رواية السكن الفصل السابع والعشرون بقلم غدير الحيدري
لا شيء يؤخذ من فم الحياة دون ثمن
لا شيء يُعطى دون مقابل
حتى الحب
نعطيه مكاناً في قلبنا
ويسرق منا الطمأنينة
......
صفنت بوجهة
الدمعة جمدت بعيوني
كان يباوعلي بخوف
خايف من ردة فعلي
خايف من الراح اسوي
باوعتلة هواي
كان قلبي مدرك
هاي النظرات حتكون الاخيرة
واخر مرة اباوع لوجهة بهذا العمق..
كلت
روناك: ليش سويت كل هذا؟!
كال بأرتباك
عبدالله: حتى ما اخسرج، حتى تبقين الي ويمي، صدكيني راح ارجعلهم كلشي
مشيت وهو وراي
دخلت للمحكمة
بعدها دخلنا للقاضي
صار كلام هواي
وانا صافنة
تذكرت كلشي
تذكرت مكانتي العظمى عند اهلي
وشلون تغيرت بيوم وليلة
شلون شمروني هنا كأنسانة مخطئة
يمكن عبدالله وجهة الحقيقي بلش يطلع
واليوم شفت بعيني
الخداع الكانت تحجي عنة عمتي
ما حسيت ع نفسي
الا لما كلت
روناك: نعم
واصبحت زوجتة شرعا وقانونا
باوعتلة كان يترقب حالتي
بداخلة خوف من ردة فعلي
شراح اسوي؟
راح اغرك سفن؟
راح احرك مدن؟
انسانة مجروحة من اهلها ومن قلبها
شنو ممكن تسوي؟
طلعت بسرعة
كنت امشي دون وعي
لحكني وكان يصيحني
جرني من ايدي
عبدالله: روناك كلشي راح نحلة بتفاهم
دفعت ايدة وكلت
روناك: هالمرة مراح تخليني بسيارتك وتشوفني رجولتك وتفرفرني مطاعم ومحلات حتى تغير من نفسيتي هالمرة اني الراح افرفرك الدنيا كلها وما تحصلني
اقتربت منة
كلت
روناك: سويت كل هذا حتى ابقى يمك وما تخسر شوفتي مو؟!
دمعت عيونة
هز راسة بمعنى اي
كلت بغضب
روناك: وصلت للي تريدة لكن بدوني، اني مرتك هسة شرعا وقانونا بس مو يمك ولا راح اكون يمك
مشيت بسرعة
الدمعة جامدة بعيوني
ترفض النزول
اجرت تكسي
ما عرفت وين اروح
كلت
روناك: السكن
نزلت ووكفت كبال العمارة
احس كلبي يوجعني
صعدت وانا ارجف
دكيت الباب
فتحتها حبيبة
عقدت حاجبها وكالت
حبيبة: روناك! شنو هالقاط الابيض عبالك مهزومة من عرس
كلت بخنكة
روناك: عطاء وين؟
حبيبة: تعاي جوة
دخلت جوة
لكيت عطاء كاعدة بالصالة
ركضت الها ووكعت بحضنها
وصرت ابجي
الكل يسأل ومصدوم من حالتي
الا عطاء اخذتني لحضنها دون ما تحجي
بجيت هواي
بس ما كان يخف وجع كلبي
لزمت وجهي
مسحت دموعي
وكالت وهي تبجي
عطاء: روناك شبيج؟!
كلت بخنكة
روناك: خدعني عطاء خدعني
اخذتني لحضنها
والكل مصدوم
صرنا نبجي ثنينا
كنت ابجي واسولفلها
وهي تبجي وتسمعلي
كلت واني منهارة
روناك: انا هسة غريبة الحب والوطن، تخيلي ماكو مكان يلمني تخيلي عطاء الكل تعاملني ع هيئة صفقة، اهلي باعوني ع شكل صفقة حتى ما يخسرون شغلهم وهو عاملني كسلعة
اجت زهراء
جرتني من عطاء وكالت بغضب
زهراء: وانتي ليش تبيعين نفسج؟ انتي ليش تساعديهم بهالشي؟؟
كلت بأنهيار
روناك: انا لو ما مكملة عقد الزواج هذا راح تبقى صفقتهم ناقصةةة
باوعت زهراء ع حبيبة
وكالت بغضب
زهراء: هذا الحب التحجين عنة؟
حبيبة: هو حقير انا شعلية
زهراء: وخالد؟؟
حبيبة كالت بأستغراب
حبيبة: خالد شعلية؟ لا يكون خالد هو اللي عاقد عليها ومسويها صفقة
صاحت زهراء بعصبية
زهراء: اناااا لو منطية مجال لخالد كان سوة بية نفس روناك واكثر، هو هذا الحب اللي تحجون عنة؟
صارت تبجي
زهراء: اكلتي راسي لان خالد مختفي، بقيتي تلومين بية لان هو ماكو ومتدرون بي وين، جاي تشوفين بعينج؟
كالت حبيبة ببرود
حبيبة: رجعي الخاشوكة بالاستكان وخوطي، لا تخوطين بصفها
صاحت زهراء بعصبية
زهراء: اناااا مو مخبلة، انااا جاي اعرف شأحجي، ما وحدة حبت وكلبها سلم من الاذى
وكفت بوجه حبيبة وكالت
زهراء: حبيبة ضوية وين هسة؟ روناك شنو حالتها؟ عطاء شبيها؟ عوفيهم كلهم انتي شلونج؟
دمعت عيون حبيبة
كالت
حبيبة: انتي مو ما تحبين خالد؟ ليش حاسة بالندم وجاي تحاولين تقنعين نفسج انتي الصح وكلنا غلط
كالت زهراء بخنكة
زهراء: انتي ليش تحاولين تستفزيني؟!
حبيبة: لانج من اختفى خالد اختفى لونج وياه تنكرين هالشي؟ وهالمرة انا سولفت عن روناك وعبدالله انتي جبتي سيرة خالد
باوعتلنا زهراء
كالت عطاء بعصبية
عطاء: مووو وكت صراعاتكم كافي
كالت زهراء بغضب
زهراء: يلعن الجامعة والدوام والهندسة وخالد وزهراااء
دخلت للغرفة
وسدت الباب
حبيبة كالت
حبيبة: كالت وخالد وزهراء اخيرا انجمعوا
عطاء: انجمعوا بلعنة
كامت عطاء وراحت يم حبيبة
وهمست بغضب
عطاء: لا تبقين تبثين سم الحب هنا وهنا وتأذين مشاعر الكل، عمرها البنية هنا ما لاك الها الحب ولا حست بسعادتة، وحتى لو الحب صادق الاهل والمجتمع يخربة، يعني لا تحجين عن العائلة كدام ناس يتامى، ولا عن الحب كدام كلوب مجروحة
صاحت حبيبة
حبيبة: هسةةة اذا يصير انفجار كوني بيناتها النجوم تتعارك تكولون حبيبة هييي السبب
عطاء: سويلنا جاااي البنية منهارة
كانوا يتعاركون
وانا كاعدة بالكاع
مخلية راسي ع التخم
والدمعة بعيني
كنت اظن نفسي الوحيدة اللي متأذية
اكتشفت هنا ان الكل موجوع
الكل مجروح
كعدت يمي عطاء
كالت
عطاء: يكولون المكتوب ع الجبين لازم تشوفة العين، هواي صبرت نفسي بهالمثل
خليت راسي ع رجلها
صارت تمسح ع شعري
كالت
عطاء: همة العائلة دائما قراراتهم صادمة، يعني همة من يسوون تصرف معين مو يعني ما يحبون بنتهم لا بالعكس بس هي الدنيا هيج
كلت بخنكة
روناك: عائلتي عبالهم انا متفقة وي عبدالله عليهم
تنهدت وكالت
عطاء: راح يجي يوم ويبين كلشي
روناك: راح تكون حقيقة متأخرة
عطاء:بس هي حقيقة
سكتت
بعدها كالت
عطاء: اعرف وحدة من هي طفلة لحد ما كبرت مراودها شعور بداخلها ان هي ما تنتمي لعائلتها، يحبوها ويهتمون بيها بس عيونها تلاحظ الفرق بأبسط الاشياء، عاشت وسط عائلة كبيرة ومعروفة بس ما كدر هالشي يغير حقيقة شعورها ان هي مجرد طفلة متبناة
رفعت راسي
كلت
روناك: ما فهمت
كالت بخنكة
عطاء: اكو اشياء هواي بهاي الحياة نسمع بيها بس ما نفهمها، بعدين يجي الوقت المناسب وكلشي يتوضح
باوعتلها وكلت
روناك: انا شسوي؟
تنهدت
عطاء: تصيرين قوية، تخليلة حد ما يتجاوزة، وحتى لو انجرحتي من اهلج ما تسمحيلة يجرحج
روناك: اريد احرمة مني
ابتسمت وطاحت دمعتها
عطاء: هاي اكو فد وحدة حبت واحد من طرف واحد وشافتة ما يحس بيها قررت تحرمة منها تدرين شصار؟
روناك: شصار؟
عطاء: ما حس
صارت تضحك وتمسح بدموعها
روناك: اني اسفة، قهرتج فوك قهرج
عطاء: انا خسرت ضوية، شأخسر بعد؟ انا مراح اسمح لأي وحدة بيكم تتأذة
لزمت ايدها
كلت بخنكة
روناك: عادي ابقى هنا؟
دموعها صارت توكع
عطاء: بمكان ضوية؟
هزيت راسي بمعنى اي
كالت وهي تبجي
عطاء: بس انا مراح اسمح تضيعين مني مثل ما ضاعت ضوية
اخذتني لحضنها
صرنا نبجي ثنينا
اجت حبيبة وشايلة الجاي
حبيبة: اهووو شراح يخلصها اليوم، عمي دعوفي البجي وروحي اغركي بالسعادة يا اهل يا صفقة
عطاء: اسكتي حبيبة
حبيبة: اوي، خلي اروح اصيح لحبيبة خالد تشرب جاي ويانة
كالت عطاء بعصبية
عطاء: حبيييبة
حبيبة: سكتت سكتت
راحت حتى تدك الباب
طلعت زهراء من الغرفة
عيونها مورمة من البجي
زهراء: ميحتاج تصيحيني، جاية
اخذت كوب جاي
كعدت ع جهة وصارت تشرب جاي
حبيبة: روناك اشربي جاي يمعودة الدنيا متسوة
بلشنا نشرب جاي
ولا عبالك قبل شوي كان عدنا مجلس عزاء
حبيبة: صدك عمتج الحية شكالت
روناك: عمتي ساكتة
حبيبة: زين تسوي، زين ما سألتي ليش سوة هيج
ذبيت الكوب
وكلت بعصبية
روناك: كتلة ليييش هيج سوييت، دمر اهلي واخذ شغلهم وخسرهم فلوسهم ومسوي كل هالسوالف وهو يجاوبني ببرود حتى ما انحرم منج، وك يابةةة شتنحرم مني انت بايك اهلي يكلي علمودج
حبيبة صارت تضحك بقوة
حبيبة: هههههههه والله عبدالله وردة
احنا ساكتين ونباوع عليها
سكتت وكالت
حبيبة: الله يرحمج ضوية
عطاء: شيعدلج انتي ما تكوليلي؟
حبيبة: والله لأروح ومااسكن وياكم سنة التجي
زهراء: جا ويامن تسكنين؟
حبيبة: وي حازم ان شاء الله
زهراء: كون ما يدك الناقصة بيج
حبيبة: مثلج من دكيتيها بخالد
صاحت زهراء
زهراء: لاااا اله الا الله
حبيبة: محمد رسول الله
زهراء: مووو عبالك لحيتي هواي بموضوع خالد؟
حبيبة: انتي البديتي، عيرتيني بحازم
كالت عطاء
عطاء: روناك لا تستغربين، اليوم كلة يخلص وهمة وحدة تذب بسامير للثانية
زهراء: شو ناسين الغدة انتو؟؟
حبيبة: لا تسمعيني ادري اليوم علية
زهراء: ضيفي روناك بالجدول
حبيبة: وعبدالله هم لان هسة يكابل شقتنا ويكعد ليش نبقي بالباب؟ ندخلة جوة
كلت بعصبية
روناك: اكسر رجلة اذا يفوت
عطاء: يمعودة تتشاقة، كومي انطيج ملابس حتى تبدلين
حبيبة: دعوفيها بالقاط طالعة تخبل هسة يتخبل ويجيج وين يعوف هيج جمال بهيج شقة طايح حظها
زهراء: كومي نكعي التمن
دخلت للغرفة وي عطاء
طلعتلي ملابس
كالت
عطاء: دافكر نغير الغرفة، يعني نقلب الاسرة، اليوم راح احجي وي عمي يجيب سرير الج
تنهدت
روناك: داتنامين؟
كالت بخنكة
عطاء: موجودة وياية بكل مكان، احس حتى اذا غمضت عيوني داخونها وارتاح وهي جوة التراب
روناك: ضوية مسكينة
صارت تبجي
اخذتها لحضني
اجت زهراء وكالت
زهراء: روناك عبدالله بالباب
انعصر كلبي
طلعت من الغرفة
لكيت حبيبة واكفة بالباب وهي تكول
حبيبة: بدت رحمة الله، بربك نطيناك وردة دزيتها بس بتلة وحدة
جرتها عطاء
باوعت ع عبدالله
اقترب وانا مديت ايدي
وكف بمكانة
كال
عبدالله: انتي بخير؟
روناك: من تكون انت ماكو
عبدالله: روناك خلي نتفاهم بهدوء
روناك: كملت العقد مو حبا بيك، كملتة حتى ترجع لأهلي كلشي خسروه بسببك
كال بأرتباك
عبدالله: رجعتة رجعتة اصلا انا مو بحاجتهم، انا سويت هالشي بس حتى يوافقون حتى تصيرين الي
دمعت عيوني
روناك: حصلتني؟ صرت الك؟
كال بتعب
عبدالله: روناك انا سويت كل هذا علمود مااشوف الدمعة بعيونج، لا تكسريني، شسوي وتسامحيني؟
ابتسمت
روناك: هيج السماح حجاية سهلة؟
عبدالله: روناك لا تكسرين بية
روناك: انت سويت كل هذا حتى ابقى يمك مو؟ روح جيب اغراضي كلها وخليها هنا كدام الباب، انا من اليوم مراح ابقى يمكم
فتح عيونة بصدمة
كانت اكو مزهرية ع التلفزيون
جريتها وكسرتها
وخليتها ع ايدي
روناك: والرب اذبح نفسي
كال بخوف
عبدالله: روناك اهدي اهدي ذبيها من ايدج راح تنجرحين
روناك: روووح جيب اغراضي كلها من بيتكم والا اقتل روحيي واموووت واخلص منك ومن اهلي
اقتربت الة
خليت الكزاز ع ركبتة
وكلت بعصبية
روناك: ولا عبالك صرت مرتك وتكسرني، اعلى ما بخيلك اركبة، لا راح احتاجك ولا احتاج اهلي وراح اشتغل واعتمد ع روحي، واذا تفكر فد يوم تأذيني اقتل روحي واقتلك فاهم
كال بأرتباك
عبدالله: اهدي اهدي راح يصير اللي تريدي
ابتعدت عنة
كلت
روناك: ووجهك بعد مااريد اشوفة يا زوجي المو محترم
دخلت للشقة
سديت الباب بوجهة
البنات يباوعون علية
حبيبة: اشتهيت هالكزازة لحازم
زهراء: كسرتوا دبدوبي علمود حبكم
روناك: يا دبدوب؟
حبيبة: المزهرية الكسرتيها عيني دبدوب زهراء
روناك: اعوضج غيرة
حبيبة: لا يمعودة زين تسوين، هي مال نزاكة؟ خو زهراء من تتزوج ذاك الواحد مزهريتها تصير ع شكل طلي لان يذبحون هواي
اباوع لزهراء ذبت نعالها
واشتغل الصراخ بالسكن
اخذتني عطاء للغرفة
عطاء: عوفيهم معليج تعاي ارتاحي
بدلت و تمددت ع سرير عطاء
كلت
روناك: لازم ادور ع شغل
عطاء: العصر اخذي حبيبة وشوفي هاي المحلات اليمنا بلكي تحصلين شغل
صرت اتذكر كل المريت بي
ودموعي توكع
لحد ما صبوا غدة
طلعت وكعدت وياهم
وبلشنا ناكل
حبيبة: هذا نويبي وهذا زبيدي وهذا كارب، واكو وحدة هامور مدري وينها ضاعت مني
زهراء: ما خلص السمج؟ ع كد ما اكلت سمج راح تطلعلي زعانف
حبيبة: لاا اصلا حتجي امي هالايام وتجيبلي شروة سمج جديدة
روناك: شمعنى اهل البصرة ياكلون سمج هواي؟
حبيبة: هو كل العراق ياكلون سمج بكثر بس البصرة اكثرهم لان شط العرب وهواي اكو صيد واساسا البصرة تجارية وبيها موانئ
زهراء: هذا السمج كلة غالي بس احنا مليناه ع كد ما اكلنا والحلو ناكلة بيوم العدنا عركة
تنهدت
روناك: خففتوا عني هواي، الصبح كنت منهارة
حبيبة: يمعودة طز بي، بس للامانة هو مقهور
عطاء: خلي ناكل حبيبة
روناك: حبيبة العصر اخذج ونطلع اريد الكة شغل الي
حبيبة: خوش واذا ما لكينا اخابر ابوية يدبرلج لان يعرف ناس هنا هواي
كلت بأستغراب
2 تعل
روناك: بنات شعجب انتو اليوم ما مداومين؟
عطاء: انا تعبانة ومابية حيل
زهراء: وانا مريضة
حبيبة: وانا معاقبة حازم، بس تدرين روناك، اكو ناس مالهم نفس يداومون لان ماكو شوفة
عقدت حاجبي
روناك: مفهمت
زهراء ذبت الخاشوكة وكامت
وهي تكول
زهراء: اللهم طولج يا روح
عطاء: يعني هسة ارتاحيتي؟ ليش تلحين عليها؟
حبيبة: ترا هي صار عدها ملل من السمج وكامت
عطاء: صار عدها ملل من سالفة خالد اللي مجاي تنسد
روناك: ليش خالد وين؟
.....
صحت
حازم: كتلككك ما ادرييي ما ادرييي لا تبقى تاكل براسيييي
كال بعصبية
حسين: صااار يومين خالد مختفي وين راح يعني؟ انشكت الكاع وبلعتة؟
كعدت وخليت ايدي ع راسي
كال حسين بغضب
حسين: انا متأكد اكو سالفة مضمومة عني، بس صدكني اذا طلعت الشغلة تمسني ما ارحمكم، اكلب الشقة عليكم
تنهدت بتعب
كمت وكفت كدامة
كلت
حازم: شنو قصدك تمسك ها؟؟ شتقصد بهالكلام؟
كال بصياح
حسين: ضميتوا عني سالفة ضويةةة وهي تخصني وهسة متأكد انا اكو سالفة مضمومة بس قسم بالله ما ارحمكم
طلع وعافني
خليت ايدي ع راسي
دخيلك يا علي
هذا خالد بشنو ورط نفسة وورطني؟
هسة انا وين الكاه؟
اختفى صار يومين ماكو
منين اجيبة؟
اجة سراج من برا
كال
سراج: شبي حسين لاكاني برا وجهة ما يتفسر؟
صحت
حازم: انت اخررر واحد تحجيي كبرت البنية وواكف كبالي
سراج: ماتت موت الله، شسويلها يعني؟
دخل للغرفة
مااعرف شنو من كلب عندك
كمت افتر بالشقة
باجر اخر يوم
اذا ما اجة خالد ابلغ
ياربي اخاف اخذوا داعش!
لالا ان شاء الله لا
طلعت للشغل
احس وعي براسي ماكو
لليل رجعت للشقة
لكيت حسين يسوي عشة
كلت
حازم: ما اجة خالد؟
خزرني وكال
حسين: لا
كعدت وخليت ايدي ع راسي
اجة يمي وكال
حسين: للمرة الاخيرة اسألك، خالد عندة شي وضامة عني؟؟
باوعتلة وكلت
حازم: شي مثل شنو؟
حسين: انت كلي
حازم: انا مااعرف عن شنو جاي تحجي، بس انت كلي شتقصد حتى افتهم
خزرني وكال بغضب
1تعليق
حسين: منو البنية اللي يريدها خالد؟
اول مرة احس بالخوف
كلت بأرتباك
حازم: شنو هالسؤال؟!
صك اسنانة وكال
حسين: سؤالي واضح، وانت تعرف منو هي
رمشت بسرعة
كلت بتوتر
حازم: يعني منو مثلا، بنت عمة وكلنا نعرف هو يريد بنت عمة
حسين: لا مو بنت عمة
بلعت ريك
قريت فاتحة لام البنين
هو سكت بعدها كال
حسين: تعرفها لو لا؟؟
ما اعرف منين اجتني القوة
كلت بعصبية
حازم: هااااي شبيك حسين؟ كتلك بنت عمة وهو كال هيج بعدين انا شمدريني؟؟
كال بعصبية
حسين: انا مو مرتاحلكم ومتأكد اكو شي ضامي
حازم: هذا عشمنا بيك مو؟؟ تشك بينا وتتهمنا؟ شنو الشي المو زين الشايفة على خالد حتى هيج متخبل؟
71 تع
ضرب ع الميز وكال
حسين: مشكلتييي حاس بس مو لازم شي بأيدي بس وربك لو الزم شي بأيدي اسيح دمة واذا الك ايد بالموضوع اسيح دمك وياه
بلعت ريك
احس سقف الشقة وكع ع راسي
كلت بعصبية
حازم: والله عيب عليك، والله عيب
طلعت من المطبخ
احس كوة لازم اعصابي
كلشي جاي ينفضح وخالد ماكو
ثاني يوم داومت
اجت حبيبة علية
كالت
حبيبة: خالد رجع؟
حازم: لا
حبيبة: ليش ما تتصل علية؟
حازم: عاف شريحتة يمي
حبيبة: وين راح مثلا؟
حازم: مااعرف بس حسين شاك وكالب الدنيا ع راسي
حبيبة كالت بقلق
حبيبة: شاك بشنو؟
حازم: ان خالد يريد زهراء
حبيبة: هو خالد يريدها من صدك لو قشمرة
كلت بعصبية
حازم: يعني الرجال بكلشي يقشمر الا بالموت
كالت بأستهزاء
حبيبة: مدري والله، مشايفة رجال يوصل للموت علمودي
حازم: بس اكو رجال يشتغل شغلين حتى يحصلج، ظهري انكسر من العمالة حتى بيوم الجمعة اشتغل، وايدي وعيني راحن من الحديد
دارت وجهها
حازم: ما تشوفين تعبي تشوفيني من اروح واحجي وي عطاء
حبيبة: شعندك وي عطاء؟
كلت بغضب
حازم: صديقتج الغبية تريد تنتقم من سراج
كالت بعصبية
حبيبة: صديقتي مو غبية وما مسموح الك تحجي عليها كدامي واما بالنسبة لصديقكم سراج فهو عار
حازم: سراج مو صديقنا
حبيبة: شفناكم شلون تدافعولة
كلت بعصبية
حازم: بعدين انتي ليش ما حجيتي عن عملة سراج وي ضوية
نترت
حبيبة: ع اساس انت متدري يعني، انتو بكلشي تدرون بس سكتوا لحد مراحت البنية بالرجلين
حازم: خلي اروحج انا بالرجلين؟ اكدر؟
باوعتلي بغضب
حبيبة: شنو قصدك؟
حازم: ضوية غبية وضيعت نفسها وراحت ع انسان الكاع زايعتة وموتها رحمة الها
سكتت
كلت الها بعصبية
3 تعليق
حازم: شوكت تبطلين تسيئين الظن بية؟
حبيبة: من تبطل شكك
حازم: انتي ما تنسين مو؟
حبيبة: وانت تقشمرني
حازم: انا واضح وصريح واحبج واسوي الاكدر علية
مشت وعافتني وهي تكول
حبيبة: حتى الحب صار بمنية
تنهدت بتعب
احير بيج لو بخالد
لو بحسين
ماادري..
رجعت للشقة
لكيت حسين متمدد وصافن
اول ما شافني كال
حسين: ما رجع خالد؟؟
حازم: انا اجيت اسألك
حسين: امشي نبلغ، خلي نشوف وين اختفى
بلعت ريك
حازم: ما نستعجل، بس اليوم كدامة، باجر الصبح اذا ما رجع نبلغ
كام حسين
وكف كدامي وكال
حسين: اخاف تعرف بمكانة ومتكول؟
دفعتة وكلت بعصبية
حازم: وخررر عنيييي لان لروحيي مو طايقها
رن موبايلي
ركضت الة عبالي خالد
اباوع خالتي
فتحت خط
حازم: الو هلا خالة
: هلا حازم يمة شلونك
حازم: بخير خو ما بيكم شي
: يمة حازم امك تعبانة، متقبل اتصل عليك بس انا مكدرت اضم عليك
كلبي انعصر
كلت بخوف
حازم: شبيها امي؟
: كليتها توجعها تعال يمة لازم ناخذها للدكتور
حازم: جاي جاي
2 تعل
سديت الفون
احس روحي انقبضت
لبست بسرعة واخذت فلوسي وطلعت
حسين: وييين رايح انت الثانييي
حازم: امييي مريضةةة اميي
طلعت بسرعة للكراج
اجرت تكسي ورحت للناصرية
لكيت امي تعبانة
اخذتها للدكتور
والدكتور ما طمني ع حالتها ابد
اخذت علاجات وصارت احسن
ثاني يوم اتصل علية حسين
تطمن عن حالتي بعدها كال
حسين: اكلك خالد لحد هسة ماكو
حازم: ما رجع بعدة؟
حسين: لا وانا كلبي كارصني اخاف صارلة شي
حازم: بلغت بالمركز؟
حسين: لا، حتى لو ابلغ شراح يسوولنا هو العراق كايم مكاعد
حازم: لا اله الا الله
حسين: انت شوكت تجي
حازم: باجر
حسين: تعال ويصير خير
احس كلبي عاصرني
اتصلت علية حبيبة
وبعد السلام والكلام
كالت
حبيبة: حازم ماكو اخبار عن خالد؟
حازم: لا
حبيبة: وين راح؟
حازم: مااعرف انشكت الكاع وبلعتة
حبيبة: شوية واتصل عليك
......
سديت الخط
التفتت ع البنات وكلت
حبيبة: بعدة ماكو ما يعرفون عنة شي
روناك: يا خوفي يكون رايح بالرجلين
حبيبة: تلكي لو رايح بأنفجار لو لاكفتة سيطرة وهمية ع الطريق
اباوع لزهراء طلعت من الغرفة
راحت للبلكون
كالت عطاء
عطاء: شبيكم هيج تحجون؟ دتشوفون الاوضاع متوترة
روناك: هسة ما افتهمنا تحبة تكرهة
عطاء: الحب والكره معلية، يمكن تحس نفسها مذنبة
روناك: معقولة يحبها هالكد؟
حبيبة: واكثر متتصورين بس هو مالة عين يعترف الها
تنهدت روناك وكالت
روناك: وليش ميخطبها
عطاء: والله لو تطلع عينة مينطوها الة
روناك: خلي يصير نفس عبدالله يهجم بيت اهلها ويكللها علمودج ولتكسريني بدموعج
حبيبة: عبدالله ايقونة الدكات الناقصة
كالت عطاء بقلق
عطاء: يمعودين هسة خلي يرجع بالسلامة
حبيبة: والله صار مرتين يوصل للموت من وراها، الله اليستر من الثالثة
روناك: خلي تكمل الثانية اول
طلعت من الغرفة
لكيت زهراء كاعدة يم الباب
يمكن سمعت كلامنا
كعدت يمها
كانت تبجي
كلت بهدوء
حبيبة: سمعتي كلامنا؟
مسحت دموعها وكالت
زهراء: مجاي اعرف ليش الله يخليني بهالاختبارات، حسين من جهة كل شوي يتصل علية ديشوف ردود افعالي، وخالد من جهة كل ورطة يخلي بيها روحة شكبراتها وادفع ثمنها من نفسيتي وانا مالي ذنب
خليت راسي ع كتفها
كلت
حبيبة: لازم اكو حل، والغايب عذرة وياه
كالت بخنكة
زهراء: كلشي خلي يصير بهاي الدنيا، بس مااريد يتأذى واحمل اذيتة ذنب بركبتي ليوم الدين، انا يشهد علية ربي مااريدلة الاذية، ولو ادري راح اواجه هيج شي حقير بحياتي ما اجي هنا ولا اداوم
طلعت روناك من الغرفة
كعدت كدام زهراء وكالت
روناك: هو الوقت مو مناسب، بس ممكن افهم شلون حبج؟
كالت زهراء بخنكة
زهراء: ماادري، حتى انا بنفسي ماادري من بين كل بنات القاعة متقصدني ويحجي علية بكلام طائفي، باك ملزمتي بسببة رسبت بأمتحاني الاول، بسببة مكدرت اعيد الامتحان مااعرف بين ليلة ويوم تغير كلشي
روناك: لنفترض رجع بخير وسلامة، مابيها مجال تنطين لنفسج فرصة؟ وهو يحجي وي اخوج وتدخل عالم وربج ع كلشي قدير
كامت وكالت بعصبية
زهراء: الحب مو بالاجبااار وانا ما اتقبل انسان ما عندة حب لأل البيت بداخلة، ما مجبورة ع هيج انسان
روناك: منو كال ما يحبهم؟
الدمعة بعيونها
كالت بقهر
زهراء: انتو كلكم تلومون بية لان ما سمعتوا وهو يذم بية وبمذهبي وبعباتي
حبيبة: زين اذا استشيع
صفنت
بعدها كالت
زهراء: لا اكراه بالدين، انا ما اريد انسان يحول مذهبة حتى يرضيني، لان كلبة مراح يتغير
كالت روناك بانزعاج
روناك: اووي ليش نطولها وهي كصيرة، انتي رافضة خالد لشخصة هو والمذاهب والاختلافات كلها اعذار
عطاء متكتفة
ومخلية راسها ع الباب
كالت
عطاء: مصايبكم هاي نستني مصيبة ضوية
حبيبة: صدك روناك من يموت عدكم واحد شتكولون؟ يسوع يرحمة؟ استغفرالله استغفرالله
عطاء صكت اسنانها
وكالت بنفاذ صبر
عطاء: حبيبة اسكتييي راح انومج بصف ضوييية
بهالاثناء رن موبايلي
كلت
حبيبة: اصبروا اشوف منو
ركضت للفون
كان المتصل حازم
كالت روناك
روناك: فتحي سبيكر بلكي اكو اخبار عن خالد
فتحت سبيكر
حبيبة: الو حازم هلو
حازم: هلا حبيبة
حبيبة: شنو شبيك
حازم: انا راجع لبغداد
حبيبة: خالة صارت زينة؟
حازم: اي صارت احسن وعفت يمها خالتي
كلت بقلق
حبيبة: ليش جاي لبغداد هسة؟
حازم: اجاني اتصال من شخص غريب يخص خالد
باوعت ع البنات
يباوعون بترقب وخوف
كلت بتوتر
حبيبة: شبي خالد؟!
حازم: ما فهمت الاتصال بس اللي فهمتة خالد بالسيطرة
حبيبة: شنو؟!
وانغلق الخط
باوعت ع البنات
كلها تباوع بترقب
كالت روناك
روناك: معقولة م ات؟!
قد لمحتُ كثيرا لم وتك
هل ستموت وتُخلدُ ذكراك؟
ام تبقى في الوجودِ خالدا...
