رواية ومضه امل الفصل الثالث بقلم ام مصطفى
ماتشوفون حالنا من عرفنا ابوي مات مثل الطير المذبح نتصارخ بالبيت وامي عافتنا وراحت للمستشفى
وبعد ساعة رجعت بس ورجعت وياها جنازة ابوي
هيج بسع بساع ابوي راح من ادينة بجينة دكينا لطمنا بس ميفيد الراح بعد ميرجع.
عشنة ايام صعبة ورة الفاتحة حسينة بوحشة وبوحده نخاف لا يرجع الحرامي علينا
امي جابت قفالة وقغلت كل البيبان وكامت تنام يمنا وهم نقغل الباب علينا
بعد عشرة ايام من وفاة ابوي اجة نعيم راد مفتاح المحل كال خلي يشتغل
امي كالتلةة منو يشغلة انت توكف بيه
لا العمال همة يشغلوه واني اروح وارجع عليهم ليش يبقى بله شغل
امي شالت المفتاح وانتطتة الهة
لان بقينا بلايا مصرف
حتى امي كلت لريسان ماعدنا بالبيت ولا فلس بس مارد عليها ولا عار اهميه
الحمد الله عدنا حصة تموينية كلش هواي وابوية ترس غاز ونفط والا متنا جوع
بعد كم يوم بالليل نايمين ونسمع صووت قصف هز بيتنا هززز
طفرت يمة يمة شصار
لا تخافن يمة يمكن حرب ضربتنا امريكا
طفت الكهرباء وي القصف كامت امي شعلت الفانوس وشغلت الصوبة
بدون متطلع من الغرفة بس تباوع من الشباك جانت الدنيا حمرة من الرمي اطلاق نار هواي الحزبية بوكتها يرمون بالجو
تلفلفنة بالبطاطين من الخوف نرجف
شي مرعب احنه شايفين الحرب عادي وهم جنا نخاف بس جان ابوي واخوتي بالبيت بس احنه وحدنا
-يمةة حيل خايفة
كالت ايناس ونهله حتى احنه ونرجف من الخوف
-لا تخافن يمة مايضربون المناطق السكنية كولن يا الله ان شاء الله ماكو شي
-هسه لو ابوجن عدل جان سمع راديوا وعرف شنو الاخبار
عمت عيني عليك وين رحت وخليتنا
بجت امي واحنا بجينة بسكتة وياها
بقة القصف للصبح مستمر بس بعيد علينا
الصبح كلش طلعنا سوت امي ريوك انة وطلعت مدت راسها من الباب
جان تشوف الجوارين تشيل وتطلع
سئلت جيرانة ام احمد شنو القصة
كالت الها
بدت الحرب وامريكا ضربت العراق ويكولون راح يطبون علينا
وهاي الفرقة الحزبية قريبة علينا وتضرب ع الطيارة خاف يطكوها يام اية وتطيح بيوتنا علينا
-يااا واحنه شلون
-اطلعي ام اية الناس كامت تروح للمناطق الريفية هناك اامن ماعدكم اقارب بالريف روحولهم
-لا ماعدنا
-اذكري زين
هااا اي اي خالتي ب ...... بس مااندلها بالضبط
خل اخابر اختي اسئل ع مكانها بالضبط وين
مع ذالك منو ياخذنا الها
ناخذج ويانه نذبكم الها مو تدرين احمد عندة سيارة جبيرة كوسر مال شركة البادية وناخذكم ويانه
-رحم الله والديج بس اخابر اخوت البنات وارداج خبر
-استعجلي لان احنه منتضرين بنتي تجي ونروح
-اي فدوه
طبت امي ع السريع
كومن لمن روحجن بسرعة
حطن النة تمن شكر جاي وجيسين التمر هم حطنهن
-ليش يمة وين ناخذهن نطلع لا يضربون الفرقة الحزبية ويطيح البيت علينا
-خل اخابر ريسان ابلغةة ياخذنه وياه اذا طلع لو نروح لخالتي
خابرت امي راحت واحنه اني وايناس شكو عدنا مواد خليناهن بجنط
والبقية الطحين والتمن والدهن دخلناهن بالغرف وغطيناهن ابطاطين
اجت امي كالت
امداني هو راح الزين منو بحالنا
يكلي روحي شعلي بيجن وين متردن روحن اني حاير بعايلتي اروح احير بيجن هم
-ذول اغسلن اديجن منهم
يله البسن طلعن الجن لكل وحده ثوبين وبطانية وحطيلنا فراش
واهم شي عربانة اختجن
لملمن اغراضنا وامي تقفل بالبيت وتبجي وتصيح باسم ابوي
صاحت ام احمد علينا هاا ام اية شنو ترحون
ايي اي فدوه نروح وياكم ربي يوفقكم
خابرتي اختج دلتج ايي اي دلتني
وكالت معروفين زوجها شيخ عشيرة معروف
ديله لعد استعجلي
ماعدي شي عيني بس اصعد الغراض ايناس
هسة اصيح حمودي يصعدهن الها
اي فدوه رحتلج ولو اتعبج
واني راح اصعد نهلة وعربانتها
-يله بنات امشن اصعدن خوما نسيتن شي
-لا
اكلج يوم ناخذ جناسينا
-اي اي جيبيهن كلشي يصير
صعدن البنات وكوه صعدت نهلة وخليت العربانه ليورة
وهم جيرانه جلبوا ويانه بيت ابو كاظم صعدوا صرنا يمكن خمس عوائل سوة
وطلع بينا
امي تبجي طول الطريق
هي لازمة عدة جانت عود بس مكدرت بعد لازم نطلع وكالت اسئل شيخ احد يعرف هناك واشوف شنو حكم طلعتي من البيت
جان ازدحام من كثر الناس الي طالعة من بيوتها متوجها لمناطق الريفية ناس تروح لديالى وناس للمحافظات الجنوبية
كولها طالعة من بغداد
لان بغداد هي المستهدفة
نهلة موخرت راسها من الجامة
ابد مطالعة وشايفة شوارع حدها للمستشفى ليمنى
من شافت الشوارع والطريق كله نخيل واشجار كل شويه تلفت علينا شوفن شوفن
احنة هم مو هواية طالعين
بس ابوية كم مرة اخذنا لكربلاء نزور
شوية احسن من عدها.
كولوا وصلنا لقرية خالة امي
وامي نزلت سئلت ع شيخ هارون
بسرعة دلوها
احمد جيرانه كل لامي اوصلكم لباب البيت بعد مااعوفكم
وفعلا وصلنا لباب البيت
امي من نزلت محد عرفها
بس كالت جاية ع خالتي زهرة
اجت حجية حطتة ايدها ع فوك عيونها وتباوع
-ياهي انت
-خالة اني بت رزاقية نسيمة
-يااا خالة كل الهلا بيج يمة هلة بريحة اخيتي كل الهلا بيج
وكامت تبوس بامي جنه نباوع من جامة السيارة عليهم
امي كالت الها بس انزل بناتي
-ايي كل الهلا بيكم
نزلت ونزلت امي ايه
وبعدين هي وام احمد نزلن نهلة وخلنها بعربانتها
ودعنا جيرانه وراحوا
والحجية رحبت بينا وطلع بنات وياها هم تلكنا طببنا لغرفة جبيرة غرفة الحجية يمكن لان الاستقبال بيها بيها خطار زلم جانت نسمع صوتهم
خليتا اغراضنا بالكاع
وكعدنا
والحجية تحجي
-خالة نسيمة شكرج بينه شلون خطرت ع بالج
-والله خالة ماناسيتج بس هسه الحرب والقصف ذكرتني بيج كلت ماكو غير اروح لخالتي واخذ بناتي نكعد عدها كم يوم
-بس كم يوم طول العمر اكعدوا عدنا كل الهلا بيج ياريحة اختي خاص بصفحتنا قصص عراقيه واقعيه ابو ريسان وين دنكت امي وجرتها نواعي
-افة ابو ريسان مات وسفة يموت الزين شوكت شو ماادري
-هسه مصار عشرين يوم اقل
-انا لله وانا اليه راجعون
ضلت امي تحجيلها
واحنه نباوع من الباب ع البستان كبالنا جان بيتهم مفتوح وغرفهم من طين مطشرة بالبستان
ونسوان تروح وترجع
طبت وحده تقريب بعمرنه
الحجية صاحت عليها
تعاي طبي يمة
هاي حفيدتي الجبيرة بت ابني الجبير حازم
-كل الهلا بيها تعاي ابوسج حبيبتي
فاتت سلمت ع امي وبعدين سلمت علينا وكعدت يمنا تتبسم بوجوهنا واحنه هاي كعدتنا
بساع ضيفونا واجة الغدة سمج شوية وخبز حار وذيج الروبة والتمر
صار شكد مماكلين سمج شوية حطوهن كبالنا
طب رجال بكد امي تقريب
سلم
كل الهلا بنسيمة شلونج شخبارج والله زمان مشايفيج شكرج بينه
-الله يسلمك خوية حازم
هلة بيت البيت واهلة كله بخدمتكم الماتشيلكم الكاع نشيلكم بعيونه
-رحم الله والديك والنعم منكم
تفضلوا اخذوا راحتكم
-الله يسلمك
طلع وكعدنا ناكل والحجية تفلس وتحط كبالنا
ودكتها سوالف وي امي وتذكرن جدي وجدتي وووو جابن الموتى كلهن
واحنه ناكل
خلصنا كالت كومي جده كومن غسلن
طلعنا اني واية غسلنا بره وتصب علينا هاي البنية ببربيگ می
نباوع المكان يجنن لوحة فنية عبالك
كالت اتطلعن هناك
-لا لا نرجع شسمج انت
-اسمي فرح
-عاشت الاسامي حبيبتي
جابت المي لنهلة تغسل جوه
ارتاحينة كلش يمهم
حتى من صار الليل ماسمعنا صوت لا قصف ولا رمي
فرح صادقتنا واكثر شي صفت هي واية سوالف
جانينهن بس سلمن وبعد كلمن التهت بشغلها
اية
فرح كلش حبيتها بهاليومين اول مرة اصادق وحده وجانت هي حبابة وماشافتني بيه نقص مثل بقية الناس متشوفني بسرعة كامت تحجيلي الي بكلبها
اخذتني ورحنا ع ضفاف النهر اني وياها جنت كاعده وامددة رجلي والعب بالمي شكد حلو ياا الله عبالك بحلم اني منظر يجنن طلعنا من الحزن الي احنة بيه
وفجأءه صار شاب كبالي عبالك نزل من السماء ماحسيت شلون اجة وشوكت صار كبالي
التفتت ع فرح ملكيتها
جان يكول
انت بشر لو حورية البحر
ابتسمت ع حجايته ودنكت
تلفتت يمين يسار اني احلم جنت اسمع بالتلفزيون يكولون اكو حورية بحر ومااصدك ثاري طلعت صدك
نفس الشكل بيضة وعيون صفر والشعر سرح وطويل واشكر
انت منو ؟
-انت منو حجيت ع كيف
-اويلي هذا صوت لو موسيقى طلعتي تحجين صدك عود ؟
ماكدرت اكوم خاف يشوفني اعرج ضليت ع كعدتي استحي اكوم وجان تراب ومي طين خفت لا اوكع وانفضح كدامة
اجت فرح تباوع باستغراب
-شتريد علاء
-ولج فرح تشوفين الي اشوفة حورية البحر كاعده ع ضفاف النهر
-ههههههه هي الصدك صدك تشبه حورية البحر
-وج ياهي هاي
-هاي خطار بيبي لا تتقرب عليها
-وج منين جابتها بيبيتج من الجنه حور العين
-علاء كافي لواكة ويله روح خلي ناخذ راحتنا
مااروح خل امتع ناظري بيها.
لعد احنا نروح لغير مكان ناخذ راحتنا
كومي اية
-يابوووية انوب اسمها ايه ماجذب الي سماج اية صدك اية من الجمال
-علاء شبيك ماعرفتك هيج شجاك خويه عيب
استحت منه وفرح كلي كومي خاف اكوم ويشوفني اعرج اطتني ايدها فرح يله كومي
لزكتها ردت اكوم وزلكت للنهر طحت
صرخت من الخوف
جيت علاء للنهر ولزمني من ايدي جرني ع الضفاف كعدني خفت اكوم وارجع ازلك
فرح عاطت بيه
ارتاحيت يله علاء وخر منة خردلت البنية من وراك
اي اي رايح اسف والله اذا اني ربكتج
جانت عيونهة بيهن لمعة ماعرفتها شنو بس درت وجهي بعد ماصفنت بيهن
ردتة بس يروح حتى اكوم ارجع
مااعرف ليش ماردته يشوفني عرجة
