رواية ومضه امل الفصل السادس بقلم ام مصطفى
،
اية اصعب ايام مرت علينا
اولا تفكير بالمستقبل وين نروح ثانيا نخاف لاتنباك الفلوس اخاف الحرامي يسمع عدنا فلوس ويرجع علينا هيج جان تفكير امي
بس امي كثرت قفالة وضمت الفلوس ورة الكنتور ونضدت الفراش المانريدة عليه
مع ذالك كلش خايفين
-يمة شبيج صافنة
-صافنة ع دنياي شلون فرتني فرن وين جنت وين صرت من جان ابوكم موجود ماافكر بشي ولا اشيل همكم ابد
هسه هم المصرف وهم البيت وهمجن لو متت وين ترحن وانتن هذا حالجن شلون تعيشن
-ربي يطول عمرج يمة ليش هيج تحجين
يمة هي هاي سنة الحياة شكد نعمر مية سنه اول ع تالي نموت
-ان شاء الله يومنا قبل يومج
الله يخليكم الي حبايبي
اختج ايناس وين ؟
-راحت تجيب العجين من بيت ام نادية حتى نخبزة
ها
التفتت ع نهلة
-نهلة يمة تردين شي شو صافنه
-يوم اتمنى اتعلم اخيط عندي هواية بالخياط ليش متدخليني معهد اتعلم وهم اخيط والهي نفسي بمكان مكاعده
-والله ياريت خوش فكرة بنيتي بس وين اكو معهد هسة قريب علينا ولازم اني اروح وارجع وياج
-اي صح مشوفيني صافنه ماما اريد اسوي شي اريد احس الي اهمية بالحياة مو بس كاعده ع هالكرسي ومتعبتكم وياي
-لا دكولين هيج يمة انتن اعز من روحي والله وبالخص انتي اهم بيج ليل نهار
-اي ادري بيج ادري يوم لعد ليش اكلج اريد اتعلم صنعة حتى اشيل مصرفي وابقى عالة ع غيري
-والله بنتي خل نلكة حل لشغلة البيت ونشوف وين نكعد
والله كريم افكر شوف شلون
طبت ايناس بيدها انجانة العجين
-هاج يمة هذا عجين بيت ام ناديه وتكول كبري الخبزة وكسبيها زين
-اي ميخالف
شنو يتشرطن علينا انوب هنا الفين دينار
-ميخالف بنيتي عيشتنة ع هالفين
دروحي جيبي عجين بيت ام احمد وتعاي
خل نخبزه فدنوب ودكي الباب ع بيت ابو لؤي شوفيهم عدهم عجين اليوم
انت اية يمة جيبيلي طحين خل اشنگ العجين بعجل بنتي حرت الدنيا
-اي صار
هاي حياتنا صارت عباره عن عجن وخبز للناس علمود الالف والالفين تطلع امي تسوك النا بيهن
بعد مرور شهرين
اجة ابو البيت يريد بيتة واحنه لحد الان ملاكين مكان نكعد بيه
ام احمد كالت لامي ع بيوت حواسم بس امي ماقبلت كالت حرام اكعد بيها شنو اكعد تجاوز واذب فلوسنا ع كاع تجاوز
نعيم اجانا
-ابو البيت يريد بيته خالة ليش عاصين بيه هسه اجة علي
-ولك نعيم كلي وين اروح باخواتكم فهمني شوفونا ع الاقل بيت انتوا رخيص يلمنا يعني تقبلوها مرت ابوكم واخواتكم يكعدن بالشارع ذن هم عرضكم ترة التاس راح تاكل وجهكم
-ليش انت لحد هسه مالا كية بيت
-لا وين الكة شمعرفني اني وين الكة بيوت رخيصة
-خاله احسن شي روحي محافظات لو باطراف بغداد اكو بيوت رخيصة
-صدك تحجي ولك تريد تشمرنا محافظات بالغربه وين نعرف الناس احنه
ونروح محافظات
-لعد اجروا لحد ماانشوف الكم بيت
-واني اخلص افلوس البيت ايجارات
خلونه نكعد يمكم مو عندك غرف فوك كعدنا عندك
-شنوو لا الغرف مال جهالي وبيهن غراض خاله انت ليش؟مكبرتها تكعدي هسه ابيجار والله كريم ابو البيت انطاكم مجال اسبوع تره يشمر الغراض بالشارع دبروا روحكم واني هم اسئل ريسان بلكت يعرف بيت بفلوسكم
-وينه هو ريسان بس اجه باع البيت وهجولنه حسبي الله ونعم الوكيل
-ليش تتحسبين علينا تره ماسوينا شي احنه اخذنا حصتنا بشرع الله
-انتم تعرفون كلش زين حصتكم اطاها الكم بحياته ابوكم واخذتوا حصة خواتكم هم بس مااكول بس الله ع الظالم
-ماغيرج ظالمة سنين تاكلين بخير ابوي انتي وبناتج هذا كله تعب امي وبيتها اجيتي انت عالحاظر اخذتي وكعدتي بالبيت ابوي ماكلج امي شجانت تسوي ولمة هاي البيوت والمحل
امي جانت تخيط ومكسور ظهرها وتبيع ملابس ولمتهن تالي انتي وبناتج صارن من حصتج
-استغفر الله ليش هنه مو اخواتك غريبات قابل وبعدين شنو اموته امكم اني لو نازلة عليها ضره
امكم ماتت وابوكم خطبني شمدريني شنو تشتغل جانت شسوي
-يله بله حجي زايد البيت الجمعة الجاية تفرغيه سمعتي
-الله كريم ربك مايعوف حمل مطروح يحلها من يمة
طلع
وامي ماخلت امام مانخته نلكانه مكان
اخر شي كالت ماكو غيرها اجر بيت بالمنطقة من باجر اروح للدلال يشوفلي بيت ايجار قريب ماكو غيرها
نمنا كلنا مهمومين ودمعتنا بعينا متعرف وين نروح وشراح يصير بينا
بس رب العالمين حشاه يكطع بعبدة لا ابد البشر همة الي يكطعون
الصبح كاعد نخبز واندك الباب
طلعت ايناس تفتح الباب ورجعت تركض؟
يمة عمي ابو علاء اجة
من جابت اسم علاء احس روحي راحت مني
-هله بيها بسرعة اطني حجابي وعباتي اطلع افوته
طفت التنور امي وراحت تركض هم
-هله خويه شلونك تفضل تفضل
هله خاله علاء طب طب
سمعت اسم علاء بدون شعور شمرت المخابزة البيدي ورحت اركض بطحيني
شفته واكف ينزل مخضر ومسواك
امي كالت اخذي من علاء المسواك
رحت ع السريع بابتسامة نسيت كل الي حجاه
-شلونك علاء
-باوعلي وببتسامه حزينه
- شلونج ايوتة شخبارج مشتاقلج
-اني هم هواية
-حليانه اكثر خدودج تفاح صايره
لزمت خدودي حارات اذكرت جنت اخبز وي امي ومن اتقرب للنار خدودي يصيرن حمر
-ضحكت شكرا واخذت منه المسواك
فات جوه
ركضت غسلت اديه ووجهي ونكتت ملابسي
ايناس صفطت الخبز كالت اخذه اوديه
ايناس لا تجريها سوالف وي رحمن ذبيه وتعاي
-لا لا بسرعة
تره بس امي تلكفج مترحمج احنه لا مال حب ولا خرابيط
-اي صح مبين كولي لنفسج هالحجي
-شتقصدين
-الحب الي بالاستقبال
-انجبي ولج وروحي يله بسرعة تعاي نسوي غدة
-ان شاء الله
رحت خليت مي بسراحيه
وطبيت
امي تبجي
ووابو علاء وعلاء مدنكين
كالت اني شوكت توفت وشلون
باوعت منووو متوفي
-الحجية متوفية
-قبل شهرين تقريبا توفت هيج بسع بسع ماتت الحجية يكولون صاعد الضغط عدها وصايرة جلطة عدها
-الله يرحمها خالتي بس قصرتوا ماكتولنا
-والله الاوضاع مثل مااشوفين وحتى الطريق كوه نجي الامريكان سادينا وازدحامات ومواجهات والله كوه اجيت لان وعدتكم ارجع وعلاء كال اروح وياك يابه
-هلا بيكم اجيتوا بوقتكم دعيت والله جابكم
-شنو شصار
شوفولي بيت يمكم
البيت انباع
وحصتنا بس عشر ملايين ونص
-شنو ماتجيب الكم بيت
-ابو علاء احنا بشاربك اطونه مهلة اسبوع وذول اصلا مامنهم رجوه
-لا تخافين خلي فلوسج عندج عدنا بيت بالولايه اخذكم تكعدون بيه ابلاش وهم قريب علينا بس خواف ولد رجلج يعارضون
-لا لتخاف اصلا مو ابالهم احنه ويردون بس يخلصون من عدنا
خلص لعد حضروا روحكم يومين اجي عليكم
ايناس
اخذت الخبز ورحت بس حتى اشوف رحمن الي افرح من يسولف وياي
لكيته واكف بالباب
-هلو رحمن شلونك هاك ذن الخبز
-اوكفي شبيج مستعجلة
-عدنة خطار رايحة
-اي شفتهم منو هذا الولد الحلو
-ابن ابن خالة امي
-وشعدة جايكم
-وانت شكو شعليك
-ها هيج
-اي هيج لعد شعندك ويانه
-جم مره كتلج احبج والله
-اني مو مال حب سوالف كتلك احنه نستروق يله اطيني فلوسي حتى اروح
اخذت الالفين ورحت رجعت
صح احب اسمع كلماته بس ماانطيه مجال
اية
بسرعة سوينا الغدة وحطيناه الهم
خلص علاء ركضت جريت الخاولي انطيته اله
-ايوته شسويتي بيه تدرين الليل كله افكر بيج
-واني هم بس انت اخر مرة
-اسس لا تكملين تندمت والله من صدمتي اني حبيتج الج حبيت روحج وكلبج وجمال وجهج حوريتي انتي
-امممم
-فدوه للخجولة تدرين كلش فرحان
-ليش
لان اراح تجون يمنا بهيج حالة اكد.ر اشوفج ع طول
-اي هم اني
اجة ابو علاء يغسل
شافنه واكفين نحجي
بسرعة خليتله الخاولي ورحت
لمينا السفرة وشربوا جاي
طلعوا ودعني علاء باشرات وكلمات مع سلامة ايوته ان شاء الله راجع وي ابوي نشيلكم
فرحت كلش ولمي هم احسها هم وانشال منها
وبدينا نشدد بالغراض منتضرين عمي ابو علاء يرجع وياخذنا
