رواية قيود العوف الفصل الخامس والاربعون 45 بقلم ريتا

 لقاسم شد علىٰ فكة وگال ..

-قاسم: ههههه ولك وانه اگول خانسين مالهم حس ولا تشوفهم عيني أثاري العزيزين متفقين وي الك**  ويشتغلون من داخل بيتهم 

-رغد: كل شيء توقعت ألا هذا الشيء ماخطر حتىٰ علىٰ بالي ماااخطرررررر خلف ؟؟ خلف يسويهة ؟؟

-قاسم: إذا أمه غرور ليش تنصدمين من العااار

-رغد: شلون وصل اله وين عرف حامد ؟ وشلووون أتفق وياه قاااسم هذا يخاف يتحرك خطوة خنيث ما تتذكر ؟ملابسة أمه تشتريهن اله كل حركة يتحركها غرور تعرف بيها يعني چانوا يعرفون كلهم يعررفون ومخططين علينا !!

رفع راسة وهزة بثقل وگال ..

-قاسم: أكيد يعرفون أكيد بس أكو شيء بعدني ماطحت بيه شلون حامد گدر يخليه ينفذها أكو سبب

-رغد: همة يكرهونة مايردونة العائلة كلها تتمنىٰ تخلص من عندنا وأولهم أبوك وزوجتة يعني مثلاً بقت علىٰ الأولاد 

-قاسم: لا هذا مو سبب رغد ام جُمان شنو دخلها ماعندهم حتىٰ عرف بيها حتىٰ غرور تحطها براسها

-رغد: نگول مو سبب بس هم يفيدهم لو فعلاً المعلومات الحقيقية واصلة لحامد ومقدمها ضد عوف چان خسر شغلة وأتحاكم واتعاقب وأنتَ تعرف شگد غرور تتمنىٰ تخلص منه وتسوي كل شيء علمود تكسر گلبة وتطيحة بشغلة 

-قاسم: وياچ بس مو هذا السبب الرئيسي و رغد همة مو أذكياء لدرجة يتخلصون من أقل شيء يخلينة نوصل ألهم ماعندهم هاي الامكانية حتىٰ يوگفون كاميرات فندق بكبرة وكاميرات الشارع والمحلات ويحسبون حساب لكل شيء مُمكن چان يفيدنا 

اتنهدت صفنت لثواني وحچيت ..

-رغد: يعني أكو سبب واحد جاي يفتر براسي 

                                            

              

                    

-قاسم: وهو ؟ 

-رغد: يعني أكو شيء لازمة حامد عليهم ؟

حط أيده علىٰ شفايفة وگال ..

-قاسم: أو اساساً ألهم أيد ويشتغلون وياه من زمان ؟ 

بلعت ريگ وحجيت بتردد ..

-رغد: يشتغلون وياه ؟ شلوون وهاي عصابات ومجرمين وكل أعمالهم مو قانونية يعني شنو نوووع شغلهم بهاي الحااالة !!

نفخ بعصبية وهدأ نفسة وگال ..

-قاسم: هاي كلها أحتمالات رغد ما متأكدين من شيء والمشكلة راح أنزل واجب شلون راح أگدر اتحررك وأشتغل علىٰ هذا المووضوع وعوف ناازل هم ومطول 

-رغد: انتَ ماموجود بس انا موجودة 

رمقني بنظرة استغراب وگال ..

-قاسم: شلون يعني شتسوين ؟

بللت شفتي وحچيت .

-رغد: راح أرجع للبيت حتىٰ أشتغل علىٰ هاي السالفة واشوف شجاي يسوون طبتهم طلعتهم تصرفاتهم أو فعلاً مثل جاي نشك يشتغلون بهاي الأعمال!! راح أبحوش وأدور بكل كتر حتىٰ اللگالي دليل عليهم ويخلينا نعرف 

-قاسم: من كل عقلج ؟

-رغد: اي من كل عقلي لا تنسىٰ هذاك البيت الي حصة بيه يعني أفوت وأطلع منه شوكت مايعجبني ومحد منهم يفك حلگة ويااااي 

-قاسم: مو هذا قصدي بس بعد أبوي هناك وانا أدري ماتشتهين شوفتة وراح تصير حزازيات وتمسلت هواي وتضوجج غرور اگعدي وأنا أرجع وأتصرف 

-رغد: عمت عينها تضوجني غرور ؟ عليمن اليشوفك يگول أغار علىٰ أبوي من الهوىٰ حتىٰ تصير حزازيات ولا تضوجني ولا تهمني جاي تسرح وتمرح لأن محد يمها الله يعلم بعد بشنو مشتغلة وشمسوية وشنو تخطط هية والعائلة الكريمة هذا الي شفناه وعرفنا الي مانعرفة الله يستر منة 

-قاسم: هههههههههههه بوية وعلي تلسعين ولسعتج توجع وتترك أثر ماتنگدرين صااااايرة ناار 

-رغد: أحسن 

-قاسم: زين شلون راح تقنعين الحجية بروحتج وحدج لهناك 

-رغد: ما أدري أدور الي حجة وعذر ولو مايمشن علىٰ جمولة عاجنتنة وخابزتنة 

-قاسم: هاي مال حجة وعذر مشيهن علىٰ الدبة مو عليها

-رغد: أشوف شلون أقنعها أشوف انا جاي أفكر بيهم الفيديو هذا والصور والاثباتات هذن ياخذنهم سسسسحل قااسم 

            

              

                    

-قاسم: أدري بس أنا اريد أعرف النگرة مالت العائلة شنو شجاي يسوون ؟ براسي الف فكرة وشك و ياريت أحساسي يتثبت حتىٰ ضربتين علىٰ راسهم و سسحل كتل نتل وعلي 

-رغد: بس لازم نبلغ عوف ويصير عندة علم ؟

-قاسم: بلغتة أول ماعرفت ورسلت أله كل شيء

-رغد: اي وشگال ؟؟

-قاسم: گال تركوهم خطية يمكن غلطة وغلطوها

-رغد: شنوووووووووو 

-قاسم: وعلي گال شگوهم ششگ وانعلوا خير خيرهم لا ترف عينكم علىٰ كل سرسري بيهم 

- رغد: اوووف الله ياااخذهم لأن اذوه وبسببهم صار كل شيء وهسة جُمان مانعرف أراضيها حقرررررراء

-قاسم: خو همة شمروا أول حجارة بس وحق الخلقج دربهم منين ماراح يندلونة 

ابتسَمت وحچيت بحقد وغيض ..

-رغد: قريب يومج ياغرور صار قريب كلش وأخذ منج حگ وحيف سنين باقي بگلبي وتتحقق العدالة بيج .

نهض وگال .

-قاسم: حضري روحج اليوم معزومين 

باوعت أله بأستغراب ..

-رغد: وين بمناسبة شنو ؟

-قاسم: بمناسبة عرسي كلنا معزومين عند بيت أم مصطفى وخابرت الحجية وعزمتها 

-رغد: ها 

گلت الكلمة وتمددت علىٰ القنفة باوعلي وگال ..

-قاسم: أدري بنية ضيجة خلگ وين ماتلگين الج مُكان تمددتي بيه وغفيتي 

أخذت الكوشة شمرتها عليه وحچيت ..

-رغد: مالك شغل روح يم مرتك رووح

-قاسم: بعد روحي مرتي رايح إلها رايح 

فتحت تلفوني وشفت شمس هواي دازتلي رسائل وخالة ام مصطفىٰ هم تعزمني بيهن طفيت التلفون وغفيت شوية بس أريح راسي 

*****

تصلبت وجمدت من الصدمة ماتحركت ولا خطوة دب الخوف بكل جسمي صرت أتلفت بهلع وخوف عيوني تتنقل وتفتر علىٰ المُكان كُله ...

رجعت فتحت الرسالة ما مصدگة بعدني قريتها الف مرة وبكل مرة ارجع أخاف أضعاف ماجاوبتة وحضرت الرقم بسرعة حسيت صدري انقبض ونفسي ضااق وين أروح بعد ياربي وين وأخلص ليش بكل مرة يصير وياي شيء وما أرتاح 

            

              

                    

بقت حسبة تجيبني وحسبة تاخذنِي أنتهيت رجعت أم رهف مدت أيدها وقدمت الي العصير ما اخذتة بقت تباوع بأستغراب وأردفت..

-جُمان: خالة خلي نرجع للبيت تعبت اني 

-ام رهف: وين نرجع حبيبة أكو بعد أماكن قريبة نروحلهة تحصلين يروحي إن شاء الله لا تجزعين 

-جُمان: لا لا خااالة فدوة اني تعبت بعد ما أريد 

ركزت بوجهي لثواني وگالت ..

-ام رهف: شنو صار عيني اشوو وجهج انگلب لووونة بيج شي ؟؟

-جُمان: ما أتحمل أمشي مسافة طويلة اني خالة بسرعة يتعب گلبي وجسمي يتعب 

اتغيرت ملامحهة لخوف وگالت ..

-ام رهف: ها ها يله يله لعد حبيبة امشينا ما أعرف بيج هيچ اني تعبتج علىٰ فد فرة وحدة غير تگليلي

-جُمان: لا عادي بس خلي نرجع وأرتاح 

-ام رهف: صار صار يله أمشي 

أخذنا تكسي ورجعنا للبيت دخلت وياي وأمي بقت تستفسر هي صارت تحچي وياهة فتت للحمام غسلت وجهي وطلعت لگيتهم رايحين 

دخلت للمطبخ أسوي غدة حضرت كل شيء جاي أهدر بالتمن سرح بالي بالرسالة وداخلي بعدة الخوف داب بيه براسي علامات استفاهم بنهاية كلمة منو هذا منو ..

بدون أدراك وانتباه اتكئت علىٰ الكاونتر ومديت أيدي وصارت بظهر الجدرية الي صايرة جمر شاااغت روحي وصرررخت بصووت متوجعة ..

-ااااااااخخخخ 

وصلني صوت أمي المرعوب من صرختي ..

-أمل: هاااا يمةةةة جُمانة شبيييج بنيتيي

غمضت عيوني بوجع طفيت الطباخ وطلعت يمهة نصيت صوتي وكتمت وجعي وحچيت  ..

-جُمان: لا ماكو شيء ماما ضربت رجلي بالكاونتر هيج 

-أمل: ياعلي خو متأذيتي غير تنتبهين 

من گالت يا علي ابتسَمت وصفنت لثواني بسؤال چان يدور ببالي وحچيته ...

-جُمان: ماما ليش الأمام علي يطلقون عليه هذي الأسماء يد الله ، وجه الله ، عين الله ، روح الله ، سيف الله ، سر الله ؟ 

أخذت نفس ابتسَمت وگالت .. 

-أمل: ماما لأن يروون أنُ سمي بـ أسد الله لأن كانت عندة جرأة وشجاعة الأسد وما أنطاه رسول الله الراية إلا فتح الله سُبحانه علىٰ أيده وچان إذا قاتل يقاتل جبرائيل عن يمينة وميكائيل عن يسارة 

            

              

                    

-جُمان: اللهم صلِ علىٰ محمد وال محمد ياعيني هو حبيبي زين شنو معنىٰ سيف الله وليش ؟

-أمل: سيف الله لأن أهلك الله تعالىٰ بيه أعداءه فـ كان واسطة وسبب لمحي وأفناء أعداء الله بالارض .. وأكو حديث عن أنس يگول بيه صعد النبي علىٰ المنبر وخطب هواي بعدين گال أين علي بن أبي طالب ؟ فـ وثب اله الأمام علي الىٰ أن گال 

:- هذا مُفرج الكروب عني هذا أسد الله الغالب وسيفه في أرضه علىٰ اعدائه وعلىٰ مبغضيه لعنة الله ولعنة اللاعنين 

وهم ماما روي عن الأمام علي يگول :- أنا سيف الله على أعدائه وحُمَته على أوليائه.

وعن رسول الله صلى‌الله‌ عليه ‌وآله گال : يا عليّ أنت سيف الله الّذي لا يُخطئ وأنت رفيقي في الجنّة

-جُمان: دخيييلة ماما شگد مُقااتل شُجااااع 

أمل: لعد غير الأمام علي قابل شخص عاادي ؟

-جُمان: فدوه لأسمة ماما زين وألقابه الباقين عين الله وباب الله وعين الله وغيرهن ؟؟

-أمل: أكو روايات هوايه تفسر وتشير لهذي الألقاب ومنهن عن الامام الصادق عليه السلام يگول 

قال أمير المؤمنين عليّ عليه ‌السلام في خطبته : أنا الهادي، وأنا المهتدي، وأنا أبو اليتامى والمساكين... وأنا حبل الله المتين، وأنا عروته الوثقى، وكلمة التقوى، وأنا عين الله، وباب الله، ولسان الله الصادق

-جُمان: الله يا حبيبي يا أمير المؤمنين شنو هذي المكانة والعظمة ألي اله يم رب العالمين 

-أمل: لعد شوفي وأقرأي خطبتة الي خطبها بدون حرف الإلف وراح تكتشفين عظمة وعلم هذا الأنسان أكثر 

-جُمان: ان شاء الله أكيد دوختج اني ماما 

-أمل: بالعكس ماما اني فرحانة لأن دتسأليني هيج أسألة وترضين فضولج وتسدين فراغ عقلج للأسف احنة بهذا العصر والزمان ولسه أكو ناس تسب وتقذف بهذا الأنسان العظيم وبأهل بيتة بوقت الي حتىٰ الغرب صارت تقتدي بيه وتبحث عنه وعن تاريخة وصارت تكون أفلام ومسلسلات وتوثقهن للعالم حتىٰ يشوفون العرب صاروا يطعنون بيه ويشوهون بأسمة الطاهر 

أتنهدت وحچيت ..

-جُمان: الله يهديهم ماما  بس والله دائماً أسأل نفسي ليش ؟ 

-أمل: الجهل وقلة المعرفة السب والقذف الأنتقاص من هيچ شخصيات تجي من الجهلة لقلة معرفتهم وجهلهم عنهم الجهل يخلي الأنسان يتصرف ويحچي بدون علم ... لذلك اني ماريدج تكونين جاهلة وأريدج تكون عندج معرفة عن علم وثقافة وقوة وشجاعة وغيرة هذي الشخصيات النقية الجهل ظلام يا أمي 

            

              

                    

-جُمان: مُمتنة ماما 

بقينة نسولف شوية وسألتها أسألة أكثر چنت أستمع وسعيدة من زمان احب المعرفة الي عند أمي وأحب أتعلم منها وتكون عندي فكرة .. تغدينا و وشربتهة علاجهة ونفس الشيء مثل كل مرة سويت إلها مساج لرجليها وبقيت أحرك بيهم 

طلعت شوية بالطارمة گعدت أجت عيني علىٰ هذي الغرفة زميت شفتي وبقت نظراتي تحول عليها ياتُرىٰ ليش هيج معزولة عن بقية الغرف ؟ وليش مقفولة بهلشكل ؟ من أخذت البيت وسألت أم رهف ماعرف بس يمكن تارك بيها أثاث البيت وأشياء تخصة وقافلهة ..

نهضت بفضول عضيت شفتي بتوتر وگفت يم الباب مقفول وقفلة سلاسل تركتة ورحت للشباك هم مقفول بسلاسل قربت نفسي وركزت بنظري عليه مايبين شيء منه الجام مظلل 

نزيت بخوف علىٰ صوت ماما چنت مندمجة وفززتني من عيطت عليه ابتعدت عنها ودخلت جوة وأهمس بيني وبين نفسي عيب شنو هلفضول جُمان شعليج قابل هو بيتج كُله إيجار كم شهر وبعدهة نطلع منه ..

وثاني يوم أجو إلنا أم رهف وبنتها هم فتحت وياها هذا الموضوع وگالت ...

-ام رهف: هسة خاف نطلع وتتخربطين عليه 

-أمل: ليش شوكت تخربطت ؟

توترت و جاوبت بسرعة ..

-جُمان: لا لا مو اتخربطت يعني شوية تعبت لأن هواية فرينا يله يله خااالة لعد شلون منو ألي غيرج هنا بس أحفظ الطريق بعد ما أطلعج وياية 

-ام رهف: اي حبيبة موووو هي هيتة وييييين كاعدين 

-أمل: حيل عندج إياها منطيتج اني كل الصلاحية

-ام رهف: هايهية لعد عند عيناج 

لفيت شالي وحچيت ..

-جُمان: اي تأمرن عليه بس الله وياي اني 

-رهف: اووف ماما لعد متخليني اني اشتغل هم وياها ؟؟ 

-ام رهف: انچبي ولج رهيفة انتِ شعايزج وتشتغلين شو يمتىٰ ما اجيتج رافعة رجيلاتج مثل الحامل ومتقدمة جارتها وتنامين للظهاري والاكل يجيج والشرب يجيج والفليسات تنشمر علىٰ راسج 

-رهف: ياااا يااااا 

-ام رهف: ويعاااا هسة احنة لاگين شغل للبنية وعرضتي ألنه يله امشينا جمينة

مشت خطوتين وألتفت عليه وگالت ..

-ام رهف: اليوم منفتر هواي حتىٰ ما تتخربطين 

            

              

                    

ضحكت ومشيت وراها واتنهدت اااخ يا خالة لو تعرفين شنو سبب خربطتي ..

بقينة نفتر أماكن مختلفة فتت لمحل ملابس حچت وياه خالة باوع ألي بنظرة طوويلة بعدها أشر عليه باصبعة وگال ..

-وهيچ تشتغل ؟

حچيت بأستغراب ..

-جُمان: يعني شلون هيچ مافهمت قصدك ؟

-يعني بهذا الشكل ؟ العفوا احنة محل معروف ومرتب ونريد نكسب زبائن 

-ام رهف: اي لعد شفتهة بزون ولازمة الباب وتنفخ علىٰ العالم  ياعيني شو ما فهمناك ؟؟

-لا لا مامحتاجين 

-ام رهف: توووك كلت محتاجين شني هاي 

-حجية إذا ماتلبس هذا البشت وبدون حجاب ميخالف

فتحت عيوني علىٰ وسعهن عزا بعينة شگد صلف فزت بوجهة خالة ام رهف وگالت ..

-ام رهف: ياااا خااايب من عمت عينك وعين شغلك تريد نتشلح علمود تشغلنة دطييير انتَ وشغلك من زود محلك كاتلة الوصخ غدددي

بقى مبحلق عيونة وصافن بوجهة بدون جواب لزمت أيدي وطلعنا من المحل ..

-جُمان: عزا بعينهم شنو طلباااتهم تفششل ؟ شنو الفرق ؟ المحجبة مرتبة وكشخة هم ليش هلطلب الغبييي

-ام رهف: خيولي من كطمة حاجبة مو راحة وين أكو ولد يكطم حاجبة من الصفح اووو مااال الثووول 

زفرت وهزيت راسي شگد افترينا بيومها جزعت ومليت صرت أمشي شوية وأتعب واگعد أرتاح وأكمل ما أعرف شكد مر من الوقت بس ماكو ماحصلت يا أما يردون مُهنة يا أما خبرة للشغل تعبت حيييل ..

-جُمان: خالة خلي نرجع كافي الظاهر ماكو ماراح اللگي 

اتنهدت بتعب وگالت ..

-ام رهف: مدري شسالفة اتخبلوا علينا محد يريد لو يطلبون ألف طلب شني خااالة

-جُمان: أمشي خالة أمشي 

انقهرت وحسيت گـلبي انعصر واني أفكر شلون بعلاج أمي رجفت شفتي بس تمالكت نفسي بالگوا .. رجعنة جاي نمشي حتىٰ نأجر تكسي صار بوجهنة كوزمتك باوعت ألي وگالت ..

-ام رهف: بله خلي نفوت نسألهم بلكي محتاجين مندوبة بيه هذا زين وكله بنات اني اعرفهم

-جُمان: لا خالة نفس الشيء هسة هم ميريدون خلي نرجع تعبنة 

ماسمعت كلامي وأخذتني من أيدي فوتتني اله چان جبير ومرتب بشششكل وبيه بنات ٢ يفترن أول ماشافن خالة ام رهف أتقدمن بأبتسامة يسلمن عليها سلام حاار ..

            

              

                    

فتحت وياهن خالة الموضوع باوعن ألي اثنينهن وگالت وحدة منهن ..

-ياريت والله خالة قبل شوية احنة نشرنا محتاجين عاملة تشتغل ويانة 

انرسمت إبتسامة علىٰ وجهي حطت أيدها بظهري قدمتني بدفعة خفيفة وگالت بضحكة .

-هاااااي هاااااي گدامجن 

وفعلاً اتفقنا علىٰ الراتب بس وقت الدوام ماگدرت چان من ال٨ ونص الصبح لحد ال٨ بالليل ..

-جُمان: ماا اگدر اني هيج عندي والدتي مريضة و وحدها هذا الوقت هواية عليه 

-مو بعد ال٨ تجي بنية ثانية تشتغل غيرج لحد ال١٢ ينسد الكوزمتك يناسبج من الـ٨ ونص لحد ال١٢ الظهر ؟

-جُمان: اي هيج وقت مُمكن 

-بس راتبج راح يكون أقل 

هزيت راسي وقبلت ميخالف ولا الماكو مستحيل أگدر أترك امي كل هلوقت بالدوام ..

-تگدرين تبلشين من اليوم حتىٰ نفهمج علىٰ الأسعار والمنتجات الموجودة 

-جُمان: بس هسة بـ٩ ونص ؟ يعني نص وقت الدوام راح 

-عادي مو مشكلة بداية ومن باچر تلتزمين

هزيت راسي وباوعت لخالة .

-ام رهف: بكيفج والله تردين تبلشين من اليوم وأني ابقىٰ يمج لحد ميخلص دوامج 

وبلشت يومي الي مليان توتر بدوامي الجديد وخالة ماتركتني حطولها كُرسي وبقت گاعدة ومگابلتني اتصلت علىٰ رهف وبلغتها وماما يمها چانت ..

چنت واگفة يم المنتجات وأجن اثنيهن ضحىٰ ورشا وبقوا يشرحولي عن أسعارهن حسيت روحي دخت هذن كلهن لازم أحفظ أسعارهن وأگعد أشرح للي يشتري عنهن وأروج 

هزيت راسي بقبول و وصار صوت رسالة بتلفوني انخمش گـلبي وبلعت ريگ قبل ما أفتحها بس اتذكرت اني حضرت الرقم ؟ رفعت تلفوني فتحتة وانصعقت رقم جديد والمكتوب ..

"علىٰ الخير ست بس ديري بالج "

عصرت عيوني بقسوة بأصابعي وغمضتهن من حسيت أطراف جسمي كلها صارت ترجف ياربي منو هذا منو ليش جاي يعيشني برعب وخوف 

أخذت نفس وزفرتة محاولة أهدأ نفسي قفلت التلفون وضميتة ورجعت أكمل شغلي بس ماكو ماركزت بشيء بسببه وهذا أول يوم ألي ..

*****

صاحت عليه بصوووت عااالي ..

            

              

                    

-ولججج يله رغيييدة وين صرتي 

-اااي اييي يمُا اجيت

جاوبتها وانا اطبطب بالحمرة علىٰ شفتي خلصت وسديت الجرار وطلعت شافتني وگالت ..

-وعلي دقيقتين يمكن لبست عباتي وشيلتي وحطيت مسك وطلعت وانتِ صارلج ثلث ساعات مدري شكثر يبووووي

-رغد: يله يُما يله چا وين قاسم ومنار ؟ 

-طلعوا وانا بقيت أنتظر سمو الملكة تخلص 

ضحكت وحچيت ..

-رغد: اوف جمولة بس يلوگلي اللقب ها 

-جميلة: اي عشتوو يلوگ يلوگ لأبو الضروگ

-رغد: اوووع يمُا شني هاي 

-دطلعييييي چلبتي شمالج 

طلعتني دفع وطلعت وراي صعدنة بالسيارة و وصلنة الهم دگ هورن قاسم مامرت دقيقة وانفتح بابهم طلعت ام مصطفى قبل الكل ترحب بينا ..

تلگتني شمس بأبتسامة وحضنتني ...

-شمس: هلووو حبي مشتااااقة ألج 

-رغد: وانا أكثر 

سلمت علىٰ منار ودخلنة للأستقبال گعدنة كلنا سوىٰ گال مصطفىٰ 

-اي شلونج حجية شخبارج صحتج شلونها 

-جميلة: اخ يمه منيلي صحة انا بعد شوف رجيلاتي جاي يتگرمن شوية شوية مابيه أنهض بدون هاي العصي

-قاسم: يمه أسمهن عكازات شني عصي

-مصطفىٰ: خلي المرة تكول عصي عكازات شعليك انتَ ؟

-جميلة: اي والله فوگ ضيمي ضيم قويسم اخ بويه

-قاسم: يله هاك أستلم 

-ام مصطفى: والله يخيه ينراد الهم گلب لوحدهم خاص لمصايبهم وصدماتهم وبلاويهم انا مصيطف راح يموتني

-مصطفىٰ: شني شمسووين يمه نوب درتي عليه 

-ام مصطفى: منين كل شيء مامسوي عمت عيني فقير 

-جميلة: وعلي فروخيش بس شلعان گلب يبوووي يتعاركون ويه النملة التمشي بالگااع 

-ام مصطفى: انا مرات أفكر بله ليش خلفته هذا الخايس مصيطف ؟؟

-مصطفىٰ: هااا يمه عود صددددك

-جميلة: وعلي وانا هم أكول عود شمالني ربيتة هذا قويسم السرسري عقلي وين چان 

            

              

                    

-قاسم: ذكررن الله يمعوووودات 

-جميلة: عمت عين الوكت يخية يضمضم علىٰ أمه الربتة ماخذ مريتة لعبانة روحها راح ورجع ماحچالي شيء ولو هية مبينة متزوجة وتلعب روحها يعني شني ؟؟ بس امددداني انا ربيته امدانييي

غص قاااسم بكاسة الماااي اختنگ بحيث وجهة صار أحمر واحنة فطسنة ضحك ومنار تباوع للحجية بصدمة فاكة حلگها ..

-قاسم: يمههه دخيييييل بختتتتج انتِ شهرتييييينة البت نفسها تلعب لأن ما ماكلة شيء 

-جميلة: انچب تضمضم وتچذب هم وين اكو وحدة ما ماكلة شي تلعب روحهة عمت عين الوكت يقويسم تهمبل عليه 

-ام مصطفىٰ: شسالفة يخية شني حر الجيس يمتى حبلت صارلها سبوعين من عرست

تقربت مني منار وهي تضرب ع خدها بخفة ..

-منار: ولج شديحجون شديصخمون راح يطك وجهي اني 

-رغد: من ينجمعون هاي گعداتهم أهلاً وسهلاً بيج بيناتنة 

-منار: فشلة فشلة صخام الصخمني 

-مصطفىٰ: بس شگد حيووووان تچذب علىٰ أمك ليش ولك ؟

-قاسم: والحُسين مامچذذبببب 

-جميلة: اي والله يايمه انتَ خوش ولد مو مثله مسربت هنيال أمك بيك 

-ام مصطفى: منيله الله مطيح حظه بس گدامج الله يسساااعدني عليه 

-مصطفىٰ: يمة چا عود انا حاجز ألج سفرة علىٰ حسابي ترحين بيها للرضا 

-قاسم: وانا هم حجزت الج حجية گلت ترحن سوىٰ انتِ وياها تزورن بلكت الرضا يهديجن 

-جميلة: ياااا يمة فدوه اروحلك وليدي قسومي حبيب امه الحنين 

-ام مصطفى: بعد روحي أبني وحيدي البار بيه عزيزي عود صدك راح تاخذووونة نشوووف الرضا ؟؟

-مصطفىٰ: لا ماكو بعد سقط حقج انتِ وياها 

-قاسم: علىٰ هذا الحجي لأبو الأسواق ماوديجن مو تشوفن الرضا 

-جميلة: ياااع چا شني غير چنت اتقشمر وياك شماالك خايب 

-قاسم: لا ماكو بعد 

-ام مصطفىٰ: يمه مصيطف خو ما صدكت انا هم چنت اتشاقة 

-مصطفىٰ: خلي يفيدجن هذا الحجي بعد 

-ام مصطفىٰ: ولك انت غير ابني الغالي 

-مصطفىٰ: ها هيج 

            

              

                    

-ام مصطفىٰ: وعلي هيج چا انا يمتىٰ حاچية عليييييك ؟؟ ماتعرررفني ؟؟

-جميلة: شني ماتعرف امك ولك 

ضحك ضحكة طوووويلة وگال إلها...

-مصطفىٰ: اااافااا انا ماعرفج يمه انااا ؟

-ام مصطفىٰ: بعد گلبي وليدي يعرفني چا شلون مايعرفني 

-قاسم: شلون تعرفها بلا سولف النه 

-مصطفىٰ: خلي النار طافية لا تشعلها لا أشعل ابوووك 

-جميلة: ولك تشعل أبو ياهووو 

-قاسم: أبوي 

-جميلة: هو صح مسربت وسرسري ومايخاف الله ومهتلف وماعندة سالفة بيها خير بس يبقىٰ أبني عشتوووو محسوب عليه 

-مصطفىٰ: چا حجية هذا الضيم كله وترضين ينحسب عليج ؟

-جميلة: ياااع خااايب شسوي رضيت ولا مارضيت المصخم بالجنسية مكتوب أنا أمه وعلي لو بيدي أغير أسمي خايب قويسم ماتغيره أليه 

-قاسم: إن شاء الله تدللين شنو تردين اسمج الجديد ؟

-جميلة: هذا جميلة الجديد أريدة حليوة 

-مصطفىٰ: لا حجية بس جميلة أقوىٰ من حليوة 

-جميلة: هااا اي وعلي صدگ يخسىٰ أدم أغير أسمي السمتني إياه أمي تفاحة العزيزة علمودة المصخم

-مصطفىٰ: أمج اسمها تفاحة ؟

-جميلة: اي وشلون تفااحة يبوووي أسأل أمك 

-ام مصطفىٰ: وعلي چنهة برتقالة تخبل

اختنگنة من الضحك بعد انا ريجي نشف وعيوني دمعت گال مصطفىٰ... 

-مصطفىٰ: هاي قبل چنتوا ماتفكرون لأن هواي تخلفون 

-قاسم: هو أول ماتصير المرة حامل شيجي ببالها تلزگة  ويجي الثاني نفس الشيء ماكو داعي يفكرن لأن يخلفن عشرة عشرة درازن 

-جميلة: وعلي من أرجع من الرضا أرد عليك مو هسة

-قاسم: ياهو يوديج للرضا ؟ 

-جميلة: انت وغصباً علىٰ راسك وراس أبوك 

مصطفىٰ: ههههههههههههههههه

-ام مصطفىٰ: چا وانتَ عليمن تضحك هم غصباً عليك توديني سرسرية تضحكون علينا عود چنكم عگاريك شط 

            

              

                    

-مصطفىٰ: عمي نوديجن وحق الكفل زينب حتىٰ لبيت الله اوديج يمة بعد شتردين 

-قاسم: بعد شتردين ام مصطفىٰ ردي علىٰ سؤالة هاي خوش فرصة 

-ام مصطفىٰ: أخذني للعمرة وللرسول وللسيدة زينب وللرضا ونوب أخذني للحج لبيت الله وعلي لو تاخذني تفرني الدنيا كلها وتزورني إياهم كلهم 

-جميلة: رجلية المگرمات علىٰ رجليج وعلي 

-قاسم: ولك شگووول عليييك الله اكبر علىٰ راسك علىٰ هاي العزيمة والجمعة لو باقين بالبيت أشرف 

نهض مصطفىٰ وگالت بيبي ..

-جميلة: ها وين يمة

-مصطفىٰ: رايح أجيب عشا يله أنهض قاسم 

-قاسم: تاااكل تبن ولا أنهض تشتري وتصيح نسيت محفظتي بالبيت وتخليني انا أدفع 

طلع محفظتة وگال ..

-مصطفىٰ: هاي محفظتي وياي شوف يله أنهض 

-قاسم: إذا هيج بيها مجال 

راحوا طلعوا وگالت الحجية ..

-جميلة: يا مال السوادين وانا أگول شمالهم فروخي متسودنين شلون مرافگيلهم واحد

-ام مصطفىٰ: منيله سودة عليه همة الي مسودنينة 

-شمس: والله محد مسودن الثاني همة بلادي من گاعهم مسودنين 

-رغد: ههههههههههه جبتيها 

-منار: خو رجلي ميفيد 

-جميلة: هاا ولج طلع حسج شمااله وليدي مايفيد

-منار: بيبي توة تحچين عليه 

-جميلة: لا منين يمتىٰ انا احچي عليه ؟ قويسم هذا وليدي حبيبي راح ياخذني للرضا وياخذني لله 

مر وقت بين السوالف والروتين الطبيعي بكل گعدة خابرونة راح يوصلون جابوا العشا نهضنة حضرنا گلاصات فرشنة السفرة وخلينا المقبلات الي مسويتهم شمس والعصائر وبقينة ننتظرهم شوية وفاتوا وجابوا العشا چان كباب وگص ودجاج ومقبلات ..

وأكيد الگعدة ماتخلىٰ من مناگرهم خلصنة نظفنا الاماعين ودخلناهم بالغسالة أخذت شمس الچاي وگعدنة أنتبهت مصطفىٰ ماچان موجود ..

جاي تصب چاي وأتصل تلفوني نهضت بسُرعة من شفتها موكلتي اترخصت وطلعت بالطارمة فتحت خط واجاني صوتها وهي تبچي وتشهگ وبالگوا تطلع منها الحچاية ..

            

              

                    

-عفية ست اني مو گلت ألج خلص سدي القضية بعد ما أريد شيء يخصصصهااا موووو بلغتج 

تحچي وتشهگ بالحچي ..

-رغد: بس لحظة ليش جاي تبچين ؟ ليش تحچين وياي بهلطريقة بس فهميني 

-ماابيه مااابيه بس الله يخليجج كااافي خلييي تووولي اني مااا أريدهاا بعددد

-رغد: انتِ هيج جااااي تثبتين الي وتأكدين شكوكي مية بالمية 

-جاااي أثبت الج شنو 

-أنُ جااي يهددون ويخوفون بيج حاچيني والله محد يگدر منهم يوصل الج لو حچيتي ألي الحقيقة وربج بنتج تبقىٰ وياج وهمة يااخذون جزاءهم بخصوص هواي أشياء همة مسوووينهاا بس أحچيلي !! 

جاوبتني وهي تشهگ وتغص بشهگتها ..

-مااا أگدر احچي شيء ماااا أگدررررر 

زفرت نفس بضيييق وحچيت ...

-وضحيلييي يكفي أنُ توضحيلي لا تخااافين انا جاي أطلب منج متخافين ليش تسكتين همة هذا الي يردونة يخوفونج وتسحبين نفسج وتنسد القضية وياخذون بنتج منج علىٰ الحاااااضر !! 

-اوووووووف اووووووووف جاااي أموت اني جاااي اموووت اخاااف أحچي ااااخاااف مااا أگدررر 

حچت الكلام وسدت الخط بوجهي بقيت صافنة علىٰ التلفون مسحت وجهي بغضب وألتفت نزيت من صار بوجهي مصطفىٰ ..

-أسم الله أسم الله 

-خررعتنيي ! شتسوي هنا 

-چنت طالع ورجعت سمعتج تصيحين وگفت بفضول هاي هي نفسها موكتلج مو ؟ 

-رغد: اي وهلمرة فعلاً أتأكدت شكوكي مهددينها ومخوفينها لدرجة مرعوبة وتگلي ماا أگدر احچي شيء أخاف 

-لااا يااا حواوييين 

-رغد: شلون راح أتحرك وهي ماجاي تحچيلي شيء علىٰ مجرد شكوك ! 

-مصطفىٰ: بدون ماتحچي احنة راح نعرف بشنو جااي  يهددوها

ميلت راسي بأستغراب وحچيت ..

-يعني بدون ماتحچي الكلام والتهديد الي وصلها شلون راح نعرف ؟

صار يحچي ويفهمني بالخطة الي ببالة شيء بعد شيء ضحكت وحچيت ..

-رغد: اااهااا مو انا نسيت الي گدامي شنو 

-مصطفىٰ :بعد لا تنسين 

            

              

                    

-رغد: جائر يطلع هو هذا الي گلت ألي بيه جائز كلشش !!

-مصطفىٰ: انا ماشوفة جائز اشوفة أكيد بعد البحث الي اجريتة وعرفت 

-رغد: تمام بس أرجع للبيت راح نتواصل بخصوص هذا الموضوع ونحدد الوقت 

هز الي راسة عفتة ورجعت يمهم وانا براسي الف شغلة صارت بقينة شوية نسولف اترخصنا منهم ورجعنة للبيت طلعت ملفاتي والحاسبة وبديت أرسل بالمعلومات الي عندي اله المشكلة الي رسلتهم اله چان ردة عليهن ..

-مصطفىٰ: هذن مايوكلن خبز راح أجيب ألج الأقوىٰ عنهم 

-رغد: الله وأيدك 

سديت التلفون وبداخلي خوف وحماس ماعرف شنو من أحساس بالضبط بس أحس مصطفىٰ راح يكون سبب من أسباب نجاح هذي القضية وأنُ أگدر اوكفهم عند حدهم واخليهم يتحاسبون ...

وتارة عقلي يفكر بالي يتسمىٰ أخوي خلف عشتو ولو انا ما أعترف بالعائلة هاي كلها ولا أعتبرها مني ولا ولا يعرفوني ومع العلم انا متأكدة كلهم ألهم أيد بالي صار وخططوا واتأمروا علينا بس هين هين حسابهم ثگيل راح يكون والله 

*****

مرت أسبوعين علىٰ شغلي هنا وبكل يوم صرت أطلع للشغل توصلني رسالة من أرقام مختلفة بيها كلام يخوفني ويرعبني ويوگعني لسابع أرض من التفكير والقلق ..

صرت ماعرف بمنو أفكر كلهم خطروا علىٰ بالي أمشي واتلفت بدربي بخوف حتىٰ من وياي خالة ام رهف هم أخاف ويبين عليه وتسألني شبيج وأسكت...

وفد يوم چان الوقت متأخر بالليل بس مانمت ماخذني التفكير حيل اشتاقيت أله أحس گلبي ينعصر بطاريه أشتاق اله بكل لحظة أتمنىٰ أشوفة بس مشتاقة لصوتة و وجهة وطولة مشتاقة لعطرة لكل شيء منه مشتاقة حيييل 

فتحت تلفوني بحثت بأسمة بالفيس اتمنيت اللگي صفحة أله بس ماكو بحثت بطرق مختلفة وبأللقاب مختلفة يصيحولة بيهن بس ماحصلت شيء عنة 

فتت لليوتيوب حطيت السماعات بأذني وتلقائياً لگيت نفسي أبحث عن أغنية هيثم يوسف (أضعف گدامك ) ويه كل كلمة بيها يجي شكلة ببالي وأتذكر شلون يغني بيهاا أتنهد تنهيدة تاخذ گلبي مني ..

ماعرف كم مرة سمعتها بس لحد ما گلت كاافي گلبي صار يوجعني من القهر طفيتها ونهضت لفراشي حتىٰ أنام وراي شغل فكرت باجر أرجع أغير شريحتي يمكن بعد ميحصلني بس شلون ؟ واني بكل رقم أحضرة يجيني واحد غيرة أتنهدت وعقلي داخ من التفكير ماوگعت بالعلة شنو بس رسائل ورعب مستمر ..

عقدت حاجبي و وگفت بخوف من سمعت صوت حركة وطقطقة ببيتنا صرت أبلعم من الخوف گلبي انقبض ومشيت وكل ذرة بيه خايفة مشيت علىٰ كيفي وگفت يم الشباك اباوع منه بـس أشو ماكو شيء الطارمة فارغة ! 

ابتعدت عن الشباك ورحت للباب فتحتة بخفة ونفس الشيء الوضع هدوء طلعت أمشي بالطارمة علىٰ طرف اصابيعي وأتلفت علىٰ كُل مكان بيهة ماكو بس البزازين تفتر أخذت نفس ونفضت أفكاري ورجعت دخلت صرت أخربط من الخوف من الارقام هاي الدتوصلني ماعرف منين 

خربطت من حركة بزونة لأن أفكر بيه أبو راس الاملح ليش أفكر بيه انييي وهو هسة ناسيني ولا أجي علىٰ باله مرتاح مني طبعاً طبعاً 

اي وفرحان وماخذ راحتة چانت جُمان متجيب اله بس المشاكل و وجع الراس واني اسهر للفجريات افكر بيه وگلبي عاصرني علىٰ شوفتة و وراي شغل نهااار كامل لالا شنو أصلًا ولا جاي أفكر بيه الأجلح الأملح ولا شيء بس عيوني ماتاخذ نوم هيج شبعاانة 

صرت اتعارك حتىٰ ويه أفكاري لحد مالزمت المخدة ضربتها براسي واني أهمس لنفسي ..

-خمديييي خمدييي وراج شغل وراج تعب خمدي

وفعلاً غفيت وماحسيت علىٰ نفسي ألا من گعدت علىٰ صوت المنبه سويت ريوگ وريگت ماما وشربتها علاجهة بدلت إلها و أجت خالة وطلعت لشغلي وصلتني وگفت يم باب الكوزمتك وأشرت إلها ترجع ويه التكسي 

هاي كل مرة توصلني تتطمن عليه وتوصلني بأيدهة يلا ترجع شفت التكسي رجعت بيها توني جاي أفوت وسمعت صوت من وراي هز گلبي وخلاني أجمد و أتبسمر بمُكاني 

خفقق گلبيييي بقوووووة هزيت راسي و أقنع بنفسي وأگول متوهمة لاا معقولة ! .. غمضت عيوني من رجع لفظ أسمي ألتفتت عليه بثقل أتنهدت من صارت عيوني بعيونة غرغرت دمووع وشفايفي يرجفن نطقتتت بصوت هزيل مبحوح ويرجف ...