رواية السكن الفصل الرابع والعشرون بقلم غدير الحيدري
من قال إن حبل الكذب قصير
كان يحاول أن يجر خيبته طويلاً
لكن الحبل انقطع منذ اول عقبة
•┈┈┈••✿❂✿••┈┈•
بلعت ريك
كلت بأرتباك
خالد: ها شنو شبيكم؟؟
كال حسين بعصبية
حسين: خير؟ شنو المناسبة حتى تحمد ربك؟؟
باوعت ع حازم
وجهو يضرب الوان
عدلت كعدتي وكلت
خالد: اجت رسالة من اهلي ابوية بخير، طلع خارج حديثة وتأخر وخافوا لا يلزمو داعش
حازم تنهد براحة
وحسين صار يستوعب الكلام
كمت وكلت
خالد: عن شنو دتحجون؟ كنت ملتهي وي اهلي
حسين باوعلي بشك
وكال
حسين: ماكو شي، طفوا الضوة نعسان اريد انام
طلعت برا
لحكني حازم
كال بهمس
حازم: غييير تنتبه لنفسك؟؟؟
بقيت اباوعلو
بعدها طلعت ادخن بالبلكون..
ما حجيت وي اي بشر
بقيت ساكت وافكر
وبداخلي منزعج من حازم
ثاني يوم طلعت للجامعة
لحكني حازم
حازم: خالدد جاي احجي وياك
جرني من ساعد ايدي
ودارني علية
خالد: شتريد حازم، متأخر عن المحاضرة
تنهد وكال
حازم: زعلان مني؟
خالد: كان لازم تفهم الموضوع قبل ما توصلني لهالحالة، مو تأذيني ع الفاضي
لزم ايدي وكال
حازم: خالد انا اخوك، وانا ما كنت فاهم الموضوع توقعت الخطوبة تخص اختة، بعدين هالخطوبة راح تصير اذا مو اليوم بعد فترة ليش ما تفكر بهالطريقة؟
احس اختنكت
جريت ايدي منو وكلت
خالد: حازم شتريد
حازم: عوفها، زهراء علوية وما ينطوها الك، وهي ما تحبك انت جاي تأذي نفسك وبس
مشيت وعفتو
احس كلبي يعصرني
جرني بقوة وكال بغضب
حازم: لا تتهرررب اسمعني ولا تسوي بنفسك هيج، ليش وصلت روحك لهنا؟؟ ضيم اهلك كلة ما وصلك لهالحالة، اول ما اجيت كنت قوي وجسر، شنو الخلاك ضايع وتعبان وما تندل دربك وين؟؟
دمعت عيوني
كلت
خالد: توقعتك تفهم حالتي لان تحب، بس طلعت ما تحب
حازم: انا احب بس ما انسى نفسي، ما انهمر بكامل مشاعري، كل ما ذبيت نفسي اكثر كل ما الجرح كان اعمق، خالد اعتذر عن هالكلام بس انت يتيم، من تجرحك زهراء وترفضك مراح تلكة ام تحضنك، راح تذب نفسك للموت بس حتى تخلص نفسك من شعورك
احس كلامو كان بمثابة رمح
استقر بكلبي
بقيت اباوع بصدمة
والدمعة متجمعة بعيوني
كال
حازم: انا ادري كلامي جاي يأذيك، بس انت اخوي ولازم اصحيك، زهراء مراح تصير الك، انا اعرف تفكيرهم، اكو اختلافات واكو نزاعات من الاف السنين
كلت بخنكة
خالد: اقنعهم
غمض عيونة
وكال بنفاذ صبر
حازم: خالد افهمنيي، ايد وحدة ما تصفك، انت عايش هالحرب وحدك، انت تسهر ومتدمر وهي نايمة، انت متأذي وهي ما تدري، انت ضايع بس هي تمشي بثبات
شوف وجهك شلون متغير بسبب السهر والجكاير، انت جاي تنتهي ومو حاس ع نفسك
درت وجهي
اداري الدمعة اللي بعيوني
كلام حازم مؤذي
بس صح..
حازم: انساها وروح حب غيرها وعيش حياتك، هاي الانسانة بالذات مراح تكون من نصيبك فهمتني؟
باوعتلو
كلت بتعب
خالد: ليش دتحاجيني وكأن كلشي مستحيل؟ ابوها متفهم واستقبلنا بأسلوب حلو راح يفهمني
تقرب الي وخلة ايدة ع كتفي
كال بهدوء
حازم: يستقبلك كضيف، يخليك ع راسة وبعيونة لان هاي عادات العرب اجمع، بس ان ينطيك الوحيدة العندة ويخاطر بيها ويشمرها لمذهب يختلف عن المذهب اللي تربت علية هذا شي ثاني
كلت بيأس
خالد: بس انا ما راح امنعها..
قاطعني
حازم: وهذا مو فضل منك اذا ما منعتها عن ممارسة معتقدها، هي بالنهاية مو بحاجة وجودك
دفعني وكال بأنزعاج
حازم: بربك الحياة معقدةة، ليش تعقدها ع روحك اكثر؟؟ واحدنا وي روحة ما متفاهم، يخلص يومة بألف يا علي يمشي بصف الحايط ويكول يا الله وكل هاي ومو كادر يخلص من النفس اللوامة اللي بداخلة
كال بصوت ناصي
حازم: بدل ما يسهل الحياة علية، يروح يفوت فوتة هو مو كدها؟
فركت وجهي
احس روحي دخت
كال
حازم: اهلك مراح يقتنعون، واهلها يقتلوها وما ينطوها الك وهاي انت بوحدك لازم تحارب كل هالناس، ولازم تخسر وتضيع وتتدمر، والادهى من هذا هي مو بجانبك
كلت بغضب
خالد: كافي حازم
حازم: لازم تصحى خالد
خالد: راح تحبني
حازم: واذا ما حبتك
خالد: كتلك راح تحبني
ربت ع كتفي وكال
حازم: ان شاء الله تحبك، بس اذا ما حبتك راح تشمر نفسك بنص النار وما تنطفي نارك
راح وعافني
احس نار مشتعلة بية
الكون ضاق علية
والم قوي بصدري
اعصابي بلشت ترجف
وكلام حازم يدور براسي
لالا مراح اسمح لهالشي يصير
ومراح اعوفها
مشيت للجامعة
المحاضرة فاتتني
كعدت برا
خليت ايدي ع راسي
انا مو ضعيف
ولا يمكن اكون ضعيف
انا قوي
انا بس احتاج احد يفهمني
وكلبها يحبني
وبس
شفتها طلعت من المحاضرة
بدون ما احس كمت
مرت من يمي وكلت
خالد: زهراااء
مشت وما اهتمت
احس تلقيت اول صفعاتي
بس ما يأست
مشيت وراها
وكلت
خالد: زهراء اريد احجي وياج
ما ردت..
كلت يمكن ما سمعتني
سبقتها بالمشي
ووكفت كدامها
نار وثلج..
كنت اشتعل من الحزن
وهي تباوعلي بكل برود
اول ما باوعت بعيونها
هدأت النار اللي بداخلي
وحسيت نفسي صرت احسن
كلت
خالد: صار ايام انتي ماكو، وانا افتقدتج
عقدت حاجبها
وصارت تباوعلي بعدم قناعة
بلعت ريك
كلت
خالد: انا اسف اذا زعجتج، انا بس مجرد ما اعرف..
صرت احجي بأرتباك
كالت بأنزعاج
زهراء: انت بس مجرد وقح
فتحت عيوني مصدوم
مشت وانا كلت
خالد: زهرااء
التفتت علية وكالت
زهراء: وقح
وراحت وعافتني
كأنني لا شيء!
انا وقح!
احس كلبي وجعني هواي
والمكان ضاق بية
طلعت من الجامعة امشي بالكوة
دخت وع اي لحظة اوكع
كنت احتاج ان افقد وعيي
وانام..
بس مو هنا
حاولت اتمالك نفسي
وصرت امشي بصعوبة
شفت نفسي كدام السكن
اخر وجه شفتة
هو سراج
كان ينزل من فوك
وفقدت الوعي..
.....
دخلت للجامعة
شفت حبيبة تراجع
تكتب بملزمتها
شعرها يوكع ع وجهها وتخلي ورا اذنها
مخلية حمرة حمرة
وكحلة بسيطة
وصلت يمها
كعدت
ما التفتت الي
كلت
حازم: شلونج
مدت ايدها دون ما تباوعلي
وصارت تأشر ع اصبعها
حبيبة: بعد كم يوم هنا راح تتخلة حلقة
كلت بأنكار
حازم: ههه حبيبة عوفي الاستهزاء
باوعتلي وابتسمت
حبيبة: انا مثلك، ما اصدك بالكلام، اؤمن بالواقع
رسمت حلقة ع اصبعها
وخلت القلم ع اذنها
وكالت وهي تبتسم
حبيبة: كم يوم بس وبدل هالحبر يصير ذهب
كلبي خفق بقوة
كلت
حازم: منو خطبج؟
حبيبة: مو المهم منو اللي خطبني، المهم انخطبت
كامت وهي تكول
حبيبة: الكل يكولون عني هوائية، والكل مو حابين شخصيتي بس انا حابة نفسي وانطيك معلومة عني
اشرت ع عيونها بأصبعها
حبيبة: هالعيون باوعت هواي، واكتشفت هواي ناس، انا مو بس امتلك بصر امتلك بصيرة، والبصيرة الله ما يخص بيها فقط عبادة الصالحين لالا، انما يخص الناس اللي يحبهم لان الله يحبني، فيخليني اعرف حقيقة الكل واولهم حقيقتك
وكفت
دمعت عيوني وكلت بخنكة
حازم: يمكن ما سويت نفس ما انتي تريدين، ولا عيشتج شعور باقي العلاقات، بس نيتي تجاهج عمرها ما كانت مو زينة
ابتسمت
حبيبة: انا اعرف نيتك زينة، بس شنو فايدة النية وانت مو كادر تتقدم خطوة تجاهي؟!
سكتت
كالت
حبيبة: انا وهواي بنات قبل ما نحب الشخص ونغرك بأحلامنا نعرفة هو شنو، ونعرف لو نموت ما يجيبلنا كفن، ونعرف النهاية كسرة كلب بس نحب نشوف النهاية بعينا زين، بالنهاية المرية تعاقب نفسها من تختار شخص غلط بالحب، تبقى تحبة لحد ما تستوعب
عقدت حاجبي
حازم: بنظرج انا شخص غلط؟
حبيبة: بقصتي اي، بس بقصة غيري حتكون صح وحتكون البطل
حازم: بس حبيبة انا احبج
غمضت عيونها ورفعت ايدها
حبيبة: لتكول هيج، خليني اصدك وشوفني الواقع
لزمت ايدها
سحبتها مني
حازم: اسمعيني، راح اشتغل شغلين بس حتى اخطبج، ارفضي هذا ووعد مني بنهاية السنة اتقدملج، حبيبة انا مااريد اخسرج
تنهدت
ودارت وجهها بعيد
كلت بخنكة
حازم: حبيبة
حبيبة: ان شاء الله ما اندم وانا انطيك هالفرصة
حازم: مراح تندمين، وانا اسف لان زعلتج
بهالاثناء رن تلفوني
سراج!
هذا ابد ما يتصل علية
شيريد؟!
احس كلبي وجعني
فتحت خط
سراج: حازم وينك
حازم: شبيك سراج شصاير
سراج: انا بالمستشفى، خالد لزمتة نوبة قلبية الحكلي حيموت
فتحت عيوني مصدوم
حازم: نوبةةة!!، جاي جاي
ركضت بسرعة
لزمتني حبيبة بخوف
حبيبة: شصايررر وين رايح
حازم: خالد صايرة عندة نوبةةة قلبية
حبيبة: شنوووو
تركتها وطلعت اركض
اجرت تكسي وطلعت للمستشفى
اتصلت ع حسين
وبعدها وصلت
دخلت اركض
شافني سراج بممرات الطوارئ
حازم: وين خااالد، فهمنييي شبييي
لزمني من كتفي
وكال بعصبية
سراج: ليش عايفي بوحدةةة؟؟ يمشي مثل السكران بالشارع لو مااشوفة واجيبة لهنا
كلت بتعب
حازم: عميي بارك الله بيك بس كلي وينة
سراج: الدكاترة جاي يسعفوه
خليت ايدي ع حلكي
تذكرت كلامي وياه الصبح
كلة بسببي
بهالاثناء اجة حسين يركض
كال
حسين: شكو شصاير فهموني
سراج: هاي عود انتو صحبة وبغرفة وحدة، صاحبك واصل للموت وانت ماتدري
باوعلي حسين وكال بعصبية
حسين: حازم سكتة لهذا لا اطلع روحة هسة
حازم: خالد لازمتة نوبة قلبية، اسكت حسين مو وقتك
فتح عيونة مصدوم
حسين: شنو؟؟ شلون وليش؟؟
وكعت دموعي وكلت بعصبية
حازم: انا السببب، انا الغبييي بسببي هيج صار بي، كتلة ما تفيدك عوفهاا وهو انقهر انا جرحتة بكلامي
حسين ضيق عيونة
وكال
حسين: شنو الما يفيدة؟ حازم شجاي تحجي؟
حسيت ع نفسي
مسحت دموعي وكلت
حازم: ها، هيج خالد راد يفتح مشروع
حسين: اي؟
حازم: وما عجبني وتناقشنا الصبح
حسين: اي؟
حازم: وكتلة هالشغلة ما تفيدك
تقرب الي
خلة عينة بعيوني
احس اكو بداخلة غضب مدفون
كال
حسين: حازم اكو شي ضامة عني؟!
دك كلبي بقوة
كلت بتوتر
حازم: حسين شبيك؟ شضم عنك يعني؟
ربت ع كتفي
وراح بعيد
طلع موبايلة وصار يتصل
بلعت ريكي
اجة سراج يمي
كال بهمس
سراج: السالفة سالفة نسوان؟
كلت بأنكار
حازم: لالا
سراج: خالد شاف الضيم من اهلة ما وصل لهنا، تقنعني خالد ما يحب؟
كلت بأستغراب
حازم: ليش واحد عطل مثلك وين يعرف الحب؟
سراج: اعرف العب، بس مو شرط اشارك وي اللاعبين، عموما خالد قصتة مأساوية الظاهر
حازم: سراج سد حلكك لا تبلينا
سراج: وواضح حسين الة ايد بالموضوع، مبينة السالفة
فركت وجهي
احس الموضوع راح ينفضح
دخيلك يا علي
طلع الدكتور من الغرفة
والتمينا علية
نترقب الخبر
......
وانا كنت اترقبها
كانت تطبخ بنشاط
وبسرعة..
اول مرة اشوفها هيج
كلت بأستغراب
عطاء: زهراء، صاير وياج شي؟
كالت وهي تشتغل
زهراء: لالا، بس اريد اكل جوعانة، فجاي اطبخ سريع
كمت من مكاني
لزمت ايدها
عطاء: زهراء اذا صاير شي وياج كوليلي، انا افهمج
صفنت بوجهي
اجت حبيبة من برا
تكتفت وكالت
حبيبة: اي علوية زهراء، كوليلنا
التفتت ع حبيبة
كلت بأنزعاج
عطاء: حبيبة لا تدورين مشاكل
حبيبة: انا مجاي ادور مشاكل، ادور منكم مروة يا عديمات المروة
عقدت حاجبي
عطاء: مو عبالك جاي تكبرين بالكلام؟
حبيبة: اسألي العلوية، الملاك البريء شمسوية؟
باوعت لزهراء صافنة
كلت
عطاء: شبيج حبيبة، شصاير؟ هي اجت تطبخ وما بيها شي، وحسين هسة اتصل يتطمن عليها
حبيبة: شكاللها حسين ها؟ ما كاللها عن عملتها السودة؟
فتحت عيوني مصدومة
عطاء: انتي شجاااي تحجين؟؟ انا بأذني سمعت الاتصال ما كال شي بس تطمن عليها كاللها انتي وين كالتلة بالسكن، شجاي تسوين كالتلة جاي اطبخ تريد ادزلك كللها لا بالعافية وراح
اباوع لزهراء اجت يم حبيبة
وكالت بخوف
زهراء: حبيبة شبيج؟
كالت حبيبة بأنزعاج
حبيبة: انتي تدرين بخالد جاي يموت بالمستشفى لو لا؟؟
انصدمنا من كلامها
كلت بغضب
عطاء: منين جبتييي هالكلام وزهراء شعليهاا؟؟
حبيبة: اسأليها، شنو اللي يوصل الانسان لهالحالة؟؟
اباوع لزهراء صافنة
وترجف!
حبيبة: خالد صايرة بي نوبة قلبية ونايم بالمستشفى، ودام حسين اتصل بيج معناها شاك بشي يالنايمة ورجليج بالشمس
اباوع لزهراء كعدت بالكاع
خلت ايدها ع راسها وصارت تبجي وترجف
كعدت يمها
لزمت ايدها
عطاء: زهراء ماكو شي ماكو شي لتخافين
كالت وهي تبجي
زهراء: عطاء والله معلية والله مسويت شي
كمت من يمها
رحت ع حبيبة وجريتها من ايدها
صحت
عطاء: كافيييي حبيبة مراح اسمحلج تتجاوزين اكثر
صاحت
حبيبة: ع منو اتجاوز هاا؟؟ اكلج الولد راح يموت بسببهااا
عطاء: هي معليها، هي ما تحبة والحب مو غصب
خزرتني وكالت
حبيبة: اكووول بسج عن المثاليات المالها داعييي يلاا
اشرت بأيديها بمعنى روحي
حبيبة: وخري يلا يالنايمة ورجلج بالشمس
فتحت عيوني مصدومة
عطاء: شنو قصدج
حبيبة: قصدي واضح
لزمتها من زندها وصحت
عطاء: وضحييي اكثررر
اقتربت الي
وكالت بعصبية
حبيبة: ماااا يحبهااا لو ما شايف امل منهااا، ما يوصل للموت لو ما نزعت هالامل منة
فتحت عيوني مصدومة
باوعت ع زهراء
تباوع ع حبيبة بصدمة وعيونها مليانة دموع
كامت من مكانها
اجت يم حبيبة وهي تكول
زهراء: شنو قصدج حبيبة؟! تتهميني حبيبة!؟؟
لزمتها من كتفها
وصارت تهزها بقوة وتبجي
زهراء: تتهمييينيي حبيبةةةة تحجييين علية هالكلللااام
وخرت زهراء عني
وجريت حبيبة من شعرها
وكلت بعصبية
عطاء: من داومناااا لهسةةةة روووحييي طلعتيييها وطلعتينا كلنااا من طورنا شبيييج تخبلتييي؟؟ خبلج حازم؟؟
دفعت ايدي وصاحت
حبيبة: طز بيكم كلكم وطز بحازم وياكم، اكلج الولد حيموت بالمستشفى لازمتة نوبةةة قلبيةةة وهي تكلي حازم
زهراء صارت تضرب ع وجهها
وتصرخ
زهراء: اناااااا معليييية، اناااا مو ذنبييي
صحت
عطاء: كان استحيتييي يا ادبسزز توكفين وي واحد غريب ضد صديقتج
تقربتلي حبيبة وكالت
حبيبة: انا الادبسزز مو؟ دومي مو زينة بنظركم صح انا اتفهم هالشي، ما انا نفسي حبيبة ام العلاقات، بس روحي اسألي العلوية زهراء شعدها واكفة اليوم وي خالد وبنص الجامعة تسولف وياه
باوعت ع زهراء بصدمة
وزهراء تبجي وتهز راسها بمعنى لا
كلت
عطاء: زهراء جذب هذا الكلام مو؟؟
صاحت حبيبة
حبيبة: بس انتو تحجون الصدك موو؟؟ حبيبة جذابة يلا علوية زهراء انكرييي
كالت زهراء وهي تبجي
زهراء: هو اجةةةة حجة وياية، وانا انا رفضتتت ومشيت وعفتةةة
حبيبة: بلا عوفييي المثالياااات عوفيهاا
مشيت تجاه حبيبة ببرود
وكفت كدامها
كلت بهدوء
عطاء: لنفترض زهراء تحب خالد، وخالد يحب زهراء، ممكن اعرف انتي شنو الغاثج؟
زهراء كالت
زهراء: عطااااء لااا
رفعت ايدي بوجهها
سكتت
حبيبة: الولد حيموت بالمستشفى بسببها، وهو يتيم
عطاء: انا يتيمة
صفنت بوجهي
بلعت ريك وكلت
عطاء: كلنا عدنا اهل وعايشين وياهم بس نحس بيتم، خالد وحدة يتيم؟؟
ما جاوبتني
تقربت الها وكلت بهدوء
حبيبة: مقهورة من حازم لان مشيتي الة عشر خطوات واستكثر عليج خطوة مو؟ بس زهراء هي وبمكانها خالد قتل نفسة عليها
وجهها صار احمر من الغضب
ابتسمت وكلت
عطاء: اعتذر منج بس العلوية زهراء مثلت اسمها بأفضل طريقة وفعلا تستحق ان نكول عنها علوية وترفع الراس، وسواء حبها خالد او حبتة شأن خاص بيهم ومو من حقج تستفزين مشاعرها بس لانج مقهورة من حازم
دموعها وكعت
مشيت تجاه زهراء
كالت
حبيبة: تمثلين دور القوية والفاهمة، حسين بدل ما يحبج حب ضوية
دمعت عيوني
وحسيت كلبي عصرني
التفتت الها وكلت
عطاء: انا ما امثل، انا فعلا قوية، وكنت مستعدة ازوج حسين لضوية بأيدي بس الله ما راد، وحتى وان اعجبت بحسين بفترة من الفترات هالشي ما يزعجني بالنهاية اني بنية وعندي كلب، بس تجرحني انسانة اكلت وياها من ماعون واحد تجي وتعيرني
راحت لغرفتها وسدت الباب
زهراء كامت من مكانها
دموعي صارت توكع
اجت يمي وكالت بخنكة
زهراء: اسفة عطاء كل هذا صار بسببي
عطاء: عادي ولا يهمج
زهراء: زعلتي من كلام حبيبة مو؟
تنهدت واحس بخنكة
كلت
عطاء: حبيبة عدها خيط جنون، لا ع المجنون حرج
اخذتها من ايدها
ودخلنا للمطبخ
كعدتها ع الكرسي
وكلت
عطاء: مو من حقي اتدخل، بس اسألج سؤال واحد
كالت وهي تبجي
زهراء: شنو هو
عطاء: حالة خالد هاي انتي سبب بيها؟؟
فركت وجهها وكالت
زهراء: كنت امشي بالجامعة اليوم، سمعتة يصيحني، تجاهلتة لان ميصير احجي وياه، كام وكف كدامي كان متوتر وتعبان ومااعرف شحجة صار يحجي بدون مايفهم كلامة..
ميلت راسي
عطاء: اي؟
زهراء: كتلة وقح ومشيت
رفعت حاجبي
خليت ايدي ع حلكي
زهراء: مااريد احجي وياه، شنو هو جبر؟؟
تنهدت
عطاء: بلشت اتأكد، خالد يحبج، وكون يطلع من المستشفى بسلامة
خلت ايدها ع راسها
وصارت تبجي
زهراء: عطاء انااا والله مااريد أذي، اساسا مو حابة حالتة توصل لهنا بسببي بس انا مااكدر، عطاء مااكدر، انا اموت ولا اسمح لنفسي احبة
غمضت عيوني بقوة
عطاء: بس خلي يطلع منها بسلامة
زهراء: شسوي؟!
عطاء: مو انتي تسوين، انا
زهراء: شلون؟؟
طلعت العلاجات من الثلاجة
صرت ادور وهي تكول
زهراء: عطاء شحتسوين؟؟
طلعت حبايتين بندول
زهراء: راسج يوجعج؟؟
عطاء: لا
شربتها وسحبت نفس بقوة
زهراء: عطاء شبيج
عطاء: البندول يسببلي هبوط ضغط، مااعرف ليش بس كل ماابلعة يخلي ضغطي يهبط والدكتور مانعني منة
ضربت ع خدها وكالت
زهراء: وليش بلعتييي؟
عطاء: لازم اروح للمستشفى وافهم شصاير
زهراء: عطااااء شجاااي تسوييين
عطاء: راح يصير حجي وحالة خالد مراح تمر بسلام، راح تبتلين وانتي مالج ذنب، لازم اروح وافهم الصاير
بقت تباوعلي بخوف
كلت
عطاء: زهراء ضوية من البارحة نايمة، خليج يمها وانا راح اخذ حبيبة واروح للمستشفى
زهراء: حبيبة؟!
عطاء: اسمعيني ومعليج
دخلت للغرفة
ضوية تبجي
لبست كوت وخليت شال ع راسي
دخلت ع غرفة حبيبة
كانت تبجي
عطاء: عوفي دموع التماسيح وكومي وياية للمستشفى
مسحت دموعها وكالت
حبيبة: ها؟ شنسوي نروح؟
عطاء: ضغطي هابط
حبيبة: هابط وواكفة كدامي مبدلة؟
كلت بغضب
عطاء: كووومي وبلا كلام زايد، بعدين انا وكفت وياج مرة واخذتج عالجتج امشي رديلياها
باوعت ع زهراء
كانت واكفة بالباب خايفة
كالت
حبيبة: ضغطج مو هابط، رايحين نتطمن ع حبيب الكلب مو؟ خو اتصل ع حازم واتطمن
جريت الموبايل من ايدها
عطاء: غبية لا تصيرين، اذا اتصلتي راح يشك حازم بيج ويكول عدها شي وي خالد، بعد تعرفين حازم شكاك، واذا اتصلتي حسين راح يعرف اكو شي لان هاي دروبهم
كومتها
لبست حذائها وطلعنا
كلت لزهراء
عطاء: زهراء ابقي يم ضوية وعينج ع الموبايل عود نتصل عليج
اخذنا تكسي
حبيبة: اي اعراض هبوط ماكو عليج
عطاء: صبري هسة يبين مفعول الحبايتين
حبيبة: مال شنو
عطاء: بندول
حبيبة: اول مرة اسمع بندول يهبط ضغط
عطاء: من الأعراض الجانبية النادرة واني نادرة
حبيبة: لا إله إلا الله
عطاء: سمعي زين، اول ما نوصل انا يخلولي مغذي، وانتي تدورين عليهم واذا شافوج كولي عطاء فاقدة وعيها لا ايد ولا رجل ضغطها هابط وشوفي وضعية خالد شنو تمام؟؟
حبيبة: تمام
عطاء: كلمة زايد ناقص مااريد
هزت راسها بمعنى اي
بلشت احس بدوخة
نزلنا يم المستشفى
شفت حسين برا واكف يخابر
عصرني كلبي
بس لا خالد بي شي
سندتني حبيبة واجينا ندخل
اجة النا وهو مستغرب
حسين: خير خير خو مابيكم شي
حبيبة: عطاء هبط ضغطها وراحت علينا لا ايد ولا رجل وكوة جبتها
حسين: تعالوا جوة، زهراء وين
حبيبة: بالسكن
حسين: وحدها؟!
حبيبة: لالا ضوية وياها، يمعووود عطاء حتموووت وهو يكول زهراء
دخلوني جوة
وحبيبة التهت بية ونست خالد
احاول انبهها ما تنتبة
بالكوة يلا حست
كالت
حبيبة: عفوا منك خوية بس انت شتسوي هنا؟
حسين: صديقنا شوي وضعة تعبان
حبيبة: خير منو هو؟!
حسين: مو حازم، خالد وهسة هو بالانعاش
حبيبة: مات؟؟
حسين: لالا اسم الله بس مخلي تحت المراقبة
خلولي المغذي
حبيبة نطتي الموبايل
اتصلت ع زهراء
وبهالاثناء دخل حازم
حازم: خير، حبيبة شجابج؟؟
حبيبة: مجاي تشوف عطاء متخربطة
خليت الموبايل ع اذني
وحازم وحبيبة يتناكرون
وحسين واكف بالممرات
مرة يباوع علينا
مرة يروح ع خالد
عطاء: الو
زهراء: هاااا
عطاء: الحمدلله زينة اني زينة تحت المراقبة لتقلقين
زهراء: ماشي ماشي
سديت الخط
اجة حازم وكال
حازم: ههه ولو رزلتيني ذاك اليوم بس بالسلامة ان شاء الله
عطاء: الله يسلمك، انتو هم بالسلامة لصاحبكم
كالت حبيبة
حبيبة: صدك حازم شخبار خالد
حازم: الله نجاه منها وهسة هو بالانعاش
حبيبة: مخابرتوا ع اهلة؟
حازم: لا ما نخوفهم، ان شاء الله مابي شي
حبيبة: هو شنو عندة مشاكل وياهم؟
حازم: لا مو همة السبب
حبيبة: جا منو؟
باوعت ع حبيبة
وهو كال بأرتباك
حازم: هيج خلاف انا وياه
اجة حسين
حسين: حازم خالد رجع لوعية تعال
راحوا ثنينهم
كلت
عطاء: تعاي سرعيلي المغذي
حبيبة: وج تموتين
عطاء: كل وريد عندي بكد الصوندة سرعي ومعليج
سرعتة الي
قبل لا يخلص شلعتة وكمت
عطاء: تعاي وياية
حبيبة: ولج وين رايحة
عطاء: نأدي الواجب ونسلم ع خالد
حبيبة: عطاااء
عطاء: ششش ولا كلمة
اخذتها ومشينا
دخلنا للانعاش
هدوء والمكان مليان اجهزة
كالت حبيبة بهمس
حبيبة: الله لا ينطيج زهراء ع هالدكة
ندستها وكلت
عطاء: ششش
اجة الموظف حتى يطلعنا
لان ميصير ممنوع الزيارة
طلع حازم وشافنا
كلت
عطاء: محبيت نروح قبل ما نسلم ع خالد ونتحمدلة بالسلامة
حسيتة انحرج
اخذنا لخالد وحبيبة تدردم
حسين اول ما شافنا ضاج
اباوع لخالد شكلة تعبان
ومبين علية مقهور
من يمي انقهرت علية
ابتسمت وكلت
عطاء: مابيك غير العافية، ضغطي هبط واجيت اتعالج ومن سمعت بيك هنا كلت اسلم عليك
ماكدر يرد
بس ملامحة صارت احسن
كام حسين وكال
حسين: يلا لازم اوصلكم
طلع كدامنا
وحبيبة تجر بية
كلت
عطاء: عفنا زهراء بالشقة واجينا، معافى ان شاء الله
ابتسم
وحازم يباوعلة ويباوعلي بطرف عين
جرتني حبيبة وهي تكول
حبيبة: هاي شيسموها اشارة؟؟
عطاء: الولد رايح منتهي، بلكي من يسمع بيها يتحسن
حبيبة: نطيتي جرعة وهم
عطاء: احسن ما يموت
لكينا حسين مأجرلنا تكسي
صعدت حبيبة وانا وكفت كدامة
كلت
عطاء: مرة كلفتني بمهمة وحاولت والله بس ما كدرت احب اكلك ضوية انخطبت
صفن بوجهي
بعدها نزل راسة
كلت
عطاء: الحمد لله ع كل حال، ما الك بالطيب نصيب
صعدت وسديت الباب
ورجعنا للسكن
طول الطريق صافنة
الدمعة معلقة بعيوني
ترفض النزول
احس بية وجع هواي
وكتمان هواي
رجعنا للشقة
لكيت ضوية تتقيأ ومنهارة
رفضت اخذها للمستشفى
وبقت تعاني دون ما تتقبل اي مساعدة..
كل وحدة بينا راحت لغرفتها
وكل وحدة بينا سوت مأتم لخيبتها
وبتالي الليل انجمعنا
حسينا بالجوع
وبعد مشاكل جبيرة وكلام مؤذي
كعدنا ع سفرة وحدة
هالسفرة ينقصها ضوية
لان كانت نايمة
وترفض الاكل
حبيبة: خابرني حازم، رجعوا للسكن لان خالد رافض يبقى بالانعاش ومطلعي ع مسؤوليتة
اباوع لزهراء بقت ساكتة
كلت
عطاء: هو اعرف بنفسة
حبيبة: الدكتور كايلة صاير هيج بيك بسبب السهر والتدخين والقلق والظاهر هو عندة مشاكل وي اهلة
سكتنا
كلت
عطاء: اليوم من رحت سلمت علية اخوج ضاج
كالت ببرود
زهراء: اهلي ما يحبون الاختلاط
عطاء: استغليت الفرصة من طلع حتى يأجرلنا تكسي كتلة عفنا زهراء بالشقة واجينة وهو ابتسم
بقت ساكتة
حبيبة كالت بأنزعاج
حبيبة: هااا، لو انا حاجية هالكلام كان فريتيني مثل المصراع
عطاء: خفت لا يموت وكلت انطي جرعة وهم
حل الهدوء
كسرت حاجز الصمت حبيبة
حبيبة: لو روناك هنا كعدتنا تصير بعد احلى، انا وياها كلش خوش ثنائي
تنهدت وكلت
عطاء: روناك مبتلية، وكعت بحب عبدالله وجيب اللي يطلعها، النوب جاي تحاول تاخذ الصندوق منة ومجاي تكدر
كالت زهراء بأستغراب
زهراء: يا صندوق
كلت بأرتباك
عطاء: ماادري، خلي اروح اشوف ضوية
زهراء: ترا ضوية صار يومين عايشة بس ع الماي، اذا بقت هيج ناخذها للمستشفى باجر
هزيت راسي بمعنى اي
دخلت للغرفة
لكيتها تون
تمددت ع سريري
وصرت اباوعلها
ليش هيج سويتي بنفسج
كلت
عطاء: ضوية كومي اخذج للمستشفى
كالت بتعب
ضي: مااروح، ب، باجر اروح منا
عقدت حاجبي
عطاء: وين؟!
كالت بثقل
ضي: اروح لأهلي
تذكرت كلامها وي امها
ضوية قررت تغادر السكن
وترجع لأهلها
نمت..
وماكنت ادري
سيد الموت كان يتجول بيننا
وخطف منا شمعة صغيرة
كانت مضاءة فأنطفأت
فزيت من نومي
باوعت لسرير ضوية
لكيتها نايمة
ما اعرف ليش كلبي عصرني
كمت الها وكلت
عطاء: ضوية، ضوية
ما جاوبتني
كلت
عطاء: ضي، ضي؟
ما ردت
اخذتني رجلي الها بثقل
كعدت كدامها بالكاع
رفعت الغطا عنها
فجأة تذكرت وجهها وهي طفلة
خليت ايدي ع ايدها
كانت باردة!!
فتحت عيوني بصدمة
كلت بهمس
عطاء: ضوية!
ما ردت
هزيتها ع كيف
عطاء: اختي، ضوية!
ماكو رد
الدموع تجمعت بعيني
وخرت الشعر عن وجهها
كان بارد وشاحب
وكعت دموعي
نفسي ضاق
كلت بخوف
عطاء: ضوية لا تعوفني، انتي نايمة مو؟ ضوية
ماكو رد
هزيتها بقوة
كانت اخر محاولة مني
لأستيعاب صدمة رحيل ضوية
صرخت صرخة هزت اركان المكان
عطاء: ضوووووويييييييةةةة!
ها قد انطفأ ضوء السكن .
