رواية ارهنت عمري الفصل الثالث والعشرون بقلم نورا ناصر
أضطررت لنزعك مني ، أثقلتني وانا لا انحني.
شمرني ع الكاع بكل قوته وانه انازع مايهمني هو اريد ارجع اكتلها الحقيرة اما سيف انتهى بالنسبة الي .
اريد اكوم رجع لزمني من زنودي ورجعني ع الكاع
يخزر بيه وويكوول بتهديد وعصبية اششش صوتج صوتج سكتي
خل اشرحلج .
عطت اليوم اله افضحكم سرسرية وصخين قذرين
ماكملت سيل الشتائم الي نطلقت من حلكي
لزم وجهي وكتم نفسي بيديه .
ويرجع براسي ليورا يريد يسكتني بكل قوته
يريد يخمد نيران الثورة الي نطلقت عندي ضده .
وهيات يكدر يسيطر على اللهيب الي تسرب من الحرائق المشتعلة جواي بهذي اللحظة .
كامت شهد اخذت الشرشف من جواها وتلفلفت بي
وتركت البطانية واجت صارت كبالي
متخصرة والشرشف الوردي ملتف على طولها
ليبرز تضاريس ومنحنيات جسمها .
كالت ترا هو زوجي واذا تفضحينه بعد احسن اكيف اني ترا منتظرتج تفضحينه حتى يعترف بيه كدام اهله وينكسر خشمج وانت تصيرين ولا شي .
كام سيف على حيله وسحبني ويا مقيدني بيد وحده ويسحل بيه .
لزمها من شعرها بالايد الثانية عاطت متألمة .
همس باذنهه سمعي ولج تنجبين لا اعرف شون اسكتج
هذا الحجي ماتحجينه بعد تعرفين شسوي .
شمرها على السرير وحضنت نفسها تغطي بروحها .
وكف مقابيلها وهيه ايدها مخليتها على راسها تمسح بي توخر المها .
وانه تحت رحمته ، ساد حلكي ومقيدني . واريد بس اخلص نفسي منه مااكدر .
شهد : شبيك سيف شسالفة هاي جزاتي ؟
باوع عليها كال سكتي و سمعن انتن اثنينجن والله العظيم الي تطلع حجايه من هذا كله اذبحها ومايرفلي جفن ..
لو اخلي براسها تهمة واشمرها بالسجن لو كلش عادي اتهمها بشرفها اهم شي مايعرفون اهلي والي تريد اطلكها بعد احسن تدلل .
والله يا شهد والله ياميسم اذا امي عرفت وصار بيها شي او ابويه محد يخلصجن مني .
ظل يهز بيه سمعي ولج ميسم ؟ رمقته بنظرات كلها حقد وكلها كره
كمل كلامه : هسه راح نصعد فوك
لغرفتنا نكمل حجي واحجيلج على كل شي نفس ماريد يطلع منج نصعد منا واذا شفتي احد ديري بالج تنطقين بحرف وتصرفي ولا كأنه صاير شي مفهووم ؟
اباوعله باشمئزاز واحس نفسي راح اموت
ظل يخض براسي مفهوووم مفهووم ؟
انجبرت اهز راسي واعلن موافقتي واستسلامي .
فتح الباب وبعده كاتم نفسي سحلني ع الدرج سحل حتى رجليه تزلغت ع البايات لان يرفعني وينزلني .
وصلنا لغرفتنا شمرني ع السرير طحت ع الطرف لزمت بالفراش وتسرسحت ع الكاع .
التفتت اباوعله واشهگ ..
شمر الطابورية يم الكنتور ، الكنتور كلش عالي وبي تاج من فوك ، راح صعد ع الطابورية وظل يدور
الى ان طلع صندوك صغير ، شمر ع السرير
ونزل من على الطابورية ، وراح فتح المجر وطلع سويج سيارته ، اختار من بين المفاتيح المجلبة ويا السويج
مفتاح صغير ، واجه فتح الصندوك الصغير الي شمره
ع الجرباية .
هو يحوس وانه احجي ويا واعاتبه ليش هيج تسوي بيه سيف ليش ؟؟ ليش خطبتني ليش تزوجتني ، اهلك جبروك ؟ انه شنو ذنبي تظلمني وياك ليش مارفضت وين شخصيتك و رجولتك ؟
كال انجبي وسكتي ....
اجه كرفص كدامي ، سحبني من زندي بقبضة كلش قوية قرب ورقة كدام وجهي كال هااااج اقري .
باوعتله بعتب وندم ودموعي تجري ، خزرني وعاط بعصبية اقريييييي كتلج .
تمتمت شنووو هاي بعد وليش اقراها اصلا ماجاي اشوف من دموعي .
كال هذا عقد زواجنا اني وشهد !!
شهكت اباوع ع الورقة الي هيه العقد احاول استرق بنظري كلمات واكد كلامه وارجع اباوع عليه مصدومة!!!
باوعتله تمتمت : شوكت تزوجتوا ؟
جاوبني وهو يخلي ركبه ع الكاع : قبل لا اتزوجج قبل لا حتى اخطبج . !!!
انصدمت اكثر لعد شكد جنت مخدوعة بي!!!
هاجت كل المواجع مصحوبة بشعور الظلم احس انو نور روحي انطفأ وجاي اعيش بظلام ، ظلام من كل جانب شكد صعبة اباوع بعيونه وما اشوفه غير انو غريب اول مرة اعرفه .
حجيت بوجهه طلكني سيف ..
كام على حيله كال تعبان ونعسان باجر نحجي بالموضوع عود افكر بلي يناسب مصلحتي .
كمت على حيلي اتوسل بشجاعتي حتى لا تخذلني .
حجيت بوجهه بقسوة واصرار : لا مو تفكر طلكني وتزوج شهد كدام اهلك وفضني انا تعبت بعد ما اكدر اكمل وياك باجر اخابر اهلي يجون عليه .
عاط وين تليفونج ؟؟ وظل يدور بالغرفة ..
الى ان لكاه واخذه وظل يفتح بي يريد يطلع الشريحة من عنده .
رحت اريد اخذه منه دفعني حيل ومامهتم وين اوكع وين انصدم وحتى اتعور مايهمه عبالك يتعامل ويا كرسي او اي قطعة من الاثاث .
صيحت بوجهه جيبه جيبه خليني اخابرهم ينقذوني منك ياجبان .
كام ضربني على وجهي حسيت بوجع قوي ، لزمت خدي باوعتله بكره : محد مد ايده عليه قبل غيرك والله انت عديم رجولة .
رجع ضربني لزمني من حنجي حييل حسيت راح يقتلع راسي همس بفحيح كله عجرفة : يامطية ولج انت من بيئة متخلفة اهلج اموتييج كتتل وجايه يمي تتعزين لو ما اني جان هسه انت متزوجة ذاكه واول ليلة انت بالمستشفى بس غير اني محترمج .
_ والله اهلي يشرفونك ويشرفون الف من امثالك باجر بس تطلع افضحك كدام اهلك انت وذيج النذلة .
رجع ضربني على ظهري ولزم شعري حيييل ويعت بي بقووة حسيته راح يملخني جسمي كله يرجف بس ماجاي اكدر اسكت .
_ انت بس فتحي حلكج بحرررف ووواحد وشوفي شراح يصيرلج اله اذبحج واكوللهم شفتها وي واحد وجماعتي هواي اله اصورج وياهم واسلمج لاهلج يذبحوج .
شمرني وكعت باوعتله واتحسر صدك تسويها هسه بين وجهك الحقيقي مو ؟
كلشي توقعي مني ميسم لذلك سدي حلكج احسن لمصلحتج دا احجي.
انت شنو من بشر تورطت بيك انه لا انه ورطت روحي طلكني وديني لاهلي وديني ماابقى عندك ولا لحظة وانت شهد عيشوا حياتكم ماعليه بيكم بس طلكني .
كام على حيله كسر السيم كارد مالتي تكسر بيده وشمرها بالزبالة كال اطلك بس موو هسه .
كمت على حيلي كوة وامشي وراه اضربه بقبضة ايدي على ظهره واحجي : جا يمته ها يمته اريد اليوم كبل باجر ماابقى دقيقة عندك كتلك ترا والله افضحك انته وياهه .
رجع لزمني من ركبتي خنكني حيل مطلني ع السرير صار فوكاي عيونه عبارة شيطان مو بشر
مااحس تجاهه بس بالكره والحقد والالم ع اثر ضربه ووجعه اليه .
_ تتحديني ميسم ها ولج تتحديني اكوم هسه اخذج واشمرج ببيت دعارة وافرغ بحلكج بطل عرك واوديج لاهلج واكوللهم شوفوا هايه بنتكم ؟
ظليت ارافس برجليه حسيت راح امووت مابقالي غير دقايق واموت بيده هوى ماجاي يوصل لرياتي
وهو ظل يضغط على ركبتي احجي كولي تسكتين لو اسوي بيج بلاوي مو بلوى وحدة ها شكلتي .
وخر ايده مني ظليت اكح وطعم الدم بحلكي شفتي نزفت على اثر راشدياته عمري مامضروبة بهاي الطريقة
انه الي جنت مدللة ابوي خزرة ماجان يخزرني وامي تباوع لحلكي من احجي صفيت بيدين هذا الحقير ..
تهديداته خلت جسمي يصاب بقشعريرة
وتملكني الخوف وكلشي اتوقع منه الي شفته منه لحد الان يأكدلي انو رجل جبان مصلحجي يخاف من اهله اهم شي ماينفضح كدامهم .
رجع يريد يضربني اكتفيت ماريد اتألم اكثر
ابتعدت وانه ع طرف السرير صرت بنهايته ع الطرف الثاني اريد انهزم منه .
وهو يخزر بيه يريد مني جواب هااا تسكتين وتسدين حلكج لو اطيح حظ حظج ؟ وحظ الي بلاني بيج ؟
اسكت والله اسكت بس انت طلكني سيف انه وياك مانرهم .
اطلكج بس مو هسه كتلج لا تلحين ، اسمعي اذا اسمعج مخابرة اهلج لو حاجية حجايه يم اهلي توقعي مني كل شي افتهمتي .
رديت بخوف ماعليه بيك ماعليه بس اوعدني تطلكني تصرف برجولة ولو مرة وحدة بعمرك وطلكني وردني لاهلي .
راح قفل الباب وخله المفتاح بيده ورجع تمدد ع السرير كال عجبج الكتل مو ؟ اجي اشك حلكج هسه ؟
كافي تتجاوزين واصلا اني ما ميت عليج والله لو ما ال*** شهد دكت بيه الناقصة واهلي ضغطوا عليه فلا اباوع بوجهج .
حسيت قلبي ينعصر من الالم ، خيبة ، ذل ، واهانة ووراي الشماتة تنتظرني ياربي شنووو اسوي يااربي شراح يصير الي .
يمته تطلكني ؟
_ لاتدوخيني اريد اخمد وانه اقرر يمته ها على شرط انت تكولين لاهلج ماريده وانت الي تقنعينهم اني الي الصافي بس يا ويلج اذا كتيلهم ع زواجي من شهد هاي الي الله كتبها عليج .
ماعليه بيك ولا عليه بيها المهم اروح لاهلي ...
وشراح تكوليلهم بلله ؟ كال هيج وابتسامة استهزاء على وجهه . تكوليلهم ماينطيني حقي ؟
_ ترضاها على رجولتك ؟
_ لا ماتسوينها لان اهلج يكطعوج وصلة وصلة ويشمروج للجلاب .
سكتت عنه تافه عباله يضحك وانه بيا حال !!
كال اني اكوللهم ماتشيل شواربها ماريدها .
سكتت عنه همين ، ظل يضحك ..
كتله ابجي اتظاهر بالمرض كل شي اسوي المهم يطلكوني منج .
اخذ المخدة وشمرها عليه يلله خمدي دوختيني .
تعاي نامي هنا .
كمت ونزلت من السرير وانه احجي : ماانام يم واحد توة جان نايم يم وحدة اييع .
_ ميت عليج اني يطبج مرض فووك ستين مرض ..
بكلبي كلت يطبك انته ويخلصني منك عار ع الرجولة والاخلاق والزلم انت .
جاب المخدة خلاها فوك راسه باوعتله لعبت نفسي منه
نمت ع الكاع وجسمي ينبض بالالم من راسي لاخمص رجليه .
اباوع ع السكف ومية فكرة اجت ابالي وتمر عليه تهديداته من صدك خوفني ماكو غير اصبر
كعدت الصبح شفته ماكو ع السرير باوعت ع الساعة ب ٨ رحت غيرت ملابسي الي تمزعت بسببه وغسلت وجهي ونزلت جوا ...
سمعت صوته بالمطبخ جاي يسولف وجنه صوت شهد جاي تعاتبه بهمس ، شعنده مارايح لشغله اليوم ؟
الجبان خايف يروح ونفضحه يريد يسيطر ع الوضع
صار مايهمني بس اطلع منانه واخلص طز بي هو وياها حتى الغيرة انشالت من قلبي وصرت حتى ما اغار عليه .
حتى مارحت للمطبخ كبل رحت للهول صبحت على عمي وعمتي والجد كعدت يمهم صاحتني عمتي
كالت تعاي كعدي يمي عندي شغلة وياج .
بلعت ريك وكمت من مكاني رحت كعدت يمها
همستلي شبيكم البارحة صوتكم طالع وهذا شبي وجهج هيج مزورك سيف ضربج ؟
ظليت محتارة شنو اجاوبها ...
ها اي عمه تعاركنا كلي لسيف خلي يطلكني احنه مانرهم سوا والله هو مايحبني ولا انه احبه .
خلت ايدها جوة حنجها : يا صدك تحجين ؟ بعدكم توكم بأولها الناس شتكول عليكم شتكول علينا دحولي غيرها بعدين اني احجي ويا سيف اطيح حظه شون يمد ايده عليج .
عمي جان لاهي يسولف ويا الجد كال شكو صدك شبيكم البارحة مبين جاي تتعاركون جنتوا واحنه نايمين .
دنكت مارفعت راسي عمتي جاوبته بيناتهم ان شاءالله تنحل ماكو اثنين ماتصير بيناتهم مشاكل .
وهما كبار وواعين يحلونها ان شاءالله .
الجد باوعلي كال هيه هاي مرة ياهو ؟
عمتي جاوبته مرة سيف وانه حجيت بكلبي
سيف المصخم سيف الملطم من ساعة السودة .
عمي والجد كاموا وانه عمتي طبينه للمطبخ
شفت بس شهد ذاكه ماكو ، شهد لابسه نيلي ضاب على جسمها وشال وردي
عمتي بس شافتهه شهكت .
هي لفت روحها وكالت بدلع صباح الخير
لا انه ولا عمتي جاوبناهه وعمتي ظلت فاتحة حلكها
فاتت من يمنه وطلعت .
وراها بثواني فاتت سارة شايلة بنتها وعمتي كعدت ع الكرسي تتحلطم شون شهد نزعت الاسود وتضرب على فخذها
_ نسته بساع هذا ابو ضحكة الحلوة والنفس الطيبة بس بيها خذته وراحت عمت عليه فكرته وموتتته البومة وهسه كاشخة ولابسة ولا هامها .
سارة : خالة ترا ميصير هذا الحجي الي دتكوليه شهد هم اخذت نصيبها من الحادث وشوفيها شلون دتعرج وراح تبقى هيج طول عمرها ، والي صار كله قضاء وقدر . وهو الاسود شنو هو مجرد قطعة قماش لايرجع ولابي فايدة .
جاوبتها عمتي ؛ ولج انتي سكتي عني مو وكت مواعضج وحكمج هسه خليني خليني .
_ خالة هو الي يكول الحق دوم ينزعل منه اني على مودج والله .
ظلن يحجن وانه طلعت من المطبخ طليت ع الكراج شفت سيف جاي يغسل سيارته ، عضيت شفتي كون اكدر اغمه ومحد يشوفني لو اشمر عليه النعال ومحد يدري بيه اخخخ شكد حاقدة عليه .
فتت من يم الممر طلعت شهد من غرفتها
باوعتلها وخزرتها ..
ضحكت وهمست شفتي شلون البارحة خليتج تستوين على نار هادئة لا وفوكاهه حصلتي كتلة حييل وبو زايد تستاهلين .
تقربت منها صكيت اسناني انت وحدة ساقطة وبلا كرامة مقرفة وصخة ولج انه يتزوج عليه وابقى دقيقة يمه بس انت بلا احساس .
ههههي اول وتالي انت منكلعة منا واني الي باقية هنا يلا دي ولي .
صفكت ايديه وغميتها اي انكلع منا احسلي ماعيش ويا العار الافندي مالتج اخذي شبعي بي خلي يشبعج سحل بلله خلي نشوف شوكت راح يعترف بيج .
مااشوف اله ايد انخلت على كتفي وهمس شعدجن شبيجن هااا شكلنا احنا والله الي اسمع الها صوت اله اشك حلكها .
شهد ضحكت كالتله غير دا اكوللها حمدلله ع السلامة ع كتلة البارحة ..
انجبي وسدي حلكج شهد وانت ميسم صعدي جيبيلي ملابس ناشفة يله خل اغير هاي المبللة .
وخرت ايده من كتفي منقرفة ومتوجعة وخليت ايدي على مكان قبضته افرك بيها من كد الالم الي سببه الي .
التفتت عليه وانه ابتعد ليورا ابتعد عنه بخطواتي
حجيت بحماس : ها تريد ملابس طلعة تريد تطلع مو ؟
تقرب مني كم خطوة : لاتفرحين ماريد اطلع جيبيلي تراك يله .
صعدت اركض واتمتم بكلبي اجيبلك جفن كون يجفنوك بي اكررررهك .
جبتله ملابس ، دورته لكيته يم سيارته
صحت عليه اجه كال علكيهن بالحمام
مالة الجوا اكمل غسل السيارة واجي
حتى هاي ماتدبريها شعندج جايبتهن الي
هنانه تريدين ابدل هنا بالبرد ؟
اريد اروح وانه مقوسة شفايفي
يمعنى شمدريني . اجت من وراي عمتي .
كالت تعال سيف عندي حجي وياك هاي شمسوي البارحة ولك .
باوعلي خزرني خزرة تموت عضيت شفتي اباوعله بتوسل واهز راسي بمعنى والله ماحجيت شي .
اجه هو يم الباب بسرعة يمكن بهاللحظة كتله الخوف عباله حجيت ، وانه اريد اروح لزمني من ملابسي وكفني كال اوكفي لا تولين .
امه كلتله ولك شهالاسلوب هاي شمسوي بيها البارحة ماستحيت من عمك اذا اجو اهلها فجأة وشافوا وجهه مزورك شيكولون احمد ربك ابوك ماانتبه والا جان طيح حظك .
كاللها اووو يوم لانظلين تدخلين بيناتنه مو ردتيني اتزوج ورحتي خطبتيها الي هذا هو لا احد يتدخل بيناتنا وثاني شي هيه وكحة وعرمة وماتنجرع ابد ادبتها شويه مو صح ميسم ويغمزلي .
باوعتله ببببقرف ودرت وجهي واختفيت من كدامهم وظلوا هما يحجون .
الايام البعدها انتكست صحتي صرت حتى
انزف رغم صار عشر ايام بس من مخلصة
اكلي قل ، نهار كله بس ابجي واهلي مايسألون
وييييينج يمه والله محتاجتج حازم وينك
ليش ماتسأل عني تشوفني تدورني .
احس روحي مربطة ومقيدة
خاااايفة حيل .
سيف يروح ويجي يهدد وانه جبانة
ماادري بي هو الجبان مو انه لان بس الجبان
والخايف يهدد مرة ضعيفة مثلي .
اجه من شغله وانه ع جرباية الدموع ماتفاركني وصارت تسليتي الوحيدة
انام وابجي ، كال حازم خابرني وسأل عنج
كتله تليفونها عاطل ، راح اخابره احجي وياه .
رغم بؤسي وحزني ويأسي شويه فرحت بس اعرف ماكو خلاص من سيف .
خابره وحجيت ويا حازم عتذر مني كال وردة تعبانة من الحمل كلش يومية مستشفى ومغذي مايدخل شي لمعدتها كرهت الاكل فد مرة ووزنها راح يوصل للاربعين وابوي صحته تعبانة كلياته مأذياته حيل
ظليت ابجي يعني خلاص ماظللي احد
عذرتهم كلهم اريد احد يجي ينقذني منا
ويخلصني ، جاي اكره حتى روحي .
ورا ماخلصت من المكالمة شمرت عليه التليفون
ونترت بوجهه شوكت تطلكني .
كام من يمي موووو هسه بعد
كمت وراه وقوتي متلاشية ومنهكة
شوكت بعد مو مليت تعبت منا انت مو مخلص وكت وياهه فضني يلللله مااتحمل بعد .
اجه يمي لزمني من شعري كتلج بعد يعني بعد
اريد اروح دكتورة وديني الاهلي النزف ماجاي يوكف تعبت .
اني اخذج للدكتورة ....
ماريد منك شييي وديني لاهلي سيف
صيح عليه سدي حلكج وانجبي
اكرهك حقييير عديم الرجولة
اجه ضربني وطلع كمت اشوف وجهي خريطة الوان .
تشوفني عمتي تحجي عليه ليش تلاسنينه وتروح ترزله وتحجي عليه ويتدخل عمي ويرزله ويحجون وياي همينه كسبي وبالسياسة ومايدرون بأبنهم شنو مصخم من وراهم .
اكوللهم انطوني تليفون خلي اخابر اهلي محد ينطيني
يكولون تتعودين كل بداية زواج تصير مشاكل
مايدرون مشكلتي شنو ؟
تجي سارة تهون عليه انزل شهد تتشمت بيه وتضحك وبالليل ينزل يمها ويجي فوك يسبح انقرف منه ...
...حمدت الله ع نزف حتى لايتقرب مني .
كاعدة بغرفتي واسمع عمتي تصيحلي
فتحت باب الغرفة مالي نية انزل
بس سمعتها تكول تعالي الحجية ام حاتم ع تليفون تريدج .
طلعت اركض ونزلت ادبج ع درج
اسمع سيف يكوللها كوليلها نايمة .
وهيه تكوله لا ميصير يقلقون عليها خطية .
خمطت التليفون من عدها وجاوبتها بانفاس متقطعة .
ييييمه شلونج ؟
هلا يبعد امج انت شلونج بالي يمج شخبارج .
بجيت غمضت عيوني حيل وتسربت دموعي
جريت النفس كوة شحجي وشكول .
كتلها بصوت كوة يطلع وخانكتني العبرة
تعاي اخذيني .
كام سيف جر التليفون مني .
شونج خالة كاللها
وانه بكلبي كلتله وخلخالة تخلخل عضامك ان شاءالله .
لا هيه زينة الحمدلله بس مشتاقة الكم وان شاءالله اجيبلها تليفون وترجع تتواصل وياكم .
خالة راح يخلص الشحن نشحن ونخابر عليج
خمطته منه لزم ايدي لواهه وامه تجرجر بيه
كتلها يمه انه مريضة تعاي
كالت شبيج خاف حامل ؟
لا لا مو حامل والله ابوي شونه اريد اسمع صوته
ابوج اخذه حاتم وراح للهند حتى يتعالج كلياته مأذياته سودة عليه . وانه بلكي اشوفلي احد يجيبني الج حازم مايكدر يترك وردة مريضة يمكن اجي انه واختج ورجلها اجيج اشوفج ديري بالج على نفسج .
تمتمت ان شاءالله وانه ميتة قهر على ابوي .
ودعتها كوة صوتي مايطلع .
صعدت اركض فوك تعبت حيل احس نفسي جاي اكبر اسرع مما يسمح بي الوقت
احس حياتي مثل فلم تم تسريع الوقت بيه
...
وراها بأيام صعدتلي سارة
كالت تعاي خالة تكول ابن عمج جاي يسلم عليج .
انتفضت من الفراش اعصر بيديه
ابن عمي منو ؟
يصيحوله ابو مهند ..
شهكت عياش ؟ شجابه امي الحجية وياه لو وحده ؟
لا ماكو مرة وياه وحده . وعمتي تكول يله بسرعة بس يسلم عليج ويروح مستعجل مايبقى .
نزلت سارا .
ظليت اعصر بيديه ، اكل بأظافري
محتارة انزل لو لا ماانزل اباوع للساعة
هسه وكت جية سيف مابقى شي
انزل خاف يتشمت بيه .
ركضت للمراية باوعت لوجهي زراك جوه عيوني
شك بخدي من فوك
شفتي الفوك شبه وارمة
شفتي الجوة يحيطها حمار على بنفسجي .
شماتة عياش اهون عليه بمليون مرة من هذا العذاب .
خليت على راسي شال ونزلت ..
وانه بالممر اجاني صوته الرجولي الاجش ، يسولف ويا عمي ..
وصلت لباب الاستقبال شفته كاعد ع التخم مقابيل الباب ..
لابس قميص رصاصي مشكل رداناته
وبنطرون اسود .
دخلت باوعت عليه ووكفت ارجف .
واعصر بأصابعي .
بس شافني هو وكف يباوعلي بنظرات كلها هلع
كال بصدمة : ميسم !!!!
صارت عيوني كباله عبارة عن غيمتين تمطر
نزلت دموع الالم ، الحزن ، والندم ......
