رواية ارهنت عمري الفصل الثاني والثلاثون 32 بقلم نورا ناصر

 فتحت عيوني من شدة الالم ، احس حمم تجويني ببطني ، نار مشتعلة ماتنطفي ، خليت ايدي على بطني 

رغم توجعت من العملية بس الالم الي بجوفي وجعه اشد . 

حسيت بالحجية يم راسي واثنين من اخواتي 

لزموا ايدي ووخروها عن مكان العملية 

زمن اختي كالت لاتنلجم عمليتج .. 

باوعتله متألمة راح اموت من الالم عفية سويلي جارة مااتحمل .. 

كالت راح اصيح للسستر تجي تشوفج .. 

راح واجت السستر وراها ، انطتني ابرة 

وراها هدأ الالم ونمت .. 

بقيت بالمستشفى ، جابوا يمي بنفس الغرفة مريضة هم متعرضة لحادث ، مبين عمرها بالثلاثين سنة بس حالتها تعبانه وبس توون ووياهه نسوان اثنين .. 

ذبن ميانه ويا اخواتي زمن ولمياء .. 

لمياء لابسه كلبيه حمرة نص ردن وشعرها صابغته اشكر ورافعته ليفوك وهيه يلوك الها لان بشرتها بيها شكار ، وتفتر بالغرفة ومن يجي دكتور او ممرض تلبس .. اجت ام فخري ووردة يشوفوني .. 

جان وحدة من البنات الي ويه المرضة 

كالت للمياء انطينه رقم اهلج بس نرجع للبيت نخطبج لاخوي .. 

لمياء طكتها ضحكة عاليه .. 

ظلن صافنات .. 

ام فخري ظلت تفر بيدها : والله زمن يخطبون المتزوجات ويعوفون العذروات الانيقات الي مثلي ... 

جاوبتها المرة لا والله خالة انت جبيرة على اخوي نخطبله هالحليوة هاي . 

دردمت ام فخري وتكول خالة انوب خالة بعينج 

كالت الها ها شكلتي خالة ؟ 

ام فخري : ماكو شي بس ترا هاي ( وتأشر على لمياء) متزوجة وعدهه ٥ جهال . 

_ يا ولا مبين عليها ... 

اجت لمياء تركض لجنطتها تريد تطلع تليفونها 

سالتها زمن شبيج :؛

جاوبت بنبرة مرح اروح اخابر كاظم واكوله خطبوني بالمستشفى خلي يحمد ربه ويشكره على جمالي والنعمة الي مامقدرها . 

كالتلها ام فخري كعدي ويسكتي لا يجيج يسحلج سحل من كفشتج الصفرة جنها ذيل مال ببغاء استري على روحج كافي علينا ميسم مصوبه مانريد يصيرون اثنين . 

لمياء متجاهلتها وجاي تخابر على زوجها ..

جاوبتها زمن والله خوش تنصحين صايرة ام فخري .. 

خزرتها وكالت جا شعبالج .. 

لمياء كالت لزوجها خطبوني بالمستشفى شافوني حلوة واخبل عبالهم مامتزوجة ولا مخلفة . 

جاوبها : وليش جاي تكليلي ؟ ترديني اخطبج من جديد بت محروك الصفحة مو متزوجين احنه وعدنه خمس جهال . 

_ لاتغلط على ابوي احذرك .. 

_ هسه عوفينا منو سعيد الحظ الي خطبج ؟ دكتور ضابط فد شي مهم ..

_ ها لا اخو وحدة من المريضات ..

_ ومكيفة وفرحانه وجايتني تركضين تبشريني هنيالي عليج والله ..

_ اي طبعا هنيالك منين تحصل هيج وحدة مثلي 

_ هاي لو خاطبج واحد دكتور جان شسويتي ؟ 

_ جان هلهلت بنص المستشفى .. 

_ الليلة منو منكم تبات يم ميسم ؟ 

_ زمن وانه ارجع .. 

_ لا لا ترجعين ظلي يمها ومن تطلعون من المستشفى من دربج لاهلج يله مع السلامة . 

سديت التليفون وظلت تلوح بقبضة ايدها بالهوا 

وتكول ايييه هم زين حركت دمه .. 

كالتلها زمن ولج خاف يسويها صدك ؟ 

لمياء : مايستغنى عني ادري بي ولا يغار ابد جنه قالب ثلج من كد مابارد .. 

انوب ام فخري ذبت ميانه وياهم وصن خواتي على مريضتهم واخذن ام فخري ويردن يرحن ..

سألتهم زمن وين رايحين ؟ 

_ رايحين نصعد بالمصعد فد وناسة ... 

راحن ورا شويه اجن ووراهم نسمع صوت صياح 

مسؤؤلة الردهة وهنه مدنكات وخربانات ضحك .. 

وذيج تصيح عليهن وترزلهن شعدنه زحليكة مسويات المصعد مدينة العاب ياصاعدات يانازلات جهال انتن ..

مو مخلينه للحالات الطارئة اذا عطل وهم كلتوا ماكو مستشفى بيها خير وانتوا ماتخافظون ع الاملاك العامة والله هسه الي الكفها مو يم المريضة مالتها اله اطلعجن برا المستشفى والزيارات يله خلص وكتجن لايجي الدكتور ويحاسبنه .. 

كامت وردة بوستني والحجية خطية بس تبجي عليه 

هم بوستني واخذن ام فخري وراحن . 

وهيج مر الوقت بالمستشفى الدكتور ماقبل يكتبلي على خروج حالتي مو تمام الالم مافارقني بقى مداهمني طول الوقت الى ان ينطوني مسكن وانام . 

كعدت على صوت صريخ قريب عليه كلش 

متت من الخوف وكعدت ارجف بس اريد اعرف شنو صار .. 

شفت لمياء وزمن واكفات ويبجن .. 

   والي ويه المريضة يصرخن ويحجن ... 

الي عرفته من كلامهن مريضتهن ماتت خطية .. 

متت من الخوف وانهاريت ، لزمني زمن ولمياء 

ظليت اتوسل بيهن وابجي اريد اطلع للبيت ماابقى هنا ماابقى بعد .. 

كامت زمن خابرت على عياش وتحجي وياه .. 

باوعتلها واحجي وياهه : زمن انطيني احجي وياه فدوة .. 

انطتني التليفون خليته على اذني وحاجيته وانه ارجف وابجي صوتي مكتوم ومبلل بالدموع : ابو مهند .. وكملت كلامي بجي .. 

جاوبني بلهفة ؛ عيون ابو مهند شبيج ؟ 

_ الله يخليك اريد اطلع منا ما اتحمل بعد والله اختنكت من غير شي انه مخنوكة اريد ارجع للبيت سويلي جارة ماريد اموت هنا .. 

اجاني صوته كله طمأنينه تطمن روحي وتسكن جروحي : اسم الله اسم الله افا عليج لاتكولين هيج 

هسه احاجي الدكتور واهم شي صحتج .

_ ماريد ابقى حتى لو صحتي تتطلب بقائي هنانه فدوة ماريد اريد ارجع للبيت هاي هنا ماتت البنية عفية ما اتحمل ابقى . 

_ ميخالف ننقلج لغير غرفة بس لاتبجين ومسحي دموعج لخاطري . 

هو بس كال هيج وكانه سحر غريب سيطر عليه 

امتدت ايدي لوجهي وصرت امسح دموعي بظاهر كفي واحاول انهي ماتبقى من شهگاتي . 

سديته منه وانطيت التليفون لزمن ، كامت الممرضة سدت البردة الي بينه وبين سرير المريضة االي ماتت 

وبقى صوتها بأذني من جانت توون قبل لاتموت . 

خليت ايدي على اذني اريد بس يتلاشى هذا الصوت من مسامعي ماجاي اكدر ..

للعصر قبلوا يطلعوني وعلى مسؤؤليتي .. جابولي كرسي متحرك وكوة نزلت من على السرير ..

طلعت من الردهة صار مقابيلي عياش باوعت بعيونه 

وهو ماشال نظراته من عليه ابد .. 

ووياه عمي منصور وظلوا يتحمدولي السلامة .. 

ودوني لسيارة عياش ، نزلت من الكرسي وصعدت بسيارته ورا.. 

كلساع اشوفه يباوعلي بالمرايه وانه جنت حيل متألمة بس ساكتة بس ملامحي تبين من حركاتي انو زاعجني الالم . 

نزل يم صيدليه جابلي العلاج ورجع صعد 

ظليت اعصر بيديه على لسانه كلمة تعبتك بس استحي من عمي ولا حتى كدرت اتشكر منه ، خايفة لا نبرة صوتي تفضح مشاعري الي احس بيها والي احاول اسيطر عليها المشاعر الي نمت بداخلي على غفلة مني. 

نزلت للبيت تلكتنه الحجية حضنتني حيل وظلت تبجي اخذتني للغرفة وتحجي شكول لابوج من يجي انه والله فشلانه منه خلاج امانه عندي ، ساعة السودة الي طلعت بيها من البيت ذاك اليوم ، شسوي كلولي اختج راح تموت تعاي شوفيها شمدريني عبالك صدك تموت ومااشوفها .. 

مددتني زمن ع السرير وراحت تجيبلي ملابس وانه بقيت احجي ويا الحجية ، لزمت ايدها وبالايد الثانية امسح دموعها : ولا يهمج بعد الي صار صار امر الله هذا لا اعتراض على امره . 

كالت بحقد والله خلي يولي يعفن بالسجن على هاي سوايته خلي يتعلم من اخطاءه . لو واحد منكم ميت لا سمح الله جان هسه الله اعلم بحالنه . 

اجاني الالم ببطني قوي عبالك شي يحركني جوا لزمت بطني حيييل اجت لمياء لزمتني ووزمن غيرت ملابسي 

ظلن يهدأن بيه جبرني اكل كوة وانه مالي نفس .. 

كالن علمود الدوا مايصير معدتج فارغة وانتظري هسه دزينه على جيرانه تضرب ابر راح تجيج تضربج ابرة . 

اجت وردة يمي وظلت تسولفلي علي صار وياهم 

كالت اجو اخذوا حاتم سحلوه سحل من البيت يمه شصار بيه بوكتها اجاني الم عبالي راح اجيب وانه بنص الثامن والله . 

ولج وردة راح اموت من المي ماجاي تهدا اوجاعي ابد شسوي كليلي ولزمت بطني اريد انام عليها 

كامت كلبتني ولج مو هيج تنلجم عمليتج مخبلة صيري عدل .

صرخت متألمة طبت زمن ووياها جيرانه ضربتني ابرة وغير الادويه الي اخذتها متتتت منها حسيت اخرتي قربت .. 

ايام وايام وانا اتلوى من الالم المسكنات والمهدئات بس تخلص مفعولها اظل اتمرغل شي يمشي ابطني عبالك شي حار كلش ماينحمل وجعه . 

نمت حسيت على حازم باس راسي فتحت عيوني باوعت ابوي كاعد يمي ومدمع عيونه سودة عليه .. 

كوة اريد اكوم احضنه واسلم عليه بس مابيه الالم مدمرني ومتمكن مني ، مديت ايدي اله 

اجه ابوي باس راسي ..

وظلوا هو و حازم ويسالوني عن حالتي شجاوبهم متبهذلة ميته هلكانه بعدها تخربطت كلش زاد الوجع وصرت اتألم اكثر وفقدت كلش مااحسيت بشي ابد ..

فتحت عيوني بالمستشفى ومشكلين بوريدي الكانيوله 

جنت مهدودة الحيل كوة ارمش واسمع صوت الممرضة تحجي ويا زمن بنتكم ضعيفة كلش وماتتحمل عدهه وجع بسيط لاتخافون عليها تطيب وتصير زينه . 

رجعوني للبيت وحالتي تزيد ماتتحسن ، كعدت وردة تبجي يم راسي .. باوعت عليها بعيوني لزمت ايدها 

لاتتوترين وراج ولادة لو ترحين لاهلج احسن هناك ماكو توتر عليج مبين ماراح اصير زينه انه ابد وراح ابقى هيج سقيمة الروح والجسد . 

خلت ايدها على حلكي اشش سكتي لاتكولين هيج اسم الله عليج تصيرين زينه بس تحملي شويه واكلي زين . 

تدرين شنو اتمنى ؟ اتمنى يربطوني ويشدون وياي فد تثكالة بلوك طابوك وشمروني بالشط خل اغرك واموت بسلام وارتاح كافي تعبت وربي . 

ولج ميسم شجاج شنو هالحجي هذا ؟ وهاي عود انت ماترديني اتوتر وانت كلامج يوتر اكثر . 

ابتسمت ابتسامه مغلفة بالالم وخليت ايدي على بطني وغمصت عيوني وعضيت شفتي دعيت الله لو يموتني ياخذني يمه ويرحمني لو يخلصني من هذا الالم . 

دخلت الحجية كالت يمه تحضري راح ناخذج لدكتور اخصائي كاللنه عليه عياش بلكي يطيح على علتج ..

وفعلا العصر رحنه انه وزمن وحازم وعياش 

بعد فحص الدكتور دزاني للسونار وهناك جانت المفاجأة الرصاصة بعدها ابطني ......!!!!!!

ظل عياش يدردم شبيهم ذول يشتغلون من ورا خشمهم مايادون شغلهم على اكمل وجه مدري كلهم ناجحين بالغش يعني رصاصة ماشفتها زين مافكرت شون تطلع وماكو زرف ثاني ؟ 

الدكتور جاوبه احتمال الرصاصة ممستقرة لذلك ماشافوها .. 

لا دكتور الله وكيلك يردون بس يخلصون العملية ويطلعون يسختون .. 

واستمر يدردم عليهم كال انه لو مخلي المنجل ع النار ومطلع الرصاصه بي احسن ولا هالفاشلين ..

ظل يضحك الدكتور هاي سوالف اهل كبل هسه الطب تطور .. 

_ تطور بكل مكان اله يمنه تطب للمستشفى صاحي تطلع لو بتابوت لو مسكطينك تسكط .. 

الدكتور كال سلامتكم وهسه راح ادزكم على دكتور جراح حتى يحدد الكم موعد للعملية الثانية .

خليت ايدي على راسي هم عملية ثانية لعبت نفسي خلال شهر واحد انفتح راسي واتخيط وبطني انفتحت مرة وراح تنفتح مرة الثانية اي لازم يفتحون بطني حا شون تطلع الرصاصة الله يعينج يروحي .. 

حدد موعد للعملية الثانية سويتها وبعدها فعلا حسيت براحة بس مستمرة ع العلاجات والابر صارت مثل الماي الاشربه والاكل الي اكله . 

جانوا بيت عمي ابو اسعد يتابعون اخباري اول بأول .. 

وبيوم اجت ام فخري كالت اجو بيت عمج ابو اسعد كومي سلمي عليهم . 

سالتها سيف وياهم ؟ 

كالت اي جاي وياهم .. 

لفيت راسي بالبطانية وسويت روحي نايمة .. 

طلعت ام فخري وبقيت بالغرفة تجنبت الطلعة منها ..

للعصر اندكت باب غرفتي ودخل ابوي باوعت دخلوا وراه عمي وسيف ، حسيت بقشعريرة على طول جسمي .. لزمت طرف الغطاء حييل عصرته .. ماريد اشوف سيف كارهته ، سبحانه الي خلاني اكرهه لهالحد . 

ابوي كاللهم تفضلوا . اجه عمي تقرب مني 

كال شلونج بنيتي ؟ 

همست الحمدلله من الله بخير .. 

سيف : شلونج ميسم الحمدلله على السلامة .. 

سكتت شويه يله رديت عليه .. 

عمي كال سيف يريد يحجي وياج ..

عمو مابيننا حجي الله يخليج اريد اتطلك منه انه .. 

ابوي كال احجي ويا بنيتي وسمعي منه والي تردينه يجرالج يلله ابو اسعد احنه نخليهم وحدهم . .. 

مططت شفايفي ورفعت عيوني للسكف بحركة استهزاء 

ماردت اطلع اسلم عليهم اجوني للغرفة وين اشرد بعد بس يله خل اواجهه . 

كعد يمي ع السرير وكال شلونج ميسم 

درت وجهي عنه وجاوبته مدام بعيدة عنك انه بخير والف خير . 

_ ميسم انه مشتريج مابايعج والي صار كله جان بسببج وبسبب تصرفاتج وهسه شهد طلكتها ارجعي ويايه ونبدي من اول وجديد . وانه صدكي احبج.

_ لا ماترهم سيف ماريدك انه نزلت من عيني للحضيض بعد تهديدك ضربك اذيتك الي يحب مايضرب ولا يأذي سيف انته اناني وبنفس الوقت جبان وماتكدر حتى تواجه اهلك بالشي الي تريده ماكدر اكمل حياتي وياك .

_ لا انه مو جبان اعترف صح غلطت بس جنت خايف على امي ماريدها تتأذى وهسه فعلا هيه تأذت وما دا تصحى ابد . 

_ وانت اكيد تءب اللوم عليه انه السبب شمدريني ماتريد تنتقم مني لان فضحتك بعد ابد مالي ثقة بيك انه .

كام على حيله : هذا اخر كلام عندج ؟ 

جاوبت بثقة واصرار : اي لاتحاول طلك احسن الي والك . 

_ كومي كليلهم هالحجي خل يسمعوج خل يطلع منج انت احسن . 

_ اي اكوم ليش ما اكوم ، نفضت الغطه عني وكمت وانه لازمه بطني متألمة ، جريت نفس بضيق وتوجعت .. مشه هو ولطلع كدامي ، مشيت وراه 

ورحنه للديوانيه يم عمي وابوي جان حازم كاعد كام على حيله يسندني وكعدني على القنفة . 

سيف بقى واكف كال بنبرة حزن مصطنعة : ماتريدني وهاي هيه كدامكم واسمعوا منها . 

حازم كال حتى لو هيه تريدك مااخليها ترجع الك ترا انت ماصنتها ولا حافظت عليها .

سيف : رجاءً الكلام ماموجه الك ياريت تسكت احسن دنتناقش . 

كام على حيله حازم لك هييه انت مطي هاي اختي ومانسيت الي سويته بيها ياجبان ... 

ابوي كال مو وكت عركتكم هسه اسكت حازم وخلينه نشوف دربنا .. 

عمي ابو اسعد كال : يعني مابيها مجال ماكو امل ؟ 

باوعت على ابوي اريده ينطيني اذن بالاجابة 

باوعلي بنظرات مطمئنة 

باوعت لعمي و جاوبته من يمي : لا عمو مابيها مجال بعد والشغلة طولت لا شهر ولا شهرين ياريت تستعجلون ..

_ اي هذا هو اهم شي ابوج مايزعل مني ويحسبها عليه وانت هم لاتزعلين مني .

_ لا عمو انه ماشفت منك شي مو زين والنعم منك وابد ماازعل عليك وانت هم لاتزعل عليه.

ابوي كال : هايه رغبتهم وان شاءالله احنه نبقى اهل وحبايب محد مايغلط الكل يغلط وان شاءالله سيف يستفاد من اخطائه ومايكررها بعد وانت يا بنيتي العوض على الله سلامتج وصحتج عندي بالدنيا اهم . 

كمت من مكاني وانه لازمه بطني وامشي توجهت لابوي بست راسه وايده وهو هم باس راسي وانه اباوع لعيونه الي تعبها المرض وادعي الله يحفظه ويخلي الي لان صدك ضعت من بعده وتأذيت . 

رحت سلمت على عمي وتوجهت للغرفة فرحانه 

احس عبالك جاي احلم واخيرا تخلصت من الكابوس الي جان جاثم على صدري . 

بقوا يومين يمنه ، طلكني يم السيد ومشينه باجراءات طلاق المحكمة .. 

لجميع الفصول من هنا