رواية خيط وابرة الفصل الرابع والعشرون بقلم شمس العراقية
لبنى ـ مرات الشخص يحس روحه ضايعه، وأيده انكمشت وفارغه من كلشي بعد ما كان تارس أيد الكل، يركض بلهفة يلم شمل هذا ويجبر خاطر ذاك وكأن همه يشيل هموم الناس كلها .. هيج جان حال نافع شكد تعب وداس على كرامته حتى يرضيها وشكد تحاشى وتلافي المشاكل حتى لا ينفتح باب خراب لحياته
لكن عجيبة هاي الدنيا وناسها أعجب! تاليها يطلع هو المو خوش أدمي، وصاحب القصور الوحيد بعيونهم.. بأول زعلة نورس طلبت الطلاق . مو بس الطلاق أهله كلهم وگفوا ضده وأولهم عمتي هواي حجت وقست بالكلام
حربيه ـ أنت هاي التريدها تطلگ وتكعد وتگابلني شسوي بيك بعد، والله أذا طلگتها ينافع خطيتها برگبتك لآخر يوم بعمرك ولو تموت زواج بعد ما أزوجك شلعت گلبي ومرضتني من دون إخوتك.. بس أنت طول عمرك أعوج ومخربط .
نافع ـ شُـنو هاي الأريدها ومنو گلج أريد اطلگها أصلاً! ترى بنت أخوج هي الي طلبت الطلاك مو أنه.. وأذا مديت إيدي تنكلب الدنيا وأني مية الف مره گتلها صوتج ما يعلى... وبلا زحمة على شنو متعاركه هي وصفا وضمياء؟ علمود قميص ! وأني ضربتها ولحد هاي اللحظة أكولها وأرجع أكررها المرة الما تحترم وصوتها عالي أكسىر رأسها وأطيح حظها
حربيه ـ أي والله تطيح حظها وتكسر راسها، تايهتلك مو يا نافع! بنيه يتيمه لا أم تلمها ولا بيت يستر عليها
الله وكعها بيدك وما رحمت حالها وفوك ما محترك دمها على حاجتك وأنت الما عاجبك من عمت عينها أي والله
باقر ـ تعالي شعندج واكفه يم الباب وتسمعين الحجي! گومي وتعالي يمي وما إلچ دخل لا من بعيد ولا من قريب لا يلوحچ طشار حچي .
لبنى ـ تقربت يمه بس أنقهرت والله ما يستاهل شدعوه هلگد بالغن وكبرن السالفة ..
الصبح كعدنا لگينا نافع نايم بصالة! وتوجهت للمطبخ سويت الريوك على السريع وأجتي عمتي لابسه عبايتها وواكفة تردردم ويه روحها
حربيه ـ كلها حظوظ بس حظي نايم بالخيسة ومطين بطين! لا زوجت الأبن وأرتاحيت ولا البنيه وحدتهن بگد الفصمه عگبت رجال وبيت .
لبنى ـ عرفتها تقصدني ومشت للباب ورجعت باوعتلي
حربيه ـ طبخي الغده من وگت عمج أهنا وأذا ماكو خبز خبزن وأنه ما أجي عالغده أضل يم البنات لما أشوف تاليتها شون تفض على رأسي وعلى رأس هالسليمه النايم لا يفكر لا يگول .
لبنى ـ طلعت ورجعت سويتلهم الريوك وكعد عمي وناجح وحليم نزلوا فرشت السفره بالكاع ونافع كعد گلب بموبايله باوع عالريوك وشال باكيته وجداحته وطلع .
مشعان ـ غسل وتعال تريگ وعوف هالدخان نافع مو أحاجيك
نافع ـ ما أريد يابه .
لبنى ـ صبيتلهم الجاي والبنات نزلن وصفا ضلت واكفه وتباوع تخاف تنزل هي وضمياء وباوعلهن عمي وصاح عليهن .
مشعان ـ نزلن شعدجن واكفات .. زهور بابا روحي حاجي أخوج خل يجي يتريك من البارحه ما مأكل .
زهور ـ أي يابه هسه أروح أشوفه
لبنى ـ نزلن البنات وكعدنا تريگنا وناجح ما يصبر أذا ما يضيف لمساته عالأكل گام سوا ريوك وبس الريحه وصلتنا وجاب الطاوه مسوي طماطه حمس وعليها بيض عيون شكلها تشهي . وباقر حس بيه أشتهيتها عزلي بالماعون وصارت عركه عليها حتى عمي أكل وياه
أجتي زهور هزت رأسها لعمي وكعدت وگمت حميت الچاي وباوعتله كاعد بالحديقه يدخن طلعت كوب وصبيتله چاي وأخذتله .. نافع الچاي .
نافع ـ أي والله عاشت أيدچ .
لبنى ـ بالعافيه أجيبلك شيء ويه الچاي
ـ لا لا تسلمين ما أريد گلشي .
ـ رجعت صبيتلهم الچاي.. وضلينا على هالحال يومين نافع ما يحجي أبداً بس جگارته مورثه وعمي ساكت ما تدخل بعد گال عوفوا على راحته الا عمتي ما سگتت أبداً وتطب وتطلع تحجي وتدردم على نافع وهو ساكت ما يجاوبها وتلبس عبايتها وتطلع من الصبح ما يجيبها غير الليل ..
الصبح كاعدين نتريك ورن موبايل عمي وگام الاستقبال يمكن الشيخ والفهمته الحجيه تريد تچي الظاهر وصلهم خبر .
گملوا وكلمن گامت على شغلها وأني طبخت الغده وزهور عجنت وخبزت وقبل وگت الغده أنفتح الباب دخلت الحجيه وتدك بعوجيتها عدلت شالي وطلعت عليها
الحجيه عطايات ـ هلا يمه هلا .. يمه حبتچ ترد الروح
وملگاج ملكى شيوخ . شلونج شلون عافيتچ والفرخ البطنج شلونه دايره بالج عليه يا يمه .
لبنى ـ هلا بيج حجيه الحمدلله بخير الله يسلمج أتفضلي أتفضلي
الحجيه عطايات ـ شتفضل يا بنتي أنه الليل ما نمته من سمعت نويرس شاده حزامها على أبن گلبي .. وينه أنه أجيت عليه ولك يمه مشعان أبنك وينه بالعاده بس أدش البيت يجي يتلگاني ويقبط بيه .
مشعان ـ طلع يمه هسه أخابره وأشوفه فوتي أرتاحي
الحجيه عطايات ـ من كون لا شفت الراحه ونافع معلل سوده بوجهي عليك يا يابه منين أجتك هاي .
لبنى ـ طلعوا عليها وباوستهم كلهم بس محبة نافع عنهم تختلف تدور عليه وكلما أحد دخل تباوع بوجهه وكل شوي تسأل عمي مشعان عليه .
وصار وگت الغده گمت ويه البنات صبينا وفرشنا السفره يمها بالأستقبال وهي كاعده عالتخم وتضرب على رجليها
ناجح ـ يله حبوبه
الحجيه عطايات ـ مالي نفس يحبوبه .أكلوا عليكم بالعافية وهذا أبوك شما أشوفنه يضحك عليه كلما أحاجي ويگولي چاي چاي وعيني سوربت من كثرما أعاين عالدرب وأخوك ماهو .
ناجح ـ على كيفچ على روحج حبوبه هسه يجي وين يروح قابل وبعدين هو خوما صغير ونافع رجال واعي .
الحجيه عطايات ـ النسوان ما خلن برأسه عقل دهيره دهرتهن من فلك صابهن فرن رأسه فر .. چا وأمك وينها ما شفتلها خويط وين موليه .
ناجح ـ يم بيت خالي صباح من الصبح راحت على نورس
الحجيه عطايات ـ دز عليها خل تجيني دأفهم السالفه منها شنهي وعلى شني طلابتها نويرس ويه نافع ودگها الضيم وتريد الطلاك!
لبنى ـ ناجح خابر عليها ورجع وكعدنا نتغدا والحجيه ما أكلت ودخل نافع والحجيه گامت عليه وباسته وكعد مقابيلها .
الحجيه عطايات ـ يمه ما تأكل .. گومن صبله
نافع ـ لا حبوبه متغدي والله .
ـ وين تغديت ليش تچذب عليه
ـ لا وداعتج حبوبه متغدي أكلت يم غافر عزمني عالغده .
ـ چا أذا هيج زين بالعافيه وليدي بالعافيه
ـ الله يعافيج حبوبه .
لبنى ـ گامت وكعدوا بالصاله لوحدهم وكعدت تحجي وياه سولف الها السالفه وهي تهز برأسها وتستمع اله
نافع ـ والله حبوبه سالفة تافهه وما تسوى علمود قميص ومدري شُنو.. وهي هاي زعلاتها على الشغل البيت لو على طلعت على أجيت وليش تأخرت وأخواتك ما يشتغلن ولبنى طبت الحمام وأني أشتغل لوحدي ..
.. اليسمعها يگول گاتلها الضيم بيت عيالها والبيت مليان محد بحال شلغتها وأذا على حاجتي وقميصي الحركته أختي وأدري بيها ما متعمده وأساساً ضمياء ما تعرف تگوي لو نورس صايره السباعيه ومأخذه الملابس وگاويتهن ضمياء ليش تگوي بس هي هيج تتعارك ويه ذبان وجهه وأدون سبب تگب وتزعل وتعال نافع راضي وطول خلك وسايس والله العظيم ماشي وياها مثل الماي بالصينيه والله
على شنو طالبه الطلاك ما أدري .. گبل طلاك گبل لا حجي لاتفاهم گبل .. مو چاي نلعب أحنه تزوج منا طلك منا .
الحجيه عطايات ـ ميخالف يمه ميخالف وليدي ونسوان كلهن هيج يحبوبه
نافع ـ لا والله حبوبه مو كلهن هيج بس أنه المشلوع گلبي ما تعرف نفسها شتريد كل شوي بطبع ساعه زينه ساعه حاقده ساعه تغااار وخو بالغيره ما أسولفلج خليني ساكت أحسن .
الحجيه عطايات ـ ميخالف حبوبه يله گوم وليدي أمشي أكعد وهسه تجي أمك ونكعد ونحجي بسالفتكم وأنه أردها ما الك لزوم مو كيفها تتطلك يله وليدي .
لبنى ـ چابته وأجو كعدوا بعدنا جاي نتغدى ودخلت علينا عمتي ذبت عبايتها عالباب وسلمت على الحجيه وباوعت على نافع
حربيه ـ كاعدلي يم غافر وعايف مرتك زعلانه بالجذب
ما وصلت شفتها حاجيتها طيبت خاطرها .. لو غافر وكعدات وسوالف تروح ركض بس نورس لا شلون كرامتك عزيزه وأدكلي ثگل برأس هالمسكينه .
الحجيه عطايات ـ حربيه أشوفن للسانج طولان وتلعلين وما تحشمين وتحترمين أحد وتگولين أبو وحبوبته كاعدين شنهي تايهلج وليدي .
ـ وليدج فرگس گلبي يعمه چا ما دريتي شسوا وشعمل ببنت بنتج .
ـ أي دريت والسالفه عندي
ـ چا السالفه صارت عندچ ما تحاجينه لو بس يعرف يضرب
ـ وأذا ضربها شسوالها كسرها طفلها عينها زورگها
شنهي من طلابه والله ضاربها راشدي وزعلانه وتعال طلگني! والله مو أدمي تنضرب وأنه حفيدي وأعرفه ما يغلط بس أذا أنتن تجفصتن بطنه .
ـ لا والله عمه أنه ما خايفه عليها وأدفعلها بس هو مو أدمي .
ـ وشبي مو أدمي شمسوي شتردين منه يضل كاعد ومگابلها ويتوسل بيها ترد .. وطبها مرض خلها زعلانه
وبعد محد يوصلها كافي مسربه عليها ومسويه الدرب سچة ..
ـ بس عمه نافع الغلطان چا أذا أنه ما تدخلت وأنتِ ما تدخلتي منو يحل طلابتهم .
ـ نافع ما غلطان لاتجلبيلي بهل الحجايه لا أكومن أنكدچ بتوثيه وأخليهم يحتارون بخياطتچ وأسوي بيچ دهيره ولا جنه أبنچ من فلك فلگج گون .
ـ بس عمه
ـ من عمه العماچ وعمى عمتج وياج شوفي وسمعي وين يبنت مهديه فهمي بنت أخوچ ما عدنا نسوان بس يتزعلن والمره تحمل الرجال وتصبر على المره والحلوه لو بس من حلو تردنه.. الله يساعدنا على الضيم الشفناه والجرا على گلوبنا ومحد مكطوك بس بنت أخوج چا أنتِ قليل مشعان دگج لو هاي عدها لطمات ونوحات
.. وتريد ترد باب البيت مفتوح الها ما تريد خلها عد أبوها وأنه ولدي مو كرامته رخيصه عليّ يضل مسرب عليها وطلاك ماكو وهالحجايه أن سمعتها مرتن نوب لا أروح أحطها وأدگها وأطلع قهر أهلها بعريب كله وأنعل والديها لابو الساعة السوده الشفتهم بيها وغربوا گلبي تغربل نبشوا أهاليتي أنه جوية عريب بعدها بگلبي تدگ وما ناسيتها أدور تفتحين عليه باب وطلايب ويه أخوج ونافع لا يحربيه أكظبچ الباب وأدربج ورا بنت أخوج .
چا أنه زوجته يستقر ويرتاح حاله حال ربعه لو ينشلع گلبه ويه نويرس بس تربيه مهديه شترچى منها بس گلت بنت عريب بنت عزيزة گلبي جوية أفادي والدم يحن وسلمتها أبن گليبي بس ما ظنتي هيج تعمل وتنعفص علينا ما ظنتي .
حربيه ـ هذا هو عمه التردينه يجرالج بس على كيفج على رويحتج ورأس أبوسه خلها تولي .. أرتاحي عمه
لبنى ـ عمتي خافت وگامت بأستها من رأسها والحجيه دفعتها ونافع ضل ساكت .. وگملنا الغده وزهور ضلت تنظف المطبخ وأني رحت الغرفتي أتمدد عفتهم كاعدين شغلتهم مطوله .
باقر عفته كاعد يمهم وضليت أحوص أريد أعرف شصار وأتصلت على لينا دام ما موجود وجاوبتني هلا لينا
لينا ـ هلا عيني شبيج صوتج ناصي عبالك كاعده بحمام
ـ لا ولج بس باقر ما يقبل لان يعرفني أتصل عليج علمود أعرف أخر الأخبار .. تعالي أحجيلي شصار صدك تريد تطلك لو بس حچي .
ـ ها قصدچ نورس
ـ أي قابل منو
ـ يمعوده وحده جذابه وفارغه بس تنهمل عليكم وعلينا طلعت النسخه مالت عمج نفسه بالضبط تحب تهول وتأخذ الجو بس للصدك فارغه .
ـ يعني شُنو
ـ طلاك ما تطلك بس تحب تشلع گلبه عود تأدبه بعد البي .. وأصلاً گاتله نفسها علما يچيها نافع ويراضيها بس كدامنا تبين القويه والكرامه والكرامه وهي مفتهمه الكرامه بالمگلوبي الله يساعد أمي على أبويه شتحملت من مر وضيم وهي ضاربها راجدي گلبت الدنيا على رأس نافع وشسوت كدام أبوها .
ـ أي
ـ أي گتلج ما تطلگ وأكبر دليل بس شافت نور وغافر نگلبت ١٨٠ درجه! كون تشوفينها شگد ملعبه تخليج تفرين بأذانج والله.. تلگت نور وتبوس بيها وتهلي وترحب كدام غافر حتى هو سوده عليه أجته الصفنه نوب يسميها البرنسيسة! خرب بروح عمامي .
ـ يعني سلمت عليها
ـ أي ولج لان خاله البارحه جانت عازمتهم عالغده جابيين سمج ودزتهم عليهم وصبيحه هم أجتي لو تشوفينها شلون صارت بنيه تنحط عالجرح ويطيب! وتضحك وتسولف اليشوفها يگول جانت عايشه بالضيم . وهاا صبيحه سألتها شصار ما صار تدرين شگالت الها
ـ شگالت
ـ گاللتها ليش هو شگو .. گاللتها سمعت تردين تطلگين گالت لا خاله ماكو هيج حچي أشاعات وتصير ومصارين البطن تتعارك وأني جايه أرتاح كم يوم وسبأ مريضه گلت أضل يمها .
ـ هيج الحجي
ـ أي .. وأنتوا صدكتوا بهاي تطلك وتعوف نافع والساحه فارغه! لا حبيبتي هاي حية ملمسها ناعم وحاطة أيدي على گلبي منها .
ـ والله ما أدري الله يهديها
ـ الله يهدينا جميعاً ويبعد عنا شرها وشر غيرها!
ـ أمين .. يله گلبي أني أروح خاف باقر يچي
ـ أوك عيني أني هم أروح على نور راسلتني وأنتِ أتصلتي وبعد ما جاوبتها .
ـ تمام الله وياج حبيبتي سلميلي عليها .. سدت الخط وضليت مصدومه بهل البشريه أثاري أحنه فطر وعلى نياتنا وتعرف شلون تخلي الرجال والعيال يركضون وراها ويردون رضاها ..
ضلت الحجيه يمنا يومين ورجعت وتونسنا بيها تسولف والكعده وياها مليانه محنه وحيل تحبني وتمشي وتوصي عمتي حربيه عليه وعمتي تهز برأسها ..
مر أسبوع وبعد محد رأحلها ولا عمتي وصلتها الحجيه منعت أحد يروح عليها تريد تعاقبها وأكدت على نافع
وبيوم كاعدين أني والبنات بالحديقه ومسوين كعده وعمتي هم ويانا بس كاعده لوحدها مدده رجليها وأنفتح الباب دخلت نورس وراها نافع .
نورس ـ السلام عليكم .. شلونچ عمه
حربيه ـ زينه هلا بيچ!أي أنه ما قدرتيني من رايحه راده عليج ونافع بس وصلج أجيتي على عمى عيونچ وياه بس الصوج مو منج يعمه الصوج مني أنه .. يله الله يهديكم ويصلح حالكم شريد قابل غير أشوفكم سعيدين .
نورس ـ تسلمين عيوني عمه وأن شاء الله بعد ما تنعاد ونافع بعد ما يزعلني مو حبيبي .
لبنى ـ ما جاوبها وهي دخلت البيت وتقرب أخذ حفنة حب وكعد يركز ويانا .
حربيه ـ شلون قنعت وأجتي وياك
نافع ـ قنعت الله هداها وعوفيها لاتفتحين بعد الموضوع خلص سديناه وصفحه وگلبناها .
حربيه ـ چا أنه شريد يا أمي .. هذا هو يجرالك
لبنى ـ ضل كاعد يمنا ويسولف هو وعمتي وبطاري بنات عمي محمود ما خليت بالي .. وصار الوگت نسوي عشه گمنا أني وزهور ولگيناها هي واكفه تطبخ مطلعه لحم مثروم ومخليه تمن عالنار تريد تسوي كبه ولابسه دشداشه نار من كثرما حلوه ولايگتلها والمكياج
والعطر فايح وهي من يومها هاي كشختها ..
ضلت فترة جاره عدل وشحلاتها هي ونافع مثل بلابل الحب بس هم يتعاركون والطرف متنازل ومسامح نافع على الرغم هي أكبر منه مفروض أوعى بهيج أمور والحياة الزوجيه تريد خلك بس هي مزاجيه حتى بحياتها
هي للامانه ما مقصره من ناحية گلشي طبخها طيب شلغتها تكظيها على أتم وجه وكشاخه وتهتم وأهتمامها بنافع من طراز الأول وهو هم زين وياها يباوع على حلگها ويريد رضاها وغرفتها دومها نظيفه ومرتبه وزينه ما عليها القصور لما مزاجيتها وطبعها الصعب .
وبهاي الفتره عمتي نوريه ومرات جديتي مهديه گامن يجن عليها بس أكثر شيء عمتي مهديه كل يومين والثالث لابسه عبايتها وجايه عليها وگبل يدخلن غرفتها ويضلن كاعدات بالساعات وجيتهن من نافع عنده شغل لو روحه بالقريه ومن عمي ما موجود .. يجيبن الشك ولا ساعه ولا ساعتين هم ما يكعدن ويه العيال لا الأ بالغرفه!!.
كاعده أطبخ الغده هالفتره ذابات الغده عليه والباقي الشغل عليهن .. أكشر الخضروات أريد أسوي دولمه وأنفتح الباب دخلت عمتي نوريه ماكو هيج ميانه تفتح الباب وتتدخل .
نوريه ـ ها الله يساعدج شلونج لبنى
لبنى ـ هلا بيج عمه . زينه الله يسلمج
ـ البطنج شلونه كم شهر الج
ـ زين الحمدلله .. كملت ثلاث أشهر
ـ أي زين... منو كاعد نايم
ـ كلنا گاعدين أتفضلي أتفضلي
ـ لا أريد نورس من رخصتج .
ـ ومشت وطلعت نورس ومباوس هي وياها ودخلن الغرفه .. شويه وطلعن لابسات عبيهن مستعجلات
غلست ولا عليه ..
كملت الدولمه ودخل نافع يفر بسويج سيارته ومن الباب صاح عليها
نافع ـ نورس .. نــورس
لبنى ـ مو هنا نورس .. رفع حواجبه وعگدهن مستغرب
ـ چا وينها
ـ طلعت هي وعمتي نوريه .
ـ وين طلعت وويامن
ـ ويه عمتي نوريه
ـ خـــير .. خـــير ..
ـ شال موبايله ويتصل وأسمعه يصييح عليها
نافع ـ أنعل أهلج كلهم بنت *** ويامن طالعه .. أني أعلمج نورس أحاسبج عليهن وحده بصف وحده .. چايج الا ما أعميج وأطفيلچ عينج مثل ما عميتها وما أخليج تشوفين دربج أني مو نافع .
وأجتي عمتي على صوته وتسأل
حربيه ـ شبي يعيط شجاه
لبنى ـ سأل على نورس
ـ أي وشگلتيله
ـ گتله طلعت ويه عمتي نوريه
ـ غضب الله على يومج شگو گللتيله هسه شيسگته ووين طالعه قابل ويه عماتها وبيت جدها بس هو خبل المخابيل ما يحب خواله .
ـ طلعت تحچي وياه وعافها وطلع يجيبها ماطول نص ساعه ورجعوا ونافع هادئ! وهذاك الجان يريد يصلخ ويذبح صار واحد يضحك ويباوعلها من تحجي! شغيره
الله يصلح الحال أحسن شيء.. دخلوا غرفتهم وصوت ضحكهم واصل لعندي وعمتي حربيه مبتسمه ورافعه أيدها وتدعيلهم ..
للعصر باقر نزل ولبس وطلع يشغل السياره نريد نروح لدكتوره .. واكفه أعدل شالي وفتحت الباب وحجت
نورس ـ أنتِ ما ناويه تفگين عني وتطلعين رأسج من حياتي الا تهجمينها .
لبنى ـ وأني شعليه بيج وبحياتج
ـ والله ما أدري سألي روحج الصبح أشسويتي من حقاره
بس أني أعلمج تردين نافع يطلگني علمود يضل عزابي وتأخذنه بس لو تموتن البالجن ما يصير وعسى بيوتجن تنهجم وبيتي يضل عامر .
ـ بابا أنتِ عقليتج مريضه روحي تعالجي ورجلج محد بحاله أشبعي بي .. الحمدلله والشكر على نعمة العقل
ركعت الباب وطلعت أشهد بالله فلا صاحيه هالبنيه وطلعت مستعجله وشفتهن كاعدات هي وعمتي من شافني سگتنن عفتهن وطلعت ما أهتميت .
باقر ـ وين صرتي يا عيني مو تأخرنا هسه تلگين الحجز مقبط ولليل ما نرجع وتتعبين .
ـ أجيت حبيبي أجييت وبعدين أني حاجزه من البارحه .
ـ على كيفج يابا على كيفج أنعل أبو الدكتوره شجاج ياعيني غير تتنبهين وتديرين بالچ على روحج
ـ عثرت بالصعده وتأذت رجلي ونزل أنخبص بيه وحبه وخوفه وحنيته نستي الوجع گله، لاتخاف ما بيه شيء فدوه أروحلك
ـ صعدي بويه صعدي .. هسه لو بيه أشيلج جان شلتج بس ما تنشالين تبارك الرحمٰن
ـ هااا هيج صارت باقر بدينا نغلط
ـ لا يروح باقر لا على شنو نبدي بس والله كبرناه والحمل حيل مضخمج وبعدج يله ثلاث أشهر!!
ـ صعدت وضچت منه ويحجي وياي ما أجاوبه
ـ زعلت وربي زعلت .. حقج عليه لبلبي شو عاينيلي خل أشوف هالوجه الحسن عبالك گيمر حبوبه
عاينيلي يعزيزة الگلب عاينيلي
ـ ما جاوبته بس گوه لازمه أبتسامتي بس أباوعله أضحك مشكلتي زعلتي ما تطول مجرد ما أباوعله أضحك .
ـ أي دضحكي عاد .. ضحكت ضحكت من أروح فدوة
وهسه بعدج زعلانه مني
ـ لا ما أزعل منك بس بعد لاتگولها
ـ ما أكولها تدللي أمري .جيبي أيدج يمي أنطيج جرعة حنان وأمان وحبي المتفرع بجذور گلبي أخ بويه شحبها هالبنيه شحبها .
ـ ضحكت وهو يسوق وعين عالشارع عين عليه وسحب أيدي وحضنها بجفوف أيده وباسها ولما وصلنا وهمزين لكينا واصلني السره وگبل دخلتني وباقر ما دخلته ما تقبل ضل واكف برا ينتظرني .
وتسألني وأجاوبها وتباوع من جوه المناظر خفت من نظراتها بس أبتسمتلي ما فهمت شيء
الدكتوره ـ صعدي ماما عالسونار أفحصج
لبنى ـ صعدت وشوي وأجتي وخلت السونار وعينها عالجهاز وأني عيوني تراقب نظراتها تباوع بتركيز وطولت وين وجان أشوف أبتسامتها .
الدكتوره ـ زين وضعج كلش زين .. وأطفالج هم زينين!
لبنى ـ أطفالي ما فهمت دكتورة
ـ أي ماما أطفالچ بيج تؤام حبيبتي
ـ تؤام .. صدك دكتوره بيه تؤام
ـ أي حبيبتي بيج تؤام
ـ الله يبشرج بالخير .. ما أعرف شگول الفرحه ترست صدري وحجيت سريع وأني أبجي الله عليج دكتوره خل زوجي يدخل ويشوفهم
ـ وين يدخل وشنو يشوف وينهم بعدهم ماما
ـ حتى لو .. فدوه لگلبچ
ـ تدللي بس لاتبچين موزين البجي أفرحي ماما .
ـ مسحت دموعي دموع الفرح وصاحت على البنيه التشغل وياها
ـ فاطمه طلعي صيحيلي زوج لبنى صباح
ـ أي دكتوره .
ـ طلعت وشويه وأسمع صوته وأجه وگف وباوعلي مبتسم ورجعت سوت سونار وأني فرحانه حيل فرحانه
باقر ـ ها دكتوره دازه عليه
الدكتوره ـ والله ما عندي شيء وياك بس زوجتك دزت عليك .. باوعوا زين شوفوا هذا واحد وهذا واحد .
باقر ـ يعني شُنو واحد واحد!.. تؤام
الدكتوره ـ أي عيني زوجتك بيها تؤام .
باقر ـ الف الحمدلله والشكر ربي الف الحمدلله والشكر
الدكتوره ـ أما الجنس ما بين هسه من تدخلين الخامس تعالي أشوفلج الجنس
لبنى ـ أن شاء الله دكتوره والفرحه ترست صدورنا وگمت وهو سندني وگفت بصفه والدكتوره گتبتلي باقي الفحوصات وكملناهن وراح جاب العلاجات وطلعنا وأحنه فرحانين
باقر ـ مبروك علينا حبيبي والله أمي جانت حاسه ومن أجتي هذاك اليوم گالت أشك لبنى حامل بتؤام وحتى حبوبه گايله بيج تؤام بس ما حجيتلج گلت الا نشوف ونتأكد .. والمهم سلامتج عندي بالدنيا كلها .
لبنى ـ الله يباركلي بعمرك يروحي .. طلعنا للبيت فرحانين ونزل أخذ جگليت ومن وصلنا بشر عمي وأخوانه كلهم بارگوا النا .
ناجح ـ مبروك يابه
نافع ـ مبروك مبروك
لبنى ـ عفته وياهم ويباركون اله وفرحانين الا عمتي ضلت بس تباوعلي وأكتفت بكلمه مبروك بارده
حربيه ـ مبروك .
لبنى ـ الله يبارك بيج عمه .. مشت ونورس باركتلي مثل عمتها وباوعت على نافع وصفنت يمكن عبالها يغار لو يضوج... عفتها ما ردت أخرب فرحتي بنظراتهن
واكفه گدام المرايا حاضنة بطني بيديّ الاثنيْن وأباوعلها حب. يعني هسه بهاي البطن روحين وياي؟ يا ترى بنوتات حلوات لو أولاد حلوين مثل باقر
بينما آني أهوجس وأفكر بيهم نزلت دمعة فرح من عيني وأي شي يجيبه رب العالمين هو خير وبركة، وأهم شي عندي سلامتهم وسلامتي وبخير وبصحة وعافية يا ماما
بهل الأثناء أنفتح الباب ودخل باقر وجهه منور بابتسامة دافية وتقدّم مني بخطوات سريعة وحضنّي بحنان ينسيني تعب الحمل وثگله.. مد إيده وصار يتلمس بطني بحنيه وخوف، كأنما ديحاچيهم وهمّا بداخل أحشائي
باقر ـ يمتى يجي هذاك اليوم المنتظره الي أشيلهم بيّن إيديه وأحضنهم لصدري وأشمم بيهم ريحة أمهم الطيبه... تدرين مو بس لأنهم توأم آني فرحان.. فرحتي الأكبر لأنهم من ريحتج ولأنچ إنتِ بالذات أمهم
لبنى ـ الله يخليك ويحفظك اليه .. ومن ذيچ اللحظة صار باقر ما يعوفني من كثر الخوف واللهفة وكل ما يگعد يمي يكثر من الحجي الحلو والغزل مالته ويگعد ساعات طويلة وهو يباوع لبطني ويحچي وياهم كأنهم كدام عيونه يوصيهم يديرون بالهم على أمهم وما يتعبونها وبيناتنا من أسمع هالحچي، أنسى كل تعب وثگل الحمل وأحس روحي ملكت الدنيا وما بيها بوجوده وبوجود هاي الرويحتات اللي ببطني
ويمد إيده بهدوء يمسح على شعري ويكلي بصوت مليان حنان
ـ كلشي يهون فدوه لبطنچ وتعبچ يا بعد روحي.. باجر الله يرزقنا بيهم، وينترس البيت من حسكم إنتِ وياهم ويلهيني الزمن بضحكاتكم اللي تملي عليه الدنيا .
ـ أن شاء الله حبيبي ويحفظك إلنا...
أيام الالتحاق ثگيله ومرعبة، وكل ساعة تمر بدونه جمرة بگلبي من يغيب عن عيني البيت يصير يخنگني وكل زاوية بيه تصرخ باسمه وضحكته وحچيه الحلو
التحق الله وياك وترك وراه ريحة عطره وصدى صوته. وأبقى واكفة بالباب أقرأ عليه آية الكرسي وأدعيله بگلب مكسور وخايف لحد ما يغيب عن عيني وأنتظر بفارغ الصبر ساعة رجعته بالسلامة.
رجعت لغرفتي وبغيابه أضل أفتر بالبيت وحدي وعيوني على الباب وكل صوت أو حركة برا أفز عبالي رجع أگعد أصفن بهدومه اللي عافلي ريحته معلگه بيها، وألزم تسبیحي وأضل كاعده الساعات والأيام شوكت يخلص دوامه ويدگ الباب..
الأيام المرت عاديه نفس الروتين ودخلت شهري الرابع وأنتظر باقر ينزل ونروح نشوف الجنس كلش متحمسين وبعدها نروح على عمتي وهبيه گالت بس تعرفون جنس تجون للقريه الشيخ يذبح ذبايح وطايره من فرحه يوميه بالساعات تتصل وتحجي وياي توصيني أدير بالي على نفسي وعلى البطني والفرحه تارسه صدرها دوم أنقهر عليها أحسها مظلومه حيل وعينها على الله وعلى ولدها ..
وكلما أحد يروح القريه أدزلي أشكال والوان الأكل واللحم حتى ملابس تخيطلي أشكال الفصالات والقماش كله من الزين وتشتريلي گلشي ما تخليني محتاجه شيء صارتلي أكثر من أم وحنيتها نفس حنية باقر يا حظي بيها هي وأبنها ربي يگومني بالسلامه وأفرحهم وتكمل فرحتي بشوفة أطفالي سالمين معافين .
گاعده عالتخم مكملة شغلي من وكت وأتصفح بموبايلي وأتابع لينا هالفترة عدها أمتحانات أخير السنة والحمدلله أجوبتها كلش زينة ودومها تجيني تبشرني الله يبشرها وما يضيع الها تعب
وبهل الفتره طاش حچي ووصلني خبر على أساس هشام يريد يتقدم لـ لينا بس گايل لما تخلص الخامس وهي من سمعت تخبلت وگعدت تلطم ما تريده وأني أصلاً ما أبالي أزوجها وعي طموحها تكمل دراستها وين تروح يم جديتي مهدية وعمي قادر صحيح الولد خوش ولد بس أهله صعبه تصير قسمه .
لا إرادي أجت عيني على نافع متمدد بالصالة ومتغطي بالبطانية جكايره جداحته تلفونه سويجه نفاظته كوب الچاي مالته كلها مكومة يمه.
وفجأة فتحت نورس الباب ورجعت سدتها بقوة فزيت من صفنتي وهو كمز جافل ومخروع من شدة ضربة الباب
نافع ـ شكووو
لبنى ـ عدلت كعدتي وجاوبته ماكو شيء عيني
نافع ـ گلاص چاي .. أريد چاي
لبنى ـ كمت من مكاني والچاي جان بعده حار صبيتله بكوب وأخذت صحن الكعك اللي جابه حليم الصبح نور مسويه ودزتلي أتذوق طعمه وأتابع انجازاتها هالفترة ومتطورة .
ونافع بعادته ما يتريك مجرد جكاره عالريك وكوب چاي أما ناجح لا إلا ريوك وعلى المزاج يخلق أجواء للبيت مخلمه ودهن حر وبيض عيون واللي ماله نفس هم يشتهي وكل عائلة تحتاج مثل الكابتن ناجح مرح حباب ولطيف وحليم ما عنده سوالف تدخين كل همه دراسته وكتابه مرحلة رابعة صحافة وأعلام وريوك نادراً ما يتريك
صبيت الچاي وخليته كباله ويه ماعون الكعك
نافع ـ رحم الله والديج يابه
لبنى ـ والديك عيني بالعافية وأخذت موبايلي وتوجهت لغرفتي ولاكتني نورس كبال الغرفة منين طلعت هاي
نورس ـ شوفي عيني سوالف النادرات بطليها كاعدة من الفجر ويا طكة البريج وصايرة برأسي نادرة ومكابله رجلي تتأملينه عيونج أفكسهن وأطيح حظج يا أدبسزز لو إستاذ باقر ما مالي عينج بس حقج عسكري وين تلحكين تشبعين منه
لبنى ـ صفنت عليها وعلى الفاظها تذكرت مقولة تكول اترك السفيه بلا جواب أشد عليه من السباب ويكولون عامل الناس بأخلاقك زين اللي ما عنده أخلاق شلون تتعامل وياه
دفعتها بساع وسديت الباب وراي والنار تاكل بگلبي عجيب حقارة البشر وين توصل أني أگعد من الفجر ويا باقر أسبح وأصلي وعالواهس أنظف المطبخ إذا بي شي وأغسل ملابسي أرجع مرات أنام ومرات ياخذني الواهس أتصفح فيسبوك بالصالة إذا هي ما تكعد للـ۱۱ أنا شلي دخل وإذا زوجها نايم بالصالة قابل الصالة مِلك بيت أبوها والبيت للكل ..
رجعت تمددت على الجرباية وأخذتني الغفوة ما حسيت إلا على صوت الباب ينفتح بهدوء باقر .
باقر ـ يروحه لباقر شلونج شعجب نايمة هيجي وقت
لبنى ـ فدوه لطولك شعجب رجعت وأنت من رحت ما نمت فهسه يله نعست ورجعت غفيت.
ـ رجعت لأن ما أگدر على فراگج
ـ ههههه علينه غير دوامك اليوم وبعد ستة أيام لازم تنزل .
ـ لا صاحبي داوم بدالي وگال انت بعدك عريس ما أفتهمت من زواجك شيء .
ـ الله ينطيه يارب والله صدك ما أفتهمت مني شيء تعال مدد ارتاح وريح رأسك.. أجا نام بصفي وسحبني لحضنه رفعت راسي وصرت أتمعن بتفاصيله المريحة حواجبه الحادة عيونه الواسعة الرفيعة المسحوبة شعره المرتب شواربه وبشرته السمرا كلشي بي يجذبني الله أتقن تفاصيله حتى أني أعشقه بجنون بست خده وهو مغمض فزّ جفنه برجفة خفيفة رجعت خليت راسي على صدره ونمت بهدوء وهو نام يمي بس ما اجاني النوم ومثلت النوم بس كلام هالحقيرة أخذ مساحة شكبرها بعقلي يدور ويدور مثل الناعور وأرجع لنفس النقطة اللعينة يا ريت هالنقطة أگدر أحذفها من الوجود وفجأة اندك الباب بقوة كمزت مفزوعة فتحت الباب نورس!
خير شتردين
نورس ـ عيني ست ملابسي يالماشايفه تعالي طلعيهن وين وديتيهن
لبنى ـ سديت الباب ورجعت ودفعته بقوه شبيج شبيج تخبلتي يا ملابس .
نورس ـ اي حقج ما شايفه ملابس سيت النوم أول بارحة غسلته وشريته هسه ماكو أختفى بححح طار وين راح سألت عليه الكل وماكو بس أنت نهار كله تفترين بالسطح وتراقبين الرايح والچاي .
لبنى ـ گتلها ودمي فاير نورس خليني ساكتة كافي عاد طوختيها والقران أگول لرجلج استحي شوية يا ملابس نوم كافي الاستحو ماتوا .
نورس ـ لج لبنــــى خليني الميت مدفون لا تضلين تحومين على نافع تره عيونج أطلعهن من مكانج
لبنى ـ ضليت مصدومه بكلامها وطلع باقر على الصوت مفزوع وعمتي حربية تباوعلنا ولا عبالك صاير شيء گاعدة تباوع مسرحية ..ونافع دخل الصالة ينشف وجهه بالخاولي وما منتبه عالسالفة ولا يدري شكو
نافع ـ شگـــو شصاير نـــورس شبيج عيني ممغوصه اخذج للطبيب صوتج من الصبح يلعلع
باقر ـ سوالف النسوان ما تخلص يخوي دگة علينا الباب عبالي المغول طبولنا
لبنى ـ نافع خزرها خزرة يبس الدم بجسمها طلعت تركض لغرفتها وعمتي ترفعلها بحواجبها وأني بگلبي عساس ناقصتج الله يبعدني منج ومن بنت أخوج
باقر ـ شبيها شرادت منچ
لبنى ـ ما ردات شي خبالاتها گبن عليها وأجتي تفرغن عليه
ـ وأنتِ شگو چايه عليج ما تولي على رجلها تطلع خبالاتها وسوادينها عليه.. أشهد بالله هاي وحده مو صاحيه تحتاج شماعيه .
ـ عوفها يمعود مأخذتها على گد عقلها وساكتلها ومتجنبه المشاكل لخاطر من خاطر .
ـ وليش خايفه منها وساكتلتها والأ أكولج أنه أحاجي نافع خلي يحطلها حد شنو تتهجم وتصيح عليچ ششايفه نفسها .
ـ كيفك عيني منك لأخوك سوّي اللي يريحك بس أني طلعني منها لا تحط اسمي بنص السالفة
ـ أدري بيج ما تردين المشاكل، هاي أنتِ من يومج أصيلة وبنت أصول وحمولة وصبورة بس ميخالف يصير خير، وحقج عندي ومحد يكسر خاطرج وأني موجود
ـ سگتت وما رديت بس روحي من جوه مهضومة وتفور وساكتة ومتحملة وما خلصانة من الحچي، وأدري زين لو فتحت حلگي وحچيت جان گلبوا السالفة عليّ وگالوا عليه وكحة وللسان ما تنجرع ولا ينعاش وياها
گمت للمطبخ لگيت البنات مكملات الغدا حميت چاي لباقر ونافع يصيح من الصالة
نافع ـ جاي يمعودات چاي
لبنى ـ أخذتله بدربي كوب وگلت بگلبي ياربي هو كوب هالچاي راح يدمرني لو أسويله طلي شيگول لعد...
بلكي يخلصني من طلباته أنطيتهم الچاي ورجعت كعدت بصف باقر أباوع ويا عالموبايل يباوع فيلم مصري عمر وسلمى تقريباً شكد ما يتابعه ما يمله أبداً
صار الغدا وگمت أخذت صينية إلي وباقر ودخلنا للغرفة تغدينا وحدنا لأن ما أخذ راحتي كدامهم وشوي أطول بالأكل وهما يخلصون بسرعه عاد من باقر هنا أجيب الأكل للغرفه نأكل سوا .
كملنا وشلت الصينيه ورحت المطبخ صارت صدفة كلام عمتي ونافع بالممر يحچون .
نافع ـ يمه لا تطلعيني عن طوري ونورس بالسنة حسنة تلبس ملابس نوم منين طلع هسه الله يصخم وجهها تريد تصخم وجهي گدام أخوي ومرته
حربيه ـ غير حاجتها يا أمي وأتبع وراها وين راحت
نافع ـ يمه مو والله أزين خلقتها وأني أول بارحة بالدوام والبارحة نزلت وهي كالبة خلقتها ونمت بالصالة منين أجه والمن لابسته إذا تكول غاسلته
ـ ولك يمه شبيك تسودنت شمالك شنهي تشك بمرتك
ـ لا ما أشك بيها بس نورس جذابه تعلميني بدروبها سوالفها كلهن حافظهن .. يمه كرعت راسي كااافي بزعتني من ساعة الكشرة زين
ـ شبيك يعني ما تحجي ما تفگ حلگها وياك گبل تگب بيها
ـ يمه شنو شبيه مو بنت أخوج راح تخبلني بسوالفها يوميه طالعتلي بسالفه شكل يعني أذا باقر أجاني وسألني مرتك شبيها ويه مرتي شجاوبه بس گولليلي شجاوبه!! والله علمود سيت نوم دگت عليكم الباب وخرعتكم وبس بنت أخوج تريد تصخم وجهي وتفضحني
ـ لا نورس عاقله وعوفها لاتحاجيها أنه أحاجيها وهي زعلانه وضايجه لان أنت عايفها ونايم بالصاله شلزومه تعوف غرفتك يا أبني وتخلي الكل يدري أنتوا متعاركين
ـ نايم بالصاله هچيت منها ومن النگ مالتها وفهميها تفگ يأخه عن لبنى ولاتسويلي سالفه وتفضحني كدام أخوي لا أغير أسلوبي وأشوفها وجه نافع الثاني .
لبنى ـ ضليت مصدومه وگفت أغسل المواعين وعبر من يمي وگال بصلافه
نافع ـ لبنى چاي چاي
لبنى ـ يربي وسالفه الجاي وأهله وتالي وياك ويه مرتك أني شيفضها هالطلابه على رأسي نوب سوتني بواكه كدام رجلها شگد حقيره بحالج بحال ملابسج الحمدلله والشكر على نعمة العقل .
اخذت جاي للكل وزعتلهم ورحت لغرفتي بحظن باقر
والله بس أنت ولتصبرني عليهم هيج نظراته حلوه دافيه اعتبره جنه اليه وساكت كلامه كله عافيه وشكله عافيه للمعلعل .. بسته بخده باقر أاني احبك اموت بيك
باقر ـ وأنتِ تتحارشين واني عاقل أبداً ما عليه
ـ فدوه لوجهك
ـ يربي حتجلطيني
ـ غير اني حلاوه
ـ لچ أموت بيچ ...
ـ نمنا وكعدت باقر طالع فتحت موبايلي دازلي رساله
ـ حبيبي أني طلعت ويه صاحبي وللعشه تجهزي نطلع
ـ وين نروج حبيبي
ـ نتعشىٰ برا ونفتر ونأخذ ملابس لجهالنا
ـ ضحكت بس بعد ما مبين الجنس شنو
ـ أني أعرفه شنو
ـ شلون ومنو گالك بالله وشنو هو
ـ بنات أي بيج بنات وأن شاءالله أحساسي ميخيب
ـ الله ينطيك على گد أمنيتك وبعدين شعجب ما تريد ولد الأعرفه الاب يدور ولد يشيل أسمه
ـ ليش أسمي اني ما شايله يچي أبني يشيله .. أبني يچي يشيل أسمه وأني أريدهن بنات ومتأكد بيج بنات
ـ وليش تريد بنات
ـ شعليج أنتِ وبعدين هذا الشيء خاص بيه أني وبناتي يله بلا كثرة أسئله گومي أسبحي وأكلي الفواكهه حضرتلج ماعون بالثلاجه وحلوياتج هم والعصير التحبينه جبتلج منه كارتون خليته بالكنتور وباقي خليته بالثلاجه
ـ أحبك
ـ عشقي ونفسي وحيلي .
ـ گمت بكل نشاط ومثل كل يوم مدللني وطول فترة نزوله يكظيها بس دلال لدرجه من يروح أعتگف وأضوج حيل وتطلع روحي لما يرجع علمني موخوش تعلوم ..
طلعت وشفت البيت گله مگلوب ونورس رافعه ثوبه ومطلعه نص أغراضها وتجلف بغرفتها وتغير الديكور هي وعمتي .. الحمدلله ربي هديتها بهل الساعه هم تجلف غرفتها والبيت وهم تفگ عني ..
تحضرت وتأخرت لان باقر بالباب وطلعت مستعجله وشافني وباوعلي بنظراتهن غلست عليهن وگبل فلتت برياشتي أدعبل أني وبطني .. شفته كاعد بالسياره يدخن جگارته وصفنت عليه وأبتسملي ونافع وناجح واكفين يم الباب هلاو .. وصعدت السياره .
نافع ـ أكو مطعم مفتح جديد أكلاته طيبه .....
باقر ـ أي نفسه الغافر گالي عليه أدري متفقين عليه هسه يطلع يخزي
ناجح ـ هذولي الأثنين لاتثق بيهم وكل ذوق ما عدهم بالمطاعم .. أسألني أني عن المطاعم هسه أدزلك
لبنى ـ نافع كفخه على رأسه وضحكنا وطلعنا وثقينا بذوق ناجح لان باقر حاط أيده على گلبه لايطلعون نافع وغافر ناصبين علينا ... وصلنا وطلب الأكل وفعلاً طلع طيب والمطعم حلو ومرتب والله ذواق هالناجح
باقر ـ الما يتريك الا مخلمه وبيض بالدهن الحر شلون
ما يكون ذواق .. عجبني خوش مطعم .. شبعتي حبيبي .
ـ أي الحمدلله .. وكملنا وطلعنا أفترينا بالمول وأخذ ملابس اله واليه شغلات ودخلنا قسم الأطفال وحرنا شنأخذ وأخذ سيت ولد وسيت بنات على أحساسه
ـ هذا على أحساسج ولد وهذا على أحساسي لبناتي يبعد حيل أبوجن ما ضل شيء هانت حبيبي هانت
ـ أن شاء الله وافترينا وتعبت وبعدها رجعنا البيت تعبانه بس أريد أوصل غرفتي دخلنا جانوا كاعدين بالحديقه عفت باقر ودخلت غرفتي سبحت وتمددت ...
ثاني يوم التحق لان خلصت مناوبة صاحبه وناويه أروح لأهلي أبات كون ما تصيرلي مشكله مثل كل مره عمتي ما تقبل زايد من يوم ولازم أرجع على الرغم الشغل مقسمينه بس هي هيچ .
حربيه ـ أذا صعدتي جبتي ملابسج من فوك نزلي ملابسنا وياج علمود أعزلهن وأصفطهن
ـ صعدت السطح جمعت كل الملابس وشفت ملابسها وملابس رجلها عفتهن وصاحت عليه عمتي
ـ نزلي ملابس نورس ونافع وياج
ـ وهي مكسره ما تصعد تنزل ملابسها.. وصدك ما شفتها يمكن طالعه لان هي تغار بس تشوفني اني وباقر نطلع ثاني يوم اذا مو نفس اليوم تحكم على نافع تعال طلعني .
نزلت قسم شمرتهن من فوك وعمتي أخذتهن والباقي نزلته بإيدي وعمتي كعدت تغزل بملابس وصاحت على صفا
حربيه ـ صفا نزلي أخذ ملابس أخوانج وأخواتج رتبيهن بالكنتور مو أدعمث
لبنى ـ أخذت ملابسي وصاحت وراي
حربيه ـ لبنى يمه هاج خلي ملابسهم بغرفتهم لما أكوي ملابس عمج وشوفيلي أكو قمصان لنافع أكويهن .
لبنى ـ ما ردت أدخل غرفتها بس هي گالتلي وگبالي
شلتهن وفتحت باب غرفتها وهبت عليه ريحة تخنك ما تنوصف عبالك چيفه ما تحملت گبل ذبيتهن عالجربايه
على الرغم الغرفه نظيفه تلمع لمع والمعطرات مالت الجو مصفطات عالرف بگج كامل هي من نوع نظيفه وتجلف وتخلي بهل المعطرات والله ريحتهم للباب توصل منين عالريحه عبالك فطيسه!! ريحه بحياتي ما شامتها
طلعت من الغرفة وروحي مقموته أختنگت وعمتي حاجتني بالي يم الريحه وترتيب الغرفه وشيء ما يشبه شيء !!!
حربيه ـ شو ما جبتيلي بدلة نافع وقمصانه چا مو گتلج
لبنى ـ ها نسيت ورجعت دخلت الغرفه شفتهن عالجربايه بدلته وقمصانه وصار عندي فضول أتبع أثر الريحه گلت يجوز شيء عايفته جوه الكنتور وخايس مديت رأسي أني وبطني ماكو نظيف حيل حتى تراب ماكو!! شسالفه الغرفه مرتبه والجرجف بعده جديد!!
شلتهن وطلعت على عمتي وكعدت أكوي وياها وهي مرات زينه وياي مرات لا.. طبگات مثل بنت أخوها ..
كملنا الگوي أني وياها
حربيه ـ أي والله عاشت أيدج خلصتيني منهن.. ولج صفت يصفا
صفا ـ بس صفا بهل البيت بس صفا شگو خير شتردين
حربيه ـ چا من أكو غيرج وأخواتج راحن القريه ومرت أخوج ما بيها تضل صاعده نازله ومو زين ما كظبتج ودزيتج وياهن أحمدي ربج وشكري بقيتي حالج من حال جنايين تعال هاج ملابس أخوانج علكيهن بالكنتور ويا ويلج وسواد ليلج ناجح لو حليم ينزلون ويگولون القميص معقج الأ اطيح حظج .
دهاج ملابس نافع صفطيهن قبل لاتصعدين
لبنى ـ أخذتهن ورجعت تدردم
صفا ـ شنو هالريحه عيعع خابصتنا بنفسها وهي غرفتها جايفه
حربيه ـ شبيج تدردمين ويه نفسج ياهي الغرفتها جايفه مو أكوم أملص رأسج تصيرين بندارتها ونظافتها .
صفا ـ سگتنا سگتنا منو يگدر يحجي على ست الحسن والجمال ..
لبنى ـ أخذتهن وصعدت وأني أبالي الريحه!! مو بس أني أشتميتها صفا گذلك .. وكاعدين ودخلت علينا هي وعمتي نوريه وتباوسن وكعدت .
حربيه ـ شلونج نوريه أمي شلونها
نوريه ـ زينه تسلم عليج ودگولج ليش ما تمرلنا هالأيام صارلج حسبة وگت كاطعه رجلج .
حربيه ـ البيت فارغ ما أكدر أتيهه البنات مشن للقريه وناجح بالدوام وباقر ملتحق بس بطرك نافع والجنايين ومن يصيرلي مجال أمرلها .. أي رحتن الخياطه
نورس ـ أي عمه رحنالها .
حربيه ـ چا وين دشاديشچ مو گلتي مخيتطلچ جم ثوب
نوريه ـ ها نسيناهن والله من گمنا وهي أنخبصت بنافع تعرفين أبنج يثول الما ينثول عاد من تكملهن كلهن أنه أروحن أجيبهن كلهن
حربيه ـ أي أحسن .. يله گومن فوتن المطبخ سوا العشه من وگت نافع عنده خفاره بالـ ٨ يمشي لدوامه
نورس ـ أي عمه أن شاء الله
نوريه ـ أنه هم أكوم أروح البيت
حربيه ـ هلا بيج خيتي سلميلي على أمي وأبويه بلكي باجر أمرلهم لما يجي مشعان ان شاء الله
نوريه ـ هلا بيح بكل وگت .
نورس ـ عمه نافع ما أجه البيت مو
حربيه ـ لا ما أجه خابرته بعده بالچم گال يخلص گبل يجي يتعشى ويتوكل گملي العشه مالته من وگت لايجي ويهرج البيت عليچ .
نورس ـ أن شاء الله عمه .
لبنى ـ وگفت تطبخ عشه لرجلها وأنه بلشت بعشه العيال وعمتي عجنت وخبزت وغسلت الحوش وصفا كاعده بالصاله اليوم وعايفه كتابها ولازمه موبايلها مأخذه راحتها لان كل يوم بغرفتها ما تنزل من أخوانها هنا .. وكملت العشه وطگيت گبل دخلت أسبح وأندك الباب وبس سمعت صوت صفا.
صفا ـ لبنى بالحمام .
نافع ـ تأخرت على دوامي شوكت دخلت
صفا ـ قبل شويه
لبنى ـ عالسريع كملت وطلعت وشافتني نورس گامت تحجي .
نورس ـ ما لكيتي الوقت المناسب تدخلين تسبحين الا ويه جية نافع من الچم! لو هاي موده جديده تردين تلفتين نظر .
لبنى ـ نورس أحترمي نفسج كافي عاد طلعتيها من ماعونها شويه أستحي
نورس ـ جان أنتِ أستحيتي وتعرفين موعد جيته ويجي مستعجل ولازم گبل الحمام .. وشعندج تسبحين رجلج مو اهنا المن حاجزه الحمام
صفا ـ أكولج كافي لخاطر الله شگد لغيتي ورجلج ما حجه بگدج وصعد يسبح بحمام الفوك شدعوه هلكد حميتي طفي لايحترك طفي .
نورس ـ أنجبي وما عليج وحلگج أكسره أذا تحجين وياي بهذا الأسلوب .
لبنى ـ عفتهن متلاغيات ودخلت غرفتي شگد مكروه وما تنطاق لخاطر الله .. صبوا العشه ودزوا عليه ما رحت گلت الا رجلها يروح وقررت بعد من يكون اهنا ما اتواجد كدامه ولا أكعد وياهم من هو موجود! وسالفة الحمام لازم اشوفلي حل بيها ومن يصخرني أتجاهله رغم هو عادني وحده من أخواته بس مرته شگاگه وأخاف تبليني بسالفه وتهجم بيتي بيها هاي گلشي أتوقع منها .
نايمه بالليل وگعدت الوقت متأخر متضايقه سالفة الأدرار مدمرتني گمت والبيت أظلم دخلت لمغاسل الداخليه وطلعت والنعس بعده بعيوني .
وسمعت الباب الخارجي مال المنور ينفتح عالباب الحديقه صايره ورا البيت حديقه معزوله بيها أقفاص طيور لكابتن ناجح ومكان مخصص لكعدتهم الخاصه بعيداً عن حديقه البيت مرات يكعدون يشربون نركيله ويدخنون براحتهم وناجح يفتح بث ونافع مخلي بيها أغراض سيارته يعني مخصصه بس الهم بيها باب صغير عالخارج بس مقفول يكون قريب من بيت جدي ياسين عمتي من تروحلهم تروحلهم من هذا الباب
وگفت أريد أعرف مصدر الصوت لان ناجح مو هنا بالدوام وباقر ملتحق وعمي بالقريه ما أجه بايت هناك يعني بس حليم ونافع موجودين ونافع هم راح الخفارته الصبح يله يچي ..
وگفت أريد أوصل الشباك وأشوف منو بس الباب أنفتح بوجهي وركزت زين هاي صفا! .. صفا شمطلعچ بالليل
