج كُلشي مرتب
- عجل أبوي طلع من گبرو وسوة بيهن هالشكل مو بلة
اختنگت من نبرته الجافة :- لتصيح شمدريني اني يجوز الجهال دخلوا للغرفة من طلعت ولعبوا بالغراض
- ومن تعرفين أكو جهال بالبيت غير تسدين باب غرفتج وتقفلينو بالمفتاح ليمتى تبقين بهالثول
طلع ملابس وراح للحمام ضايج استهضمت من حجايته
لميت الهوسة وخليت الملابس بالسلة مكياجي الخربان ذبيته والباقي مسحته بوايبس ورجعته لمكانه
أخذت سلة الملابس ونزلت للحمام الجوة الغسالة صايرة يمه عزلت الملون عن الأبيض نگعته بقاصر ومَي وبديت أفرك بالملابس دموعي مسكتوا طول ما أشتغل
المحيرني جهال هيام مؤدبين غرفتي ميوصلونها وميدخلون إلا يدگون الباب عليَّ مو عاد واني طالعة
اختنگت من الريحة مال منظفات وتعبت ايدي من الغسل الأبيض مكروه إلا بالأيد يلا ينظف
عفت من ايدي ودنگت راسي أشهك بالبجي
اجاني صوته من وراي :- هسع عش هالبجي
انداريت عليه دموعي مغورگة مرديت ورجعت أكمل
شو هذا محسيت عليه إلا داخلي للحمام كاف بجامته للركبة صار فوك راسي أشرلي بيده يريدني أگوم
- شتريد
- دگومي وانا أگلج شريد
وگفت على حيلي أخذ مكاني وگعد هو يفرك بالملابس ضليت صافنة عليه ممستوعبة رفع راسه يباوعلي
ومستمر يفرك بيده :- امدة الملابس اللي تبجي عيونج الصفر يولي
زدت بجي شمرهن من ايده وسحبني گدامه
- مو قصدي أصيح عليج وعيونج جانت أعصابي گابة
- اعتذر
ابتسم :- انا آسف
- بعد مرة
- آسف يابا
- بعد وحدة لخ
- آسف تربيع وتكعيب وبشهادة الكلفة بعد
ضحكت ومسحت دموعي جر ايدي باسها ورجع يكمل
شبير :- بس دحگي بشرفج شلون زوج انا ضابط وشيخ واغسل مواعين وهسع ملابس تگعدين تسجدين صبح ومسى ما تحصلين رجل مثلي
صرت أعاونه هو يجلف واتي أشطفهم بالمَي وأحط بالتجفيف خفف عليَّ بسوالفه وصار الشغل وياه ونسة
شافتنا هيام وگفت بالباب صارت تباوعلنا
هيام :- يا خوية عمت عيني عجل انتَ گاعد تغسل ملابسك بيدك
اندارلها بنص إلتفاته :- شكو بيها نتعاون انا والمرة تانخلص بسرعة
- سودة عليَّ بدال لا تجي تگعد ترتاح تمدد وحرمتك تگوم بيك تدور راحتك جاي عتشتغل عنها
- فدوة بيها التعب
- عجل احنا المن زوجناك إذا هدومك تغسلهن بيدك وأكلك برة البيت شبقى بعد
- وشنو انا ماخذلي مرة لو خدامة شلون حجي هذا
- لا مو قصدي هيج
- انا مرتاح هيج أعاونها وتعاوني ماكو فرق
تنهدت :- شحجي بعد إذا القاضي راضي
- بالضبط بديتي تفتهمين
ضاجت من رده دارت وجها ومشت باوعلي وغمزلي
كملناهن كلهن وأكو بيهن تلفن فد مرة گال ذبيهن ميسوّن وشريت الباقيات عالمشر صعدنا تعبانين
بدلت ملابسي تنگعوا وهو هم ونمنا راسي على صدره
بعز نومتي وفزيت على ايده وهو يهزني ينده بأسمي
گعدت أفرك بعيوني وأباوع للساعة بـ3 الفجر
نورجان :- شكو
- گومي يولي مو تردين تشوفين اختج
فركت راسي أريد أستوعب
- حبيبي شبيك حلمان
ضحك :- گومي لج حلمان شنو صدك تاحجي تحضري تانطلع لبغداد
فزيت بسرعة لزمت ايده :- احلف
- وحك الملابس الغسلتهن
- لا صدك
- يابا والله رايحين لبغداد خابرني خالي گبل شوي گلي آخذج وأروح تاتشوفين اختج
- لگيتوها
- وشنو هي ضايعة تانلگاها غير يم زوجها
- وقبل نشوفها
- قبل اليوم بالليل تجي لبيت خالي هي وياه واشبعي شوف بيها
طفرت من مكاني ممصدگة غسلت وجهي وبدلت ملابسي لبست جينز وبدي تعلاگة فوگاه سترة بهارية
طلعتلي جنطة وگمت اجيب واخلي بالملابس فات شافني گال :- ها يول ها وين رايحين كلها يوم رايحين ورادين اخذيلج قطعة وحدة بدلي بيها هناك
- صدك بس يوم
- اي منتعطل هناك عندج دوام وانا عندي شغل
- يعني اليوم أغيب
تنهد :- خوب انتِ الغياب عندج مثل السلام عليكم غيبي
تحضرنا ونزلت تفاجأت بهيام گاعدة هي وجهالها بعيونهم النعاس قفلنا البيت وأخذناهم لبيت عمو تيم
وطلعنا بطريقنا لبغداد
وصلنا هناك الصبح جانت هستوها صايرة بـ7
طبك السيارة گبال بيت خاله نزلت أركض فتت قبله بابهم مفتوح دخلت جوة صارت بوجهي ماما
حضنتها حيل وباوستني تشم بشعري
شدن :- اوف يا ريحتج ما أعرف البارحة شلون مر اليوم عليَّ بدون ما أصبح بوجهج
- اني هم كُلش افتقدتج واليوم مر بسنة البيت محلو بدونج
باست خدي وحاوطت رگبتي من ورى صارت بظهري
گالت :- شوفي كله من ورى مفرق الجماعات هذا
واگف گبالنا عمو فدار بكامل قيافته من حجت هيج ضحك سلمت عليه وفات شبير تلگوه سوينا ريوك اني وماما وگعدنا كل احنا ناكل
البيت سوالف وضحك وشقة شبير ويَّ خالة وضحكة ماما اللي كل شوي عمو فدار خازرها من وراها
حبيبتي أحسها خفيفة مثل الريشة گد مفرحانة
وگفت أغسل المواعين وياها بالمطبخ وشبير وخاله برة
نورجان :- شلون عرفتوا حيجيبها
- تيم رايح لبيت شاكر وگاعد وياه بوجود عبد ومتفقين يجيبها هنا لبيت فدار حتى أشوفها ومن عرفت وصيت فدار ينطي خبر لشبير حتى يجيبج
- يعني مراح تضل ويانا
تحسرت :- ما أدري يماما بس دخلي تجي طك گلبي عليها وكلام الله
《 شهربان 》
عيني عليه واگف گبال المراية يدگم بقمصيه ويلبس بساعته مشط شعره بأيده رجعه ليورى رش عطر
صارت عينه عليَّ بأنعكاس المراية
جنت گاعدة بزاوية الغرفة أطرافي كلها ترجف ملابسي الداخلية متناثرة بالگاع لابسة بس الثوب
اندار اجاني رفعني من الگاع وجهه بوجهي
عبد الإله :- كل عقلج أعديها الج وللأنباري بلا حساب
بللت شفايفي اليابسة :- ما عندي شي وياه
- لا صدك
نتر ايدي حيل عدل ملابسه :- سهلة اني إله گتلج إلي يوم وراح أحظى بيه هو وخاله مرة وحدة
مشى للكنتور طلع مسدسه مشيتله لزمت ايده أتوسله
- عبد شتريد تسوي حلفتلك والله ما عندي شي وياه
نتر ايدي :- اششش انگبري هنا بلا صوت
حجاها واندار يطلع مشيت وراه أصيح عليه ما رد دفعني ليورى وسد الباب قفله عليَّ بالمفتاح
گعدت للگاع أضرب على رجلي وأبجي :- يا ربي دخيلك شسوي عيني شلون اوصللهم
مرت نص ساعة واني على وضعي اندك الباب فزيت بسرعة خايفة اجاني صوتها من ورى الباب
يسر :- بان گاعدة
مشيت يم الباب مسحت دموعي رديت بسرعة
- اي هياني
- عبالي صارلج شي يمعودة خنستي بلا صوت
سكتت شوي وسألتني :- محتاجة شي
- اي
- شتردين گولي دا آخذ المفتاح من الحارس وأفتحلج
- محتاجة موبايل
ضلت ساكتة گتلها :- ضروري يسر والله محتاجته دقيقة مو أكثر
- تردين عبد يستلمني شيخلصني منه إذا عرف
- مراح يعرف گتلج دقيقة مراح اطول هواي
ضلت ساكتة رجعت حجيت وياها ما ردت صرت أدك عالباب اختفى صوتها انهاريت گعدت ظهري عالباب
لحظات ورجعت دگته :- وينج
فزيت بسرعة :- ها هياني يمج
- دنگي راح أعبره الج من جوة الباب
نزلت للگاع صدك دفعتلياه من جوة أخذته بسرعة
صاحت :- بسرعة بان
وگفت بنص الغرفة جانت فاتحتلي الرمز رحت گبل عالفيسبوك ضليت أهز برجلي محتارة منو
مصار گدامي إلا شبير بحثت على صفحته طلعتلي اول وحدة دخلت لحسابه اتصلت عليه مرة مرتين مدا يرد
رجعت اتصلت بالمرة الثالثة ودموعي تنزل أدعي يشيله
فتح خط اجاني صوته :- ألو
شهگت :- شبير اني بان
جان صوت هوسة يمه ضل ساكت واني أحاجيه لحد مهدى الصوت يمه رد :- ألو يول بان هاي انتِ
- اي وياك تسمعني
- شبيج شبيه صوتج شصاير
سكتت شوي أريد أجمع الكلام
شهربان :- شبير بيت خالك خليه يفرغوه ترى عبد لم جماعته ورايحين لهناك ناويلهم نية گشرة
- شنو هالحجي هذا وين انتِ مو علساس جاية وياه
- كذاب ولك ديلعب عليكم يريد يكبس على فدار وابن اخته گلهم خلي يفرغون البيت جايهم مسلح
- يول وانا الصبح وديت اختج لبيت خالي خاطر تاشوفج هي وامج
- لا يا ربي طلعهم ولك طلعهن مناك
انهاريت أحجي وأبجي گوة ينفهم من كلامي
- زين بس اهدي هسع اخابرهم رايحلهم بالطريق
- أعتمد عليك شبير
أكدت عليه وسديته منه رجعت ليسر خبصتني خبص عالباب دنگت رجعتلها التليفون من جوة الفتحة
يسر :- شوفي بان اني لا اجيتج ولا انطيتج تليفون ولا خابرتي ولا أدري شي
- تمام هذا هو أشكرج
راحت واني مشيت للمراية باوعت لروحي حالتي حالة شعري خبصة شفتي مورمة آثاره تارسة رگبتي
رجعت لمكاني كرهت أباوع لوجهي مرن 3 ساعات الدقيقة جانت تمر عليَّ بساعة جنت على أعصابي
لا ديجيني نوم وانام وأفتك لا دا أگدر ما أفكر بيهم وشصار وياهم هسه بالي فد مرة يمهم
الساعة عبرت 1 بليل سمعت صوت دك عالباب
گمت وگفت على حيلي مرعوبة دگات خفيفة متباطئة
لحد مسمعت صوت المفتاح انفتح الباب
جفلت من شكله ضخم ساد الباب لحيته الكثيفة طبرة حاجبه ملامحه كُلشي بيه جان يخوفني
لطشت روحي للحايط فات هو تقدم عيونه حمر
مثگل
عبد الكريم :- امشي عمريلي النرگيلة
حجاها بثگل وبنبرة بطيئة وشمرلي معسل يم رجلي
سحبت روحي بسرعة ومشيت تعديته طلعت للمطبخ المعسل بيدي لگيت النرگيلة عالكاونتر وجايب فحم
شغلتهم عالنار وخليتله المعسل أريد أي شي يلهيني عنه واني أسمع صزت أنفاسه قريبة مني واگفلي بالباب
دا أخلي الجمر حسيت بأصبعه يمرره على طول ايدي
جفلت بسرعة وابتعدت عنه
ابتسم :- شبيج خفتي
مرديت الرعشة مسيطرة على كل جسمي
گلي آخذله النرگيلة للصالة وهو طلع سبقني لهناك
غسلت وجهي وجريت نفس شلتها وأخذتها اله للصالة
خليتها يمه جان گاعد عالتخم اخذها يشرب بيها قبل لا أروح گلي أجيبله ثلج من الثلاجة رحت جبتله
مديتله القالب أشرلي گدامه عالطبلة :- خليه هنا
تقربت دا أخليه لزم ايدي وجرني لحضنه قيدني صرت أنفر بجسمي وأصرخ ببجي خلى ايده على حلگي
عبد الكريم :- اششش ليش هيج طلعتي وكحة مو مثل اختج
مد ايده جوة الثوب لفخذي تخبلت دفعته عني حيل وگمت أريد أشرد ملحگت رجع جرني لزم راسي باسني
ما أعرف منين اجتني القوة دفرته بين رجله ابتعد عني
وخرت منه معدتي گلبت لازمة بطني وأگح بقوة
لزمني رفع راسي اله جابني براشدي فر راسي فر وگعت للگاع نزل عليَّ يفتح بحزامه مصارت گدامي بس النرگيلة سحبتها بيدي وشمرتها بوجهه
الجمر صار عليه حرك ملابسه گمز ينكت بقميصه
گمت على حيلي ابتعدت عنه وگفت على جهة متحملت صرت أستفرغ ذبيت كل اللي ببطني
اني التهيت بروحي وهو حار بالحرك واثنينا ما انتبهنا للجمر الصار عالتخم خلال دقيقة گبت النار
هو شافها جر المخدة صار يطفي بيها بس ملحك النار بسرعة مشت وأكلت باقي التخم وعبرت الشرارة مال نار عالبردة الورى صارت نار كبرة
اخترعت من المنظر وهو يصيح عالحراس البرة يجوله
سحبت روحي وطلعت بسرعة وهم احتاروا يطفون بيها
باوعت للباب البرة مفتوح وباوعت عليهم ملتهين
دا أمشي ووگفت رجعت درت وجهي رحت لغرفتي
توجهت للكنتور أخذت ملابس ودنگت جوة الجرباية سحبت الجنطة فتحتها اتأكد عاللي بيها جان موجود
سديتها لبست الملابس فوك ثوبي الخفيف خليت الجنطة على جتفي لبست حفايتي وطلعت بسرعة
وصلت ليبرة صارت بوجهي يسر باوعتلي وباوعت للجنطة :- وين رايحة بان
- وخري يسر خلي أروح
- ما جزعتي كم مرة بمرة شردتي ولزمج
- رايحة لأهلي مراح يگدر يوصلني بعد
- اگعدي بان إذا لزمج مراح يرحمج والله
- وخري عليج النبي لتعرضيلي ليطلع أحد ويشوفني خليني أروح
- شجابرج مرايدة روحج أقلها خافي عاللي ببطنج
- إذا ضليت ساعة وحدة هنا بعد وعبد الكريم موجود ما أضمن روحي أبقى عايشة باوعت مترددة وخرت مني دا أمشي لزمتني
- لترحين منا افتري من ورى البيت واطلعي گبل من بين الزرع مناك الطريق أقصر راح يوديج للشارع
باوعت للباب :- بس لحظة
مشت وگفت هناك تباوع جوة أشرتلي بيدها افتريت من ورى البيت مثل مگالت ومشيت گبل من بين الأشجار لا انداريت ولا وگفت رغم التعب مستحلني10 دقايق وصرت عالشارع الدنيا نص الليل ظلمة وبس اني الطريق فارغ وصوت الچلاب من كل صفحة صرت أمشي عالطريق مرت سيارتين مني الأولى أشرتلها موگفت والثانية وگفلي ومن شاف حالتي خاف ومشى بسرعة
صرت أمشي بنص الطريق ودموعي تنزل حايرة بروحي ...
