رواية ارهنت عمري الفصل الواحد والثلاثون 31 بقلم نورا ناصر

احتاريت بين اسيطر ع البندقية لو اروح افزع الهم 

احس روحي صارت اثنين حسيت بألم قوي بس مااهتميت ، خليت البندقية بالكاع وسيطرنا عليها كوة 

بلحظات ورحت ركضت اباوعلهم من بعيد امي لازمه رجلها وتصرخ وعفاف لازمه مهند وبناتها ومفزوعين يصرخون ويبجون  ، ركضت عليهم محتار اتطمن على منو ..

رحت عليهم وانه اصيح لك حاااااتم شسويييت يالخبل شسووووويت .. 

رحت يم امي لزمتها اباوع مصوبه برجلها والدم من رجلها صاير على الكاع ، وتوون من الالم تعض بشفتها وتحووس متوجعه كللش .. 

باوعت الميسم وجهها اصفر كركم وشكلها مصدووومه وكاعدة ع الكاع بلا حركة 

صرخت بوجهه : شبيييج انطيني شال اشد رجل امي ..صيحت حييل  ميييسم ؟؟؟ 

ضلت تباوعلي مثل وحده متعارضه ولو هو الموقف يصدم ويخوف وخاصه ميسم انثى رقيقه مثل جنح الفراشه...

بس عصبتني بتصرفاتها مو وكتها صفنتها كلش...

بلحظة شفتها تمددت علئ الارض ومدت ايدها 

ولزمت بطنها بقوة منهكة ووتون...

انصدمت شبيها خربت يمكن من هول الموقف

صاروا الناس يجوون وحاتم واكف يدك على راسه 

بلحظة الكل صار بالطارمة مالتنه ، اجو عمامي عمي منصور ورياض وولدهم وعمي ابو اسعد وسيف همينه اجو على الصوت مال الطلق . 

ركضت علئ ميسم باوعت على بطنها  شفت ثوبها مزروووف ومخترق بطنها انرعبت ...ميييسم متصوووبه وببطنها بس دم ماكووو

لاااااا لاااااا اكيد صاااار عندها نزيف داخلي .. 

وكف يمي سيف وعمامي .. ظل سيف يكوم بيها ويحاجيها بس هيه بغير عالم وبس صافنه بالوجوه 

بعدته عنها بقووة .. 

لزمتها ضربتها على خدها وبعدها حطيت اديه على راسي بضياااع ادييه ترجف والصريخ مال النسوان احسه صداه باذاني...

باوعت امي ماكو ، ماحسيت عليهم من شالوها 

صرخت وين امي وين امي .؟؟ 

عمي جاوبني وديناهه للسيارة ، هاي ايدك جاي تنزف تصوبت شنو ولكم شمصخمين اليوم شجاكم ؟ 

تجاهلته وركضت لميسم سيف يمها يكعد بيها ، دفعته وشلتها بين اديه مثل حمامه مكسور جناحها...

شلته وانه ادردم والله وحك من رفع سابع سما اليوم حويتم انومك بصف جدي ...لكيت ابن عمي  جايب السياره كالولي  أركب أركب هنا ، صعدتها  بالسياره وحطيتها بالورا  احسها يبست بدييه وعيونها سدتها اريد اكدر الزمها ماكووو صارت مثل الخشبه بين اديه وحتى ما عرفت شلون اخليها بالسياره ثكل جسمها حييل..... 

خليتها وانه كلبي يرجف وخايف لا اخسرها طلعت راسي وسألتهم ولكم امي وين امي وين ؟ 

كالوا طلع بيها عمي رياض للمستشفى كبلنا .. 

اريد اصعد بالسيارة شفت مهند واكف بالباب ويبجي 

خفت لا طاكته شضية لو رصاصة لو اي شي معوره 

ركضت عليه اتلمسه ، لزمت وجهه بين ايديه واباوع بعيونه : مابيك شي وليدي هاا مابيك شي ؟؟ 

عفته بعد ماتاكدت مابي شي وركضت للسيارة اريد اصعد شفت سيف صاعد يم ميسم ، ويكعد بيها باوعلي خزرني بتحدي ،  صريت على اسناني وخزرته ..

رحت عليه اركض فتحت باب السيارة 

جريته من ايده واصيح عليه اطلع ياكلب اطلع ياجبان كل الي صار بسببك ومن جوا راسك . 

دفعني ورجعت دفعته اريد اضربه اجه ابوه وعمي واولاد عم ابوي فاككونا .. 

عمي كال مو وكتها البنية راح تموت وترا سيف رجلها وهيه على ذمته مالك حق تمنعه .. 

كلهم ايدوه ركضت صعدت بالصدر وهو صعد بالورا 

حجيت ويا ابن عمي يلله دوووسلها باسرع ماعندك

....  

ساق السيارة بسرعة وانه بالي يم امي مرة جبيرة خاف ماتتحمل وبالي يم ميسم وكلساع ادور اباوع عليها فاقدة ومغمضة عيونها ووجهه عركان كلش مبين ارتفعت حرارتها ، وهذا سيف مسوي نفسه حنين على تالي وكت لازم كلينس ويمسح ووجهه وركبته 

تمنيت اكسر ايده واشمرها لشي جلب مسعور سايب من الجامة . 

باوعتله ومديت ايدي اله وخر ايدك الوصخة عنها وبس تطلع منها سلامات تطلكها ورجليك فوك ركبتك افتهمت ؟؟ 

كال مرتي وكيفي وجاي ارجعها ومااخذ الاوامر منك .. 

ابن عمي كال ياجماعة صلوا على النبي خلي نوصل للمستشفى سلامات لاتنكلب بينا ترا جاي تأثرون عليه صدك جذب منكم . 

جريت نفس بضيق ، وكورت قبضة ايدي بغضب ، وفتحتها طلعت تليفوني خابرت على خواتي ورجالهن 

كتلهن تعالن للمستشفى ، طلع عدهم علم بالموضوع لان اغلبهن متزوجات ولد عمي ونفس المنطقة 

وكلهن متوجهات للمستشفى حاليا . 

وصلنه للمستشفى نزلت فزعتهم جابولنا سديه خليت عليها ميسم ، تفتح عيونها وتسدهم وتون ونينها زرف كلبي متألمة كلها بسبب الجبان حاتم وهذا الكلب اليمي 

سيف . 

اخذوها رأسا شافها الطبيب وطلع كال حضروا غرفة العمليات ، شفتهم دخلوها لغرفة العمليات ، وخابرت على عمي اسأله عن امي كال رصاصة طابه برجلها

وراح يسوولها عملية يطلعون الرصاصة .. 

شون يوم اسود هذا الله لاينطيك حاتم ، دقايق انترست المستشفى بكرايبنه ، اجو خوالي وخالاتي وخواتي ، بقيت محتار ساعة اتطمن على ميسم ساعة على امي . 

اجه عمي ابو اسعد  كالي ترا ايدك جاي تنزف 

باوعتلها ومااهتميت ، رجعت باوعتله 

عمي اذا طلعت ميسم بسلامة خلي ابنك يطلكها ترا كل الي صار اليوم هو السبب ، ميسم لجأت الي حتى احميها من حااتم وماخلي يجبرها ترجع لابنك المصون .

سيف سمع الكلام واجه يمي يحجي : اي بس حاتم ماكال هالحجي ترا هو كال تعالوا اخذوها اقتنعت ترجع وعمي الشيخ كايله يخابرنه حتى ناخذها . 

خزرته : تدري اذا صار بميسم شي اخذ روحك بدل منها ؟ الروح مقابل الروح افتهمت ؟ وحاتم جذاب ماتصدك منه حجايه اله اذا انت خبل مثله .

سيف : اشوو احترم نفسك انت لاتدخل نفسك بيننا وبعدين بصفتك شنو دتحشر روحك مشاكلنا احنا نحلها ممحتاجين نصايحك . 

اريد اخنكه تدخلوا عمامي 

كالوا عيب مستشفى وعالم مرضى احسن يصيحون الامن ويطلعونه بره المستشفى .

اخذني عمي ويمشي بيه .. تعال ابو مهند ترا ايدك تنزف لايصير بيك شي تعال يفحصوها الك خاف هم متصوب .؟ 

كتله لاعمي جرح بسيط يمكن شضية لو رصاصة شاطحة خلي اتطمأن عليهن يله اروح عود .. 

لك لاتعاند امشي شبيك بايع روحك وبعدين هنه نسوان بسبع ارواح كلشي يتحملن وهم اذا طلعن سلامات امك تحتاجك اكيد انت وليدها الوحيد وذاك الكلب سعيدان متبرين منه احنه .. 

باوعت لساعتي بعد نص ساعة ويطلعن من العملية 

رحت  وياه شافني الدكتور فحصني كال ماكو رصاصة بس جرح سطحي وتحتاج خياط ، دزني للمضمد خيطها الي .. 

خابرت على عفاف بالي يم مهند وصيتها عليه 

كالت لا يظل بالك زين مابي شي يمي ويا بنياتي يلعب ..

الحمدلله ماادري شلون الله طلعه سلامات هو طفل ومايتحمل جسمه ترف  اذا لاسمح الله جايه بي طلقه جان هاي هيه مستحيل يعيش صدك الاطفال احباب الله والله احاطه برعايته وحمايته وكت الحادثة 

والا مستحيل راح اتحمل يصير بي شي .. 

هذا وليدي االي انتظرته يصير بحظني على شف وعطش يله صار الي ربي يحميه وبقى بس اتطمن على ميسم وامي ..

طلعت امي من العملية ورحت شفتها جانت تعبانه حييل بوستها من راسها وايديها ..

يمه الالم بيه ولا بيج ، حاجتني وهيه متوجعه يمه عياش شبيها ايدك ..؟ 

ابتسمت كوة عليه اريد اطمنهه عني : يمه لاتخافين فدوة رحتلج بسيطة اهم شي انت هسه .. 

سألتني عن مهند خو ماصاير بي شي ؟ 

طمنتها لايمه مهند مابي شي طيب بقى بالبيت خابرت عفاف وكالت زين وساكت و بس يحجي بيج صيري زينه حتى ترجعيله متعود عليج هو . 

غمضت عيونهه وعضت شفتها بألم 

كالت بعد عيوني شعندي غيره .. 

ابتسمت بوجهه ها يمه جا وانه ؟ 

كالت انت الروح والرية يمه هم زين اجت بيه الرصاصة ولا بيك ..

_ اششش يمه عفية لاتكولين هيج اروحلج فدوة .. 

_يمه انت ايدنا وانت رجلنا منو لابنك منو لبنيات اخوك الي عافهن وشرد . 

_ تاج راسي انت واشيلج ابطن عيني يله هسه ارتاحي بعد لاتحجين ولو صوتج ماامل منه واريد اترس اذاني بي وفرحان جا سمعته  بس اخاف عليج ارتاحي راح اخليهم ينطوج مسكن نامي وارتاحي . 

كمت على حيلي وصيت اختي عليها وطلعت حاجيت الممرضة ووصيتها على امي وتوجهت لميسم 

جان توا طالع الدكتور من يمها ، رحت سألته 

كال ماكو رصاصة ابطنها بس جرح خيطنه مكانه .. 

وعافنه وراح بقيت صافن شون ماكو رصاصة ، يله هو دكتور ودارس واعرف من عدنه كلنا .. 

لزمني ابن عمي واخذني على صفحة 

ها حيدر خير شنو ؟ 

همس الي ترا حاتم لزموه الشرطة .. 

باوعتله كلت بجهنم ان شاءالله واذا ماتلزمه الشرطه انه بيدي انهي بس شعجب ومنوو مبلغ ؟ 

_ خوالك بلغوا عليه وهذا واحد منهم ضابط من كرابة امك بنفسه راح اخذه للمركز .. 

_ ها اي عرفته يستاهل والله الي سواه موشويه هالجبان كل يومين وثلاثة وجايني يهد وهاي نتيجتها بس والله متحلف بي انه بووويه الي سواه اليوم مايتسوا .. 

_ اكلك هو متعمد هيج يسوي وضربهم ؟ 

_ مطي الي يكلك اول مرة يلزم سلاح بس شنسوي مكتوب علينا نعيش هذا اليوم . .. 

عفت ابن عمي ورحت لسيف جان واكف وميل روحه يهز برجله

كتله ها يمته تطلكها ؟ 

عدل وكفته ولزم ياخة قميصه وظل يجر بيها  ... 

مااخذ الاوامر منك انه خووش ؟ 

اجه ابوه لزمني من ايدي كال انه ماريد مشاكل ومدام وصلت للسلاح وصار بيها دم راح اخابر اخوي الشيخ عزام واترخص منه واخلي سيف يطلكها .. 

سيف باوع لابوه مصدوم كاله مو انتوا بكيفكم تزوجوني وكيفكم تطلكوني موو ؟ ترا اذا اطلكها اسافر وبعد بعمركم ماتشوفوني .. 

اي يابه طلكها البنيه ماتريدك وخطية وصلت للموت بسببنا هسه بس نتطمن عليها من دربنا نطلع لبغداد جيتنه سببت مشاكل هواي احنه في غنى عنها 

واذا تريد تسافر سافر انه تعبت منك ومن مشاكلك ياريت تسافر وتخلصني . 

لا عمي ماترحون هسه ابقوا خلي تطلع ميسم سلامات وتصير زينه فد جم يوم وخلي يطلكها ابنك لايدك بينه الناقصة يسافر ومايطلكها وتبقى معلكة .. 

سيف بصياح ما اسمح الك اني مو ناقص الزم حدودك . 

لا بلله لك انت اكبر ناقص وربي نسيت شسويت بيها مو ضميت عنها خبر زواجك الاول .. 

ظل يضرب على صدري بظاهر كفه : حباب شي متعرفه لاتدخل نفسك بي خليك بعيد احسن اطلك ما اطلك معليك انته .. 

لزمت ايده اريد الويها لويتها ودفعته اجو عمامي فرقوا بيننا ..

طلعوا ميسم من الافاقة ونقلوها لغير ردهة .. ورحت اشوفها .. 

كلبي صار يقطر دم على حالتها .. 

رحنه تجمعنه يم باب الردهة الي دخلوها بيها واختها فاتت وياهه ، سيف وعمي رادوا يفوتون وانه وراهم

الممرضة تريد تطلع كالت رجاءً لا كلكم فوك راسها ترا تعبانه خطية والدكتور مايقبل ممنوع بسرعة شوفوها وطلعوا .. 

لزمت سيف كتله لاتطول يمها خوش بسرعة اطلع شوفتها الك لتزيد المها . 

كام فلت ايدي منه وطب جوا ... 

الممرضة شافتني معصب كالت تفضل خويه 

يمكن خافت مني دخلت بسرعة وراهم 

ميسم بس فتحت عيونها وشافته دارت وجهه 

هو كال حمدلله ع السلامة ميسم .. 

بصوت متردد .. 

عمي كاللها بنتي لاتضوجين روحج ومحد يجبرج على شي احنه هسه رايحين ومن تصيرين زينه المرة الجايه ان شاءالله نمشي باجراءات الطلاق ماتردينن مو لازم والله انه ماردت نوصل لهاي الحالة ابد بس شنسوي الله يسلمه حاتم والله يسامحه ان شاءالله .. 

امام صمت ميسم اخذ سيف وكاله يله يابه نروح ورانه طريق طويل ملازم نبقى هنانه بعد مالنا مكان بعد الي صار . 

طلع محني ظهره ، تقربت من ميسم باوعتني 

نظراتها كلها تعب وحالتها تصعب ع الكافر 

ظليت اطمنها بالكلام تصيرين زينه وتكومين على حيلج بس تحملي يبويه والله خوفتينه عليج .

تمتمت بنبرة كلها الم : مهند و عمتي ؟ البنات حاتم محد صار بي شي ؟ 

_ زينين زينين يا ام قلب الجبير لايظل بالج .

غمضت عيونها بألم ، كمت على حيلي وطلعت من يمها الليل كله هيه مانامت موتها الالم بس توون 

امي اكبر منها مو هيج صار وياها بس هيه حالتها عجيبه وكلساع يجي الدكتور يشوفها ويحجون بيناتهم 

وينطوها بهالمسكانات .. بقيت قلق عليها كلش ..

صبح الصبح يله مشيت لبيتنه بعد مانامت ميسم وتطمنت على امي ، وصيت عمامي عليهن 

وكلت ابدل وارجع .. 

طبيت لبيتنه سمعت عفاف جاي تحجي بالتليفون .. 

وتصيح طلكني وانسى عندك بنات افتهمت شكو مخابرني بعد سوايتك هاي ها ؟ مااستحيت على وجهك كل شي جاي يصير انته سببه .. 

سكتت شويه وجنها تسمعه شنو يحجي وردت جاوبت

اي هاي انه عفاف شبيك مستغرب مو جنت تصكع بيه وتهيني وتذلني عبالك تدوملك ترا مادايمه لاحد لاتشوف نفسك زايد .. 

كحيت و طبيت للهول هيه باوعتلي 

كتلها هذا سعيد ؟ 

كالت اي وزفرت نفس 

_ انطيني احجي ويا .. انطتني التليفون وايدها ترجف .. 

خليته على اذني وحجيت ارد اطلع حركة كلبي بي .. 

ها ولك كلب وهم الك عين وتخابر رووح التهي بال**** مالتك ولا تخابر وعفاف اذا تريد طلكها لان مرة شريفة حقها ماتريد تبقى على ذمة واحد گ****

مثلك .

اجاني صوته يتوسل ؛ خويه الله عليك انه غلطت وندمان مشتاق لبناتي وسمعت من ولد عمي الي صار بامي رايد  اجي اشوفها مارايد شي بس ترضى عليه امي .. 

_ اسكت كلب جبان ارتاحيت هسه والله اسويك نصين اذا لفيت ، اذبحك مثل الديج من يذبحونه ماتشرف بيك اخو وبعد ماريد اسمع بيك مخابر يله ولي . 

سديته بوجهه وكعدت ع القنفة افرك بوجهي بتعب 

اجاني مهند يركض حضنته وخليته ع رجليه 

اجت عفاف مدنكة وتلف بطرف شالها .. 

طمنتها كتلها الي تردينه احنه وياج .. 

ماريد شي بس ماريد ابقى على ذمته وميخالف ابقى يمكم هنا اربي بنياتي ؟ 

جاوبتها بثقة انت شتكولين ام بنين احنه برا وانت جوا بيتج هذا احنه ماشفنه منج بس الخير لانفكرين هيج ولا حتى تطلبين بيتج هذا مو كافي امي تحبج وتعزج والبنات بناتي الله شاهد مافرق بينهن وبين مهند اخذ من ايده واحط بيدهن . 

ماتقصر خويه خطية مهند والبنات البارحة ماناموا ارتفعت حرارتهم وبس يرجفون اثر عليهم الرمي والهوسة مالة امس . 

باوعت لمهند لزمته من خدوده وبسته والصغيرة بنت عفاف مجلبه برجلي رفعتها وخليتها بحضني وبوستهم . 

سالتني عفاف عن امي وميسم  

امي زينه بس ميسم حالتها موخوش ..

كمت سبحت وبدلت حاولت انام بس ماكدرت اغفى 

عيني ماتجيها النوم فكري كله يمهن .. 

كمت رجعت مرة ثانيه للمستشفى ..