رواية خيط وابرة الفصل السادس والعشرون بقلم شمس العراقية
لينا ـ من بعد صفنه طويله وعقل متوقف ومتبنچ تماماً والدموع جامدة بوسط عيوني والرجفه بعدها سايره بكل أنحاء جسمي .. تقربت لزمت الموبايل وأيد تتقرب للشاشه وأيد تمنع وعقل رافض يتقبل الحقيقه والواقع المؤالم .. بيتك صرت ما تأمن على نفسك وتتصور وأنت عاري وهيج صار ويه أختي مع الأسف
لقطات الفيديو والصور برأسي أنفضها من عقلي وترجع النذله تذكرني بيهن .. أخذت نفس عميق ومن بعد هالصفنه الطويله والسكوت التام على أبتزازها اليه وخضوعي الها .. قررتت
تجاهلت كل أشعارات رسائلها ورجعت عالفيديو والصور أريد أشوف زوايا التصوير منين مصورتها وشلون كدرت
وين عايشين أحنه وأذا كدرت تصور لبنى معناها تكدر تصورني هم!!
بس أشوف زوايا التصوير واتأكد وأتفرغلج يا صفا لو أني لو أنتِ! ..
فززني صوت خالتي تصيحيني عالعشه خرب مو وگتج
هسه يا عشه يا بطيخ دعوفيني بحالي
سميعه ـ لينا وينج تعاي تعشي ويانا
لينا ـ ما أريد خاله ما جوعانه تعشوا أنتوا چاي أقرأ
ـ يله بعدين راح أضملچ حصتج بالفرن
ـ بگلبي خاله بس روحي عني فدوه لعينچ خليني حايره بمصيبتي ..
رجعت ركزت عالصوره وسويت الها زوم ركزت زين أجيبها منا وأوديها منا الصوره متصوره من مكان عالي! بس منين؟ ..
رجعت فتحت الفيديو وغمضت عيوني بدايته جانت لبنى تفتر بغرفتها وترتب بنفسها أباوعلها وأني أبجي دم بس أحاول أركز رجعت ركزت عالفيديو زين! والضوء جان مفتوح ودخل باقر وقفل الباب وصار بينهم بوس والحضن أستغفر الله والفيديو واضح،بس اللي لاحظته زين الفيديو متصور من مكان عالي نفس تصوير الحمام! كأنما بالسقف ومباشر على جربايتهم أذن من فوك الكنتور!
بعدين الضوء صار من أبيض للون أحمر والتصوير يبين بس هيئتهم وحركاتهم على جربايتهم كلما أباوع أشهك شهگة موت! وموت اليأخذني يا خيتي على هالسالفه الورطتج بيها ..
قدمت التصوير أكثر عن لقطات وباقر طلع وفتح الباب وضوه الصاله شرك عالغرفه ورجع أنسد وأنفتحت الأضويه ولبنى گامت تعدل بثوبها لابسه ثوب قصير مغطي فقط بطنها وشعرها نازل وكفت تعدل بالجرجف مال الجربايه وتقربت على الكنتور وجهه صار قريب عالكاميرا كلش! يعني الكاميرا بالكنتور او فواكاه ..
بعدها توقف التصوير! أنتهى الفيديو من طلعت لبنى من الغرفه أذن التصوير تم بكاميرا أو أحتمال موبايل بس شلون گدرت تثبته!
گبل بدون تردد أتصلت عليها ورفضتني رجعت أتصلت وهم رفضتني دزتلي رساله
صفا ـ شتردين متصله وين أكدر أحجي وياج تردين تفضحين روحج وتفضحين أختج راسلي مراسله .
لينا ـ عبالي أحجي وياج بس ماكو أي كلمه تنحجي أنتهيتي صفا والله أنتهيتي .
ـ ليش لگيتي الحل
ـ أي الحل موجود .. مو أنتِ التخوفيني أني الأخوفچ وأطيح حظج هم عبالج تخوفيني بهاي المقاطع ترى حبل مشنقتچ بيدي خاف ما تدرين شو بالعكس تخوفين صاحب الحق وما تخافين .
ـ مو جنتي ترجفين وگبل رجعتي البيت شجاج
ـ موقفي جان صعب وبالتصوير أختي وهذا الشيء ثگيل ومحد يقبله وراح أنهيج والله أنهيج وأحلل ذبحج
ـ ما تگدرين تســوين شيء لاتتورطين ويطيح حظج وحظ أختج وأعرف بشنو تفكرين وحتى لو رسلتي مقاطع والصور لنافع أو باقر بالحالتين أني أنشرهن!
ـ ما تگدرين .. رجعت حذفت گل الرسائل ودزتلي رساله
ـ ثواني ويوصلج شيء يخليج تخلين رأيچ
ـ وصلت صور لمحادثات ومن الصدمه موبايلي وكع من أيدي والكاع والدنيا كلها أفترت بيه وأني أقرأ المحادثات وكلام حب وغزل وكلام سخيف! والصور مالتي كلهن بفساتين مال حفلات ومال بيت وشعري وصدري جنت أصور نفسي هاي الصور جانت بموبايلي! شوصلهن لأبو مسـار! أخذت نفس وقبل لا أكمل أنحذف گلشي جاوبتها صفا
ـ لاتگولين مفبرك ما عندي شيء مفبرك گلشي حقيقي ومؤثق وبإسمج شخصياً!
ـ بس أني ما حاجيه ويه أبو مســار شلون صفا شلون
أكتب وأيدي ترجف من الخوف والصدمه هاي التثق بصداقات الأقارب من طاح حظي شگد حذرني خالتي أخواتي منها وما سمعت الهن تالي وكعت بإيدها
ـ تذكرين حسابج القديم مره گلتي أنقفل وحاولتي وياه وما رجعلج! وبعدين سويتي حساب جديد وعفتي
ـ أي
ـ أي أنقفل من يمج بس مفتوح يمي وصورج أخذتهن من موبايلج من جنا صديقات أني وياج! تذكرين مو
ـ صفا .. دخت وگع الموبايل والنفس ضاك بيه عقلي توقف تماماً والدموع تجري وتحجي حالي والمصيبه الوكعت بيها نفسي .
ـ حتى لو حفظتي كلامي عندج وشوفتي لنافع وأبو مسار شلون .. شــلون تخلصين نفسج منه!وگلشي يخصج موجود عنده أي غلطه منج تنهيج وتنهي أختج وسمعتها وشرفها يصير للعلن وگتلج بس تبلغيهم أو أي شيء يصيرلي أنشره بكل الكروبات يعني من الأخير ما يفيدج لا نافع ولا غيره ..
مو بس أختج حتى أنتِ أنشرج بس مو على أيدي على أيد مختار المنطقة! يعني فضيحتين فضيحة للسان وفضيحة مشاهدة وأنتِ أختاري ياهو الأنسب الچ
باي لينو .. فرصه سعيده حبيبتي .
ـ سبحان الله من الشخص يوكع بمصيبه تتربط أيديه ويتوقف عقله عن كل الأفكار فقط يضل مصدوم وفاتح عيونه ورافض اللي يصير .. بثواني حذفت گلشي فرغت المحادثه وبقت فقط رسائلي!
وگعت بالكاع مصدومة وضايعة ومكسورة، وفاقده كل سبل النجاة التخلصني وتخلص أختي من هاي المصيبة اللي ورطت نفسي بيها.
بجيت بقلة حيلة توجع الروح وتكسر الخاطر وتمنيت لو عندي سند أو أحد ألجأ اله يساعدني بس أدري زين محد راح يوگف وياي ومثل ما كالت أني عندي أهلي بظهري حتى لو عار عليهم ما ينطون بيه ويفضحون نفسهم أنتِ منو عندچ؟.
يالله شکد توجع هاي الكلمة.. ياريتك بابا باقي عايش ويانا واريتك هسه موجود جان حسيت بقيمتك الحقيقية ومكانتك اللي ما يعوضها أحد، والله الأهل عزوه وسند بالحياة.. واليتيم إذا مو فطن ونبه يضيع حقه وينوكل لحمه .
صحيت على نفسي وگمت غسلت وخالتي تحاجيني بالي مو يمها ما رديت عليها دخلت غرفتي ما أعرف وين أروح وشُــنو أسوي .
. باوعت على موبايلي غمضت عيوني بقهر كرهت الموبايلات والمواقع وكل هالأمور رغم ما دخلتها ولا أعرفلها وموبايلي فقط أراسل أخواتي وأستخدمه لدراستي وعندي بي ذكريات ومحادثات وصور لماما الله يرحمها ..
بس مع ذلك أنضريت وما سلمت على نفسي لان الغباء جان مني ما عرفت أشغل عقلي ضليت مرعبله ومأخذه الحياة بضحك وتغاضيت عن أخطاء ما ينسكت عنها بالاخير وگعت برأسي وأسـتاهل أي والله أسـتاهل
طلعت أسمها دزيتلها رساله صفا أريد أحجي وياج أتصال
صفا ـ لحظه وأني أتصل لاتتصلين
لينا ـ بقيت أنتظرها لما أتصلت وجاوبتها مختنگه صفا أني إشأسويتلچ! بشُنو أذيتج ليش هيج سويتي بيه وما گفاچ رحتي على أختي الفقيره ليش صفا ليش
صفا ـ أحمي نفسي منج ومن أختج وأي غلطه تعرفين شسوي مو ما يحتاج الغي زايد
ـ تمام . تمام . والله ما عليه بيج والله شتسوين سوي مالي دخل بيچ بس الله عليچ أمانه برگبتج أني وأختي طلعينه من رأسج
لبنى لاتصورينها بعد الله عليج لاتصورينها وأحذفي المقاطع والصور من موبايلچ أخاف أحد يشوفهن وأختي تنفضح أحلفلج بيش أحلفج يتيمه ما عندي أحد بس الله يتكفلني .
ـ الأريده ما تحجين لا أنتِ ولا أختج وتكفن شرجن عني
وحلگجن تخيطنه بإبرة وخيط!!
ـ تمام أخيط حلگي بإبرة وخيط والله وروح أمي ما علينا بيچ وأذا على لبنى والله لو اتذبحينها ما تحجي هي خوافه وما تأذي نمله، بس عوفيها أذيني بس لاتأذينها گلشي الا هي أباوع على الله وعليها هي البقتلي من ريحة أمي لاتكسرينها صفا
ـ تمام تمام .. وأذا أنتن ما أذيتني أني ما أذيچن والله بس طلعن خشمن من حياتي ولاتتدخلن وتستشرفن برأسي خلني أشوف شغلي وكلها أيام وأخلصجن مني! وأطلع من هالمستنقع الجايف
ـ ليش وين تردين تروحين يعني تنهزمين
ـ أي ولاتسألين بعد . بس صمي حلگچ زين
ـ تمام تمام والله ما عليه روحي بكيفج وحتى نافع ما عليه بي ولا باقر وما أحجي شيء وعد خلص الموضوع أنسد من يمي بس سدي الله يخليچ لخاطر أمي الله عليج .. أموت ولا أحد يجيب أسمها ويگولون بنات الست قلق . أمانه صفا .
ـ ما يهمني لا نافع ولا باقر ولا غيره ما أشتريهم بقندرتي وخلص گتلج هاي هي شگد تلغين يله باي
ـ تمام باي .. غلقت الخط بوجهي وصفنت على نفسي هاي تاليتها لينا وحده مثل صفا تخليج تنزلين نفسچ الها وتتوسلين! وأنتِ ما مسويه شيء وصاحب الحق صار يخاف بس كله من أيدي ...
⊱━━━━⊰✾⊱━━━━⊰
لبنى ـ أكو أحداث تصير ويانا نتجاهلها ونخلي الها أعذار
ونگول يمكن .. وأني هذا الصار وياي خليت الها عذر وگلت يمكن صدك جانت فاتحة بث والله ما أجتي أبالي غير أفكار عنها..
غير گلت وين جانت شتسوي طالعة لوحدها يمكن صدك فاتحه بالحديقة ويه صديقاتها يعني من الأخير صدگتها وما راودتني أي أفكار ثانيه عنها لان أهلها وتربيتهم معروفين ومتشددين عليهن بالأخص نافع حتى من تزوج عيونه على أخواته ودائماً أسمعه يوصي بإمه وعينج عليهن على صفا يأكد خل تقرأ
وحتى أخواته الباقيات من أبوهن وأخوانهن موجودين موبايل ما يلزمن حريصات ويحترمنهم يعني مستحيل أشك بوحده منهن بس الأ صفا الوحيده مـا أرتاح الها من يومها گلبي ناغزني منها وأحذر بلينا وما يفيد ولينا كأنما وتعاند بيه ومن بعد أخر موقف صار منعتها منها
بيوم گملت شغلي من وگت جانت عصريات همزين ما موجودين ونورس ونافع طالعين علمود لاتكول حاجزه الحمام وتسويلي سالفه .. دخلت غرفتي لكيت باقر يتصل هلا عيني .
باقر ـ هلا بإم جهالي .. راح أنزل مشتاگ
لبنى ـ صدك لو تتشاقه وياي
ـ لا والله .. ساعه أو أقل وأني يمج تحضريلي ما أريد گلشي بس أريدج
ـ أسويلك أكل جوعان
ـ ما أريد نزلت تغديت قوزي بمطعم
ـ ها غداك دسم
ـ أي ويحتاج تحليه
ـ ضحكت على سوالفه تمام توصل بالسلامه
ـ الله يسلمج .
ـ سد الخط وأخذت ملابسي وشغلاتي ودخلت الحمام سبحت وأني أسبح سمعت صوت حركة! وگفت أريد أسمع بس گلت يجوز صوت الدوش رجعت أسبح وگملت طفيت الدوش ولفيت شعري بالمنشفه ولبست وطلعت وأني أريد أدخل الغرفه شفت صفا بالصالة كاعده تگلب بموبايلها! ..
دخلت غرفتي رتبت نفسي وحضرت ملابسه ورتبت غرفتنا وعطرتها وسمعت صوته يحاچي صفا أجه فدوه لعينه وأنفتح الباب ودخل وقفله وتقرب تبادلنا النظرات والشوك .. مشتاقتلك
باقر ـ مو بگدي والله .. زين متحضرتلي وريحة الشامبو والغسول كفخت برأسي صطرتني
ـ غير هسه طلعت من الحمام متشوف شعري بعده رطب ما نشفته ما لحگت أسشوره
ـ ما يحتاج هسه أسبحچ مره ثانية .
ـ گمت وراه حضرتله ملابسه ودخلت الحمام وصدفه وأني أشغل ضوء الحمام أستغربت ولاحظت على المفرغه طافيه! بالعادة هي دائماً مشتغله تهويه هي صايره بمكان عالي نهاية الحايط قريبه عالسكف مطله عالممر الداخلي يم الدرج صاير مثل المخزن مخلين بي صطوله مال مواد غذائية وگواني طحين .
شغلتها ورجعت طفيتها ورجعت شغلتها ضليت العب بيها ضحكت على حرگتي .. سبحت ورجعت الغرفتي
وباقر بس سبح وطلع ..
وگفت أسوي العشه ودخلوا نورس ونافع شكلهم جانوا بالسوك وعمتي وياهم .. گملت شغلي وتعشينه وبعد سحبت نفسي الباقي عليهن ..
ثاني العصر جنت أنظف المطبخ وهما كاعدين بالأستقبال كملت وكلت أدخل أسبح وأصلي مشيت لغرفتي وشفت صفا ومن شافتني فزت بخوف صفا !!
شتسوين محتاجة شيء .
صفا ـ ها لا . أي الشاحنة مالت باقر نافع دزني عليها وجاي أدورها ماكو .
لبنى ـ بس نافع موبايله أيفون! وباقر موبايله مو أيفون لان ما يحبه وشاحنته بسيارته هو يشحن بشاحنتي أذا تردينها الج گولي عادي .
ـ ها ما أدري يجوز نافع مشتبه .. لا والله ما أريد عندي شاحنه يله أروح أكوله .
ـ راحت ما دققت ولا خليت بالي .. رجعت أخذت ملابسي سبحت وطلعت وباليل من نايمين أني وباقر صافنه عالسكف ولاحظت الفراش فوك الكنتور عمتي وهبيه رتبتلي نضده فوك الكنتور وخلتلي الجرجف من التول ولاحظته مخربط! واني بالعادة أرتبه مثل الميل.
باقر ـ گومي سويلنا ترتيباتچ على كرزات على فواكهه
لبنى ـ گمت ووگفت أباوع عالكنتور وأجر بالتول
ـ شبيج؟ شچاي تسوين
ـ التول مخربط! أنتِ خربطته
ـ لا وأني شعليه بي ياعيني
ـ لا گلت يجوز ضام فلوس بي
ـ لا وين فلوسي شعندي من الفلوس هو بس الراتب
ـ شلون تخربط باوع شصاير بي عبالك واحد متعمد وعمتي شلون صفطته هذيج المره هسه شيرتبه اليه
ـ يجوز أنتِ بالغلط طلعتي مخده وتخربط دعوفي على باجر وگولي وحده من بنات تساعدج بس أنتِ ديري بالج تصعدين عالكرسي لو يضل المخربط أنتِ ما تتگلطين
ـ لا وين أكدر .. رحت حضرتله كرزات وفواكهه وبالي يم التول معقوله نورس تخبث بس لا شيدخلها الغرفه شخربطه واني ما مأخذه شيء .. يله باجر أكول لزهور ترتبه اليه ...
الثاني يوم زهور سوتلياه وگمت أقفل الغرفه لان عبالك ما وحده متعمده كنتوري عالي وهو مرتب شلون تخربط!
بس هم ما سلمت من للسان عمتي تحچي وعلى نورس ما تگول من تقفل غرفتها وتطلع بس عليه گامت تسمعني حچي . وكاعده أني وباقر بالحديقه وأجتي صفا
صفا ـ أكولج أمي تريد الأوتي مالتچ تگوي بي الأوتي مالتنا يم نورس ونايمه وغرفتج مقفوله!
لبنى ـ أي هسه
صفا ـ لا ما يحتاج تگومين بس أنطيني مفتاح أني أخذه
لبنى ـ أنطيتها المفتاح وباقر باوعلي مثل ما عاجبه تصرفي لأن قافله غرفتي وگمت وراها وگفني حجي عمتي تحجي بالصاله
حربيه ـ المن قافلات غرفچن چا شگو كاعدات بالعيال ما مأمنات والله وگت جنتن مكفخات صرتن جنايين وغرف وأنحسبتن عالأوادم .
سگتت ورجعت وأجتي صفا أنطتني المفتاح وضچت وعمتي كعدت تگوي وطلعت نورس وتسأل على نافع
نورس ـ عمه نافع ما أجه من القريه
حربيه ـ شمدريني سارحه بي عندج موبايل وخابري
ـ شبيج عمه شو اليوم مزعوجه
ـ من سوالفچن حصره ما نأخذ حاجه تركضن تقفلن غرفجن چا شگو مكابلتني حاجن زلمجن وأطلعن بيوت وحدتجن ما كاظتجن غصب تكعدن عندي .
ـ أني جنت نايمه وسمعت صفا ادك الباب بس تعاجزت أكوم أعذريني عمه حقج عليه خل أشوف نافع وينه وأجي أكوم بدالچ .
ـ الحچي كله جنت بي قصد اليه لان أني قفلت غرفتي
لو قافلتها من زمان جان أشسوت! وبهل الأثناء دخل نافع مزعوج ودمه حار على لينا وسالفه هشام متقدملها ..
نافع ـ هذا أبن أخوج ليش ما يكعد راحه .
حربيه ـ شبيك تصييح شگوو هم رجعت على خوالك وياهو منهم شبيهم ولد أخويه ووكعوا بللسانك الله يستر .
ـ هشام العار
ـ شبي! وهشام صار عار ليش يمه شمسوي الك
ـ متقدم على لينا يخطبها!شو أبن أخوج شايف نفسه شوفه ومن كل عقله والله لو ينطح رأسه بالحايط لينا ما تصيرله مره وأهلج صدك ما يستحون وعينهم صلفه فوك سوالفهم رايجين يدورون مره لحضرة الضابط هشام عود الزين ما بيهم
ـ وشگو بيها أبن عمها كسار رأسها وچا البنيه أول تاليها تتزوج وأبن عمها أولى بيها وهشام خوش هشام ما بي قصور .
ـ ما تخليني ساكت على سوالفج أهلچ يمه ما تخليني
ـ لا أحجي يمه أحجي ليش ساگت وبعدين أنت شگو حارك حمامك السالفه مو يمك شعليك منها خلها تتزوج .
ـ شُــنو شعليه يمه غير بنت خالي وأذا أني ما عليه من عليه والله لو ينطح الحياطين لو مو أبن عمها ما أخلي يأخذها .
ـ والله يمه هاي زايده منك تتدخل
نورس ـ لا الظاهر عمه أبنچ حاطه عينه عليها ويريدها اله متشوفينه محترك دمه عليها لو وحده من أخواته ماهيج يحترك دمه بس هاي لينا وأخواتها نور ولبنى! شلون ما يفور دمه عليهن .
نافع ـ نورس لاتلوصين بالحچي والسالفه ما تعرفينها لاتبعرينها خلچ بمكانج وصمي حلكج لا الصمه الج بالقندره .
ـ هاي الله گدرك عليها تلصم حلگي بالقندره علمود الست لينا والله متقدملها أبن عمها وأنتِ شگو معترض وتمانع بس أذا تريدها أكولك أي وااضح تريدها والله أكص أيدي أذا ما طلعت مخيل عليها
ـ وتالي وياچ مو أجي أكسر حلكچ
ـ تكسر حلگي لان كاشفتك وكاشفه سوالفك وصايرلي والي مالتهن وأي مشكله تصيرلهن تركض كدامهن حتى المتزوجه متكفل بيها دگول مسجلات بإسمك لو يوكع بإيدك تأخذهن كلهن ما طلعت سالفه هاي
.. نور لبنى لينا كلهن من ضمن أهتماماتك! أهلهن ما حايرين بيهن بگدك .
لبنى ـ ما سگتت وتحجي بعصبيه وعمتي تسد بلحگها وهو يصييح عليها وأخر شيء راد يضربها عمتي دخلتها الغرفه وقفلت عليها الباب وخلصتها من نافع
نافع ـ يمه وخري من الباب أكسرها وأربيها وخري يمه
حربيه ـ عوفها ليش تضربها وعلمود منو علمود صفيره
ـ يمه ما سمعتيها شحچت شگالت
ـ أي سمعت وحقها شگو محترك دمك عليها چا تريدها ما جان تأخذها شکو عكب ما تزوجت كمت تحوم عليها
وتمانع زواجها حتى الخبله التشوفك تگول هذا عاشگها
ـ يمه شبيچ من كل عقلج بابا البنيه عادها مثل أختي دخيل محمد على تفكيرجن مو نسوان صركاعة الله .
ـ خوش عادها أختك والله ما أشوفن هيج يايمه وتاليتك تأخذها ينافع لان أنت من يوم يومك حصة خالك صباح وعمتك سميعه ومن أولها ما حصلت ونضربت دبه عاد من تاليها والتهوبز مالتك مو خالي يا يمه لان سالفتك مالك بيها حق تعارض على أبن عمها .
ـ يعني أخلص من بنت أخوج تطلعيلي أنتِ!! ويا حصه تحجين عنها أنه مو حصة أحد وبنات خالي مثل أخواتي أفهمنها هاي أفهمنها .
وما عدهن زلمه فوك رأسهن وخالي ومات مو كدام عينج يتامى طاح حظهن بالمراكز وكسروا بيهن وطعنوا بشرفهن ونور سمعتها صارت بالحضيض والأهلج السبب أمج وأخواتج حچن وطعنن بشرفها مو كدامج ليش تعرفين وتحرفين ليش مو بنات أخوج مو أمانته
ـ والله بنات أخويه رجلهن خفيفه من دور أبوهن عايش خليني ساكته نويفع مو أنت هم مذنب ومشرك ليش تحجيني! بس شگول أنت حصة سميعه
ـ لخاطر الله شتردين أنتِ بس گولليلي شتردين! ..
أنتِ هذا الكاتلچ من القهر نافع حصة سميعه! وتردين أعوفهن وألمن أعوفهن وياهو اليجي يصير عليهن والي مثل أخوج محمود صاير والي وبكيفه يزوج يوم جايبلي واحد من السلك العسكري الواياه ومدري منين ويوم مقدملي أبن قويدر الجلب والمن لـ لينا .
ـ أحترم ترى أكوم أكسر حلگك كافي ولك التحجي عليه خالك لازم تحشم تقدر
ـ من خلاله خلت عينه وفگستها ما عندي خوال مثل أخواتج صايرين زلم عالنسوان ووصليها لأبن أخوج لينا ما يحصل أظفرها وشتگولون گولوا يريدها هاويها بكيفي بنت خالي وبكيفي ما أزوجها للولد أخوج لو يعبدون يم بابي .
ـ بنت خالك صاير ولي عليها
ـ أي ولي عليهن كلهن .
ـ لعبن بيك لعب وفشلنك گدامك أهلك وأنت والماكو سوه ما أعترفن لا بيك ولا بوكفاتك وياهن وهسه جاينيني تهوبز ودمك محترك عليهن من عمت عينك أذا تلحك الأوادم ما طول تضل ملاحك ريحتها
ـ يمه گافي هذا الموضوع ما ينحچي بي لا أحرك البيت على رأسج ورأس الخلفوج
ـ طاح حظك يا يمه ما تحترم أمك
لبنى ـ خله وطلع مزعوج وعمتي تحجي وتدردم ويه نفسها
حربيه ـ مدري شمسوياتله مدري .. يجرن بدمه أكص أيدي اذا ما طلعتي مشربته وفاره رأسه وصاير حصتج أنه أجيب طاريه عمته ينگلب خنزيز عليه مو عمه هاي عوزه يعبدها وگلشي عايد الها محترك دمه عليه . أخ ينافع أخ يجوية گلبي معلعل گلبي من دون أخوتك .
لبنى ـ ما تدخلت لان هي من الأساس ما تحبنه نوب نافع مسوياته حصتنا كملت علينا ... للمغرب صار وگن العشه ولا وحده منهن گامت تسوي عشه ونورس كاعده تگلب بموبايلها وعمتي گوت ملابسهم وراحت تعزل الطحين ومواد غذائيه جوه الدرج ويمكن العشه على نورس بس شو مغلسه أني هم غلست وطبخت الغده مالي شغل
بغرفتي ودخل باقر وأسمع صوت ناجح
ناجح ـ يمه شُـنو ماكو عشه جوعانين شسالفه شو گلشي ماكو .
حربيه ـ هسه أكوم أسويلكم يمه صبرك عليه
لبنى ـ دخلت المطبخ وصاحت على وحده من البنات تساعدها ونورس خلت ومشت لغرفتها بعد ما شفناها والمواعين وكعن برأسي لان عمتي والبنات سون العشه .. ماكو هيج قابليه من التغليس العدها .
تعشينا وگملنا اني رحت تمددت تعبانه وباقر طلع ويه جماعته عبالي يجي وأحجي وياه على موضوع يطلعني أو يوديني القريه أنه أضل أسمع حجي منهن وساكته
وگبت العيطه وصوت نافع عالي وعمتي حربيه تعيط يا ساتر شگوو، عفيه بيت بس عياط وأكيد تعارك هو وياها
لبست شالي وطلعت مو مال أضل كاعده .
طلعت وعمتي تدك بالباب وعمي مشعان وياها يحاولون يكسرون الباب وناجح نزل يركض ويصيحون عليه وما ينسمع غير عياط وصريخ نورس!
نورس ـ لحگولي راح يموتنني عمه لحگيلي عمه عوفني عوفني أنت مخبل مريض مخبل الله يأخذك .
لبنى ـ أنفتح الباب وطلعت نورس تعيط وشعرها على وجهه اللي صاير قطعه دم حلكها ينزف خشمها كذلك وهو شايل الحزام ويريد يضربها ومشعان وناجح أثنينهم لازمينه وما يگدرون اله وهي بظهر عمتي تحجي عليه
نورس ـ مريض مخبل والله مخبل
نافع ـ أني مريض أني مخبل ولج أني والله اليوم أموتج والله أذا ما فلشت حلگج وكسر ظلوعچ وما خليت الهوا يطب بصدرج يا بربوك أني مو نافع بنت الگلب اليوم أنهيج وصلاة محمد اليوم أحفر گبرج بيدي .. عوفوني أربيها هالطايحة الحظ
حربيه ـ ولك شجاك تسودنك وگبن سوادينك عليها شصارلكم أنزركتوا بعين .
مشعان ـ ولك نافع بويه أرگد بكاعك خل نفهم السالفة شنهي
نافع ـ شحچي يابه شحچي حاچيتي ما تتسولف
حربيه ـ يمه الزهره وگعت گلبي يمه شگو أحجي
نافع ـ والله يا يمه السالفه وما بيها بنت أخوج طلعت تأخذ حبوب مانع علمود لايصيرلها جهال وأني صارلي شگد اسألها تطلعي مية عذر وأوديج الدكتوره لا بيج شيء لا.. لما طلعت الخاتون ما تريد جهال يابه ليش سأليها سأليها أريد عذر مقنع ليش ما تريد جهال مني
لبنى ـ شمر الأشرطه على عمتي حربيه وعمتي شالتهن وفتحت عيونها على وسعهن مصدومه ونافع يفرك بوجهه مقهور
نافع ـ هاج شوفي كم شريط بشريط مأخذه هذا الصخام المأخذته حتى خلفه ما خله بيها
نورس ـ وأنت شمدريك بهل السوالف! وشمعرفك هذه حبوب مانع! لما عندك خبره بهل المواضيع
نافع ـ ومحمد اليوم أموتج
لبنى ـ هجم عليها من ظهر عمتي ولزمها من شعرها ويضرب بوحشيه ضرب موت بالگوه عمي وناجح خلصوها منها وسحبوا وهي تبجي بحضن عمتي حربيه أخذتها لغرفتها صايره ساحة حرب من تكسير حتى جامة الكنتور مفلشها ..وگفت يم الباب بصف زهور وأباوعلها ضاربها ضرب قاضي عليها وتبجي وتجمع بملابسها وعمتي تحجي عليها
حربيه ـ لو موتتج هم حقه ما الومه عاشت أيده چا تأخذين حبوب مانع ينورس وهو منتظر خبر حملج على نار واني طايره رويحتي علما أشوف أبنه وحفيدي طلعتي ما تردين تخلفين منه والله يصحلج رجال وگلتي أعور وكمتي تتبطرين على نعمتج ينورس أنتِ ما تردين خلفه من نافع لا والله لو يكسرج وما يخلي عظمه صاحيه فلا الومه .
نورس ـ لا والله عمه مو القصد ما أريد منه بس شفت الوقت مو مناسب للخلفه وگلت خل تستقر علاقتنا كم سنه وعگبها الله كريم ما ردت أشيل خطية الطفل وأحنه علاقتنا ما مستقره .
ـ وشبيها علاقتكم ما مستقره منو مثلكم شو يباوع على حلگج وطولچ وتمدين لسانج متر عليه وهو مطول باله وساكتلج وهو الصاكر عائله كامله أنه أمه أخاف وأهابه بس أنتِ وحده ما تردين تبنين بيت يا يمه وهذا مو عذر لان أبني وأعرفنه من دوامه للبيت .
ـ هذا حچي عمه أنتِ الج الظاهر شمدريچ بسوالفه خوما يچي يسولفلج صخام وجهه .. عمه نافع مو أدمي واحد مسقط لأبعد حد
ـ أنجبي وأسگتي أحسن بس أنتِ خبله عبالج كل الزلم مثل أبوج من طاج حظج يا عمه ويله گومي غسلي
ـ لا عمه لهنا حدي ما أضل بعد. ومستحيل أبقى عنده وخل يتزوج وحده تتحمل خبالاته وسوالفه وأيده الثكيله
وتخلف اله جهال أني بعد ما أصيرله مره لو يصبونه بالذهب نافع بعد ما أرجعله .
ـ رچلج أكسرها أذا طلعتي من غرفتج وين تولين عليمن تباوعين كعدي وسگتي وحشمي وستري على روحج وداري نعمتج يعمه المره مو كل يوم تلگي رجال وأنتِ بيت ما عندج عليمن تمشين على أبوج حاير بهم أخواتج
سدي حلگج وگومي غسلي يله وهالسالفه تنسد ومن باجر أخذج الدكتوره تفحصج تشوفج شمسوي بيج هالمصخم المانع الجنتي تأخذينه
لبنى ـ نورس جانت معانده ومتأخذه قرار نهائي طلعت من يمها عمتي راحت على نافع كاعد لوحده يجر جگاير وگفت تحجي وياه وتقنعه وما حسينا غير نورس طلعت لابسه وبيدها جنطتها .
نورس ـ عمه وديني لبيت أبويه لـو أروح لوحدي
حربيه ـ وأبوج منيله البيت دمشي كعدي وسكتي كلمه والثانيه أبويه وأبويه من عمت عين أبوج وأذا ضربج تستاهلين چا يضل يباوعلچ .. تعوذي إبليس ورجعي
الغرفتچ
لبنى ـ عبرتهم وطلعت لوحدها تمشي وعمتي تصيح وراها وهي ما سمعت كلام ولا أهتمت لأحد حتى عمي مشعان وگف يحجي وياها مشت عناد .. طلع نافع وراها وجرها من أيدها وصعدها السياره غصب
نافع ـ أكبرج بيت أبوچ وأنه الممنون وأنعل أهلچ لابو الساعة الكشره الشفتچ بيها وخرا بروح أهله اليفكر يتزوج .
لبنى ـ شغل السياره ووداها وعمي مشعان گام يحجي على عمتي وصار عصبي
مشعان ـ گله منچ .. والله گله من أيدج محد خرب حياة هالولد وطيح حظه غيرج أنتِ ..
حربيه ـ وأنه شعليه بي هو أبنك مخربط
ـ لا والله أبني مو مخربط بس أنتِ دبگتي على بنت أخوج دبگتي لزكتي لدينها والولد ما جان مفكر بالزواج گتلج عوفي عوفي خل يأخذله سبة وگت ويصفى فكره وگلبه لا أنتِ عبالج أذا يتزوج يرفع رأسج كدام حبابيج شلون سميعه فضلت غافر على نافع شلون لا هاي ثكيله عندج ما تهضمينها أذا ما تسوينها شغلة عناد وأستلمي طيحان الحظ هسه .
والله لو تبقين طول عمرج توفين نذوره وصداقات زواج نافع ويه نورس ما منا خير وهذا شاربي أزينه أذا بنت أخوج رجعت لا خبالات وسوادين أهلها كلهن برأسها .
لبنى ـ عمتي سگتت ما جاوبته وعمي دخل مزعوج والبيت صارت أجوائه مشحونه وأني هم نهزمت على غرفتي ضليت كاعده لوحدي وقررت هاي هي بس يجي خل يشوفلي حل لو يأخذني للقريه شگو بيها وعمتي تحبني وتخاف عليه .
نايمه وأسمعه يدك بالباب ويحجي
باقر ـ شگو قافلته متگولليلي شبيها هالغرفه فتحي يمعوده .
لبنى ـ خرب نسيت گمت عالسريع فتحته ومبين عليه عصبي
ـ على شنو قافلتها
ـ شمدريني أنت تأخرت وقفلتها
ـ شگو ترى عايشه بنص أهلي مو غربه سالفة المفتاح ما عاجبتني عوفي يمعوده وبعد لاتقفلين غرفتچ لاتجبيين حجايه لنفسج على قافله غرفتها .
ـ ترى قفلت غرفتي لان الجرجف متخربط وعبالك واحد متعمد يدخل غرفتي ويخربط ويلعب أغراضي ومرت أخوك تكرهني وگلت أقفلها أحسن .
ـ وأذا تخربط شصار يعني ما يترتب شو سالفتج مدري شلونها ومنو بحال غرفتج وأغراضج عيب عليج بابا وليش تكرهچ شگو بينچن .
ـ هيج ماگو شي
ـ من أحجي وياج جاوبي لبنى
ـ لا أحجيلك ولا تحجيلي هاي هي سد الموضوع والغرفه ما تنقفل مشيت لزمني من أيدي عوفني باقر
ـ من اسألج جاوبيني طبع النتر هذا والعنفصه ما أحبه
ـ گتلك ماكو شيء هي من يومها ما تحبني وحدة صاحبة مشاكل ويوميه هارجه البيت بصوتها
ـ وأحنه شعلينه بيها هي ورجلها وكل رجال ومرته يتعارگون
ـ شو أني وياك ما نتعارك
ـ چا غير متفاهمين لو تردين تحسدين نفسج ويكبن سواديني عليچ وأكرهچ بعيشتچ.. تردين وجع الرأس بس حايره شلون تجيبنه لروحج .. سكتي عمي وأحمدي ربج على العندچ وما الج لزوم بغيرج وعدها رجال هو يحل طلايبه وياها .
ـ مشيت وصاح وراي
ـ وين
ـ أحضرلك فواكهه
ـ ما أريد گلشي .. تعاي گابليني
ـ مشيت نمت وهو ذب ملابسه ويباوعلى وصديت وجهي مزعوجه منه
ـ عاينيلي
ـ ما جاوبته
ـ ما تلوگلچ الطنگيره لان گلبج طيب وأني أطيب مو
ـ أبتسمت غصب
ـ چا هيّ العافية غير من تضحكين وتخلينا نصفي حساباتنا بكلمتين حلوات .
ـ ولا ينگدرلك تعرف شلون تراضيني ... متمدده وأباوعله يكشر تفاحه باقر أريد أحجي وياك بموضوع بس مو تعصب مثل قبل شويه وتصدمني بيك
ـ ليش مصدومه بيه
ـ الصراحه أي
ـ علمودج أني ما أريد تسمعين حجايه تغثج وسالفة تقفلين غرفتج واكفه وزحمه كدام أهلي .
ـ تمام هذا هو
ـ أي شگو ماكو
ـ ماكو شيء بس عركة نورس ونافع .. انقهرت حسيته غلس على موضوعي
ـ خوما تدخلتي أو حجيتي
ـ لا شعليه بس أحنه حبيبي شلنا بهل الهوسه كلها ليش ما نشتري راحه بالنا أني وياك ونخلص وهم نأخذ راحتنا أكثر
ـ دخليلي بالنظيف لبنى
ـ نطلع من البيت
ـ جديده هاي ست منين طلعتي بيها
ـ شگو بيها حبيبي ترى كل المتزوجين أول تالي يطلعون بيت وحدهم وهم يوميه مشاكل والحمام مشترك وأنتِ تريد راحتي وراحتك والله نطلع نرتاح وبدون مشاكل ومغثه مو ما تريدني أقفل غرفتي خوفاً أسمع حجايه تغثني
ـ لا بيها وين من هسه تردين بيتج لوحدج
ـ ليش مستكثر عليه لو ما أستاهل
ـ مو سالفة مستكثر لو ما تستاهلين بس السالفه وين أخليج لوحدج مره صغيره حمره صفره وحيدج وانه دوامي كل أسبوع ما ترهم بويه ما ترهم
ـ ليش ما ترهم ومن تروح الدوام أروح يم أهلي لاتصعبها فدوه لعينك
ـ لا يابه شسالفه وتضلين مسربه على أهلج شتگول علينا العالم جنة مشعان ما تكعد بيتها كعدي وستري علينا لاتجبيلنا حجايه
ـ ليش أجيبلك الحجايه ليش شمسويه ياعيني
ـ من الأخير سالفة بيت وحدج تشيلها من رأسج وين أحطج بيت وأنتِ جاهل وحامل بله طگ عليج الطباخ صارلج شيء يگولون مشى ورا شور مرته وحطها بيت وحدها وكبعها بمسؤوليه .
ـ يعني شايفني جاهل گول هيج من الأول
ـ چا شمكبرچ يا بويه البگدج چاي يدرسن وأنتِ من هسه تردين بيت لوحدج چا البيت بالسوالف مسوؤليه بابا وتلحگين على هالسوالف عليش شالعه گلبج من هسه كاعده والله ساتر عليج ومدلله شتردين يا بنتي مقصر وياج بشي!
ـ لا مو سالفة تقصير بس
ـ سدي الموضوع لبنى وگومي طفي الضوه خل أنام
ـ أخذني يم أمك بالقريه
ـ أنتِ خليتي الطلعه برأسج دبگتي على أم السالفه وين أخذج يم أمي ليش القريه أهنا أهنا والدوامي شلون خاتون أضل مسرب عليچ للقريه
ـ شگو عليه دوامك وداوم وأنزل علينا للقريه
ـ أبويه ما يقبل أهلي كلهم ما يقبلون والقريه دربها بعيد وأنه عسكري وقبل لا أتزوجج أكظي دوامي هنا
ـ گول ما تريد تطلعني وفضها
ـ وگومي طفي الضوه وفضينا .
ـ طفيت الضوه ونمت مقهوره منه حشگت روحي بالأخير وأجي سحبني عوفني باقر
ـ شگو طنگرتي شحجيت وياج
ـ عوفني
ـ ترة لمصلحتج أنه ومن الصبح أشتريلج بيت بس موهسه
ـ أنت ما تريد تحطني بيت وخلص
ـ نامي نامي سالفتچ طويله وأني مالي خلك لسوالف النسوان وطناگيرهن تعبان وجسمي تعبان
ـ عافني ونام وأول مره يسويها وحيل ضجت منه بس جذب ما يصبر أنتظرني أغفى وسحبني بحضنه وأني بعدني زعلانه منه .
مر كم يوم ونورس ونافع بعدهم وهي معانده وطالبه الطلاك وابوها وياها يوميه يدز على نافع تعال طلگها والعرفته من لينا يوم يمهم يومين يم أجدادها ونافع متخبل وكاعد وأجه حالف يوكفلها بالفرع بس يشوفها يجيبها للبيت والله يحبها ويريدها بس هي مو أدمي گبل تعال طلگ .
نافع ـ تريد تضل زعلانه خلها تضل طبها مرض بس يم أبوها مو لازمه الدرب على مهديه وگوم مهديه لا والقرأن الزمها أكسرها أخليها تتحصر على المشيه! وتعرفني وتعرف خبالي أسويها وعلي .
وفهمي بنت أخوج طلاك ما اطلگ لو تنطح الحياطين هي وأبوها وكل أهلها وأذا سمعت بيها لازمه درب المحاكم لو محاجيه محامي والعباس أبو فاضل أسوي شيء ما يعجبها! .
حربيه ـ أنه أحاجيها ما إلك شغله .
نافع ـ نشوف أنه أريدها من الله الكف عليها زله!
لبنى ـ دخل غرفته لازم رأسه وعمتي لبست عبايتها ومشت على نورس ودخلت الغرفه باقر يريد يلتحق وگفت متخصره ومزعوجه
باقر ـ گلبي خلقتج راح أمشي
ـ ما الله هداك
ـ لا . رجعنا لنفس الموضوع
ـ لا خلص سديناه تروح وترجع بالسلامة تقدمت حضنته ما ردته يروح هو زعلان مني ترجعلي بالسلامه
ـ يسلمج الله ديري بالج على البطنج وما عليج باللي يصير خليج بعيده هما يحلون مشاكلهك ومن أنزل هالنزله أخذج الدكتورتچ نشوف ششبيچ
ـ أن شاء الله .. شال جنطته وطلع الله وياه وصلته ورجعت ونافع متمدد بالصاله
ـ لبنى چاي چاي رأسي راح يموتني ما شربت الصبح
ـ سويتله وأخذته اله ولاحظت شريط الباندول بصف باگيت الجگاير كله مخلصه! شرب الچاي ونام ودخل عمي حجه ويه ما رد عليه
مشعان ـ أبني نافع گوم نام بغرفتك ليش نايم هنا نافع بابا مو أحاجيك
ـ يابه رأسي يريد ينفجر ومختنگ والغرفه ضيچه! أجيت أهنا أريحلي .
لبنى ـ عافه عمي ما ناقشه وضلوا على حالهم بس هالفتره نافع تعب حيل وصاير حاله حال الجنازه وعمي گام يودي لطيب هو وعمتي وحايرين بي حتى نورس سدوا سالفتها ولا يحچون بيها حاروا بنافع لان وضعه تعب كلش گام لا يأكل لا يشرب وگع بالفراش بس نايم وضعف وحتى العلاجات ما تفيده وأخذوا على طيب ثاني ذكروا الهم بكركوك والله كريم .
والصراحه خفنا عليه وأخواته حيل خايفات عليه .
صفا ـ أگولجن خاف بي مرض خبيث وأهلي ما يحچون
زهور ـ فال الله ولا فالچ عوذه منج ومن للسانج أسم الله عليه وعلى شبابه بيش طالبته
زينب ـ أمداج على هالمنطق لو ضاله ساكته بدل هالتمسلت مو أحسن من كبر لفچ .
لبنى ـ ما أنطنها مجال شبعنها تكفخ وگامت تلم بثوبها وصعدت فوك وضلينا كاعدين گالوا راجعين بالطريق أستغربنا ما تأخروا والدكتور الگالوا عليه أزدحام
زهور ـ من سوده بوجهي يمه أخوي أخاف بي شيء ورجعوا شو ما طولوا
لبنى ـ كعدنا ننتظرهم ودخلوا ونافع عمي سانده دخله الأستقبال وباسه من رأسه وعمتي تفرك رجليه وتبجي العيون صايرات جمره والحلك يابس
حربيه ـ يمه وليدي بيه ولا بيك شجاك يحيلي يمه نافع سوده بوجهي كون منين أجتك هالوكعه شنهي علتك يا يمه صخام بوجهج يحربيه ولك يمه حاجيني لاتعن يمه لاتعن وتزرف گلبي .
لبنى ـ كلنا مگابلينا وناجح لازم رأسه ويحجي وياه وأخواته يبجن عليه وعمتي تلطم على رجليها وتبجي
زهور ـ يمه شگال الكم الدكتور ما بطيتوا بسرعه رجعتوا
حربيه ـ ولج يمه شيگول الدكتور شيگول ولجن أخيچن معلول وما نعرفت شنهي علته گال سالفة أبنكم مو يم الأطباء چا عدمن أذا مو عند الأطباء عدمن يمه شنهي سالفته ما يحجي، يمه أخيچن يمه نافع سوده بوجهي
لبنى ـ طلعت أجيب الها گلاص ماي لكيت عمي كاعد بالصاله لازم رأسه وموبايله بإيده وأتصل وأسمعه يحجي ويه الحجيه .
مشعان ـ يمه أبني راح يروح من بين أيديه لحكي على نافع يمه .. ما گتلج خفت عليج وگلت أنه أودي لـ أطباء بس ياهو الأودي اله يگولي أبنك مو مريض گلشي ما بي گومه سويتله فحوصات يمه ما خليت دكتور يعتب عليه .
لبنى ـ أنطيت الكلاص لعمتي شربت ونكعت ملابسها وحضنته وتبوس بي وهو نايم على بطنه وعمي لازم الموبايل ويفتر ومر الوگت وأندك الباب بقوه .
مشعان ـ گوم يابه ناجح هاي حبوبتك أجتي جابها عمك
لبنى ـ گام ناجح ودخلت تمشي سريع وشافته نايم وكعت عگازتها من أيدها ودگت على صدرها بكل قوته
الحجيه عطايات ـ يمه وليدي يمه نويفع شسون الك الما يخافن الله يمه جمرة أفادي يمه يحيل حبوبتك
لبنى ـ تقربت عليه وتحاجي وتحاول تكعده
الحجيه عطايات ـ ولك حبوبه نايم وأنه هسه يله دريت بيك واكع .. مسوين بيك العمايل وانه محد يعلمني بعلتك يحبوبه من كون تنعمي عيوني ولا أشوفنك متمدد بهل الطول الحلو من سوده بوجهج يحربيه گومي منا گومي خليني أشوف علته شنهي گومي لا بارك الله بيج وبالساعه الشفتچ بيه .
لبنى ـ گومتها وعدلت نومته ورفعت تيشريته وداست على صدرته ما تحرك بس يعن وگامت على حيلها وداست على معدته گبل زوع على ملابسه وملابسها وحضنته من رأسه ضمته لصدرها .
الحجيه عطايات ـ گوم يمشعان گوم شغل السياره وديني على السيد... موجود بعرب... أجيبله دوه أبنك سالفته سالفه!
مشعان ـ شبي يمه
الحجيه عطايات ـ أكو غيرهن يمه الما يخافن الله مهديه وگوم مهديه اليمشن بهل الدرب شتترجى منهن حتى على أبنك ما سلمت منهن وهذا الجنت خايفه منه سالفة نوريه العوره ما تفوتها الك يحبوبه طلعتها بعافيتك كون صواب صابهن ..
لبنى ـ گامت تريد تنزع ملابسه وباوعتلنا بغضب
الحجيه عطايات ـ شعندي فرچه يله منا ولا وحده تضل ووحده منجن تجيبلي ملابس نظيفه مو من ملابسه وأريدن ملابس أعزب من ملابس ناجح! يله بساع تحرگن وياجن منشفه نظيفه ما مستخدمه .
لبنى ـ طلعنا وركضن چابن الها التريده وسندته هي وعمي مشعان دخلوا الحمام وقفلوا الباب وعمتي كعدت يم العتبه حاضنه ملابس وتبچي دم وتريد منو يبچي وياها على حالها...
إنقهرت عليها ودعيت من گل گلبي ربي يگومه بالسلامه .. طلعته الحجيه ونومته بفراش نظيف وفتحت القرأن بوجهه وضلت تقرأ يمه
... گملت وقدمتلها كلاص ماي حجيه تفضلي
الحجيه عطايات ـ أي والله يمه ريچي يبس كون الله يبس الماي ببطونهن .. شلون عافيتج فروخج شلونهم
لبنى ـ الحمدلله حجيه .. رجعت جرت حسره وباوعتله وغلست وجهه بماي بارد
ـ يا مطعونه عملت بيك هالعمل من كون الله يصخم وجهه من جعب الجدر .. وسليمه وينها لحدهسه زعلانه
حربيه ـ أي عمه ما ناويه ترد .. تريد الطلاك
الحجيه عطايات ـ شجاها تسودنت چانت شلون بنيه وتباوع عالطوله ليش نافع التواسد مخدته هم تنوي تعوفه من فلك فلكچن عليتن گلبه عِل .
تعالي گربي صوبي وأحجيلي عن نويرس
لبنى ـ أنه حجيه
الحجيه عطايات ـ أي أنتِ چا منهو أكو غيرچ اسألنه تعالي گربي صوبي وأحجيلي گلشي تعرفينه بس خل أكوم منا هذا مثل الذيب ما ينام وعيونه مغمضه بس هذا عگله مشغله مثل المكينه نام يحبوبه ساعة النوب أوديك وأطيبك .
لبنى ـ گامت ولزمتني من أيدي وطلعنا برا
ـ أي يمه أحجيلي..أنتِ أصدك بحجايتچ أحجيلي ولاتضمين عني ولاتجرجرين وتماطلين
ـ والله حبوبه ما أدري شگولج بس الأمانه هي مرات زينه شحلاتها مرات ما أعرف شيصيرلها حتى هو ما يفهم الها.. ومن ناحية الإهتمام والمدارات الشاهد الله زينه ملابسه أكله زايده ناقصته وراه وراه وبداية زواجهم مثل البلابل الحب هي خربت من گامن يدخلن عليها عماتي وجديتي مهديه حجيت وگبل عمتي حربيه خزرتني وسگتت .
ـ گملي شمالج سگتي حربيه گومي منا .
حربيه ـ لا لا عمه شخربن منها هنا يجن يشوفنها وعماتها يحبنها من دور أمهن عايشه هنا الربنها شيخربن منها .
الحجيه عطايات ـ محد رايد منچ تحجين وحبتهن حية وخلصتني منهن ومن أمهن .. لبنى يمه گملي ما الج غرض من عمتج .
لبنى ـ عمتي گامت والحجيه جرتني عليها وأفرك بيدي والله حجيه شگولج أنه لاحظت من فتره بس ما سولفت لان گلت خاف يحجن عليه ومحد يصدگني
ـ شنهو يمه أحجي أحجي گبل لا عمج مشعان يجي ونمشي للعرب على السيد
ـ غرفتهم حجيه ريحتها حيل مو طيبه!
ـ شنهو ولچ
ـ ما أدري بعد .. عافتني وگامت وأيدها على گلبها ودفعت الباب وعمتي وراها والريحه تخنگ نوب بابها مسدود الريحه تقتم الروح .. نفضت الفراش ما بي شيء وهزت رأسها
الحجيه عطايات ـ هالمره نويرس ساحرتله يحربيه وهسه تبين ومنو اليصدك ومنو اليچذب! خل أودي للسيد وأرجعلج وأفك طلابة وليدي ويه گوم أمچ
وأذا نافع صارله شيء يحربيه هالمره أمج أنه أذبحها بيدي مثل ما سوت أمي كتيبه وذبحت جديتج زكيه على فواينها وسحورتها ولازم أكطع عرجهن وأخلص الخلاليك من شرهن وبلاهن
لبنى ـ طلعت الحجيه وعمتي وراها وجهه أصفر ما ضل بيها قطرة دم وقفلن الباب وأخذت مفتاح وياها وأجه عمي مشعان وأخذوا نافع وما أخذوا عمتي وياهم ضلت تلوب ورا أبنها .. وضلت كاعده تتنظرهم وتبچي .
مر الوگت وصارت الدنيا لليل وهما ما بينوا تأخر الوگت ورجعوا ودخلته الأستقبال والحجيه أستلمه تداريه وأكله شربه وگام يرد من رأسه وضل فتره يوم زين يوم تعبان لما صحح وگام يكعد ويسولف وياه الحجيه بس عيونه تدور على شيء عبالك مضيع ضايعه .
كاعده بالغرفه وباقر صارله أيام من نزل وكام هو يروح وياهم من يأخذونا للسيد ومبين عليه شكثر ضايج على أخوه والحمدلله عدت على خير ونافع صار زين بفضل حبوبته .
راسلت لينا واسأل على نورس وهي اسألتها مدري شلونها حايرتلي بصفا أني وين أنتِ وين شبيج .
لينا ـ يمعوده گلشي ما بيها ولا مهتمه لا لنافع ولا لغيره بس عمتي بردت گلبي بيها أجتها غسلتها غسل فضحتها فضاحه
ورادت تضربها بس نورس لزمت أيدها ما خلتها عاد خالتي تدخلت وفازعتهن .
ـ شنو يمتى هالحجي شو أني ما أدري
ـ أي ولج أجتها من الباب هاده وتحجي عليها أمهات السحوره سحرتيلي أبني تردين تموتينه سويتي طلي الج بس لو تموتين ما أخلي يردج بعد وهذيج تكول الها يوم عيد أخلص من أبنج .. عمتي تبجي وتدعي گلبها محترك حرك على نافع عاد خالتي أخذتها انطتها كلاص ماي وأخذت نفس وكعدت تحجيلها كالتلها مسويات اله عمل بالنجاسه مالت العلاقه التصير بين الرجال والمره أستغفر الله لعبن نفسي وحصلتلي كفخه من هاي زينه وطردني ما خلني أسمع گلشي بس هذا السمعته .
ـ من صدك تحجين يعني صدك نورس ساحرتله
ـ ما أدري نورس جديتي مهديه عماتي محد يعرف بس هنا مشتركات بالعمل لان نورس گالت أني ما سحرتله أمج وأخواتج هنا يكرهنه وسحرنله روحي الهن شكو جايه عليه واذا صاير طلي اليه فه من حبي هو يحبني
عاد هنا عمتي تخبلت لو بس خالتي مخليه عمتي تضربها جان خوش صارت فازوع بالنص وفگتهن وهذيج يمه العرامه كون تشوفينها خلتنا أني ونور صافنين .
ـ صدمتنيني والله ونور جانت يمكم
ـ أي خطيه اجتي وراحت هاي مل ينكعد وياها ما تتعاشر بس تحجي وتسمع كلام سمانيه حقيره ونور مو مال مشاكل دجاجه .
ـ ما نخلص وين ما نروح ما نخلص جانت شالعه گلبي أنوب أجتي عليجن .
ـ أي شنسوي حظنا غير... هسه ما علينا منها سولفيلي شلونج أنتِ صفا شلونها هم تحجي وياج تدخل غرفتج
ـ أني زينه... وصفا هم زينه لا على كد السؤال ليش تسألين بس لا رجعتي تتواصلين وياها لان أعرفج ما أتوبين مو گتلج عوفيها
ـ أي والله عايفتها بس هيج اسأل لا أكثر يله باي خالتي أجتي من السوك اروح اعزل المسواك وياها
ـ ماشي . راحت وگمت عليهم كاعدين كلهم وضل أبالي كلام لينا معقوله توصل بيها تسحر اله وتمشي بهل الدرب وعلى شُنو منو يستاهل أغضب رب العالمين علموده .. أستغفر الله وأتوب اليه ربي أبعدنا
باليل أجو غافر ونور وخالتها صبيحه يعافون لنافع كمت ضيفتهم وكعدوا شوي ما طولوا وگاموا حتى ما لحكت أكعد ويه نور واحجي وياها وهالفتره لا طالعه لا طابه حتى بيت اهلي ما واصلته من سالفة نافع وباقر اكوله يگول بعدين أحنه بيا حال وأخلي وأسگت ..
نافع صار زين والحجيه راحت القريه بعد ما تطمنت عليه وتمشي وتوصي وتحذر بعمتي وعمتي تهز برأسها وتبچي نافع حيل مأثر بيها ..
ورجعت حياتنا طبيعيه ونورس ما رجعت بعدها تريد الطلاك ونافع معاند ما يطلگها ومشاكلهم ما تخلص ولا باقر خلصني وطلعني وحتى للقريه ما يقبل كاعده وساكته ونوب أخذوا البنات للقريه خلوا بس صفا گلشي ما تسوي بس لازمه موبايلها والشغل گله برأسي.
كعدت من الصبح على شغل البيت وباقر راح القريه يوصلهن أخواته ويرجع ردت أروح وياه گال البيت فارغ لان عمي ونافع بالدوام عنده خفاره من الليل راح وناجح ملتحق والبنات راحن القريه مبين گال عود غير مره وهم سگتت كون من يرجع يوديني لأهلي طاگه روحي من الشغل وگله برأسي هالفتره .
سويت الغده ولملمت البيت وغسلته وأجيت أنشفه بالوصله وصفا جانت كاعده بصاله وتگلب بمويايلها بس كل شوي تتلفت نبهه! وضل أبالي كلام لينا من گالت ديري بالج من صفا خليج حذره! .
والصراحه أني هم ما مرتاحتلها بالأخص هالفتره من التهوا بنافع هي كل وقتها غرفتها حتى عالحجيه ما نزلت وراحت وهي ما شايفتها حسيتها تتجنب تشوف جديتها! .
نشفته وهي كاعده بس تلتفت وجنت أريد أصعد أجيب الملابس من السطح مشيت على كيف من ظهر التخم أريد أشوفها شتسوي واذا حست أكول الها اريد اصعد اجيب الملابس ..
مشيت حافيه من الفضول بس وصلت وباوعت من بعيد وأنصدمت صدمة عمري مشغلة مقطع فيديو ركزت بالفيديو زين ولمحت صورتي بي! تقربت أكثر أريد اتأكد بس لمحت خيالي وراها وأندارت عليه مرعوبه وگبل دون گلشي سحبت الموبايل منها وباوعت المقطع وهي گامت تريد تأخذه مني تخبلت خبال واني مشغله فيديو رافعه موبايل فوك وأباوع لما صار الضوء أحمر وتأكدت أكثر لحظة ما لمست شاشه بيدها ونقلب وصارت صورتي وأني بالحمام ردت افقد الوعي بس تمالكت نفسي
صفا ـ جيبي موبايلي لا أذبحج والله لبنى جيبي موبايلي
لبنى ـ حاجيتها واني ضاغطه عالموبايل بظهري ولازكه عالحايط بكل قوتي ودموعي محبوسه بعيوني والرجفه بكل جسمي وهي ضاغطه على بطني تريد تأخذه مني مصورتني صفا مصورتني أدبسزز مصورتنا فيديو أني وأخوج بغرفة نومنه ومصورتني بالحمام ساقطه.
ـ أي صورتچ لان حاشره خشمج بحياتي أريد أخلص منج بگلشي تتدخلن من الله يأخذچن بلوه وأبتليت بيچن
ـ عضتني بكل قوتها وأخر شيء خنگتني تريد تأخذ موبايلها واني أصرخ وأرفس ما أنطي الج أدبسززز ساقطه تصورينا عزه العزاني صخام الصخمني يا فضيحتج يا لبنى يا فضيحتچ .
صفا ـ أموتج أنتِ والبطنج أذا ما تنطيني الموبايل والله أموتج لبنى أنطيني موبايلي غضب الله على يومج شگد قويه جيبي موبايلي راح أدفرج أطلع طفلچ من خشمچ والله أسويها .
لبنى ـ تلاوينا أني وياها واني ما اعرف شسوي بروحي أصرخ الطم أملخ نفسسي مصيبتي مصيبه شحجي شسوي شصخم بعمري والشفته بالفيديو ما ينعقل برأس بشر ومصورتني بنص غرفة نومي وبوضع ما تشوفه العين يربي وين عايشين أحنه .
للحظات تنعد وما ينوصف شعورها لحظات شعري رأسي تجمدت بصيلاته وعروقي برزت والدم تجمد برأسي من الصدمه والقهر والدم الأحسه ترس صدري لحظات وبيني وبين الموت شعره وهل الشعره وگفت برأسي وفززتني لحظه السمعنا الصوت وجمدتنا بمكاننه أثنينا أني وصفا .
نافع ـ شچاي يصير! .
لبنى ـ نفسي أنكطع من شفته وأرتخى حيلي وصفا أستغلت وضعي وسحبت الموبايل من أيدي ملتفه ورا ظهري وركضت عالدرج لغرفتها واني ردت أوكع وأستندت على الحايط وهو بلمح البصر ركض من كدامي وراها بدون ما يسمعني كأنما عرف گلشي من نظره أو جان يدري وعنده شك وهسه تأكد أو يكون مشترك هو وياها! ..
حاجيته بعلوا صوتي الا أنبح الحك أختك الأدبسززز الحك أختك الساقطه البربوك الحگها مسوين روحكم زلم وأختكم الشريفه لاعبه لعب بينا الحكها يالشريف يالزين ما بيهم .
باوعتلهم من فوك رادت تقفل الباب وخله رجله وهي تدفع وهو يدفع تالي دفعه ودخل عليها
نافع ـ شمسويه من مصيبه شمسويه
لبنى ـ لحظات أخذت نفس وتذكرت الفيديو! وركضت بكل حيل عندي وكل درجه أصعدها أدفع بيها عمري دفعت الباب ودخلت عليهم هو متلاوي وياها يريد يسحب الموبايل منها ما تنطي ..
گعدت بالگاع وگمت ألطم على وجهي وأعيط وعيوني تطلع منها دم مو دموع صحت بيهم بيت گواويد والله گواويد أنتِ وأخوج عايشه بيت مگوده أني والله حتى الگواويد بشرفها أطهر منكم! سفلة أنذال ساقطين! ولچ أنتِ يالساقطة شلون صورتينا شـــــلون أدبسزز أم البوب أو الولد بنص ليالي ترجعين لوحدج هسه عرفت وين جنتي دايحه وتطلعين بالتختل الله يدري ويامن جنتي يا ساقطه
اليوم أحرگگم اليوم البيت أحركه عليكم ششوف أختك شمبدعه شمسويه من ورا ظهركم لو گدرتكم بس على لينا گومتوا الدنيا وما كعدتوها والله دخلت المراكز عمي أنعم الله على أختي .. طلعت أختكم عامله العمايل!
نافع ـ سگتي لا أجي أقضي عليچ ومحمد خليني أشوف شغلي بس سگتييييي رحمه لأمج بس سگتيييي.
ـ على شنو تسگتني ليش الشفته ينسكت عنه! يا الشريف ما بيهم يا أبو الغيرة! واگف تباوع وساكت
توها رادت تشمره بالحايط وتفلشه بس وگع بإيده وضربها بوكس وگعها بالكاع خله دمها يتطافر من حلكها وخشمها وعساها بالموت وأزود ..
وگف يباوع بالموبايل! وأني أنتفضت بقهر وركضت سحبته من أيده وحضنت الموبايل لكيته مشغل فيديو گبل قفلت شاشه وضميته بصدري ما أنطي
نافع ـ لبنى أنطيني الموبايل لا أفشله على رأسج ورأس الخلفوني ترة وصلت حدها ومحمد خليني أشوف شغلي .
ـ شتشوف شغلك! مو حجيتلك مو صخمت وجهك وگتلك أختك مصورتني أني وأخوك شحجيلك أكثر من هيج ما تذبحها شمنتظر شمنتظر لو تريد تخلص أختك وتكربس الفضيحه برأسي! .
ـ تخبلتي أنتيييي جيبي داگولج لبنى لاتخليني أكفر بيج ومحمد.
ـ ما أجيبه الموبايل ما أنطي الك وگلشي أتوقع منكم أي أي گلشي أتوقع منكم وأنت هم ساقط إي ساقط تريد تشوف الفيديو وتوكف ضدي
أي انت هم ساقط وابو درابين جنت أسمع خالتي تگول عليك ساقط وأبو درابين وما نصدك بيها واگول حشى هذا نافع مو ساقط بس هسه ثبت كلامها صح شفت بعيني محد گالي طلعت ساقط مثل أختك الكح** تبيع علينا مثاليات وبطولات براسنه أحنه اليتامى، واختك من شافتك هيج طلعت أنكس منك گالت أگمل مسيرة أخوي الساقط گلگم نفس الخيسه والنجاسه وأني وكعت بنص بؤره مال قذاره ...
قذر جنت ملتهي بسوالفك وعايف أختك على حل شعرها ما مربيها وتصور أخوك ومرته وعايفها وأكف تريد مني الموبايل علمود تشوف بعينك وتصدك وكلامي ما تصدگه بس لو أموت على أيدك يا نافع الموبايل ما أنطي الك ..
تعلگت أيدي بإيده يريد يسحب الموبايل مني بالقوة ويفتح الشاشة حتى يشوف الفيديو ويتأكد بنفسه بس أني صرخت مثل المخبله وفاقده عقلها تعلگت بالموبايل وما عفته ولزمت خده أخمشه ما أنطيكياه! ما أنطي شي بايدك وكلكم نفس الطينة، كلكم زبايل! عوفني يا حيوان يا سافل مثل أختك الله يأخذكم ساقطين گواويد عارات عايفين أختكم الأدبسزز .
سحب الموبايل من أيدي وصرخت بوجهه جيبه شتسوي بي داكولك جيبه تلاوينا أني وياه هو يسحبه وأني اسحبه صرت بين أيديه وصدره وقربه مني لعبها لنفسي بس مجبوره ما أريده يشوف الفيديو!
ـ أمشي أطلعي برى وخليني اشوف شغلي لا أجيبج بضربه أصكطج ومحمد
ـ ما أمشي قبل ما أخذ الموبايل منك وقسم بالله العظيم وروح أمي اذا شفت أو باوعت ثانيه وحده من الفيديو اسويها حرب عليك وأخلي أمك وأخواتك يتحنن من دمك وجدك أبوك وأخوانك يغسلون عارك أنتَ وأختك السكط ام البوب الادبسزز هاي لو أختي من زمان حافرتلها كبر وطامه عارها بس ما وراها زلم تضبها وأخوان عارات مثلك عايفها وتريد تباوع المقاطع .
جنت أحجي وهو كل هالوقت هو ساكت مستمع أليه كأنما منتظرني اخلص كلامي للأخير ويهجم عليه هي ثواني قليله وضربني كف وخنگني ورفعني من الكاع لزكني بالحايط من قوة الضربه حسيت كبدي أنفطر الا خشمي طفر دمه بوجهه ومسحه بكل سرعته وتفل بوجهي يعصر بوجهه ولعبانه نفسه وروحه والغضب مأخذ مساحه ومحتل معالم وجهه الحاقده والمليانه شر وحقاره ونذاله صرت احسه هو وأخته متفقين عليه بهاي السالفه !!
ضربتني؟! ضربتني حتى تستر على أختك الساقطة هنيالها أختك بيك طلعتوا كلكم من ثوب واحد! تضرب اليتيمة المظلومة وتترك العاهرة اللي مصورة عرضكم وببيتكم إنتو مو زلم إنتو حثالة الشارع أطهر منكم!
وكف يرجف وعيونه چمر من الغضب وأبتعد عني وكعت أكح واطلب النفس مختنگه وهو يمسح بوجهه حسيته فقد وأنكلب وحش كاسر بهل الأثناء صاحت بي اخته الادبسزز
ـ لا لا لا تضربها گافي فدوه حامل وأخاف الطفل يموت بطنها والله يدخلنا السجن وما يسأل لا عليه ولا عليك وأني السبب هي ما دخلها عوفها الله يخليك أني السبب كله مني الله يأخذني الله يأخذني .
ـ دنجبي أنتِ وياه ووياها ولج من الله يأخذج.
ومنو يدخلني السجن لا والله خفت خل أخاف من الاكبر منه علمود أتخوف بي ما تنركعين بقندره على حلكج وتسكتيين ، ولا عبالج نفذتي منها لاااااا وأنه أخوج
"حسابج مو هسه خل اخلص من هاي البربوك وأتفرغلج الا أطم عارج على هاي سالفتج عبالج تعبر عليه سالفة التصوير عبالج بس هاي وتكظي لا ما تكظي... لااا الا اسيح دمج بس بطريقتي أنه مو بطريقة أخوانج! .
ـ كمل كلامه وباوع الموبايل گلب بي واني اباوعله بحقد صحت بي بغضب عارم لاتباوع دير بالك تباوع الفيديو والله اذبحك أنت وأختك والله يا ساقط ،ما اهتملي ما اعرف شيسوي صحت بي احلفك بشرف أخواتك اذا عندك شرف لاتباوع وتشوف الفيديو ،گبل رفع عيونه وخله الموبايل بجيبه طلع المفاتيح من الباب وسحبني بقوه وكومني وين تريد بيه وين عوفني وين مأخذني عوفني ، قبل لأ أصييح أسمه سد حلگي ومنعني أحجي!
ـ أنتِ تردين تموتين وأني ما أكول باطل ومعروف بالعائله أني شنو! بس راح انعرف اكثر اذا موتتج أنتِ وأختي الصكط اصير ابو حفار الكبور العائله وأبو گبر هوگبرج أني ساقط مو أمشي گدامي !!
ـ أني هنا تخبلت گمت أرفس وأدفع بصدره وهو يريد يطلعني من الغرفه ويستر أخته الساقطه وأدفع بصدره تريد تسگتني وتستر أختك والله ما أسكت وروح أمي ما أسكت وأضربني، يلا اضربني واستر على أختك الساقطة! تريدون تكتلوني حتى تحمونوها مو؟! تريدون تاخذون الموبايل حتى تمشونها وتگربسونها براسي علمود ما تنفضحون ساقطين گواويد .
ـ من غضب على يومج من مره بس أسكتييييي من الله يأخذج ويأخذها بس أسگتتي .
ـ مو شفت الفيديو شمنتظر ما تذبحها ما تحط طلقه برأسها وتغسل عارها هاي عار عليكم يا عارات الزلم .. ضربني راجدي ونزلني غصب من شعري وباوع محد ما موجود دفع باب غرفتي ودخلني وين جايبني شتسوي نافع شتسوي تريد تسوي مثل أختك الساقطه مو لحگولي يالعالم لحگولي...
صم حلگي بأيده وقفل باب الغرفه .
كاتم أنفاسي بس عيوني تريد تأكله بجيت بقله حيله عايف أختك وجاي تحاسبني ليا ساقط غيره وشرف ضربني على حلگي وسگتني
نافع ـ ما أحاسبج بس جاي أسگتچ وأستر عليچ وعلى روحي وعلى أهل بيتي .. لبنى سدي حلگج وخليني أشوف ويه العار الفوك أذا ما سيحت دمها وأخذلج حگج مربع هذا شاربي أزينه بس سديلي حلگج وخليني أنه أتصرف
لبنى ـ والفيديو بالموبايل جيبه يمي ما أريدك تشوفه نافع الله عليك أني عرضك وعرض أخوك هذا أحلفك بروح خالك بگبره لاتشوف الفيديو .
ـ لچ أنتِ شنو شنو هيج أني گواد ومسقط أباوع على عرضي لچ أنتِ شرفي عرضي من خرا بعقلچ ششوف من الفيديو صخام وجهج وصخام وجهي وجه العار الفوك هو أني شفت مقتطفات عقل ما ضل برأسي بالگوه واكف على حيلي بس أريد أفضها گبل لايجون بس هذا للسانج راح بجيب أخرتچ وساكتلج لان حقج .
ـ بس أني ما راح أسگتلگم وباقر لازم يعرف لازم
ـ بس تحجين حجايه وحده يطيح حظج وينهجم بيتچ خاف ما تدرين ليش عبالج التصوير ينكظي بس هيج الرجال عقله بي **
ـ فزينا أثنينا على صوت عمتي حربيه
حربيه ـ لبنى وينج صفا وينجن ليش البيت فارغ! لبنى
نافع ـ بصوت ناصي طلعي لهي أمي وأخذيها للمطبخ بينما أطلع وأصعد فوك أفضها وأخلص
ـ تذبحها
ـ طلعي لبنى بساع مو وگته الحجي مو وگته .
ـ عدلت شالي ومسحت وجهي هو صاد وجهه ولازم رأسه والمفاتيح مالت غرفتها والموبايل بأيده خايفه أطلع ويباوع الفيديو! فتحت الباب وطلعت ها عمه
ـ مو صارلي ساعه أصيح وينج ما تنطين صوت وصفا وين شو ما الها حس وسيارة نافع بالباب أجه من دوام وينه شُنو نايم .
ـ ها أي يمكن دخل غرفته ما شفته جنت بغرفتي وصفا يمكن فوك صعدت
ـ شبي وجهج جنج طماطيه
ـ ها يمكن تحسس عندي
ـ أي من الحمل .. شستوين غده
ـ ما أدري بعد تعالي وگوليلي وأسوي ما أدري محتاره عمه أخذتها المطبخ وسديت الباب وهي أندارت مستغربه
ـ عليش تسدينه
ـ لا الذبان يطب داخل وريحة الطبخ
ـ مو أكو مفرغه ..دعوفي الباب وتعالي طلعي لحم من المجمده لما أكلم الج الباميه جبت وياي خوش باميه
ـ أي عمه.. أنداريت وشفته طلع سريع وصعد ركض لغرفتها ورجعت أساعدها بالطبخ وأيدي ما تأخذ على الشغل أني وين وعمتي وين بالگوه أشتغل ولزمتني مغصات ولويات تعصر بيه من الهبطه نسيت جهالي حسبي عليچ صفا بس لا صارلهم شيء لان أيده ثكيله جعلها بالكسر ساعه الضربني بيها .
.. وسمعنا صوت صفا وعمتي جانت كاعده باب المطبخ بالطرمه وفزت وذبت السجينه
حربيه ـ هذا مو صوت صفا تصرخ يمه بنيتي شبيها ولج مو عفتها يمج ليش تعيط مو سألتچ گلتيلي بغرفتها چا شبيها .
صفا ـ يمه لحگيلي راح يموتني لحگيلي يمه يمه .
لبنى ـ صعدت تركض وأسمع صوتها وعياطها فجأه أختفى الصوت الله وأيدك وتموتها صدك تكون زلمه أذا غسلت عارها وعاركم يا طايحين الحظ على هيج خلفه نكسه ملفينها بيتكم الذبح قليل بيها ..يابه روحي تغيب والنفس ينكطع عني من أتذكر الفيديو ونافع شافه كون ميته ولا هاليوم الأسود بحياتي! .
حربيه ـ ولك يمه دخيلك عوف خيتك ولك يمه نافع شمسويه وتضرب بيه ولك هاي أخيتك يا گواد خيتك لحگولي يمه راح يموت أخته ولج لبنى ركضي خابري على رجلج يجي يخلصها من هالمخبل ماتت جوه أيده ماتت ما أسمع الها صوت
لبنى ـ صعدت الها وهي تتوسل بيه عود نزلت سويت نفسي أخابر لا والله ما أخابر أحد خل تموت وخل أدخل بخطيتها هيج وحده الموت حقها تستاهل الأدبسزز .
بهل الأثناء دخل باقر وعلى صوت عمتي ركض عالدرج وصعدت وراه وگف هو وعمتي يصيحون عليه ويدگون الباب
حربيه ـ ولك يمه دخيلك الحك أخوك راح يموت أخيتك من يگول ما ماتت ما أسمع الها حس غاب صوتها صارلها ساعه يگتل بيها ويصيح مدري شنهي طلابته وياها تسودن على عمره تسودن ولك نافع
باقر ـ نافع لاتتخبل نافع أفتح الباب على شنو تضربها نافع .
لبنى ـ أنفتح الباب وطلع گوه يمشي ونفسه عالي وقطرات دم على وجه وأيده! ذب الواير يم عتبة الباب ودخلو وراه عمتي وباقر عليها وهو تقدم وصلني باوعلي ثواني گبل نزلت عيوني وغمضتهن بقوه گارهته هو وأخته وكل أهله حسبي الله عليج صفا
ونزل گوه يمشي وفزت روحي على صرخة عمتي .
حربيه ـ يمــــا بنيتي صــــفا ...!
•┈┈┈••✿❂✿••┈┈•
