رواية سواد الاثمد الفصل الرابع بقلم نورس
سمعت صوت صياح من برة نزلت اركض عالدرج
لاگيت ماما بوجهي توها طالعة من الغرفة مرعوبة
والصوت كل ماله يزيد ويصير اعلى ..
ركضنا للحديقة فزعت من منظر بان بأيد مآب يصفك بيها كل راشدي والثاني تشهك بصوت عالي وجها أحمر خشمها ينزف دم وعلى جهة فدار صوته راج المكان وعيونه ناطة يهومش عليها يريد يلزمها وشبير صاير بوجهه يمنعه
عاطت ماما بخوف وركضت على مآب تريد تاخذها من ايده وتعيط عليه راحلها فدار دفعها وجر بان من شعرها وگفها كدامنا
فدار :- عجل هاي هي تربيتج وكسرة ظهرج عليهن ؟
شدن :- راح تموووووت البنية بيدك عوووفها
- يولي تدرين بنتج النچرة شعتعمل هساع هين
صاحت :- شسوت
- مختلية ويَّ العاشگتو وگالبتو للبيت دعارة
صارت عين بان بـ ماما وتهزلها راسها بالنفي
دموعها تنزل بس صوت شهگتها مسموع
حجت تتوسله :- فدار حرام عليك عووفها
- هاه وانتِ هذا الهامج متجاوزة سالفة عشيقها
- ابن عمها والله
فتح عيونه صافن عليها صاح بصوت جفلني بمكاني
- وانتِ تدررررررين وساكتة وانا يا غافلين الكم الله
- لا ما ادري والله ما ادري بيها
ضحك بصوت مستهزئ وهو يهز راسه :- عجل طلعت ملفيلي كاولية بـ بيتي وانا مالي خبر
- فدار طفلة وغلطت
- وانتِ گاعدة تبرريلها الغلط لا كفو من تربيتج
- اني المسؤولة عنها تجيني تكلي بنتج غلطانة واني الأتصرف وياها ما الك حق تلزمها تكفخها ليكول مجرم ووكع بيدك
جر بان من شعرها ودفعها بكل قوته بأتجاه ماما وصاح بأنفعال :- احمدي ررررربج ما زتتيها الج بدون راس دحكي زززززين الكدامج فدار خاف بعدج متعرفيني من تووووصل الشغلة للأعراض ودوسة بيتي اسووووويها بحر دم والحط هالركبة بمجانها
- هاي عندكم انتوا أعرافكم الهمجية متمشي براسي وبراس بناتي اليتقرب أحررررررگه وكلام الله
- طلع حسج شدن
- وراح يطلع منا وجاي إلا بناتي فدار خط أحمر
- عجل اسمعيني زين انا بيتي ميحوي زبايل بنتج ياخذها مآب يزتها على أهلها هناك تاتكمل مشوارها ويه ابن عمها النجر
- لوووو يموت سالم ما انطيه وحدة بيهن
- عجل مو هو رايدها اخلصي من حملها خلي هو يبتلي بيها وبأبنو جائز يطلع ازلمة خير ويعقدلهم سوة عاد خلوتهم تصير بالحلال
- ميرحموها والله
- مو شغلي بنتج ما ألفيها بعد عندي لو تنطبك السما عالكاع
- واني ما أعيش وبنتي بعيدة عني تريد تتقبلني تتقبل وجود بناتي وياي غير هيج حتى اني طالعة منانة
- هاه هيج صار الحجي ؟
- شلون متريد تحسبها احسبها ولتجرب تخيرني لأن تعرف الجواب شنو حيكون
سكت للحظات مدنك للگاع رد رفع راسه بكل شموخ عدل حزام سلاحه كال وعينه بعينها :- عجل انتِ طالك
ضلت ساكتة تباوعله عيونها حمر
متجمعة بيها الدموع .. بس ما بچت
مآب عيونه على بان خازرها يريد يطلع بروحها
وشبير على جهة واگف مدنك راسه يباوع للگاع
عضت شفتها تتمالك أعصابها وهزت راسها
وهي تباوعله أشر علينا بأصبعه وجه الها الكلام
فدار :- لوجه الصبح انتِ وزبالتج برة البيت ماريد ادحك وجه وحدة هين ولوما مخافة الله بيجن حريم ولوحدجن بهالليل جان زتيتجن من هساع بس شعملو لگلبي حنين
عافنا وطلع من البيت بس وجهه مدخن ومبين
ضايج تقدم مآب على بان صارت ماما بوجهه
- عوفها شتريد منها مكافي مشوهين وجها ومسوينه دماية
باوعلها بخيبة ونظراته الها بيهن عتب وحجي هواي مگدرت أفهمه
گلها :- حتى انتِ طلعتي مثلهن ؟
مسحت الدم اللي ينزف من خشمها وباوعتله
شهربان :- الكدامك مو ثولة أعرف معنى نظراتك الي وافهم صفناتك كلش زين انتَ البنيت آمال بعيدة اني ما أملتك بشي ولا انطيتك فرصة لتكعد تطلع نفسك ضحية لعلاقة مرسومة بخيالك لوحدك وتحسسني اني غلطانة بحقك مالك شي يمي
رفع حواجبه بدهشة مثل اللي اتدارك
وضحك بخيبة وهو يهز راسه
- لا حگج صوجي انا .. انا الكلب ابن السطعش كلب العلگت روحي ودوخت راسي بوحدة ساقطة مثلج
جان المفروض أعرف واخلي حدود بينا وما أتمادى من ذيج الليلة الشفتج بيها تروكضين بالشارع جنطتج بجتفج تا تروحين للــگواد مالج
شدن :- مآب لتتجاوز خليني محترمتك ومتذكرة زيناتك النا لتخرب صورتك گدامي
صاح :- لا يابا هووووواي يوگف بعينجن الزين انتن
شقصررررر وياجن عش تكسرينو هالشكل گاعدات معززات مكرمات شنو قصورو وياجن وتجازنو هيج
لزمه شبير يحجي وياه بخفوت يريده يسكت
شهربان :- لا ليش تسكته خليه يكمل معايرته النا
25 تعليق
شدن :- أشكرك مآب هو اني مجنت متوقعة غير شي جنت أدري الكم يوم وحتعايرونا وتمنون علينا بگعدتنا
بـ بيتكم
ضل يباوعلها ساكت للحظات
بعدها دار وجهه وطلع لحگه شبير
دخلت ماما للبيت واني عيني على بان خايفة عليها
وجها يخوف من صدك مورم من كل صفحة وعلى خدها طبع جف ايده صاير أحمر شفتها مجرحها بـدم جامد ولازمة خشمها كل شوي يصب دم
دخلنا بالصالة وماما شفتها تحوص بالغرفة وراها طلعت صعدت فوك محجت ولا كلمة ملامحها جامدة استغربت سكونها المفاجئ ، لشوي ونزلت بيدها جنطة صغيرة النا
صارت گدامنا شمرتها يم رجلي
شدن :- كدامي البسن دنطلع منا
نورجان :- وين نروح ماما
- عسى ما للگبور دقيقة وحدة ما ابقى بعد هنا
بالعجل يلا مالي خلك احجي
حجيت بتردد :- باردة والله خليها عاد للصبح
- البسن ثگيل خاطر تدفن فضني يلا
- ماما ..
صاحت :- شدا الغييييي
سكتت من شفتها انفعلت كمت لبست قمصلتي وجبت قمصلة بان اللي منتهية بغير عالم ولازمة راسها مدنكة للگاع ساعدتها تلبسها اخذنا الجنطة وطلعنا من البيت
نمشي بالشارع الدنيا ظلمة ولا طير طاير نتراجف من البرد صك عظامنا صك دارتلي مثل اللي تذكرت
شهربان :- جداحة
فتحت سحاب قمصلتي شوفتها مغمض عيونة دفيان ورجعت سحبتها وكملنا مشي ماما كدامنا كل شوي اسمعها تتنهد لو تذب حسرة لحد محجت بان
- ماما
ولاجنها سمعتها كملت تمشي وگفت بعناد
صاحت :- ماما مو دا احجي وياج
اندارت الها وحجت بنفاذ صبر
شدن :- شتردين بان
- لويش ساكتة
- فضيني امشي مالي قابلية للحجي بعدين نسولف
حجتها وكملت مشي خلت بان وراحت گعدت عالرصيف لحگتها وعيني على ماما وهي تمشي لحد مندارت النا شافتنا واكفات اجت بأنفعال
- وبعدين بان
- اضربيني صيحي عليَّ بس لتسكتين هيج
- اضربج فوك الضرب الأكلتي من فدار وابنه ما خلوا مكان بوجهج صاحي حتى افوخ گلبي بيه
- أستاهل
حجتها وبجت :- بس والله مكتله يجي هاي آخر مرة جان جاي ديودعني راح يسافر لتركيا وبعد ما اشوفه ويدري بيهم ميقبلون يدخلون غريب لبيتهم
- ومدام تعرفين بفدار ميقبل واني حذرتج اكثر من مرة ليش تعاندين وتتواصلين وياه من وراي مووو كتلج ماما جوووزي من محمد ما وراه بس الأذية
- انتِ هم سديتيها بوجهه وطردتي مخليتولنا خيار ثاني ومآب مراقبني بالفوتة والطلعة كابت على نفسي
- ضيعتينا بان ضيعتينا
حجتها واختنگت اجت گعدت يمها عالرصيف
شهربان :- ماما انتِ تحبينه للعقيد ؟
- كل عشگة وراها فشگة بطلت أحب من زمان
- عيونج تكول غير هالحجي
- دا ابجي على حظي وحظجن الخلانا بالشوراع وخلى اليسوى والميسوى يتمنن علينا باللگمة بس شگول اذا اخوي عار عالزلم ميعرف يصون اخته وبناتها ويلمهن
- اني گتلج من زمان الهم يوم وينگلبون علينا بس انتِ مسمعتي مني ورحتي تزوجتي من ورانا وفوگاها بالسر
منو اليعترف بزواج مؤقت ؟ بيه خير جان شهر زواجكم
نورجان :- بان شبيج شنو هالحجي وكته
شدن :- عوفيها عوفيها دتطلع اللي بگلبها وتخلصني هي من يوم ما أخذته وهي تدور المشاكل دوارة وتريدلها حجة حتى أنفصل عنه .. ارتاحي هسه
العقيد وطار ...
حجتها وگامت شالت الجنطة وأشرتلنا ومشت
رحنا وراها من تحجي مختنگة حيل خفت عليها
صحت من وراها :- ماما حبيبتي بيج شي ؟
ما ردت عليَّ ، مشينا مسافة اتصل تليفونها
وگفت باوعت بالأسم وعقدت حواجبها
ردت :- ها شبير .. اي اخذت البنات وطلعنا بعد ما النا مكان بذاك البيت .. أرض الله واسعة .. روح شبير والله مالي خلك اتجادل
سدته منه وأشرت يلا بس متضايقة حيل ومخنوگة لحد ما انفجرت وكامت تبجي دموعها تنزل وترجع تمسحهم بسرعة تمشي گدامنا سريع لبالها منشوفها
فزينا على صوت هورن سيارة جاية من ورانا اندارينا طلع شبير بسيارته صار بصفنا وأشر :- اصعدن يولن
شدن :- توكل شبير كتلك ما ارجع
شبير :- وين تردين مسيبتلج فحلتين وياج بهالليل الشارع يخوف كتلج بس الليلة عديها والباجر وين متردن روحن
- ما ارجع بعد طردته الي مو هذا الرايده خالك
- خيولي هذا الدايح جريت اذنو كتلو راح ارد النثايا للبيت بس عتفتح حلكك اشكو شك
- متأكد انتَ هيج كتله ؟
- شو جنج ما مصدگة هسع تشوفين بس نروح غاد اذا ما گضبتو وملصت رگبتو بيدي شلون يزعل ام النثاية
- استغفر الله
حجتها ودارت وجها منه
نزل من السيارة :- يولي دحگيهن خطية بالقرآن الجو بارد والليل يخوف يتعرضلجن ابن حرام لا سامح الله وانتن بس نثاية
شهربان :- يا عيني حنين على خالك
- لا والله بس خايف على ابن الحرام الراح يوكع بيدج شيخلصو منج وداعة طردة الهندس امو داعية عليه
شدن :- طردني شبير
- ومحمد هو الدزني رجع للبيت شافو فارغ ضل يفرفر بأذانو عليجن وصاني اردجن تباتن بالبيت لحد ما تلكين مكان يلمج ويلم بناتج
- لتحاول الله يخليك والله ما عندي قابلية للكلام
- يول الخاطر العشرة البينكم
- هو خالك خلى بيها عشرة
- بيمن أحلفلج هو الدازني وراجن شنو كل عقلج يتركج انتِ والبنات بنص هالليل تفترن بالشارع
باوعت النا بحيرة
ورجعت باوعتله
ردت :- بس اليوم
جر نفس :- هذا هو يبا بس اليوم وباجر بيدي ازتجن للمكان التردنو
اندار النا :- دحكن فحلات بس نروح اكضب خالي اربطو بالباب وانتن شوفن شغلجن وياه الم الجن طابوك من الشارع ونكعد نتراهن عليه اليطكو ويفشخ راسو اول هو الفايز
نورجان :- الله
ابتسم :- دحك الصفرة مكيفة
شهربان :- اني ما اروح
- بس اليوم بان
- ماما طرررردنا شتردين بعد اكثر من هيج نرجع نكابله بيا وجه
شبير :- مو بالبيت راح هو ومآب للأنبار خاطر تاخذن راحتجن
- ما اروح لو تگطعوني هسه
ماما تحجي وشبير يحجي وهي ميبسة راسها لحد ما جزعت روحه اندار لماما :- من رخصتج ..
حجاها وتقدم على بان شالها مشى بيها للسيارة وسط صريخها صاح افتحيلي الجنطة سويت مثل ميريد خلاها وقفلها عليها
اندار النا ينكث بأيده :- يلا يولي جرشت من البرد
ماما ما اعترضت تدري بان عنودية صعدنا وياه راجعين لبيت فدار وسط ضيقة ماما وصياح بان من ورانا لحد مسكتت بنص الطريق وخنس صوتها من وحدها
وصلنا هناك فتح الجنطة لگنا بان عيونها مورمة نزلت مبتعدة عن البيت وكعدت على جهة من الشارع تباوع
راحلها گامت بسرعة وصاحت
شهربان :- والحُرررر شبير اذا تقربت اكثر اخلي واشرد وبعد متشوفون وجهي
- الكلفه شبلاج استجلبتي امش كدامي للبيت يلا تاشوف
- ما اروح
- ما ميت عليج بس خاف تعضيلج واحد من الشارع ويجون يدورون براسنا فصول شكلك محسوبة علينا
- لو تنط ما اروح ومعليك انتَ
- دحكي امج واختج يولي خطية يباوعلج ما راح يفوتن وانتِ هين
- ماروح تربيع
- عش تعندين
- ماروح تكعيب
رفع حاجبه :- هاه
بحركة سريعة راحلها شالها واجه يمشي بيها للبيت ايده على حلگها لان فضيحة وهي تشمر بجسمها تريده يوخر
دخلنا بالصالة شمرها عالتخم اندارتله عيونها مورثة
شهربان :- والحُر اذا عدت هالحركة مرة اللخ يا شبير ...
قاطعها
- انتَ حلو وحضنك دافي وانا ما اتحمل راح احبك اعرف يولي اعرف
- شبيرررررر
- عيونو دحكي لج واكف انا بالباب لا ابالج تغافليني كاعدلج للصبح تاشوف منو التنهزم
حجاها وطلع صارت گدام ماما
- انتِ قابلة بهالوضعية
تنهدت تنهيدة طويلة وباوعتلها بتعب
شدن :- شتردين بان
- ما اريد ابقى هنا شنو حابسنا مثل الحيوانات ويجبرنا عالجية
- محد جبرني اجيت بأرادتي
- حتى بعد ما طردج ؟
- بس الليلة دا اگلج والباجر من الصبح نطلع
- هسه نروح
كامت تصيح بأنهيار :- وين اووووولي بيجن بهالليل لج مررررررضتيني مدا اعررررف شلون اضبج لمرررررة وحدة ريحي گلبي واسمعي حجايتي بلا متعاندين
من شافت حالتها سكتت من ذاتها وكعدت عالتخم دايرة وجها عنا بيومها نمنا كلنا بالصالة مكومين احنا وجنطنا ، مرت ساعة رفعت راسي شفتهن نايمات گمت اتسحب على كيفي اخذت غطة خفيف وطلعت برة
احرك بالقفل اريد افتحه مكدرت اجاني صوته يصيح من ورة الباب :- ها الكلفه طلعتي تاتنهزمين كاعدلج للصبح
نورجان :- هاي اني بان نامت
- الصفرة شعندج تفترين مثل بزون المطابخ بهالليل
- جبتلك شي
فتحه وصار كبالي :- عجل جاية تعترفين بحبج الي بس ما كتيلي من شوكت ضامة هالمشاعر عليّ
ابتمست ومديتله الغطة :- هاي ماما دزته الك تگول باردة خطية
- دحك شكد حنينة خما مثل بزرتها فرق السما عالكاع بينجن وبين امجن
- شلون يعني
- هي تقطر انوثة انتن مهترات
- شنو يعني مهترات ؟
حك گصته :- هاي مال مثقفين فرع الأنبار بعدها ما واصلتج
- امممم
مشى خله الغطة بالسيارة ورجع بيده باكيت جگاير وجداحة سحب وحدة خلاها بين شفايفه يورثها
- خالك ومآب ليش راحوا للأنبار
سحب نفس ونفخه بالهوى :- صارت مشكلة عدنا بالبيت ورايحين تايفضوها
- امممم
رجعت سألته :- وانتَ ليش مرحت ؟
- لاحگهم الصبح
- اممممم
- شبلاج بنت التطلك ضباط اممم واممم شعلتي الخلفني
- شُبير
- دحك حرف الراء يركص بلسانها عيونو يولي
- اريد جگارة
- شتسوين بيها بنيتي مو زين عليج
- لا حباب بس شوية جكارتك سودة ريحتها تخبل مو مثل التشربها بان تخنك
سكتت بسرعة استوعبت شگلت من حجاية
وهو فتح عيونه مصدوم وخر الجگارة
- اختج تدخن ؟
- لا والله بس مرة وحدة رادت تجرب وماما لكفتها وهي تبوك من باكيتها وتوتبها بعد
- امج تدددددخن ؟
خليت ايدي على حلگي وهزيت راسي بسرعة بـ لا
ضحك بصوت عالي ردت أرجع للبيت واستوقفني راح للسيارة مدري شدور ورجع مدلي جنطة صغيرة سودة وجنسية
- هاي جنسية اختج الكلفه والجنطة مؤخر امج خافن الصبح تعاند ومتاخذهن انتِ ضميهن بين غراضكم وبعدين كليلها
هزيت راسي
صفن بوجهي شوي تقرب گرص خدي وهمس :- فحلة راح اشتاگ لعيونج الصفر
- رجاءً ما اسمحلك اني انثى مو فحلة
عض شفته مبتسم :- وانشهد نثية حلاتها تشحط شحط
- بيباي شُبير
- يندارلج فدوة شبير وخال شبير وعشيرتو لشبير اشتعلت روحو لخالي شبع وخرب علينا الاول والتالي بيباي يبعد الاجوا والراحوا
عفته ودخلت للبيت ضميت الجنطة بين الملابس مثل مگـال ونمت ، اليوم الثاني فتحت عيوني على ايد ماما وهي تهزني وتستعجلنا تريدنا نگوم غسلت وجهي لميت شعري ولبسنا قماصلنا وطلعنا من البيت
سيارة شبير كبال الباب نايم بالصدر مبين سهران الليل كله ذاب نفسه متغطي بالغطة الانطيته اله ابتسمت واني اشوفه مرة أخيرة ومشينا مبتعدين عن البيت
جان ابالي لهنا وانتهت قصتنا ويه العقيد فدار وضباطه مجنت محسبة راح تجمعنا بيهم الدنيا مرة اللخ وبوضع اتعس من الاجينا بيه المرة الاولى
...《 شهربان 》 ...
اخذنا تكسي وطلعنا للكاظمية نزلنا بمرقد الامام تذكرت اول يوم اجينا لهنا رجعنا لنقطة البداية كعدنا بالحضرة
شدن :- انتظرني هنا لتتحركن
شهربان :- وين رايحة
- هسه اجي ما اتأخر
نورجان :- ماما جوعانة
- انتظرني بس دا اشوف احد هنا اسأله على شقق سكنية ونطلع نتريك
- باردة والله المكان مكشوف احس الهوى دا يدك بعظامي
- ادري يأمي بس المكان هنا أمان محد يتعرضلنا احسن ما احير بيجن بالشارع عاد مأمنة
راحت وهي توصي بينا منتحرك من مكاننا لزگنا وحدة بالثانية حيل وعيوننا عالناس رايحة جاية بالمكان
مرت الساعة والساعتين وماما ماكو خفت عليها
اجيت دا اريد اگوم .. لزمتني نورجان
- وين رايحة مو گـالت ماما ابقن مكانجن
- تأخرت حيل
- هسه تجي بان اگعدي
- شبيج تحاجيني من ورة خشمج
- انتِ تعرفين كُلش زين ليش
- لا والله ما اعرف اطربيني
- كل الدا يصير بسببج جنا كاعدين بيت مستقرين بيه واكو احد يرد عمو سالم من عدنا وعايشين حياتنا منين طلعتيلنا بمحمد خربتي علينا الاول والتالي ما الوم عمو فدار بالسواه بيج لان صدك تستاهلين وحتى ماما لتشوفيها مسايرتج ومحجت وياج ترة كُلش ضايجة منج بس مرادت تبين تدري بيج وحدة مخبلة وفيوزاتها طاكة خافت لتسوين شي بروحج
- حييييييل هيج شايلة بگلبج عليّ
دارت وجها مختنگة :- تعرفيني كُلش زين ما فد يوم زعلتج ولا حاجيتج كلمة تأذيج بس انتِ متهورة بان وتهورج دا يجرجرنا وياج بمصايب نحير شلون نطلع روحنا منها
بدايتها من الضابط الفشختيه ليوم ما انهزمتي ولگفج مآب لحد ما انكبستوا انتِ ومحمد بالحديقة وحتى طلاك ماما من فدار ملاحظة كل الدا يصير ويانا من وراج انتِ ؟؟
- ماما كالت حتى لو هو ما طلگني جان اني طلبت منه الطلاك ولا ابقى بذمة واحد يخيرني بينه وبين بزرتي
- وهو ليش خيرها من الأساس غير من السويتيه
- مسويت شي غلط هم زواجهم غلط من البداية مجانوا راح يكملون
- كالعادة متغلطين نفسج ابد وتطلعين بلوفات تتهربين من اغلاطج
- اي صح يمكن فوتت محمد لبيته جانت مراهمة بس هم الجبرونا نسوي هيج لو قابلة ماما من الاول نتشاوف مجان صار اللي صار
- المشكلة مو بالغلط نفسه المصيبة انتِ مدا تعترفين بغلطج النوب رجعتي دتلومين ماما بالصار
- لان مسويت شي غلط من الأساس الغلطان الوحيد هو ماما بيوم موافقت بالزواج من العقيد وخلتنا جوة رحمته من اوووول يوم شفناه بالمركز كتلها راح يضل ورانا هذا ومراح يعوفنا بحالنا ومصدكتني لحد موكع الفاس بالراس
- لو مقبلت بالعقيد برأيج وين نروح لعمو سالم ؟
- لا
- هسه لا قبل جنتي تدگين على الروحة لبيتهم
- اني كل الردته نعبيش احنا لوحدنا بدون ما واحد يصير فوك راسنا يتأمر علينا ويبدي يذلنا مثل مصار البارحة
- لتنكرين عمو فدار مقصر ويانا بشي وجان يدور رضانا ورضا ماما ..
صارت دموعها تنزل وتمسحهم وترجع تنزل اكثر
شهگت :- هسه وين نروح لا بيت نگعد بيه ولا النا أحد هنا وعمو بس يعرف بالصار حيجي ياخذنا ويزوجني
سكتت وعيونها مغورگة بالدموع حضنتها حيل :- تحلم سجودة تسوي اللي براسها واني موجودة اشتم الهوى
صارت شهگاتها تزيد :- خايفة بان ماريد اتزوج
- يخسون والله اني وياج دائمًا مراح اعوفج وماما هم يمنا مراح تخليهم يتقربولنا
- يتراوالي شكل الخلاس بالنوم لا عبالج بس انتِ اني هم ممرتاحة بنومتي والله من اتذكر لمساته وايده على جسمي اركض للحمام اجلف روحي بكل قوتي لحد ما يتزلغ جلدي ويتجرح متقززة من نفسي كل يوم ينعاد نفس السيناريو عبالك البارحة ولا جن ٧ سنين مرت
شفتها انهارت تحجي وتشهك النسوان داير مدايرنا انتبهن ويباوعن علينا بنظرات استغراب واستعطاف
رحت بسرعة جبتلها مي ورجعتلها
لگيت يمها نسوان اثنين يحجن وياها
شربتها شوي واخذت شوي بيدي غسلت وجها لحد مرتاحت وجرت نفس والنسوان يسألني عليها ويهدنها
وين يلا اجت ماما اباوعلها الوجه احمر عيونها مورمة وصوتها مبحوح گوة تحجي :- يلا كومن دنروح
گمنا طلعنا تمشي كدامنا بالي كله يمها
شهربان :- ماما بيج شي
باوعتلي :- لا ماكو شي حبيبتي
- أكيد ؟
- لتلحين بان
سكتت عنها عفتها براحتها تريگنا وطلعنا من الكاظمية اخذنا تكسي وكالت للسايق يطلع بينا للكرادة درتلها
- لويش للكرادة ماما
- اشوفلي شغل هنا وادورلي شقة نستقر بيها وهم منها عمج بعيد علينا مراح يندل مكاننا
اطمئنيت شوي ما اريد نرجع لقوقعة فدار من جديد
اباوعلها شعرها لامته نازل منه كم خصلة على وجها عيونها واسعة مسحوبة مثل لون عيوني بس افتح بشرتها بيضة گطن ملامحها حادة مثل البغداديات
فعلاً جانت كُلش حلوة ...
وصلنا هناك نفتر بالشوارع وماما تسأل بأهل المحلات دخلنا مولات محد يريد موظفة ويا شقة نسأل عليها تطلع مؤجرة لو إيجارها غالي منگدر عليه
صارت دنيا الليل واحنا على نفس الفرة كعدت ماما عالرصيف دموعها تنزل بقلة حيلة نحجي وياها مترد
انهارت ..
خليت وگعدت كبالها ايدي على خدي واباوعلها شلون تبجي ما بيدي شي اسويلها لا لگينا شقة ولا لگت شغل
هدأت ساكتة وگعدت صافنة بالطريق لحد مدك تليفونها
شالته ردت :- ها ناهدة .. وينج بالبيت .. لا ملگيت
حجتها ورجعت انفجرت بجي ما اگدر اسمع الطرف الثاني بس اسمع ماما تحاجيها وهي تمسح دموعها
- اي وياج .. شلون وزوجج ؟ .. متأكدة ماريد ازاحمج وتعرفيني مو بحال روحي وياي اثنين بنات .. ها تمام لعد هسه مسافة الطريق يمكم مو بعيدين احنا
توادعت وياها نهت المكالمة وكامت تستعجلنا
شهربان :- وين ؟
- لبيت صديقتي
- منو هاي
- نوصل هناك وتشوفيها
- اعرفها لو لا
- شنو تحقيق هو ؟
اخذنا تكسي وماما انطته العنوان مسافة وصلنا لمنطقة سكنية أشرتله يوگف حاسبت ونزلنا مشت تتقدمنا
صارت گبال بيت ودگت الباب
مطول دقايق وانفتح طلعت مرة شابة تجي بعمر ماما صاحت بفرحة وحضنت ماما اثنينهن كامن يبجن ويتعاتبن بعدها باوعت النا وأشرت لماما بعيونها
شدن :- التوأم شبيج
فتحت عيونها بصدمة :- احلفي
ابتسمت ماما وتأشرلها علينا :- هاي ام عيون خضر شهربان واللخ الشگرة نورجان
- اووووووي لج شو نسوان صدقة شنو هاي كبرنج شدن
- شفتي شلون العمر يمشي ومحاسين بيه
- دسكتي يمعودة شكلج نفسه بأيام الكلية ولا كبرانة
اجت علينا بوستنا وترحب وتأهل بينا :- خرررب لج شدن نسخة مصغرة منج والنبي والنوب مو وحدة اثنين
- بس بالشكل الله وكيلج وحدة فالتة مينگدرلها واللخ عقلها ضارب اسأليها شتريگتي تگلج ما ادري
- اووووي لج عيني اگزگر اگزگز عالبنات فوووتوا فوتوا البيت بيتكم دادة الدنيا باردة لتمرضون
دخلنا جوة للصالة صغيرة بيها تخم بس مرتبة ودافية اني ونورجان گابلنا المدفئة الكهربائية مادين ادينا ندفى
رجعت هي بيدها دولكة مي انطتنا
وگعدت بصف ماما تستفسر عن أحوالنا
ناهدة :- احجيلي بلة شصار مصار شجابكم لبغداد شوكت اجيتوا من السليمانية والله من خابرتيني الصبح تسألين على شقة للإيجار انصدمت
بدت ماما تسولف الها من بداية موضوع زواجها من إسماعيل لحد لحظة طلاقها من العقيد ودموعها مسكتت تفاجأت معبالي ماما هالكد كاتمة بداخلها وناهدة ساعة تبجي وياها وساعة تصبر عليها
لحد مصاحت :- لج عيني دكافي شهالطاقة السلبية الزلم ما من وراهم بس الهم والكدر عوفيها وين متريد توصل خلي توصل
شدن :- على گولتج
مسحت دموعها :- اگلج صدك على طاري الزلم رجلج وين شو ما اله صوت
بعدها تحجي وصوت رجال فات من برة
صاح :- ننو حبيبتي وينج ؟
ناهدة :- ذكرنا القط قام نط اجه الشفيه
نورجان :- يصيحلج ننو ؟
- لويش مستغربة ترة دلع راقي بعدج مشايفة ننة وننوش
ضحكت ماما
رجعت ناهدة صاحت :- تعال كيمو حبيبي هياني هنا بالصالة
فات رجال ضعيف البنية شافنا وگف بالباب يباوعلنا
كامل :- السلام عليكم
ردينا السلام وگعدت مرته تعرفه علينا
- هاي صديقتي واختي شدن اللي سولفلتك عليها وهذول البزونتين بناتها
شو هذا نفخ روحه وعقج ملامحه عود جدي
- تشرفنا بمعرفتك مدام شدن
شدن :- هلا بيك عيني النا الشرف
- وتشرفنا بالبنات الحلوات الله يحفظهم الك كُلش جميلات
ناهدة :- طالعات عليها عيوني
- لا واضح ما شاء الله الله يحفظهم الك
شاورتني نورجان :- عود ليش يخبط لهجة عامية وفصحى ؟
- متأثر بكاظم الساهر
گامتله ناهدة لزمته من عكسه تتحايل عليه :- حبيبي كيمو عدنا خطار وجايين من طريق تطلع تجيبلنا عشا من برة ؟
- من عيوني انتِ والستات الحلوات
شدن :- لا يمعودة يا عشا قبل شوي اكلنا لفات عالطريق بس تعبانين والله نريد ننام گـاعدين من الصبح وعلى فرة وحدة تكسرنا تكسير
- شلون حجي هذا البنات خطية خاف جوعانات
باوعتلنا :- ها بزونات شنو مشتهيات ديجيبلجن عمو
كمال :- احجن عمو لتستحن بمقام ابوجن اني
همست :- اتخسه الأملط
درت وجهي مجاوبت ونورجان تستحي وماما تحجي ويَّ ناهدة حتى لتوصي بس مقبلت وهي وصته عالأكل
طلع ومرته رجعت النا ماما تلوم بيها
ناهدة :- ديلا يمعودة غرب احنا صدك جذب
رجع جاب العشا محتار شيجيب گعدنا كلنا بالصالة ملمومين بالگاع وهو على صفحة كاعد التخم
يباوع بالتلفزيون بس عيني عليه كل شوي عيونه
تجي علينا لحد مأشرتله مرته بعيونها حتى يگوم خاطر ناخذ راحتنا
اني مجنت جوعانة ولا ماما شفتها تنقش وياها
مجاملة ونورجان مخبوصة بجداحة توكل بيه
سولفنا هواي وضحكنا ناهدة سوالفها تونس ومن نوع سبورت روحها مرحة وخلصتها تحجي على رجلها وتشكي من ضعف شخصيته
شدن :- يمعودة كله شتردين وشتأمرين وانتِ ام الكلمة شتردين بعد
- شدن دخيييييلج يا كلمة نفسي مرة يضربني راشدي ينطيني دفرة يلزكني بالحايط نوووو شخصية صفررررررر عبالك اني الرجال
- عزة هاي شبيج صدك تحجين
21 تعليق
- والله العظيم مو شقة ..
باوعت للباب ورجعت اندارت نصت صوتها :- شدن موتني بالقرآن لا شخصية لا كلمة مثل الزلم البيت اني الگايمة بيه زايدة ناقصة زين هو شنو دوره
- اشو دا اشوفه زين وياج لتبالغين
- حقج انتِ معايشة وياه ومعاشرته لج شايفة گلوب يعطل بالبيت اني اصعد ابدله يتعاجز حظي لو فد غرض يعطل اگعد اصلح بيه والشفيه يوگف يباوعلي لو يناوشني بالعدة الشغل يروح يوم ويگابلني عشرة كل يوم طاردينه من شغله
- عزة لعد شلون عايشين منين دتصرفون
- اني دا شتغل واصرف عالبيت ومرات اخذ شفت اضافي على شغلي اسدد بيه الأيجار
- هذا إتكالي معتمد عليج
- يمعودة بعدج مشايفة شي
- وشعجب قابلة بهالوضع ومتطلگتي مو طبعج
تنهدت :- احبه شسوي
تقربتلي نورجان :- ايووو شحبت منه هي تخبل واحسه مبيه رجولة مثل عمو فدار وضباطه واحدهم شواربه تهف هف بصيحة وحدة منهم جسمي يگوم يرجف
- حرامات شواربه مبيهن موس
فتحت عيونها :- عزة بان اگعدي ترة والله اكول لماما
- يمعودة هن غير املأ الفراغات لتخافين ما اسوي شي
تأخر الوقت نعسنا فد مرة وكامت ناهدة تفرش النا بالصالة كالت :- اتحملوا بس اليوم الغرفة الثانية ممنظفتها
- والله دا احس مزاحميكم بلكي منا لباجر الگي شغل حتى اطلب راتب مقدم وأأجرلي شقة تلمنا
- شهالحجي شدن والقرآن راح ازعل منج بيتكم هذا شوكت معجبكم تطلعون لا يوم ولا يومين عسى ما العمر كله تبقون هنا
- ما ادري لو ما انتِ شجان سويت بروحي وبهالبنات
- اختي انتِ دُندن وبناتج بناتي
رفعت حاجبها :- رجعنا لدُندن ؟
- ههههههههههههه حارث جان يحب هالدلع وانتِ تتحسسين منه يكعد يضوجج بيه
باوعتلها :- تعرفين بابا ؟
- باع هاي تگولي تعرفيه حبيبتي جنت معشعشة ابيتكم ليل نهار حارث جان يشوفني اكثر من مرته حتى يوم ولادتجن جان مو بالبيت اني اللي ابتليت بأمج افرفر بيها بالمستشفيات واني الداريتها لحد الأربعين
من التعب نمت واني محاسة على روحي فتحت عيوني الصبح الشمس ضاربة بوجهي ، صوت ماما وناهدة يسولفن فوك راسنا نورجان بصفي رايحة ذابة روحها
شد انتباهي حديثهن ركزت وياهن وهن مستمرات يسولفن ما انتبهلي :- من سولفت لكيمو على طليقج كال شوداها عليه عشيرته هذا كلها ضباط من ولده لأخوته حتى نسابته نصهم بالداخلية
شدن :- وشگلج بعد يعرفهم ؟
- عائلتهم معروفة يسموهم بيت عزام الـ*** هذا يصير نسيبه لطليقج متوفي وولده خالهم اتكفل بيهم ورباهم لحد ما كبروا اخوهم الجبير عنده شركة مقاولات
والنوب لج دادة تعاي نسابتهم كلها سادة وميدخلون غريب لشغلهم بس جماعتهم خيرهم يسد عين الشمس عندهم سلسلة عقارات حتى هنا بـ بغداد وبالشمال
- اي يمعودة مو شفت البيت الگعدنا بيه يصفن شنو من حداثة من أثاث كله آخر موديل
تنهدت :- ايه الله يزيدهم
- بعد شحجالج عنهم
سألتها بنبرة شك :- شدن هواي دتلحين بالسؤال عليه احجيلي الصدك انتِ تحبينه ؟
جرت حسرة طويلة :- جذب اذا اگلج مجنت مرتاحة وياه بيت دافي وبناتي بحضني ولا سالم ولا غيره يگدر يتقرب النا بوجوده جنت احسب صار عدنا سند
وعيشتنا تعدلت عفت حتى الشغل لخاطره وصرت ربة بيت ومشيت مثل ميريد في سبيل يتقبلني ويتقبل وجودهن بحياته بس من توصل يخيرني بوحدة بيهن هنا اگله .. طُز بيك وبعيشتك
- بس والله دندون الله يحبج وخلصج انتِ وبناتج منهم ذولي تحكمهم عشاير عيشتنا تختلف عن عيشتهم وتفكيرنا غير تفكيرهم يباوعون للمرة بالعين الصغيرة وميحسبولها وجود
- يمعودة اسأليني اني يستحكم ويفرض سيطرته يحب يحس نفسه هو المسؤول عليج دائمًا وميريدج تعتمدين على روحج حتى تلتجأيله بكل وقت
- متشوفينه مخلاج تشتغلين
سكتت شوي جرت نفس :- بس الصدك غير ؟ والله جان مدللني بالأسبوع مرتين طلعة مرة مطعم مرة كورنيش مرة مولات يشتري الحاجة قبل لا اطلبها منه وقبل لتصير سالفتنا جنا مقررين نطلع سياحة لأربيل كم يوم نونس البنات گال خطية ضايجات
ناهدة :- لج دادة هذا خلي يحكم عليّ منا لحد ما اموت شريد بعد على هالدلال
- ما ادري جنت اخاف منه مرات رغم حنيته عليَّ تجيه حالات يفقد بيها من يجيله تليفون يصير عصبي حيل ويفصل بعد فنج تفتحين حلگج كدامه كم مرة حاولت عود اهدأه وزمخ بوجهي ومرة ضربني راشدي خلاني اصطك وزعلت منه تالي يرجع تالي الليل يگعد يراضي
- عزة بعينه وصدك ضربج ؟ حارث سنين وياه وعشرة عمر ما يوم رفع صوته بوجهج لو فد يوم شكيتي منه
تنهدت بحسرة :- دتشوفين هو هنا مربط الفرس جنت دائمًا أقارن تصرفاته وتعامله بحارث رغم أمكانيته المحدودة بس جنت عايشة بدنيا غير وياه جانت نظراته الدافية كافية تثبتلي حبه بس فدار ما ادري احس حبه رغبة لا أكثر مع انه مجان مقصر وياي بشي وحتى من يريد يحجي لو يتغزل انتِ وانتِ يسويج ملكة زمانج
- هسه انتِ دتسألين عليه حنيتيله لو شنو بالضبط اشو صايرة مدا افتهمج
- ما ادري والله بالي يمهم مبينة مشكلتهم جبيرة شبير خابرني الصبح يسأل علينا ويوصيني اذا احتاج شي اخابره بس حتى من سألته عالمشكلة مالتهم منطاني جواب يشفي وحاول يتهرب
- يمعودة عوفيهم نارهم تاكل حطبهم عليش مضايقة روحج تفكرين وتهمين بيهم خلص انسي صفحة وانطوت
- هو هيج
- دگمي لعد گعدي بناتج دا احظر الريوك حتى نطلع ندورلج شغل هم يلا نلحك على ساعات دوامهم قبل الظهر
كعدنا تريگنا وتحضرت ماما وطلعن هي وناهدة من البيت زوج ناهدة طالع ضليت راسي وراس نورجان شفتها مندمجة بتليفونها تلعب لعبة باوعتلي
نورجان :- ها
- اريد تليفونج
- عليش ؟
ضليت ساكتة افتهمتني عفست وجهها :- اهو بان وخري ماما مو گالتلج كفي من محمد
- بس اطمئن عليه سافر لو لا بالي يمه
- خيولي
- لتغلطين عليه
- والفشار والسب بمحادثتكم ؟
- اني اغلط بكيفي غيري لا
هزت ايدها وانطتني التليفون :- والله يا الله
ركضت على صفحته طلعتها ناشر صورة قبل يوم ويَّ أصدقائه واصل بأسطنبول ، دزيتله اوكي دقايق واتصل
فتحت خط :- اكو بنات وياك بالصورة
محمد :- صادوك وانتَ النچر
- منو ذولي هم گول خواتي
- اذا تعرفين بعد ليش السؤال تدرين كل بنات الكرة الأرضية خواتي
- تغشم روحك محمد شنو الگدامك زوج
- حشاج يروح محمد خرب لج والقرآن مشتاقلج وجنت محضرلج علبة قبل لا أسافر
- همممم شوكت وصلت
- بيوم الأجيتج بيه جانت طيارتي الصبح احجيلي انتِ شصار وياج من وراي
- لا والله كلفت روحك
- هاي شبيج جنت ملتهي والله ومگدرت اتصل
سولفلته بشكل مختصر جان يمة صوت أغاني عالية وضحك بنات گتله :- روح محمد الظاهر عطلتك عن خواتك
- افتحي كام
- ولي
صاح :- افتحي لج
فتحت كاميرا كاعد بالگاع منتجي على تخم صدرة عاري المكان أظلم يمه بس گوب واحد ملون ودخان تارس الغرفة شافني ابتسم
- فدوات اروح لهالعيون
- وين انتَ
- بشقتي
- شدتسوي
حك شعره شوية مغمض تك عين وضعه مو طبيعي عيونه ناعسه وحمر شكله مخربط همست :- دتشرب ؟
- لا
صحت :- محمددددد
- آخر كاس وعيونج
حجاها وشاله بيده يشوفني وشربه سفته وحدة خطفت من وراه بنية بالداخليات كمت اكمز
- منو هاي محمد
- يابة شبيج مو دا اكول اختي ليش تباعيلي هيج شنو ممصدگة هسه اشوفج
صاحلها بأسمها ومدري شحجة وياها بالتركي لحظات واجت لطشت روحها يمه تباوع للكاميرا ، انتبهتلها لبست تيشيرت فوك ملابسها بس التيشيرت هذا اعرفه مالته گمت افور واكل بشفايفي بحرگة وقهر
تباوعلي وتبتسم سوتلي هلو بيدها واندارتله تسأله وهو يجاوبها لزمت وقفلت الخط بوجههم ، انتبهت لنورجان مگابلتني وتباوعلي متخصرة
- ها ارتاحيتي ؟
- روحي مني نورجان مالي خلگج
- مراح تجوزين الا يدمرج ويتلف اعصابج يلا تدرين بيه واحد ابو بنات
... 《 نورجان 》 ...
اخذت جداحة وطلعت للطارمة اشتم هوى انفتح الباب وفات زوج ناهدة جفلت شافني ابتسم واجه يتقدملي
كامل :- شلونج بابا منو بيهن انتِ نور لو بان
- نورجان
- شنو هالأسم الجميل حلو مثل وجهك
- شكرًا
- فوتي بابا الجو بارد لويش هنا حتمرضين
مرتاحيت لنظراته ابد وجوده مضايقني گتله :- لا حبقى هنا شوي اشم هوى اختنگت جوة
جنت كاعدة بالگاع ويمي بزونتي تلعب بحضني اجاني دنك بمستواي ومد ايده عالبزونة گمزت بسرعة وكفت
- شبيج حبيبتي لويش خفتي
رعشت شفايفي :- بردت حروح جوة
حجيتها ورحت اركض بسرعة شافتني بان عقدت حاجبها :- شبيج ؟
- طلعت برة وبردت
ما اهتمت زايد جان بالها بغير مكان لحد مفات كامل للصالة عينه عليَّ كال :- شلونهن الحلوات
شهربان :- الحمدلله
- محتاجات شي اجيبلجن من الأسواق
ردت بنفور :- لا
- ليش خلي اجيبلكم حلويات ولو انتن حلاتجن طاغية متحتاجن
- گتلك لا ليش تلح ؟
بان تحاجيه من ورة خشمها ما انطته مجال سدتها بوجهه فد مرة عاد هو حس وگال :- براحتجن بابا اخذن راحتجن اني بالغرفة اي شي تحتاجونه تعالولي
راح يمكن اقل العشر دقايق واجه للصالة گعد عالتخم يتابع تلفزيون بس جذب ان جان منتبه مشال عينه مني ابد ويوزع ابتسامات من جوة لجوة اجيت اتقيء
لاطشة روحي بشهربان نتصفح بالموبايل وكل شوي ارفع عيني اشوفه عينه علينا عطشت ردت مي
حجيت بصوت ناصي :- بان عطشانة
- روحي اشربي برادهم بالمطبخ
- تعاي وياي
- صدك جذب هسه لو دنيا ليل عاذرتج يلحگج جني بالنهار شكو
- حبابة ..
ما اهتمت ورجعت عينها بالموبايل گمت لوحدي شايلة بزونتي دا اعبي بالگلاص حسيت بحركة وراي درت بسرعة شفته واگف على مسافة مني لزمت صدري
حجيت بخوف شفايفي ترجف :- ها عمو
- عطشت اجيت اشرب مي
وخرت سويتله مجال وتوترت حيل معرفت بعد شسوي شربت شوي ايدي گوة وصلت لحلكي من الرجفة الصارت بيها ابتسم اخذ الگلاص من ايدي وشرب منه
فاتت بان صاحت :- وين صررررررررتي
غص بالمي وكام يكح بصوت عالي واندارلها
كامل :- جفلتيني عمو هو هيج
- اوي جفلته الزم روحك عمو لا تتخربط وانتِ امشي گدامي
طلعنا اثنينا تقربتلي تحجي بصوت ناصي :- شسوالج ؟
- مسوة شي
- گلبي مرتاحله من شفته گام وراج
- خيولي لتهتمين
- لتضمين عليَّ نورجان اقل حركة منه تجاهج تجين تگوليلي لو تگولين لماما لتضلين ساكتة مبين فد واحد منحط وزايعته الگاع
مر ٤ ايام على جيتنا لبيت ناهدة وماكو شي تغير على وضعنا ، لليل فاتت ماما كعدت بالصالة مخنوگة وتبجي وناهدة وراها تحجي عليها تريد تهدأها
- شصاير ماما ؟
5 تعليق
ناهدة :- ماكو مدا نلگه شغل زين لو راتبه يكون قليل لو ساعات العمل متأخرة
نزعت قمصلتها وكعدت عالتخم تاخذ نفس
كملت كلامها :- گبور شلون نفسيات كلها تريد تستغل العامل ابشع استغلال
- يعني ملگيتوا شغل ؟
- بعد فرة طويلة لگينا معمل گالولها تشتغلين من ٨ الصبح للـ ٥ العصر والراتب شگد ؟ ٢٧٠ ألف يعني تشتغل ١٠ ساعات باليوم لمدة ٦ أيام بالأسبوع علمود براس الشهر تحصل ٢٧٠ الف تفاليس ادري وين ينصرفن ذولي هي بس الكراوي ينراد الها فوك الـ١٠٠ ألف بالشهر
شدن :- وفوكاها مدا الگه إيجار كلها تريد دفع مقدم واني ما جوة ايدي فلوس شلون ادبرها شلون راح اصرف عالعيشة كلت اجي لبغداد الگالي شغل براتب عالي واطلب مقدم وأأجر شقة صغيرة نوب اني ام الراهي وأتشرط مجان ابالي هالگد صعب الگي شغل هنا
حجتها خلت ايدها على وجها ورجعت انفجرت بجي جانت منهارة حيل صار كم يوم على نفس الرنة يطلعن من الصبح يدورن يرجعن للظهر فحطانات ويردن يطلعن العصر ميرجعن الا تالي الليل هلكانات من الفرة
ناهدة رغم ممحسستنا بالعكس كُلش متونسة بينا بس احنا ممرتاحات زوجها حركاته مو راحة وبان هم بدت تلاحظ ومنتظرة زلة منه حتى تتمشكل وياه ومراقبته
صفنت بعدين تذكرت الجنطة الانطاني ياها شبير ضربت گصتي وصحت :- ياااااااااااا شلون نسيت
باوعولي مستغربات ركضت للجنطة مال ملابسنا حاطتها آخر شي ممبينة طلعتها ورحت گدام ماما
تباوعلي مستغربة ..
شدن :- شنو هاي ؟
- مؤخرج شُبير انطانياه كال من عمو فدار
اخذتها بسرعة فتحتها جانت بيها سفطات فلوس وكلها بالدولار باوعتلي صافنة :- نورجان ماما ثولج وراثة لو تعلوم ؟
بهتت :- ها
- شـ ها صدك تحجين وين جنتي من دتشوفيني صار كم يوم أفر بأذني مخليت مكان يعتب عليَّ واتوسل باليسوى والميسوى خاطر يقبل يشغلني عنده
كامت تصيح عليَّ انهضمت ودنگت مقهورة
همست :- والله نسيت
كامت تحجي عليها ناهدة وتگلها :- عليش دتصيحين عليها صوجج انتِ شلون تطلعين من بيته بدون متاخذين المؤخر وتخلينه بيدج
- شمدريني راح من بالي بيومها
- هي هم ما اجه ابالها لتگعدين تلوميها ركزي بالبيدج شوفي ربج رجع فتحلج باب على عين بناتج ومن باجر نطلع ندور شقة ضوجتوني ترة اوي
- والله حقج اعرف مزاحميكم وثگلنا بكعدتنا
- اهو دنجبي اشاقة شبيج والله متونسة عليج وعلى بزازينج مليتوا علينا البيت اني وكيمو
خلصنا الليل و ماما تسولف النا شراح تسوي وتخطط لحياتنا الجديدة نبني أحلام وردية ما بيها بس احنا الـ٣
ثاني يوم گعدن الصبح واجتنا للغرفة توصي بينا تحجي بصوت ناصي :- طلعة منا ماكو لحد ما اجي حتى التعوز تدخل حمام الثانية تلحگها ممنوع منعًا باتًا وحدة تبقى بمكان لوحدها زين لو لا
- وهذا شنو حيگابلنا اليوم ؟
- معليج بيه غير بيته شنو انطرده النوب
- ما ارتاحله
- استغفر الله بان مالي خلك مشاكل اكعدي واگرصيها اتحملن بس اليوم أشوفلي شقة ونخلص لتتمشكلين ويَّ الرجال ابتعدن عنه وهو ميتقربلجن احنا منتأخر للظهر راجعين للبيت
بان معاجبها تنافخ وعينها بالسگف
صاحت :- دتسمعيني بااااااان شدا الغي ؟
- افتهمنا
- نشوف بلة
راحن وزوج ناهدة گاعد بالصالة ماخذ اجازة من شغله
وكل شوي فتح الباب وفات للغرفة بحجة خاف محتاجات شي لحد مقفلت بان الباب اجه دك دك محد فتحله من شافنا ممنطياته وجه خلى وراح لوحده
الظهر رجعت ماما تضحك لاگية شقة مأجرتها ومتفقة ويَّ صاحبها هاليومين ننتقل بيها بس تريد تجهزها أول
من الفرحة طلعنا تغدينا بمطعم ورحنا للمول تونسنا حيل ما رجعنا ألا لليل هلكانين ذبينا روحنا عالنوم
بالليل فزيت الدنيا ظلمة بان وماما نايمات كمت على كيفي اعتازيت حمام ، طلعت من الغرفة البيت ظلمة يخوف ما بيدي بس فلاش الموبايل حسيت بأيد على حلگي تكتم صوتي وانرفعت عن الگاع دخلني للحمام
وخر ايده باوعتله فاتحة عيوني واشهك النفس گوة اريد صوتي يطلع من الرعبة معرفت شسوي جمدت بمكاني واني اشوفه ينزع التيشيرت ويباوعلي
گصني گص يحجي بصوت اقرب للهمس
كامل :- والقرآن اباوعلج صار كم يوم عقل ما ضل براسي كوة لازم روحي عنج
تقرب عليَّ اكثر رجعت انلزك ظهري بالحايط سنوني تطك سن بسن والعرك يتصبب من وجهي صرت گوة اجر النفس لازمتني الرجفة
همست :- عمو
- اووووويلي يصوتج شكد ناعمة دخيل هالترافة شنو انتِ متكوليلي لعابة خما لعابة شو بلة تعالي...
... 《 شهربان 》 ...
سمعت صوت عيطة من برة فزيت مرعوبة ، باوعت لماما كامت قبلي گوة مفتحة عيونها :- هاي شكو
باوعت مديت ايدي بصفي المكان فارغ فزيت بسرعة
- صوت نورجان ماما نوررررجان ما هي
حجيتها وطفرت طلعت من الغرفة اركض لمصدر الصوت سمعت بجيها من الحمام رحت دفرت الباب
لگيته حاصرها بالزاوية ايده على حلگها
يريد يسكتها وهي تقاومه تحاول تفلت روحها
باوعلي فاتح عيونه عافها بسرعة معرف شيسوي
شهربان :- دوووووووني شسويتلها
ارتبك :- مسويت شي عاطت واجيت اشوفها
ناهدة :- هاي شكو كامل
مشى ديطلع ويحجي وياها اول موصل للباب اجسته من ورى لزمته من فانيلته وصرت وراه انطيته چلاق من ورة اندفع برة وگعته يم رجلين مرته
مگابلة الباب وتباوعله عيونها تفور
4 تعليق
رفع راسه عليها :- ننو والقرآن هي جانت خايفة وصاحتلي اجي اوكفلها حتى اسأليها
ركضت ماما بخوف على نورجان اللي احسها فاقدة ترجف تررجف وتباوع لوجها تگلب بملابسها مبيهن شي ، ضربت وجها وتصيح عليها تريدها بس تنطق
گامت على كامل تضرب بيه وتصيح
شدن :- چلب ناقصص شسسسسويت بالبنية
- بنتج صاحتلي معليَّ اني
من حجة هيج جابته براشدي فرته فر اجه بهمة يريد يلگفها ركضت عليه لزمت ايده عضيتها بكل قوتي صاح بعلو صوته ودفرني ابطني شمرني بالگاع واجاني لزمني من شعري ومرته تصيح عليه ولازمته تريده يعوفني
گمزنا على طبة قوية بالگاع اباوع لنورجان فقدت
اغمى عليها ، تراكضنا عليها كلنا وماما تضرب بوجها
ركضت ناهدة تأجر تكسي اباوع لماما
وجها احمر ودموعها تنزل صاحت بيه بتهديد
شدن :- وكلام الله بنتي لو صار بيها شي سجنتي تصير بتهمة قتلك
اجت ناهدة تركض موكفة تكسي طلعنا نركض بيها جبت جنطة ماما باوعتله قبل لا اطلع لازم ايده يتلوه من الوجع بصقت عليه وطلعت صعدت وياها
رحنا بس اني وماما كاتلنا الخوف عليها هاي متتحمل من كُلشي تموع روحها وخايفة لا هذا الچلب جايسها
الطريق مدري شلون خلص من الدموع وصوت ماما اللي كل شوي يستعجل السايق وهو يحاول يطمأنها
وصلنا للمستشفى فاقدة البنية ولا فتحت عيونها دخلوها جوة الدكتور فحصها وطمأنا عليها
گال :- لتخافون حالتها متستوجب اصلاً تبقى بالطوارئ
گعدت لامة رجليها لصدرها ومدنگة تنحب بصوت ناصي
شهربان :- كافي ماما والقرآن طلعتيها لروحي مو دتشوفين الدكتور كال زينة
- اني صوجي عفتجن كدامه هالحيوان شافها فطيرة ومفهية گام استغلها
- يخسي هالحرمة يجيسها لو مسويلها شي جان بين
- فاقدة وجها اصفر رايح منتهي متتحمل حبيبتي روحها ترفة ثاني مرة بان هاي المرة الثانية وهم مگدرت احميها منهم
- اهدأي ماما الله يخليج هسه تگعد لتخليها تشوفج هيج عودتينا نشوفج قوية متنكسرين من أي موقف خليج مثل متعودنا عليج
اخذتها غسلت هدأت شوي ، گعدت نورجان رحنالها للغرفة عيونها گوة تفتحهم حلگها ابيض من الهبطة
حبيبتي معلگيلها مغذي باست ماما راسها
وكعدت يمها تهمس يم اذنها بس مدا ترد
لزمت ايدها :- انتِ زينة ؟
هزت راسها
شدن :- احجيلي ماما سوالج شي خما جاسج لتبقين ساكتة دا اتصرف وياه
بجت أشرت لماما بيدي مو وكتها ، عفناها براحتها اهم شي هي زينة والممرض كل شوي يجي عليها يشاقيها يغير من نفسيتها عاد شوي يلا فكت ، نامت شوي
ورجعت گعدت وماما وياها تغفي گوة مفتحة
الدنيا صارت الفجر بدت الجوامع تقرة قرآن وتردد نداء الصلاة :
{ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا } ...
گاعدة واهز برجلي بأعصاب تالفة عيني على نورجان لحد مسمعت المؤذن صاح : الله أكبر .. الله اكبر
گمت على حيلي منتظرة هالجملة من ساعات طويلة
رحتلهن :- ماما اريد فلوس
باوعتلي تتثاوب نعسانة حيل
شدن :- شتسوين بيهن
- دا اشتري جعت
- ماكو شرايتيش بهالوقت .. اگعدي
نورجان :- اني هم جوعانة ماما
- بسم الله صحت
- دنطيني اكو اسواق جوة مفتحة اجيب كيك وعصير نسد جوعتنا
فتحت الجنطة انطتني خمسة رجعتها وسحبت عشرة صاحت من وراي غلست وعفتها طلعت من المستشفى وگفت عالشارع اريدلي سيارة بالشافعات يلا واحد وگف
صعدت وانطيته العنوان وداخلي يفور يفوررر واريد بس اوصل ، وصلنا لراس الفرع وگفته نزلت بسرعة
صاح وراي :- الكروة يبنية
درتله :- تريد كروتك اوگفلي هنا هسه اجي
صاح وراي تجاهلته مشيت لبيتهم بدت تطلع الشمس جان بصفهم بيت هيكل ديبنون بيه وطابوك مكوم بالگاع رحت شلت كم وحدة وصرت گبال سيارته
شلت طابوگة وشمرتها بكل قوتي تفلش جام السيارة الامامية ولحگتها بطابوگة والثانية وكعت كل جامها
كمت اصيح :- اطلععععع كامل الناقصصصص
الجوارين طلعوا عالصوت وناس وگفت تباوع انفتح الباب وطلعوا هو ومرته شاف السيارة تخبل كام يصيح عليَّ ويتقدملي شلت طابوگة شمرتها عليه ما اجت بيه
كامل :- شبيج بنت الككككككلب
- شسويتلها
اجتني ناهدة وتباوع داير مدايرنا :- شبيج انتِ بعقلج تعاي جووووة ونسولف
- وخرررررري انتِ
- لتزوملين بان كتلج نفووت جوة ونسولف
- گتلج وخررررري
تقربت همستلي :- خلينا ساتريها احسن ترة اختج هي المتوددتله ومجرجرته للحمام
صفنت عليها :- وصدگتي ؟
- خليني ساترة اختج لا افضحجن بالمنطقة عيب شيگولون العالم استضافت صديقتها وبناتها ابيتها وحطن عينهن على زوجها يردن يبوگنه منها
- عليج الله ؟
- مثل مسمعتي انضبي وولي منا واخذي ملابسكم وياكم
اجاني :- روحي بان واخذي غراضكم هم بيتنا يتعذركم ما اتشرف اكعد گحاب ابيتي الناس شيكولون عليَّ
- احنا گحاب مو ؟
دنگت شلت طابوگة بسرعة ابتعد يصيح يمنعني
صحت :- شسسسسسويتلها
- وخررررررري يالمخبلة يا ناس يا عالم اشهددددوا هاي مخبلة هادة عليَّ مفلشة سيارتي و تريد تكتلني
شمرت الطابوگة اجت بالباب مال شارع صحت
- الطابوگة اللخ براسك احجييييييي شسويتلها
- اختج هي الصاحتلي
شلت طابوگة لخ اريد اشمرها صاح :- تحرررررشت بيها اني تحرررررررشت بس وخريها
- صيح گدام العالم
كز على اسنانه :- يا ناس اني تحرشت بأختها
- صوووووووت عالي
- اني متحررررررش تسمعوووووون اني متحرررش بأخت هاي البنية ارتاحيتي يلا وخرررررري
رفعت الطابوكة شمرتها بكل قوتي عليه صارت كباله ناهدة اجت براسها وكعت بالكاع دمها بطولها ركضت بكل سرعتي شاردة واباوع وراي الناس التمت عليها وصلت نهاية الشارع صعدت التكسي الرجال مستغرب
صحت :- بسرعة عمو امشي...
