رواية جثة الزوجة الخاينة في اللوكنده الفصل الثاني بقلم ياسر عوده
اللى بيشهر الصفحه واعتبروه ده تقدير من حضراتكم ليا وشكرا احبائي.
اللى حصل ان دخل رجل عجوز لقسم الشرطه وقال للامين:
-انا عاوز اعمل بلاغ تغيب.
-عن مين؟
-بنتي، اسمها كريمه، مختفيه من كام يوم.
-ولسه جاي تبلغ دلوقتي؟
-كان عندي امل انها تظهر، بس هي ماظهرتش وانا خايف عليها.
وقتها الامين خد بيناته الشخصيه وبينات بنته، وكمان خد منه صوره لـ بنته وكل المعلومات اللى يعرفها، بس اللى انتبه ليه امين الشرطه ان الاب واللى كان اسمه شريف وهو بيقول ان بنته كريمه متجوزه ومن مده شهر واحد بس، وطبعا كان طبيعي ان امين الشرطه يقوله:
-طيب لو هي متجوزه، ليه جوزها ماجاش يقدم البلاغ، او حتى جه معاك؟
-علشان جوزها طلقها، جه عندنا البيت وهو غضبان وثاير وبيتهم بنتي في شرفها وبيقول انها هربت مع عشقها، ورمي عليها يمين طلاق قدمنا وهي اصلا مش موجوده ومشي، وانا كان عندي امل ان بنتي تظهر وتكدب كلام جوزها، بس هي ماظهرتش وجيت اقدم بلاغ تغيب عنها.
-تمام، تقدر تمشي انت واحنا هنقوم بالواجب ماتقلقش بنتك هترجعلك.
ماكنش يعرف امين الشرطه ان البلاغ اللى قدمه الاب داه يكون بدايه حل لغز كبير اوي، وان الموضوع اكبر من اتهام زوج لمراته بالخيانه، واللى حصل ان المحضر اللى عمله امين الشرطه لما تم تسجيله على شبكه الوزاره، وقتها تم مقارنه مواصفت كريمه بمواصفات الجثه اللى لقوها في اللوكنده مقطوعه الرأس، وساعتها يلاقوا تشابه بالمواصفات، طبعا كان تشابه بسيط اوي بس التطابق او التشابه ده كان كفيل انه يدي امل للشرطه اللى بتحقق في جريمه جثه اللوكانده انهم يحاولوا يبذلوا مجهود اككبر للتأكد من ان فعلا الجثه لـ كريمه ولا لا، وبعد ما تم اصدار قرار من النيابه لـ اخذ عينه دي أن ايه من الجثه ومطابقتها مع الاب، وكانت النتيجه ايجابيه، وفعلا الجثه كانت جثه كريمه، وكان تقدم ملحوظ في القضيه، دلوقتي الشرطه عرفت صاحبه الجثه، ويقدروا يعملوا تحريات كامله ومفصله عن المجني عليها، واول حاجه عملها الضابط المحقق هي استدعاء الزوج واللى كان اسمه ماهر، بس قبل التحقيق معاه، كان ضابط الشرطه طالب تحريات كامله ومفصله عن كريمه، وفعلا ملف كامل عن التحريات عنها، واللى كان فيه معلومات كتير ومفصله عنها واللى هتسمعوها حالا.
كريمه كانت البنت الوحيده لـ ابوها وامها، وطبعا انتم فاهمين يعني ايه بنت وحيده، يعني زي ما بيقولوا متدلعه وكل طلبتها مجابه، وعلشان هي كانت حلوه فبمجرد انها وصلت لسن ال 14 سنه ابتدي الشباب ينتبهوا ليها ولجملها، وفي نفس الوقت كانت هي شايفه نفسها، كانت بتحب تلبس بطريقه تخلى الناس تبوص عليها، ولما كانت امها بتعترض على طريقه لبسها، كان ابوها بيقولها انها لسه طفله، وماكنش شايف ان بنته كبرت فعلا وابتدي يظهر عليها علامات النضج والانوثه.
وقبل ما تكمل كريمه سن ال 15 سنه، تعبت امها ومافضلتش مريضه كتير، وماتت بشكل مفاجيء ووقتها اتصدم الزوج، حس ان المسئوليه كبرت اوي ومابقاش قادر يتحملها، وخلال سنه وحده ماقدرش يتحمل المسئوليه دي وقرر يتجوز ويجيب وحده تنتبه على بنته اللى ابتدت تكبر وبقى يتخاف عليها، وفعلا اتجوز وحده وكانت غلبانه جدا وطيبه للغايه، وكانت منتبهه على كريمه وقدرت تفهم ان كريمه ماينفعش تتساب بالشكل ده، انتبهت ان كريمه من البنات اللى لازم تحط عنيها عليها علشان ماتغلطش غلطه تضيع نفسها بيها، وطبعا كريمه ماكنش عاجبها ده ابدا، ولما حست ان مرات ابوها فهماها وحطه عنيها عليها وبتراقبها في كل خطوه، وقتها بس قررت انها لازم تتخلص منها باي شكل، واستغلت كريمه حب ابوها ليها علشان تبتدي توقع بينه وبين مراته، وابتدت المشاكل بين شريف ومراته وكانت كريمه السبب، وصل الامر بكريمه انها قدرت تشكك شريف ابوها في مراته واوهمته انها خاينه وبتعمل علاقه غير شرعيه مع شاب اصغر منه، ومش بس كده دي اكدتله بعدها انها بتجيب الشاب ده في البيت بعد ما هو بيروح شغله، وبمجرد ان شريف سمع الكلام ده وقتها قرر يطلق مراته من غير ما يحاول يتأكد من اللى حصل، كان مصدق بنته ورفض يسمع اي دفاع من مراته، وطلقها وكانت كريمه وقتها عندها 17 سنه، واستغلت كريمه ثقه ابوها فيها علشان تعمل كل اللى هي عاوزاه، وبعد سنه كمان لما كان عندها 18 سنه اتقدم شاب لخطبه كريمه، ورغم ان ظروفه كانت سيئه جدا، وكمان ماكنش يملك شغله ثابته، اضطر شريف يقبل انه يخط بنته بسبب اسرار بنته عليه، واللى شريف ماكنش يعرفه ان الشاب ده كان يعرف كريمه من فتره وبنهم اتصالات وخروجات كتير، ولما تمت الخطوبه ساعتها قدر يثبت لكريمه حسن نيته، واستغل ان كريمه كانت بتبقى لوحدها في شقه ابوها وكان بيروحلها، ومع الوقت قدر يقنعها انها تعمل معاه علاقه، وفضلوا على الوضع ده حوالي 3 سنين، لدرجه ان كل الناس في المنطقه كانوا بيتكلموا عن العلاقه الغير شرعيه بين كريمه وخاطبها، والشخص الوحيد اللى ماكنش يعرف ده هو الاب واللى كان غرقان في الشغل علشان يوفر لـ بنته الحياه الكويسه اللى كانت بتحلم تعشها، بس مع الوقت ابتدي يسمع كلام وتلميحات سخيفه على اللى بيحصل في بيته، ومش بس كده هو كان بيلاحظ النظرات اللى كان معظم الناس بينظروله بيها واللى كلها غضب وسخريه، واخيرا قرر شريف يواجه خطيب بنته ويطلب منه يتجوزها، بس خطيب بنته يصارحه بانه مش مستعد للجواز، وحتى بعد ما عرض عليه شريف يساعده في الجواز ويدفع معاه كل التكاليف، هو رفض ومش بس كده دا فسخ الخطوبه، ودا كان تصرف طبيعي طبعا منه، ازاي يتجوز وحده سلمتله نفسه، بس شريف ماكنش فاهم حاجه ومش فاهم ليه خطيب بنته عمل معاها كده، وفضل يواسي بنته وهو مش فاهم انها عملت مصيبه من وراه، وبعد اللى حصل بـ 6 شهور تقريبا ظهر شخص وطلب يتجوز كريمه، والشخص ده اسمه ماهر، وكان اكبر من كريمه بحوالي 12 سنه، ولما اتقدم ليها هي وافقت عليه بدون تفكير، وابوها وافق عليه كمان، واتجوز ماهر من كريمه بعد الخطوبه بـ 6 شهور بس، وبعد جوازه منها بشهر واحد بس راح ماهر على بيت شريف، فضل يزعق ويقوله ان بنته هربت من البيت، وقال انها اتصلت عليه من رقمها وقالتله انها هربت مع عشقها واللى طول عمرها بتحبه، وحاول شريف يهدي ماهر ويحاول يفهم منه، بس ماهر مادلوش فصه وطلق كريمه قدامه وقاله انه مش عاوز يشوفها تاني او عاوز يشوفه هو كمان.
وقتها شريف استني لغايه لما بنته تظهر او حتى تتصل عليه، وكان بيتصل على تليفونها باستمرار بس تليفونها كان مقفول، ومعرفش شريف يوصلها وعلشان كده في النهايه قرر انه يروح للشرطه ويقدم بلاغ، هو كان مستني يمكن بنته تظهر ويقدر يلم الموضوع بدون فضايح، بس هي ماظهرتش تاني لغايه لما عرف بعد كده انها اتقتلت بالطريقه البشعه اللى عرفناها.
وبعد ما عرف الضابط كل تفاصيل حياه كريمه، ابتدي يستجوب ماهر جوزها وقاله:
-انت عرفت كريمه ازاي؟
-حضرتك انا صاحب محل للموبيلات، وفي يوم لقيت كريمه دخله عليا المحل، وبصراحه اول لما عنيا وقعت عليها عجبتني، حاولت اتكلم معاها وافتح كلام، لقتها صدتني وفهمت وقتها انها بنت اصول ومتربيه، بس ماكنتش عارف ان كل ده خدعه هي عيشاها ومعيشه ابوها فيها.
-طيب لما عجبتك وصلتلها ازاي؟
-انا مشيت وراها لغايه لما عرفت بيتها فين، وعرفت من الجيران انها مش مخطوبه، ووقتها انا صليت صلاه استخاره وبعدها اتقدمتلها.
-اتقدمتلها من غير ما تسأل عليها كويس وتعرف هي ايه واخلاقها ازاي؟
-دي غلطه انا بعترف بيها يا فندم، انا انخدعت في جمالها والطريقه اللى صدتني بيها، ماكنتش عارف انها لابسه قناع مزيف، وان الحقيقه انها لا بنت اصول ولا محترمه.
-وانت عرفت الحقيقه دي امتي، لما هربت وسابتك؟
-للاسف ايوه، عرفتها متأخر اوي، لما هربت وطلقتها وصلي عنها كلام كتير، وعرفت انها كانت على علاقه مع واحد وكمان كانت عمله معاه علاقه.
-وانت ماكتشفتش ده ليله الدخله لما لقتها مش بنت بنوت؟
-يا فندم انا ماكنتش مدي خوانه، في ليله الدخل هورتني بوقعه حمرا على منديل قماش، وقالتلي انه دم وانا ماركزتش وقولتلها اني بثق فيها، وماعرفش بقى هو فعلا كان دم ولا كان مجرد لون وخلاص.
-تمام، قولي ايه اللى حصل بالظبط قبل ما هي تسبلك البيت وتهرب.
-تصرفاتها من ساعه الجواز كانت غريبه ومش مفهومه، يعني ديما كانت سرحانه وهي قاعده جنبي، وكمان اات كتير كنت بشوفها بتتكلم في الموبيل بصوت واطي اوي، وكانت بتقولي انها كانت بتكلم ابوها، ورغم ان مكلمتها كانت كتير اوي، بس كنت بقول لنفسي علشان هي وحيده ابوها فاكيد مرتبطيب ببعض اوي، وعلشان كده ابوها بيطمأن عليها باستمرار، ورغم انهم اوقات كتير كانوا بيتكلموا في اوقات غريبه، يعني اوقات بعد الساعه 2 بعد نص الليل ولما كنت بسألها بتقول ابوها، وطبعا كنت بسكت رغم ان الموضوع كان مأفور جدا.
وفي اليوم اللى هي اختفت فيه انا كنت في شغلي، ولما رجعت في معادي اللى برجع فيه، ناديت على كريمه بس مالقتهاش بترد عليا، وقتها فضلت ادور عليها في الشقه كلها، بس بدون فايده مالقتهاش، وبعدها لقيت جالي اتصال منها، وقالتلي انها هربت مع حاببها ومش هترجع تاني، وقالت انها بتكرهني وبتكره اليوم اللى شافتني فيه، وقفلت الاتصال بعدها، وكنت متعصب من كلامها طبعا، وحاولت اتصل عليها بس هي قفلت التليفون، وروحت لـ ابوها وزعقت معاه وبعدها انا طلقت بنته قدامه.
وقتها الضابط كان متأكد انه خارج دائره الاشتباه، كان واضح ان ماهر شخص طيب واتخدع في واختار زوجه غلط من غير ما يسأل عنها كويس، ومستحيل يعني يكون هو اللى راح مع كريمه للفندق وعرف الاستقبال انه جوزها وقتلها هناك.
اول مشتبه فيه كان خطيب كريمه الاول، لانه اكيد هو الشخص اللى رجعت اتواصلت معاه بعد ما اتجوزت من ماهر، وفعلا تم استدعاءه وتم التحقيق معاه، بس هو انكر معرفته بيها وقال:
-يا فندم انا لما صدقت خلصت منها، ايه اللى هيخليني ارجع واروح اكلمها تاني، وكمان ايه اللى هيخليني افكر اقتلها، اكيد يعني بدل ما اقتلها ابعد عنها احسن.
-يمكن هي فرضت نفسها عليك وطلبت منك تتجوزها مثلا؟
-منا لو كنت عاوز اتجوزها كنت اتجوزتها من الاول، يا فندم دي وحده سلمتلي نفسها وقت الخطوبه، ازاي اروح اتجوزها، وبعدين انا خاطب دلوقتي وبحب خطبتي.
-تمام، تقدر تقولي كنت فين وقت وقوع الجريمه؟
-كنت في شغلي يا فندم، انا شغال مندوب تسويق، وطول اليوم بفضل الف على رجلي علشان اسوق للبضاعه اللى ببعها.
اقواله كانت متطابقه مع التحريات اللى اتعملت، فعلا زملاءه في المكان اللى شغال فيه قالوا انه كان موجود وخد بضاعه يسوقها، بس شهادتهم ماكنتش كفايه انا عرضته على موظف الاستقبال علشان يتأكد ان كان فعلا هو اللى شافه مع المجني عليها ولا لا، وطبعا لبسناه كمامه ووقتها موظف الاستقبال قال انه مش نفس الشخص، وبردوا الشرطه عملت اجراء تاني مهم ودا كان الدليل القاطع على برأته، ودا حصل لما النيابه حولته للطب الشرعي، وهناك اتعمله مسحه دي أن ايه علشان يشوفه هيتطابق مع الحمض النووي اللى كان جوه الجثه نتيجه العلاقه الجنسيه اللى حصلت، وكانت النتيجه سلبيه وماتطبقتش ووقتها الشرطه اتأكدت انه بريء ومش المجرم اللى بيدوروا عليه.
للاسف الشرطه رجعت لنقطه البدايه من تاني، وكان تفكير الضابط المحقق وقتها ان اكيد في عشيق تاني واللى اكيد هو الجاني، بس علشان الشرطه توصله كانت محتاجه تدور في كل حاجه تخص كريمه، وتم اصدار قرار من النيابه بفحص كل حاجه تخص كريمه زي سجل بارقام التليفونات اللى اتصلت عليها، بس حتى دي ماقدمتش النتيجه المرجوه منها، وابتدت الشرطه بفحص حسابات كريمه على مواقع التواصل الاجتماعي، يمكن عن طريقها يقدروا يوصلوا للشخص اللى كان بيتواصل معاها، بس بتتبع كل الاشخاص اللى كانوا بيتواصلوا معاها الشرطه مالقتش اي دليل ضد اي شخص فيهم، ورغم كل المعلومات اللى اتجمعت عن كريمه الشرطه ابتدت تحس انهم وصلوا لطريق مسدود مره تانيه، وفي لحظات اليأس اللى اتسربت لقلب ضابط الشرطه، ظهر دليل قوي جدا ماكنش في حد متوقعه، والدليل ده كان عباره عن سيده اسمها كوثر، واللى راحت للشرطه وطلبت تقابل الضابط المحقق في جريمه كريمه، ولما قعدت مع الضابط قالتله:
-انا سمعت عن جريمه كريمه من صفحات التواصل الاجتماعي، ناس كتير نشروا اخبار عنها، وماكنتش مركزه معاها لغايه لما صفحه من الصفحات الاخباريه اتكلمت عن زوج كريمه او بالاصح طليقها، واللى اسمه ماهر، ولما شوفت صورته انا عرفته، هو يا فندم لو كريمه اتقتلت اكيد هو ليه يد في الموضوع ده.
اتصدم الضابط من كلمها وسألها:
-انتي ازاي متأكده من الكلام ده، ماهر مايعرفش حاجه عن مراته، هو مجرد زوج مخدوع مش اكتر.
-لا يا فندم انت ماتعرفهوش، ماهر مش زي ما هو بيبين خالص، اسألني انا يا فندم، لانه عمل معايا كده قبل كده.
-ازاي يعني، ممكن تحكيلي؟
-ماهر كان جوز بنتي رانيا، وفضل متجوزها شهر واحد بس، وبعدها قال انها اختفت وهربت مع شخص تاني، وانا عارفه ان بنتي ماهربتش، بنتي اكيد ماتت وهو اللى عارف هي فين.
-انتي تقصدي ان ماهر كان متجوز قبل كده ومراته هربت وسبته بردوا؟
-لا يا فندم ماهربتش، هو اللى خفاها، انا متأكده من كلامي ده كويس.
-طيب ممكن تحكيلي اللى حصل بالتفصيل، انا محتاج اعرف كل حاجه حصلت.
