رواية ارهنت عمري الفصل السادس والعشرون بقلم نورا ناصر
لاتبچين دمعج والكحل غالي
خلي خدودج موردات فشلة يذبلن كبالي ..
فتحت عيوني على اوسعها مصدومة ومقهورة بنفس الوقت : انت شتكول حاتم ؟ يعني شيكولون عن امي الله يخليك لاتحجي هيج كدامي ؟ والله هم ماتت مظلومة ومكتولة ومرعوبة وبليلة ظلمة وهم يتجرأون يحجون عليها ؟ شنو من بشر حتى الميت ماسلم منهم .
_ والله انت توقعي من الناس كل شي تحجي ..
_ عمود حجي الناس ادمر حياتي ، انه ماريده هو متزوج ترا متزوج ارملة اخو وانه شفتهم بعيني هاي سوى .
_ميخالف نخلي عليهم شرط يطلكها يله ترجعين لا تسوينها قصة عاد .
_حاتم انه ماريد ارجع اله الله يخليك والله مايحبني هو يكرهني واذاني لاتكسر بيه انت همين انه اختك .
_ اكلج انت ماصارلج شهر من تزوجتي مدري شهرين وتردين تطلكين ، لا تنسين هذا اختيارج انتِ حبيبة محد طكج على ايدج ولا احد جبرج وكلج وافقي كافي لاتخزينه .
احس غركانه بالضعف ووهنت القوة الكامنة باعماقي ماعندي طاقة كافية حتى اصطدم ويا بالحديث او اجادله اكثر ، حبست دموعي ، وهو دار ظهره ومشى عني ، يفر بيده ، احس الخوف يجتاحني ، كمت من الهول توجهت لغرفتي...
امشي واتجى ع الحايط وامسح بدموعي الي نزلت على خدي بغزارة ، انفتحت باب غرفة حازم وطلع منهه هو ، شافني تفاجئ .
كال ميسم شبيج تبجين ؟ تعاي شو .
رحت يمه احجي وابجي : عمي مخابر على حاتم ويريد يجي وحاتم يريد ارجع وياهم يكول عيب تطلكين وانطاني محاضرة شطولها .
(احجي وصوتي يرجف وامسح بدموعي)
لزمني من جتافي ويحجي شنوو هو بكيفه حاتم خلي يولي .
دخلني لغرفته رحت كعدت يم وردة جانت متمددة ع السرير مالتها ، حضنتني وتمسح بدموعي وتهدي بيه
سكتي يمعودة لاتبجين محد يجبرج على شي .
رفعت راسي اباوع الها وابجي وردة ابوي مريض خطية وتعبان انه شون راح اشغله بمشاكلي خاف مايتحمل .
اجه يمي حازم وخله ايده على راسي
كال شبيج صلي على محمد وهذا حاتم لا تهتمين لكلامه ترا هو من طلك لهسه مدري شونه صاير
خليها عليه والله متحلف اله هذا سيف
عض صبعه وكمل كلامه : اخخخ لو يمي والله اله اطيح حظه هو بس خل يوصل راح اكضله الدرب لا اخاف ولا استحي من اكبر واحد اله اكسره تكسر واردله كل ضربه وجهه الج ضربتين والله غير متحلفله بوووووويه .
باوعت لحازم وانه اشوفه سند اليه واتذكرت عياش همين مدري شجابه على بالي هسه !!فركت راسي اريد ابعده عني وجريت نفس قوي .
تمددت يم وردة وظلينا نسولف بس اريد انسى كلام حاتم الي ظل يحفر بكلبي . وحازم طلع .
ورا يومين والخطار مستمرين يجون لابوي
يتحمدون اله السلامة .
وانه اساعد الحجية بالمطبخ بالجايات والتحضيرات .
اجه حاتم صاحني تعاي ميسم عمي وسيف اجو تعاي سلمي عليهم .
احس كلبي يريد يوكف خليت ايدي على گلبي والهوا بدا ينسحب من رياتي ، حسيت بالم قوي
اباوع لحاتم بتوسل وخايفة يجبرني ارجع وياهم .
رحت لزمت بالحجية من ملابسها وحجيت ويا حاتم
خويه ماريد اسلم الله يخليك اعفيني .
تقرب مني كم خطوة : تعاي تعاي مو عيب ماتسلمين شيكولون علينا بلله ؟
باوعت للحجية يمه وصوتي كوه يطلع : احجي وياه كليله ماريد عفية .
صاح حاتم اووو لا تخبليني امشي سمعيهم شيحجون وابوي هم يريدج لاتصيرين كلش فد نوب والعناد ماحبه ، وهو شيريد يسوي قابل .
الحجية : حاتم على كيفك لاتصيح روح انت وهسه انه اقنعها .
_ يمه ماريد اروح عفية وينه حازم خلي يروح يحجي بدالي .
حاتم : اووو حازم مكابل مرته وكاعد عبالك هو راح يجيب بدالها مدري راح يخطفون الطفل من بطنها
يدري بيج هو حازم امشي وياي امشي .
ظليت ابجي الحجية ظلت تمسح بدموعي
تطمني وتهديني : امشي يمه انه وياج اروح ولا يهمج ماخليهم يجبرونج على شي ، امشي خل نسمع منهم بلله .
ظليت امسح بدموعي والالم يغرس انيابه بيه
وانه امشي واتبعهم ويتكرر كدام عيوني مشاهد الالم والعذاب والضرب الي جنت اعاني منها ببيت عمي
وبغرفة سيف .
درت وجهي على غرفة حازم وتمنيته يطلع بهاللحظة ويسندني ، بس ماكو ماانفتحت الباب تمنيت اروح اركض لغرفته او اصيح اله بس احس ماعندي رجلين غير الي تقودني للديوانية وصوتي ماكو احسه اختفى .
دخلت للديوانية ورا الحجية امشي ، هيه سلمت على عمي وانه صار كبالي ابوي متمدد على فراشه ومتغطي حد نصه ووجهه تعبان من المرض .
انقهرت عليه ، ومناك كاعدين عمي وسيف
مدنك راسه ويسمع لحجي ابوي الي مبين جاي يرزل بي وجاي يتناقشون بتوتر .
صارت عيني بعينه باوعلي بنظرات صعب افسرها
نظرات فضول عتب او ندم جانت نظراته غامضة كلش خزرته بحقد ودنكت راسي ، دخلت طليت عليهم من ورا الحجية كلت شونك عمو .
هو رد عليه بترحيب هلا بنيتي هلا ميسم تعاي تعاي
تقدم عليه كم خطوة وانه هم تقربت بتوتر ، عبالك كدامي حقل الغام مو سيف الجبان .
عمي لزم وجهي باثنين ايديه وباسني على راسي .
_ شونج بنيتي والله اشتاقينالج وتعودنا عليج ويانا بالبيت انتِ بنيتنه وماعاش الي يأذيج وان شاءالله هاي اول واخر مشكلة وانه عند وعدي وعمتج ماكدرت تجي مريضة وحالتها كلش موخوش وسلمت عليج هواي هواي .
تنفست بضيق وهمست الله يسلمك عمو ، سلامتها من كل شر .
ورحت كعدت : لا عمو هو مو بس ضرب ومشاكل ترا ابنك الي سواه مو شويه هددني بشرفي .
سيف سوا نفسه مصدوم ويتصنع الصدمة:اااني ؟ هددتج؟؟ هه شوكت ؟ ليش تتبلين عليه؟ وبعدين اني المفروض الي اعاقبج لان طلعتي ويا واحد جان مخلي عينه عليج وبدون اذن مني .
كعدت بصف الحجية وانه معصبة كلش نار تطلع من عيوني وانه ارمق سيف بحقد ظليت اشر عليه باصبعي واحاجي عمي : شوف عمو هاي كدامك شوفه شون يحجي عليه ومصر يعتبرني انه مو خوش وعياش ترخص من ابوي يله اخذني من بيتكم وكدام عينكم بعد شنو ؟ قابل ناهبة ؟
حاتم كال بنبرة كلها تهديد : ميسم !! باوعتله خزرني .. سكتت وانه معصبه واتنفس بعصبيه
ابوي ظل يحجي بصوت تعبان ومبحوح
_ والله انتوا غدرتوا بيه انه انطيتكم جوهرة بناتي والغالية عندي هيج تغشوني ويطلع ابنك متزوج وماتدرون بي .
ابو اسعد : مو هيج الحجي خويه هو تزوجها علمود ابن المرحوم .
باوعت لعمي مصدومة : هو متزوج من وراكم لعد ليش جان خايف ويكفخ بيه خايف لا اكول الكم .
وكملت كلامي بكلبي عمي انت وين تدري اشو نايم ورجليك بالشمس .
ابوي كاله علمود ابنها وبالسر شون صايرة هاي بعد ؟وانتوا شون ماتدرون ؟
ظل عمي ابو اسعد يجفص يريد يبري ابنه مايعرف شلون كال والله هيه شردت واحنه كلنه بعد ماترجع وخطبنا ميسم اله ويا خويه يا ابو حاتم ترا كل اثنين متزوجين تصير بينهم مشاكل وسيف وعدني وعد زلم مايمد ايده عليها بعد ابد وانه جاي ارجعها .
ابتسمت باستهزاء وانه اباوع لسيف وادور وجهي
يريد يجاوبه ابوي وجان تندفر الباب ويطب حازم
رأسا ركض على سيف وضربه بوكس بحيث انركع راسه بالحايط الي وراه .
وصياح حازم بس المسموع : لك جبان تمد ايدك على اختي تعال اشوفك الامهات شجابك .
سيف رفع ايده يدافع عن نفسه وحاتم يجر بحازم ويصيح عليه عيييب عليك ولك هما ابيتنه لخاطر عمك لاتهينهم هاي مو رجولة منك .
جان حازم معصب كلش حيل وظل يصيح والله ولا احترمه مدام مااحترم اختي ولا قدرها ومد ايده عليها الجبان الي يمد ايده على مره جبان وخر عني حاتم خلي اطيح حظه والا خل يطلع من بيتنا ولا يشوفني ركعة وجهه بعد .
كام عمي يهدي على حازم وسيف لازم حلكه محتار بالدم الي يطلع من خشمه وحلكه وابوي يصيح من مكانه وياشر ، يهدي بحازم بويه حازم مو هيج عيب احترم عمك احترم شيباته هسه نحل كل شي احنه .
بس حازم طاير طير عبالك فلت روحه من حاتم ورجع لسيف يدفر بي برجله وسيف يصيح بوجهه
يلله تريد نتعارك تعال نتواجه انه وياك .
رجع عمي صار بنصهم وحاتم طلع حازم من الديوانيه
وانه والحجية تبعناهم .
حاتم دفع حازم بالصالة وظل يصيح بوجهه
مو عيب عليك ماتستحي هو هيج نحل المشاكل .
كام حازم من ع الارض ، خله ايده على صدر حاتم ودفعه وهو يصيح وخرر عوفني يمد ايده على اختي وتريد اسكت له ولك توحد بيها وشبعها كتل الجبان خليني اشرب من دمه .
رجع حاتم دفعه والحجية تجرجر بحازم وتهدي بي ووردة وام فخري واكفات بالممر يباوعن وانه مخليه ايديه على خدودي واضرب بيهم اخاف من المشاكل ياربي كلش اخاف .
اخر شي حاتم دفع حازم حيل وطب وقفل الباب من داخل وظل حازم يصيح من ورا الباب
وراح يريد يدور من الباب الثاني صرت كباله انه
حازم عفية تركه يولي ماقصرت .
ظل يصيح بوجهي اتركه شنو ولج ؟ نسيتي نسيتي ولج طابن جروحج ونسيتي ان شاءالله تردين ترجعين اله ؟
_ لا والله ماارجعله بس اهدا راح يصير بيك شي فدوة حازم لخاطر وردة وابنكم الجاي بالطريق .
_ ولج انت شوداج يمهم وشعندج مكابلتهم وكاعدة
هاا؟؟ ناويه ترجعين اله ولج على جثتي ماترجعين .
_ اسم الله عليك عمري انته بس حاتم جبرني وخفت منه .
_ جان جيتيني للغرفة وانه اطلع اطيح حظه وحظ حاتم وياه .
الحجية ظلت تجر بحازم : ولك يمه ابوك مريض خطية
جر نفس وغمض عيونه كال راح اتانيه برا
وطلع برا وانه دخلت جوا بغرفتي ابجي
لهناك سمعت صوت هوسه بجيت بحركة
وخليت ايدي على اذني ماريد اسمع شي .
بعدها صار الصوت داخل البيت وجنهم حازم وحاتم يتعاركون ويصيحون ، انوب من بين اصواتهم
سمعت صوت عياش يهدي بيهم طلعت وكفت بباب غرفتي شفتهم بالممر وكفت اباوعلهم ...
عياش : اهداو يا جماعة شجاكم والله عيب عليكم ابوكم مريض وانتوا صوتكم طالع هاي وانتوا ولد الشيخ وابوكم يحل مشاكل العالم وانتوا هيج تتكاتلون بيناتكم صدك جذب .
لاحول ولاقوة الا بالله انوب خليتوني اكسر حلفاني وادخل للبيت هاي على شنو هوستكم بلله . ؟
حاتم : ماتشوفه فشلنه ويا بيت عمي وخله عمي يطلع زعلان منانه وراح لبيت عمي منصور يبقى يمهم وهو جاي من طريق طويل .
عياش : اي لاتنسى الي سواه سيف بميسم مو هين ومن حقه حازم يأدبه جا غير اخته ويريد ياخذ حقها المفروض انت هم ماتنطيهم وجه ترا هذول غشوكم سيف متزوج .
حاتم ؛ شجاك عياش شتريد الناس تحجي علينا بتهم ماصارلها جم شهر من تزوجت ترجع مطلكة ؟
حازم ؛ مطلكة ولا تبقى ويا هذا العار الي يهددها بشرفها .
حاتم : ومنو يكول هددها بشرفها جايز اختك تألف حجي من كلبها .
حازم : لا بلله ميسم اخر وحدة ممكن تتبلى على احد او تألف حجي من كلبها اختي وانه اعرفها كلش زين .
عياش : حاتم خليها تطلك ولا تخاف ماراح تبقى على كلبك انه اخذها بس بشرط هيه توافق عليه وتكولها الي بعظمة لسانها والله مالها داعي كل هالمشاكل بيناتكم انتوا اخوة.
حاتم : ماتريدك عياش ماتريدك وهي اختارت سيف وفضلته عليك وقبلت بي محد جبرها خليها ترجع اله وهذا اخر كلام عندي .
ميسم .. ظليت اباوعلهم ودموعي مغركتني من حاتم كال هيج التقت نظراتنا انه وعياش ، نظراته نظرات قهر وعتب .
حسيت بوخزات بصدري على اثر نظرته هاذي ، ضربت اطار الباب بيدي بعصبية واحس بحرارة تفور بداخلي دخلت لغرفتي خليت المخدة على اذني تعبت وكملت بجي ، تمنيت استرجع عمري الي انفرط حباته على غفلة مني مثل عقد خرز ، لكن هيهات من ان يرجع بجيت لحد ماغفيت .
كعدت حسيت بهدوء مو طبيعي ، كمت افرك بعيوني
احسهن يوجعني ويحركني على كد البجي البجيته، طلعت وتوجهت للحمام غسلت وجهي ورحت للمطبخ ، شفت ام فخري بالمطبخ كاعدة تشرب جاي .
سألتها وينهم شو ماكو احد .
شربت من الجاي شوي وكالت والله ياست الحسن كلمن بغرفته والحجية يم ابوج بالديوانية توهم خلصوا الخطار انكطع ظهرنا والله موتوني لو اعرس وافتك منكم احسلي .
ماجاوبتها ورحت من دربي للديوانيه دكيت الباب وفتحته ، شفت الحجية كاعدة يم راس ابوي
وتشربه شوربة بالخاشوكة ، انقهرت على ابوي كلش حالته تعبانه حييل عنده عجز بالكلى .
باوعولي اثنينهم ابتسمت نصف ابتسامة
ودنكت امشي باتجاههم .
رحت كعدت يم ابوي اخذ ايدي لزمها .
باوعلي وبنبرة مطمئنة كال لاتضوجين روحج بنيتي مايصير اله الي انت تردينه ، لاتضوجين روحج خوش .
اباوعله مقهورة هذا هم حظي وكت ما صارتلي المشكلة هو تخربط بعد عيني كتله انت هم لاتضووّج روحك اهم شي تصير زين ودير بالك على نفسك عمري انت انه كل كلشي مابيه وزينة وانت شتأمر انه حاضرة .
ظلت الحجية تمسح على ظهري ، وتحجي
حبابه ميسم وعاقلة ومامنهه اذية فدوة لعمرها .
ظليت اباوعلها بامتنان
وابوي يكللها ميسم امانه عندج ديري بالج عليها لاتخلينها تنظلم من بعدي وادري بيج ماتقصرين .
كلتله عمرك طويل ان شاءالله .
وانه انقهرت من كلامه دنكت على ايده ابوسهه .
وهو خلى ايده على راسي بحنيه .
............
يوم ثاني كعدت الصبح شويه متأخرة شفت حازم سألته عن بيت عمي بعدهم لو مشوا لبغداد
كال مادري سألي حاتم عنده الخبر انه مادري ولا اريد ادري بيهم واذا صدك رجعتي وياهم من وراي لا انت اختي بعد ولا اعرفج .
انقهرت من كلامه دمعت عيوني كتله افا عليك تتخلى عني يبن امي ؟
كام سحبني اله وحضني ولج لا لا مو هيج انه دمي فاير هذا سيف اريد اموته اريد ادفنه وانت شعندج تسالين عنهم .
وخرت من كتله اريد اعرف راحوا لو بعدهم ؟ وبس هذا كل ما بالموضوع .
لا تسالين عليهم ولا شي يولون شيليهم من بالج ولاتفكرين بيهم .
خوش .. وين وردة ؟
وردة كاعدة بالحديقة تلعب روحها من تكعد الصبح وتضوج من ريحة البيت والغرفة .
خوش انه رايحة يمها اشوفها .
روحي شوفيها حتى انه تضوح من ريحتي .
اي حقها اذا كله مدحوس بيها وخر عنها ارحمها لخاطر الله كوه متحملة روحها هيه .
كرصني من خدي كال ولج غير اريد اعوض صبري .
ايام الله هواي من تولد عود عوض .
ضحك وراح وانه رحت للبستان شفت وردة كاعدة جوا السدرة ووجهه اصفر ومتجيه راسها على جذع السدرة
وشالها مفتوح بس خالته على راسها باهمال .
رحت يمها طليت بوجهه صباح الخير
عدلت روحها وكالت صباح النور .. بتعب
انت شكد عليج هسه وبعدها هالنساوة ماخلصت .
عليه اربع اشهر وعمتي الحجية وامي يكولون لو من اطب بالخامس تروح لو ابقى لشهري على هذا الحال .
يبوووي الله يعينج والله انه مقهورة عليج اكثر منج .
اكلج وين حازم ؟ مو الشمس سمطتني سمط روحي صيحيله خلي يدخلني انام بفراشي .
بعدني اريد اروح اصيحله اجه كتلها ها شوفي حس بيج محتاجته اجه وين لاكيتها هاي .
ضحكت كوة عليها واجه كرفص كبالها يعدل بخصلات شعرها المتمردة وهاربه من شالها .
ها حبيبتي محتاجة شي ؟
كالتله هويت الغرفة فتحت الشبابيك ؟
هويتها عمري انتي تردين ترحين جوة ؟
اي تعبت من الكعدة هنا والشمس صمطتني سمط .
اي يلله كومي لعد .. اخذ ايدها وكومها ، حوط خصرها بيده وظل يمشيها وهي ظلت تسأله : خو ما رشيت عطر خو ما دخنت بالغرفة .
جاوبها لا رشيت عطر ولا دخنت وغيرت الفراش وشريته بالشمس بعد شتردين .
مشوا باتجاه باب المطبخ وانه اباوعلهم مبتسمة
واكول بكلبي الله يسعدهم .
خذتني رجلي وظليت اتمشى بالبستان الهوا حلو شهر الرابع وريحة الزرع والتراب المبلل بماي السگي
مشيت وافكر بمصيري وشراح يصير بيه ماريد مشاكل بسببي تصير وخاصة ابوي مريض بس اتمنى الله يخلصني من سيف هسه شكو مجلب بيه وشعنده جاي يريد يرجعني انه كارهته كره مو طبيعي .
امشي واتفكر لحد ما طخت ريحة عطر بانفاسي
مو غريبة عليه ولعبت باعصابي .
واسمع صوت خطوات وراي عرفته هو مالتفتت ولا باوعت احسن استمريت امشي .
واسمعه يكول وين راح توصلين بعد راح تطلعين من كاعنه وتطبين بكاع ابو جاسم اوكفي اوكفي
كالها بنبرة مرحة خلتني ابتسم .
التفتت عليه وانه الف بشالي وابتسمت متوترة وكلت الله يساعدك ابو مهند شلونك ؟
انه زين انت شلونج ؟ كبل جم يوم جنج موزينة وتبجين .
جريتها حسرة واباوع للكاع بنظرات فارغة
وظليت احجي ويا والله مادري حاتم يريد يرجعني وحازم مايقبل وصايرة بينهم مشاحنات بسببي وابوي مريض انه صايرة بنص هالمعمعة احس روحي بدوامه .
ان شاءالله ضعفتي وناويه ترجعين ؟
رفعت راسي اباوع اله : لا لا والله ابد ماناويه ارجع بس جاي احجيلك عن الحالة الي انه بيها مليت من المشاكل وتعبت شوكت ارتاح .
كال تعاي امشي لاتظلين واكفة خاف هذول ولد ابو جاسم صاعدين ع النخل ويباوعون .
مشيت بصفه كال شوفي ميسم اريد حجايه منج انه اشوفج متغيرة وياي مو ذيج ميسم الي جانت ماتطيقني وتكرهني .
اي صح انه ممنونه منك ابو مهند والله الي سويته الي ماتتجازة عليه يمكن وكفتك الي هاي اخوي حاتم مايوكفلياهه وهلتشوفه يريد يرجعني .
مو كتلج لا تكولين هالحجي ، المهم انه اخلصج من سيف والله ، خليها عليه بس لاتضوجين روحج بس كبلها توعديني تصيرين الي .
توترت وكلت بس ها وظليت اجر بشالي ووكفت عن الحركة .
هو تقرب مني كال اشاقه اشاقه بس اريد اشوف ردة فعلج انه ماعاد اجبرج عليه ابد توبت بعد .
لا لا بس انه مستحبة لا اكثر ولا اقل .
يعني ترديني ومستحية تكولين ؟
سكتت وابتسمت . باوعت اله استشعر نظراته اشوف بيها نظرة الحب الي جنت غافلة عنها .
ركز بعيوني وكال مو ناكعه بكلبيي انتي وميت بيج انه احجي عاد ؟
شون احجي انه هسه على ذمة رجال ثاني مايصير هالكلام يا ابن عمي .
بانفعال : هو هذا هم حاسبته رجال ؟ وربج بصخلة مااخلي يسرح بعد مو انطي مرة الماسة درة مثلج .
ضحكت واستحيت كلش من كلامه ومشيت كبله
وهو وراي يكول على كيفج بويه لاتطيحين .
كبل لا نوصل لبيتنه و مانشوف اله حاتم كدامنه مخنزر عيونه كال ها شعدكم ؟
جاوبه عياش ماعدنه شي وانت شبيك لابس وجهك بالمكلوب ؟
_ عياش ترا ميسم على ذمة رجال وانت صارلك ساعة دك سوالف وياها وانه شفتكم من بعيد .
جاوبه عياش باقتضاب : اشفتنه بلله شجاي نسوي ؟ وبعدين انه مامتواعد وياهه شفتها صدفه شصار اذا وكفت اسولف وياهه؟ و انت تعرفني كلش زين انه مااتجاوز حدودي مع الاسف عليك .
_ لا مو قصدي بس ماتصير هاي وكفتك وياهه وانت جنت رايدها كبل .
_ اي وبعدني رايدها وبس تطلك من سيف ارجع اخطبها اريد اشوف منو يوكف بوجهي ؟
_ شنو هذا تهديد ؟ وبعدين منو كالك هيه راح تطلك من سيف هسه هي بس زعلانه احنه مااتفقنه ع الطلاك .
باوعت لعياش بنظرات حزينه وهو خلى ايده على صدره ، انطاني اشارة يطمني بمعنى خليها عليه
عفتهم وركضت للبيت وهم بقوا يحجون .
عياش : حاتم شجاك انت كلش هالايام متخبل ترا اختك انهانت ونذلت هناك وانت تعرفها كلش زين مايطلع منها خطأ ورغم هذا تريد تردها الهم ؟
_ واذا كتلها هو رجلها شنو نسيت نفسك شون جنت تجنز سميحة تجنز ؟
_ وانت تجيب سميحة الملسونه الملعونه ويا ميسم الفقيرة ميسم تربات ابوك شجابها على سميحة ام لسان ؟ انت هالايام مدري شجاك اكلك نصيحة تزوج احسلك .
_ لا ماريد اتزوج اريد اتواصل ويا زينة هلبت ترد الي واوعدها نتعالج بالخارج بلكي يصير عدنه طفل .
_ اووو هم ردينه على زينة شبيك بابا ماتريدك تحب الذلة انته ماكو نسوان بس هايه روح شوفلك غيرها العشيرة متروسة نسوان كافي تحن لهايه الي مامعبرتك اظل اعلمك انه ؟
_ المهم ميسم بعد لا توكف وياها وتشووش عليها ترا هيه هسه ممنونة منك لان رجعتها مناك ، هم ترتاح وتفكر وتنسى معروفك وترد لرجلها وهذا احسن شي ماعدنه نسوان تطلك خوش لاتخلون ابالهه هالشي ، يله انه اروح من رخصتك عندي شغل .
عياش : ظليت افر بيدي وادردم وراه رجعت للبيت..
ومرت الايام تقريبا كم شهر عده
وبيوم دخلت للبيت
تلكتني عفاف مرة اخوي سعيد .
الله يساعدك ابو مهند شلونك ؟
هلا بيج ام بنونه شلونج وينه مهند خو مامتعبج ؟ خو مارجع كتل بنونه ؟
ضحكت بعد هو طفل وهيه هم الله يسلمها وكحة وماتكعد عنه تروح تتحرش بيه وهو كاعد بامان الله .
ضحكت والله هاي بتج وكحة يله هو شيحليهم غير وكاحتهم .
كالت انه عندي حجي وياك ولو انت هسه تعبان بس اتحملني ؟
شنو كولي ولايهمج ؟
والله يا ابو مهند اخوك هو اكو غيره سالفه ؟
كعدت ع التخم وتحسرت الله يعينها عليه شون ويا اكتله واخلص منه ؟
كتلها احجي كولي خيتي انه اسمعج ؟
والله هالايام مدري شجاه صاير مايجي بالليل واذا اجه يطلع نص الليل لو يجي ويطلع ب ١١ ومايرجع لثاني يوم لو مرات مايرجع ابد اله بعد ٣ ايام او ٤ ايام حجيت ويا تعبت مليت يكلي انلصمي وسكتي عاجبج اهلا وسهلا ماعاجبج الباب يفوت جمل روحي ذاك الدرب .
ظليت اهز راسي بأسف واتحسر شون وياه هذا مايتوب ؟
كملت كلامها عفاف : انه والله تعودت على سوالفه اهاناته ورزالته وكل شي بس المشكلة هاي المكموعة زينه تطلكت صارلها اشهر واكول خاف كل شي يصير عنده وياها شي وتصير مشاكل .
رفعت راسي وكلامها صحاني من غفلتي صار هواي مامراقبه بس شون وياه ووين اطيح بي هسه ؟
جاوبتها خليها عليه انه احجي وياه واشوف شعنده ؟
امي وين ؟
راحت يم الحجية ام حاتم شويه وتجي . تريد غدا ؟
لا تغديت برا مهند وين ؟
نايم بغرفتك ..
تغده ؟
اي اي اكل ويا عمتي ونعس ونام .
الحمدلله .
عفتها وطبيت للغرفة شفته نايم رحت بوسته على كصته . اخذت تليفوني وخابرت سعيد
جاوبني ومبين من نبرة صوته متفاجئ .صار اكثر من سنة مااحجي وياه .
طلعت برا الغرفة خاف اصيح ومهند يكعد .
حاجيته ظل يتحجج عندي شغل وخفارات
حتى اسال صديقي وهاك رقمه ومن هالحجي
قررت اراقبه من الليلة واشوفه وين يروح
لان مامطمأن اله .
رجعت للبيت نمت والعصر كعدت على صوت مهند كعدت ابوسه والعبه ، كتله روح يم بيبي وانه كمت بدلت واريد اطلع للمحل .
اندكت الباب بقوة بس عبالك دفر مو دك تفاجئت وطلعت بسرعة اشوف منو ؟
كبل لا اوصل للباب افتحه انفتحت بدفرة قويه
انفتح الباب ودخل منها حاتم رجع طبك الباب حييل .
واجه يركض باتجاهي .
استغربت كلش شبي هذا ؟ طلع مسدس ووجهه الي
يرجف وعيونه بهامته .
بقيت مصدوم اباوعله واحاجي حاتم شجاك ؟
كال اليوم اكتلكم كلكم اليوم موتتكم على ايدي .....
