رواية السكن الفصل الواحد والثلاثون بقلم غدير الحيدري
لم يكن غباءاً
كان قدرا حتمياً كي ارى وجهك
والمح وجهتي الحقيقية معك
اين سيأخذني طريق الضياع؟
واين سترسى سفينة الألم
لم يعد مهم
اثبات نفسي لك اليوم قد اصبح ضربا من الوهم
.......
دخلت للقاعة
مكان روناك خالي
رتبت ملازمي وكعدت
وصرت اكلب بيها
دخل حسين للقاعة
كعد بالستول القريب مني
غلست عنة
دخل الدكتور وبلشت المحاضرة
مرة كنت اركز بالمحاضرة
ومرة اركز ع روحي
واكول لنفسي
شسوت بيج الايام؟
كملت المحاضرة
اجيت اطلع
وكف يمي وكال
حسين: صباح الخير
رديت وانا اشيل الملازم
عطاء: اهلا
حسين: شلونج عطاء انتي بخير؟
عطاء: هلا خوية، الحمدلله بخير
باوعتلة وكلت
عطاء: محتاج شي؟
كال بأرتباك
حسين: لا، بس حبيت اتطمن عليج
كلت بتعجب
عطاء: علية؟!
سكت
كلت ببرود
عطاء: حسين انا معاشرة اختك واعرف تفكير عائلتكم، مثّل عائلتك بطريقة مناسبة اكثر
باوعلي بأنزعاج
عطاء: يمكن كلامي ما يعجبك لكن هاي الحقيقة، كانت اكو ضوية وراحت الله يرحمها، شنو المطلوب من عطاء هسة؟
كال
حسين: انتي حاقدة علية! انا شسويتلج؟
عطاء: ومنو انت حتى تسويلي شي؟
رفع حاجبة بتعجب
حسين: واضح الحقد، لالا وفوكاها كبريائج مجروح
عطاء: واحد مثلك ما يجرح كبريائي، واذا خلصت سلام اريد اطلع
ابتسم
حسين: وليش انا حتى اجرح كبريائج؟
عطاء: المطلوب؟
حسين: انا انعجبت بضوية ما انكر هالشي لكن ضوية مو الانسانة المناسبة الي
تنهدت
عطاء: واحنا هسة نتناقش عن المناسبة الك؟ انت بهاي عقليتك الهجومية وتسلطك حتى اسمك ما يناسبك مو عاد ضوية
عقد حاجبة
حسين: انتي منين تجيبين هالكلام؟
اشرت ع جيب السترة مالتي
وكلت
عطاء: منا
كتم ضحكتة وكال
حسين: وعندج حس فكاهي هم
عطاء: تحب تناقش حسي الفكاهي لو شنو؟
حسين: لا خليها للمرة الجاية
مشيت
والتفتت الة
عطاء: مراح تكون اكو مرة جاية
حسين: صحيح تذكرت، بالمناسبة حازم هالايام جاي يتصرف بغباء
عقدت حاجبي
عطاء: شدخلني بحازم؟
حسين: انا اعرف انتي مو يمة بس اخذي حذرج منة
رجعت وكفت كدامة
كلت
عطاء: وانت ليش مركز ع حازم؟
تنهد
حسين: لنفس السبب اللي ما خلاج تنطين رسالتي لضوية
خفق قلبي
دمعت عيوني
راح وعافني
نفس السبب؟
لالا
حسين ما يحبني ولا راح يحبني
واللي يصير مجرد غباء
هو شمدري ما نطيت الرسالة لضوية؟!
زهراء مستحيل تكلة
يمكن لان كلهم شافوا انهياري من ماتت ضوية
وقرروا يخففون عني
وبس
كملت محاضراتي وانا اتجاهلة
لملمت اغراضي وطلعت بنهاية الدوام
شفت حازم واكف بباب القاعة
كان يسترق النظر!
حسيت بشعور مقرف وغبي
كان حسين يسألة
حسين: ليش جاي لهنا؟
وهو يرد علية
حازم: موعد الايجار
وعينة علية!
طلعت من الدوام
احس نفسي مخنوكة
هو شنو الجاي يصير؟
شنو الغير حسين!
وشصاير لحازم!؟
......
انا هم هواي اسأل نفسي
شصاير لحازم؟!
بس ما الكة جواب يشفي
اليوم من شفتة
واتفقنا ان بيوم الجمعة يروح ع ابوية
لـ لحظة حسيتة متندم
وكذبت نفسي..
وصار يتحجج بالايجار
وراح..
طلعت من قسمي
احس الدنيا ضاكت بية
رحت ع زهراء
لكيتها بالقاعة تلملم بملازمها
وخالد واكف ع جهة يباوع
خو انت خلصتها بس نظرات
روناك اجت وراكم بشهرين وحبت وتزوجت وحتطلك
وانت بعدك واكف وتباوع
وصلت يم زهراء
كلت بتعب
حبيبة: زهراء ماعندي غيرج
جفلت وكالت بخوف
زهراء: يمة اسم الله
باوعتلي بقلق
زهراء: حبيبة شبيج!
شبكتها وانا تعبانة
اباوع لخالد يحوص
صدقا سوالفة خلتني انسى همي
زهراء: وج احجيلي شكو
حبيبة: مخنوكة
وخرت عنها
وعيني ع خالد
يمكن لو باقية حاضنتها شوي بعد
يجي بنفسة ويوخرني
تعمدت احجي بصوت عالي
وكلت
حبيبة: مالهم امان
تنهدت زهراء وكالت
زهراء: السالفة تخص حازم؟ يمة اشوى عبالي صايرتلج مصيبة، امشي نطلع ونسولف برا
مرينا من يم خالد
وانا اكول
حبيبة: الله يفرحني بيج ع كد ما انتي طيبة، هيج كون سيد مثلكم
كرصتني زهراء
وطلعنا برا
زهراء: امشي ولي كدامي للسكن يلا
حبيبة: اوووي هاي شبيج زرفتي ايدي
زهراء: ماكو داعي تسمعي
حبيبة: غير علمودج حتى يتلحلح
زهراء: ميحتاج يتلحلح واساسا كلشي ماكو
عقدت حاجبي
مشت وعافتني
لحكتها وانا اكول
حبيبة: زهراء شنو قصدج؟! كلام جديد هذا
زهراء: ماكو شي جديد من ناحيتي الجديد من ناحيتة هو
بقيت اباوعلها مستغربة
دخلنا للشقة
ذبت عبايتها وفتحت شالها
وانا واكفة اباوع الها
كلت
حبيبة: شنو الجديد اللي من ناحيتة؟
كالت ببرود
زهراء: الافضل نسد الموضوع وما نجيب سيرتة بعد، ومو بس هو ما نجيب سيرة الكل لان ما طلعوا كد الشوفة
دمعت عيوني
حبيبة: وضحي كلامج؟!
زهراء: حبيبة خالد خطب
فتحت عيوني مصدومة
حبيبة: شنووو؟!!! تتشاقين!
كالت بخنكة
زهراء: يحب بنت عمة كل هاي الفترة وخطبها، واساسا يردون يرحون للمنصور حتى يشترون ملابس لخطوبتة
حبيبة: لالا اكيد اكو غلط انتي متوهمة انتي ما شفتي شلون يباوعل..
قاطعتني وكالت
زهراء: كلة كذب، اساسا ما يهمني ولازم نسد الموضوع الولد زين سوة وخطب والله يوفقة
اباوع لعيونها مدمعة
رحت يمها وكلت
حبيبة: ليش عيونج هيج؟ انتي مقهورة مو؟!
كالت بخنكة
زهراء: انا ما حبيتة بس مو حلو يسوي شي مو كادر يستمر بي، اذا بنت عمة بحياتة من زمان شلون كدر يمثل كل هالفترة؟
مسحت دموعها وكالت
زهراء: بعدين انا مريت بأيام صعبة بسبب تصرفاتة، عانيت هواي وخفت هواي وتمرضت وتأذيت، هاي كلها عدها حوبة يم الله
اخذتها لحضني
حسيت كلبي معصور عليها
حبيبة: منو كلج بهالكلام انتي متأكدة؟
ابتعدت عني وكالت
زهراء: مو المهم منو كلي، انا متأكدة وهو سحب نفسة وبطل يحاول وهذا المهم والاهم اما عن نفسي مو زعلانة بالعكس فرحت لان خفت اشيل ذنبة
كانت تكابر
بس مااعرف ليش حسيتها حزينة
كعدت ع السرير
لزمت ايدي وكالت
زهراء: لا تسمحين لحازم يتلاعب بيج، واياج تسمحيلة يخرب علاقتنا
كلت بخوف
حبيبة: انتي ليش تكولين هالكلام؟
زهراء: كلهم نفس الشي وما يختلفون عن بعض، احنا مو مثلهم، مهما كنا قويات تبقى قلوبنا ضعيفة، قوي قلبج وانطي مهلة اذا مااجة بيها معناها ما يفيدج
دمعت عيوني
دخلت عطاء للغرفة
كالت بتعب
عطاء: بنات شفتوا روناك؟ عفتها نايمة اخاف اجة عبدالله وسوالها شي؟؟
كالت زهراء
زهراء: ترا ساعة ٤ اكيد راحت للشركة، لا تنسين احنا تأخرنا اليوم
عطاء: مدري خايفة عليها
زهراء: لتخافين، ميكدر يسويلها شي واساسا ما اتوقع ان هو جاي
كمت ورحت لسريري
اباوع لعطاء مخنوكة وتعبانة
تفرك بركبتها وتلوب
وزهراء حزينة
اما انا كنت ساكتة
ساكتة تماما..
حسيت نفسي تعبانة
اكو شي بية مجاي يهدأ
اتصلت بحازم
حبيبة: الو
حازم: هلا حبيبة
حبيبة: انت وين؟
حازم: ليش محتاجة شي؟ رايح للشغل
حبيبة: ماكو شي
سديت الخط
طلعت من الشقة ونزلت جوة
من بعيد شفتة واكف وي خالد
مشيت الة
كانوا يسولفون
وصلت يمهم وكلت
حبيبة: السلام عليكم
ردوا السلام
حازم كال بأستغراب
حازم: شطلعج حبيبة خير صاير شي؟!
باوعت ع خالد
رجعت باوعت علية
كلت
حبيبة: عندي حجي وياك
خالد كال
خالد: يلا انا اترخص
باوعت لخالد بقرف
وكلت
حبيبة: مبروك
عقد حاجبة
كال بأستغراب
خالد: الله يبارك بيج، بس ع شنو؟
حبيبة: ع الخطوبة
كال بأستهزاء
خالد: شنو؟!
حبيبة: شنو اول مرة تسمع احد يباركلك؟ لو مسوي نفسك فقير ومسكين؟
كال حازم بأنزعاج
حازم: حبيبة شبيج شهالحجي؟
كلت بغضب
حبيبة: حتى باللباقة ما تعرفون؟ شلون جاي تحبون تخطبون ومستقبلا تفتحون بيوت اذا انتو مباركة مو كادرين تجاوبون عليها عدل
حازم راد ينفعل
وكفة خالد وكال
خالد: عفوا، بس انا مو فاهم عن شنو تحجين خيتي؟
حبيبة: انت مو خطبت؟
كال بأنكار
خالد: لا شوكت؟!
فتحت عيوني بدهشة
حبيبة: شنو لا؟! ترا انت خاطب بنت عمك اللي تحبها صارلك فترة طويلة، انا بس ردت اكلك اذا تحب الف عافية بس اكو تصرفات بدرت منك مو حلوة
خالد باوع لحازم
ورجع باوعلي وكال
خالد: منين جبتي هالكلام؟
حبيبة: يا كلام؟
خالد: منو كلج انا خاطب؟!
كلت بأرتباك
حبيبة: مو المهم منو كلي، ترا السر حتى لو انضم راح ينفضح بيوم من الايام، عموما مو حلو نخدع غيرنا
كال بعصبية
خالد: انتييي شتكولين؟! انا شوكت خطبت؟!
حازم كال
حازم: حبيبة هيج موضوع ما يتشاقون بي
حبيبة: ترا مجاي اتشاقة، انت خاطب وحتى روحتكم للمنصور حتى تشترون لخطوبتك زهراء كالتلي
خالد باوع لحازم وكال بغضب
خالد: راح تخليني اسبك واسب المنصور وياك، شفت شسويت بيةة؟؟؟
خالد تركنا وصعد لشقتهم وهو معصب
وحازم فرك وجهة
حبيبة: كلت شي غلط؟
حازم: منين جبتي هالكلام؟
حبيبة: كافي تلح علية، كتلك زهراء كالتلي
اجة يلحك خالد
كلت
حبيبة: عندي كلام وياك
حازم: بعدين نحجي
وراح وعافني
بقيت اباوع والدمعة بعيوني
خالد اهم مني ورحت وراه وعفتني!
.....
صعدت للشقة
احس نار شابة بية
صار بوجهي سراج
كان نازل ع الدرج
جريتو من ياختو
وكلت بغضب
خالد: قسم بالله اذا انت الك يد بالموضوع اذبحك واحسب الله ما خلقتك
كال بخوف
سراج: شبيييك هاي شبيك خالد شمسوي انا؟؟
دفعتو بقوة للحايط
وكلت بغضب
خالد: لااا انت ولا عشرة امثالك يمنعوني منهااا فاهمم؟
اجة حازم
دفعت سراج وصعدت فوك
صار بوجهي حسين
كان ماشي حتى يروح للمكتبة
كال بأستغراب
حسين: شبيك؟ صاير شي؟
باوعتلو بغضب
وكلت
خالد: سلامتك
حسين: متعارك وي احد؟
خالد: لا، بس عن قريب راح اتعارك
عقد حاجبو
دخل حازم للشقة وهو يصيح
حازم: دعوفةةةة لسراج جلبت بي؟؟ لو ميت بأيدك شتسوي؟
كلت بغضب
خالد: خلي يموت، هذا مصير كل واحد يأذيني
اباوع لحسين صافن
ما مقتنع بكلامي
راح للشغل
وبقينا انا وحازم
حازم: شبيييك تخبلت ع سراج، ما تخاف لا يكول لحسين؟
كلت بعصبية
خالد: وطز وخلي يكول ان كان هو زلمة ومن ظهر رجال خلي يحجي
كعد حازم كدامي
وكال بهدوء
حازم: سراج هو اللي مخبث عليك يم زهراء؟
كلت بغضب
خالد: شحدوا يروح الها؟ شحدووو يفكر يحجي وياها كلمة وحدة؟
صرت افشر
وحازم يسكت بية
حازم: كافي كافي شبيك تخبلت
كمت اصيح
وكلبت الغرفة كلب
خالد: انااااا ليييش هيج حظيييي اعوج وياهاااا ماادريييي، اجيبها منا اخليها هنااا ما ترهممم
لزمني حازم وهو يكول
حازم: قسم بالله اذا سمعك حسين هسة يذبحك هنااا، انت ليييش مستخف بي؟
خالد: وين حسين؟؟ انا اريد اكلو وينو
حازم: لتصييير غبي، حصل موافقتها اول لان حسين اذا عرف يخرب الدنيا
كعدت ع السرير
لزمت راسي
كعد حازم يمي وكال
حازم: مو المهم هسة كل هاي الهوسة، المهم منو وصل الها الكلام
صفنت
وتذكرت حسين من لح وياية ع الخطوبة
كلت بتوتر
خالد: حسين، حسين هو اللي وصل الكلام
حازم: بربك تحجي صدك؟
خالد: بذاك اليوم لح وياية هواي ع الخطوبة وانا شفتو بالليل راح ع زهراء يعني هو
اباوع لحازم كال بتعجب
حازم: وليش حسين يوصل هالموضوع لزهراء؟!
باوعلي بصدمة
وانا باوعتلو بنفس الصدمة
كال
حازم: مستوعب؟!
كلت بأرتباك
خالد: يعني حسين يدري؟!
حازم: ويريد يتأكد
ضربت ع راسي
كام حازم
كلب ميز الملازم وصاح
حازم: انعل ابوكم لابو هالدكة الناقصة، والله لتوصلونا لدرب ضيق، كتلك اكعددد واسكت لا تبقى تستفز بي، مناااا سراج عندة علم ويهدد بيك ومنا حسين يوم بعد يوم يتأكد
صحت
خالد: كااااافي، لا تصيييح وتهوس فوك راسي، انا ما سويت شي
حازم: شتسووووي بعد ما تكلي شتسووي؟! كل هذا الصاير وتكلي ما سويت شي؟؟
صرت افرك بوجهي
كلت
خالد: انا ضروري احجي وي زهراء
كال حازم بتعجب
حازم: شكلت عيني؟! شتفضلت اغاتي؟!
كلت بعصبية
خالد: حاااازم لازم اوضح الهااا ان الموضوع غلط وانا مو خاطب
حازم: بين هاي الهوسة كلها هذا الهامك؟ وحسين اذا اجة وواجهك شتكلة؟
كلت بتوتر
خالد: راح يتفهمني، انا حبيتها وهالشي مو بيدي، بعدين انا ما غلطت وياها ولا حاجيتها، راح يتفهم ارادتي الها لان فوتني لبيتهم وكال احنا اهل
حازم رفع حاجبة بتعجب
حازم: انت متأمل بهالكلام؟! غريييب ما نعرفة بالشارع يكول احنا اهل ويفوتنا لبيتة ويكرمنا، بس مو معناها ينطيك عرضة
دمعت عيوني
خالد: ليش انا مو كفو؟
كال بتعب
حازم: لا اله الا الله، خوية انا تأخرت عن شغلي وانت رتب الهوسة الصارت ونام، جمع نوم من هسة لان حسين اذا تأكد راح يبوك النوم من عينك
طلع وعافني
انا شسويت بروحي؟!
اجتني رسالة ع الموبايل
من اخوية
كاتب بيها
: اكو تعرضات هالايام ع حديثة والوضع مو زين، لا تجينا ابد ابوي هيج يكول
كعدت بالكاع
لزمت راسي
كلشي حيكون بخير..
كمت رتبت الغرفة
كنت كوة اشتغل
لليل انا ارتب بيها
دخل حسين للغرفة
كان تعبان
تمدد ع سريرة وكال
حسين: عبالك ما رحت لشغلك
خالد: لا
حسين: اجرت المحل؟
خالد: اي، ودفعت فلوس المواد وحاليا انتظرها توصل
حسين: والعمال؟
تنهدت
خالد: صديقي عندو عمال بالمحل ما يحتاجهم راح اخليهم بمحلي وهو ضامنهم الي
حسين: اكو شي مضوجك؟
باوعت لحسين
وكلت
خالد: ليش تسأل؟
حسين: احسك ضايج
خالد: اذا كتلك عن المضوجني راح تفهمني؟
حسين: حسب ظرفك
دخل حازم للغرفة
وهو يكول بأنزعاج
حازم: تتزقنبون العشة وتكومون غصبا عنكم نلم فراش الشقة ونرتبها لان البك اكلني وميت حر
كعدت ع سريري
كال حسين
حسين: العشة علية واحس روحي تعبان
حازم: ما تذبة براسي كلنا تعبانين كوم سوي عشة حتى نخلص وننظف الشقة وننام مرتاحين
حسين كام بدل
بعدها راح للمطبخ
حازم اجة يمي وكال
حازم: مخبل انت؟ كاعد تشكي لحسين؟
خالد: ماادري، كلت يمكن اذا شكيتلو راح يفهمني وشوي شوي اشرحلو الموضوع
حازم: كل انسان غيور من توصل السالفة لأختة يتحول وحش مستوعب هالشي مو؟
تنهدت بتعب
احس كلبي يوجعني
كلت
خالد: اجيبها منين واسدها منين؟ الرسالة الاجت من اهلي خذت نص حيلي، هسة صح قاطعتهم بس مااكدر ع اذيتهم
صفن حازم وكال
حازم: رسالة!
باوعتلو وكلت
خالد: شبيك؟
حازم: اصبر
راح لغرفتو ورجع وشايل بأيدو ظرف
كال
حازم: انت مراح تكدر تحجي وياها، اشرحلها كلشي بهذا الظرف
ضيقت عيوني
خالد: وين احنا بالثمانينات واكتبلها رسالة بظرف!؟
حازم: انت ما تكدر تحجي وياها ولا هي تسمحلك بهالشي، اكتب كلشي تحس بي هنا وانطي الها وبعدها تخطبها
حسيت كلامو صح
اخذت الظرف منو وكلت
خالد: ما متفائل بظرفك، بس ان شاء الله
طلع من الغرفة
وبقيت بوحدي
فتحت الورقة
لزمت القلم
احس ايدي ترجف
مو ضعف
حب..
مااعرف شكتبت
لكن حجيت هواي
ووضحت كل مشاعري
وما كانت الرسالة تخلو من اسمها
كتبت اسمها هواي
لان احبو
طبكتها وضميتها بالظرف
صاروا يصيحوني ع العشا
ضميتها جوة المخدة يم الملزمة
وطلعت..
كعدنا نتعشة
سراج عازل اكلو ع صفحة
ياكل ويشمر حجي لحسين
وحسين كل شوي يريد يضربو
ويكعدو حازم
انا كنت بغير عالم
بالي يمها
حيل تغيرت من سمعت بية خاطب
معقولة تحبني
فزيت ع اصواتهم
وهمة يتعاركون
حازم: مو جاااي اكلك المطبخ علية؟؟
سراج: حضرة جنابك تنظف بس المطبخ واحنا علينا الشقة كلها؟ خوش عدالة
حسين: انا عندي اقتراح، انا انظف الغرف لان مااحب اكسر الاغراض نفس بعض ناس
وباوع علية
كلت بتعب
خالد: اهووو شحيخلصها وياك عمي اجيبلك درزن ترب
حسين: وخالد ينظف الصالة وحازم ينظف المطبخ وسراج ع الحمامات
كمز سراج وكال
سراج: لو تطلع نخلة براسك
حازم: جا تتبادل وياية بس تنظف الثلاجة والماعين وتجلف الطباخ وتلمعة لمع
سراج: اهووو
بلشنا شغل
وانا بلشت ارفع فراش الصالة
حازم يصيحني من المطبخ
حازم: اذا كلبك يوجعك كلي اساعدك
خالد: لا عادي مابية شي
سراج: ديلا هي صالة بكد العباية مسويلياها شكبرها كلي وخابرني ودزلي رسالة
ذبيت الوصلة من ايدي
من تذكرت الرسالة!!
حسين جاي ينظف الغرفة
والرسالة جوة المخدة!!
احس كلبي وجعني
باوعت لحازم بخوف
ومشيت للغرفة بثقل
وكفت بالصالة اباوع
كان حسين واكف يم سريري
شايل الظرف بأيد
والملزمة بأيد ثانية!
كانت لحظات معدودة
بين الحقيقة والنكران
وبينها كنت انا
انهدر هنا وهناك
وتشقيني رسالة...
.......
كل اللي وصلت الة
كان سببة رسالة!
باوعت لعبدالله
والدمعة بعيوني
وكلت بخنكة
روناك: تحليل حمل؟!
وكف كدامي
كال بعصبية
عبدالله: كلمة وحدة ما اريد
كلت بغضب
روناك: ما راح اسوي، تريد تقتلني اقتلني
طلعت من المختبر
لحكني
جرني بالشارع وصاح
عبدالله: اذاااا ما تفوتين تسوين تحليل تدفعين الثمن غالييي انا لحد هسة بوعيي ترااا
دفعت ايدة وصحت
روناك: انتتتت انسان مو صاحي، انت مريييض وفوك مرضك تتهم شرفييي
رفع حاجبة بتعجب
كال
عبدالله: اتهم شرفج؟! يعني ع اساس انتي شريفة
صحت
روناك: واشرف منك ومن اهلك
جرني بقوة
دفعني للسيارة
صعد وصار يسوق بسرعة جنونية
وهو يكول
عبدالله: انا اشوفج الشرف بعينج يا شريفةةة
صرت اصرخ
وهو يصيح علية
روناك: انتتتتت مخبلللل
عبدالله: انتيييي خدعتينييييي
صرت ابجي وارجف
وكفنا بشارع يم عمارة سكنية
نزل وجرني من السيارة
صحت وانا ابجي
روناك: ويييين جايبنييي
باوعلي بغضب
عبدالله: اشوفج حقيقتج بعينج
روناك: حقيقة شنووو انت عن شنو تحجييي؟!
سحبني من ايدي
صعدني فوك وفتح شقة
دفعني ودخل وقفل الباب
كال بغضب
عبدالله: انا مراح اسويييلج شي، بس جاوبيني منووو هذا الحامل منةةةة وتخافييين تواجهييي
فتحت عيوني مصدومة
صرخت
روناك: انتتتت شنوووو مخبل؟؟ عن شنووو تحجييي
دخل للغرفة
اجة وشايل بيدة الصندوق
فتحة وشمر الرسائل بوجهي
وهو يكول
عبدالله: وجاااايبلج ذهب همممم
فتحت عيوني
وكلت بضياع
روناك: ضوية!!
كعد كدامي
كال بخنكة
عبدالله: بس جاوبيني ليش، بس كوليلي ليييش مااريد منج اي شي، بس كولي ليش كذبتي علية وليش سويتي هيييج بيةةة تخبلت بسببج عفت الدنيا كلها علمودج تاليها طلعتي بلا شرف؟!
صارت توكع دموعي
كلت بخوف
روناك: عبدالله مو اني والله مو اني، ه، هذا الصندوق مو اليي
صاح بقوة
عبدالله: كاااااااافييييي كذبببب
خليت ايدي ع راسي
وصرخت
روناك: والررررب مو اليييي
باوعتلة وانا ارجف
لزمت ايدة وكلت
روناك: هذا لضوية والله، تعرفها؟ هاي صديقتنا الماتت
جرني من شعري بقوة
وكال بغضب
عبدالله: ضويةةة موو؟ والمكتوب بي؟؟ اسمعج
دفعني
فتح رسالة
وصار يقرة
عبدالله: ضوء حياتي، نور ايامي واشراقة الصباح، هاي الكلمات لصديقتج مو الج مو؟
ضربت وجهي وصرخت
روناك: لا تبقى تتهمممم بيةةةة هذا الهاااا مو اليييي
اقترب الي وصرخ بوجهي
عبدالله: معنى اسمممج بالكوووردي الضوء والاشراق والنور، كلبت كل الرسايل اسم واحد غير هالكلمات ماكو، انتي تضحكين ع منو؟؟
جمدت الدمعة بعيني
عبدالله: وفوكاها غلطانة وياه وحاسة روحج حامل؟! كل هذااا صاير واناااا ما ادري؟! ليييش ما تكولبيين ليش
بقيت صافنة
وانا احاول استوعب
شسوت بية الحياة!
جرني من شعري
كال
عبدالله: تهزمتي مني كل هالفترة حتى ما تنفضحين مو؟! حتى مااكشفج ع حقيقتج؟!
صاح
عبدالله: بعتي براسيييي اخلاقيات واهلي واهلييي تاليها جاية تحبين وتتمعشكين؟ شوكت صار هالشي جاوبيني شوكتتتتت صار؟ راقبتج بكل مكان شلون غافلتيييني
باوعت بعيونة
حسيت بالخيبة
اسوء شي نعيشة بالحب
هو سوء الظن والفهم
وانا عشتها ثنينها وياك
شحبيت منك!؟
دار وجهة عني
ترك شعري وكام
وهو يكول
عبدالله: نظرات البراءة مالتج مراح تنطلي علية، تحجين لو استخدم وياج غير طريقة
خليت راسي ع الكاع
وصرت ابجي بقوة
وهو يصيح
عبدالله: مراح تعترفييين موووو؟!!! مرااااح تحجييين؟!
جرني من الكاع
تركتة وحاولت انهزم وانا اصرخ
روناك: انااااا ما سويييت شييي اناااا خايفةةةةة
سحلني واخذني للغرفة
شمرني ع السرير وانا اصرخ
روناك: عوووووفنييييييي
قفل الباب وهو يكول
عبدالله: ما تقبلين تحللين مو؟! انا اكشفج بروحييي
ضربت وجهي وصرخت
روناك: انتتتت مووو صاحيييي، وخرررر عنييييي
اقترب مني وهو يكول
عبدالله: حبيتج اكثر من كل الدنيا، تكسرين بية هيج؟!
كلت بخنكة وخوف
روناك: انا مو هيج، والرب داتظلمنيي
عبدالله: ليش خفتي وما ردتي تحللين؟!
روناك: انت دتطعن بشرفي، انا مو ه. هيج
صاح بقوة
وشكك ملابسي
صرت ادفع بي واصرخ
روناك: مراااااح اسامحكك ع اللي تسوييي بيةةةة، راح يجييي يوووووم تتوسل يم بابييي وما اسامحك
جرني من شعري بقوة
الدموع مالية عيونة
عبدالله: عفت كلشي واجيتج، هاي مجازاتي؟!
روناك: لا تصدكني، سوي اللي براسك بس راح اقتل ر. روحي وراح تعرف ا. الحقيقة وتندم
ابتعد عني
باوعلي بقرف وكال
عبدالله: ما اريد انكس نفسي بسلعة مثلج، شبعوا بيها واجت هنا تتمسكن، من اليوم تحلمين تشوفين وجهي، وطلاك مراح اطلكج
طلع من الغرفة
خليت وجهي بالمخدة وصرت ابجي بقوة
احس كلبي يريد ينفجر من الوجع
سمعت باب الشقة انطبكت بقوة
رفعت راسي بخوف
كمت وانا ارجف
وكعت بالكاع وانا ابجي
فتحت الكنتور
خليت قميص ع ملابسي
طلعت برا
صرت امسح الدمع واعدل شعري
فتحت باب الشقة
ادور علية اختفى
رجعت للشقة لملمت الرسائل
خليتها بالصندوق
اخذت الصندوق وطلعت
صرت امشي بالمكان بخوف وحذر
اول ما طلعت للشارع
صرت اركض بقوة وابجي
اجرت تكسي
كان رجال جبير
يسأل بية وانا بغير عالم
مااعرف شلون نطيتة الموقع
نزلت يم السكن دون ماانطي كروة!
صعدت للعمارة وانا ابجي
وانصدمت من شفت الوقت مغربية!
من الصبح لهسة انا اعيش انواع الرعب
ومو حاسة ع نفسي؟!
صرت ادك بالباب
فتحتلي عطاء الباب وهي مصدومة
دخلت لداخل الشقة
وشفت عمتي ناز وعبدالله كاعدين
كانوا يباوعولي بكره
وكأن المكان اصبح مو مكاني؟!
وبعدين؟
