رواية قاتل مجهول الفصل الثالث بقلم محمود الأمين
بصيت لسليمان اخو عطيه واللي كان قاعد قدامي وقولتله
_ انت متاكد ان الجثه اللي في المشرحه دي، جثة اخوك عطيه؟
= ايوه يا باشا طبعا متاكد، هو في حد هيتوه عن جثة اخوه
_ ما اهو تقرير الطب الشرعي مش بيقول كده؟!
= معلش انا مش فاهم حاجة
_ والله ولا انا... انا هحولك للنيابة دلوقتي، لانها هي جهه التحقيق اللي المفروض تحقق معاك
= تحقق معايا ليه يا باشا؟!.. هو انا لا مؤاخذه عملت حاجة؟
_ ولا انا مش فايق دلوقتي لكلامك لو عندك اي حاجه قولها في النيابة
...
وخرج سليمان مع العسكري وفي الوقت ده دخل الرائد معتز ولقيني متصدع وماسك دماغي.. فسألني
_خير يباشا وصلت لحاجة مع اللي اسمه سليمان ده؟!
= اقعد يا معتز احنا في كارثة.. وشكل القضيه دي معقربه وهتتعبنا
_ انا مش فاهم حاجه يا باشا بس فهمني؟!
= الدكتور وليد دكتور الطب الشرعي لسه مكلمني وبيقول ان جريمة قتل عطيه حصلت قبل جريمه قتل مرات وعياله وده على حسب توقيت التقريبي اثناء تشريح الجثث، وفي نفس الوقت البصمات اللي على سلاح الجريمة وفي مسرح الجريمة، هي بصمات عطيه
فازاي قتلهم وهو اتقتل الاول اصلا
انت عارف ده معناه ايه؟!
_ معناه ان عطيه لسه عايش، وان الجثه اللي في المشرحه دي مش جثته
= ورغم كده اخوه بياكد ان دي جثة عطيه.. وانا مش عارف ده بيقول الحق ولا بيكدب، انا حولته للنيابه عشان يحققوا معاه ونشوف اذا كان هو اللي عملها ولا لا؟!
*****
كنت قاعد في مكتبي بفكر في الخيوط المعقدة اللي بقت في الجريمة، بعد ما وصلني تليفون انا كمان من الطب الشرعي وبلغني نفس الكلام اللي بلغه للمباحث.. وفي الوقت ده لقيت باب المكتب بيخبط والعسكري داخل يبلغني ان في واحد بره جاي ومترحل من المباحث للنيابة.. كنت عارف ان ده سليمان اخو عطيه.. وفعلا بعد اقل من دقيقه كان واقف قدامي وشه في الارض ومش بينطق
_ انت سليمان صح؟!
= تحت امرك يا باشا
_ انت روحت المشرحه مع رئيس المباحث واتعرفت على الجثة اللي كانت في التلاجه واكدت ان الجثه دي هي جثة أخوك
ولكن دي مش جثة اخوك يا سليمان، وانا مش هكون سيء الظن وهقول انك كذبت علينا او ضللت الشرطة، انا هقول انك اتلخبطت واتخضيت شويه مش أكتر من شكل الجثه
واكيد هرجعك تاني عشان تتعرف عليها، ولكن خلينا نفترض ان الجثه اللي في المشرحه فعلا هي جثة اخوك، وانك انت اللي قولت بنفسك ده مش حد تاني والنقطه الاخيره دي مش افتراض ده اللي حصل فعلاً
فانت المتهم الرئيسي في الجريمه دي.. وانت هنا عشان تحقق معاك في تهمه قتل اخوك ومش بعيده تكون انت كمان اللي قتلت عيلته
= قتلت مين بس يا باشا؟!.. انا مستحيل اعمل كده، اه في بيني وبين اخويا مشاكل ومزعلتش عليه لما مات لكن انا ما ليش في السكه دي انا ما ليش في الدم يا باشا
_ بس التحريات اللي قدامي بتقول ان اخوك عطيه زق ابنك من على السلم في مشكله ما بينهم وابنك وقع على دماغه مات، وقتها انت هددت عطيه بالقتل لا وكمان اتهجمت عليه ولولا تدخل الجيران كنت هتقتله في وقتها
= مش هنكر.. ده حصل فعلاً، اصل سيادتك تخيل انك تدخل البيت تلاقي الناس ملمومه وتلاقي ابنك ميت على الارض قدامك وسايح في دمه وتعرف ان اخوك هو اللي عمل كده، تقدر وقتها تتحكم في مشاعرك وتقول هتعمل ايه؟
_ كلامك منطقي يا سليمان، ولكن اخوك ميت بنفس السبب اللي ميت بابنك نزيل داخلي في المخ ادي إلى الوفاة
= صدفه يا فندم.. اكيد صدفه
_ طيب يا سليمان هترجع تاني للمباحث وهيخلوك تتطلع على الجثه مرة كمان، وعاوزك تركز كويس وتتاكد ان ده اخوك او لا قبل ما تتكلم الموضوع مش سهل، اخوك متهم بقتل مراته وعياله، يعني لو ده مش اخوك.. يبقى اخوك لسه عايش وانت هتطلع براءه من التهمه دي
= انا كده كده هطلع براءه يا باشا، سواء كان هو او مش هو عشان انا معملتش حاجه
******
النيابه حولت سليمان تاني علينا وكان الطلب باعاده عرض الجثه على سليمان، ويا اما ياكد ان ده اخوه، ياما ينفي
وفعلا سليمان جه معايا تاني على المشرحة وبص على جثه اخوك وطول المره دي ولكن بعدها رجع وقال انا متاكد يا باشا هي دي جثة اخويا
وبعد ما قال كده.. كان لازم ناخد عينه منه وعينه من اخوه ونشوف هل في تطابق ولا لا؟.. لو كان في تطابق يبقي ساعتها هنفكر في طريق تاني خالص، اما لو طلع مفيش تطابق يبقى الشخص ده بيضلنا، وعطيه لسه عايش وبيلعب لعبه كبيره اوي
وبعد ما اتاخدت العينات عشان تتحلل واتقال انه هيترد علينا في خلال 48 ساعة.. رجعت على مكتبي وكنت متحفظ على سليمان لحين ظهور النتيجة، ولكن في الوقت ده العميد ياسر طلبني في مكتبه.. كنت عارف انه مش خير ولكني روحت.. وبدأ هو الكلام
_ ايه يا حضره الظابط؟!.. الدنيا مقلوبه والكل عاوز يعرف اخره القضيه دي ايه؟!.. وانت شايف الكلام المكتوب على المواقع، ان الشرطه عاجزه انها تقبض على اللي عمل كده
= يا فندم اللي بيحصل ده غصب عننا، تقرير الطب الشرعي قلب الدنيا.. واحنا مستنيين التحليل اللي هيثبت اذا كان اللي في المشرحه ده اخو سليمان ولا لا!
_ ما لو حضرتك شايف شغلك كويس، كنت بصيت في التقارير اللي اتعمل بعد ما ظهر سلاح الجريمة وكنت هتلاقي ان السكينه اللي لقيوها مدفونه من بيت عطيه نفسه، يعني نفس نوع السكين ده موجود عند عطيه في البيت، يعني جايز القاتل كان عارف ان عطيه استخدم السكينه دي قبل كده وكان لابس جوانتي او مسكها بمنديل وبعد ما خدر مراته وعياله خلص عليهم ودفن السكينه قدام العماره وكده بصمات عطيه هي اللي على سلاح الجريمة
= كلام حضرتك منطقي وممكن يحصل وحصل في قضايا قبل كده، بس ده معناه ان اللي عمل كده حد من اهل عطيه او ليه عداوه مع عطيه
اصل ده واحد خدر مراته وعياله واستخدم سكينه كان عارف ان عطيه استخدمها قبل كده، يبقى الشخص ده كان قريب من عطيه وعيلته
_ وانت هتقعد تحلل قدامي، اتفضل يا حضره الظابط شوف شغلك وركز وقدامك اسبوع واحد.. لو القضيه دي متحلتش هتروح لحد تاني
....
كنت زعلان من كلام العميد معايا.. ولكن بعد 48 ساعة ظهر التحليل والنتيجه اللي فيه كانت مخيبه للامال.. النتيجه بتقول انه في تطابق وده معناه ان عطيه مات
واننا لازم نحقق مع اخوه لان هو المشتبه الوحيد في القضيه وهيرجع على النيابه بتهمه القتل العمد
...
ولكن قبل ما اخد اي قرار.. جت بنت في اواخر العشرينات تبلغ عن اختفاء والدها.. وانه مرجعش البيت بقاله كام يوم، وكان سايب رساله انه رايح مكان معين عند ناس قرايبهم ولما اتاخر والبنت اتصلت بقرايبهم دول قالوا ان ابوها ما جاش عندهم.. الظابط اللي بيعمل المحضر دخل البنت دي على المكتب عندي لما شاف الصوره اللي معاها.. وبعد ما البنت حكت اللي عندها اديتني الصوره عشان اشوف اللي فيها.. وهنا كانت المفاجأة..
