رواية قاتلة ابي الفصل الثالث بقلم بنت الشيخ ترابية
الصدمة الي اجتني
والهوى البارد الي كفخني ماتوقعت بيوم يكفخني هجي
الموقف الي بيه ماتوقعت يجي يوم واكون بهذا الموقف
ماتوقعت الي صار يصير بيوم
صفنت بوجهه
اي هو هذا نفسه
رجعت بذاكرتي لسنة 2013 بيوم الي امي جابت شيخ ورادت تزوجني
اي هو نفسه الي راد يعقد عليه
نفسه الي جان كاعد ومنتظر الشيخ يحجي حتى يعقد عليه گتل ابوي واخوي اليوم
هو يباوعلي وانا وكعت واغمى عليه
................................
انا واكفة بمكان وهم كدامي
اتقرب يبتعدون ف توقفت
اباوعلهم وجهم نور ولابسين ابيض وحمامه بيضه على متنهم ..
اباوع لابوي يكول اريدج قوية وديري بالج على ماهر
اندار على اخوي يكول كملي الرسمة وكتبي اسمي
دنكت بالكاع
وابوي كال .....
..............................
كعدت مختنكة من كمية الماي الي على وجهي
امي تبجي وماهر نايم بحضن ابوي
واني بنصهم
اي بنص ابوي واخوي
ثنينهم راحو بيوم واحد وساعه وحده
التمت العالم
واخذوهم وبقينا انا وامي وماهر راح وياهم
واجو نسوان يطبطبون على متن امي وانا كاعده على جهه وصافنه
رجفتهم وخوفهم عليه ببالي
ابوي واخوي من بقو ينكثون كدامي
دم ابوي ليهسه بوجهي ودم اخوي بظهري
مابدلت ولا سبحت بعد
النسوان تكول ميصير سبحي وبدلي وذبيهن مايصير دم الميت يبقى بيج
كمت سبحت وبدلت
ماهر خابرني كال رايح ادفن اخوي وابوي نامي لتبقين كاعدة
احس ماهر صار رجال
وڪبر حيل ڪبر
مو مراهق بعمر 13 سنة لا كبر هواااي اليوم
كمت لغرفتي وقفلت الباب
كعورت نفسي على الجرباية
ساعة ومن بعدها مادري شصار
ماهر :- هند .. هنادي بابا كوومي
فتحت عيني وشفته واكف كعدت وانتجيت وخليته يكعد يمي كبران ومتغير
مبين عليه اكبر
اخواني على ابوي ضخام وطوال
هو اطول مني تقريبا بطول مهند ومو سمين لا بس ضخم الي يشوفه يكول معضل بس هو لا ميلعب حديد
طلته تذكرني بمهند
لابس بنطرون اسود وبدي اسوي نص ردن وساعه سوده وحذاء اسود
نفس لبس ابوي
ومخلي من عطر ابوي هم
دمعت عيني تقرب وحضني وبقى يمسد على شعري
كال:- خاف ابوي واخوي راحو وامي اصلا ممهتمه الج وتضوج وتغار منج لا تخافين انا ابوج وامج اخوج والي ترديه اصيرلج عون وحبيب وصديق واصيرلج ظهر وسند اصيرلج اسـد بظهرج لـبوتي ...
ابتسمت ابتسامه من جرح بالكوه صارت وحضنته حيل
كال:- هسه ساعة 12 ظهر احتلو تكريت حتى مانكدر نسوي فاتحه فـ خلي نحاول ناخذ غراضنا ونقفل ونطلع للمطار ساعة 5 طيارتنا كومي جهزي وانا ابلغ امي
طلع ماهر وكمت انا جهزت الغراض بس ميته
حسبي الله ونعم الوڪيل عليهم حتى فاتحه لروحهم مانكدر ... جهزت كلشي وقبل لا انزل غراضي تذكرت كلام ابوي من اجاني بالحلم البارحه مرتين
بسرعة نزلت للمخزن
فتحت الباب
شفت الخزنة
فتحت الرمز واخذت منها مبلغ كلش هواي وقفلتها وصعدت لغرفتي
خليت الفلوس بين ملابسي والذهب الي وصاني عليه والجناسي والمفاتيح ونزلت
اجه ماهر اخذ الجنط وطلع للسيارة خلاهم
يعرف يسوق هو
واجانه كال :- ماكو خطر قوي بعدهم مانتشرين ذاك الانتشار امشو بسرعة
طلعو وانا قفلت الباب وطلعت صعدنا وگبل للمطار
السيارة سلمها للـ الامن
ورحنا ننتظر الوقت
سوده عليه يابويه ردتك ويانه هسه يابعد عيني
صافنه بالكاع ودموعي تنزل
اجه ماهر كعد يمي وسحبني لحضنه
اباوع لامي كاعده رجل على رجل وتاكل
شكد لعبت نفسي بلا احساس من صدك
مشى الوقت وصارت ساعة 5 صعدنا للطيارة وطارت لتركيا
وصلنا وياريت ماوصلنا
ماريد ادخل للشقة وابوي مو وياي
صفينا ورتبنا الشقة كامل مكمل ومابيه أيّ نقص
مـر علينا اسبوعين بالضبط ..
كعدت الصبح طلعت من غرفتي وشفت الصدمـة
