رواية ارهنت عمري الفصل الثاني والعشرون بقلم نورا ناصر
حين حكّمت القلب في أمور العقل ، سقط الجسد ضحية بينهما ..
لزمت طرف الميز احاول اسند نفسي ، وتحققت اسوء هواجسي ، بقيت متسمرة وواكفة بمكاني
هسه عرفت انه راهنت على عمري كله ماراهنت عليه
زين شمدريني وشنو ذنبي ووين الغلط الي غلطته ؟
شمعرفني بخفاياه ماجنت اعرف سيف جان بالنسبة الي كتاب مغلق بس رغم هذا وافقت عليه .
راح كعد ع السرير رفع رجليه وخلاها ع الثانية
ويباوعلي : هسه عرفتي موو ؟ مااعتقد الج حق تحاسبيني ع الماضي واني خطبتج وانت وافقتي اهلج جبرووج ؟ ..... احجي اذا اهلج جابريج عليه هسه ناخذ سيارة ونروح الهم نتواجه وياهم .
بقيت اباوعله متخدرة الاحساس ودموعي الي حبستها لدقائق بدت تتخلص من سجنها وتنزل على خدي .
جنت اعرف علاقتهم غير طبيعية ، حدسي انبأني وهسه صار كل شي حقيقة حتى تلميحات شهد جانت تخوفني .
سألته بنبرة مرتجفة ونظرة استنكار تشع من عيوني : بعدك تحبها ؟ اكو شي بينكم هسه ؟ انه شنو بالنسبة الك ؟ جاوبني ؟
ظل يأشرلي ع السرير يريد اروح اكعد يمه بقيت واكفة بمكاني ماحركت ساكن ..
مد ايده الي وسحبني من يم الميز للجرباية
كعدني بحضني ، خليت ايدي على صدره ابعده مني .
بس هو قيدني قوي وظل يبعد شعري عن وجهي يهمس بأذني .
حبيبتي ميسم انت ليش ماكلة هم ترا اني اول وتالي الج مراح تاكل مني وصلة واذا جانت حبيبتي قبل انت حبيبتي هسه واني احبج بعد ليش ضايجة ؟
كمت على حيلي وكفت كباله : بس علاقتكم غريبة كلش ونظراتكم لبعض بعد اقرب احساسي يكول انتوا رجعتوا وبينكم علاقة هيج احس .
كام على حيله كال اووو خلصينه من احساسج بلله ترا دوختيني عاجبج تبقين وياي اهلا وسهلا معاجبج خابري اهلج خلي يجون ياخذوج وانت بكيفج بعد .
بقيت اباوع عليه باستنكار وهو كاعد مثل الحجر بارد لابعد حد ولا هامه عكس النيران المشتعلة بيه
سيف اسمعني هذا الكلام مايوكل خبز شنو هيه لعبة ترجعني لاهلي لازم تخلي حدود لتصرفاتك وياها حتى اتأكد انت محترمني وصايني .
احس نظراته باتجاهي كلها استهزاء هز راسه بموافقة بس انه مامقتنعة نطق : صار وبعد تأمرين بشي ثاني حضرة جنابج ست ميسم ؟
نظراتي باتجاهه كلها رفض وانه صافنة عليه
وبداخلي اكول بشنو ورطت روحي يربي ؟
حبيبته القديمة ووياه بنفس البيت وارملة وابنها يصير ابن اخو راااح انجن يربي !!
_ هسه هيه ليش ماتروح لبيت اهلها شكو باقية هنا يربي ؟
_ انت شعليج بيها كاعدة على كلبج ؟ ماكله من اكلج ؟ صارفة عليها انت ؟؟
زفرت نفس بعصبية شون يدافع الها ..
وهو رافع حاجبه وابتسم ابتسامة جانبية
ولا مهتم للنيران المشتعلة بيه ، راح خلص تبديل ملابسه ونزل جوا .
بقيت انه بالغرفة احس مربطة حتى مابيه انزل
وافكر نزل اكيد راح يمها ، كمت بسرعة ونزلت جوا
ادور عليه .
رحت للصالة شفته كاعد كبال التلفزيون وحسين بحضنه وعمتي وعمي يمه بس شهد ماكو .
رحت كعدت ع التخم يصير كبال الممر وجان اشوف شهد طلعت من الحمام ومخليه الخاولي على راسها
ظليت اتكلى على نار هادئة وغزتني الافكار السودة
معقولة جان يمها قبل لايصعد يمي ؟
اروح اشوف ملابسه صعدت اركض وسمعتهم حجوا وياي بس ما انتبهت .
ركضت للملابس الي تركهن بالحمام ظليت اشم بيهن
ادور عطر نسائي او لطخة حمرة او اي شي .
بس مالكيت غير ريحته الخاصة وريحة عطرة ممزوجة ويا ريحة الجكاير .
بقيت متسمرة وواكفة بمكاني .
اشم بيهن واتفحصهن .
اجاني صوته التفتت شفته واكف يضحك
- ها شنو لكيتي بلله ؟
تركتهن طاحن بالسلة .
هزيت راسي همست ماكو شي ..
مو صاحتلج امي وحجت وياج شبيج ماجاوبتيها ؟
ماسمعتها .... حجيت ببرود
يلله نزلي شوفيها شنو تريد منج بلله .
خوش هسه راح انزل ...
هو طلع وانه توجهت للدرج امشي على كيف ..
نزلت جوا ورحت يم عمتي كعدت
كالت شبيج يوم شجاج اصيحج ماتردين فريتي فر ورحتي فوك خو ما اكو شي .
جاوبتها بتلعثم لا عمة موو موو هذا
شنو هو هذا ؟
نسيت الشباك مفتوح ورحت اسده ...
وشعليه الشباك بس انت مو على بعضج منو مضوجج كوليلي .
ماكو شي عمة والله لايظل بالج .
عفت عمتي وصعدت فوك شفته لازم موبايله ويدوس بي .
رحت كعدت بعيد عنه ظل يباوعلي شبيج ؟
هزيت راسي ماكو شي .. حجيتها بنتر ظل يفر بيده تمدد ونام .. وانه هم رحت غفيت بصفه وكلساع اباوعله وافكار سوداوية تقتحمني .
للمغرب كعدت ماشفته يمي ، نزلت جوا ادور عليه
باوعت على سيارته ماكو تأكدت طالع
رجعت ادور على شهد ماشفتها خاف طالعين سوا؟؟
الشك راح يجنني للاخر .
ظليت ادور على سارة حتى اسألها مالكيتها
اسمع صوت اجاني خرعني انتتتتي منووو ؟
باوعت لكييت الجد كاعد ع القنفة وبيده عوجيته
ولابس غترة وبشت وكاشخ ع الاخير
خليت ايدي على قلبي واريد اجاوبه
قاطعني صوته بنبرة صارمة انت مرة رأفت احجي ؟
هزيت راسي جاوبت بانفاس متقطعة لا انه زوجة سيف .
جاوب بأريحية : اي احسن اذا انت مرة سيف احسن .
بقلبي جاوبته لا والله مو احسن ساعة السودة هه ..
شفت عمتي اجت بيدها كلاص ماي وراحت صوب ابوها وتحجي شجابك شرجعك ماتكولي بلله ضعت بالطريق مو البارحة كتلي اريد اروح بيت غانم هسه شرجعك .
جاوبها ماترديني هسه اكوم ارجع وكام على حيله
لزمته من ايده وكعدته وناوشته كلاص الماي خلته بيده ..
اكعد يابه اكعد مو هيج القصد مو مااريدك بس اني اخاف عليك ياعيني انت .
عفتهم وافتر بالبيت ادور المفلوكة شهد وسارة بغرفتها اكيد واستحي اروح يمها خاف رجلها يمها وشهد لو اموت ما اطب غرفتها ماعندي ميانة وياها ابد ماكو غير اسأل عمتي .
شفتها راحت للمطبخ رحت وراها خطية تدردم بسبب ابوها جاي وحده من غير منطقة وهو عنده زهايمر .
سألتها ها عمه اشو محد وينهم لا سارة لاااا شهد ؟
كالت اثنينهن بغرفهن ...
تنفست براحة وصعدت فوك توضيت وصليت ونزلت ..
شفت شهد وسارة اثنينهن بالمطبخ .
دخلت شهد مخليه رجل على رجل وكاعدة وسارة واكفة ع الطباخ .
شهد تلف بخصلات شعرها باوعتلي بنظرة كره ودارت وجهه على سارة كالت والله عاجبني انزع الاسود متتت مليت منه .
جاوبتها سارة اي انزعي صار سنة ونص مدري اكثر من توفى الله يرحمه واانت صغيرة بعدج والاسود ابد مو مقياس للحزن الحزن يبقى بالقلب وانت هم خو ماناسيته.
كالت شهد اوووف وخالتج هسه تدكلي طبل والله اذا انزعه وتظل تغرد وتكول اني كتلته واني مووته .
اي تعرفين بخالتي تحجي تحجي وتسكت وهيه بس حجي قلبها طيب ترا .
عوجت حلكها شهد وبعدها تلف بخصلات شعرها ..
ظليت اساعد سارة بالعشى .
شويه ودخل الجد للمطبخ ضرب بعصاته ع الكاع
كال اريد عشى يله وين صار عشاكم مية سنة مايستوي .
كالتله سارة : اي جدو تدلل هسه فد شويه واجيبه الك انت روح للصالة واني جايه وراك .
كال يلله بالعجل ترا جوعان ...
وطلع ..
مرت دقايق وبعدنا مامخلصين العشه ورجع ظل يباوع على شهد ويصيح : شنو تقشمرين عليه انتي ؟ صارلج ساعة من كلتي راح اخليلك عشه وينه عشاج ؟
شهد فتحت عيونها على اوسعها وتمتمت انوبه المخابيل عليه .
سارة ردتها شهد جدو مو مخبل عيب عليج بس هو مريض عيب هيج تكولين .
شهد عوجت حلكها ودارت وجهه .
راحت سارة اخذت الجد وطلعت بي من المطبخ ورجعت ورا شويه تحضر صينية عشه للجد
وشهد عود اخذت على خاطرها وطلعت من المطبخ
وانه جاي اطلع مواعين للعشه .
التهت سارة بالطباخ ونست تودي صينية العشه
للجد ..
اجت عمتي كالت وين ابويه ؟ ماشفتنه سارة جدج وين ؟
التفتت سارة وجاوبتها : يا خالة هستوة وديت للصالة كتله راح اجيبلك عشه واجي وين اختفى ..
ولج ماكو .. كالت هيج وطلعت من المطبخ وراحت وراها سارة ، تبعتهن انه عمتي كالتلي شوفي خاف صعد فوك ، صعدت اركض فوك ادور عليه .
ماكو مالكيته نزلت .
لكيتهم مخبوصين ويدورون عليه ويخابرون ع الولد
رأفت وسيف وعمي . ورا شويه دخل الجد وويا طفل يجي عمره عشرة سنوات شايفته ابن جيرانهم .
سلم الجد لعمتي كاللها جان يمنه يتعشه يكول جوعان ومحد يخليله عشه .
عمتي ظلت تضرب بكفوف ايدها بأسف وتكول يااا فشلنا ويا الجيران شون فشلة تسوا عمري والله هسه شيكولون علينه بلله يكولون ماعدنا اكل لو متعاجزين
عفيه يابه انت ماتصبر ؟
وخري عني لا صبولي عشه ولا تريدوني وديني بيت غانم احسن هناك يعشوني انتوا حتى عشه ماعدكم تعشوني بي .
يلله بلله صدك جذب منك يابه واحنه نظل موديك وجايبيك ؟
اي انت خو مدري منو ؟ ومدري وين شايفج ؟
عليه اني ؟
لا هذيج الوراج ويأشر عليه .
لزمتني الضحكة بس باوعت لسارة وعمتي كلش مقهورين خطية دنكت واكتفيت بالابتسامة .
عياش .... خابرني واحد من اخوان سميحة تفاجئت بس رديت عليه كال دز احد ياخذ ابنك سميحة راح نزوجها وأنهى المكالمة .
خابرت على حاتم وطلبت منه اشوفه جان ضايج كلش مرته مصرة ع الطلاك وهو معاند صار اله اشهر مايقبل يطلك ، كلت استغلها فرصة اقنعه يطلكها وهم ادزه يروح يجيب ابني مهند لان انه وحازم مو على صلح .
اجه يمي حاتم وكعدنه نحجي ..
كافي تضوج روحك شنو قحط نسوان طلكها ماتفيدك ..
جاوبني باقتضاب : شمدريك ماتفيدني قابل نايم جوا جربايتنه انت ؟
_ لا ولك مو هيج بس احسن الك والله حاتم على شنو شايله خشمها عليك وماتقبل ترجع الك شناقصك انتَ ايد رجل ..
ظل يضرب ايد بأيد بأسف
خليت ايدي على كتفه كتله ترا نسوان هواي وبعدين واذا طلكت شوف هسه انه شحلاتني راسي بارد اصلا من طلكت لهسه ومرتاح .
هز راسه واكتفى بالسكوت .. اي طلك خويه طلك وحتى اخذك ونروح جولة اول شي نروح نزور وتالي نروح لبغداد نزور الامام الكاظم (ع) وهم نروح نشوف اختك الي زوجتوها هناك وماتدرون عنها رحتولها لا ؟ .
مسح على لحيته وكال انه ملتهي ويا البلوى مالتي وحازم مرته حامل ومريضة ويوميه دكتور وابوي صحته على كده هالايام .
اي هذا هو نروح انه وياك نشوفها واطمأن عليها خطية هسه اكيد تحس روحها غريبة وتفرح اذا اجاهه احد من اهلها يشوفها وهم خاف محتاجة شي .
يمعود شتحتاج يعني اكو اختراع اسمه تليفون تخابر وتكول شتحتاج واحنه مانقصر اكيد .
اي بس مو مثل تروحلها وتشوفها وتكعد وياهه وتفتحلك كلبها واذا ناخذ الحجية امك ويانه هم احسن خاف عمي مابي ياخذهه .
ظل يفرك بوجهه الله كريم عود الجلسة عكب باجر وان شاءالله خير .
ميسم : خلصنا عشه وسيف مارجع للبيت صعدت فوك لغرفتي انتظره على نار وكلساع انزل جوا اطلع ع الحديقة اشوفه اجه لو لا .
رحت طليت من باب المطبخ شفته ماكو اريد ارجع شفت شهد مقابيلي بالمطبخ جاي تسوي حليب لابنها .
كابلتها وكعدت ومنا هيه شلون تحبني ظلينه وحدة تخزر بالثانية .. رفعت حاجبها ونزلته كالت شبيج خايفة عليه خابري شوفي وينه ليش كاعدة هنا تنتظرينه ؟
جاوبتها انت شعليج ليش تتدخلين بكيفي انه مااخذ الاوامر منج .
ايبااه شون لسان يرادله كص خلي يجي سيف اله اكوله عليج تلاسنين خلي يكص لسانج متستحين .
وبصفتج شنو تكليله بلله وانت منو حتى تشكيني اله ؟
ظلت تضحك بسيطة ولللج اني اعلمج خو خليتي راسج براسي راح اخليج تعرفين منوو شهد .
ظليت افر بيدي وامشي كبالها بدلع اووي خوفتيني ارووح انتظر زوجي بالحديقة .
ضحكت زوجج مووو ههه ، فرت ايدها و غمتني
خنشوووف بلله اله اخليج تبجين دم .
منو يبجيني انت (واشر عليها ) ماعاش الي يبجيني ...
يلله ولي ولي شوفيني عرض اكتافج عود انتظري زوجج دنشوفه يجي لو شارد منج بيج خير مو لهسه باقية بنية حتى مايعجبه يتقربلج .
بمزاجي مايتقربلي خووش لا تفرحين روحج هوواي .
مزاجج ام مزاج عشتوو ..
اي مزاجي عندج مانع ؟
ظلت تهز ركبتها وتضحك لا ماعندي ياريت تجيبيلي محتاجته .
ظليت اغلط عليها بكلبي شكد ادبسز وماتستحي .
وكفت يم باب الاستقبال انتظره وهي كلساع تجي تشوفني طولها وسيف ما اجه .
خليت وصعدت فوك ، ظليت هواي انتظره وهو ما اجه
كلساع اطل من الشباك لمن ماشفت سيارته اجه .
رحت للفراش سويت نفسي نايمة تأخر يله صعد
اجه بدل وتمدد بصفي اريد اشوفه شنو يسوي .
. اتظاهر بالنوم وحواسي متيقضة .
ورا ربع ساعة سمعت صوت مسج وصل لتليفونه
. نزل من الجرباية وطلع من الغرفة .
بقيت انتظره يجي ، ظليت اتقلب بفراشي
مرت نص ساعة وهو ماكو ساورتني الشكوك
كمت نزلت جوا دورت عليه واحاول اتجنب غرفة شهد كلبي مايطاوعني ابد احاول ابرئه
دورته مالكيته مريت من يم غرفة شهد واسمع اكو صوت بالغرفة ضحك او اصوات سوالف .
كدرت اميز صوت سيف من بينها
بس ماكدرت ادخل خانتني شجاعتي
وتخلت عني ، اتوسل بيها توسل
بس اريد افوت عليهم اشوفهم ماكدر
قلبي منتفض وجسمي كله يرجف رجيف ماصاير
اروح واجي واعصر بأصابعي واكل بأظافري
واعض بشفتي واتنفس بسرعة احس كلبي راح يوكف .
بس بعدها ابد ماتحملت مديت ايدي ليدة الباب
حركتها ماتنفتح مقفوول من جواا ..
ضربت ع الباب بقووة وصوتي مبحوح وكوة يطلع صحت سييييف سيييييف .....
ثواني انفتحت الباب بسرعة وطلع سيف صدره عاري ولابس بس شوورت .
فاتح عيونه مصدوم ويباوعلي وانه اكثر منه صدمة
اريد احجي واصيح وافضحه .
مد ايده بسرعة الي سحبني بسرعة قيدني وسد حلكي
طببني لغرفة شهد سد الباب وشمرني ع الكاع .
دخلت شفت شهد ع الجرباية لافه روحها بالغطه وطالع بس اكتافها وجزء من صدرها وايديها .
كمت من مكاني وهجمت عليها لزمت شعرها بيدي وصرخت عليها يا وصخة ياقذرة يازانية تفوووو عليييييج .
وهيه بس تحاول تستر نفسها بالغطه .
لزمني سيف طوق خصري بيديه وسحبني منها
باوعت عليها وانفاسي متقطعة واتنهد
شعرها مكفش بسببي عدلت شعرها بيد وبالايد الثانية لازمة الغطه وعلى وجهه ابتسامة انتصار .
شمرني سيف ع الكاع وهو يهدأ بيه ويهدد ويطلب مني اسكت بس انا كل همي اريد اكوم اكتل شهد اموتها كتل واطلع ضيم كلبي كله بيها
اما سيف حسابه بعدين وياي انه اعلمه ....
