رواية فصلية بديلة ( شموخ ) الجزء الثاني الفصل الواحد والعشرون بقلم ام ملكوت
:-فزيت مخروعه على صوت المنبه ب٦ الصبح كعدت وصفنت بالحايط تذكرت اليوم اول يوم الي كمتدربه بالدائره واليوم راح تبدي حياتي العمليه
واحصد ثمار تعبي كل هل سنين .. ابتسمت واستنشقت الهوى براحه واخير انتهت سنوات الدراسه واجه وقت الشغل والحمدلله كدرت اوصل لحلمي وادخل طريق ثاني وصفحه جديده حلوه بحياتي مليانه حماس وشغف ..
التفتت على بنيتي شفتهه نايمه بجربايتهه كمت بوستهه ودخلت
للحمام سبحت ونشفت وطلعت اخذت ملابسي العسكريه محضرتهن من امس وكاويتهن لبستهن ولبست البسطال تكرمون ولفيت حجابي اخذت البيريه بيدي رشيت عطر وباوعت لرجلي وكلت خلي اخذ حذاء رياضي للاحتياط اخاف يدربونه او يلعبونه رياضه باول يوم ماخسرانه شي ..
طلعت علاكه من المجر
وخليت الحذاء بيهه وخليته بعلاكه مرتبه اخذت ريانه وهي نايمه لامي ماردت اكسر نومتهه صبحت
عليهه وعلى بابا وهمه يشوفوني بالبدله العسكريه وعيونهم مبتسمه باستني امي من خدي وهيه تمسد عليه ورحت سلمت على بابا باسني براسي وشجعني كالعاده بكلماته التحيي بروحي الشغف خليت ريانه يم امي بعدما بوستهه وصيتهه عليهه وجهز بابا نفسه وطلعنه ركبنه بالسياره باوعلي بابتسامه فخر على وجهه وكال..
_مستعده محققتنه
_اي بابا مستعده ادعيلي ربي يوفقني وماواجه عراقيل
_ربي وكلبي يرضه عنج و يسهلج وييسرلج امورج وارفع راسي بفخر كدام الناس واكلهم بنتي محققه جنائيه وصيتهه يسوا ازلام
_بعد حيلي بابا بس انت العشگ
_هههه يله نتوكل
_توكل حبيبي..
حرك السياره وطلعنه من البيت ومرتضى الكئيب سد الباب ورانه رجعت عيني على بابا يلي الفرحه تلمع بعيونه والابتسامه ماختفت من وجهه
متحمس وفرحان اكثر مني بانجازي حمدت ربي وشكرته على نعمته ولان رزقني هيج اب اقتدي بي ويفتخر بيه .. كل الطريق وانه كلبي يخفق بجنون
حتى اطرافي بردت من التوتر صفنت بالشوارع وسرحت بذاكرتي قبل اسبوع لمن اجوا اهل محمد تقدموا لجنان والصار بيومهه ..
... ثاني يوم بعدما اجه مرتضى سكران وكتلهم يكعدون يحجون ويتفاهمون وافقوا ورحنه العصر للكورنيش واجه مرتضى ويانه وصلنه وكلنه
تجمعنه بمكان واحد سويه فرشنه حصيره خلينه الفواكه وكعدنه ناكل ونسولف ونضحك عدا جنان ومرتضى جانوا لازمين الحد وكاعدين اقترحت
عليهم ندخل لمدينه الالعاب القريبه عل شط حتى براحتنه نكعد ونتمشه عاد همه ما متنعوا لمينه الحصيره واكلنه ودخلنه للمدينه اخذنالنه صفحه
رتبنه عشانه عل طاولات خليت ريان عند احسان حتى يلتهي بيهه عنه وكلت لمرتضى ياخذنه للحمامات هوه فهم علي وكام اخذنه انه وجنان
صرنه بعاد عن مكان كعدتنه وبقينه نتمشه كلاثتنه سويه وهمه ساكتين محد عرف يفتح الموضوع ويه الثاني عاد كسرت الصمت وحجيت موجهه الكلام لجنان..
_جنان احجي حبي كوليلي شنو السبب يلي خلاج تتقبلين تزوجين شخص غريب لا من عدنه ولا من ثوبنه وهيج فجاتا
_ليش شبي الغريب ياكل لو يذبح اخذي الغريب يقدرج وشمري القريب يلي يرخصج وبعدين اكو هواي اسباب ومنهم ان محمد خوش ولد ورغم
غريب ومامعاشرني بس حبني وطالبني على سنه الله ورسوله بالحلال وشاريني بالغالي مو نفس
العاشرتهم كل عمري وخلوني اختيار جانبي ورخيصه بالنسبه الهم و يلعبون بيهه يمته مايردون ..
التفتت على مرتضى وهو وكف مسح عرك جبينه ونفخ بضجر باوعلهه وهيه دايره عينهه عنه وكال موجه الكلام الهه..
_ماجان قصدي اخليج كاختيار جانبي او العب بيج وانما ردت استفزج حتى اشوفج تهتمين لامري لو لا تحبيني ومتمسكه بيه وتغارين لو لا
_ليش حتى تعرف البكلبي اتجاهك وانه ماشرفك
_اي كتلج ماتشرفيني كاخت لاني ماعتبرج اخت ولا اريدج تعتبريني فقط اخ وابن عم لان تدرين كل زين ان علاقتنه بعمرهه ماجانت علاقه اخويه او ابن عم وبنت خاله
_وكلامك على علاقتنه لمن كتلي اذا تحبيني ننجمع بعلاقه ونخلي الزواج بعدين شنو معناهه تريد تلعب
وياي لحدما تشبع تالي تشوف غيري لو تكابلني وتكلي انتي مو عفيفه لو وين تريد توصل مثلا وانت الزواج شايله من راسك
_ماجان قصدي العب وياج فقط كلت نعيش الحب قبلما نتزوج لان الزواج يدمر كلشي حلو يبني الحب واريد نتونس قبل روتين الزواج الممل
_هاا يعني اذا تزوجنه بالنهايه راح ينتهي الحب من كلبك والشغف راح يصير زواجنه عباره عن واجبات وروتين ممل مو
_ماعرف بعد حسب المره بيدهه تكدر تخلي حياتهه الزوجيه ممله لو تخليهه تتجدد بكل مره
_ههه كاعد تسمعين شموخ اخوج شكاعد يهبد ويكول مو عباله انه بت شوارع لو لعبه بيده
يتونس بيهه ولمن تخلص مونتهه يذبهه بالبيت تخدمه وتخدم جهاله وزين اذا سالهه عن حالهه
_احجي عدل جنان شنو اهبد شنو معتبرج بت شوارع ويمته كتلج انه تصيرين خدامه
_مرتضى انه بنت بيوت الي عزوتي وكرامتي والي اهل مربيني ومنطيني ثقتهم واليحبني ويريدني يدك باب بيتنه ويتقدم بالحلال وانت اذا تريد تلعب
وتتونس روح ابتعد عن حياتي و ارجع لحبيبتك بالخارج العب بيهه لمن تشبع وجيبهه هنا خليهه تخدمك عود وتخلي نعا** فوك راسهه
_منو كلج بعلاقتي بسيبرا
_ماكو شي ينضم وكلشي اريده بسهوله اوصله واعرفه وشغله ثانيه هم خاف عبالك عندك مشاعر بكلبك اتجاهي فاريد اكلك انت غلطان ومتوهم
لانك لا عشكت لا سالت لا بجيت لا اشتاقيت لا حاول تعرف اخباري ولا صليت ودعيت ربك يجعلني نصيبك ماسويت اي شي يثبت البكلبك
اتجاهي حتى الغريب ثبت حبه الي عن طريق الحلال وانت ردت بس تلعب واكبر دليل على انك ماتحبني كلامك قبل يومين وهسه وياي وفوك هذا رايح طول غيبتك تلتهي بالنسوان وتاليتك اخذت اجنبيه كحبيبه
وردت تجيبهه وياك تزوجهه يعني جنت من بدايه ضامن وجودي كاختيار سهل بالنسبه الك فنصيحه
مني امحي هذا الوسواس البكلبك التسمي انت حب اتجاهي وخلي عقلك براسك انت لا كد الزواج ولا كد مسؤؤليته ..
صفن بيهه وعيونه تنط شرار وعصبيه جانت كفيله تشرح غضبه وزعله عليهه بس شنو المخلي ساكت ورافض الزواج مادري واذا يحبهه ليش مايتقدملهه
عل اقل يعقد عليهه ويتونسون على راحتهم مثلما يكول بس بالحلال مو شي صعب ومستحيل وبهذا اسلوبه وياهه ورفضه لفكره الزواج دمر اخر فرصه
ممكن تجمعه ويه جنان .. كملت كلامهه ودارت ضهرهه وراحت للمكان الكاعدين بي اهلهه باوعت لمرتضى وكتله باسف..
_الحب فطره وهاي الفطره انخلقت بيك وانت صغير لمن جنت تاخذ شغلاتي وتنطيهن الهه حتى تفرحهه بس لمن كبرت تغيرت واختفى هل حب او
تحول لنزوه وتملك لا اكثر ولا اقل ولو باقي رغم مشاعر النزوه هاي محتفظ بجنان جان صارت الك وحلالك بس انت دمرت كلشي ومو هسه لا من اول
نزله الك من الخارج لمن تجاهلتهه واعتبرتهه ماموجوده بهذاك الوقت كسرت البراءه والفطره يلي بكلبكم اتجاه بعضكم كسرت عفويتهه وحبهه الك
بهذا اليوم خذلتهه واعتبرتهه ماموجوده بعدما انطيتهه امل وخليتهه تنتظرك سنين وهي متعذبه
اعرف هل كلام المفروض ماحجي نيابه عنهه بس لازم تعرف البكلبهه حتى تسترجع اغلاطك وتلوم نفسك وتحاسب ضميرك بدل ماتحاسبهه لانهه قبلت بغيرك..
كملت كلامي وهو صافن بحيره هزيت راسي باسف ورحت من يمه عفته يتمشه وحده اجيت يم اهلهه ومالكيتهه استغربت وكتلهم وين جنان واحسان كال..
_هذيييج فوك تلكينهه ..
رفعت راسي وين ما اشر واشوفهه صاعده بالسفينه وحدهه زفرت براحه وكعدت اخذت ريان وسال احسان عن مرتضى وكتله بالحمامات كام راح اله
وبقينه كاعدين شويه ونزلت جنان اجت اخذت ريانه مني انطتهه لخالتي وسحبتني من ايدي وهي تتصنع الحماس وكالت..
_كومي خلي نلعب بالالعاب اريد ارجع طفله اليوم ماخلي شي يعتب علي
_ههه تمام حبي يله نروح نكص بطايق
_افا عليج كصيتلج قبلما ترجعين
_كفوو يله امشي لعد..
ابتسمت ورحنه نمشي باتجاه السفينه صعدنه بيهه وبدت تشتغل باوعتلهه وشفتهه صافنه بالفراغ تحسرت عليهه وكتلهه..
_جنان
_ها
_ارتاحيتي لمن حجيتي التردينه وسمعتي منه
_مارتاحيت لان حجيتله او سمعته وانما ارتاحيت من الساعه يلي قررت اطلعه من حياتي واختاريت الشخص المناسب الي لمن حسيت اني تحررت من
قيود حبه وتفكيري بي كل هل سنين ارتاحيت وجان كلامنه قبل شوي هوه يلي خلاني اصر واتاكد ان قراري بالارتباط بمحمد هوه القرار الصح
_الله يوفقج وياه ويعوضج عن كل هل سنين الذرفتي بيهه دمعج وصحتج علمود مرتضى
_تسلمين حبيبتي الله يسمع منج ويرزقج المثل
_اريد اكلج شي بس لا تفهميني غلط
_كولي حبي
_انه كتله لمرتضى لمن رحتي من يمنه انج جنتي منتظرته على امل وتجاهله الج كسر الحب والامل يلي بكلبج اتجاهه
_ليش حجيتيله شموخ
_لان معتبرج انتي الغلطانه كتله هيج حتى يحس بتانيب الضمير حتى يعرف ان تجاهله وقسوته وياج هيه الخربت كلشي حلو بيناتكم حتى يحترك
بنار ضميره وهوه يشوفج ويه غيره ويعرف شنو خسر هوه حتى يحس على دمه ويعرف ان كلشي صار بسببه ويحاول يصلحه
_ شلفايده بعد
_حتى لو ماصلح شي المهم يحس بالمج وماينسبلج الغلط كلما التقيتوا ويحسسج انج
غلطانه صح هوه اخوي بس الحق عليه هوه بيده وبسبب عناده وكبريائه خرب علاقتكم وخسر اثمن شي واكثر شخص يحبه
_هفف ماعرف سدي موضوعه بعد لا يهمني يتعذب ولا يحس بتانيب الضمير اتجاهي خلي بطريقه وخليني بطريقي احسلي
_اهم شي سعادتج والتشوفينه وتحسينه مناسب بالنسبه الج اخطي اتجاهه بكل ثقه وانه راح اكون وياج وسند الج بعد رب العالمين
_تسلمين يروحي مانسه وكفاتج وياي طول عمري جنتي اختي الجبيره قبلما تصيرين بت عمي وصديقتي
_شعندي غيرج انتي اختي الماولدتهه امي
1 تعليق
_الله لا يحرمني منج
_ولا يحرمني منج يحيلي ..
ابتسمت وسندت راسهه على كتفي شويه وبدت السفينه تشتغل وكلش تونسنه بيهه وباقي اللعبات كذلك ومرتضى واحسان ماشفتهم بعد يمكن رجعوا
للبيت او طلعوا وفعلا لمن خابرهم محمد طلعوا ملتقين هنا ويه جماعتهم ورايحين للكوفي عاد رجعوا يمنه وره ساعه ومرتضى مغنتب وواكف
بعيد عنه ..لمينه شغلاتنه ورجعنه للبيت سويه .. وثاني يوم بدت تحضيرات المشيه راحت جنان الصبح هيه وخالتي للسوك وانه ونوره اخذنه
الضهريه كلهه ننظف ونرتب بالديوانيه ومسحنه القنفات وبخرناهه شغلنه السبلت شويه حتى يتجدد هواهه ورجعنه طفيناه لان بارد الجو مو
مال سبلت يجمدون الناس ..فقفلناهه وطلعنه صار بوجهي مرتضى وهو ضايج طلع باكيت جكايره
ودخل للديوان باوعتله باستغراب وشفته شغل الجكاره وركضت عليه اخذتهه من ايده وطلعتهه شمرتهه عاط بيه وكتله..
_يعني صارلي ساعه انضف بيهه وابخرهه وتجي تريد تترسهه دخان شهل خباثه ادري بيك ضايج
من السالفه كلهه بس فكر باهلك تقبلهه تدخل الناس الغرب لديوان ابوك وتكول وصخ لو ريحته دخان
_مالج علاقه انتي سدي الباب وروحي
_والله فلا اروح الا تطلع واذا تطلعني غصب اروح اشكيك لابوي ويجي يتصرف وياك ويهججك من البيت
_شموووخ
_باباااا
_خرب شكلج همين وخري عن وجهي خل اولي اهج
_وين رايح
_لجهنم ترحين
هز راسه باسف لبس برجله وراح يمشي باتجاه الباب فتحه وطلع من البيت رجعت عطرت الديوان وسديت بابه ورحنه للمطبخ انه ونوره نحضر
الضيافه ويه امي .. للعصر رجعت جنان وخالتي واحسان من السوك دخلنه لغرفتي وتمددت جنان بتعب وذبول عل جربايه وكعدت خالتي حلى تطلع
بالملابس الجابتهم والقفطان مالت المشيه وتورينه جان كلش حلو ومناسب مو مبهرج مثل مالات الخطوبه والحنه وجايبه ثاني ابيض عاد كتلهه مو
مال ابيض وهيه بس مشيه خليناه على صفحه.. باوعت لجنان وشفتهه صافنه بالسكف كمت تمددت يمهه على بطني وكتلهه بهمس..
_ها حبي جنان شبيج تصفنين
_مابيه شي بس تعبانه
_تذكرين لمن سالتج عن محمد وكلتي انج ترتاحين بالحجي وياه وتنسين اوجاعج بطيب كلماته
_اي
_فكرت وحسيت فعلا لمن تلاكي شخص يحبك ويقدملك الاشياء التسعدك راح تنسى كل الجروح وكلماته الطيبه تواسيك وتحسسك ان اكو شخص
مهتم بيك وشاريك بحلاوه الدنيا ومرارتهه وانتي بهيج وقت متعب وضغط مستمر عليج تحتاجين تكونين ويه محمد بكل وقت فنصيحتي الج كلما
تضايقتي او حسيتي بتعب وكآبه شيلي نقالج واتصلي عليه احس هيج راح يطمئن بالج اكثر وترتاحين ومنهه تتعرفين اكثر عليه وتتقربين منه
_هيج رايج
_اي حبيبتي انتي اخذتي سبيل نجاة ودوه لجروحج فما يكدر اي بني ادم هسه يخفف تعبج وحزنج غيره
_اي والله بله هسه من تطلع امي وخالتي اتصل عليه
_ راح اطلعهن الج افا عليج
_هههه حبيبتي انتي..
كمت على حيلي وحجيت ويه خالتي وامي ..
_خاله امي عوفن شغلات المشيه هسه الناس بعد ساعتين يجون وانتن لا محضرات جاي ولا ماي
_يا خاله صدك شلون راح عن بالي والتهيت بالملابس خيه سماء كومي خيه خلي نحضر استكاين كلاصات وين نلحك بعد
_اي خيه امشينه
_خاله شموخ بعد خالتج ماوصيج عدليهه ورتبيهه لجنان اريدهه اليوم تتخبل عليهه النسوان وصيت جمالهه يوصل لاجدادهم
_ خليهه علي وماقصر انشاءلله
_اي بعد خالتج ادري بيج ماتقصرين وانشاءلله نردهه الج بعرسج
_ قصدج بجنازتي
_ياا اسم الله الرحمن ليش ولج خاله تفاولين على روحج
_اي خاله حبيبتي لان راح تشوفيني ميته وماتشوفيني بعد عروس
_اسم الله عليج حبيبتي انشاءلله ربي يسعدج ان جنتي وحدج او ويه شخص بحياتج
_امين حبيبتي
_يله خاله رايحين احنه
_روحي واذا تحتاجون مساعده بعد نوره يمجن لان احنه راح نقفل الباب ونشتغل بعد لحد يصيحلنه
_لا محد يصيحلجن بعد كعدن مكيجن حتى بتج جيبيهه يمج لا تطلع بره وتطيح
_اي هسه اروح اجيبهه
_تمام يله كومي خيه سماء امشينه
_يله ..
طلعن ورحت وراهه جبت ريانه من سلام ورجعت للغرفه قفلت بابهه وكعدت جنان على حيلهه ولزمت النقال بتردد رفعت راسهه وكالت ..
_اكلج عادي اخابره قبلما يجيلنه بساعتين لو عيب
_اي ليش عيب عادي
_خاف يكول علي مستعجله لو مزعجه
_لا تتقيدين وياه وتفكرين هيج خليج على طبيعتج وخلي تصرفاتج عفويه وصدكي لو يحبج صدك ماراح يمانع لو ينزعج منج حتى لو اتصلتي عليه وهو بالحمام
_ههه تمام ..
رفعت النقال واجيت كعدت يمهه انه وريانه طلعتلي صورته المخليهه عل تلجرام وكالت..
_نسيت ماوريتج شكله شنو رايج بي
_يولي هذا اشكر
_ههه لا صابغ شعره بني
_وعيونه شنو عدسات
_لا طبيعيه خضر
_بس تردين الصدك احلى من اخوي الاملح
_ههه شوفينه بله نلوك لبعضنه
_عين الله عليكم لايكين وثنينكم جمال شتطلع جهالكم بس لا يكسلون على ريانه ويتنمرون عليهه تالي اكتلهم بالنعا*
_هههه
_يله اتصلي بله شفنه الشكل بقه بس الصوت واسلوب الكلام خلي نشوفه بله حتى نعرف نصنفه زين
_ههه تمام ..
اتصلت عليه بقه يرن شويه ورد عليهه فتحت سبيكر واجه صوته خشن وحنون على كولتهه وكال..
_ الوو جنه
_ هلو محمد شلونك
_شلوني بعد كاعد على كرسي الحلاقه عبالك كاعد بهليكوبتر من فرحتي
_هههه
_اويليي يمته تمر الساعتين واجي اشوفج تدرين احس صارلي عمر ماشايفج واليوم اول لقاء بيناتنه
_هاي شنو
_اي والله مدري لان جنت منتظر الفرج وهسه رايحله هل اختلف الشعور
_اي يجوز هيج
_شبي صوتج ذبلان يبعد صوتي
_جنت بالسوك وتوه رجعت تعبانه وكلت خلي اتصل بيك
_اويلي يا الله
_هاا شبيك
_ماعرفت شصار بكلبي
_شصار
_تخربطت علومه بس تخيل نبض كلبج مختلط بنبضه
_هاا مو كلنه مانتغزل بعد
_غير اسويلج راح تعب بحضنه
_محمدد
_هههه اي لمن تصير الشغله بكيفي منعيني من الغزل عود
_همم هسه شكاعد تسوي انت
_كاعد اخابرج وصاحبي لازم علي موس
_ليش
_كاعد يحلق لحيتي وكلساع مهددني بس اضوجه يخربط وجهي
_هههه ليش تضوجه جا
_لان اضحك عليه اكله انه راح اخطب وانت اكبر مني وبعدك عزابي
_يااا هههه جا تستاهل التهديد ليش تتنمر عل ناس
_جا غير اوزع فرحتي كدام المحتاجين بلكي يحس على دمه ويتزوح عمره ٣٥ ويكول بعدني صغير شلونج بيهه هاي
_هواي ٣٥ جا بعد يمته يتزوج يمته يخلف يمته يكون عائله
_ماتشوفيني اتنمر عليه اكول عسى ولعل يسويهه عناد بيه ويتزوج يفرح ابوه عل اقل
_انتم مشكله الشباب ماعرف ليش تشردون من الزواج
_انه الحمدلله رجال محترم وادور ستر واحب اكون عائلتي واهتم بيهه وهذول الهتليه كاضينهه لعب ونسوان بلاش بعد يكلك شلي بالزواج..
بلعت غصتي لمن حجه هيج عبالك كاعد يحجي على مرتضى باوعت لشموخ وهزت راسهه باسف على اخوهه رجعت سالته على موعد جيتهم بيش ساعه بالضبط وكال..
_بعد انه خلال ساعه اكمل اموري وارجع للبيت اخذ اهلي واجي يعني كولي ساعتين انشاءلله احنه يمكم
_هااا اوكي براحتكم بس منو راح يجي من اهلك
_بس انه وامي وعمي وخالي واختي الصغيره
_بيج اكثر جنتي
_يله روح كمل شغلك وخلي ارتب نفسي انه همين
_ماحاجه تتعدلين وتترتبين انتي كمر ضاوي مايحتاجله ضوه
_همم شكرا عل مجامله
_افاا من يمته انه اجامل تعرفيني احجيهه طك بطك ام خد الاحمر
_هههه يله كافي غزل لعد خليني اروح لا تجي امي ترزلني هسه
_هههه يله روحي انه قبلما نطلع من البيت ادزلج رساله اكلج جايين تمام
_تمام هاذهو
_يله اخذي راحتج مع السلامه
سدت جنان الاتصال من محمد وباوعتلي بتساؤل ابتسمتلهه وهزيت راسي باعجاب وحجيت...
_من طريقه كلامه والفرحه المبينه بصوته اكدر اكلج ان هل ولد فعلا شاريج بروحه ورايدج غنيمه
بهل دنيا مو بس زوجه تخدمه وتجيبله جهال واكدر اكلج بكل ثقه ان راح يحافظ عليج ويصونج ويصون الوعد بيناتكم
_ماتصورين شكد ريحني كلامج وطمئن كلبي اكثر شكرا حبيبتي شموخ لانج وكفتي وياي بكل اختياراتي
_واجبي انتي اختي وصديقتي وبنت عمي وخالتي كل هذا اذا ما وكفت وياج ويامن اوكف
_يروحي انتي
_بس اكو مشكله
_شنو هيه
_حسيت اسلوبج ويا ثكيل شويه يعني من حاجيتي لحدما سد الخط هوه يسولف ويتغزل وانتي ضحكه ماضحكتي مثل الاوادم تره خلي بالج الولد شاريج وشاري فرحتج لا تبخلين عليه بالسالفه والضحكه
_ادري بس مو بيدي خيه مخنوكه ومالي خلك شي
_لا جنان مايصير هيج حبيبتي اذا تحبسين نفسج الحقيقيه وطبيعتج عنه ماراح تكدرين ترتاحين ويا وراح تكضيهه مكتئبه اذا ضليتي على اسلوب كلامج هذا حاولي ولو غصب عنج ان تنسين الصار وياج بهل سنين وتسولفين وتضحكين ويه الولد وتخلين عقلج وكلبج ويا مو ويه غيره
_انشاءلله خيه احاول اسوي الكلتي عليه
_لا مو تحاولين اريد اشوف طبيعه جنان الطيبه والحنونه والمرحه ويه محمد منا ورايح وراح اراقبج بعدين واشوفج شلون بله تمدين البوز عل ولد بعد
_هههه تمام انشاءلله منا ورايح اتصرف على طبيعتي ويا وماتقيد
_اي هيج اريدج معدله وتسمعين الكلام وهسه يله حبيبتي يله كومي سبحي ونشفي حتى تطلعين تلبسين القفطان واكعد اسويلج تسريحه والمكياج عليج بعد انتي اشطر مني بي
_تمام حبي..
ابتسمت وكامت دخلت للحمام سوت الكتلهه عليه وطلعت بدلت ملابسهه رتبت القفطان عليهه وكعدتهه عل كرسي كبال ميز المرايه كمت نشفت شعرهه وبديت امشطه الهه
وهي جهزت شغلات المكياج وبدت بي وريانه لازمه الحمره وتملطخ بوجهه سوته فلم همزين حمره سائله مو جافه جان انرعبت العالم وتورطت وياهه....
..رجعت للحاضر لمن بابا وكف السياره بالكراج القريب عل دائره وكلي يله ننزل باوعت للمكان وحسيت كلبي راد يطلع من مكانه من فرحته نزلنه
انه وياه و لزمت بيده عصرهه حيل وغمض عيونه باطمئنان مشيت وياه بثقه لحدما دخلنه للدائره شفت قسم من زملائي بالدوره موجودين ويه
عوائلهم بالاستقبال منتظرين توقيع فايلاتهم راح بابا سلم الفايل مالتي للضابط وداه للعميد وبقينه ننتظر ويه البقيه فتره نص ساعه
تقريبا وانه التوتر الف صاعد عندي وملزمه بيد بابا مثل الطفله باول يوم مدرسه الهه .. طلع الضابط وصار يصيح باسمائنه واحد وره اللخ دخلنه بالسره
استلمنه فايلاتنه من العميد ومبين عليه خوش انسان محترم واسلوبه راقي انطانه محاضره قصيره عن الاجتهاد والامانه والصدق بالعمل
وبعدها دكينه تحيه اله وطلعنه .. كلمن ودع اهله وودعت بابا وصاني على نفسي وراح ابتسمت برضى ومشيت ويه فريقي لقاعه الاختبار يلي
اختبرونه بيهه امتحان القبول دكينه تحيه للمحققين يلي راح يدربونه والتفتت بالمكان اشوفه
للقاعه تختلف تماما عن اخر مره شفتهه بيهه جانت فارغه بس كراسي بيهه وهسه مليانه شغلات رياضيه عبالك جيم ..
رفعت راسي على صوت مألوف لمن حجه وكال نعرف على نفسنه قلصت عيوني باوعتله بتركيز وتفاجأت من عرفت ملامحه المالوفه صفنت افكر
هذا راهب لو غيره .. دخلت بدوامه افكاري مره اكول هوه مره اكول لا التفت علي صارت عيني بعينه عرفته من صفنته بيه وهوه مصدوم اي راهب هذا
متاكده راهب ابن خاله وفاء العشت عدهم لمن ضعت من اهلي ياربي شلون كبران وكوه عرفته متغير حيل ابتسمت وبقيت صافنه عليه حسيت
بشعور غريب بداخلي وكأني شفت شخص مفتقدته من سنين ماعرف الموده الجمعتنه بيوم هيه السبب او الصدفه الغريبه والغير متوقعه بثت هل شعور بكلبي وخلته يتلهف..
بقيت اباوعله وهو ماشال عينه عني شكله عرفني بس شلون هيج صادفته هنا ياالله شكد الدنيا صغيره ولا توقعت اشوفه بهيج يوم مميز بالنسبه الي ولو وجوده بصفته محقق تدريب مو غريب
بس الصدفه جانت غريبه كلش ومايتوقعهه العقل وخاصه ان هوه بكربلاء فشجابه للبصره مادري اعتقد اجه كمدرب مساعد لو منتقلين هوه وعايلته وعايشين بالبصره ..
رجع عينه على المتدربين وسوه نفسه كأن ماشافني ولا ابتسم بوجهي دليل على معرفته الي استغربت فعله و صفنت بملامحه الجديه والصارمه وهو يباوع
للمتدربين يلي يعرفون عن نفسهم وتفاجأت شلون هيج كبران وملامحه صايره حاده اكثر بس متعوب وين هذيج العيون الواسعه وين الوجه
الصافي والشبوبيه من التعب والسهر الواكف كبالي حاليا عكس الشخص العرفته وشفته قبل ١٠ سنين هيج السنوات مرت بسرعه وماحسينه عليهه هيج
الانسان يكبر بسرعه وتتعب ملامحه بمجرد مرور كم عام عليه .. بس شعور الفرحه والحماس يلي تخلد بداخلي حلو وغريب حسيت شفت واحد من
اهلي ولو همه اساسا بيوم من الايام صارولي مثل اهل وفضلهم جبير علي بعد رب العالمين برجعتي لاهلي سالمه معافايه ..
رجعت عينه علي باوعلي بتركيز فتره لمن انتبه علي مركزه وياه و اباوعله تحمحم بتوتر وبعد عينه عني ضحكت بكلبي عليه لهل درجه انه متغيره وكبرانه لو هوه
فاقد الذاكره وناسي شكلي .. هزيت راسي بحيره وحولت ملامحي لبارده بعدما اقترب دوري بالتعريف باوعت للمحققين الكاعد يركزون بكل حركاتنه ووكفت بثقه عكس التوتر
الاكل كلبي بسببهم كل تفكيري الباطني شلون ابينلهم نقاط قوتي واخليهم يحسون باجتهادي من
اول لقاء وشلون اخلي انطباع حلو عدهم اتجاهي .. وصل دوري كلت بسم الله وتقدمت بثقه دكيت تحيه وحجيت بصوت عالي وثابت..
_الملازم شموخ شهم محمود قسم التحقيق الجنائي سيدي..
هزوا راسهم باعجاب ورجعت لمكاني وباوعت لراهب ظهرت على وجهه ابتسامه طفيفه
وهوه يباوعلي تحمحمت ودرت عيني بتركيز عل متدربين وبقيت واكفه استمعلهم لحدما تقدم هوه بعدما كملنه تعريف نفسنه وكال....
.
.
:- لمن لمحت شخص منهم صافن بيه باوعت باتجاهه وشفتهه بنيه من المتدربين تباوعلي بملامح مالوفه للحظه جمد كلبي وحسيته صار ماينبض وانه
اجذب عيوني واكول لا مو معقوله يجوز مو هيه يجوز تشبهه اصلا مو نفس ملامحهه القديمه بس لمن ركزت بوجهه وشفتهه تباوعلي مبتسمه
وكأنهه تعرفني حسيت انهه هيه كلبي كال هيه شموخ بس عقلي يجذبه ويكله وحده تشبهه اخيرا كدرت تلتفت وشفت الشامه يلي بجانب
عينهه لانهه من بدايه جانت تميز شكلهه عن غيرهه رجعت عيني بعينهه وانه واكف بصدمه عرفتهه شموخ حبيبه الروح البعيده بس السؤال
شجابهه هنا استغفرالله ياربي
هسه تطلع تشبهه وانه مخلي عيني عليهه ..قصص ماي
هوبس بقيت حيران وكل شوي ارجع اباوعلهه محاول اتاكد اذا
هيه اوتشبهه لحدما قطعت الشك باليقين لمن تقدمت وعرفت عن نفسهه وكالت انهه الملازم شموخ ..
اخيرا تاكدت واخذت نفس من كثر صدمتي حتى نسيت اتنفس بانتظام تاملت طلتهه و #شموخهه وقوه صوتهه واحس روحي رجعت انهدت بتفاصيلهه بعدما جانت تحارب كل هل سنين
حتى تقوه على فراكهه ..
ضهرت على ملامحي شبه ابتسامه فخر بحبي الهه لمن شفتهه بالزي العسكري والقوه والثقه معلكه مثل النجمات على اكتافهه ..
تذكرت #اقتراحي الهه وهي عدنه ان تصير #محققه وفعلا اخذت باقتراحي .
وكأني بهذاك الوقت جنت متاكد ان هل منظر القوي والياسر الكلب راح يلوكلهه وكفتهه والقوه يلي بعيونهه زادت هواي عن قبل جنت بامل لقاءها
وصعوبه هل لقاء ماتوقعته يصير وبهل طريقه الصادمه ..
قوه شخصيتهه وثبات صوتهه ووكفتهه الواثقه صوبت كلبي وخلته يطيح بعشكهه مره ثانيه ..
ماعرفت شسوي وروحي انخبصت عليهه وكأن اشتياق ١٠ سنوات بده يشن حرب بداخلي حتى يتحرر ويوصلهه ولولا الموجودين جان وكفت كبالهه بلهفه وسالتهه منا لباجر وابدي من حالهه بعدما تركتنه قبل ١٠ سنين
لحد سبب وجودهه بهل دائره يلي سببلي #صدمه وحيره ابد ماتوقعت ان ممكن #شموخ تدخل هيج #اختصاص ولا توقعت بيوم يجمعنه هيج مكان لاوتكون متدربه عندي هم ..
بقيت اتامل بعيونهه وهيه ابتسمتلي بادلتهه بابستامه خفيفه وبالف يا ويلاه كدرت الزم روحي ومشاعري من ان تفضحني فكرت وكلت وقت الشغل #شغل ووقت الحب #حب وخلي اصبر منا لتصحلي #فرصه واحجي وياهه بعيد عن انظارالموجودين درت عيني عنهه ورجعت باوعت بجديه واستمع للمتدربين وهمه يعرفون عن نفسهم بانضباط ..
وجود الكل ضيق كلبي تمنيت لو موجوده #وحدهه يمي حتى اكدر احجي وياهه اسمع صوتهه
وسواليفهه نفس قبل جريت حسره حتى البصفي سمعني وباوعلي باستغراب #تجاهلته وتقدمت حجيت وياهم ...
_انه المحقق ج #راهب منا ورايح انه المسؤؤل عن تدريبكم العسكري من قتال واسلحه وطيران
وكلشي يخص العسكر وهذا الضابط سالم مساعدي اليحتاج يسالني او يوصلي يكدر يتواصل وياه ويخبره تمام
الكل : نعم سيدي....
