رواية سواد الاثمد الفصل السادس بقلم نورس
فتحت عيوني الضوة صار بوجهي غمضت عيوني متضايقة الرؤية مواضحة عندي متمددة على جرباية صورته صارت كبالي فتحت بصعوبة وركزت زين بالمكان
اني بغرفة محمد ! ...
تحركت نزلت رجلي من الجرباية اختل توازني فجأة عيوني اغمض وافتح وراسي الألم اللي بيه مينحمل
كمت من مكاني ايد على راسي وايد ساندة نفسي بالحايط لا أوگع مشيت للباب اجر باليدة مينفتح كمت أدكدك وأصيح لحد ما تعبت ومحصلت رد
رحت لميز تواليت كمت اشيل بالغراض واشمر عالباب لحد ما انفتح ودخل محمد شافني اجاني بهمة
شلت شيشة عطر بيدي وصحت :- اشمرها براسك لتتقرررررب
محمد :- ماشي اهدأي
- لتگوولي اهدأي
- تمام هذا هو والله مثل متردين عوفي من ايدج
- ليش جايبني لهنا محمد
ضل ساكت وعينه مرتكزة عليَّ سكوته طير آخر ذرة عقل براسي شلت الشيشة وشمرتها عليه بكل قوتي
حاول يتلافاها اجت بجتفه صاح متوجع وباوعلي
صاح :- شبيييييج تخبلتي
حركت جسمي بصعوبة اريد اطلع گوة امشي
لزمني يمنعني صرت اصرخ واضرب بيه
- عووووووفني چلب حييييييوان عوووفني
- ادري والله ادري بس أعصابج مو زين عليج
- اخذذذذني لشقتنا يلا
- هسه اخذج
لزمت راسي بوجع :- راسي راح ينفجررر يا الله راسسسسي
- تعاي اگعدي ارتاحي
- رجعني للشقة محمدددد
- هسه ارجعج والله
بجيت :- لتكذب عليَّ
- لا بس تعالي
لزمني رجعني للجرباية گعدني عالطرف راسي بالگاع من اشيله احس ثگل الدنيا بيه وارجع ادنك متأذية
جسمي بيه خمول مو طبيعي عبالك متخدرة
رفعت راسي أباوعله :- ليش جايبني هنا
- انتِ زينة ؟
حجاها وايده توخر بخصلات شعري عن وجهي
- راسي يوجعني
كام مني وراح للكنتور فتحه مدري شأخذ ورجعلي مدلي ايده وانطاني مي :- هاج اشربي
- شنو هاي
- حباية تخفف الوجع
بلعتها بسرعة من گد الألم الـ آني بيه جرني لحضنه راسي صار على صدره وايده يمررها على ظهري يهدأني
حجيت بتعب :- ماما
- راسلت نورجان كتلها جبتج لبيتنا عندهم علم ليضل بالج
- دايخة محمد
- ارتاحي يعيوني انتِ
- شوكت ترجعني لشقتنا
ما رد مددني عالجرباية وغطاني نعست وحسيت بخمول مو طبيعي صاح لخدامتهم وأشرلها تنظف الهوسة السويتها والگزاز اللي ترس الغرفة
اسمعه يخابر بالتليفون بس ما اركز شيحجي
غمضت عيوني ومدريت بالدنيا بعد
فتحت كعدت بعدني بنفس مكاني تجيت ظهري عالجرباية أحاول استوعب ..
باوعت للساعة بـ تثلاثة بس الظهر بالليل تاهت عليَّ
گمت للحمام غسلت واباوع لوجهي عيوني مورمة أثر النوم لميت شعري ورجعت غسلت بمي بارد وطلعت
فات للغرفة وسد الباب وگف يم ميز تواليت ينزع بتيشيرته بقى بالفانيلة الداخلية يتحرك وممنتبهلي عاقد حاجبه ملامحه مقتضبة مبين متضايق
شافني ابتسملي واجاني :- صح النوم
- اني ليش هنا محمد
- جوعانة ؟
- ليش تغير السؤال متجاوبني
گعد على طرف الجرباية فرك وجهه بتعب كال :- مو هسه بان بعدين نسولف
رجع باوعلي
- گومي ناكل
تنرفزت من تجاهله گمت من مكاني وعليت صوتي
- لييييش جبتتتتتني هنا
- صوتج بان نايمين
- رجعني للششششقة
دا احجي كام خله ايده على حلكي يمنعني وفاتح عيونه على وسعهن يخزرني همس :- والقرآن كلمة ثانية انهيج هنا صووووتج بنت الكلب
نزلت دموعي من غلط على بابا مقيد جسمي بأيده ما اكدر اتحرك من الحرگة البيَّ كوة كدرت املص روحي وانطيته دفرة بين رجله
دنك وجهه أحمر وعاض شفته يكتم وجعه باوعلي ابتعدت عنه خفت من منظره .. هدأ شوي وباوعلي مشفته الا يتقدملي رجعت ليورة لزگت روحي بالحايط
صار گدامي وقريب مني مخلي ايده عالحايط مانع حركتي همس :- ليش هيج بان
- تستاهل
- تردين نبقى بلا جهال يالخبلة
- غلطت على بابا
- لو ما كلب ما خلف كلبه مثلج وبلاني بخبالها
حجيت واني صاكه على سنوني :- الف مرررررررة حذرتك متتجاوز على بابا
تقرب أكثر درت وجهي عنه حسيت بملمس شفايفه على خدي انقرفت منه خليت ايدي على صدره دفعته بكل قوتي .. باوعلي تخبل شلون سويت هيج
لزم وجهي دارني عليه محسيت الا جايبني
براشدي خلى اذني تصفر من قوته
بقيت لازمه خدي واباوعله مصكوكه دمعت عيوني
همس بتحذير :- هاي حتى بعد متعيديها
اختنگت بس مبجيت :- رجعني لشقتنا يلا
مشى من عندي ولا جنه يسمعني اخذ ملابس من الكنتور عفته ورحت للباب دا اريد اطلع ركض عليَّ بسرعة شالني رجعني واني اتلاوى وياه اريده يعوفني
راح للباب قفله وجر المفتاح رفعه يشوفني :- تردينه تعاي اخذيه
حجاها وفات للحمام والمفتاح وياه همست :- چلب
كمت اروح واجي بأعصاب تالفة مبينة دنيا الليل لأن بيتهم هادئ باوعت بالغرفة شفت تليفونه عالميز رحت اخذته ما أعرف الرمز حاولت بيه أكثر من مرة معرفتله
اجاني صوته وهو طالع من الحمام ينشف بشعره عينه عليَّ :- الرمز مواليدج ومواليدي
حجاها ومشى للمراية ما اهتميت فتحته دخلت
بسرعة على صفحة نورجان ماكو شي باوعتله
- شلون تكول حاجيت نورجان هيانها المحادثة فارغة
- خابرتها
- لتكذب عليَّ محمد
- اذا تدرين ليش تطحنين بروحج
نزلت دموعي وشمرت التليفون بالحايط :- رجعني يلا
اجاني گعد بمستواي ولزم وجهي
- والقرآن ما احب اشوف دموعج لتبجين
- مدا افتهمك والله شتريد بالضبط
- مو ردتي ننجمع ونصير سوة هذا هو راح يصير التردينه
- مدا افتهم شنو يعني
وگف مرر ايده بين شعره گال :- حاجيت ابوي على موضوعنا گلي جيبها أول واخليك تعقد عليها
- هو هيج گلك ؟
- اي يدري بيَّ أحبج ورايدج وبنت خليل لو تضل آخر بنية بالدنيا مراح اخذها واسوي اليردونه
- ومن شوكت هالحجي لويش مگتلي
- صار اسبوع أتعارك وياهم كل يوم گابة عركة ويَّ ابوية وحتى امي ما اباوع بوجها عفتلهم البيت وطلعت لحد ما هو خابرني گلي جيبها للبيت واخذها
- واني دوري شنو بالموضوع هيج مخليني أطرش بزفة
- ليش مو هذا الرايدته ؟
- بس مو بهذا الأسلوب عبالك ابوك مسوي فضل علينا وماخذني بالختلات شنو عروس لو فصلية مو من حقي خطبة ومهر وعرس مثل الأوادم لو الكدامك حيوانة متستاهل تقدرها مثل البشر
- كلهن يصيرلج واسويلج أرقى عرس وباللي يعجبج بس هسه خلي نعقد جزععععت روحي مصدگت شوكت اقتنع وبعدين اني اسحله يطلبج من امج غصبًا ما عليه
- وماما ؟
- امج مراح تگدر ترفض احنا عقدنا بعد واذا اعترضت اخذج ونهج منا وانعل ابوهم لابو خيرهم من ابوي لأمج
- بالله وانتَ مقتنع بهالكلام ؟
اجه گعد بصفي كاعدين بالگاع وظهرنا عالجرباية
- تعبت بان والقرآن تعبت اشوفج بالختلات وين صايرة هاي ابوي من جهة وامج من جهة وال.......
سكت شوي :- استغفر الله الدنيا كلها سادتها بوجهي لتصيرين انتِ هم وياهم عليَّ
- ما اسوي شي اذا ماما مالها علم
- تدري
- لتكذب محمد
- شسسسسوي لعد گوليلي امج ميبسة راسها أكثر من ابوي تشوف دم سنونها ومتشوفني
- نحاجيها
- راح ترفض بان تدرين بيها خاف ابوي گدرت اقنعه امج لو ينزل الها وحي يگلها خلي محمد يعقد على بان مراح توافق على زواجنا
- نحاول
- ورى منعقد
- لك بابا ما اگدر افهم جايبني لهنا حتى ميدرون بيَّ اني بـ بيتكم شحالهم هسه
كمت وگفت :- گوم رجعني محمد
- گتلج ورى منعقد عناد لتعاندين
- ما ارييددد بطلت ماريد اتزوج هسه رجعني لأهلي
- گلت العندي
- افتحلي الباب اني أولي
- اگعدي بان
ضربت رجلي بالگاع :- ماااااا اگعد
ضل ساكت ويباوعلي واني احجي وياه جزعت روحي رحت للباب كمت ارگع بيه واصيح گام لزمني ويسد بحگلي يريدني اسكت واني لازمه ايده اوخرها
اندك الباب دفعني ليجوة وخزرني يأشرلي بمعنى اسكتي راح فتحه اندفع وفاتت امه شافتني
كفاح :- هاي البربوك شبيها خبصتنا من البارحة لليوم بس تصيح نريد ننام شلون بلة بيك وبمصايبك محمد
صحت :- انتِ البربوقة
- عليمن هاي بنت شدن ام الملاهي
- ام الملاهي احسن من ام الـ****
دارلي فاتح عيونه وهاي تخبلت شلون حجيت هيج گامت تصرخ تشحنه عليَّ اجاني لزمني من فكي
محمد :- شگلتي ؟
- مثل مسمعت
محسيت الا ضربني راشدي اختل توازني رجع لزمني
- اعتذري بان
باوعتله عيوني تحرگني :- احلف ؟
جابني براشدي ثاني
- اعتذري
- لا صدك هاي كُل قوتك
كفاح :- صلفة بربووووك قابل شترجه من تربية شدن والعينتين يريد يجيبلي الثانية خاف عايزة اني
- روحي يوم كملي نومتج ماكو شي
- يا نوم هاي متبقالي بالبيت اليوم لو اني لو هي خلي ابوك يجي يشوفلي صرفة ويَّ بنت اخووه فطس مثل الچلب وعاف چلابه سايبه وراه
هي حجت هيج واني رايدتها من الله على الله ورثت بحركة سريعة فلتت روحي من ايد محمد وطفرت عليها عضيتها من متنها محمد لازمني من شعري وهي تعيط وتجرجر بيَّ حسيت سنوني طگن سن بسن يلا وخرت
كعدت بالگاع تبچي وتصرخ لازمة ايدها ومحمد كاعد يمها يحاول يهدأها صريخها گوم البيت على أثره اجن بناتها يتراكضن بخوف للغرفة
نسمة :- شبيج ماما
كعدت تبجي وتشكيلهن مني واستلمتني غلط وفشار اني وأهلي صرت افور من جوة اريد بس احظى بيها لوما محمد لازمني مانعني اتقربلها
وخرت ملابسها من الكتف وشهگت بفزع
من شافت متنها مورم صاير أحمر ..
طبع سنوني مبين نابت بيه طالع منه دم قليل
كفاح :- يممممممة شمسوية بمتني تريد تموتني عزة ولكم چلبة چلببببة مو بنية شلعلتها صفحة من ايدي
اندارلي هبة وهنادي واجن عليَّ يردن يلگفني صار بوجهن محمد صاح بيهن :- والقررررررآن التتقرب لبان اكسسسسر ايدها
هنادي :- متشوف شسوت بماما لو سباعيتك بس علينا
كفاح :- عوفي عيني عوفي غاسلة عقله هاي الگحبة ما ادري شمشربته شحاجية براسه وهيج گالبته علينا
- هي عايزة تشربه مناه هو شلونه
هي حجت هيج راحلها رادت تشرد لگفها بسرعة جرها من شعرها سحل بيها الغرفة وامه گامت تصيح عليه تريده يعوفها انتهت بيده شمرها برة الغرفة
صاح :- انگلعن منا يلا احسن ما اشوفجن وجهي الثاني
كفاح :- لا انتَ تخبلت رسمي يجي ابوك واخليه يشوفلنا حل لخبالك
رگع الباب حيل وقفله راح لميز المراية مخلي ايده عالميز ساند جسمه ومدنك ، رفع راسه فركه حيل
اندارلي بلوم :- ليش هيج سويتي بان
- غلطت على بابا
- وتعضيها هيج ؟
- تستاهل واذا جابت طاري أهلي مرة اللخ اسحل بيها البيت
- عفية عفيييية بالسباعية
گام يشمر بالغراض ويصيح :- اني گوووووة مرگعها اريدهم يقبلون تجي تعاررررك ذبان وجها بنت الزفرررة
حشگت روحي بالزاوية وهو مستمر يصيح بطريقة هستيرية خفت منه أول مرة أشوفه بهالحالة ..
ضليت لامة رجلي لصدري واباوعله دموعي تنزل
هدأ شوي وگعد بالگاع منتجي عالميز وايده على وجهه مرجع راسه ليورة جسمه كله يهتز يتنفس سريع وجهه أحمر لحد ما سمعته صار يشهك مثل الجاهل
احس شهگته شگت گلبي كمت تقدمت عليه بتردد همست :- محمد ..
وخر ايده باوعلي عيونه صايرة دم فتحلي ايده كعدت يمه جرني لحضنه ، راسي على متنه جسمه يرجف حيل
رفعت راسي أباوعله :- انتَ زين ؟
باس شعري وضل ساكت بقينا على هالحالة يمكن بالربع ساعة لحد ما تنهد وگام مدلي ايده باوعتله ممفتهمة
- مو تردين ارجعج للشقة گومي يلا
مصدگت بسرعة كمت عدلت ملابسي ولميت شعري اخذ سويچة ونزلنا محد جان جوة طلعنا من البيت جانت الدنيا ظلمة صعدنا السيارة وحرك
خلص الطريق ساكت ولا اني بادرت وحجيت مبين أعصابه تعبانة مردت ازيدها عليه وصلني گبال العمارة
قبل لا انزل درتله اباوع بوجهه
رفعلي حاجبه :- ها يلا انزلي
تقربت بست خده ونزلت باوعتله سوالي حركة بوجهه عود اني الج وشخط سيارته بسرعة وراح ، صعدت فوك وعقلي كله يمهم گلبي يدك سريع خايفة اوصل
صرت گبال باب الشقة وگفت مترددة جريت نفس طويل ودگيت الجرس بتردد لحظات وانفتح الباب
صار بوجهي شبير اول مشافني عقد حاجبه وصاح
شبير :- وين جنتي يررررربج
على صوته طلعت ماما ونورجان ماما عيونها مورمة وحالتها حالة ونورجان مو أقل منها عيونها منفوخة
أول مشافتني سحبتني من شعري وكعتلي ضرب بنص الشقة تصيح كوة سحبوني شبير وخالة ام شذى من ايدها وكفت اشهك واوخر بشعري من وجهي
كعدت عالتخم تبجي ومدنكة راسها نورجان واكفة على جهة دموعها تنزل بلا صوت حالتنا حالة انتبهت للعقيد واكف يباوعلي وعاقد حاجبه معاجبه الوضع
تجاهلت كل الموجودين وصرت گدام ماما كعدت يم رجلها وخرت ايدها :- باوعيلي ماما
- ليش هيجي بان ليش تردين شلاع گلبي رايدة تموتيني گوليلي شسويلج بشنوو قصرت وياج دتنهزمين وياه ليييييش
فتحت عيوني :- لا لا والله مو هيج ممنهزمة جنت
بـ بيت عمو سالم
باوعتلهم كلها ساكتة صحت :- والله العظيم جنت بيت عمي ليش مدا تصدگوون
شبير :- منو جابج هين ؟
- محمد
- وعش مولية وياه وما منطية خبر لأمج صار يومين عايفين شغلنا ونفتر ندور عليج لبالنا سوالج شي
- كلي خابرتهم انطيتهم خبر انتِ يمنا بالبيت والله معبالي يكذب عليَّ
شدن :- مو راح شبير لبيت عمج طلعتله كفاح كالت ما اجت لهنا وحتى محمد مو بالبيت روحوا شوفوهم يجوز انهزموا
- كذذذذابة والله حتى هو جان موجود مطلع من البيت
فدار :- وشعندو ماخذج غاد لبيتهم بدون ليكول لأمج
دنگت راسي :- عمو راد يعقدلنا
- تضحكين على منو يول اهو عمج وينو محد مدحك وجهو صار بالأسبوع مووولي لأربيل
رفعت راسي متفاجأة يعني حتى بهاي ضحك عليَّ
أباوع للوجوه كلها تباوعلي بلوم وكأني مسوية ذنب
عضت ماما ايدها بقهر گالت :- اخ منج بان اخ
هز فدار ايده وأشر لشبير
فدار :- امش يول امش متسوى عايفين الشغل مكوم لفوك روسنا صوجنا احنا الغمان ما عنتعلم على فواينها
... 《 نورجان 》 ...
راحوا عمو فدار وشبير وخالة ام شذى اطمأنت على بان وانطتها كم رزالة ورجعت لشقتهم ، كعدت تحجي ويَّ ماما مترد عليها زعلانة منها عافتها وراحت للغرفة
اجت شذى تشوفها وگعدت يمها عالتخم تحجي وياها :- ليش هيج سويتي بان
- غصبًا عني والله ليش كلكم تلوموني
نورجان :- شلون غصبًا عنج مو كتلج لترحيله وانتِ عندتي الا تنزلين تشوفينه
- عوفيني نورجان تعبانة
- عليج الله لعد مفكرتي بحالتنا اني وماما من البارحة لليوم ندور عليج مثل المخابيل مضل محل مطلبنا منه كاميرات دنشوف وين اخذج المدمن
- والله بالي كله جان يمكم حاولت وياه حتى يرجعني مقبل
- لا هذا تخبل رسمي
- أهله خبلوه
- بان يا أهله ضحك عليج گلج نعقد وابوه بالأصل مموجود شنو عبالج محمد يسويها بدون علم عمو
- يدري هو عمو گله جيبها بس ما اعرف شصار بينهم فجاة يمكن اختلفوا ومحمد صار عصبي انگلب عليهم وتعاىك ويَّ امه وخواته وگام رجعني لهنا
- وشلون يعني احنا مراح نخلص لا من محمد ولا من أهله
- وكفاح هم مناك تصيح مراح نخلص لا من حارث ولا من بناته
شذى :- علاقتكم عقيمة بان العائلتين متخاصمين محد رايد الثاني شنو ابالج زواجكم راح يعدي على خير وتعيشين حياة سعيدة ورة الزواج ؟
- ادري
- لعد اذا تدرين لويش متبتعدين عنه هيج دتأذين نفسج وتأذينه هو وياج وتأذين امج واختج
- ما اكدر
- وليش متگدرين هالگد تحبينه ؟
دارت وجها وگالت :- ما أدري
- حبج أذية الج ولغيرج
- ليش هيج كلكم بوجهنا ؟
- لمصلحتج دا احجي هيج يا حبيبتي وامج لو تشوفه زين الج جان قبلت بيه من زمان وخلصت من مشاكلج ولو مو بعدج صغيرة يعني لتزعلين مني بس اني لو منها من زمان منطيتج لعمج سوالفج متنجرع امي
- هذا هو لعد خلي توافق عالزواج وتخلص مني بعد ما اشوفها وجهي
- لجججج غبية لتصيرين دا أحجي لمصلحتج لتخبليني وتگلبين الحجي افتهمي قصدي
- اني ام مشاكل وصلفة واني المو زينة هذا التردون توصلونه افتهمنا عاد
- استغفر الله يا ربي بلوة اني وين احجي وانتِ وين
رفعنا راسنا على صوت ماما واگفة بالباب متكتفة
شدن :- عوفيها عووفيها خلي محمد غاسل دماغها المحجر شلون ما أشوف تاليتج وتاليتنا وياج على ايده
لهذا المدمن البلا عقل ولو هو انتِ شلونج
حجتها وفاتت للغرفة بان غورگت عيونها واندارت لشذى :- شفتيها ؟
شذى :- شفتها وكلامها صح دتأذيهن وياج بان كل يوم والثاني تخلين امج بموقف متنحسد علين وتروح تذل روحها لليسوى والميسوى لخاطر يساعدها ويخلصها
- منو غير العقيد
- العقيد ولا غيره انتِ رايدتها الها الشماتة ؟
نورجان :- والله من اجيتي وشفته شلون يباوعلها تمنيت الگاع تبلعني ولا اشوفها تنحط بهيج موقف
- ممجبورة تركضله بكل شي يصيرلنا
- النوب انتِ المراضية ليش هو منو الوگفلنا لوما عمو فدار وشُبير حتى الشقة الگاعدين بيها من خيره لتغشمين روحج بان
- اي زين طلعت اني المو زينة الوحيدة وكلهم خوش أوادم بس اني المو آدمية
هزيت راسي منها بيأس صدك ماكو فائدة من الكلام وياها اللي براسها براسها قفلت بعد باوعت لشذى جرت نفس سلمت وراحت واني وگمت رحت للغرفة
لگيت شبير مراسلني يسأل عن أجواء البيت بعد مراحوا
- ماكو شي بس ماما زعلانة وبان متخبلة واني واگعة بيناتهن
- جعلهم بالعثرة
- لا خطية لتحجي عليهم
- اويلي يحنية گلبك بس وياي تزومل
ضحكت :- تصبح على خير
سديته ومددت عالجرباية نعسانة حيل منايمة زين من البارحة من الهبطة محد اجاه نوم شفت بان دخلت للغرفة اخذت ملابس وراحت تسبح
غفيت شوي وفزيت ما هي بالغرفة كمت طلعت للصالة لگيتها متمددة عالتخم متخذة وضعية الجنين شعرها مبلل رحت جبتلها غطة غطيتها ورجعت أكمل نومتي
گعدت ثاني يوم ماما مريضة بالفراش حتى لدوامها مرايحة خابرت مديرها طلبت اجازة بان تحوص عليها تريد تحجي وياها بس ما انطتها مجال ولا حاجتها
اجت خالة ام شذى خطية اول مسمعت جايبتلها شوربة وگعدت توصيني عليها وهم وجها ثگيل على بان عاد هي هم حست خلت ولازمت الغرفة ولا طلعت بعد
راحت خالة لشقتهم رتبت الشقة ونظفتها سويت غدة وكملته توها بـالوحدة الظهر محد يشتهي ياكل هالوقت طفيت الگدورة سمعت موبايلي ديرن
شفته شبير رديت عليه گال :- انزليلي
لبست الحفاية وركضت لغرفة ماما
نورجان :- ماما اجة شُبير جايب المسواك حنزل اخذه منه
باوعتلي گوة مفتحة أثر الفلاونزة أشرتلي عالمجر
- اخذي فلوس بالجوزدان
- اهوووو كل مرة نفس الأسطوانة مراح يقبل ياخذهم
- اشمريهم عليه وتعالي
اخذت الفلوس وقبل لا اطلع باوعت بالمراية شعري مسويته كعكة ونازل كم خصلة على وجهي جريت حمرة وردية خليت شوي لشفايفي ونزلت اركض
لگيته واگف يم سيارته گبال العمارة رحتله
- هلو شُبيررررر
شبير :- يندارلج فدوة شبير والراء البأسمو شلونج يولي
- زينة
باوعلي من فوك ليجوة كال :- عش هيج نازلة مهلعة
- الجو بدة يحر ما اتحمل البس ثخين
- عجل ومطلعة زنودج علينا المن نازلة رگبتج تلالي تصيح للأعمى باوعلي ميصير هيج يولي
جنت لابسة تراك خفيف نص ردن تقرب عدلي الكتف ورفعه ليورة كال :- مرة الأخرى خلي شال على متونج لتنزلين هيج
- اوكي
- شطورة اختج الكلفه شلونها
- زينة بس ضايجة محد دينطيها وجه خلصت اليوم نوم
- خليها يولي جعلها تنام نومة أهل الكهف ولو هي تخوف لأن كل ما تنام وتكعد تعمل الها فاينة بكد راسها
- شمدريني محد يفتهم بان شنو وشتفكر تحسها ذكية بس غبية متحس الا مسويتلها مصيبة وساحلتنا وراها
مندمجة احجي وهو ساكت باوعتله شو هذا صافن أشرتله شبيك تقرب مسح حلگي :- يول هو انتِ عايزة تاتورين گلبي بالزايد
- هاي ليش
- شفايفج دم متعتازين للحمرة
سكتت ضايجة اخذت منه المسواك كال :- تگدرين تشيليهن لو اصعدهن عنج ؟
مرديت اخذتهن صدك ثگال مگدرت وگعت مني علاگة
صاح :- وثول
انطاني كفخة على راسي عالخفيف
- هم صفرة وهم ثولة شيسوي الله بيج بعد
دمعت بس مباوعت بوجهه ودنگت أشيل العلاگة
لزمني من متني يمنعني ودنك هو شالها
باوعلي شاف الدموع بعيوني صاح :- يول لا تخبليني ترى ما طگيتج قوي ومحمد أضحك وياج
ضليت ساكتة ودايرة وجهي
گال :- وتالي ؟
- لتصيح بوجهي بعد
تنهد :- هذا هو صار
- ولتكفخني
- حگج على هالشارب
- ولتگولي الصفرة بعد
ابتسم طرف شفته :- هاي ما اگدرلها تعذريني بيها
شالهن مني وصعدنا فوك فتحت الشقة
دخل خلاهم بالصالة باوع گال
- عجل امج وين
- مريضة بالفراش
شو هذا صاح :- لااااااااا الا حلويات الخاصكي يول هسع خالي يزعل شبلاها
- ما ادري سخونة ومن ورة هبطت بان تكسرت بالفراش
- عمت عيني يعينو گلبك خالي تعال اسمع
طلع جگارة شغلها وكام يدخن كال :- بعد محتاجين شي
تقربت منه واباوع لغرفة ماما حجيت بصوت ناصي
- حباب خلي اسحب نفس منها
- مو زين عليج بنتي هاي مال كبار
- حباب والله ضلت بنفسي
باوعلي سكت شوي يفكر گال :- نفس واحد بس
- اي والله
قربلياها دا اخذها من ايده منعني أشرلي عود وهي بيدي تقربت سحبت منها نفس جرها بسرعة من حلگي
- شبيك مسحبت
- كافي
حجيت أتوسله :- هاي شبيك شُبير عليك النبي بس شوية
قربها مرة ثانية تقربت اخذت منها نفس ونفخته باوعتله خدرانة من ريحتها :- طيبة
- مو بطيب شفايف الشاربها
حجاها وجر نفس منها وعينه عليَّ وضعه جان غريب سلم وراح بسرعة گمت للمطبخ دا اعزل بالمسواك وانتبهت ما انطيته الفلوس ضربت گصتي
رحت للتليفون خابرته بسرعة رد :- ها يول شبسرعة اشتاگيتي هيجي فراكي يوجع
- شُبير عليك الله تعال اخذ الفلوس هسه ماما تدري وتموتني
- لاه لاه شلون حجي هذا ما اقبل
- راح تجي تاخذهن ؟
- اي بس مو اليوم خليها على باجر عتصيرلي حجة ادحك الوجه المفهي
- تمام بيباي
- الراء يولي الراء
ابتسمت :- بيباي شُبيررررر
- يندارلج فدوة
مر ٣ أيام على هالحال ماما كامت على حيلها ورجعت تداوم بس هم متحاجي بان وهاي اللخ ذبتها عالنوم
رحتلها للغرفة مثل كل مرة گاعدة تطگطك بتليفونها ادري بيها تراسله فتحت الكنتور وكعدت أعزل بالملابس عيني عليها وعلى تعابير وجها ملامحها مقتضبة لحد ملزمت التليفون وخلته بنفور عالميز عرفتهم متعاركين
نورجان :- بان صاير شي
ما ردت خلت ودارت وجها للحايط نامت عفتها براحتها كملت تعزيل واني ارتب بملابسها اجت بيدي علبة صغيرة باوعتلها مستغربة ما افتهمت شمكتوب عليها
شفتها تحركت خليتها بصدري بسرعة كملت طفيت الضوة عليها وطلعت ، انتظرت ماما لحد مرجعت من الدوام تغدينا اني وياها وغسلت هي المواعين
ضليت بالصالة اروح واجي مترددة احجي لو لا
لحد مستقريت على رأي ورحت لغرفة ماما جانت
توها طالعة من الحمام تنشف بشعرها شافتني
شدن :- ها ماما تعالي
رحت كعدت عالجرباية واباوعلها وهي تسشور بشعرها طفته واندارتلي :- شبيك تويتي
افرك بأيدي وعيني عالباب عقدت حاجبها
واجت گعدت بصفي حجيت مترددة
- ماما راح اكولج شي بس حبابة لتتعصبين
- احجي شكو خوفتيني
- توعديني ؟
- لج امي شلعتي گلبي احجي
طلعت العلبة وخليتها بيدها ونظراتها تريد مني تفسير
- هاي لگيتها بملابس بان
- ماليش ؟
- ما ادري خفت ليطلع شي مو زين وهيج ضامته گلت اجي اگولج
كامت وهي تفور طلعت من غرفتها راحت لغرفتنا شغلت الضوة وراحتلها هزتها بقوة :- كووووووومي
گعدت تفرك بعيونها وتباوعلنا ممفتهمة شي
لزمتها ماما من متنها تهزها بقوة
- كلمة وحدة بان ماريد اسمع غيرها
شالت العلبة گدامها :- هاي الحبوب مال شنو ؟
جمدت من شافت العلبة بيدها ضلت ساكتة وعيونها تتنقل بيني وبين ماما عبالك تدور مهرب ، هزتها حيل
نترت :- دا احجي وياج هاي الحبوب شنووو فلمها
- ما ادري
حجتها وكامت تريد تطلع صارت وراها ماما جرتها من ملابسها رجعتها لمكانها وحجت بعصبية وهي ترجف
- وكلام الله ألزمج اگطعج وصل تحجين هاي الحبوب ماليش لو اعرف بطريقتي
ضلت تباوعلها غورگت عيونها صاحت :- لتبجين لج هاي الحبووووب منيلج محمد انطاج اياها مو ؟
هزت راسها ودموعها تنزل تخبلت ماما
لزمتها گطعتها تطع گوة جريتها من ايدها
نورجان :- كافي شوفي حالتها انتهتتتت بيدج
- عساها بالوجع الله ياخذج ويخلصني منج لج انتِ بلاء بلااااااء ونزل على راسي الله ياخذج ويخلصني منج ومن مصايبج مراح اشوووف الراحة من وراج ابددد لازم تسميني متكدرين موووووتي على ايدج بان دتسمعيني لو لا ماما مووووتي على ايدج
- ماما عفية لتسوين هيج بنفسج
انهارت تبجي وتحجي وياها واللخ هم منتهية گاعدة بالزاوية ولامة رجليها لصدرها بس صوت شهگتها مسموع تناشغ بجي
ضلينا على هالحالة ماما گاعدة متربعة بالگاع وايدها على راسها وبان ساكتة وعينها متشكلة بالسگف حالتها حالة وجها مخرمش من أظافر ماما وأثر الراشديات مبين بخدها شعرها متناثر
كامت من مكانها عيونها تدور بالغرفة لحد مصارت على تليفونها كامت سحبته وشمرته حيل بالحايط صار طشار
شدن :- هاي تليفون وبعد ماكو دا اشوف شلون تتواصل وياه بعد طلعة من الغرفة هم ماكو على كد الحمام تجين تفتحيلها الباب وتاخذيها بيدج خمس دقايق ترجعيها وتقفلين الباب سمعتي هالباب ينفتح على كد الأكل والحمام غير هيج يا نورجان انتِ حصتي
اندارتلها بتوعد :- اني الج منا وهيج بسيطة
طلعت وجرتني وياها قفلت الباب عليها راحت للصالة ضليت واگفة بمكاني عيني عالباب گلبي يأذيني عليها ماريد اشوفها بهالحالة بس هم ما اكدر اعوفها تأذي نفسها
رحت للصالة لگيت ماما گاعدة عالتخم ايدها على راسها وتبجي اندك الباب رحت فتحته جانت خالة ام شذى وبنتها
ام شذى :- لكم عيني شنو هالصوت والله گلبي وگع خما صاير شي
دخلن للصالة شافن ماما وگعدن يسألن شبيها
بس هي عبالك فصلت عبالك بغير عالم بس الدموع وصوت بجيتها مسموعة ..
اندارتلي خالة :- شبيها امج نور
نورجان :- ماكو شي خالة ليضل بالج متعاركة بالشغل ويمكن يطردوها وخايفة نبقى بلاية مصرف
- ياااا فدواتج امي الشغل وصاحبه متستوجب هالدموع كاتلة نفسج بجي صدك جذب
باوعت لشذى عرفتني دا اكذب عليهم
شذى :- يوم حبيبتي ارجعي للجهال ضلوا لوحدهم اني باقية هنا يمها ليضل بالج
- عينج عليها امي خطية نفسيتها تعبانة
- لتوصين بعيوني
راحت خالة لشقتهم اجت شذى گعدت يم ماما حضنتها عاد ماما مصدگت انفجرت بحضنها وگعدت تشكيلها طلعت كل اللي بگلبها وحجتلها على بان
شدن :- دا اخسرها شذى والله دا اخسرها اشوف البنية تصرفاتها مو طبيعية نهارها كله مخلص بالنوم لا ساعة ولا ساعتين أثاري جسمها متشبع بهالسم مخليها فاقدة
- من يا ملة هذا طفلة شنو هي وشنو المهدئات
- المدمن ديريد يجرجر بنتي وياه لأدمانه ولدربه الاعوج وبداها بهالحبوب والله يعلم شمنطيها بعد
- شدن اگولج شي ولتزعلين مني هي بنتج رعنة مگاعدة تتوب منه وثقي مراح تخليج ترتاحين لا انتِ ولا اختها
- شسوي گوليلي اذبها بالشارع
- لا مو تذبيها بس رجعيها لعمها خلي هو يهم بيها مو كافي كل هبطة واللخ تاكليها من وراها على ساعة يصيرلج شي كل مرة تكولين راح تعدل وترجع تخليج بمصيبة اضرب من القبلها هو مو يحوم عليج يريدهن خلص انطيه بان خلي هو يبتلي
- راح يأذوها متعيش وياهم
- شدن خلي نكون صريحين ترى بان لسان وصلفة ومتسكت عن اللي يدوسلها على طرف كل واحد يأذيها ترجعله الأذية اضعاف وهم يگومون يگعدون تبقى بنت اخوهم غصبًا عنهم يتحملوها شيردون يسوون قابل
- لتشوفيها تهوبز هو شعام عليها غير رعونيتها ولسانها والله مراح تتحمل تضل يمهم اللي هناك يكرهوني وكارهين ابوها وراح يأذوها كيد بينا
- هاي اني دا اكلج بان مراح تخليج ترتاحين ادري قابل مجبورة بيها مو باجر عكبة تذبج بمصيبة تخليج تروكضين بالمحاكم هم بعدج صغيرة ومن حقج تعيشين وتشوفين حياتج العنده مثل بان ميأمن يعوفها لوحدها ينرادلها مراقبة ومال واحد يكعد ويكابلها ٢٤ ساعة وانتِ مكاعدتلها بالشغل ونورجان متكدرلها
ضل كلام شذى براس ماما اشوفها تتصفن دوم وعينها عالغرفة بس مينطيها گلبها تسويها صدك وتنطيها لعمو
مر يومين الوضع هادئ بان ساكتة وضلت ماما حابستها حتى من ادخل الها الاكل متحجي شي بس وضعها صار يخوفني دائمًا صافنة الهالات جوة عيونها واضحة وجها يخوف صارت ضعيفة حيل وهزيلةة
وديتلها الأكل مثل كل مرة حاشگة روحها
بزاوية الغرفة وعينها متشكلة بالسگف رحتلها
نورجان :- بان حبيبتي بيج شي ؟
مديت ايدي امسد بشعرها تنهدت بحسرة وتقربت بست خدها گمت طلعت وقفلت الباب رحت لماما جانت كاعدة بالصالة مدنگة بيدها أوراق وتخابر بالتليفون
- ماما ..
أشرتلي بيدها :- بعدين نورجان مشغولة
كعدت يمها انتظرتها بين متنهي اتصالها باوعتلي
- شكو شبيج مگابلتني
- بان
- شبيها النوب والله مالي قابلية اسمع مصيبة لخ
- ليضل بالج ممسوية شي بس حالتها مدتعجبني كل ما ادخل عليها للغرفة ألگاها بنفس الوضعية يمكن مدا تنام
- لتخافين عليها مبيها شي
- ماما الأكل ادخله الها ارجع اشيله مثل ما هو مدا تاكل
عافت القلم من ايدها :- وين جنتي لويش محجيتي
- شمدريني
كامت بسرعة للغرفة فتحت الباب ودخلتلها جانت
على گعدتها راحت يمها تمرر ايدها على وجها
- بان يعيوني انتِ بيج شي يأمي يوجعج شي
ضلت ساكتة تباوعلها لحد منطقت :- اريد انام
- گومي نامي مددي شوي ريحي جسمج
- ما اگدر
- شنو متگدرين ؟
- اريد حباية
صاحت بيها :- لج انتِ ناوية تخبليني ترديني انطيج من هالسم بيدي
كامت تبجي وتتسول بيها :- عليج الله بس وحدة اريد انام تعبت من التفكير تعبت من خيالهم مدا يخلوني
أنام وأرتاح .. أريييييد حبابة انطيني يلا
كامت تصيح وتلزم بشعرها وماما لازمة ايدها تمنعها ودموعها تنزل
- لج كافي أمي شدتسوين بروحج تعبتيني بان والله مالي قابلية تحمل بعد
- انطيني حباية بس وحدة عليج الله
كامت منها نترت بيها :- سم ماكو لو هسه تصيرين مواتة كبالي
- حرررررام عليج اريد انام صار يومين منايمة
نورجان :- ماما خطية انطيها وحدة
- انلصمي انتِ اللخ يلا كدامي برة
طلعت وسحبتني وياها عيني عليها
تفرك براسها حيل طلعنا وقفلت الباب
اندارتلي تحذرني :- وكلام الله يا نورجان اذا عرفت بيج فاتحة الباب وداخلتلها محد يخلصج من ايدي
شهگت وعيني عالباب :- خطية والله
- لمصلحتها دا اسوي هيج اني ما اكرهها
خلت وراحت للصالة تكمل شغلها
لليل نايمين بغرفة ماما طفرنا على صوت دك
على باب غرفتنا طلعنا بسرعة جانت ترگع بالباب وتصرخ صاحت بيها ماما من ورة الباب
- شبييييج بنت الصخلة العالم نايمة
- انطيني حباية
- انطيج وجع انگبري ونامي بان
- ما اگدر افتتتتتتهمي يا بشرررر ما اگدر انام هي الحباية تريحني وتخليني اغمض انطيييييني يلا
- ماكو ذبيتهم
تهسترت گامت تدفر بالباب تبجي وتصرخ
- لييييش ليييييييش حررررام عليج بس ذني عندي تررردين تموتيني انتِ متحبيننننني بس تحبين نورجان اني ما اهمج
رخت نبرة صوتها :- ليش اني مو بنتج ليش تكرهيني
- والله لمصلحتج يا ماما اخاف عليج
- كذذذذذابة انتِ متحبيييييني
- ماكو أم تكره ضناها
- ماما حبابة شبيج ما قهرتج والله طيف بابا يحوم عليَّ بالغرفة اخاف والله مدا اگدر انام
- والله ذبيتهم
ركعت الباب حيل :- حقييييييرة كلببببببة الله ياخذج انتِ مو أم اكرررررهج ما احبج
رجعت سكتت شوي وصاحت :- اريد حبووووب راسي راح ينفجر
خلصنا الليل وياها كل شوي تصرخ وترگع بالباب وترجع تهدأ تگوم تتوسل بماما تحاول تستعطفها حتى تنطيها حباية وماما مگابلة الغرفة وظهرها عالباب دموعها تنزل وهي تسمع توسلاتها
اجن شذى وامها شافن حالتنا بقن مگابلاتنا معافونا
التمينا كلنا بالصالة كلها تغفي الساعة بـالثنتين بالليل
كاعدة عالتخم ما ادري شوكت غمضت عيوني فزيت على صوت تكسير قوي جاي من غرفتنا ، كمت اشوف ماما وشذى ركضن قبلي فتحت الباب ودخلنا عليها
شهكت وتجمدت بمكاني من منظرها عاطت ماما وركضتلها ، واكعة بالكاع وشاكة وريدها الكزاز مال مراية متناثر وبيدها اللخ قطعة صغيرة مفتحة عيونها كوة تباوعلي وتشهك النفس
ماما فقدت كامت متعرف شتسوي وخرتها شذى وكامت تضرب بخدها :- بااااااان وياي باعيلي لتغمضين
ركضت جابت شاش لفت ايدها وصاحت بماما
شذى :- كووووومي هو وكته الدك واللطم البنية حتموت خلص دمها
نزلوها بسرعة واخذناها بسيارة شذى ماما احسها مو بوعيها تباوعلها وتبجي تلوم بروحها .. اني انتهيت من شفتها متمددة والدم تارس الگاع اجيت اوگع من طولي
گوة خلص الطريق وصلنا للمستشفى تلاگفوها من عدنا بسرعة وللطوارئ كعدت بالگاع وكامت تضرب بوجها
شدن :- راح تممممموت اني كتلتها اني خسرتها شذى خسرت بنتي
لزمتها شذى تحاجيها تريدها بس تهدأ :- گالتلي ماما بس حباية وحدة اني عاندت صوجي بنتي ماتت بيدي
- اسم الله عليش مفاولة البنية هو هيج يا عيني اصبري يطلع الدكتور يفهمنا
گعدت على جهة وعيني عالغرفة واهمس :- لا بان لتعوفيني اموت وراج والله گومي شوفي ماما شلون دتبجي عليج ارجعليلي بان شلون انطاج گلبج تسويها
... 《 شهربان 》 ...
فتحت عيوني بغرفة المستشفى ايدي ملفلفة ومشكليلي مغذي درت وجهي للجهة الثانية لكيت محمد كاعد لازم ايدي ومدنك راسه
تحركت شوي انتبهلي رفع راسه بسرعة
عيونه حمر شعره مخربط همس بعتب
محمد :- ليش سويتي هيج تأذين گلبي عليج
حجيت بصعوبة :- گتلها بس حباية وحدة
- وتنتحرين ؟ جان كتيلي اني اجيبلج
- منعتني من كُلشي التليفون والطلعة مكدرت
- ادري نورجان سولفتلي
حركت ايدي شوي شاغت روحي دموعي نزلت فز بخوف :- شبيج يعيوني متأذية اصيح الدكتور
- ايدي توجعني
- اي طبعًا بنت سير النعال مشرحتها تشريح سبع خياطات
- اريد ماما
- برة هسه اصيحها
طلع شوي ودخلت ماما عيونها مورمة گعدت تباوعلي وتبجي بسكتة حالتها حالة گتلها :- مراح تحاجيني
- أذيتيني بان
- رجعتلج الأذية لا أكثر كتلج مدا انام كتلج بابا يباوعلي
- وهسه ارتاحيتي من هبطتيني عليج
سكتت شوي نزلت دموعي :- ممتعمدة اسويها والله بلا وعي مني صار هيج مدا أتذكر شجاب الموس بيدي
- انتِ تخبلتي رسمي وخبالج اني مو حمله بعد
- آسفة
- سمعتها هواي من قبل اذا تبقين عندي بعد ما أضمن تضلين عايشة يا مجرجرتني وراج للمراكز يا اركض للمستشفيات يا انتحار تعبت منج
تحجي ودايرة وجها مني وضعها مو مريح :- شنو يعني
- اجه عمج حياخذج وياه بعد تضلين عندهم
شهكت اندارتلي نترت ودموعها بعيونها :- عليش البجي مو انتِ هيج ردتي
- تعوفيني ؟
- ما اگدرلج ماما افتهمي بقائج عندي أذية الج والي مدا اگدر اسيطر عليج تعبت وكلام الله
عضيت شفتي وهزيت راسي من شفتها حاسمة قرارها
- هذا هو اللي تشوفينه مناسب سويه
- غصبًا عليَّ والله الا على عمى عيوني اخليج ترحيلهم
عمج منطاني مجال تخبل عليَّ وحتى اختج راد ياخذها مني
- وانتِ ضحيتي بيَّ لخاطر نورجان مو
- انتِ تعيشين وياهم هي فطيرة مو گدهم تضل محد الها هناك
- واني منو الي ؟
- محمد يمج عمج كال اعقدلهم واخلص منهم ومن خبالهم الظاهر مو بس اني دا اعاني من خبالاتج الاخ هناك هم مرگصهم
تقربت باست راسي دموعها مسكتت :- لتظنين بيوم ضحيت بيج كُلشي صار خارج عن إرادتي
- روحي ماما
- لو مسويت هيج اختج تنتهي
- رووووحي لتلحين روووووووحي الله ياخذذذكم كلكلم اكرهكممممم اررررريد اموت ليش جبتوني لهنا
حجيتها وكمت اشمر بيدي انشلعت الكانيولا كامت ايدي تنزف دم حاولت تلزمني مكدرت تخبلت اجوا على صوتي يتراكضون كوة محمد لزمني والدكتور ضربني ابرة عاد شوي يلا خدر جسمي وعيوني بدت تغفي
عيني عليهم الممرضة واگفة تضمد ايدي بالشاش
وتشكلي كانيولا جديدة ماما واگفة على جهة دموعها تنزل وتباوعلي ومحمد يمي لازم ايدي
عمو واگف يم الدكتور يحجي وياه عالخروج اجت عيوني على نورجان واگفة بالباب وجها اصفر تباوعلي وتبجي بهدوء ابتسمت الها ردتلي الابتسامة وغمضت
فتحت عيوني لكيت روحي بغرفة محمد ملابسي متغيرة شوكت جابوني شوكت طلعت ما ادري بالدنيا
گاعد عالكرسي على مسافة يگلب بالتليفون شافني
محمد :- صح النوم بان الحلوة شلونج اليوم خما متأذية
- هاي من شوكت اني هنا
- من البارحة كتبولج خروج وطلعنا
- ماما وين ؟
- اخذت نورجان ورجعوا للشقة
نزلت دموعي اجه لزم وجهي ويمسح بدموعي :- كافي وتالي احنا ويَّ البجي
- عافتني
- معافتج شوكت متردين اخابرها الج تجي تشوفج
- اريد بابا
- اني ابوج اصيرلج كلهم بس لتبجين
- راسي يوجعني
لزمت راسي افرك بيه گال :- هسه اكلي وارتاحي واخذي علاجج يخف الوجع
- اريد حباية
- ماكو بعدين مو هسه
- اريد انام عليك الله بس وحدة
- ورة الاكل
- ماريد مجوعانة
- مو بكيفج تاكلين انطيج غيرها ماكو
راح طلع من الغرفة گمت للحمام غسلت اباوع وجهي يخوف من صدك شفايفي بيض ويابسة لميت شعري شلون مجان وطلعت لگيته جايب الأكل گوة غصبت روحي اكل لگمتين وكمت .. بعد ما كمل رحتله
صرت كباله رفع حاجبه :- ها
- الحباية محمد
جر نفس وكام للكنتور انطاني وحدة شربتها حتى بدون مي ورجعت مددت عالجرباية ضل يمي ايده تلعب بشعري غمضت مدريت بروحي
گعدت ثاني يوم على ايده وهو يهز بجسمي
محمد :- گومي لج خستي من النوم
گمت افرك بعيوني راسي ثگيل :- صار شكد نايمة
- من البارحة وهسه دنيا الظهر شنو السالفة هو هيج
- تعبانة ما ادري بروحي
- دگومي لعد گومي نطلع ناكل برة
باوعت للمكان :- صدك انتَ ليش مخليني بغرفتك
- حتى ادير بالي عليج بين متگومين وصيتهم يحضرولج الغرفة البصف غرفتي ولتخافين جاي أنام عالقنفة خاف يضل ببالج
- اريد اسبح
- گومي ملابسج هناك
حجيت بسرعة :- ماما اجت ؟
- لأ هذن اني اشتريتهن بس خابرتني اكثر من مرة هي ونورجان من جنتي نايمة يسألن عليج
هزيت راسي بخيبة وگمت للغرفة اللخ
صغيرة بس حلوة ومرتبة ريحة المعطر تهف منها
اخذت ملابس من الجايبهم الي
رجعت للحمام مال غرفته دا اريد افوت گام وراي
صحت :- نعم وين
- اساعدج غير
- احلف ؟
حك گصته :- فوگاها
- توكل ابني
- لعد راح اصيحلج شارمن تساعدج
ما انتظر رد عافني وطلع دخلت للحمام سبحت بمي فاتر رخت عظامي طولت جوة المي سمعت الباب يندك
صحت :- منو
شارمن :- انا بابا يكول روح ساعد مدام
عضيت شفتي خرب روحك محمد شجايبلي من ملة
- هسه اطلع انتظري
نشفت بسرعة لبست ملابسي وطلعت ساعدتني اغير الشاش مال ايدي وگعدت تمشطلي شعري
- انتَ شعرك كوولش حلو
ابتسمتلها ضفرته الي وگامت كالت :- مدام انا يروح انتَ من يريدني صيح قوي قووي وانا يجي
هزيت راسي وتشكرتها راحت گمت للمراية اباوع لنفسي ما اعرف شسوي ضليت احوص اروح واجي لحد ما انفتح الباب وفات محمد للغرفة
- وين رحت ابن الزفرة
- شبيج ووجع
- صار ساعة محبوسة هنا
- متطلعين لعد
- منو بالبيت ؟
- امي والبنات
- حلو وتريدني اگابل الثلاثي المرح
- ليش هيج نسمة تحبج ترة وتوها سألتني عليج گتلها تسبح
- هو انتوا بيتكم كله طلع منه بس نسمة
- ها واني ؟
- چلب حالك حال أهلك
- هيج صار الحجي ولج
اجاني يتقدملي صحت معترضة :- والحُرررررر محمد اذا سويت شي اعيط وألم قوم ثمود عليك
- سباعية انتِ بلة سويها
صحت :- شارمممممـن
اجه لزمني واني مستمرة اصيح سد حلگي
- يعني شتريد تسويلج مثلا محد يخلصج من ايدي
بعده يحجي اندفر الباب وفاتت مفزوعة بيدها چفچير شافته شهكت واجت عليه انطته ضربة بمتنه خلته يكمز وتصيح عليه
شارمن :- قليلة أدب شنو تسوي عيب عييييب
وگف يفرك بمتنه بوجع :- بنت الخرا شمسوي استلمتيني دك
- مسكينة مدام خايف منك
- هاي تخاف ؟ دباعيلها جنها صل اصحى مني ومنج
بعده يحجي انطته ضربة لخ
شهربان :- حيل
- اني الج تتشمتين مو وانتِ اللخ بسيطة الظاهر مو مال احترامات
- ولي ولي يجي بابا سالم يخبر عليك
- تهدد هي الزرگة امشي لج
جرتني من ايدي طلعتني وياها درتله طلعتله لساني أشرلي عود بسيطة رحنا للغرفة الثانية ووكفت توصيني
شارمن :- هذا حمودي يولي يسوي اشياء انحراف انتِ ابقى هنا
هزيت راسي مبتسمة لكلامها :- شكرًا
مسحت على راسي ابتسمت وطلعت شارمن حبابة يجي عمرها بالـتلاثينات من زمان بـ بيت عمو حتى محمد كبر على ايدها ومتعلم عليها ميزعل منها ..
شوي وفات صحت :- والقرآن راح اصيحلها هالمرة تركع گدورة الغدة براسك
- شبيج چلبة شمسويلج هسه امشي مو كتلج نطلع ناكل
- ماريد
- ليش فوگاها
- انتَ تسوي أشياء لا أخلاقية شارمن حذرتني
- يا يابة اذا لزمتجن الا ارگع راس براس يلا گدامي
- مالي خلك والله
- حلو لعد گابلي الثلاثي المرح عالغدة واني طالع
طفرت بسرعة :- لا لا كلهن متحلفاتلي من ذاك اليوم اروح وياك
- طلقة گدامي
نزلنا بسرعة جانت هبة وامها بالصالة يباعن تلفزيون شافتنا طلعنا بسرعة وهي تصيح ورى محمد ما اهتملها
راد ينزلني مطعم مقبلت جاية بملابس البيت
والحفاية جابلنا اكل وگعدنا بالسيارة ناكل
وراها فررني صارت دنيا العصر رحنا للكرادة صار بالي يم ماما ونورجان درتله :- اخذني لشقتنا
- منو يگول هم هناك
- لا موجودات هذا وكت حلة ماما من الدوام
رحنا هناك نزلت اركض ما انتظرته گلبي ملهوف لشوفتهن شگد ما اكابر واحاول اتذكر كلامها خاطر اموت گلبي ما اگدر احقد عليها
وصلت للشقة دگيت الجرس وكمت ادك بالباب حيل
محد طلع ، انفتح باب شقة خالة ام شذى وطلعت
شافتني حجت بفرحة :- بان هاي شجابج ولج
رحت حضنتها باستني وگعدت تسأل عليَّ
- خالة وين ماما ونورجان ليش مديفتحن الباب
- امج طالعة ويَّ شذى ونورجان هيانها يمنا
دخلت بسرعة جانت كاعدة بالكاع تلون ويَّ الجهال
شهربان :- نورجانو
رفعت راسها بسرعة شافتني طفرت حضنتني حيل وكامت تبجي مسحت على ظهرها وباوعتلها :- وجع عليمن تبجين هياني ترة بعدني ما ميتة
مسحت دموعها :- لتحجين هيج اشتاقيتلج هيج يهون عليج حتى متخابرين
- ما ادري بالدنيا والله اليوم يلا گمت من الفراش
گعدنا نسولف ومحمد ضل جوة منتظرني بالسيارة وخالة ام شذى تعاتب بيَّ عالسويته شگد انتظرت ماما حتى تجي واشوفها ملحگت عليها تليفوني احترك
محمد كل شوي يخابرني حتى انزل ..
باوعت لنورجان :- حروح نورجان سلمي على ماما
- ابقي شوية هسه تجي
- صارت دنيا الليل تأخرنا ورانا طريق
- راح أشتاقلج بان
حضنتها :- واني قابل وين رايحة يا حبيبي شوكت متردين بس خابريني من محمد
وخرت منها اباوعلها عيونها مدمعة نظراتها بيهن حسرة إلي همست
- نورجان اذا اكو شي ضامته عليَّ احجي
- ماكو شي
- أكيد ؟
هزت راسها بوستها وسلمت على خالة ونزلت لمحمد صعدت السيارة نزلت دموعي
محمد :- وتالي بان ويَّ دموعج
- مشفت ماما
- غير مرة اني اجيبج
- اريد ابقى يمهم
سوة حركة بوجهه :- ممنوع
- ليش
- ابوي ميقبل وامج بعد متريدج اصلًا كالت انتوا شيلوا مسؤوليتها ما اكدر على اثنين
- متحبني تحب بس نورجان
حجيتها وشهگت لزم ايدي باسها :- خليهم لحد يحبج بس اني
رجعنا للبيت على گد مجنت متونسة بداية النهار رجعت نفسيتي تعبانة صعدت للغرفة وسديت الباب ضليت ابجي مخنوگة من المكان بالساعتين مرت محد اجاني
تعبت حيل گمت طلعت لغرفة محمد ما هو .. طالع
رحت للكنتور فتحته أدور بيه عن الحبوب ما ادري وين يضمهن صعدت عالطبلة اباوع بالخانة الفوك لگيت كومة مال چياس صغيرة وابر شفت العلبة اللي يجيبلي منها كل مرة جريتها ونزلت اطلع وحدة منها
هنادي :- شتسوين هنا ؟
رفعت راسي شفتها بالباب :- مو شغلج
اجتني لگفت العلبة من ايدي
صحت :- شبيييييج بعقلج انتِ انطيني العلبة
- هسه يجي محمد واگوله تلعب بغراضك
- احلفي ؟ توكلي بنتي لا أجيبج بعضة ازورگ جلدج
- حقج چلبة مسعورة
- لعد اتچفي شري لا اشوفج شي ميعجبج
- لج شو تهوبزين صار كم يوم متحملينج شو تعاي
هجمت عليَّ جرتني من شعري اجت هبة شافتها مصدگت لزمني استلمني كفخ جريت ايد هبة عضيتها حيل صارت تگمز وخرت تبجي لازمة ايدها واللخ مچلبة بشعري ولا تتحرك شضخمها
ادفر وهي تدفر تمالخنا خفت لتلچم مكان الخياط
صحت :- شارممممممـن
دقايق واجت تركض هي ونسمة
شافنها وخرنها مني خلتني وراها
شارمن :- شبيك انتَ مجنون
هنادي :- وخررررري لج لا اكومج فوگاها
صاحت بيها اختها :- ووجع شبيج هادة عالبنية
- انطينياها انچلبت علينا ياهو التلزمه تنطي عضة تخلي يگمز
- فكي ياخة عنها وهي متعضج اذا انتن متگابلات عليها شترديها تسوي
- وين هو احنا گادريلها هاج شوفي شوهت وجهي بأظافرها وعضت هبة من متنها
محمد :- حييييييييل
درت شفته واگف بالباب ومچتف يباوعلنا ركضت يمه
هنادي :- مشجعها انتَ متشوفها شسوت
- حيل بيجن حتى لتعيلن بيها مرة اللخ
- شفتها تاخذ منك حبوب
دارلي خزرني همست :- وحدة والله وهي جرتها مني
- معليج بيها تجين تگليلي واني اتصرف وياها ممنوع وحدة تمد ايدها عليها هاي اني حذرت مرة اللخ ايدي والحزام
- والله يا الله النوب فوگاها
خلت وطلعت معاجبها قبل لتطلع اندارت غمتني
انطاها دفرة شمرها برة باوعتلي الثانية تهدد
هبة :- بسيطة يجي بابا الا اگوله عليج
- تولين لو انطيج دفرة الحگج بأختج
خلت وطلعت تشهك اندارلي :- شمسوية بيهن طلعن مدمايات
- هن هدن عليَّ خما اضل اباوع
- بلة اشوف سنونج
- ما
- خلي اشوف لج
- وخر
دا امشي جرني رجعني ولزم فكي يشوف سنوني ضحك :- خرب روحك عمي دباع الأنياب اكول التلزمه يصيح الغوث من عضتها
دفعته عني متضايقة افرك بوجهي
اجت نسمة تعدل بشعري
نسمة :- بان ديري بالج ترة محملات عليج لتحتكين بيهن زايد واني هم اوصيهن ميتقربلج وفدوة بطلي عرك وياهن هن وامي
- خواتج مچلوبات
محمد :- لعد وانتِ شنو ؟
- بس هن أچلب
- لا واصلة مرحلة انتِ
نسمة :- صيري عاقلة بان ومعليج بيهن اني يمج شتردين تعاليلي ماشي يروحي ؟
هزيت راسي كفشت شعري بالشقة وراحت
لحگتها شارمن انتبهتله واگفلي متخصر بأيد
- خير لويش دتباوع هيج
- عفتج ساعة ارجع الگاج باسطة خواتي شسويلج وين اضمهن عنج
- والله اني رقيقة هن عالن بيَّ واستچلبت
- اويلي اذا مو احلى چلبة
- حتى غزلك معوق
ضحك بصوت عالي اجه دنك شال العلبة وطلع وحدة انطانياها :- اشربيها وروحي لغرفتج انطمري صوت ما اسمعلج
- خاف يجن يخنگني واني نايمة
- اي مو هن بان الفوصة
- لتغلط
- واطيح حظج هم
دا امشي منه قبل لا اتعداه بحركة سريعة عضيته وطفرت قبل ليلكفني اسمعه يصيح وراي شردت للغرفة وقفلت الباب ، شربت الحباية ومددت بالفراش تعبانة
نمت واني بالي يم نورجان وماما
... 《 نورجان 》...
مر كم يوم شقتنا كئيبة ماما تخلص الوكت بالدوام واني مگابلة جهال شذى مقيمة بشقتهم ما احب ابقى لوحدي
أراسل بان مرات تگول زينة ماكو شي عدا مشاحناتها ويَّ بنات عمو سالم شگد توسلت بماما نروحلهم مقبلت
عمو يتردد علينا بين فترة ولخ ماما مراغبة وجوده بس متگدر تطرده تستقبله نص ساعة بالزايد ما ادري شنو يحجون لوحدهم ميخلوني اگعد وياهم لحد ميروح
خفت من جياته علينا حتى بان مديجيبها وياه لعد شكو ديجي لشقتنا ، كل وبالي جان علمود زواج بان ومحمد
مجنت ادري ضاملنا ضمة
كاعدين بشقة خالة ام شذى ماما وشذى يسولفن بيناتهن سمعت أطراف الحديث سالفة بيها حجز وسفر
درتلها :- وين نروح ماما
- نسافر لتركيا ما أأمن ابقى هنا بعد
- وبان ؟
- بان حتتزوج اكو من يدير باله عليها الا احنا ضالين جوة رحمة سالم بدة يحوم علينا يريد يجرنا وياه
- ماريد اروحلهم
- بأحلامهم والله هو واخته اسوي اللي يردونه
- شوكت نروح
- مكملة الجوازات أقرب حجز نطلع مناه بس أكمل هالشهر دا اخذ الراتب
كمت طلعت من الشقة ومن العمارة بكبرها تمشيت وگفت عالرصيف مخنوگة دموعي تنزل مقهورة حيل
يمكن بالربع ساعة وشخطت سيارة شبير گدامي
شافني نزلي بسرعة بخوف :- شبلاج يولي عش البجي
ضليت ساكتة واباوعله الشهگة تطلع غصب عني تخبل
صاح :- لتخبليييييني نورجان احجي شبيييج امج صايرلها شي اختج
هزيت راسي بـ لا
- عجل شبلاج
- اشتاقيت لبان
- أفشر هسع ؟؟؟
حجاها بحرگة ضليت ساكتة
طلع جگارة يدخن كال :- عش ما شايفتها ؟
- لا صار بالأسبوعين من جابها محمد هنا ضالين عالموبايل نتواصل
- زينة هي ؟
- اي حسب كلامها
- عجل عش البجي هناك أريحلها وأريح الج و لأمج هم تعبت خطية أقلها هناك اكو واحد فوك راسها تخاف منو
- بيت عمو يكتلوها
- لمصلحتها غير
- لا يأذوها بدون سبب يكرهونا على كره ماما وبابا
- عش هيج
- ميحبون ماما وجانوا رافضين بابا يتزوجها حتى جدو تبرئ منه وحرمه من الورث بس بابا عاندهم وراح تزوجها عناد بيهم وعزل بيها بغير منطقة بعيد عنهم
حالتنا رغم جانت على گد الحال بس جنا مرتاحين بوجود بابا ما قصر علينا بشي وبان جانت متعلقة بيه أكثر مني لحد مطلعت عليه ديون هواي وگاموا الديانة كل يوم والثاني داگين بابنا مگدر يسددلهم فلوسهم
راح توسل بعمو وخواته محد قبل يساعده ذل روحه الهم وحتى بجي بجى محد انكسر خاطره عليه لحد ما بيوم لگيناه معلك حبل بالسگف وشانق روحه معايفلنا منه شي غير رسالة كاتب بيها أسماء عمي وعماتي
متحملت اختنگت كعدت عالرصيف ابجي راح جابلي بطل مي ورجع انطانياه اخذته منه شربت شوي
جريت نفس :- ول انتِ زينة ؟
هزيتله راسي انتجى على سيارته يباوعلي
كملت :- ورى ممات بابا تحاصصوا بيناتهم عالورث جدو عنده خير من الله عقارات وزعهن عليهم من راحتلهم ماما تطالب بورث بابا محد قبل ينطيها وكالوا جدو معايفله شي بس كذب كُلشي موجود عندهم ومسجل بأوراق رسمية بس شگد وشعايفله محد يعرف غيرهم
- منو هذول ؟
- عمتي الكبيرة وعمو سالم
- وراها شصار وياكم
- انتقلنا لبيت خالو جنا صغار باعت ماما البيت وسددت دين بابا وانتقلنا للسليمانية اجوها خطابة هواي من اصدقاء خالو وحتى عمو تقدملها بس هي جانت رافضة مكسورة على بابا وخالو مرة جبرها وخلاها تتزوج
- امج متزوجة من قبل ؟
- بالگوة حتى خالو يخلص من عدنا وبشروط هي خلتهم واهمهن انُ احنا نبقى وياها وزوجها قبل بس مطول زواجهم وانفصلوا ورجعنا لخالو ماما گلتله اشتغل واعينك بالمصرف يلا قبل وسدوا سالفة الزواج
- هيج تحبو لأبوج ؟
- اخذها صغيرة فتحت عيونها عليه شگد اجتها عروض زواج مقبلت ولا تنازلت عن حبها ابد ولا رضت تتنازل عنا اني وبان لأن من ريحته
- عجل شتغير وخلاها تقبل بخالي
- وضعنا جان ميسمح شردنا مهزومين خالو من جهة وعمو من جهة جانت مواعدتهم بزواج واحنا يشمرونا على بيت عمو اخذت فلوس المهر وشردنا لحد موگعنا بيد خالك جانت مجبورة تقبل حتى تحمينا من عمو
- سالفتجن مليوصة
- ماما راح تحجزلنا نطلع لتركيا
دارلي فاتح عيونه :- لاه
- والله عمو يريد ياخذني منها وخافت ليسويها صدك
- واختج ؟
- تكول تعيش يمهم
هز راسه وطلع جگارة لخ ورثها :- عجل حگها لو سوت هيج طليقها الاول عش انفصلت عنو ؟
- جان يتحرش بينا اني وبان جنا صغار وقتها وماما لكفته بسرعة صار طلاكهم
- شبلاجن انتن الله يزت شكو واحد زايعتو الكاع عليجن
- شنسوي حظ الجميلات عاثر
گح بالجگارة حيل طبطبت على ظهره :- الله الله
باوعلي :- عش يولي انتِ جميلة ؟
- اي ومثقفة هم
- وين ما دحگت من الثقافة بس اسمها
- مو راح أسافر بالطيارة خلص صرت مثقفة رسمي
- غمها لثقافتج يولي
- انتَ همجي شمعرفك هالسوالف مال طبقة مثقفة أرستقراطية
- اويلي يربك داحت الفحلة شتردن بعد تركيا وبس انتِ وامج سيبن يولي
- بعد ماكو لا انتَ ولا عمو
- وانا شدخل امي
- راح اخلص منك كل متشوفني تكفخ بيَّ وتصيحلي الصفرة
- عجل وين اكو فحلة مطقمة عيونها بلون شعرها الاصفر
- أنثى شقراء رجاءً
- ومثقفة ؟
- مثقفة
- داحن بنات شدن المثقفات وحدة متدري وين الله زاتها والأخرى تمشي وتهطر بالزلم يعينو الله الياخذجن
- ايوو ومنو گلك حاخذ مناه راح اروح اشوفلي تركي معضل عيونه زرك
رفع حاجبه :- هاه ؟
- والله تخوفون ايدكم والكفخ اخذلي واحد مثقف كيوت مثلي
- قصدج تردينو شادهن ستيل
- شنو يعني
- گومي يولي گومي وريتي گلبي لو اعرف ما جاي
مدلي ايده گومني صفن بوجهي شوي تقرب گرص خدي
گال :- طالع بالليل راد للغربية جائز جيتي الثانية
ما الحك عليج راح اشتاگ لعيونج الصفر فحلة
نزلت دموعي تقرب مسح خدي طرف أصابعه
تنهد :- عش هيج يولي عجل طلعتي صدك رقيقة
- ماريد أسافر
- وين لاگيتها تركيا وشباب حلوين وبس انتِ وحلويات الخاصكي تونسي كافي بداعتي لتبجين مو وريتيني ور
مسحت دموعي كتله :- بس أعترفت اني رقيقة
أشر على نفسه :- انا وين شوكت كلت هيج ؟
- والله توك كلت
- بالحرام اذا حجيت امش بنتي توكلي مصدگة روحها
ضربته بالشقة وضحكت ضحك لضحكتي كال :- اي شي تحتاجوه رقمي موجود عندكم اذا تخلصون فلوس خابروا أحوللكم وصي أمج وسلميلي عليها
هزيت راسي أشرلي افوت جوة مشيت شوي
ودرتله لگيته بمكانه واگف يباوعلي
- بيباي شُبيررررر
ابتسم :- الله وياج فحلة
- أنثى رجاءً
- نثية يبا نثية تشحط شحط
خليت وصعدت للشقة غصة بگلبي بس الله يعلم بيها
مر كم يوم وماما حجزت شگد حاولنا نشوف بان بس مگدرنا هم ميخلوها تطلع واحنا منگدر نروحلهم
طيارتنا بالليل حضرنا جنطنا دموعي مسكتت شلون اروح بدون ما أودعها ماما موصيتني ما اجيبلها طاري سفرتنا بس گلبي منطاني .. شفت ماما ملتهية تسولف ويَّل شذى ركضت للغرفة وسديت الباب
خابرت محمد مرة ومرتين يلا رد :- هلا نورجان
- محمد عفية انطيني بان بسرعة
- شصاير ؟
- ماكو شي بس احاجيها بالي يمها
شوي واجاني صوتها تعبان :- ها حبيبتي
- بان احنا مسافرين
فزت :- شنو !
- عفية اسكتي لحد يسمعج ماما حجزتلنا اليوم طيارتنا طالعة لتركيا
- من شوكت هالحجي ليش مالي خبرررر
- والله ماما وصتني ما اگولج ومصارت فرصة حتى نشوفج خابرتج اسلم عليج
اسمع صوتها گامت تبجي ومحمد يمها يسكت بيها مفتهمت شي من كلامهم صارت هوسة عندها
همست :- الو بان تسمعيني
سالم :- شوووووووكت طيارررررتكم يغضب
شهگت بخوف وسديت الخط بوجهه گلبي
كام يدك بسرعة اجت ماما تستعجلني
شدن :- يلا نورجان تأخرنا
انتبهتلي وجهي مخطوف :- شبيج امي
- مبية شي يلا بسرعة دنروح
رحنا بسيارة شذى امها وجهالها ويانا يوصلونا للمطار ويودعونا مناك الطريق مدري شلون خلصناه من الدموع
وصلنا هناك نزلنا الجنط سلمنا على خالة وشذى والدموع جانت سيد الموقف بفترة قصيرة صاروا جزء من عائلتنا وگفولنا وگفات حلوة بوست الجهال وسملنا وراحوا وهم يوصون بينا نخابرهم بس نوصل
دخلنا للمطار كملنا الإجراءات وگعدنا بصالة الأنتظار طيارتنا بعدلها ساعتين خليت راسي على چتف ماما
ما ادري شوكت غفيت وفزيت على صوتها
شدن :- اجيبلج شي تاكلين ؟
- لا بس عطشانة اريد مي
- انتظري هنا هسه اجي
راحت وعدلت كعدتي اباوع للعالم نعسانة كوة مفتحة ما ادري شلون لمحت عمو سالم جاي من بعيد
فركت عيوني ممستوعبة عبالي اتخيل وصدك اشوفه هو ورجل عمتي وراهم محمد يمشون بأتجاهي
غير اريد اتحرك ماكو رجلي تصلبت بمكانها
وصل يمي لزمني من شعري كومني :- تريد تنهزم بيج وين ماخذتج شدن بنت ام الملاهي لحضن يا گ***
گمت ابجي لزمه محمد جرني منه
محمد :- يابا مو هنا العالم تباوع
- گدددددددامي يلا
لزمتني الرجفة شفايفي ترعش همست :- ماروح
انطاني كفخة على حلگي كتمني خليت ايدي متأذية وباوعت بأيدي گام يصب دم جرني من ايدي وطلعني يسحل بيَّ واني اتوسل بيه يعوفني وأبجي
حاولوا الأمن يمنعوه بس جانوا حاسبين حسابهم طلعوا باجاتهم وسكتوهم اخذوني غصبًا عني للسيارة
وحركوا ضلت عيني عالمطار ماما شتسوي من متلگاني
رزايل وأهاين وفشار عليَّ وعلى ماما وبابا مخلوا احد ومحمد يباوعلي ويتنهد گوة لازمني عنهم ليضربوني
وصلنا للبيت نزل اجه من جهتي اخذني
يسحل بيَّ دخلني جوة شمرني بالصالة
سالم :- هاي السسسسسساقطة اذا عتبت الباب اهجم البيت عليكم سمعتوا لو اعييييد
كفاح :- هذا هو عيني أعصابك لتحرك بروحك عالساقطة هاي ليرتفع ضغطك
لميت روحي واشهك بناته يباوعلي متشمتات نزلت بان من فوك تركض عالصوت شافتني ركضت حضنتني
شهربان :- ليش ضارررربها حيوان كسررررر بأيدك
تقدم عليها يريد يلگفها صار بوجهه محمد يمنعه كله
محمد :- والقرآن اذا جستها راح تشوف مني تصرف ميعجبك
- عفية ينچر ابوووووووك تحامي للساقطات وترررريد تضربني
- لتجبرني اسويها صدك حذرتك الا بان متتقربلها
صار مصايح بينهم وستار واگف بينهم ومرة عمو تعيط من جهة اجت لزمت بان سحلتها سحل من شعرها
كفاح :- كله من وراج يالسسسسساقطة الله بلاني بيجننننننن انتِ واختج راححح تهجمن بيتتتتتتي
هي استلمت بان وبناتها اندارن عليَّ محمد عاف ابوه واحتار يحامي لمنو مگدرلهن گوة جرني من ايدهن
هلسني تهليس فطست بديهن واباوع لبان تتناطح ويَّ كفاح واگفة نسمة والخدامة لازماتها حتى لتهد عليها ومرة عمو على جهة واگفة تفرك بأيدها وتبجي
صريخ مينفهم شي لحد مصاح عمو خرسهم كلهم
سالم :- انعل ابووووووجن لابو منين ما طلعتتتتتتتن بنات الخرا الزمججججن ارگع راس براس كل وحدة لغرفتتتتتها كدددددامي
تطافرن بسرعة الأماية وبناتها اجتني بان استوقفنا
سالم :- اسمعن بنات شدن خاف عبالجن تلعبن بذيلجن وتغافلني مثل ما غافلتن فؤاد وتنهزمن بالقرآن الزمجن اذبحجن وميييييرفلي جفن اگعدن وصيرن عاقلات حتى ما تتأذن
رادت ترد خزرها محمد وأشرلها فوك اخذتني وصعدنا گوة امشي الشهگة شاگة صدري وبلعومي احسه متجرح من الصريخ الصرخته دخلتني بغرفة
گعدت عالجرباية دموعي موگفت گابلتني تبجي وياي وتوخر بخصلات شعري عن وجهي وتفشر عليهم
باوعتلها :- ليش كتيلهم بان ؟
ضلت ساكتة عينها بعيني تنهدت وحجت
- مگتله جنا جوة من خابرتي ومحمد فاتح سبيكر من جابلي التليفون وهو سامعج وتخبل
- عفتها بالمطار بان شحالها هسه
حجيتها وشهگت ضميت وجهي بيدي گامت غسلتلي ومسحت الدم اللي بحلگي وجوهنا اثنينا مشخطة هسه صدك حسيت بروحي يتيمة وما عندي أحد
نزلت دموعي بسكتة شافتني عبالك افتهمت شنو يدور براسي كالت :- اني يمج دائمًا مراح اخلي احد يوصلج لو أعرف اخذج وانهزم
- مراح يخلونا مسمعتي شكال
- تهديده يلفه يلفه ويحطه بـط***
- اشششش ليسمعون
- ميخوف چلبي
- متنلام ماما من تگول رعنة
- رعنة من العشته مضل بيَّ عقل گمت امشي واهف اي واحد يتقربلي ما اشوف گدامي هم جبروني أصير هيج
خليت راسي بحضنها همست :- لتعوفيني بعد نورجان والله من گتيلي مسافرين عقل مضل براسي مالي أحد غيركم
ضلينا على وضعنا مرت ساعات واحنا بالغرفة وين يلا انفتح الباب وفاتت نسمة مادة راسها :- عادي افوت ؟
أشرتلها بان تدخل اجت وگعدت يمنا مدت ايدها لشعري
نسمه :- اووووي هاي شصايرة تويتي الأصفر شكد جميل
شهربان :- يا جمال دباعي الخريطة البوجها
نورجان :- ديلا عأساس انتِ شلونج ودتعيبين مرة عمو حتى أنهار رسمت بوجهج
ضحكت نسمه بصوت عالي :- دباع الوضعية يربي غراب يكول لغراب وجهك أسود
رغم حالتنا الكسيفة صدك ضحكنا على كلامها بعدنا دنحجي وگبت عيطة من جوة صوت صريخ مال مرة ميزت الصوت وجفلت بسرعة من مكاني
نورجان :- ماما بان هاي ماما
نزلنا نتراكض لگيناها بالصالة تريد تدخل جوة عمو سالم صاير بوجها يمنعها تفوت واحد يرفع والثاني يكبس
- ماما
شافتنا دفعته واجتني تركض لمتني بحضنها وتشهك بصوت عالي بان وكفت على مسافة مترددة شافتها فتحتلها ايدها اجت تركض اخذتنا لحضنها وبس صوت البجي مسموع حالنا يصعب عالكافر
كفاح :- ديلا يلا بلا عيارة بنتج حيصيرلها بالشهر هنا مكلفتي روحج تجين تشوفيها وهسة مسويتلج مناحة
- اجيت كم مرة وطردتوني لتگلبون الحجي كفاح
- باع منو اليحجي شدن بنت ام الملاهي وين ماخذتها ومنهزمة ليا چلب تردينه يلمج بحضنه عاد صيداتج انتِ تسوى مرة عقيد مرة مدير شركة منين توگعن على هالزلم
راحلها عمو كفخها على حلگها لصمها هي تخبلت عاط بيها خرسها :- حجاية ثانية أفصخ عظا
