رواية قاتلة ابي الفصل الثاني بقلم بنت الشيخ ترابية
خلص شهر كامل وعادي وابوي كال:- راح نرجع لتركيا
واخيرا راح اسافر جهزت غراضي بيدي ورتبت اوضاعي
ساعة 12 ليل طيارتنا وهسه ساعة 5 العصر
كال ابوي ساعه 7 نروح للمطار
كلما رتبنا البيت وصفينا وخلصنا ترتيب الجوازات صارت ساعه 7 رحنا للمطار وهم انتظار وتعب
في تركيا 2013
رحنا فندق وصلنا تركيا احنا بوقت الفجر على صبحيه
بس نمنا شوي
ابوي نام ساعه وطلع للعقار
واحنا نمنا كلمن بغرفته
كعدنا الساعة 12 الظهر
لكينا ابوي مجهز الاكل ومخلص كلشي
كعدنا ناكل وكال:- اشتريت شقة وخلصت تأثيثها
امي غصت وكالت:- هاي شبسرعه؟ اشتريت واثثت بدون مادري شبيك مستعجل
امي غصت وكالت:- هاي شبسرعه؟ اشتريت واثثت بدون مادري شبيك مستعجل
كال ابوي:- مو مستعجل بس راح نبقى هنا لشهر الثالث ونرجع للعراق واحنا هسه شهر التاسع وتردين نخلصها فنادق؟
عوجت حلكها امي ومهند كال:- شبسرعه شهر تاسع البارحه جان شهر السابع
ذو الفقار:- هو هيج الوقت والايام تمشي بسرعة
كملنا اكل وابوي كال ساعة 8 كعدوني حتى نروح للشقة وراح نام
وانا اخذت ورقه وقلم وكعدت ارسم شي بسيط لانو لوحاتي كلهن بالعراق
اجه مهند مد رجلي ونام بحضني وجتف ايده
هنادي:- ههههههه حنيييييت
مهند:- لا والله الي يسمعج يكول مغلس عنج انا
سكتي سكتي خلي انام عندنا شغل
هنادي:- اني گصيرة طولي 158 ورجلي هم گصيرة وهو ضخم وطوله يطلع بالـ 190 وضابط وضخامه
يعني نص راسه بحضني والباقي على الهوى
كملت رسم ومهند نايم بحضني وامي راحت لغرفتها
وماهر نايم بغرفته
مشى الوقت وصارت ساعة 6 كعد مهند راسه يوجعه وطلب جاي
كمت سويت جاي لمهند ورحت كعدت ابوي
خليت الجاي وكوابه على العدد وبسكت واخذته للصاله
انا رحت بدلت وطلعت ملابس لمهند ولماهر وامي مادري وين نايمه مدري كاعده ماعرف
خلصو وكال ابوي يلا نروح نشوف الشقة
رحنا وياه
انا سافرة يعني ما البس حجاب بس امي لا تلبس
رحنا لمكان يجنن
الشقة جانت بمكان وكدامها حديقة ومتنزه صغير
مكان كلش حلو
صعدنا الها
ممر وبعدها صاله على اليمين 4 غرف واليسار مطبخ وصاله ثانيه وكل غرفه بيها حمامها واكو حمام بالصاله الثانيه والغرف بيهن بالكونه
ابوي حدد الغرف
وكال:- هذيج الغرفه الي بالنهايه غرفة هنادي
ركضت ودخلت الها
غرفة ومأثثه تجنن واكو بابين وشباك سحب من السگف للكاع مال البالكون
فتحت الباب الاول حمام والباب الثاني جان مرسم
وبي لوحات واللوان تجنن
طلعت بسرعه حضنت ابوي وهو يضحك
:- شككررررا شكراااااااا بااابا متوقعت حتسويها
مهند:- شمسوي الوالد خنروح نشوف
راحو للغرفة ورجعو
ماهر:- والله ترتيب يجنن
حنان:- ايي وانا ام البيت غرفتي صغيرة وحمامها على كدها
ذو الفقار:- بنيتي هاي تختلف
غمت نفسها وراحت للغرفة وكلهم دخلو لغرفهم وانا رحت اتفحص الشقة واشوف شبيها مابيها
الاثاث كلش حلو ونازك
والالوان تفتح النفس
جنت مشتاقه لاسراء رحت اخذت تلفون مهند واحجي وياها لانو انا ماعندي برامج تواصل ماحبهن
..................................
بعد مرور 8 اشهر
احنا هسه بشهر الثالث يوم 29 / 3
وصل النا خبر من اهل اسراء صديقتي
ومن جماعه ابوي
تم دخول / دال / الف / عين / شين الى تكريت
ابوي كال:- نرجع باجر ناخذ غراضنا ونسد البيوت وناخذ فلوسنا وامورنا واجدد الاجازه مالتي ونرجع هنا
احنا ماجان عندنا غراض هوايه هناك بس فلوس وامور مهمه
جهزنا ملابس قليلة لانو بس يومين ونرجع
وتعشينا ونمنا
ثاني يوم الفجر طلعنا للعراق
وصلنا 3 الظهر
هدوء
وماكو شي
رحنا بسرعة دخلنا للبيت وقفلنا الباب
اخذ ابوي الفلوس الي لازم ياخذها وامي ذهبها لمته
والامور الي تخص شغل ابوي وكلشي جاهز
ساعة 6 المغرب ابوي خابر وجدد اجازته 4 اشهر بدون راتب ..
ساعة 7 ونص امي كالت راح اروح للسوك واخذ ماهر وياي ما اتاخر بس اجيب اكل واحتياطات للسفره مال باجر كلشي يصير بالطياره
ابوي وافق مارفض وامي راحت
وانا وماهر وابوي كاعدين على التلفزيون
جاي نباوع كارتون
انا بنصهم كاعده واضحك وهم على ضحكتي
ضحكنا لدرجه صرنا نبجي من الضحك
نضحك بدون سبب
كاعدين ومانحس الا الباب اندفر واربع زلم ملثمين دخلو علينا .... البيت احترك رمي وطلق بكل مكان
وكل واحد لازم بندقية وملثم ولابسين اسود
واول مادخلو سحبو ابويه ولزكو بالحايط وربطو ايده
وكام اخوي يريد يدافع هم سحبو وربطو ايده وكعدوهم بالكاع على ركبهم وانا واكفه لا بيه اصيح ولا بيه اتحرك بس ابجي وصاافنه
ارجف وانكث لو القنفة تتحرك
انا ما اتحرك .. ابوية يباوعلي يخزرني ويأشر بعينه انا لو تذبحوني قطرة دم مابيه بس عيوني يجرن وحتى صوتي ماكو .. الي يوكف كدامي يسمع نبضات گلبي
:- تنضم ويانه لو نگتلك ماتحجي هاااااه
شلون انضم يعني مافهمت شني قصدك؟!
يباوع عليه ويحجي وياهم يريد يطول كلام ويجامل
ادري بي يسوي هيج علمودي يعني انهزمي روحي اشردي خابري سوي اي شي بس اطلعي منا وانا صافنه ودموعي تنزل واريد احد يكلي حلم اصحي
:- احنا مو جاي نحجي هاااااااااا
ابني مافهمت انضم وياك شسوي يعني وين انضم
:- تنضم ويانه وتنفذ كلامنا نكلك اگتل مرتك تگتلها
ارجف من الخوف حسيت مثل المي ينزل عليه من جوه
يباوع ويحرك بعينه على الباب
اطلعي
روحي
نقذي نفسج
نظراته الي جانت تفسر كل كلامه وفهمت كل حركاته
بس مابيدي شي
الحايط يمشي ويتحرك وانا غير دموعي ورمش عيني ميتحرك ساكن .. اريد اطاول وياهم انا هم
كعدت بالكاع ابوس بالرجل وبالايد وبالراس
الله يخليكم دخيلكم ياربي بس عوفوهم اروحلكم فدوه شتردون تسوون سوو بيه عوفوهم الله يخليكم
احجي وياهم وجان يهمسلي ويزيد خوفي اكثر واكثر
:- كووومي لا تكعدين يم رجل احد وتتوسلين
رفعي راسي وكملي مسيرتي الي ماكدرت اكملها
اخوج الصغير هذا ديري بالج عليه ما اطمن عليه يم احد ثاني .. دراستج الا دراستج اريدج تاخذين الشهادة الي اريدها ... منو هذول الي يسوون ومدنكه ع رجلهم هاااااااااا
اباوع بنص عينه وماحس الا طشرو راس اخوي
دم اخوي ع ظهري
ماكدر اندار
ابوي كام يصيح ويهدد بيهم
وانا ع ركبي كاعده كدام ابوي المربط
كال حجايتين بس
:- صيري قوية ورفعي راسي هنادي
رمشت عيني دم ابوي صار بوجهي .....
كمت على حيلي وانداريت اخوي وابوي بنص راسهم
متمددين ودمهم يجري
ابوي ينكث
واخوي اصابع ايده تنكث
والدم بوجهي وعلى جسمي
نداريت على الي رماهم
ولزمته وراجديات ولعبت بيه لعب
بس هذا كله وهو لا رفع ايده عليه ولا تقرب مني
والي وياه ماتقربو مني..
مديت ايدي ولزمت القماشه الي ملثم بيها وجريتها حيل ورفعت عيني عليه ...
الصدمة الي اجتني
والهوى البارد الي كفخني ماتوقعت بيوم يكفخني هجي
الموقف الي بيه ماتوقعت يجي يوم واكون بهذا الموقف
ماتوقعت الي صار يصير بيوم
صفنت بوجهه
اي هو هذا نفسه
............
الصدمة والطعن يجي من اقرب الناس الك
بعمره الكسر ما اجه من الغريب
الي جان الك عون قبل صارلك فرعون والك الله
............
