رواية ارهنت عمري الفصل الرابع والعشرون بقلم نورا ناصر
وها نحنُ من جديد
تسائلتُ قبل مجيئي كثيراً
اهذهِ المرة سأهربُ منكَ؛ ام سأهربُ اليك
ايُعقل ﮼ان تكون لعنتي؟
﮼لا ﮼لا فأنا الان اراكَ رحمتي ونعمتي ودليلي في زحمتي!
انتشلني من محنتي
انتشلني من كسرتي
انتشلني من حيرتي
خذ بيدي وارجعني لمدينتي...
وليكون لك ديناً في رقبتي...
انتشلني...
انتشلني...
(بقلم الكاتبة المبدعةرقة♥️
♡♡♡♡
بقيت اباوع على عمي وعمتي وهم يباوعون عليه بأسف ونظرات تحذيرية ، وارجع اباوع على عياش برجاء .
قطع المسافة الي بيني وبينه بكم خطوة
وصار يمي يباوعلي بفضول واهتمام
وبنظرة ثاقبة وبيها شفقة .
حسيت للحظة انو ماراح يتشمت بيه
عرفته راح يتعاطف وياي ويسندني .
ولهيج تشجعت وحجيت عبالك اقوي نفسي
بي .
حجيت بنبرة كلها توسل وانه اعصر بأصابعي حيل
: ابو مهند الله يخليك اخذني وياك ووديني لاهلي
انه راح اموت هنا والله راح اموت .
عمي وعمتي كاموا من مكانهم بسرعة اجو وكفوا يمي
عمي كال بنيتي هاي مشاكل بيناتكم تحلوها
لاتدخلين اي احد بيها وروحتج لاهلج مو حل ترا .
عياش كال لحظة عمي خل نسمع منها
كتله عمو هيه ياريت ع المشاكل ترا ابنكم مصيبة ومسوي بلاوي ويهدد بيه انه مستحيل ابقى يمه هنانه بعد اخاف على نفسي منه .
_ احنه نحلها بنيتي يله روحي هسه بعدين نحجي بالموضوع ابو مهند جاينه خطار عيب نكدر عليه ونضوجه .
_ انه ماريد اضوجه اريد منه معروف يردني لاهلي وسيف صارله شكد يكفخ بيه وانتوا ماسويتوالي حل
بس حجي ، هسه تردون تسوون حل !؟
عمو انه ماابقى هنا بعد .
عياش : وليش يكتلها هيه شمسويه حتى يكتلها متجاوزة عليه سابته؟
وظل يطل بوجهي باوعت بعيونه وغمضت
هو كال : هذا شمسوي بوجهه وانه ادري بميسم فقيرة ماتسويها وتغلط بس هذا ابنكم انه اعلمه هو وينه خلي يجي يواجهني وانت ميسم روحي جيبي عبايتج وتعاي امشي اوديج لبيت عمي .
عمي ظل يحجي ويتجادل ويا وانه ماعبالك الوهن والضعف شالني شل بسبب قلة الاكل والنوم والقهر
ولا عبالك مريضة ، طلعت اركض وانوب سمعت صوت سيارة سيف تطب للكراج..
زادت سرعتي ، صعدت فوك طبيت للغرفة سلتت العباية من الكنتور طاحت وياهه ملابس مااهتميت رحت طلعتلي حفاية وخليتها جوا اباطي نزلت جوا اركض وانه اسمع صوت باب البيت تنفتح .
ركضت طبيت للاستقبال وصرت ورا عياش عبالك هو قوتي الي اتقوى بيها بعد ماجان اكبر مصدر خوف الي
لكن حاليا سيف اعظم واكبر قلق وخوف .
بعده عياش جان جاي يحجي ويا عمي وبنفس الوقت بيده التليفون ويحجي وجنه جاي يخابر ، بس دخلت باوع عليه :كال: يله ترخصت من ابوج وكال ارجعج وياي .
كاله عمي مايصير تاخذها هيه على ذمة رجال خلي يجي ع الاقل ترخص منه احنه شنحجي وشنكله اذا سأل على مرته .
جاوبه عياش هو ووينه رجالكم خلي يجي يواجهني وانه اعرف شون اتصرف وياه .
دخل سيف متفاجأ وانه ختلت ورا عياش...
وبيدي عبايتي وبس اطل عليه ميتة خوف وادعي لساني يلهج بالدعاء مابطلت يعدي هاليوم على خير ويطلعني منا بسلامة جسمي احسه تعب من الكتل والضرب احس تشوهت ..
وانه واكفة ورا عياش واشوفه يدافعلي احس بقوة عجيبة ماحاستها من كبل .
كال سيف شنو صاير هنا ؟
جاوبه عياش بعصبية انت شون تتجرأ وتمد ايدك على بنت عمي شعبالك ماوراها زلم ؟
رد عليه سيف بصياح ونتر وانت شكو وتحاسبني معليك لاتتدخل اضربها اكسر راسها شي مايخصك .
لا يخصني ونص والي يرشها بماي ارشه بدم وهسه راح اخذها وياي اوديها لبيت اهلها وانتوا تفاهموا ويا عمي
من يرجع .
سيف : خوش رجال انته وتاخذها من بيتي بكيفك انت
وظل يأشر يله ميسم امشي صعدي فوك .
عياش بعصبية وقسوة : رجال وغصبا على صماخك بلله اريد اشوف شلون راح تمنعني ؟
تقرب سيف وعياش صار بوضع الاستعداد
وانه واكفة وراه ولازمة مهند من ايده
لان هو جاي ويا ابوه مهند عمره ٥ سنوات هسه .
عمي صار بيناتهم كاله خلي ياخذها من يجي عمك نروح نتفاهم وياه لاتسويلنه مشكلة هسه وانت هم غلطان وياهه .
ظل سيف يباوعلي ويصيح امشي صعدي فوك لا ترا والله ماتشوفين خير من عندي .
عياش تقدم على سيف يريد يحجي ..
بلا وعي مني لزمت عياش من ايده .
وصيحت بوجه سيف :- لا والله مااصعد صار ١٠ ايام تهددني بشرفي وساعة تكولي اشمرج ابيت دعارة ساعة تكلي اشربج عرك ساعة تكلي اصورج ويا جماعتي بوضع مخل وافضحج وتريدني ابقى هنانه .
عياش فتح عيونه على اوسعهم يباوعلي
واشوف شهد وسارة واكفات بباب الاستقبال يتفرجن .
عمي كال شلج بهالحجي هذا يابنتي عيب سيف مايسويها هذا زوجج وانت عرضه .
جاوبته لا يسويها عمو يسويها انتوا ماتدرون بابنكم شمسوي .
سيف هم روحه يريد يهجم عليه وظل يغلط ويفشر
ادبسز طايحة الحظ تسكتين لا اطيح حظج وامشي صعدي فوك يله .
مد ايده يريد ياخذني دفعه عياش بكل قوته
ارتد للخلف بخطوات ولزم بالحايط .
صدحت حنجرة عياش بتهديد دير بالك تمد ايدك عليها والله هاي الي الله كتبها عليك .
صيح سيف شتسوي ؟ شتسوي بلله وانتَ ابيتي اريد اشوفك شسوي ؟
جاوبه عياش اكسر ايدك وراسك لو مو ابيتك هسه لو مادري وين خاب لو هسه بالسمه هم اكسرك .
عمي ظل يفاكك بيناتهم ويصيح ع سارا تخابر رأفت يجي .
اجت عمتي تتوسل بيه يمه صلي على محمد اكسري الشر وصعدي لغرفتج .
باوعت لشهد تباوعلي . خل اسهللها امر كبل لااروح لان كلي ثقة بعياش راح ياخذني منانه .
جاوبت عمتي والله عمه ابنج متزوج بالسر من وراكم
..
عمتي شهكت وعمي انتبه عليه وسيف عله صوته وظل يصيح ويسب ويغلط بيه ويصيح سكتي لااشك حلكج جذابه.
صيحت بوجهه وليش اسكت بلله من شنو خايف انتَ اعلنها وفضني مو متزوج كبلي طلكني انه وخليك ويا مرتك .
اباوع لشهد مبتسمة خطية الحية اجاهه الفرج
صاح سيف جذابه منيلج هالحجي تتبلين عليه ها تردين تشردين وياه تحجين حجي ماله صحة من الاساس مبين حنيتي اله مو ؟ ويأشر على عياش .
عياش تحرك من مكانه وخر عمي بعصبية من كدامه
ولزم سيف من قميصه حيييل
مخنزر عيونه بوجهه : ولك تحجي عدل لا ارغل ببطنك هسه شنو هذا الحجي هاي عرضك ياخسيس اذا ادوس ابطنك هسه احد يلومني ؟
يحجي ويا ويخض بي بقوة وعمي يباعد بيناتهم
صار واحد لازم الثاني ويتناطحون وعمي فاككهم .
عمي كالي اتقي الله بنيتي شنو هالحجي ؟
كتله والله عمو متزوج ومتزوج شهد هم بعد وانه بعيني شفتهم سوا وسيف بنفسه شوفني العقد .
شهد كيفت ، عمتي لطمت على صدرها وظلوا يحققون وياها . شهد باوعت لسيف وسكتت وسيف يصييح جذابة .
كتله انه مو جذابة واذا انه جذابه اسأل هذا الطفل
خو يفتهم ويعرف يحجي وجريت حسين ابن شهد
وكتله حسوني عمو سيف يجي يمكم بالليل وينام بغرفتكم لو لا ؟
ظل حسين يهز براسه بمعنى اي وكال بصوت طفولي بريء ومبحوح اي يجي .
لزمني سيف من ايدي وكال وانتي منو وتشهدين طفل عليه ولج ومنو يصدك بطفل ؟
لزمه عياش وخره مني .
عمي باوع لشهد كاللها شهد صدك هالحجي ؟
هي باوعت لسيف بنظرات قلق
وتمتمت عمو والله اخاف منه احجي .
راحت عمتي الها وكبت العيطة
عياش اشرلي اللبس عبايتي
لبستها ... عمي وعمتي صاروا يحجون ويا شهد وسيف وصياحهم عله .
نريد نطلع سيف ظل يصيح بعلوو صوته مييييسم
لزمه ابوه وكال خليها تروح تعال فهمني هالحجي صدك ولك مااستحيت ماخجلت شراح اكول لاخوي انه هسه
تجاهلنا صوته وطلعنا من باب الاستقبال مثل البايكله بوكة عياش شال ابنه وانه امشي وراه واتعثر .
حتى الحفاية ظلت بيدي فتح باب الصدر وخله ابنه بي وانه كعدت يمه دنكت لبست الحفاية بالسيارة ..
عياش دار وصعد شافني جاي اللبس بيها ظل يضحك .
حرك السيارة وكال والله مو هينه بنت عمي وكفتيهم على تك رجل .
ابتسمت بقلق منك نتعلم ..
كال شبيج خو ماخايفة مني ولج ؟
ها لا لا ماخايفة الي شفته هنا رعب حقيقي اكثر منك .
وانا شنو ولج ؟
ماكو شي والله احجي والتفتت وراي ودموعي مغركة عيوني .
كال لاتخافين محد يكدر يأذيج وهسه ابتعدنه عنهم صاروا ورانا .
مستمرة ابجي ميتة قهر ماجنت متوقعة بيوم عياش ينقذني هواي اذيته بالكلام سابقا وجاي احس بالندم من بين كل الاحاسيس الي مقيدتني بهاي اللحظة.
كال اخذج تزورين بلكي ترتاحين ؟
باوعتله وشهكت بالبجي : ازور امي ؟
دار وجهه يباوع للطريق بنظرات كلها قوة وضاغط على الستيرن بقبضة قوية كال : اي اوديج تزورين امج تدللين ولا يهمج .
جريت نفس وارتكيت ع الكشن ، مديت ايدي حضنت مهند من اكتافه ، باوعلي عياش ...
كال خو مابعدج خايفة مني ؟
هزيت راسي بمعنى لا وباوعت ع الطريق بنظرات فارغة ..
_ ، هذا المطي هيج مأذيج وانت ساكتة ؟ ليش ماخابرتي ليش ماحجيتي اهلج ماعدهم علم بلي صارلج ؟
مسحت دموعي بظاهر كفي وهزيت راسي مايدرون اهلي ، اخذ تليفوني وكسر شريحتي .
الكلب اال**** ، لا لا يروح فدوة للجلاب ولل *****
عديم الرجولة والشرف الخسيس هذا منين طلعلج ماتكليلي والله يا ميسم اذا ماتطلكين منه انت كبشي ماتفتهمين وانت الي راح طيحين حظج بيدج .
زدت بالبجي وصرت اناشغ ....
كال كل شي يهون يبت عمي كل شي يهون تطلكي منه وخلصي ولاتخافين من ناحيتي ماترديني مو لازم انه بعد مااتدنى منج ولا حتى اطلبج الي ولاتخافين او تخلين شي يأثر عليج بعد رجعي لمدرستج وعيشي حياتج .
باوعت عليه وكلبي رق لكلامه للحظة حسيته صادق
شال كلينكس من يمه ومده الي
كال هاج مسحي دموعج غركتينه .
اخذتها وانه مبتسمة ، كال لاتضوجين كافي اعتبري طلي وانذبح جوا رجليج اهم شي انتِ سالمة .
ابتسمت بألم وكلت بنبرة كلها وجع تدمرت تدمرت حيااااتي .
لالا لاتكولين هيج يمعودة لا اول وحدة ولا اخر يصير بيها هيج ورجلها يطلع ناقص ، بس انت سباعية واخذتي حقج وماسكتي .
بلعت ريك وجريت نفس وهو سكت بعد ماحجه ومهند نام على رجلي ، مديت ايدي العب بشعره واباوع بالفراغ ودمعي مانشف .
عياش : دخلت لبيتنا تلكتني امي تعاتبني ليش مااحجي ويه اخوي سعيد ، مديت ايدي للحيتي افرك
بيها بحيرة بلله هسه شجاوبها ؟
انه كوة خليته يرجع للبيت لخاطر مرته وبناته
لان يوميه تتوسل بيه لمن ماكتلها خابريله
خل يلفي للبيت بس ماريد لسانه على لساني .
وفعلا رجع سعيد للبيت بس انه حتى مااشتهي اباوع بوجهه ، وحاتم اخيرا اقتنع وطلك مرته .
عمي حالته موزينة اخذه حاتم وراح بي للهند
وانه اخذت مهند وطلعت للزيارة
ورحت لبغداد وابالي ميسم اريد اعرف اخبارها
اكو شي بيه يأمرني اروح اشوفها واعرف احوالها .
من رحت شفتها انصدمت وجهه مبين شابعة كتل
تذكرت سميحة وصفنت لحظة اقارن بينهن!!!
لا مامعقولة ميسم وسميحة فرق السمه عن الكاع
سميحة تفشر وتغلط وتتجاوز ، ميسم صحيح باخر
ايام صارت لسان بس مااكدر اقارنها ويه سميحة
فرق بينهم مثل فرق الثرى عن الثريا .
وهذا رجلها من اول ليلة مدري شلونه
حتى بسرعة استسلم للشرب وللسوالف المكسرة
جانت الي غاية من دزيتله حسن ابن عمي
بلكي عمي وميسم يشوفون اخلاقه وكبل فوات الاوان
بس ميسم الله يسلمها بقت معاندة واصرت تروح وياه
ظليت الوم بروحي انه جنت قاسي عليها حقها تخاف مني وتنهزم ، كله مني انه هم سبب بلي صار الها
واحنه هناك وخابرت عمي حجيت ويا
كتله انه يم بيت عمي ابو اسعد ببغداد
و ميسم موزينة هذا الشفية كاتلها ومأذيها
وتريدني ارجعها وياي للبيت وانه خابرتك اترخص منك
ترا راح ارجعها وياي .
كال رجعها من ارجع انه اتصرف وياهم .
بعد العركة الصارت طلعنا منهم وطلبت اوديها تزور امها رحنه للمقبرة ظلينا ندور على قبر امها .
خابرت على حازم وانطيتها التليفون تحجي ويا .
تسأله ع القبر ظلت تحجي وتشهك .
ميسم : وصلنا للنجف ولمقبرة وداي السلام وانه احس روحي تتأكل من الداخل على كد الوجع والالم .
ومتعجبة على نفسي شون ماخايفة من عياش
وانه جنت ارجف من اشوفه .
ما اندليت القبر وظلينه نسأل خابر على حازم وانطاني احجي ويا انصدم حازم كال انت شسوين ويا عياش ؟
جاوبته وانا منهكة وتعبانه بعدين حازم بعدين هسه كلي وين قبر امي انه مااندل ترا ولا اعرف وين .
كال انطيني عياش انه اوصفله .
انطيت التليفون لعياش وظل يحجي ويا باوعت لمهند خطية طفل وبنص المقبرة خاف يصير بي شي بسببي حضنته وبست راسه .
خلص مكالمة عياش وكال يلله اندليت مقبرة اهل امج يلله امشي كبل لايصير المغرب .
انحنى واخذ مهند وشاله ولزمني من ايدي ..
صعدت بالسيارة .
مشينه مسافة ووصلنا للمقبرة اهل امي نزلنا من السيارة .مهند بقى بالسيارة
شفت قبر جدي صاير بالبداية .
سمعت عياش يكول مادري يخلوني ادخل لمقبرتهم
لا لو هم ممنوعه عني مثل منطقتهم .
باوعتله وجانت دموعي على خدي
رحت اركض واتعثر اطيح واكوم
اريد اوصل لقبر امي .
وصلت وشمرت روحي ع القبر وانه احجي واشكي
لامي كل الي صار الي .
انهاريت كلش ابجي واتمتم حتى مامنتبهة لروحي .
كعدت بالتراب ووعبايتي طاحت على جتفي
شالي تخربط ونزل منه خصلات من شعري .
حسيت عياش اجه وخرني من يم القبر
بعدني مني غسل وجهي بالماي
وظل يعدل بحجابي وشعري ويربط شالي على ركبتي يعدله بدون خبرة .
كام وغسل القبر بالماي ولزم قرأن ظل يقرا يمي
وانه اسمع لتمتماته تخترق مسامعي
مكرفص وكاعد بصفي ويقرا .
حسيت براحة مو طبيعية ، كال يله امشي
ومد ايده الي . باوعت بوجهه .
وين جنت بالليلة الي انكتلت بيها امي ؟ شعندك بمنطقتهم بالذات ؟
نزل ايده وجر حسرة .
