رواية ايام من رماد الفصل الخامس بقلم احمد
مصطفى گال هالمرة اني اتكفل بالعزيمة وانطي خبر لابوي واخواني الي يريد يحظر ما يتدخل بشي والي يريد يبقى بشغلو براحتو
ماما رحمة گالت هيج افضل ومبين عليها انغثت لان تذكرت منتهى وصارلها هواي مو شايفتها بس ما حبت تضوجنا وياها
مرت الايام بسرعة ما حسينا الا اجى يوم الثلاثاء واتفقو مصطفى وماما رحمة ياخذون سوسن باجر للصالون علمود ترتبها ام الصالون
باغلب هيج حالات تروح البنت ووياها وحدة من خواتها بس احنا شحدنا نطلع الا بابا يسويلنا عرس جلاب لذلك اختصرنا الموضوع
ثاني يوم بال10 الصبح راحو وما رجعو لل 2 الظهر ورغم بعدها سوسن ما حطت مكياج بس مشاء الله متغيرة كلش عن الاول
اخذت دوش واجت شوفتنا شعرها ام الصالون صابغة اطراف شعرها من تحت مثل الثلج ومنطيتها صورة لبنت وگايلتلها مثل التسريحة هاي اسويلج
التسريحة جانت انو تلف اطراف الشعر اليمين واليسار عالتاج والباقي يبقى نازل على ظهرها ويصير مثل الدمج بين الفستان واطراف شعرها
احنا مجرد شفنا الصورة عجبتنا التسريحة وماما رحمة سألتنا اذا نريد نسوي حفلة بالليل بس كلنا ما النا واهس بالحفلة
لان تعرفون محد يجي فما تصير حلوة مثل من يجي احد واحنا دا نحجي وصلت سناء وطگتها بهلهولة معدلة والابتسامة مرسومة على وجهها
گمنا كلنا نتراكض عليها من شوقنا الها وسلمت علينا كلنا وباركت لسوسن وگعدت ويانا گالت جيبو البشارة
مصطفى: متمدد وحاط ايديه تحت راسو .. ما بينا حيل للخساير
سناء: ولك صوفي ما تفرح اذا صرت خال
مصطفى: لا..... شنووووووو
سناء: ههههههههههه
رحمة: صدگ والله يمة
سناء: اي يمة صدگ
رحمة: الف مبارك يمة الله يتمم على خير
سناء: الله يبارك بيج
الكل باركولها
رحمة: ايمتى عرفتي
سناء: قبل شهر تقريبا وهسا وصلت الشهر الثالث
سوسن: من شهر كامل واحنا ما نعرف
سناء: ليش هو بايدي يا سوسن الله لا يعيشج مثل عيشتي الي يمي ما ينجرع
مصطفى: مو گلتلج اذا تريدين بس گليلي اخليه يطلگج ورجلو فوگ راسو
سناء: شنو الفايدة يا روحي اعوف ذاك واگابل صفاء وبراء لو اگابل ابوي لا ابقى هناك احسلي وبلكي يتغير من يجي الطفل
رحمة: خوما متعبيج بالحمل هو واهلو
سناء: لا يمة الواحد يحجي الصراحة من سمعو بالحمل شايليني على كفوف الراحة واني هم شفتها فرصة صرت ما اتعب نفسي
دمعة: بقت تدردش ويا البنات وماما رحمة وماما نعمة وما حسينا الا صارت الساعة 5 العصر وسمعت انو ما نريد نسوي حفلة وتخبلت
گالت روحن سون العشى واتركن الموضوع علي وطردتنا كلنا للمطبخ وماعرف شحجت ويا مصطفى وطلع خارج البيت وبقت هي وسوسن
وبين ما كملنا العشى ورجعنا للكرفانة لگيناها مجهزة سوسن على حبة ونص اكلنا لگمتين بين ما اجى مصطفى وبايدو غراض
طلعت موصيتو على غراض الكوشة ولان اليوم بس احنا ما خبصت نفسها بيهن وويا الغراض جايب مصطفى MB3 ووياه ميموري بيه اغاني
شلنا المواعين عالسريع وشغلت الاغاني سناء وگالت يلا بلشن ارگصن لا انعنع ضلوعكن اذا ما نرگص لسوسن لعد لمنو نرگص
صارت هي حفلة وهي تعليلة وتونسنا بيها كلش وجود سناء غير الاجواء بشكل جذري وخلال الحفلة جابت صحن بيه حنة وحطت لسوسن حنة
سوسن تركتها لحد ما نشفت وغسلت ايدها وفورا طبعت عليها الحنة وبين ما خلصنا الحفلة ونظفنا صارت الساعة 12 بالليل
ثاني يوم الصبح اجى اخو العريس اخذ ماما نعمة وسوسن للصالون لان من عاداتنا عيب ياخذهن مصطفى يوم العرس للصالون
واحنا بلشنا نرتب نفسنا اني لبست الفستان الابيض ورتبتلي شعري سناء وحطتلي مكياج ومن كملتني بلشنا اني وياها نسوي الكوشة
مصطفى جاب كراسي 2 فخمات ولونهن ذهبي ووياهن طاولة شكلها مثل الكراسي وگال ترا اجار انتبهولهن لا يصير بيهن شي ونتورط
الساعة 12 الظهر كملناها وبقينا ننتظر الى ان تجي سوسن واخواني وبابا ماكو اي احد منهم بالبيت كلهم طالعين حتى مصطفى
ملاحظة: احنا من عاداتنا عيب يكون واحد من اخوان او ابو العاروس موجود بالبيت وحتى لو صادف وجودو بالبيت يحاول ما يطلع گدام الناس
بصراحة ماعرف ليش صارت عادتنا هيج بس انولدنا عليها وانتقلت من جيل لجيل لذلك مصطفى طلع اما بابا وبقية اخواني فالمهم عندهم يطلعون للشغل
الساعة صارت 2 واجت سوسن وطالعة حلوة بشكل لا يصدق لدرجة ماما رحمة صارت تقرا المعوذات عليها لا تصيبها العين
اخو العريس گال لماما نعمة فد شوية وتجي الزفة وراح وتجمعنا كلنا عند سوسن وكلنا فرحانين الا هي متوترة كلش وكأنها مسوية مصيبة
التسريحة طالعة عليها تخبل وماعرف شلون اوصفلكمياها شگد ما اوصف احس قليل بحقها وبجمالها من صدگ حسام محظوظ بيها
سوسن: وين مصطفى
رحمة: طلع
سوسن: اريد اشوفو
رحمة: هسا منين اجيبو يا يمة
سوسن: فدوة ماما اريد اودعو
رحمة: هسا اشوف بلكي قريب من البيت .. يمة سناء جيبي اكل لاختج هسا كتلها الجوع
سوسن: لا ماما اكلنا هناك قبل ما تحطلي مكياج ام الصالون جابولنا اكل من المطعم
رحمة: عاشت ايدهم
دمعة: الله شگد حلوة طالعة
سوسن: هههههههه يا روحي انتي اذا اني حلوة لعد انتي شنو هسا عبالهم انتي العاروس وياخذوج
رحمة: الله يحفظكن كلكن وحدة احلى من الثانية
سارة: ها ها رحمة شو اني ما تمدحيني
رحمة: يا يمة لو بيج شي ينمدح جان ما قصرت
دمعة: اية وگعت بالگاع من الضحك هي ورانيا وسارة لان تعرف ماما رحمة تتشاقة صارت تضحك ويانا هي وسناء وماما نعمة
انتظرنا مصطفى لحد ما اجت الزفة وهو ماكو الساعة تقريبا 4 العصر اجو الولد ووياه ثنين من خواتو
من نزلن صارن يهلهلن ويصفگن ودخلن ويا العريس گعد شوية وقبل ما يمشون اشرت سوسن لماما رحمة وماعرف شنو جانت تحجي وياها
بس ماما رحمة بعدين گالت تريد تودع مصطفى وماما رحمة گالتلها عيب نأخرهم راح تجي الزفة وراهم وما يگدرون يدخلون للشركة
شفت عيون سوسن انترسن هموم وكأنو غياب مصطفى هو غياب الفرحة عنها وماگدر الومها لان مصطفى فرحتنا الوحيدة من الولد
ودعتنا كلنا وحدة وحدة وجانت گوة ماسكة دموعها الى ان وصلت يمي حضنتني وانفجرت بالبجي ونريد نسكتها ما تسكت
رحمة: كافي يمة قابل ماراح توزرينا.. وصارت تنزل دموعها
گوة هديناها وسناء جانت تريد تعدل مكياجها ووحدة من خوات العريس گالت اني بالسيارة اعدللها المكياج راح نتأخر عالزفة
طلعو من الكرفانة وجان مصطفى واگف بطارف الحوش ويباوعلها بقهر وتقدم عليها اول ما وصلها دخلت بحضنو ولان اضخم منها صار كأنو اب حاضن بنتو
مصطفى: اني ماراح ابجي لان انطيتج لحسام وهو اكثر انسان يستاهلج.. وربت على كتف حسام
سوسن: بس تبجي وتشهگ
مصطفى: مسك وجهها ومسح دموعها گال كافي ابوية انتي رحمي حالج شوية انتي ربحتي حسام مو خسرتينا كافي
سوسن: بدت تهدأ وتسكت عن البجي بس لزمتها الشهگة
مصطفى: اخذ ايدها بايدو وايد حسام بايدو الثانية وحط ايد سوسن بايد حسام .. دير بالك على وردتنا ولولا غلاتك عندي ما انطيك هالوردة
حسام: تطمن يخوي وردتكم صارت وردتنا وراح تكون بالحفظ والصون وإن شاء الله ما اخيب ثقتكم بي طول العمر
مصطفى: الف مبروك الكم ثنينكم وشايفين الخير والله يسعدكم طول العمر
حسام: الله يبارك بيك ويوم الك اخوي
مصطفى: وانت حاظر
حسام: احنا لازم نستأذن علمود لا نتأخر عالناس
مصطفى: اذنكم وياكم
دمعة: ابتعد مصطفى علمود خوات حسام وحسام اخذ سوسن صعدها بالكرسي الگدام وصعدن البنات وماما نعمة من ورا وانطلقو
رحمة: لك مصطفى ما اخذو الجنط مال الغراض
مصطفى: ادري يمة راح يجون ياخذونهن بعدين
رحمة: يا بعدين البنية تحتاجهن اليوم
مصطفى: اي يمة اعرف منا ساعة ساعتين يجون ياخذوهن
رحمة: تمام
دمعة: اجى مصطفى تمدد بالكرفانة وحط راسو على ايديه وصفن واحنا بدلنا ملابسنا ورجعنا لحياتنا الطبيعية
بس فورا افتقدنا سوسن وماما نعمة خصوصا سوسن لان جانت ويانا دائما وقريبة من اعمارنا مو مثل ماما نعمة جبيرة كلش
بعدها ماصارت احداث تذكر مجرد انو مصطفى رجع الكراسي والطبلة واجى اخو حسام اخذ جنط الغراض واجى زوج سناء اخذها
من راحت سناء من صدگ فرغ البيت وصار موحش كلش وكل شوية اتخيل سوسن راح تدخل علينا لو اروح للمطبخ والگيها گدامي
ومن ضوجتنا ذاك اليوم حتى عشى ما اشتهينا نتعشى وثاني يوم رجعت ماما نعمة وكلش تمدح من اسلوبهم واحترامهم الها
وبالليل اجو سوسن وزوجها گعدو نص ساعة لو اقل وراحو حتى ما لحگنا نحجي وياها وحسام يگول هي گالتلو مشتاقلتهم لذلك جابها
وبعدها جان يوم ثلاثاء هم اجو تعللو يمنا وكل ما نسأل سوسن عن شي تگول بعدين احجيلكم بس مبين عليها كلش سعيدة
مصطفى انطاهم خبر انو يوم الجمعة غداهم يمنا هم واهل حسام ومن خلصت التعليلة راحو وجانو مقررين يجون يوم الجمعة وتبقى يمنا سوسن للسبت بالليل
من سمعنا هيج طرنا من الفرح وصرنا نحسب ليوم الجمعة ثانية ثانية وما اجى يوم الخميس الا احنا كارهين نفسنا
يوم الخميس اجت سناء وراحو ماما رحمة ومصطفى للسوگ وتسوگو احتياجات العزيمة وما خلو كلشي تخيلو حتى طلي(خاروف) اشترو
ورغم جان الطلي بالنسبة النا فوگ امكانيتنا بهواي بس علمود ما تفتشل سوسن گدام اهل حسام جان لازم نجيب طلي كامل مو كيلوات لحم من الگصاب
بيومها بابا وبراء وصفاء تخبلو من شافوه لان هم يشوفوه غالي وكل ما يشوفو واحد منهم يتأفف ويگول بطرانين
ثاني يوم الصبح اخذ سجينة مصطفى ووجهو للقبلة وگال بسم الله الرحمن الرحيم وذبحو واني والبنات انهزمنا للغرفة من الخوف
ما طلعنا لحد ما صلخوه وقطعوه وبلشن ماما رحمة وماما نعمة وسناء بالطبخ والبقية جهزو نفسهم علمود نطلع حلوين گدامهم ورتبنا الكرفانات
خطية مصطفى ما لحگ حتى يرتب نفسو طاير من شغلة لشغلة حتى الطبخ يساعدهن بيه وكل شوية يتذكر شغلة ويسويها قبل ما يجون
جنت گاعدة عند باب الكرفانة انتظرهم يجون علمود سوسن وانتبهت لمصطفى جان واگف گدام المطبخ يحجي ويا امو
جان لابس دشداشة بيضة ولاف شماغ اسود على راسو ولحيتو مسويها تدريج ومحددة ورافع ردن الدشداشة لحد الكوع وفوگ الكوع مبينة عضلاتو من الدشداشة
عيونو العسلية جانت ضايفتلو جمال فوگ جمالو وحتى من يعصب تحسو ما يعرف يعصب لان عيونو ما يبين بيهن العصبية
انتبهت لنفسي جان رايح مصطفى واني باقية على صفنتي وبيومها تأخرو الى ان اجو بحيث صارت الساعة 12:30 يلا اجو
وما اجو اهل حسام كلهم بس هو وابوه وامو وسوسن وجدة حسام والبقية بس دزو سلام واعتذار انهم ما يگدرون يجون
من نزلو سلمنا عليهم وراحو حسام وابوه ويا بابا واخواني وامو وجدتو دخلن للكرفانة مالتنا وراحت يمهن ماما رحمة واني والبنات رحنا للمطبخ
اني جنت طايرة ويا سوسن ماعوفها ابد حتى هي تشاقيني وتگول ظلي تركني علمودج على اساس صرت مثل ظلها
الساعة 1 بلشو ماما نعمة وسناء ومصطفى يغرفون الاكل والبنات يجهزن الزلاطات والطرشي وهاي الاشياء ومن كملو غرف اجو براء وصفاء ساعدو مصطفى
ومن هالهوسة كلها الشي الوحيد الي سووه انهم ساعدوه بنقل الاكل والباقي ما تدخلو بيه نهائيا ولان بوقتها الاكل هواي حطينا للزلم والنسوان بنفس الوقت
من تغدينا وشربو الجاي بقو تقريبا ساعة واسترخصو وبقت يمنا سوسن وگالت باجر بالليل يجي حسام يتعلل وياخذها وياه
بلشنا ننظف البيت ونشيل الاكل الزايد وبدلنا ملابسنا وما خلصنا للعصر بحيث صلينا العصر يلا گدرنا نگعد ويا بعض
سناء: اي ولج سوسن احجيلي شلونهم عيالج
سوسن: مشاء الله ماكو منهم معتبريني مثل بنتهم وما اسمع منهم غير الكلام الحلو والاحترام ويحترمون بعض بشكل مو طبيعي
رانيا: خوما احد بيهم جابلج طاري علمود شغلنا
سوسن: لا واتفقت ويا حسام من اول ليلة على هالشي
سناء: شلون يعني
سوسن: اول يوم بالليل من بقينا لحالنا گلتلو قبل ما تبدا حياتنا ويا بعض اريدك توعدني بشي وتكون گد وعدك
حسام: باستغراب .. گولي يابة وما يكون خاطرج الا طيب
سوسن: انت تعرف انو اني وخواتي وماما جنا نشتغل
حسام: اي اعرف
سوسن: وهالشي غلط لو صح
حسام: سوسن اني مو مجرد صديق لمصطفى اني وياه اكثر من اخوان واعرف وضعكم كلش زين واعرف ليش انجبرتو كنسوان تشتغلون
واني ماعندي اي مشكلة بالعكس هذا يعتبر شرف الج لان بقيتي نقية وعفيفة واشتغلتي وتحملتي كل هالضيم وكسبتي لگمتج بالحلال
سوسن: يعني توعدني انك ما تعايرني بالشغل انت او اهلك بالمستقبل
حسام: كل عقلج تحجين سوسن احنا مستحيل نجيب هيج سيرة لان تمسنا قبل ما تمسج ونسيئ لنفسنا قبل ما نسيئلج
وحتى لو صار وواحد حجالج هالحجاية بدال ما تحسينها اسأة افتخري بيها لان الشغل لا عيب ولا حرام
سوسن: تمام
رحمة: ونعم التربية والله ومبينين هو واهلو خوش ناس ويعرفون الاصول
مصطفى: لعد شعبالكم غير هذا صاحبي
سوسن: دير بالك ترا بدت تطلع فضايحك
مصطفى: صخم الله وجهك يا حسام
سوسن: هههههههههه
ضحكت من كل گلبها وصارت تحجيلنا عن تعاملهم وشلون يحبوها ويحترموها خصوصا ان هي اول جنة تدخل لبيتهم
وحسام بالنسبة لاهلو مثل مصطفى بالنسبة النا اغلى واحد بالولد رغم اخوانو احسن من باقي اخواني بس هو الولد المميز وحبهم الو انعكس على سوسن وصارو يحبوها
سناء جانت متفقة ويا زوجها يجي يوم السبت بالليل ياخذها يعني بالوقت الي تروح بيه سوسن وميزر طول هالمدة ما شفناه
حتى سوسن ما طلبت تشوفو ولا كانو موجود بالدنيا كل الي نعرفو عنو انو يشتغل بالشركة وبس حتى بابا ما جرب يرجعو للبيت
يوم الجمعة والسبت مرن بلمح البصر لان جنا كلش سعيدين بوجود سوسن وسناء ما حسينا الا صارت الدنيا ليل يوم السبت
اجى اول شي حسام وگعدو يتعللون هو ومصطفى وبعدو بنص ساعة اجى زوج سناء نزل بس سلم على حسام وباركلو لان عديلو واخذ سناء وراح
ومن خلص تعليلتو حسام اخذ سوسن وراح واحنا نظفنا البيت ونمنا فورا ومن ثاني يوم رجعنا لحياتنا الطبيعية بس باقي عزيمة اهل حسام النا
