رواية فصلية بديلة ( شموخ ) الجزء الثاني الفصل السابع 7 بقلم ام ملكوت

:-بعدما كملت صلاة الظهر رحت طبخت على كدنه اني وطفلي حبيبي تمن ودجاج كلي طفيت النار بعدما استوه وصبيتلي بصحن كعدت عل ميز اكل واباوع للفيلم يلي يمثله ممثلي المفضل

جاكي شان وانه مندمجه بالفيلم ماحس الا انركع الباب ودخل ثائر وهو ثائر من الاعصار هه .. اجه باتجاهي وخله الاوراق حيل عل ميز مالت الاكل وهو يكول..

_هاي الاوراق الطلبتيهه جيبي الملفات ياله اوقع عليهن 

_جؤ جؤ توقع عليهن ياله انطيك الملفات

_وشنو يضمنلي ماتضحكين علي وتشردين

_مدام اخذت الاريده منك مالي شغل بيك وبقضاياك الباطله ولا الي مصلحه اسلمهن لاحد

_واذا طلعتي ناسختهم 

_كتلك مالي مصلحه بتسليم الملفات للشرطه انت وكلشي تسوي اخر همي والراح اخذه منك هو لابني مو الي يعني حقه هذا

_تمام يمته تسلميني الملفات

_باجر لمن توصلني لاهلي اسلمهن الك بالطريق

_يعني عند اهلج الاوراق طلعن

_جؤ وانما بمكان تعرفه زين 

_وين

_لا تحاول تستغبيني تعرفني شنو

_هففف هاذهو راح اوقع وابقي الملفات عندي وباجر سلم واستلم

_بكيفك 

باوعتله ببرود عكس نضراته يلي مليانات شك وحقد اتجاهي انحنى عل اوراق طلع القلم من جيب بنطرونه ووقعهن كلهن وانطاني القلم كمت

وقعت بالمكان المخصص الي بعدما قريتهن اخذهن وطلع رجعت كعدت بمكاني وكملت اكلي كلت الحمدلله وكمت لغرفتي قفلت الباب وتمددت عل جربايه

صفنت افكر بالخطوه الجايه وشراح اسوي بي ابتسمت وكلت هذا شخص مايستاهل واحد يوفي بوعده اله ..غمضت عيوني مستسلمه للنوم ببال خالي لان اصلا الخطوه الجايه معروفه .. 

ثاني يوم الصبح كعدت مالكيته بالبيت رحت قفلت باب الشارع حتى لا يجي غفله ودخلت لغرفه المكتب مالته ادور بين شغلاته عل ملفات ماخليت

مكان بالغرفه مادورته صفنت بحيره وتذكرته امس بليل لمن سمعت صوت خطواته عل درج .. رحت صعدت فوك لكيت باب البيتونه مقفول مو مثل

العاده ايقنت ان الملفات موجودات هنا بقيت ادور على المفتاح بالمكان مالكيته رجعت نزلت للغرفه دورته كذلك ماكو رحت للمطبخ والبيت كله فتشته

ماكو كلت اكيد ماخذه وياه .. تنهدت ورحت للحمام غسلت وجهي وطلعت سويتلي ريوك وكعدت اكل بس لعبت نفسي ورحت اركض للحمام

كالعاده اتقيأ.. غسلت وردت اطلع واجت عيني لا ارادي عل ماسحه وكأن ربي بعدي اسمه راد يكشفه الي شفت طالع من مكانها قطعه حديد كرفصت

كبالهه وسحبهه وجان يطلع مغناطيس استغربت وكلت شيسوي هنا وانه بس يلي استخدمهه وماحاطه بيهه هيج شي .. رجعه لمكانه واخذ

الماسحه وطلعت بعدما لفيت بالحمام عن شي يلفت الانتباه ومالكيت .. طلعت لغرفه المكتب مالته ادور بعيوني عل اماكن العاليه رفعت الماسحه

ودنيتهه يم البنكه ماطلع شي رحت فوك السبلت ماطلع شي وره البرده كذلك ماكو فوك الكتتور وغيرهه مديت الماسحه عليهه وماطلع شي

بالمغناطيس طلعت للبيت كله نفس الحاله ماكو بقى بس مكان واحد ودائما يكون المكان المرئي والبسيط هو المكان يلي تنضم بي اكثر الشغلات

السريه .. صعدت فوك الدرج ولفيت راسي عل صاله جان السقف ثانوي اخر مربع بي صاير قريب الدرج ومفتوح من اول ماعرسنه هو جان على هل

حاله وماخليت بالي وياه .. كعدت عل درج ورفعت الماسحه خليتهه عل مربع وبقيت امرر بيهه فتره وطلعتهه وجان يطلع مفتاحين وياهه ابتسمت

بنصر واخذت المفتاح كمت نكتت ملابسي من التراب وفتحت باب البيتونه وطلعت فوك السطح دخلت لغرفه المخزن المخليتهه فوك وبقيت ادور

بين الفراشات والغراض القديمه لحدما طحت بصندوق صغير كد جف الايد وبي قفل صغير اخذته وكمت ادور على الاوراق لحدما طحت بيهن

مخليهن بالزوليه الجبيره الملفوفه والله عليه اماكن يضم بيهن اسراره بس مايدري بيه انبش التراب وادور عل نايم بكبره .. اخذتهن وقفلت

الغرفه وباب البيتونه رجعت القفل بمكانه ونزلت لغرفتي دزيت الملفات لجنان واتصلت علي تستفسر مني شصاير وانه مستعجله كتلهه بليل وسديت

الاتصال .. كعدت وفتحه الصندوق واشوف بي ٥ فلاشات مصوره ماعرف شنو مضمونهن بس من طريقه ضمه الهن ايقنت انهن اهم من الملفات الاخذتهن

بالف مره .. خليتهن بجنطه الملابس مالتي واتصلت على سلام يجيب تكسي ويجي ياخذني كال تمام وسديت الاتصال كمت بدلت بسرعه

وطلعت الجنط وبقيت انتظر ١٠ دقايق ودك الباب مانكر اني ماخفت ولزمت كلبي بس توكلت على ربي وهل شي قواني رحت باوعت من فتحه الباب

وشفته سلام زفرت براحه وفتحتله الباب انطيته الجنط خلاهن بالسياره وهو يسال شصاير وشنو هاي الجنط وانه استعجله حتى نطلع منا قبل

مايوصل ثائر.. صعدنه السياره وطار بيهه لبيت اهلي وصلنه وفتحلنه بابا الباب انه شفته لو روحي احسهه ردت عبالك ماشايفته صارلي عمر وفعلا من تزووجت 

لهسه مازورهم الا كل ٤ اشهر او ٥ خلاني النذل انقطع عن اهلي فرد مره وماحن عليهم .. وهسه من بعد هل فركه والجفاء ارتميت بحضن بابا وهو

لمني بحضنه حيل من شوكه الي ووحشته احسه يريد يدخلني بكلبه ومايطلعني بعد .. بجيت وطاحت دموعي مهضومه

لاول مره بعد سنين كدام ابوي بعدني عن حضنه لمن سمع شهكتي ولزم وجهي بقلق وسالني واديه احسهن يرجفن..

_ بويه شموخ شبيج ليش البجي ولج بنيتي ياهو وياج كليلي واشعل ابوه وداعتج ماخلي يصبح عليه صبح وهو بمخدعه كليلي يابويه منو وياج

_بعدوني عنكم وحرموني الله لا ينطيهم خلوني ماحن لا على صغير ولا على جبير منكم بويه

_احنه انحن عليج بويه كلنه كلوبنه عليج محد يفركنه انشاءلله غير الموت تعالي بنيتي دخلي لامج مكطوع كلبهه عليج من ايام تكول بنيتي احس بيهه شي 

_وينهه امي مشتاقتلهه احس صار دهر ماشايفتهه

_تعالي دخلي بويه سلام جيب جنط اختك وسد الباب 

_حاضر بويه 

دخلنه للبيت وسلام سوه مثلما كله بابا دخلت وشفت امي كاعده تقره قرآن ودموعهه تنزل انكسر كلبي على مظهرها هذا وحجيت بصوت مخنوك..

_امي ارضي وسمائي انه هنا

رفعت راسهه وكالت صدق الله العظيم وفتحت اديهه بشوغه روح ودموعهه تصب رحتلهه اركض حضنتهه وبقت تمسد على راسي وتكول..

_بنيتي شموخه وينج يايمه ليش تجافين امج وتحرمينهه من شوفتج كل هل اشهر ماهان عليج تجين وتسالين عن امج وابوج الربوج والتعبوا عليج 

_اسفه امي حبيبتي والله مو بيدي اولاد الحرام جانوا مقيديني وغامدين كلبي عنكم وعن الناس ماتدرين شصار بيه بخلافكم يمه انشلع كلبي بس هيهات ماترد بنت الشيوخ مذلوله اجيت وجايبه حقي وياي يمه 

_شصاير وياج يمه عن شنو تحجين 

تنهدت ومسحت دموعي واجه ابوي وسلام كعدوا يمي لزم بابا كتفي وكال بقلق..

_شصار بابا عن يا حق تحجين وشنو سبب جيتج محمله صاير مشكله بينج وبين زوجج محاجيج بكلمه مضايقج

_بابا هو بس ضايقني بس خانكني بس شلع كلبي وبس وبس شحجيلك ومنين ابدي يابويه بتك عاشت مهضومه كل هل اشهر يابويه

_احجي بويه وانه اصد ظهرج واشرب من دمه اليقرب صوبج

_بابا جان قرار زواجي من ثائر مو بيدي ولا بارادتي ولا بكامل وعيي

_جا شلون بويه ..

صفنت بالحايط ورجعت بذاكرتي وحجيتلهم كلشي صار وحسيت بي اتجاهه وكلشي كاله لمن راد يحركني وابوي يشطاط غضب ويشد قبضه ايده

وانه كوه لازمته وامي لازمه سلام ماتخلي يطلع يروحله كملت كل الحجي واخر شي حجيته هدأهم شويه وسكنوا..

_بابا انه حامل وخليته يكتب باسمي سهمه من البستان مالت عمه والبيت كله باسمي وكتبلي تعهد ان مايتعرضلي او لاي شخص منكم بشرط ان انطي الملفات 

_وانتي وافقتي

_اي وافقت بس انه بنتك بويه مايحكمني مال ولا بشر خليته يوقع الاوراق واخذتهن واخذت الملفات ولكيت فلاشات ضامهن بشكل سري هم جبتهم يعني رقبه ثائر بيدي هسه وبس انه الاكدر اتحكم بي 

_سبعععه بنيتي والله انج كفو وتسوين الف زلمه واغم الحاول يلعب وياج 

_ بنت ابوي انه اعجبك

_خلاص انتي لهنا انتهت مهمتج خليني الباقي على الله وعلي وانه اعرف شسوي بي 

_وانه كلني ثقه بيك بويه بس اريد تنتبه وماتخلي يعرف ان الادله عندك لاني كتله عند شخص ثاني وبس يصير بيه شي يسلمهن للشرطه

_هاذهو بويه خليني اشتغله على مرامي واعدل بي مزاجي

_كفو من الشهم هههه

_بعد بيتي بت ابوهه تعاي المج بحضني الج وحشه شكبرهه بكلبي 

_اروحلك فدوا بابا العشك الابدي

ضحك وسحبني لحضنه وهو يتنهد براحه لان رجعتلهم سالمه ابتعد وكال وهو يباوع لبطني وكال..

_شكد بعد وينور ابن بنيتي

_علمي علمك يابابا ماعرف ماحسبت

_مارحتي للدكتوره

_لا ماكدرت 

_هاذهو من باجر الصبح تاخذين امج وسلام وترحون تطمنون على صحتج وعليه واي شي تحتاجونه انتو الاثنين انه ركبتي سداده 

_الله يحفضك ويخليك النه خيمه فوك راسنه يااارب

_بعد بيتي انتي 

ابتسمت وباسني براسي وامي وسلام حضنوني وباركولي عل حمل وحيل فرحانين بيه ماشالتهم الكاع بوجودي عدهم .. اخذتني امي لغرفتي دخلت

وهيه هيه باقيه ونظيفه رغم اجيلهم جنت كل فتره بس مابقى عدهم وابات ولا افوت الهه فقط اكعد كم ساعه وارجع ولا كأني انه الماكدر اعيش

بدون اهلي عبالك وحده غريبه سوالفي وياهم لهذا السبب صارتلي وحشه عدهم وافتقدوا وجودي الدائم وحنيتي وحبي الهم .. جابلي سلام الجنط

وراح فتحتلي الجنطه امي طلعتلي ملابس ودخلت للحمام سبحت ونشفت وطلعت لكيتهه تسفط بالملابس بالكنتور وتبوس بكل قطعه تخليهه

غصيت بعبرتي ورفعت راسي للسما مقهوره وتحسبت على ثائر بيوم الجمد كلبي واحساسي وحرمني من اهلي وحرمهم مني..

رحت كعدت يمهه بستهه بكتفهه والتفتت علي وهي مبتسمه اخذت الخاوليه مني وكالت..

_تعالي بنيتي خل انشف شعرج لا تتمرضين مو زين على وليدج حبيبتي

_امي 

_عيونهه وضناهه

_شلون جان حالكم بهاي الفتره

_بالضيم يايمه لا نومتنه نومه ولا اكلتنه اكله البيت وكلوبنه صارت وحشه بدونج جنتي مؤنستنه ورحتي واختلفتي علينا 

وجان المهون علينه انج عايشه بسلام ومرتاحه ويه رجلج ماجنه ندري بهل مصايب طايحه عليج وساكته 

_جانت حياتي اتعس من التعاسه بس الله يدري بالمريت بي وبس هو شاهد على كل ليله انام وانه دمعتي على خدي مكسوره الخاطر ولوما بهذاك اليوم الله فتح عقلي وعيوني على الغلط السويته جان انداست بنتج بالرجلين وماحست على روحهه يايمه

_ويحفظج ياغاليه انتي..

كملت تنشيف وكمت جبت المشط ومشطتلي حسيت رجعت طفله مثل قبل وكاعده تهتم بشعري حسيت بامان وحنيه جنت فاقدتهه من زمااان

ماحسيت على نفسي الا وانه غافيه بحضنهه وره فتره كعدت على اثر ايد تمسد على شعري فتحت عيوني وشفته بابا كاعد كبالي ويمسد على راسي

ومبتسم وامي مخليه راسهه عل كنتور ومغمضه كمت عن رجلهه وحجيت ويه بابا بهس..

_مادري بروحي ونمت بحضنهه خطيه اكيد ضهرها ياذيهه هسه

_بالعكس اول مره اشوف امج متعمقه بنومتهه رغم نايمه كعده ولا فراش ولا غطه 

_ليش سوده علي جانت ماتنام

_جان يجيهه الارق بهواي مرات انام واكعد والكاهه كاعده تقره قرآن وتدعيلج ومن اسالهه ليش مانمتي تكلي بالي يم بنيتي شحوالهه هسه احسهه مو بخير

_ياا جانت تحس بيه من ابجي واختنك لكك ياربي شلون عساني ميته بهذاك اليوم ولا انطيتكم موافقتي على هيج انسان حطمني ودمر بيتنه ولمتنه

_ربج مايكطع بعبده حشى شوفي حوبتنه وين راح تودي صدكيني يابويه هذا الخسيس نهايته بالتهلكه مو غيرهه

_الله يسمع منك ويخلصنه منه حسبي الله عليه من بين الزلم

_لا تفكرين ولا تقهرين بروحج اهم شي صحتج وطفلج والباقي كله سهل وداعتج يابويه 

_انشاءلله بابا خلي اكعد امي تنام بغرفتهه خطيه لا يتاذه ضهرهه

_كومي انتي نامي على جربايتج انه هسه اكعدهه

_تمام 

كمت من الكاع وتمددت عل جربايه غطاني ورجع كرفص كبال امي وبقه ينده باسمهه وهيه غاطه بالنومه بس تتكلب براسهه التفت علي ابتسم وكال..

_غمضي عيونج بنيتي

_ليش شهومي شعدك شتريد تسوي

_هههه بكيفج ابقى باوعي

_لا دخيلك خل اطلع من الغرفه احسن

_كعدي ولج شسوي مثلا اريد اخذهه لغرفتهه واخاف تغارين 

_يااا هههه لا هل مره سماح لان خطيه نايمه 

_هههه تمام

ابتسمت والتفت وره امي وشالهه بين اديه مثل الطفله رغم عمرهم بس من اشوفهم هسه اشوف سماء وشهم بشبابهم الكبر ماغير منهم شي ولا ضيع 

من حبهم نقطه حب كبل مو مثل حب هل وكت تمنيت لو عشت بزمانهم وتزوجت شخص يحبني واحبه ونعيش حياة سماء وشهم بس بعد يلي صار

بحياتي كرهت جنس ادم فوك كرهي باضعاف صرت اكره الزواج وماحب اسمع بسيرته حتى واتوحش من شخص يسالني عن ثائر وينسبه على

ان زوجي خلاص اكتفيت بنفسي وطفلي واهلي يمي ماريد شي زايد او ناقص بحياتي خليني اعيش بسلام باقي عمري واربي ابني.. غمضت

عيوني وابتسمت برضى عن وجودي يم اهلي واحبابي واستسلمت للنوم فتره مو طويله وكعدتني امي والقلق بعيونهه وكالت..

_يمه شموخه هاي عمتج اجت تريد تحجي وياج يمه

_شتحجي وياي اعرفهه تعرفني كليلهه البيت الدخلتيله يتعذرج وخلي تروح منا كلشي ماعندي الهم بعد

_ولج يمه ادري ماطايقتهم بس لخاطري كومي انتي احجي وياهه لان شهرتنه واكفه بالطارمه وتعربد بين الوادم خزتنه يايمه

_وينهه هسه هيه

_دخلتهه جوه بالصاله كومي احجي التردينه وسكتيهه وتكفي شرهه عنه ابوج مو هنا وسلام كوه لازمته ماريده يغلط ويه المره بس انتي تكدرين تخليلهه حد

_خلاص امي روحي وانه بس اغسل وجهي واجي اتفاهم وياهه

_تمام بنيتي لا تطولين 

_انشاءلله 

طلعت من الغرفه ومسحت وجهي بعصبيه كمت غسلت وجهي وطلعت للصاله وكفت متخصره وكتلهه..

_السلام عليكم خير ام ثائر عندج شي لو مضيعه خلفتج هنا

_والله زين من بين الكمر عبالي عنده كسوف

_عليمن انكسف علمود ناس لازم هيه تنكسف

_لازم تنكسفين لان مو حلوه وعيب تدخلين بامور ماتخصج ماخذتج لابني حتى تصيريله حفره بطريقه وتعثرينه ويكون احسن لو تنطيني العندج لان راح تصير مشاكل تالي

_كلشي مانطي واعتبري الاخذته هو ثمن تلاعبكم بيه واذيتي وحرماني من اهلي كل هل وقت وماتحمل انام وامثالكم حريتهم مطلقه وعايشين بهني

_كلمن اله بروحه ومحد اله بشغل الغير لو اهلج ماعلموج ان عيب تحشرين خشمج بامور غيرج الشخصيه

_ عفكره هاي القضيه من شخصيه وتخص شخص واحد وانما تخص العامه تخص الناس وفلوسهه يلي اكلتوهه بحجه الاستثمار حق الناس الاخذتو

بيوتهم وطلعتوهم بليله ظلمه بالشارع بعمره النصب والاحتيال ماجان امر شخصي 

_عليمن نصب واحتيال همه الناس ينطون فلوسهم وقابلين يطلعون من بيوتهم مالزمنه سلاح على احد بيهم وكنالهم اطونه فلوسكم الناس بارادتهه

تستثمر وتدفع العدهه حتى تصير عدهم فلوس ومن طمعهم خسروا فلوسهم هذا كله تعبنه احنه وعرك جبينه وانتي اخذتي كلشي حاصل فاصل من

ابني وجبرتي يكتبلج كلشي يملكه باسمج وانه اليوم ماطلع الا ترجعين الاخذتي من ابني ان جان ملفاته او بيته وبستانه

_ههه العفو منج حجيه وانه كذلك ما لزمت على ابنج سلاح وكتله يكتب البيت ونسبه البستان باسمي انه طلبت وهو كال حاضر 

واعتقد انتي تعرفين بهاي السوالف ومشتغله بيهن وانتو تسمونه احتراف وانه اسمي ذكاء وخلاص

_تمام اذا تكولين هيج جا ديري بالج على ابنج منا ورايح اذا ابني كتبلج تعهد انه لا ماكتبت شي اكدر وبدون ماعينج تلتفت مثلما جبتج للطريق امحي ابنج برمشه وحده ..

جابت سيره ابني لو تخبلت وكفت على حيلي خليت اصبعي بين عيونهه وحجيت بعصبيه ..

_ابني خط احمر وصدكي عندي ادله توديكم وره الشمس غير الملفات فكفو شركم عني لا اوديج وره ابنج فاهمه 

_ماعندي شي اخسره اذا ابني دخل السجن شتردين تسوين سوي 

_تمام ماراح احجي شي انه بس اريد توصلين كلمتين لابنج وساعتهه هوه يلي راح يسكتج ويلزمج حدج 

_شنو

_كليله تكول شموخ تفقد فلاشاتك خاف طايحات منك 

_شنو قصدج يا فلاشات

_كليله وانتي تعرفين لانهم يخصونج انتي والعمو مالتج يدادا فلوح

همست يمهه باخر جمله وهيه اشطاطت عيونهه بغضب وبلعت ريجه بصعوبه نترت جنطتهه وطلعت رفعت راسي بابتسامه نصر مرسومه على وجهي وشفت جنانه بالباب جانت موجوده اجت علي بسرعه وكالت بقلق..

_شموخ شصاير ولج شسويتي من مصيبه واجيتي 

_تعالي للغرفه اسولفلج

_تمام يله 

اخذتهه ورحنه لغرفتي كعدت عل جربايه ورحت انه عل ميز الم بشعري التخربط مسحت وجهي بارتياح والتفتت على جنان حجيتلهه كلشي سويته بهاي الايام ولمن كتلهه عن حملي وكفت بصدمه وكالت..

_حامللل لج شموخ صدك انتي حامل 

_اي خيه 

_وشلون هسه بابنج لا تكليلي تنطينه لابوه

_لا يمعوده شكو مطيته لابوه غير ابني هذا من لحمي ودمي

_افف خوفتيني عبالي راح تكولين اشمره على ابوه 

_لج غبيه لو اريد اشمره على ابوه جان ماخليته يكتب تعهد مايضره

_اي هم صدك الف مبروك يروحي انشاءلله ربي يتمملج على خير وتكومين بسلامه وتشوفينه سالم ومعافى بحضنج 

_تسلمين يروحي انتي 

_يمه فديته ابن شموخه يمته يجي واصير خاله 

_هههه انشاءلله كم شهر وينور ويكبر راسج وتشيخين علينه شكلك صرتي خاله

_هههه اي جا شلون المهم هسه شراح يصير تالي عمو شراح يسوي

_بعد هوه يعرف محققين وضباط بالنيابه راح يستلمون القضيه ويحولونهه للمحكمه 

_وانتي شراح تسوين بثائر وزواجكم

_بعد كل يلي صار شتتوقعين ممكن ارجعله او اسامحه اول شي اسوي بعدما تثبت عليه التهم وياخذونه هو الروحه للمحكمه اسلم الملفات

الوقعهن وارفع عليه قضيه طلاك واحتيال لان اخذني بطريقه غير شرعيه ومن دون وعيي خلاني اقبل بي

_بس تدرين ان زواجكم باطل يعتبر 

_لا مو باطل لاني ماجنت مغمى علي او مجنونه فقط مستسلمه جنت بوقتهه قابله وانه السعيت بيهه حتى لو مو بوعيي

_هيج كولتج

_اي بس للتاكيد اخلي بابا يسالي الشيخ ونشوف 

_اي هيج افضل

_يله خلي نطلع يم امي بحدهه بالصاله

_تمام يله

طلعنه للصاله ولكيت بابا جاي وكاعد يم امي ومرتضى عل خط يخابرون بي باوعت لجنان وشفتهه بهتت ملامحهه

ضايجه وتبلع ريجهه بصعوبه صاحني بابا واجينه كعدنه يمه وانطاني النقال سلمت على مرتضى وكال..

_شنو القضيه الصايره شموخ هذا كله صاير واحنه ماندري لو مسويله فاينه بيج وين ننطي وجهنه احنه 

_بعد صارت ولا تخاف اختك كدهه ومايفنيهه هيج واحد عار 

_اي ادري بيج سبعه ماينخاف عليج بس للاحتياط جان لازم تنطين خبر لواحد من عدنه حتى اذا صار شي لا سمح الله نعرف نتصرف

_هوه انه هيج سويت جنت كلشي يصير وياي اخبر جنانه بس ونقلت كلشي الهه حتى اذا صار شي هيه تتصرف وتكلكم بالقضيه كلهه 

_هاا تمام شلونهه هيه

_زينه هاي هيه تريد تحجي وياهه

_هاا لا لا رايح انه جماعتي يصيحولي سلميلي على خالتي وعمي 

_تمام الله يسلمك

_ يله مع السلامه

_الله وياك

.

.

:- سدت الاتصال شموخ وانه بقيت مفهيه حسيت كلشي سويته راح عل خالي بلاش مجرد سؤال واحد علي احس رد الدم لكلبي وصار يخفك بجنون

ماعرفت وين اودي وجهي عن الموجودين عيوني فضحتني لمن دمعت نزلت راسي وانه اعصر باصابع اديه ليش سال عني ليش توتر وتشرد لمن كالتله

شموخ جنان يمي ليش كاعد يسوي بيه هيج شنو معنى سؤاله هسه علي من بعد كل هل سنين الجافاني بيهن معقوله معتبرني فقط بنت خالته

ويسال علي بس لا هو لو معتبرني هيج جان ماتجاهلني لمن نزل اول مره جان سال عني او حتى تحجج واجه لبيتنه يشوفني مثل قبل ..

رغم جنت اسجن روحي بالغرفه والهي نفسي بالحاسبه حتى ماجي كل فتره نزوله لبيت عمو بس هو ولا مره سال عني او سمعت جايب سيرتي شنو

ذكره بيه هسه معقوله حن لايام طفولته وياي او .. لا لا مستحيل لو فعلا يحبني مايسوي هيج بيه مايتجاهلني ويعتبرني ماموجوده بالدنيا اصلا

ياربي شلون بكلبي رجع لنقطه الصفر بمجرد ماسمع صوته وسمعه يسال عني شلون بحالي ياربي ساعدني ضنيت ان نسيته ومايهمني أمره ولا اله حب بكلبي بس غلطانه وحيل هم ..

" وبينما اظن اني قد نسيته قد شغف به قلبي حبا وزاده هياما "

جنت اظن راح انساه لمن ماتذكره او افكر بي بس غلطانه ماجنت ادري هل شي راح يغمض عيني عن كلبي يلي كاعد يحبه بكل مابي من قوه للحضه حسيت كلبي حبه اضعاف حبي القديم اله ..

جريت حسره احس طلعت مثل النار من صدري الموجر كمت من يمهم وطلعت بالحديقه كعدت عل مرجوحه واصفن بالنجوم ورجعت اتذكره رجعت

افكر بي خلاص عقلي وكلبي مو ناوين يبطلون من حبه مو ناوي كلبي يرحمني ويحب غيره بس هيهات ومستحيله بعد يشوف مني لو نظره حلوه

يلي سواه بيه بكل هل سنين المرت مستحيل انساه وانه اعرف اتصرف وارجع عقله براسه بس خلي اكمل اخر سنه الي برمجه ساعتهه اتفرغله

واشتغله على مرامي على كولت عمو شهم .. فزيت من صفنتي على صوت عمي يصيحني رحت للصاله وكتله..

_ها عمو صحتني

_اي عمي منو جابج اليوم

_احسان جابني

_وينه جا هذا السك* لا دخل لا سلم

_ماعرف والله ياعمو بس يمكن عنده شغل ويه جماعته لهل سبب طلع 

_خابري بله خلي يجي وين ماجان واليوم تباتون عدنه عمي ماكو رجعه بنص الليالي والطريق طويل

_لا عادي عمو ياما اجينه بالليل مايصير شي انشاءلله 

_كلت تباتون يعني تباتون ماريد اثني جنانه 

_حاضر عمو تامر انت

_مايامر عليج ظالم بنيتي 

_خلي اروح اتصل على احسان واكله يجي

_روحي عمي 

طلعت بالحديقه واتصلت عليه رن اكثر من مره ياله جاوبني وكال وهو يلهث...

_ الو ها جنان

_شنو شبيك تلهث وتعبان صاير شي

_لا جنت العب رياضه شفتي شموخ هسه نرجع للبيت

_لا عمو طلبك وكال اليوم تباتون يمنه ماخلاني احجي حتى 

_لاا جان كتيله مانكدر عدنه دوام شي 

_ماكدر تدري بعمك شنو انت اذا كال كلمه لازم نطيعه تعال وخلينه نبات يمهم والصبح نطلع 

_تمام جاي انه مسافه الطريق يمكم 

_بعدين اسولفلك من نرجع للبيت ويكون افضل لو انت كعدت وياهه وفهمت منهه

_ماكدر احجي وياهه علاقتنه مو مثل قبل بعد صارت على ذمه رجال مو هينه اكعد واضحك واسولف وياهه وكأن ماصاير شي

_انه ماراح اتعب روحي واحجي وياك انت تجي وتفهم الصاير ساعتهه بنفسك تروح وتكعد وياهه وتحجي

_شنو شصاير احجيلي

_لا ارجع وانت تعرف

_تمام يله جاي انه 

_ديربالك بالطريق

_انشاءلله 

سديت الاتصال والتفتت ردت ادخل وشفت شموخ واكفه بالباب وتباوعلي اجت مشت يمي وكالت وهيه تكتف اديهه وتباوع للسما بحيره..

_سولفيلي جنان شلون انه تزوجت شنو جانت حالتي بوقتهه ترى ماتذكر الا كم مشهد يمر كدامي مرور الاحلام

_والله علمي علمج فجاتا واحنه كاعدين اتصل عمو شهم وخبر بابا ان تقدملج شخص ووافقتي عليه والاسبوع الجاي العقد كلنه انصدمنه وبابا ساله شنو

صاير ومنو هذا التقدملهه وشلون دراستهه لان النعرفه انج ماتطيقين الزواج هيج فجاتا تقبلين باي واحد حتى ظنينه ان ماخذته عن حب ساعتهه

احسان كلب الدنيا وراد يجي يحجي وياج ويقنعج ان ماتقبلين بي او يعاتبج لان رفضتي وهو صديق طفولتج وقبلتي بالغريب 

_ليش ماجه ليش مامنعني من هل غلط ليش ماصحاني على زماني وعلى السويته ليش دائما يتاخر لو مايجي لمن احتاجه

_ماقبل بابا لزمه كوه وتعارك وياه وحلف يتبرا منه اذا اجالج وحجه وياج كلمه وحده واحسان تخبل صار شكو شي كدامه يكسره ساعتهه بس ياله اهلي عرفوا بحبه الج حتى بابا كله 

ليش ماحجيتلي جان كلت لاخوي لا ينطيهه ويبقيهه الك بس هوه كله ان حجه وياج وانتي رفضتي وكلتي ماتحبين الحب والزواج وماممكن تتزوجين مستقبلا

_لمن شفتوني هيج جان المفروض تدورون عل حقيقه تعرفون شنو السبب يلي خله شموخ تسوي المستحيل بالنسبه الهه افترضي جان مهددني او فد شي لا سمح الله وقبلت مافكرتوا تسالون وتدورون على السبب الخلاني اقبل

من اثر تهديد بالعكس تحجين وانتي مبتسمه وطايره من الفرح يعني مستحيل شخص يشك ان مهددج او مسويلج سحر وساحلج عليه

_ هففف الله لا ينطي ابن الحرام هذا لو جان زلمه جان ماسوه سوالف النسوان ودخل لبيوت السحارين 

_اي والله ياخيه 

_المهم الحمدلله ربي خلصني منه على اهون سبب وماعشت عمري كله مغمضه عيوني بس تدرين شنو اكثر شي هاضمني

_شنو

_دراستي ياجنان السنه الفاتت حملت درس ودرجاتي مو زينه ومادري اذا راح تتاثر دراستي بالمرحلة الجايه والاخيره 

_لا انشاءلله ماتتاثر ماعتقد ياخذون بعين الاعتبار رسوبج بالسنه القبل الاخيره همه عليهم بس بالمرحله الاخيره والاختبار 

باثناء مانحجي اندك الباب وطلع سلام فتحه دخل احسان بالسياره وعينه اجت على شموخ بلع غصته ونزل من السياره ومشه باتجاهنه بثقه وعاكد حواجبه وكف كبالنه وعينه على شموخ..

.

.

:- اندك الباب وراح سلام فتحه ماحس الا دخل احسان بسياره واجت عيني بعينه من بعيد يبين بي التعب حسيته كبر فوك عمره باضعاف اجه يمشي بتثاقل وكف كبالي وحجه وهو عاكد حواجبه يااالله شكد ماخذ من ملامحه سهر الليالي والتعب مو احسان الجان وجهه منور من قبل شخص هزيل

وضعيف واكف كبالي للحضه مرت علي ذكرى واحنه صغار بالابتدائيه لمن جانوا يجولنه بيت عمو ساجد ويجي احسان يركض علي من الباب ينطيني ورده شالعهه من حديقه جيرانه

ويلزم ايدي ياخذني للمرجوحه نلعب سويه وهسه وكف كبالي هزيل وكأن شخص غريب بلع غصته بعدما نظر بعيوني ثواني وكال مقاطع صفنتي 

_ السلام عليكم شموخ شلونج

_وعليكم السلام نحمد الله عايشين انت شلونك

_نحمد الله 

_تفضل بابا منتظرك 

_تمام عن اذنكم

_اذنك وياك..

فات من يمي وهو عابس وجهه بجديه جريت حسره وحسيت فعلا اني غلطت بحقه احسان جان ثاني شخص يعترفلي وهو اكثر شخص يعرفني وحقه لو

ضاج وزعل وكرهني لمن قبلت بالغريب ورفضته بس مو بيدي لو بهذاك الوقت اعرف ان مصيري الزواج جان وافقت على احسان ولا اخذت شخص

مثل ثائر على الاقل احسان يستاهل كل الاحترام والتقدير ويعرفني ويعرف أطباعي ماجان عيشني العشته عند ثائر بس شسوي مشيئه رب العالمين هاي ولا اعتراض على حكمه...

دخلنه للبيت انه وجنان على صوت امي رحنه وراهه للمطبخ واحسان بقه بالصاله يحجي ويه بابا لكيت امي كاعد تسويلي عصير زبيب طلعتلي كيك

مسويته الي العصر كعدنه انه وجنان وبقينه ناكل وامي مكابلتني وصافنه علي وتجيب وتخلي كيك كبالي وتكلي اكلي .. فتره وسمعت صوت حمحمه

التفتت وشفته احسان بباب المطبخ وصافن بيه بنظره ماعرفت افسرهه حنين على عتب على شوق على قهر وكسره خاطر نزلت عيني وكامت جنان

اخذت امي وطلعن من المطبخ اجه بخطوات تعبانه كعد عل كرسي يني والتفت علي وصفن بيه لحضات وكال بصوت مخنوك..

_كل هذا صاير وياج وانه غافل ليش 

_بعد صار يلي صار وانه قصدا ماخليت احد يعرف بالصار وياي

_بس انه مو اي احد انه صديقج مثلما تكولين جان خليتيني بالصوره منو الاقرب عليج انه لو جنان اختي 

_ماكدرت اشركك بهذي القضيه وانه ادري بيك لو عارف بالصار وياي جان ضليت تلح علي اترك كلشي وارجع لبيت اهلي لو تتهور وتروح تتعارك ويه ثائر

_لا تجيبين سيرته لهل نذل لا تجيبين سيرته على لسانج طبعا امنعج لو ماخاف واهم بيج جان عفتج تسوين البراسج بس تدرين بيه والبكلبي مايخليني اعوفج تشمرين نفسج بالتهلكه

_ليش ماعندك ثقه بيه

_مو شغله ثقه شموخ هذول نصابين ومحتالين لا تستبعدين عليهم القتل والخطف لو ضارج انه شسوي عوفج مني انه مو مهم بالنسبه الج بله بس و اهلج مافكرتي بيهم ماكلتي ابوج بهاي صحته شلون يتحمل يصير بيج شي 

_بس انه كدهه ولو ادري بالطريق صعب وماكدرله جان مامشيت بي وانت تعرفني محد يكدر يضرني بسهوله 

_استغفرالله ربي خلاص سويتي كلشي تردينه بعد كعدي وسكتي وخلينه انه و عمي نتصرف لا تسوين او تتواصلين باي طريقه جانت ويه هذوليج العارات تمام

_حاضر..

سكت وبهتت ملامحه وبلع ريجه بصعوبه راد يحجي وماحس الا زرف طبله اذني صوت اطلاق النار وجام المطبخ يلي تكسر دنكت وضرب راسي بكتف احسان كام بسرعه صار وراي حاميني وسحبني للممر بين الصاله والمطبخ وكفنه وره الحايط واجه بابا يركضون علي هو وامي وجنان وسلام حضنت بابا وبقه ضام راسي

بصدره كلنه التمينه بمكان واحد والرمي مستمر على بيتنه لزمت بطني متوجعه وكعدت بالكاع مهدود حيلي بابا كعد كبالي وبقه يسالني بقلق..

_شبيج بابا شموخ بيج شي 

_بابا بطني تاذيني بابا ابني دخيلك لا يصير بي شي 

_ماكو شي بنيتي هسه يروح هذا الصوت لا تخافين انه يمج ابنج بخير مابي شي بس من الهبطه وجعتج..

هزيت راسي ب اي وخله اديه على اذاناتي يمنع عنهن الصوت مالت الرمي مرت هل لحضات مثل الكابوس لاول مره اتعرض لهيج شي بحياتي رغم

عمامي شيوخ وغالبا مايصير عدهم رمي بالاعراس او بغيرها بس مثل هل رمي ماسامعه شكد ماكول الصوت يهد الحيل ماكدر اوصف حقيقته وبس يلي مجربه يحس بشعوري بهل لحضه ..

فتره مو طويله وسكت صوت الرمي خلاني بابا بحضن امي وطلع هو واحسان وسلام وبالي ضل يمهم بقيت اباوع وراهم لا يسوولهم شي طلع بابا

سلاحه من فوك الكاونتر وانطه لاحسان واحد ولسلام وطلعوا بالشارع فتره ورجعوا يلهثون وكال بابا..

_مالحكنه عليهم اختفوا بسياراتهم متاكد هذا النذل ثائر عباله راح نخاف من سوايته وتهديده هذا مايدري جنى على روحه 

_بابا ثائر مايسويهه لاتنس توقيعه عل تعهد مايجازف ويضرنه بهل شكل متاكده هذولي عمه وامه لانهه وكفت وهددتني بكل عين صلفه ماستبعد تكون هيه وره هل تهديد

_بسيطه العائله الكريمه رقابهم كلهم بادينه الا اتكتكهم واحد وره الثاني احسان عمي تروح وياي

_للموت 

_امشينه وانت بويه سلام وياي

_حاضر بويه

_وين رايح بابا لا تروحلهم فدوا لا يسوون بيك شي هذول مايخافون الله

_لا تخافين بنيتي ماروح الهم رايح اقيم قيامتهم

_ديربالك بابا فدوا

_انشاءلله بنيتي انتو صعدوا فوك السطح وقفلوا الباب زين لا يسوولهم فاينه

_اي انشاءلله 

_يله رايحين 

_الله وياكم يحرسكم علي واولاده..

طلعوا من البيت وامي رفعتني عن الكاع كوه وصعدتني هيه من جهه وجنان من جهه لفوك السطح نزلت جابتلنه فراش وصعدت يمنه سدن

باب البيتونه وخلن وراه بلوك بحيث ماينفتح واجينه قريب السياج المطل على باب بيتنه جابت امي الجاكوج وزرفت الحايط وراحت للمخزن

طلعت مدري ايش واجت رفعته تنظف بي وشفته سلاح فتحت عيوني بصدمه وباوعت لجنان مو اقل مني صدمه رجعت باوعت لامي وسالتهه..

_امي تعرفين للسلاح انتي

_اي يمه جا شنو عبالج امج هينه 

_والنعم والله بس يمته تعلمتي عليه اشو مادري 

_مره فصل عمج وتعارك ويه عشيره و تعرضنه لهيج هجوم وانتو صغار ساعتهه انجبر يطلع ويتركنه عند الجيران ومنهه

وعلمني ابوج عل سلاح خاف يتكرر هيج موقف تالي اكدر احمي نفسي وجهالي اذا واحد تعرضلنه بغيابه

_كفوو بعد بيتنه ربي يحفضكم ويخليكم النه خيمه وسند

_امين يارب ويحفضكم الي ومايشوفني بيكم شر شلون صارت بطنج يمه بعدج موجوعه

_لا الحمدلله راح الالم جان مال هبطه وخوف لا تخافين عليه سبع مثل امه وبيبيته طفلي

_الله يحفضه ويتمم عليه خلقه وصحته وعافيته وتكومون بسلامه بنيتي

_حبيبتي امي الله يسمع منج 

بست ايدهه وبقيت سانده نفسي عل حايط وامي كل شوي تباوع من الزرف السوته بالحايط ولازمه المسدس بيدهه متحضره تعبت ورجع الم ضهري

يون علي تمددت عل فراش وخليت راسي بحضن امي جنان تمددت يمي وماحسيت على نفسي يمته غفيت فتره بين النايمه والكاعده حسيت على ايد

خشنه تمسد على خدي تراود لاذني صوت بابا وهو يحجي ويه امي ويسالهه عني ماكدرت افتح عيوني بالعكس تطمنت لمن سمعت صوته وتعمقت

بنومي اكثر بس سرعان مافتحت عيوني وانه اشوف اهلي كلهم نايمين يمي فوك السطح والدنيا هدوء والسما بيهه ضوه الفجر وصوت العصافير

وهوى بارد ونظيف ابوي من جهه وامي من جهه جنان يم امي واحسان وسلام نايمين بعيد عنه بشوي صفنت باهلي وجريت نفس براحه رفعت

راسي للسما وحمدت ربي وشكرته لان رجع لم شملنه وماسمح يصير على اهلي اي شي مضر ..

مرت اقل الساعتين وانه اكلب بنقالي بشغلات الاطفال كعد بابا شافني وابتسم مسد على راسي وكال..

_صباح الخير بنيتي

_صباح النور بابا حبيبي شلونك بس كون ماصار عليك شي امس

_لا الحمدلله رحنه واجينه ومالهم اثر سلمنه كلشي للنيابه العامه بعد وهمه يتصرفون وياهم خلال جم ساعه بس يلقون القبض عليهم كلهم 

_اي هاذهو حيل وابو زايد بيهم 

_انتي شلون صرتي خو ماتاذيتي 

_لا بس وجعتني بطني من الصدمه وراح الالم بعدها

_اليوم موعدكم عند الدكتوره مو

_اي بس اكول خليهه بعدين مانكدر بهل ضرف نروح

_لا ماكو شي انشاءلله هسه بس تكعد امج انه اخذجن للدكتوره 

_تمام براحتك باباتي حبيبي

_اروحلج فدوا بعد بيتي 

ابتسمت وبقينه صافنين بالغيوم التارسه السما لحدما طلعت الشمس وصارت فوكانه كعدوا كلهم صبحوا علينه ونزلنه جوه سوتلنه ريوك جنانه

خطيه واحنه بدلنه ملابسنه كعدنه تركينه وطلعنه كلنه سويه انه وامي وبابا للدكتوره وجنان واحسان لبيتهم وسلام لمدرسته وصلناه بطريقنه ورحنه

للعياده بقينه ننتظر لحدما اجه دوري ودخلت للغرفه تمددت عل سديه وكشفت بطني وشعور غريب تخلخل روحي لمن خلت الجهاز وكالت وهي تمشي على بطني..

_صارلج شكد حامل ماما

_ماعرف دكتوره 

_يمته اخر موعد للدوره الشهريه

_قبل ٣ اشهر اعتقد ٥ بشهر التاسع

_تمام بس لحضه خليني احسبلج

_طفلج صحته زينه بس يراد عنايه بعد لان حركته ضعيفه شربي ماي بانتظام يعني لا تكثرين ولا تقللين وابتعدي كل البعد عن التوتر والقلق والخوف والحركه الهواي 

_انشاءلله دكتوره

_لحضه كلتيلي اكثر من ٣ اشهر يعني ....

بقت تحسب الايام بالتقويم الورقي اليمهه هزت راسهه ب اي ورجعت لزمت الجهاز وكالت..

_ماما انتي بشهر الثالث يعني بالاسبوع ال11 حسبي كل ١٥ بالشهر تدخلين بشهر جديد يعني بعد اسبوع انشاءلله تدخلين بالرابع وماحاجه انطيج مقويات

لان ماشاءالله ابنج زين وضهرج قوي فقط راح اكتبلج فيتامينات وتسوين الوصيتج عليه وانشاءلله بعد شهر ونص او شهرين تجيلي واكلج بجنس الطفل شنو

_تمام دكتوره شكرا الج 

_الله يتمملج على خير 

_تسلمين 

وخرت الجهاز وانطتني كلينكس مسحت الجل من بطني وكمت عدلت ملابسي وطلعت لامي وابوي بره اجو علي وكال بابا يلطف الجو..

_ها بشري ولد بنيه

_هههه مايبين هسه بعد شهرين بنهايه الخامس انشاءلله 

_ههه شلونه اهم شي صحته زينه

_اي الحمدلله كالت صحته زينه وقوي ماشاءالله مايحتاج مقويات بس راح تكتبلي فيتامينات اله ووصتني على اكلي ونومتي وغيرها

_اي الحمدلله خير انشاءالله 

_انشاءلله 

طلعت السكرتيره وبيدهه الفايل مالتي وصاحت باسمي رحتلهه وانطتني ورقه الادويه والفايل وكالت..

_ هذولي الادويه وهاي ورقه التلقيحات يلي لازم تاخذينهم بهذا الشهر والجاي 

_وين اكدر اخذهم

_باي مستشفى حكومي روحي دخلي عل استعلامات وانطيهن الورقه وهمه يدلونج وين ترحين والمن

_تمام انشاءلله شكرا الج

_العفو..

اخذت الورقه ورحت انطيت ورقه الادويه لبابا وراح جابهه من الصيدليه وهمه خططو عليهه الاوقات وعدد المرات الاخذهم بيهه ..

طلعنه وركبنه بالسياره واخذنه المطعم قريب تغدينه ونزلي صينيه قوزي ماقاومت ودسنه عليه فرد مره لحدما شبعنه شربنه لبن وطلعنه

جابلنه بقلاوه ودهينه دللنه ..رجعنه للبيت دخلت وبوجهي لغرفتي طلعتلي ملابس ودخلت للحمام سبحت احس كتلني التعب وجسمي ورم علي نشفت وطلعت بدلت ملابسي ومشطت شعري

ورحت للصاله كعدت يم بابا وامي خلتلنه الحلويات بصحن وجابته النه كعدنه ناكل ونباوع للتلفزيون رن نقال بابا رد عليه واجه صوت مرتضى..

_الو بويه شلونك

_هلا ابني نحمد الله انت شلونك اخوك محمد شلونه

_الحمدلله زينين كاضينهه من البيت للشغل والجامعه ومن الجامعه للبيت انتو شخباركم شسويتو بقضيه العار ثائر

_بعد ودينه الادله اليوم الصبح وستلمتهه النيابه وطلعنه منهه احنه 

_اي هاذهو خو ماتعرضولكم لو سوو شي منا منا

_لا بويه مايسترجون 

_تمام الحمدلله انه انشاءلله قبل راس السنه اجي احتفل يمكم وابقى فد اسبوع وارجع

_هلا بيك بويه تنورنه 

_بنورك حجينه صدك يمته ناوي تطلعون للعمره انت وامي

_بعدنه بويه خلي تولد اختك حتى ناخذهه ونروح 

_هاذهو انشاءلله 

_ انشاءلله 

_بويه هذا محمد يريد يحجي وياك

_وينه السك* هذا لا يسال لا يخابر على ابوه 

_هههه ملتهي بعد عيني 

_انطينياه بله خل اشوفه

_هااا شلونهم الغوالي

_ها لك سك* ماتكول عندي اهل خلي اخابرهم اشوف شصار باحوالهم ماصار

_بويه ماحاجه اخابركم عندي مرتضى شرقيه نيوز كلشي يصير يحجيلي عنه

_حتى لو جان اتصلت تطمن علينه 

_حقك علي بويه بس شسوي اسال مرتضى لو بالشغل لو نايم زين اذا طلعتلي عصريه افتر بيهه بالسوك

_يله معذور بعد كلمن ملتهي بروحه

_شلونك بويه صحتك شلونهه خالتي سماء شخبارهه سلام شموخ شلونهم

_نحمد الله زينين كلنه كاضينهه بهل ايام والدنيا ملتهين 

_الحمدلله انشاءلله انه ويه مرتضى نازل بعد وارجع وياه

_هلا بيكم بويه يله روحوا لمشاغلكم دير بالك على نفسك واخوك لا تخلي يتاخر بالسهر بره

_افا عليك احشي رجليه بس يتاخر لل١٠ بليل 

_ماتقصر بي

_ليش بويه ليش جا محمد ابنك وانه لا هو حلال يسهر بره وانه حرام 

_اي انت اكبر طايش ماامن عليك بحدك 

_اي وياك حق محمد شايب انه بعدني عين الله علي 

_هههه لا تحجي على اخوك زينه الشباب هذا بس مادري يمته الله يهدي ويخليني افرح بي واشوف عياله

_انشاءلله بويه عن قريب تفر....

بعده مامكمل مرتضى وسد حلكه محمد بقينه نضحك عليهم وعرف بابا ان محمد عنده شي باله مو خالي سلم علي محمد وسال عن حالي تالي

ودعته وسديت الاتصال ورجعت النقال لبابا .. وهيج مر الاسبوع وبقه يومين على دوران السنه وانه كاضيتهه بين السهر والاكل مانام صايره بليل

بس بالنهار وهذا الشي تعبني كلش وماخلاني انتبه لدراستي وكوه كملت الامتحانات الاخيره من هاي المرحله وبقالي المرحله الاخيره لازم اصير بيهه من الاوائل ومن الله العون ..

اخيرا اجو محمد ومرتضى واستقبلناهم وكلش كيفت بيهم اخذتلي صفنه بيهم وانه اشوف اهلي ملتمين كلهم سويه ويسولفون ويضحكون راحت عيني بعين محمد ابتسم واجه كعد يمي تحمحم وكال..

_شلونج شموخه شنو اخبارج 

_الحمدلله زينه انت شلونك شلون العيشه هناك

_الحمدلله بس حشاج سوده مصخمه

_ليش

_تعب ياخويه تشتغل بديك ورجليك ومحد راضي عنك وفوكاهه راتب قليل اقل من هنا

_جا اذا هيج خوب تعال هنا استقر وافتحلك مكتب خاص بيك وصير انت الرئيس مو المرؤس

_ماكدر لو بيدي جان اجيت بس مرتضى لازمني ابوي موصيني عليه وخلال معاشرتي اله عرفت ان بعده مامفتح عينه عل دنيا

ومايعرف اطباع الناس هناك وبيني وبينج شلع كلبي بالكليه كل فتره اتعارك وياه وامنعه من الجماعه اليمشي وياهم وما اامن اخلي بحده هناك وارجع 

_والله ماعرف ماجنت اظن مرتضى هيج طايش يبين من بره عاقل وثكيل بس هو من صغره هيج يسوي اليريده حتى لو منعناه بس تاكد مايقبل

بالغلط لو مشه ويه ناس مو زينه فيكون اله مصلحه وياهم ومنتبه على نفسه منهم مايذب نفسه بطريق مايعرف نهايته ولا يمشي ويه ناس مايعرف مصيره وياهم

_اي فعلا بس هناك الناس ماتنعرف ياخويه واحد ياكل الثاني منافسه وعداء على كلشي بعد انه قررت من يخلص مرتضى دراسته نرجع انه وياه سويه احسن

_اي انشاءلله بعدله سنه هوه مو

_لا سنتين تالي يرجع للعراق يمارس المحاماة فد ٣ سنوات تالي يترقى لمنصب قاضي اذا حافظ على مهنته واجتاز الاختبارات 

_هاا مو هو مرحله ثانيه عبالي ثالثه مثلي

_وانتي شراح تسوين بعدما تتخرجين

_ادرس دبلوم تحقيق جنائي وبعدها اتوظف كمتدربه سنتين بالنيابه العامه يعني فد ٥ سنين وامارس المهنه طبيعي

_عشتي والله كفو منج محد سوتهه غيرج وتعب هل شكل بالعاده اشوف البنات احلامهن ورديه مثل الدكتوره والمهندسه وبيهم اهم شي وظيفه مالهن هدف بس انتي العكس هدفج قوي وقله البنات

بهيج اختصاص وبس الشجاعه والكفو تكدر تحارب الظروف وتوصله وانه اشجع المرأة القويه والشجاعه يلي تلتزم بهدفهه ومايضعفهه ويوكفهه شي 

_هههه شكرا على تشجيعك وانت هم مو هين رجل اعمال معدل وشاطر ومحد يلحكك

_اولاد الشهم احنه محد يلحكنه لو شنو رايج

_اي والله والنعم منه ومن اولاده

_ههه

_هههه الا صدك شنو ماناوي تستقر وتتزوج

_وين استقر بيا زلك ماتشوفين ظروفي شلون ياخويه

_يعني اكو شي وحده بالك 

_تكدرين تكولين هيج بس الحجي بيناتنه لان ماريد حجينه شهم يضغط علي بهذا الموضوع 

_لا بس هو قلقان عليك تعنس ومحد ينطيك بنته هههه

_لا جا شعبالج انه غشيم شني اضل لهل وكت مامتزوج وماضملي وحده

_ههه وين ضميتهه بله خلي اشوفهه

_بكلبي هههه

_هالله هالله هههه احجيلي بله شنو تشتغل وشكد عمرهه حلوه كلش لو زينه قريبه لو غريبه 

_ههه اخت العريس محققه بعد

_اي جا شلون 

_البنيه غريبه وتصادفنه مره جانت جايه سياحه عمل هيه وفريقهه لكندا مثلما تكولين انتداب وكدرت اجيب حسابهه

_وااه بهل سهوله 

_لا طبعا خليت سكرتيري يطلعلي حسابهه وحتى عنوان بيتهه بالعراق

_هاا عراقيه يعني

_اي جا شعبالج اخذ اجنبيه غير بت بلدي هاي براسهه ستين حظ

_هههه اي والله ماكو احسن من بنت الولايه 

_اي ياخويه دخلتلهه من الف حساب ياله قبلت نتعرف تالي شوي شوي صرنه اصدقاء تالي حبيتهه فعلا مو مجرد حب نضره اولى 

وهي كذلك بس كتلهه بظروفي وماعدهه اشكال لان هيه كذلك كاعد تشتغل وعلى كولتهه مامستعجلين عل زواج 

_تصدك ماكاعد اتخيلك تدخل لبنيه من عده حسابات وتحاجيهه

_حبيتهه ياخويه شكد مرن علي نسوان وبنات بس مثله ابد ماشفت نزاكه وثقافه وثكل واخلاق كلهن هذن شفتهن باسبوع واحد وتاكدت منهن لمن تعرفت عليهه وحجيت وياهه فتره طويله

_صارلكم شكم سنه

_مو هواي بس سنتين 

_اي بعدكم يادوب تعرفون اطباع بعضكم واهم من كلشي هو التفاهم والاحترام والباقي يجي بالفطره

_على كولتج 

_الا ماكتلي شكد عمرهه

_عمرهه 33 اصغر مني ب٨ سنوات

_هاا جبيره بالعمر يعني مو صغيره بس لحضه يعني هسه انت دخلت بال40 سنه

_اي والله ياخويه شيبت

_لا تجذب ابد مامبين عليك تره ماشاءالله 

_هههه على كولت اهلنه عيشه الخارج راحه للبدن

_اي والله صدك وانت مامقصر خوش معتني بنفسك وجسمك 

_هههه جا شنسوي الوضع يتطلب هيج

_هههه ..

بقه يسولف عليهه شويه وتقريبا حبيتهه من كلامه عنهه بقى يذكر مواقفهم ونضحك للفجر وثاني يوم بابا عزم عمامي كلهم لبيت عمو باقر نتجمع بليله راس السنه البعض يكولون حرام نحتفل بي

لان عيد المسيح هو ماعرف ايش بس احنه مانحتفل وركص وغنى ونتونس ب نيه عيد للمسيح وانما نتجمع كبدايه سنه جديده نسوي لمه

وعزيمه ونكون ببدايه كل سنه ملتم شملنه وندعي ربنه يديم هل لمه لا نحتفل ولا ركص ولا شي حاله من حال باقي المناسبات النتجمع بيهه ..

وهيج مرن اليومين واحنه وبيت عمو ساجد رحنه بكيه جماعيه وبيت عمو شعلان لكيناهم موجودين قبلنه دخلنه وسلمنه عليهم والكل فرح بجيه

مرتضى ومحمد بالاخص لان مايزورهم من ينزل بالعطله وهو جبير الكون اله معزه خاصه بكلب عمامه .. تجمعنه كلنه بالصاله زلم ونسوان بس كلمن بجهه ونتشارك بالسالفه والضحكه كلناهم على المشكله يلي صارت وعن

حملي وكلهم باركولي ودعولي بالسلامه وانتبهت على مرتضى كل شوي عينه تروح على جنان يلي ماخاب ظني بيهه وانطته وجه البارد .. 

كاعده تسولف ويه البنات وتضحك ومتجاهله مرتضى تماما وكأن ماموجود ابد حتى لمن تلتفت وتشوفه يباوعلهه تبادله بنظره بارده وتدور وجهه

عنه ضحكت بكلبي على تصرفاتهه بس فعلا التجاهل يرجع كل شخص لمكانه ويرجع عقله براسه لدرجه ان مرتضى ماتحمل هل شي وصاحني لمن شافني بالمطبخ وكال..

_احم شموخ شبيهه بت خالتي

_ياهي منهن

_شسالفه جنان شبيهه

_شبيهه

_لا تبيعيهن علي احجيلي شمالهه ضايجه وضعفانه هيج صاير شي وياهه

_لا مابيهه شي بالعكس كاعد اشوفهه تضحك وتسولف ويه البنات عادي وان جان عل ضعف فمن الدراسه ماكاعد تنتظم باكلهه

_هاا اوك

_عندك شي ثاني تريد تسال عنه

_اي لحضه 

_شنو

_هيه عدهه شي اكو شي منا منا

_مثليش

_افهميني يعني عدهه شخص بحياتهه من الجامعه من غيرهه

_احجي عدل تره صدعت من الغازك شنو عدهه شخص بحياتهه مثلا قصدك اذا متزوجه تطمن من تزوج نوديلك بطاقه دعوه وعود تعال 

_امشي روحي مو صوجج صوجي جاي اريد اسالج

_لا والله سويت فضل

خزرني وهز راسه باسف وطلع من المطبخ ضحكت عليه بكلبي وكلت حل وياه خلي يتادب شويه ليش جان ياخذ حلوياتي ويقهرني خلي يعيش العذاب هذا شويه ههه شفت جنان تريد تروح للغرفه وصحتلهه واجت يمي ....

.

.

" يمكنني تجاهلك لدرجه ،

ان اشعرك 

بعدم الوجود ،

فلا تختبر كبريائي ابدا"

:- وهذا يلي سويته تحلفت وحلفت اتجاهله وابد ماعتبره موجود رغم داخلي ينهش بالتفكير بي والحنين اله الا ان ظاهري يختلف تماما.. و من هل لحظه 

اخذت التجاهل سلاح بجعبتي اهاجمه بي كلما التقينه واردله الصاع صاعين هو تجاهلني مره وانه قررت اتجاهله العمر كله .. كاعده اسولف ويه

البنات ودخل وهو عينه علي باوعتله ودرت وجهي مبتسمه على كلام بنت عمي ومتجاهله وجوده ضل كاعد ويهز رجله بتوتر وعاكد حواجبه ويباوعلي كل شوي عوزه بس يطلع جكاره ويدخن 

وشدعوه هسه هو مايدخن هه .. كمت ويه البنات لغرفه مرت عمي نكمل سوالف وصاحتني شموخ من المطبخ استغربت ورحت يمهه وكالت..

_عندي الج شي يمكن يريح كلبج 

_شنو هوه

_تعالي وياي للحديقه 

_تمام..

اخذتني للحديقه وصارت تحجي واحنه نتمشه وكلتلي على سؤال مرتضى علي حسيت بشعور حلو مو حب وانما انتصار حسيت ان تجاهلي راح يجيب نتيجه وياه باوعتلهه وهي ضحكت والتفتت علي وكالت..

_انه وياج وصدكي التجاهل افضل حل ممكن يفيدج حاليا لا البجي ولا التفكير يكدر يرجعلج مرتضى و هو الحل الوحيد اصلا بس يراد صبر وتدبير وماتضعفين باول موقف يجمعكم سوه تمام

_انشاءلله هو انه قررت اتجاهله تماما ولا اريد احجي وياه ولا افكر بي حتى لان خلاص احس تعبني التفكير والسهر اريد التفت لمستقبلي وماضل

شي انشاءلله واكمل جامعه واتوظف وراح تكون هل خطوه بمثابه صفعه تاديب اله راح اتجاهل طلبه الي للوظيفه واروح اتوظف واشتغل عند غيره 

_احسن شي تسوينه وعلي الطريق الماشيه بي هسه انتي وطريقه تفكيرج راح تخلي يندم عل لحضه التجاهلج بيهه وطلعج من حياته قبلما تدخلين حتى وانه وياج من يجي يسالني اضيف كم بهار حتى يتشلوط ويجيلج سحل من شعره

_هههه تمام اتفقنا

_اتفقنا ههه

دخلنه للبيت والتمينه نتساعد بالطبخ كل مجموعه تسوي حلويات شكل ووجبه العشا على امي ونسوان عمامي بحيث صارت هوسه بالمطبخ كمت شربت ماي وردت ارجع والتفتت على صوت مرتضى الفزز كلبي من مكانه وهو رافع اديه متربه وكال..

_بلا زحمه يابه وحده منجن تنطيني ماي نشف ريجي واديه وصخه..

يحجي ويباوعلي عفته ودرت وجهي عنه وخالتي سماء كالت..

_خاله جنانه انطي ماي من يمج فدوا كلنه ملتهين وادينه متلفه

_هاا اي حاضر خاله 

التفتت عليه وردت اروح اشربه ماي مع ان كوه علي بس كلت ميخالف لله اشو بعدني ماواصلتله وزكطت بت عمي الصغيره كبالي وراحتله وهي تكول بلسانهه شطوله..

_انه انطي ماي عمه عساه على ماي شعدنه غيره ابن عمي شيال همي ..

بقينه وحده تباوع للثانيه انه وشموخ وفاتحين حلكنه على كلامهه وتصرفاتهه فرغت كلاص ماي وشربته كوه بيدهه وهو يبتعد منهه

يكلهه لا جنان تنطيني وهي ابد ولا تسمع شربته كوه حتى انجفى على قميصه نصه وابتعدت خرب بعمري ماشفت هيج خفه وتلبك بالحجي ..

باوعت لمرتضى وهو مكرش عن ملامحه ورافع قوله قميصه المبلله دنيا بارده وماي بارد هسه يتمرض هز راسه باسف وراح رجع

للحديقه كمل تنضيف السلاحات ويه ولد عمي.. رجعت لمكاني انه وبالي يمه انكسر خاطري عليه الا شوي لو ما شموخ كرصتني وكالت..

_هاا خيه خيرج انكسر خاطرج سوده علي 

_هاا لا مو انكسر خاطري بس اكول لا يتمرض مو حلوه الفلاونزه تشلع الكلب

_وانتي شلج علاقه بي شنو جاهل مايعرف يبدل ملابسه مثلا تردين ترحين تبدليله خطيه 

_لا شموخ شسالفه ماكلت هيج انه عوفج منه خلاص طار من بالي مافكر بعد 

_اي احسن 

رجعت تلف بالفطاير وتباوعلي كل شوي تدور بملامحي اذا صافنه بي لو لا وانه مسويه نفسي ملتهيه الف واحجي اخر شي ماتحملت كتلهن

رايحه للحمام وكمت من يمهن متجاهله كرصات شموخ حتى توكفني جنهه تدري راح اروحله ههه .. رحت لجمانه مرت محسن وكتلهه..

_اكلج خيه ماعندج تشيرت قميص مايريده محسن لان مرتضى انجفى عليه الماي وكالت خاله سماء اجي اسالج عن قميص لا يتمرض

_اي حبي عساه على قميص تعالي وياي انطيج واحد 

_تمام

رحت وراهه للغرفه وطلعتله قميص بعده بالجيس مانطتني من القديمات فعلا خوش مره وماشفنه شي منهه بعمرنه كله غير الخير والكرم ..

اخذته منهه وتشكرتهه وطلعت بس بقيت محتاره شلون انطيه اله وهو بره وانه مقرره اتجاهله ..ضليت افتر بالصاله وحدي وافكر يم الجهال اليلعبون 

تالي صحت لزيودي ابن محسن وكتله ينطي القميص لمرتضى ويكله من خاله هو اخذه وراح يركض بره باوعت من الشباك وشفته انطاه اله وساله...

_شنو هذا زيودي

_كميس "قميص" من خاله

_يا خاله منهن

_خاله حلوه 

_اي شنو اسمهه بتمن 

_هاا

_ماتعرف اسمهه

_لا

_تمام شكرا حبيبي ..

باسه بخده ورفع راسه يباوع حواليه ضميت نفسي بالبرده وكلبي احسه يدك الف رجعت طليت عليه وشفته شلون يفتح دكم قميصه ونزعه وضل

بالفانيله الداخليه وشك الجيس طلع القميص ولبسه وبقه يدكم وانه سرسحت بمنظره هذا مادري شصار بيه وليش استحيت هفيت على وجهي

وصحت السبلت ليش طافي حاره نسيت احنه بالشته همزين ماكو احد جبير سمعني .. غميت كصتي ورجعت للمطبخ بعدني ماكاعده يم شموخ وكرصتني وهمست..

_وين جنتي بس لا تنشفين قميصه ولج ماسبحتي فرد مره 

_ياا ولج شموخ عيب شهل حجي

_ماتكولين لنفسج ام دوده ماترتاحين اذا ماتبينين ضعف كلبج كدامه

_مابينت شي دزيتله قميص بيد زيودي ولبسه بدون مايعرف منو الدزاه اله

_اشوه من صرتي ذكيه 

_شقصدج غبيه انه

_اي من توصل لمرتضى تصيرين طرمه مو بس غبيه هذا اليحب يتورط ويفقد عقله

_اي والله ياخيه على منظره مساع ماخله بيه عقل

_اويلي خوش تجاهلنه جا 

_لا صدك بعد مافكر خلاص كافي عقلي اسكت واهده لا اذبك بالعجينه واسويك فطيره 

_تخبلي خيه عايزه هيه تتخبلين..

ضحكت على كلامهه وكملنه لف الفطاير وصارت صينيه شكبرهه خليناهه بالفرن ورجعنه نسوي حلاوه كعب الغزال على ماستون الفطاير كملنه

الحلاوه وخليناهه بالفرن تستوي كملنه كلشي وصبينه الاكل بالصحون واخذناهه كل وحده بيدهه صحنين فرشنه السفره بالصاله من الطول للطول ورتبنه الاكل عليهه لحدما كملنه صحنه للزلم

والنسوان المطشرين منا ومنا والتمينه كلنه سويه بس الجهال الصغار على كتر سفره بحدهم لان يخربون الاكل .. كعدنه واجه مرتضى باوعلي وكعد مقابيلي وكال بصوت عالي ..

_شكرا عل قميص عمي رحم الله والديه الوداه الي والله يهدي باله وعقله ..

كال اخر كلمه وباوعلي وانه الكلاص بحلكي شركت بالماي وصرت اكح واحسان ماقصر خسف ضهري خسف وهو يدك عليه وخرت ايده بعصبيه وكتله..

_اووي خب خسفت ضهري هيج هوه اذا ماموت من الشركه اموت بكسر الضهر قصص ماي هوبس 

_مو وجه نعمه فوكات مانقذ حياتج

_قصدك تنهي حياتي 

_مو صوجج والله لو مخليج ميته احسن

_نعم الله عليك الموت ارحملي من خسفه الضهر هاي

باوعلي بعجرفه وبادلته نفس النضره كلبت عيوني واجت على مرتضى وهو يباوعلي وخازر بعيونه مدري شماله متكهرب نزلت عيني عنه ومدينه ادينه ناكل وكلمن ماخذله صفحه يحجي ..

مستحيل يلتزمون باداب الاكل ويسكتون لمن ياكلون لازم يجيبون الجد الرابع للناس ويحجون بي والسواه بحياته ركزت باكلي وبنفسي و للحضه

فقدت السمع وصارت اصوات الناس بعيده ومشوشه ودخلت بعالمي الكئيب فجأه بقيت عابسه واكلب بالتمن اخذه منا واجيبه منا انخلت قطعه لحم بصحني ورفعت راسي شفته مرتضى خلاهه باوعلي وكال..

_اكلي لا تصفنين 

باوعتله بحيره ونزلت عيني عنه ماجاوبته خليت الخاشوكه وكمت من الاكل صاحلي البنات وكتلهم شبعت وانه شبعت غصه وخنكه مادري منين طلعتلي وانه قبل شوي اضحك واسولف .. 

رحت للمغسله بره غسلت اديه وحلكي ووجهي رفعت راسي وانه انشف وشفت مرتضى وراي من المرايه تقدم علي بسرعه وسحبني من ايدي وداني

وره البيت همزين محد موجود بره والا جان فضحنه بين العربان .. لزكني بالحايط وتقرب علي صار مايفصلنه غير كم سنتيمتر ماكدرت حتى ارفع

عيني بعينه قرب وجهه من وجهي وياويليي على فرق الطول الصاير بيناتنه عمود وانه تنور مقابيله رفعت راسي كوه وباوعت بعيونه وكتله بعصبيه عكس الرجفه الجتاحت كلبي..

_شنو هل تصرف مرتضى ماعيب عليك تجرني لهنا وتوكف كبالي بهل طريقه ماخفت يشوفك واحد من اهلنه شراح يفكر بينه انت مو مهم بس انه مافكرت اذا شافك واحد من عمامي شراح يسوون بيه لعبه هيه الشغله لع....

قبل لا اكمل تقرب علي اكثر ولامست شواربه شفايفي فتحت عيوني بصدمه وسديت حلكي حيل لزكت روحي بالحايط ونزلت راسي همس يم اذني بهدوء..

_طز باهلي وعمامي والعشيره كلهه اليريد يحجي عليج ويجيب طاريج بكلمه اطر مكفاه وربج 

_وخر مرتضى خل اروح اولي لا يشوفنه احد

_انتي وديتي القميص مساع

_لا منين جبت هل حجي

_جنانه احجي الصدك تره اعرف اطلع الحقيقه من جوه الكاع لو اريد بس انه اريد اسمعهه منج 

_كتلك مو انه لا تلح مرتضى

_اسلوبج لا اعلمج شلون تعدلي 

_شتسوي مثلا تجاوز الحدود وياي لو تضربني لو تصيح علي لو تشكيني عند اهلي شتريد تسوي سوي مايهمني عوفني بحالي كتلك وخلي اولي تره روحي طالعه ومالي خلك اتناقش وياك

_ماسوي شي من الكلتي تعرفين شنو اليرد اسلوبج

_قصدك التجاهل ههه تجاهل شكد ماتريد وسوي التريده لان مايهمني بعد 

_لا تستفزيني وكليلي انتي الوديتي القميص بيد زيودي

_كتلك لا واخر مره اجاوبك مره ثانيه اصيح والم الكل عليك

_ماتسويهه 

_بابااا.....

صحت لبابا وقبل مايطلع صوتي خله ايده على حلكي وعصره بعصبيه باوع على جهه الحديقه من شاف محد اجه رجع باوعلي وحجه بخزره ..

_سويتي غلطه عمرج بهذا تصرفج ولا تلوميني عل راح اسوي تالي

_اممم 

_يله احجي مو انتي شجاعه وخري ايدي من حلكج واحجي لو ماتكدرين كلبج يضعف كدامي ..

باوعتله بعصبيه واحس ستفزني كلش وهو فعلا راص على حلكي بايده حيل ماكدر حتى احرك راسي شديت قبضه ايدي وضربته بكل قوتي بوكس على خاصرته

حتى انطك عكسي بالحايط ونمل لزمت ايدي وهو لزم خصره متوجع وابتعد عني دفعته ورحت اركض دخلت للمطبخ لكيت البنات كبالي وكاعد يلمن بالصحون باوعلي وسالتني شموخ بقلق..

_شكو شصاير ولج ليش اجيتي تركضين ووجهج اصفر

_لا ماكو شي بس غسلت وجهي وبردت واجيت اتدفه وين الصوبه حاطينهه

_بالصاله روحي كعدي تدفي

_لا ماريد جا اروح اتغطه احسن

_اكو ثنين وحده بغرفه محسن والثانيه بغرفه عمي روحي لوحده منهن كعدي

_تمام رايحه لغرفه محسن ..

عفتهن ورحت للغرفه دخلت وسديت الباب ورحت شغلت السبلت وكفت كباله من كد الخوف والتوتر يلي صارلي احس وجهي وجسمي جمر بس اشغل الصوبه اشتعل نار ..

بردت روحي شويه وطفيته رجعت نمت عل جربايه وصفنت بالصار مساع كلما اتذكر شلون قرب وجهه علي ولامستني شواربه احس كلبي يدك دمام رغم كل الصار واسلوبه المو حلو بس تخلخلت فرحه

وامل تجدد بكلبي لان رجع يفكر بيه ويهمه امري خليت اديه على وجهي وضحكت بخجل وفرحه تكلبت عل جربايه وكلهه دقايق من الصفنه غفيت وانه مبتسمه ...