رواية الريفية وابن بغداد الفصل الثاني 2 بقلم مجهول

وردة: امي راحت للسوك وجابتلي اشكال والوان دشاديش يخبلن مال مزوجات وجابتلي 3 رواب نوم ستن وطوال واحد نص ردن وطويل حيل مثل الدشداشه والثاني هم طويل وربع ردن والثالث ردنه كركش هيج هنه عراض يسمونهن ام الزخمتين حلوات وجابتلي شيله بريسم جديده وجابلي كحله وديرم شغلات يخبلن شكد حلوات فرحت بيهن وضميتهن بالجنطه ورحت يم جدي

وردة: جدي شلون اروح باجر وانته مريض جا غير يظل بالي يمك عليش تقلقني واني من مهب الريح اطيح 

جدي: يا بعد روح جدج اني زين ما بيه شي روحي البيت رجلج واذا الي عمر اعيشه وباجر عمج ياخذني للمستشفى والله كريم

جلال: افف شلون تحجي كلامها والفاضها مقززة ما اتخيلها صارت مرتي اباوع الها ولعبانه نفسي وطلعت من الغرفه ورحت للحديقه اشم هوه ياريتني ما جاي ولا صارت هاي المصيبة 

وردة: يا رب سترك جلال ما رايدني كلش ولا بشكل من الاشكال بس شسوي اني شنهي بيدي هم مغصوبه مثله 

رحت الامي اسولف وياها 

يمه هذا جلال ما بالعني ولاني عاجبته مطنكر بوجهي عليش اني ما بياش(بيه) شي يتعيب وجدي مدري منين طلعلي بهذا الفنتك (الموضوع)

نورية:جا شني هو بكيفه ما يريدج بعد انتي صرتي مرته شوفي سمعي كلامه اموتج اذا تعصين امره ما اريد يكولون نوريه ما عرفت تربي 

وردة: يمه شنهي ما عرفتي تربي اني مربايه زين بس هو يمه ما رايدني ما توجدين(تشوفين) زين 

نورية: شنهي انفتكتي (خبصتيني) بهاي السالفه كلتلج صتري مرته وهذا هو 

وردة: يربي محد يفهمني اروح للهوايش واسولف وياهن احسن 

طلعت ورحت البيت الهوايش وكعدت اوكل بيهن وكاضه (لازمه)الفانوس بيدي لان ليلت الدنيه وكعدت انظف بالمكاني واسولف ويه روحي بصوت عالي يربي ليش ما يريدني جا اني مو بت شنهي ما عجبته بس هو حكه هو حلو حيل من هاي الشباب الجمالهم تستحين منه بس شني اني هم حلوه عليش شايف روحه علي شني شايفني مجعمرة(مو حلوه) 

جلال: طلعت اتمشه واشرب جكاير واسمع صوت طالع من الحظيره مال الابقار تقربت حتى اسمع طلعت ورده تسولف ويه روحها بيه 

ورده: كملت تنظيف وردت اطلع وما اشوف الا جلال كبالي اتسمرت(وكفت) بمكاني 

جلال:الحمدلله والشكر هم همجية وهم مخبلة اني امي اكيد داعيه عليه

وردة: اني راح احجي بس مو تكول تراددين 

شني عليش ما عاجبتك واني شني همجيه ما كلتلك اخذني واني موش مخبله عكلي يوزن ديره 

جلال: لج دروحي دخلي جوه اني اتناقش ويه هيج شكول 

وردة: دخلت للبيت ودموعي تصب اذا ما يريدني عليش يحجي علي جا اني شني حيوان ما احس 

نمت وكعدت ويه اذان الفجر عجنت وكملت ورحت خبزت ودخلت سبحت بصابون ركي جلفت روحي جلف بعد عشتو وانه عروس وطلعت لبست ثوب وردي ستن وبي غرس لونه وردي واني شني مستحيه احد يشوفني كله البس الوان طوخ سلمت ع امي وجدي وظليت ابجي وعمتي تسكت بيه ورحنه صعدنه السياره 

واني اباوع ع الطريق انه اول مره اطلع من الديره كله جنت سارحه بحلالنه وجلال وعمي يتناقشون وعمي يقنعه بيه ويكله جدك يزعل اذا دره مدري شيريد يسوي نمت بحضن عمتي شوي وفزيت كالو وصلنا دخلت شنو البيت نازك بي اشياء ما شايفتهن دخلت واباوع ع البيت والاضويه وعمتي كالت صعدي فوك الغرفه جلال بعد هاي غرفتج جاي اصعد بالدرج واحد جرني من وره كال وين رايحه 

عمتي: اني كلتلها تصعد فوك غير صارت مرتك 

جلال: هاي مو مرتي واني ما اريدها دوريلها مكان ثاني غير غرفتي 

وردة: دفعني اجيت اطيح نزلت جوه وعمتي كالت ميخالف شوي ويتعود هو ما يحب النسوان من يوم يومه 

ودخلتني غرفه ما بيها شي فارغه جابتلي فراش وكالت باجر نجيبلج جربايه وكنتور 

دخلت بدلت ملابسي ورحت ادور ع عمتي 

عمه شنو جاي تسوين اني اسوي بمكانج 

عمتي: يا عمه شنو روحي كعدي بغرفتج عروس انتي 

وردة: يا حسره ع حضي عروسيش سوده مصخمه 

عمتي: يا عمه كل شي بالتعويد بس انتي تغيري شوي جذبي لبسيله وعدليله 

وردة: اي امي جابتلي روابه شحلاتهن 

عمتي: اي اليوم لبسي وصعدي بلكي ينغري وتعجبينه 

ورده: كملت الاكل وصبيته وعمي عجبه الاكل حتى ولد عمي بس جلال ساكت واحد من ولد عمي حيل حباب اسمه امجد اصغر واحد والاكبر منه ايمن هم حباب بس جلال اعوذ بالله ابليس عيونه تطلع نار 

كملت وغسلت الماعين واستحي اسولف لان يستغربون حجيي ويضحكون عليه هم مو قصدهم بس انه اضوج 

وصار وقت العشه عمتي سوته وجلال طلع وره العشه اني غسلت المواعين ودخلت غرفتي اخذت الروب والديرم والكحله والشب وصعدت فوك