رواية كيف تصطادين عريسا الفصل الخامس بقلم مريم سمير
معاذ : أنا اتبسطت اوي بالكام ساعة الي فاتوا ، وكمان مبسوط اني دلقت القهوة عليكي
ضحكت وانا مش فاهمة : نعم؟؟
معاذ : لولا كده مكنتش عرفتك
أحمد : الله الله ، وايه كمان؟؟؟
انجي : بابا!!!!! أحمد!!!!
نزلوا من العربية وكانوا لسه هيتكلموا بس احمد قاطعهم
_ أنا مش قادر اتخيل ، إنجي!!!! وصاحبي!!!! وفين ؟؟؟؟ في الشارع ؟؟؟؟
انجي : طب ايه نحط موسيقي تصويرية ؟
_ وكمان بتهزري ؟
معاذ : لاء هي بتتكلم بجد ايه الأداء العار دا يا احمد؟ حصل ايه ل كل دا ؟
_ حصل ايه؟ حصل اني شوفتكم ب عيني دي وانتوا..
انجي : أيوة؟؟؟؟
_ ودلوقتي السعادي الناس تقول عليا أي؟؟
معاذ : الساعة تسعة!!
_ يا عمي متخلص بقي وعمر المسدس وهات رقبتهم أنا زوري وجعني والله
حسين ( بابا انجي ) : كنتي فين يا انجي ؟
انجي : كنت في عرض ازياء يبابي
_ لا حول ولا قوه الا بالله، بابي؟ وازياء؟
انجي : ما حد يسكته بدل ما اعدمهولكم العافية يجدعان !
حسين : وايه الي موديكي مع معاذ؟
معاذ : لاء يا عمي أنا كنت هناك وشوفتها ف حبيت أوصلها عشان متجيش لوحدها دلوقتي
حسين : كتر خيرك يبني
_ أيوة كده و ايييييي؟؟؟؟ ، كتر خيره ؟ طب وانا ؟؟ أنام ازاي بعد الي حصل ؟
حسين : حصل ايه يبني ؟؟
_ انجي المفروض كنت أختار بينها وبين اتنين كمان ، دلوقتي بعد الي جري دا افكر فيها ازاي؟
انجي : يعني لولا أني خايفة أن الاوتفيت يجراله حاجة كنت سجدت سجدة شكر أنك مش هتفكر فيا ب أمانة ، دا ايه الأوفر دا
_ أوفر؟ كتر خيرك يا انجي ، كتر خيرك يا معاذ
معاذ : هو انا جيت جمبك دلوقتي؟
معاذ بص ل عمو حسين : عمي أنا.. كنت محتاج اجي اشرب الشاي مع حضرتك
انجي بصيتله بصدمة : ايه؟؟
_ لاء مش وقت صدمات ، الف مبروك يا اخويا، أنا انجي دي طول عمري اقول أختي
معاذ : بجد والله؟
_ كنت بعمل كده عشان كله يمشي بالحلال يا ابن الحلال ، ومدام الموضوع هيبقي in public وفيه feeling يبقي تمام يحبيب اخوك
معاذ : منا خدت بالي وهشيلهالك جمايل
غمزله _ مفعولها أثر عليك في تلت ايام بس؟
معاذ : ابوها واقف
_ اه صح ، احممم ، اديله ميعاد يجي يشرب معاك الشاي يعمو أنا مسامح
حسين : بعد كل الي عملته؟؟؟
_ بس مسامح والله يلا زي بعضه
حسين : تعالي بكرة يبني إن شاء الله
معاذ : متشكر جداً يا عمي ، أنا مضطر استأذن دلوقتي، هاجي لحضرتك الساعة تمانية مناسب؟
حسين ؛ اه تمام إن شاء الله
ساق عربيته ف رجعت العيلة كلها تبص لبعض ، مرة واحدة انا وبنات خالاتي اتلمينا حوالين انجي واحنا بنهلل
سلمي : كده بقي فيه عروستين في العيلة مرة واحدة
انجي : أنا لسه موافقتش!!
عمو حسين بصلنا وقال : بس بس ، اطلعوا علي فوق يلا
طلعنا فوق ودخلنا الاوضة بتاعتنا
ليلي : احكيلنا كل الي حصل بالظبط
شهد : مستلطفاه؟ عاجبك يعني ؟
سلمي : ما اكيد انتي مشوفتيش عينيها منزلتش من عليه
انجي : أنا؟؟ لاء طبعاً، دا عشان كنت.. مخضوصة
مريم : بس مبسوطة؟
انجي : مش عارفة ، بس انا محستش ب كده لما قالولي إن احمد نازل والمفروض يختار بينا
ليلي : والله يا انجي ما فيه واحدة مننا حست ، يلا الله يباركله سمير
بصينالها وضحكنا : يباركله بس؟
ليلي : خليكوا فيها وخلوها توافق أنا وافقت خلاص
سلمي : والله يا انجي أنا شايفة أنه عريس ميتفوتش
شهد : وانا كمان ، طول ب عرض ووسيم وشيك جدا وكمان ذكي ولما اتكلم قدامنا في المطعم وفي العزومة لاء بجد دماغه نضيفة
انجي : ولا كأنه حلم ، مكنتش اعرف اني هخبط في الراجل الي هيتقدملي!
مريم : عشان نصيبك ، ربنا مرتبها عشان تشوفوا بعض وترتاحوا لبعض
انجي : وعرفتي منين اني مرتاحة؟
مريم : لو مكنتيش مرتاحة كنتي اعترضتي ، ما كلنا عارفينك مستحيل تعملي حاجة مش علي هواكي
انجي : هو.. شاب لطيف بس انا مش عارفة اعمل ايه ، هو المفروض اعمل ايه؟
مريم : سيبكم من المفروض، امشوا ورا الي حسينه ، ياما مشينا ورا العقل كنا خدنا ايه يعني ؟
بصولي وهما مستغربين
ليلي : بس انتي دايما بتمشي ورا عقلك وشايفة الجواز دا نهاية كل حاجة حلوة ممكن الست تحسها!
مريم : عشان.. سمير أنا عرفاه وكويس واعتقد معاذ شاب كويس كمان
انجي : بس عشان كده؟
مريم : هيكون عشان ايه تاني؟ ، بقولكم ايه احنا بنتكلم في موضوع انجي دلوقتي ف خلونا فيه ، ها هتلبسي ايه؟
انجي : أمتي؟؟
مريم : اه انتي مغيبة؟ معاذ جاي يتقدملك بكرة ف لازم تجهزي وتعرفي هتعملي ايه
انجي : مش عارفة بس الي اعرفه اني عاوزة أعرفه أكتر واني كنت مبسوطة ب الكام ساعة الي فاتوا
مريم : يبقي توافقي ، جربي يا انجي مش هتخسري حاجة
انجي : تفتكري ؟؟
سكتت وانا بفتكر احمد، كلامه ، وأنه بس عاوزني احاول! ، أنا ليه بقولهم كلام مبنفذوش عندي؟ وليه مع الرغم من كل الي احمد بيعمله عشاني مش قادرة حتي أخد قرار ليا؟ يمكن عشان لسه خايفة؟ ولا يمكن عشان مش عاوزة أخسره؟
انجي. : مريم؟؟ سرحتي فيه ايه؟
مريم : ها؟ ولا حاجة
ليلي : طب يلا ننام عشان شكل بكرة اليوم طويل
كل واحدة راحت علي سريرها ونامت بس انا فضلت صاحية، هو انا مبسوطة عشان احمد موجود ؟ أيوة ، متأكدة أنه كويس؟ أيوة ، محسسني أنه عاوزني أنا وبيحاول كل ما تيجي فرصة؟ بردو أيوة، كنت أنا العلة الوحيدة ، بس ازاي الواحد يتطمن بعد ما قضي عمره كله خوف ؟؟
صحينا الصبح وبدأنا نقلب الشقة كلها عشان التنضيف ، شهد اكتر واحدة تعبت بحكم انها بتعرف تخلي البيت نضيف جدا وبتعرف ازاي كمان تغير من شكله، أما أنجي ف كانت بتجهز نفسها ، ليلي بتعمل حاجات للعشا ، قعدت في البلكونة وانا باصة قدامي ، طلعت النوتة وبدأت أكتب بس معرفتش ، قفلت النوتة وانا بنفخ ف احمد جه وقف جمبي
_ مالك؟ انتي كويسة؟
= ضحكت ايه الي عملته امبارح دا ؟ طب كويس انك بقيت مهندس عشان تمثيلك وحش اوي بجد
_ متهزريش
= والله أنا كنت ماسكة نفسي من الضحك بالعافية ، وكل شوية تشوح ب ايدك هو ايه يا احمد احنا فين هنا؟
_ ما عشان نوفق راسين في الحلال
= أنا مبسوطة اوي عشانهم ، ربنا يهنيهم
_ وانتي؟
= أنا ايه ؟
_ مش ناوية توافقي ؟
= أنا هدخل اساعدهم جوا عشان..
_ لاء يمريم ، المرادي مش هسيبك تمشي زي كل مرة ، أنا عاوز إجابة النهارده
=..
_ أنا مستعد استناكي بس اكون عارف انك هتحاولي ، مريم.. متخافيش ، أنا بحبك بجد والله ، هيبقي فيه مشاكل بس هنعديها سوا ، ولما نتجوز مش معني كده انك بتخسريني ، فكري يمريم
= لو.. موافقتش ايه ممكن يحصل؟
_ ولا اي حاجة ، اهم حاجة تكوني انتي مرتاحة ، بس ساعتها مش هعرف أقعد تاني
= يعني ايه؟
_ هسافر
سابني ودخل جوا ، هيسافر!! ، فضلت قاعدة لي البلكونة سرحانة وبفكر ، مرة اقول أيوة وعقلي يرد يقول مستحيل ، هيبقي زي باباكي وبنتك هتبقي زيك ،
بليل بدأت انجي تجهز وكلنا نجهز معاها ، الساعة دقت تمانية علي وصول معاذ ، قعد مع باباها ورجالة العيلة واتفقوا ، باباها دخل علينا الاوضة وبص لإنجي
حسين : موافقة يا انجي؟
_..
حسين : أنا هعمل الي انتي عوزاه ، اهم حاجة تكوني مبسوطة
حضنته : موافقة يا بابا ، ربنا يخليك ليا
معرفتش اتحكم في عياطي ، هو الحضن دا كان كتير اوي لدرجة اني مجربوش؟ لو كان بابا عمل معايا كده ولو مرة واحدة يمكن حياتي كانت هتبقي طبيعية تاني .
الزغاريط ملت المكان ، حضنا انجي وباركنالها ، قرأنا الفاتحة واتفقوا خطوبة ليلي وانجي يبقوا في نفس اليوم هنا في البيت العيلة ، كنت مبسوطة اوي وانا شايفة انجي قاعدة جمب معاذ ومعاها بوكيه ورد يجنن ، وليلي بتكلم سمير علي التليفون بتحكيله وتقوله إن الخطوبة خلاص بعد يومين ، الحياة بتبقي أخف ب كتير لما نلاقي حد بيحبنا ، بيحاول عشانا ، عاوزنا ومش عاوز غيرنا ، انجي وليلي مش كانوا بس مبسوطين عشان لقوا سمير ومعاذ ، كانوا مبسوطين عشان كل واحد فيهم عرف يحسس كل واحدة أنه عاوزها ويمكن دا اجمل احساس في الدنيا .
الصبح بدأنا نعزم الجيران والقرايب
° سلمي ، سلمي
_ أيوة يا ماما ؟؟
° دي ليسته ب الطلبات كلها الي لازم نشتريها عشان العشا الي هيتعمل للعرسان وأهلهم
بصت علي الليستة _ كل دا ؟؟
حطت الفلوس قدامها ° اجي معاكي؟
_ لاء يحبيبتي خليكي ، هروح أنا واجي بسرعة
° أيوة متتأخريش يحبيبتي عشان الخضار عاوزينه ضروري للأكل
_ حاضر ، هلبس ونازلة حالا
_ في السوق _
دخلت السوق وبدأت ألف علي الخضار والفاكهة الي محتاجينها عشان الخطوبة ، بدأت اشتري ومرة واحدة لقينا السوق متجمع عند راجل ببتخانق
= وانا مش واخدها غير ب ١٥٠ يحاج
° مش منزل جنيه يبيه
= والله ما دافع اكتر من كده
_ يوسف!!!!
= ايه دا سلمي؟ ، ايه رأيك؟ شوفتيني وانا بفاصل ؟
_ بتفاصل في ايه؟
اتكلم ب فخر = البطيخة ب ١٥٥ وعاوز أخدها ب ١٥٠ ، بصي هو لحد دلوقتي مش راضي بس انا وراه وهقنعه
_ هتيجيب بطيخة ب ١٥٠ جنيه ؟؟؟
= صفقة الصفقة
_ وبعدين البطيخة الي في ايدك وقالب السوق بسببها دي قرعة!
البياع اندفع في الكلام ° جري ايه يا آنسة هو اي الي قرعة هو أي كلام؟؟
_ طب افتحها هناخدها علي المكسر
° لاء ، البيه طالبها كاملة وخدها علي كده
= أيوة يسلمي لو فتحها هتبوظ من الحر هو مفهمني كده
_ ممكن تسكت؟ بدل ما ألم السوق عليك انت؟
رجعت بصيت للبياع _ هنقف طول اليوم هنا ولا ايه مش فاهمة ؟
فتحها ف طلعت قرعة ، بصلي وفتح بوقه
= انتي عرفتي منين؟
_ مش وقته ، خد الي هناك دي
= دي؟؟
_ أيوة دي ، اديله ٧٠
° نعم ؟؟؟ هو ايه الي اديله ٧٠ ؟؟
_ مدفعش فيها اكتر من كده ، مش كفاية كنت هتنصب عليه في ١٥٠ وانا وانت عارفين انك متأكد إن البطيخة قرعة؟
° وانا مش واخد في بطيخ ٧٠
_ طب اسمع صلاة النبي حلو ؟
° عليه الصلاة والسلام
_ اقسم بالله إن ما اخدت ال ٧٠ منا دافعة إلا خمسين وهاخدها بردو
خد ال٧٠ منه ، يوسف شال البطيخة ووقف جمبي
= لسه عاوز تفاح وموز
ضحكت _ انت طلعتلي منين!!
مشي معايا وروحنا علي فرشة الفاكهة ، البياع اداله كيس وبدأ يحط فيه تفاح
_ ممكن يا يوسف تشيل ايدك حالا؟
= ليه؟؟
اتكلمت بصوت واطي _ انت لو قاصد تنقي التفاح الوحش مش هتعمل كده ، سيبني أنا أنقيلك
بدأت أنقي وخلصت _ أوزنلي دول لو سمحت
° اول مرة اشوف تفاح بيشترلي تفاح
_ أفندم؟؟
° الفرشة كلها تحت أمرك انتي شاوري بس
كان لسه هيحط أيده علي كتفي بس يوسف مسكها ولواها وراه = انت هتعمل ايه؟
° مالك أنت هو حد كلمك
ضغط علي أيده أكتر = انت لو فكرت تلمسها هدفنك مكانك
شد أيده ° وريني هتعمل ايه ؟؟
يوسف ضربه في وشه ف رجع البياع ردله الضربة ف وقع _ يوسف يوسف انت كويس؟
= سلمي ، البطيخة أمانة في رقبتك
_ انت فيك حيل تهزر؟؟
= أقفي في جمبك ، راجعلك حالا
فضلوا يضربوا في بعض بس يوسف في الأخر فضل يضرب فيه ضربات ورا بعض لحد ما الراجل وقع والسوق لتاني مرة يتلم علينا
= خلاص يرجالة متحرش وخد جزائه ، وتفاحه وحش
ضحكت _ يوسف! ، يلا بينا نمشي من هنا
طلعنا من السوق ف بصلي = انتي كويسة؟
_ أنا كويسة ، شكراً مش عارفة اقولك ايه
= ولا اي حاجة ، بس انتي بتترعشي لسه
_ انت وشك ورم ، كل دا بسببي
= يسلمي مفيش حاجة والله ، دي كدمات ويومين تلاتة وتروح
_ بس بتجيب دم!
= هبقي كويس ، اهم حاجة انك بخير
شاورت علي بيت العيلة _ أنا بيتي هنا ، لازم تطلع وتغسل وشك وتحط حاجة توقف الدم
= ملوش لزوم
_ لاء والله ابدا ، لازم تطلع معايا، علي الاقل أهلي يشكروك
طلعنا فوق وخبط علي الباب ف مريم فتحتلي
° مين يمريم ؟
مريم : دي سلمي ومعاها واحد مطحون
يوسف : انتي جيباني هنا تهزقيني ولا ايه يسلمي؟
سلمي بصيتله وضحكت : اتفضل ييوسف
نديت علي ماما وبابا وفي ظرف دقيقة كانت العيلة كلها في الصالة
جابر ( بابا سلمي ) : مين دا يسلمي؟
سلمي : دا يوسف يبابا ، كان فيه بياع قليل الادب هيحط أيده عليا وهو اتخانق معاه وضرب البياع
باباها بصله ورجع بص سلمي : متأكدة يبنتي إن هو الي ضربه؟
سلمي : يعني ، هو ادي وأخد الصراحة
يوسف : بس والله اديت أكتر
ضحك : كتر خيرك يبني ، تعالي اتفضل
يوسف دخل غسل وشه وحط كمدات باردة عشان الدم يقف ، يوسف : معلش جيت فجأة كده من غير ميعاد
بصيتله وقولت بصوت واطي : بص.. حاول متتكلمش عشان مع كل جملة مستوي ذكائك بيقل في نظري ، هو ايه الي من غير ميعاد هو انت عارف انك هتضرب؟
يوسف : قولت أكسر الصمت
سلمي : لاء دا جملة كمان وهقوم أكسرك أنا وأنت عارف اني اعملها
يوسف : خلاص يسلمي والله
بابا رجع بصله : وانت يبني من هنا؟
يوسف: اه يا عمي ، يوسف ٢٥ سنة خريج كلية تجارة وبشتغل في المينا الي في البلد بخلص كل الحسابات الي هناك ، عندي شقة تلت اوض و..
سلمي : يوسف!!!
العيلة كلها ضحكت ف بصيتله بطرف عيني
يوسف : أنا لازم استأذن عشان اتأخرت علي والدتي
جابر : اتشرفنا بيك يبني ، لازم تشرفنا بكرة بليل في خطوبة بنات خالات سلمي
يوسف : بجد؟ ينفع اجيب معايا والدتي؟ اصل مخرجتش من ساعة ما تعبت وكانت محتاجة تغير جو و..
سلمي : يوسف ، روح شوف انت رايح فين
يوسف ؛ اه ، ماشي
مشي ف وقفت جمبي كل بنات خالاتي
ليلي : شكله طيب اوي وعلي نياته
انجي : لقيته فين دا ؟
شهد : هو صحيح ضرب البياع عشانك؟؟
مريم : دمه خفيف اوي ، شوية وكان هيقولنا بيشحن كهربا ب كام
سلمي : ايه ايه ؟؟؟ خلاص هو مشي
مريم : بس جاي النهارده تاني ، مع والدته
سلمي : اه ، اهو نشكرها أنها ربته واقولها تعلمه طريقة يسكت بيها
مريم : بس؟؟
سلمي : وازاي يفاصل في السوق عشان شكله بقي يكسف الصراحة
تاني يوم انجي وليلي راحوا للميكب أرتست ، شهد بتتأكد إن كل حاجة نضيفة وخالاتي في المطبخ بيشيكوا علي الاكل ، علي المغرب كلنا روحنا بيوتنا وبدأنا نجهز ، لبست فستان كنت جبته من فترة بس ملبستوش عشان مجتش مناسبة، حطيت ميكب ولبست هيلز ولفيت الطرحة ونزلت ، بصيت علي ماما
_ ماما راحة فين؟
° جوز خالتك جه ياخدنا بالعربية
أحمد = خالتي ، اركبي انتي مع بابا وباقي خالاتي ومريم هتركب معايا
° ماشي يحبيبي
_ أيوة بس..
° يلا في رعاية الله
_ ماما!!!
ركبت هي وخالاتي العربية وعمو ساق، رجعت بصيتله لقيته واقف قدام العربية ومربع أيده ، قربت من العربية ف فتحلي الباب وركبت ، ركب وبصلي
= شكلك حلو أوي
_ شكراً يا احمد ، معلش هتعبك معايا
= أنا الي جاي عشان اخدك ف أنا الي عاوز كده
كان لسه باصصلي ف اتوترت _ مش هتسوق؟ عاوزين نبقي معاهم من الاول
ساق ووصلنا قدام بيت العيلة وطلعنا ، بعد ربع ساعة العرايس وصلوا ، كانوا الأربعة شكلهم ولا غلطة ، كل كابلز قعد علي كوشة عاملينها في الصالة
بصيت علي سلمي الي كانت بتبص علي المعازيم ، وشها ملامحه اتبدلت لما لقت يوسف داخل مع مامته
سلمي : أهلاً وسهلاً، ازيك يا طنط
يوسف : دي سلمي يماما الي حكيتلك عليها
مامته حضنتها وباستها : اهلا يحبيبتي ، ربنا يتم عليكم بخير
سلمي : متشكرة ، اتفضلوا
قعدوا علي كراسي جمب بعض ومامته بصتلها : ما شاء الله عروسة زي الفل
يوسف : خلاص يا ماما
° ملكش حق ييوسف، انت قولت حلوة بس مقولتش أنها حلوة اوي كده
سلمي بصت ل يوسف ف ابتسم بتصنع
يوسف : امي ومينفعش اعمل حاجة عشان ميبقاش عقوق
ضحكت وبصتلها _ شكراً يطنط تسلميلي ، وتسلمي علي تربيتك ل يوسف ، أنا معرفش لو مكنش موجود كان ممكن يحصل ايه
° الواد يوسف دا راجل من صغره
يوسف : حبيبتي يماما كملي
° عنده شقة تلت اوض و..
يوسف: قولتلها يحبيبتي قولي حاجة تانية
كانت قاعدة معاهم والضحكة مفارقتش وشها ، وسط كل الضحك والهزار والفرحة الي احنا كلنا فيها ، سمعنا شهد بتزعق
شهد : انت وقعت العصير كله علي الأرض!
_ ما قولت مكنش قصدي
= انت بجد قليل الذوق
_ وانتي لسانك طويل
باباها وباباه ادخلوا ° شهد!!!!! ، ° عبدالله!!!!!
سالم ( بابا شهد ) : دا عبدالله ابن مختار صاحبي
مختار ( بابا عبدالله ) : ايه الي بتعمله دا يبني؟ يعني موقع العصير وكمان معلي صوتك؟
عبدالله: هي الي ماسكة الصنية
شهد : وانت الي خبطت فيا!
عبدالله : كنت واقف وجاي بلف ومكنتش شايفها
شهد : ف اتعاملت ببرود انك مش السبب انك توقعهم!
عبدالله : ما قولت مكنش قصدي
شهد : انت حتي معتذرتش!!
عبدالله : واعتذر ليه في حاجة أنا مقصودهاش؟
شهد : انت بجد انسان لا تطاق
عبدالله: صدقيني وانتي كمان
سالم : خلاص بقي يولاد الناس بتتفرج علينا!
الارض اتمسحت علي طول وكملنا اليوم ، المعازيم مشيت وسمير ومعاذ قعدوا واتعشوا مع انجي وليلي ومشيوا بعدها ، بصولنا احنا التلاتة
ليلي : بعد كده معلش مش هتكلم مع واحدة مش لابسة دبلة
انجي : علي رايك يا ليلي ، الواحدة فعلا لازم متحتكش الا بحد شبهها
سابونا ودخلوا الأوضة ف ضحكنا احنا التلاتة ، لمحت احمد في البلكونة
_ طب ادخلوا انتوا أنا هقعد في البلكونة شوية
سلمي وشهد دخلوا الأوضة ف دخلت وقفت جمبه
_ فيه حاجة ؟
= مستني
_..
= ايا كان قرارك ايه ف أنا هحترمه وانفذه
_ بس انت هتسيبني تاني لو موافقتش
= مش قدامي حل تاني
بابا دخل علينا وبصلينا ° فيه حاجة يولاد؟
_ لاء ابدا يا عمي ، بنشم هوا بس
فتح فونه ووجهه قدامي ° الريفيو دا ظهر قدامي ل كتابك
خدت الفون منه وقرأت الكلام ، كانت بنت كاتبة إن الكتاب فادها وغير من طريقة تفكيرها ومن اجمل الكتب الي قرأتها اخر فترة
كنت مبتسمة لحد ما بابا قال ° بنات اليومين دول بيجروا ورا تفاهات
بس دي مش تفاهات يا بابا ، دي أنا!
° الي تعمل الي بتعمليه تبقي تافهة واعملي حسابك هنخلص الي بنعمله دا وترجعي شغلك في المستشفى تاني ، أنا خلاص جبت اخري من عمايلك
_ أنا مش هعمل كده
° لاء هتعملي كده ، وانا الي اقرر تعملي ايه ومتعمليش ايه
زعقت _ دا لما تكون فاهمني وبتسمعني
° انتي بنت قليلة الادب
رفع أيده عليا في أحمد وقف بينا بسرعة
= لاء يا عمي ارجوك بلاش ، اهدي وكل حاجة هتتحل
° هيحصل الي انا عاوزه
= طيب طيب ، اهدي بس ونتكلم في الموضوع دا بكرة
سابنا ومشي ، كنت قعدت علي الكنبة وعيطت
= عشان خاطري يمريم خلاص
_ أنا تعبت ، معتش عارفة اعمل ايه عشان يرضي يعاملني اني بنته
= أنا هتكلم معاه
_ مش هيغير الي عاوز يعمله، الظاهر اني مليش حق أختار حاجة
فضل معايا ، مكنش بيعمل حاجة غير أنه قاعد قصادي ومستنيني عشان اهدي
_ ادخل نام أنا بقيت كويسة
شد منديل وادهولي = هدخل لما تبطلي عياط
_ أنت هتبقي زيه يا احمد عشان كده مش عاوزة اتجوز ، مش عاوزة
= طب اهدي ، اهدي وهعملك الي انتي عوزاه
بعد تقريباً ساعة كنت دخلت الاوضة ونمت علي السرير ، محستش ب اي حاجة من كتر التعب والصداع ، صحيت الصبح علي صوت بنات خالاتي
ليلي : اصحي يمريم
_ فيه ايه ؟؟
انجي : باباكي.. وقع
قومت مخضوضة _ ايه؟
طلعت برا لقيت الناس مسندينه بعد ما راح اتجبس في المستشفى
_ بابا انت كويس؟
° الحمد لله
_ ايه الي حصل ؟
° كنت نازل علي السلم معرفش وقعت ازاي
_ ألف سلامة عليك
بصيت علي شنطة العلاج الي كانت معاه
_ دا فيه علاج هيتاخد دلوقتي
روحت جبت كوباية ميا واديته العلاج
_ بالشفا إن شاء الله
ليلي : وانا بقي يا عمو هدخل اعملك فرخة تاكلها
° تسلمي يا ليلي
كنا كلنا حواليه ، مش عارفة ليه اتخضيت اوي كده لما جراله حاجة ، انا بحبه بس كان نفسي بحسسني أنه هو كمان بيحبني!
بليل بابا كان في البلكونة وأحمد معاه ف دخلت اوضتي ، بعد شوية الباب خبط ف قومت فتحت
_ أيوة يا احمد ؟ فيه حاجة ولا ايه؟
= باباكي عاوزك
_ هو كويس؟
= كويس كويس متقلقيش ، عاوز يتكلم معاكي بس
روحت البلكونة وقعدت قدامه
_ نعم يا بابا ؟ حضرتك عاوزني ؟
° أنا كنت فاكر الي بعمله عشان مصلحتك، كنت شايف إن دا الصح ليكي وانتي لسه صغيرة مش عارفة بتعملي ايه ، كنت فاكر اني بنصحك بس اتاريني بكرهك فيا ، أنا مش عاوزك تكرهيني يمريم انا مليش غيرك يبنتي ، وعشان كده عاوزك ست ناجحة بس نسيت أن النجاح الحقيقي هو اني اشوفك مبسوطة وبتعملي الحاجة الي بتحبيها ، أنا مكنش قصدي يبنتي والله مكنت عاوز غير اني اشوفك كويسة ، سامحيني حقك عليا
كنت احنا الاتنين بتعيط! قربت منه وحضنته ، جربت حضنه الي كنت خلاص نسيته من وانا صغيرة ، بصيت ل احمد ب امتنان ، كنت عارفة أنه السبب وأنه اتكلم معاه في كل حاجة ممكن تخلي بابا يفهمني ،
فضلت أنا وبابا نتكلم كتير اوي عن الكتاب والي عملته في حفلة التوقيع ، قولتله كل حاجة كان نفسي اشاركها معاه .
سندنا بابا انا وهو ودخلناه الاوضة ، خرجنا وبصيتله
_ أنا مش عارفة اقولك ايه
= كفاية عليا اشوفك مبسوطة
_ انت احسن راجل في الدنيا
= ها؟؟
انجي : الله ، وايه كمان يمريم؟؟
بصيت علي الاوضة لقيت بنات خالاتي واقفين وباصين لينا = هو دا وقته؟؟ ادخلوا جوا أنا مصدقت نطقت
ليلي وانجي بصوا لبعض : الظاهر أن هيبقي فيه خطوبة قريب
= يعني نسأل الله التساهيل
_ أحمد!!!
= الاه مش بنفرحهم؟
الفون بتاعه رن ف كنسل ، فضل الفون يرن ف بصيتله ب استغراب
_ ما ترد!
= لاء ، مش مهم
شديت منه الفون _ خلاص هرد أنا
= هاتي يمريم الفون
فتحت الفون وفتحت الاسبيكر وانا بضحك
° أحمد حبيبي ، وحشتيني اوي ، مبتردش عليا ليه؟
