رواية ومضه امل الفصل الخامس بقلم ام مصطفى
اية
دخلت للبيت ورة امي لكيتها تبجي
ابو ريسان رجعنا للبيت ومالكيناك كوم تلكانة شلون نعيش بدونك
وكعدت تبجي هي والبنات واني وياها لكيتها من الله حيل انقهرت ع نفسي
دخلت ابو علاء؟وعلاء امي
تفضلو تفضلوا
لا نروح نرجع هم يله نخاف كلشي يصير لا ينسد الطريق
-ان شاء الله نجيكم غير مرة مراح اكطع بيكم مدام اندليت بيتكم هاي نروح ونرجع الكم كلما تصيرلي مرة لبغداد
-كل الهلا بيكم وسلملي ع خالتي ماقصرتوا ويانه
شال فلوس وانطة لامي
بس ماقبلت تاخذهن وحلفت
كالها مو الج ذن للبنات
حطهن بيد نهلة
دفعت بله راجع بمنية وهي دفعت بله
-ربي يرجعكم سالمين بجاه محمد وال محمد
جان علاء واكف وكل شويه يباوعلي بحزن وغضب اول مرة هيج اشوفة
جنت اباوعلة ودموعي تنزل ليش ليش شنو ذنبي اذا رب العالمين هيج خلقتني واذا عرجة
زين مالي حق اعيش مالي حق احب ازوج ليش دائما الي مثل حالتي فوك ماهي مظلومة المجتمع يظلمها
اني مناقصني شي اكدر اكوم واشتغل واخدم نفسي مو مثل نهلة واعذرة
طلعوا
وبدينه نغسل بالبيت الي لكيناه عبارة عن تراب
ووامي بسرعة طلعت طحين وعجنت
عدنه مواد غذائية مخزونه بالبيت بقوليات تمن زيت معجون شخاط حليب كولشي عدنا بس مخضر وفواكه ماكو
عاد سوة ايناس مركة عدس
وامي شغلت التنور خبزت
تغدينا وفراشنا فراش نمنا
يكول ابو المثل رحت المكة ورديت وغير بيتي مالكيت
الواحد مايرتاح اله ابيته لو يروح لقصر
اذا مو ابيته يرتاح كولها هيج
ذبينا روحنا موتى عبالك لليل وي اذان المغرب يله كعدنا
ثاني يوم ايناس طلعت تسوك النه بالفلوس الي اطاهن لنهلة ابو علاء
لان ماعدنا ولا فلس الفلوس انباكت كلها بوكتها
مر يوم يومين اسبوع محد بين من اخواني
امي كالت نخابر عليهم
دكت عليها محد يجاوب
عود تكلهم رجعنا واطمهنم علينا
بس الظاهر ماكوو
بعد اسبوعين تقريب
اجة ريسان
جان حيييل يشبه ابوي من شفته جني شفت ابوي
بسرعة رحت عليه
وحضنته شلونك خويه الحمد الله ع السلامة وينكم ماكو
-البارحة رجعنا جنة بالحلة رحنة
اها
طلعت امي والبنات هم سلمن عليه
ضل كاعد يباوع ع البيت كانما يريد يحجي شي
بعدين اخر شي كال شكد يجيب هسه هذا اللبيت
امي كالتله ليش ؟
اكول يعني
-يجيبله ٣٥ مليون
-ها زين وضل يباوع
يله اروح اني محتاجين شي
-اي والله يمة المفتاح انطيته لنعيم مال المحل ياريت يفتحة ويشغلة
لان ماعدنا ولا فلس
-يا محل
-شنو يامحل محل ابوك
-نعيم باعة وراح والله بطرانه
-شنوووووو
شنو بعاعة بكيفة يبيعة شلون يعني فهمني
-اي هو باسم امي الله يرحمها المحل يعني حصتنا شنو تردين تاكلين حصتنا من امي مكفاج كاعدة بالبيت وحدج هذا
-هاي اول مرة اسمع باسم امكم المرحوم ماكلي ابد
-والله باسم امي المحل بس ابوي مجان يحجي
بس ابوك انطاكم حصص اكثر من الازم كاادري شجان متفق وياكم يجوز مقابل المحل وانتوا تعرفون كلش زين هو ابوك بانيه ع ايده المحل
يعني محلة واذا حطة باسم امكم يعني الكم
-اي النه خالة سمعتي وهذا البيت هم النة حصة بيه احسبي حساب نريد نبيعة وناخذ حصصنا
-شنو حصصكم ابوكم انطاكم حصتكم ع حياته وخله هذا البيت لخواتكم
-البيت باسمن هسه
-باسم ابوك
-خلص يعني النه حصة بالشرع والقانون
-خاف الله ريسان وين تريد تذبنا بالشارع شنو اني والمعوقات اخواتك
-ليش بالشارع اخذن حصصكم وروحن اجر ابيت
-واجرنا بيت ميخلصن الفلوس منين ناكل مشرب المحل واخذتوا
-مااعرف احنه النه حصة بالبيت وناخذها بس خل تستقر الاوضاع وترجع الدوله نجي ناخذ حصتنا
-مع الاسف عليكم حرام رباي بيكم جان ذكرتوا خدمتي وتربيتي الكم طول هاي السنين
جان كلتوا ذن خواتنا عرضنا
-لا تبيعين علينا مثاليات احته ممسوين شي يغضب الله ورثنا ماخذة بمايرضي الله
خلة وطلع
وامي كامت تبجي وينك تعال شوف ولدك شيووه بينا الله يرحمك جنت تعرفهم زين وردت تسجل البيت باسمنا بس مالحكت خذاك الموت من عدنا بساع بساع
اني جنت متوقعة هالشي من خواني لان اعرفهم ماعدهم محنه وامهم وابوهم الفلوس عود فراس اخوي الصغير شوية احسن بس مرته خبيثة بشكل تنكط خباثة هم متخلي يجينه واكيد راح تكن براسه حتى ياخذ حصته
بقينا بس نهم شلون راح نعيش ولا فلس
امي قررت تخبز للجوارين
وعدنا مكينة بالبيت
تعرف تطكط بيها
كامت امي تخبز وتخيط وجوه مخاد جراف تكف ثوب تخيط حضاين
بس متعرف تخيط ملابس بس هجي
وكامت تعيشنا
اخوتي ولا يوم سئلوا علينا
واني ليل نهار احلم بعلاء واذكر ذيج الايام الحلوه
الي عشتها هناك والكلام الحلو الي جنت اسمعة منه
وابجي ع حالي مرات اعذرة ومرات لا احقد عليه
وبيوم اجة ابو علاء
من شفته كلت هاي اجة اكيد يخطبني لعلاء
جنت ع نياتي عبالي كل الناس مثل طيبة قلبي
بس طلع جاي لبغداد ومار علينا
جاي محمل سيارتة مسواك مخضر وفواكه
تلكته امي ورحبت بيه
كام ينزل
-ليش مكلف روحك خوية صدك جذب
-لا يبه شمكلف ذن صوغة من الحجية الج من مزرعتنا وتسلم عليج هواي هواي رادت تجي بس مرت رسول طلكت وجابت ومكدرت تجي
-الله يخليها ويطول بعمرها يارب ويوفقها
تفضل تفضل ابو علاء
بسرعة امي نضفت السمج الي هو جايبه شكت سمجتين وركبنا تمن وخبز حار سوينا غده
جان يصلي وطبت ايناس حطته كدامة
وطلعت
-تغدة وارتاح وصاح ع امي
-راجع اني محتاجة شي
-امي بجت
-ليش تبجين شصاير
-ابو علاء تعرف اني ماعندي احد بس اخت وحده ومزوجة بالناصرية وكل سنة سنتين يله اشوفها وماعدي احد
-انه اهلج كولي
-عساك سالم
-بس ولد رجلي يردون ورثهم وخايفة لا يطلعونه من البيت وين نروح
-مع الاسف شلون يطلعونجن ليش ماعدهم بيوت
-لا عدهم
وكعدت امي تحجيله ع ابوي شسوه الهم
وع وضعنا
كال اني موجود ام اية ومااعوفكم كل فترة اجيكم شتردون اني حاضر
-اشكرك وربي يوفقك ممقصر ويانه بس اني ردت افضفض الك ماعندي احد احجيله تمنيت خالتي الحجية جاية يمنا
-ولا يهمج سبوع الخ اجيبها واجيكم.
طلع ابو علاء تمنيت طير واطير وياه واروح اشوف علاء
بنفس اليوم من راح اجة نعيم
وجايب دلال للبيت
امي كالتلة شنو شتسوي
-جايب دلال ابيع البيت الولد وكلوني يردون حصصهم
-صدك تحجي انتم ماعدكم مخافة الله بس كولي هسه اني مرت ابوكم بس ذن خواتك وذو اختياجات خاصة شلون تشمروهن بالشارع متخافون الله
-احنه منسوي غير شرع الله النه حصة بالبيت ناحذها
-اتقو الله حصتيش مو ابوكم اطاكم حصصكم
-خالة سوي طريق خلي الدلال يشوف البيت يله وبله ححي زايد
امي كامت تتحسب عليه
وفاتت
نهلة
يمة شبي نعيم شيريد
يردون يذبونكم بالشارع شيردون
-ليش وشلون
جايب الدلال يقيم البيت حسبي الله ونعم الوكيل وكامت تعلي بصوتها
طلع وطلع الدلال من البيت
امي شبعت بجي واحنه وياها اطيح دمعة الها احنه عشرة دموع
اصعب شي بالدنيا انو واحد ماعنده سند بالدنيا ينسند عليه لو عدنا اخو عم خال
جان مصار هيج بينه
ايناس
اخذت الخبز اوديه لبيت ام نادية اهل الحصة خبزت الهم انجانه شكبرها اني وامي
واخذته الهم
دكيت الباب طلع ابنهم رحمن
صار بوجهي
-اليوم منين طالعة الشمس شلونج وين اختفيتي
-اعرف تعرفني وهيج دكلي
-متعرفيني بس اني اعرفج انت ايناس
شلون صارت رجلج زينه
-معليك انت صحيلي امك هذا الخبز خبزناه واطينه فلوسنا خل اروح
شكدفلوسج
الفين
طلع خمسة
هاج هاي الج
-كتلك الفين
اي ميخالف اخذيهن مني الج
شنو اجدي منك جايه اطيني الفين وبس
-يمة فدوه للعدها عزة نفس
-عمي هاج الفين وعاشت ايدج ع الخبز
بس سؤال خدودج هنه حمر من الله لو خالة شي الهن
جريت الفلوس منه ورحت
-يابه فدوه للتخجل
-عابت ولا يستحي هذا بعد مااروح اودي الخبز مااريد اشوفة
هم ذيج المرة من وراه عثرت ميستحي يباوع علي
..........
اية
بعد شهر
انباع البيت
واطانه مهلة ابو البيت شهرين ونطلع
واطونا حصتنا متجيب نص بيت
وابو علاء من يوم الراح مارجع ماعرفنا شصار وليش مارجع ماندري
امي ضلت محتارة وين نروح
اهنا جيرانه ونخبز الهم وعايشين ع فلوس الخبز والحصة
بس لو طلعنا من البيت وين نروح
