رواية فصلية بديلة ( شموخ ) الجزء الثاني الفصل الثامن 8 بقلم ام ملكوت

كل شيئ اصبح باهتا امام ناظري انا لم اعد ارى تلك النجمة في السماء وعندما انظر لعيناه لا ارى شيء سوى الغموض ،

لم اعد اهتم ان كان قد نساني ام بقيت في اعماق قلبه انا ذالك المسافر الذي دخل القطار ،

للذهاب دون اياب تبا لقد اصبحت كالثلج باردة بلا احساس بسبب عثرات الحياة 🏞

-فتحت عيوني على صوت امي وخالتي ومرت عمي وهنه يسولفن عل بيت يردون يرجعون يبنونه ويخططن صايرات مهندسات يم راسي كمت واحس راسي شثكله ولازمتني الصخونه معقوله مرضه مرتضى صارت بيه مو بي شني ..

كمت طلعت بره وبوجهي للمطبخ لكيته نضيف وماعينه مغسوله خطيه البنات منضفات كل البيت وانه نايمه والله عيب .. لزمت بطني جوعانه ماخلاني اتزقم عدل بالغده مرتضى فتحت الثلاجه

وبقيت اباوع شنو بيهه لكيت جدر مركه وتمن  مالت الغده زايد عاد اخذتهن شميته مابيهن شي خليتهن عل طباخ وشغلت النار عليهن حضرتلي

صحون وخواشيك وفزيت على صوت خشن اجه من وراي التفتت وشفته ابن عمي شعلان دخل وكال وهو يفتح بالجدوره..

_المن هذا الاكل محميته

_الي جوعانه ماكلت زين بالغده تريد اصبلك

_اي والله ياريت صبيلنه ثنينه سوه خلي ناكل ماعرف اكل بحدي

_تمام..

اجه كعد عل ميز وطلع نقاله يكلب بي اجيت انه صبيت صحنين تمن وصحن سويت تشريب وكاسه مركه وطرشي وزلاطه وخليتهن عل ميز وكعدنه

ناكل انه وسراج وانه رغم بعيده عن بيت عمي شعلان وماشوفهم هواي بس تبقى الرابطه بيناتنه اخويه اولاد عمامي

معتبرينهم اخوان ومعتبرينه خوات بالنسبه الهم الا مرتضى اعتبره ابن خالتي مو ابن عمي حتى احبه براحتي .. كاعد ناكل وسراج يوريني فيديوات

بالتيك توك ويخليني اضحك وماحس الا حط مرتضى فوك راسنه مثل الغراب تحمحم واجه جر الكرسي وهو يباوعلي بخزره وكال..

_الله بالخير عمي جا هلبت تعزموني وياكم 

_هلا ابو علي تفضل مد ايدك خويه لا تستحي

_لا عليمن استحي قابل منك ابو الوصخ

_افا عليك مو البنيه كاعده وبعدين يمته شفتني وصخ ليش تشوه صورتي كدامهه

_واذا شوهت صورتك بيش تهمك مثلا 

_لا بس ماريدهه تكول ابن عمي وصخ وينكطع نصيبنه

_شقصدك ولك شدخل النصيب بينك وبين جنان خيرك

_على كيفك وشحجيت هسه انه وشنو يعني واذا حبيت يكون بينه نصيب انت شكو 

_شنو انت شكو احجي عدل لك لا ارجع اربيك واعلمك الادب من جديد

_دروح بابا يربيني هوه شايف روحه درس بالخارج صار مربي ماجنه بكلمه وحده يضم راسه 

_انه الاضم راسي ولك دتعال اليوم اوريك منو الينضم...

كاموا ثنينهم واحد لزم بياخه الثاني وانه كلبي طاح بالكاع افتريت من يمهم وحاولت ادخل بيناتهم عثرت ولزك ضهري بحضن سراج لو مرتضى تخبل لزمني من زندي وعتني عت عليه وعاط بيه..

_لج خرب شكلج شدخلج بين الزلم امشي روحي منا

_احترم نفسك وعدل اسلوبك وكافي مو مزعطه انتو وجايين تتعاركون كبالي

_امشي روحي منا لا اجرم بيج جناان

من غير شي التمو على صوته وكلامه وياي نوب زودهه سراج من دفعه عني ولزم ايدي خلاني وره ضهره فعلا بساعتهه شفت جانب من مرتضى اتمنى

بعمري ماشوفه بعد .. شافه سوه هيج وهو نطت عيونه من مكانهن واجه لزم سراج من ياخته وضربه كلتين طبك بخشمه حتى طفر دم على

وجهي وانه تهسترت بقيت اصرخ وابجي واجن النسوان تفاككهم تالي اجو ابوي وعمامي يردون يفكونه مايكدرون لازك بي لزك وطايح بي بوكسات وانه اصرخ واروح وارجع عليه..

_كااافي مرتضضى راحح تموتتتته كااافي لخاطرييي كافييي شسوي بروحيي انه شسوييي اموت تريد اذبح روحي حتى تعوفه تريد اكتل روحي وادك والطم ..

بقيت ادك على وجهي واحجي هو شافني هيج تركه واجه لزم اديه وبقه يهديني وانه دخلت بحاله استمراريه ابجي واشهك ومغمضه عيوني من هول

الشفته كلشي ولا احد يتعارك كبالي احس بروحي انه الكاعد انكتل مو همه اجه بابا اخذني منه ضم راسي بصدره وطلعني بالحديقه وداني للمغسله غسل وجهي وهو يحجي وياي..

_كافي بابا جنان اهدي ماكو شي باوعيلي بابا ماكو شي خلاص سكتو محد راح يتعارك بعد اهدي اخذي نفس فدوا اروحلج لا تطيحين علي تنفسي بابا..

وهو يحجي اجت امي تركض علينه واخذتني لحضنهه وبقت تمسد على ضهري وتهدي بيه هاي ثاني مره تصير بيه هاي الحاله اول مره قبل سنتين

بالجامعه لمن تعاركوا ولد بقسمنه نفس هل عركه وهسه مره ثانيه ومادري من يمته بيه هاي السالفه ومنين طلعتلي.. واخيرا من بعد دقايق بحضن امي

وكلام بابا كدرت اهده واجر نفس طبيعي ونبضات كلبي استقرت شربتني ماي وكعد بابا كبالي لزم وجهي ضل يمسح بدموعي وكال..

_احجيلي بابا شصار ليش تعاركو وصارت مذابح بين ولد عمج

_ماعرف بابا جنه كاعدين ناكل انه وسراج واجه مرتضى معصب كعد وبقو يتشاقون تالي حجايه منا وحجايه منا تكامشو وانه لان دخلت بيناتهم

افارقهم لزمني مرتضى وبقه يصيح علي وسراج لمن سحبني من ايدي من مرتضى علكت بيناتهم وانتو اجيتو تالي 

_هفف وانتي ليش تدخلين بيناتهم لو طاكينج بدون مايدرون هسه 

_ماجانو يتعاكون هيج بس واكفين يحجون وردت ابعدهم حتى لحد يضرب الثاني 

_يله ماصار شي انشاءلله همه كلهم هيج الولد يتعاركون تالي يرجعون يتصالحون لا تهتمين مابيهم شي ومايتعاكون بعد

_تمام 

_يله كومي خلي ندخل جوه بارده هنا لا تتمرضين

_حاضر 

كومتني امي من الكاع نكتت ملابسي ودخلنه جوه من باب الصاله لكيتهم كلهم كاعدين ويحجون عمامي وولدهم والنسوان ماموجوده هنا اخذتني امي للمطبخ يمهن وابوي بقه يم عمامي بالصاله لاكتني شموخ واجت لزمت وجهي وكالت..

_ها جنانه شلون صرتي هديتي هسه

_اي هديت ماكو شي

_تعالي للغرفه تمددي شويه ارتاحي اذا تبقين هنا راح يصير سين وجيم ويوجعن راسج

_اي خيه اخذيني منا 

_تعالي عمري تعالي

لزمتني من كتفي واخذتني لغرفه محسن اجت جمانه طلعتلي دهداشه من عدهه لبستهه لان ملابسي تبللت من غسلولي وجهي .. تمددت عل جربايه وقربت الصوبه مني حتى ادفه بقينه

كاعدين وصافنين بالفراغ ونسمع بس حجي الزلم بالصاله وواحد يرفع واحد يكبس بس مالمحت مرتضى بيناتهم من دخلت ولا سراج وين راحوا باوعت لشموخ وسالتهه عنه وكالت..

_وره ماتخربطتي اخذهم عمو باقر للصاله راد يسالهم شصار مرتضى كله ماصار شي ومشكله صغيره وطلع من البيت وراه بشويه طلع سراج ليش ماشفتيهم من طلعوا

_لا ماشفتهم اصلا مافتحت عيوني حتى اشوف

_اي خيه انه ادري الصوج بمرتضى مايكعد ويسكت روحه بخشمه واقل حجايه تنرفزه

_لا الصوج منهم ثنينهم وتكدرين تكولين ان صارت بسببي

_شلون يعني

_سراج زودهه بالشقه وكله اذا صار بيني وبين جنان نصيب انت شكو وشدخلك وهذاك كب بوجهه بس الصوج من سراج هوه استفز مرتضى وخلاه يمد ايده عليه

_الغيره عذروب خلي محلى عذروبه

_ههههه 

_يعني هاي الهوسه كلهه بس لان كله هل كلمتين هاي شحال لو متقدملج شحال لو خاطبج يمكن يكوم الدنيا مايكعدهه

_هيج رايج يسوي 

_ماستبعدهه منه اذا فعلا هل عركه الصارت من وراج

_جا ياريت الشيطان يلعب براس سراج ويتقدملي

_لا يمعوده فال الله ولا فالج غير تصير قيامه وشغله عناد وهذا يكول انهي عليهه وذاك يكون انهي عليهه وتاليتج لا لهذا ولا لذاك 

_ليش عيني اكابلهم واكلهم ماريد سراج شني غصب هوه

_اي يكلولج عادي ماتردين سراج معناهه ماتاخذين مرتضى واذا اخذتي تصير مشكله وتفرقه بين الإخوان وكلمن يروح بطريقه تقبلينهه

_عود صدك هيج يسوون

_جا شعبالج "والله اوكف واكلهم ماريد سراج الشغله مو غصب" تهي بهي امداني 

_ههه وين ادري انه بسوالف عمامج المخابيل فال الله ولا فالي يارب مايسويهه سراج ويخطبني يارب

_اي هيج ادعي ولو الكاتبه ربج يصير غصب عني وعنج بس الدعاء يرد القضاء 

_اي والله خيه يمه بس مجرد كلام وتخيل وجعني كلبي شحال لو صارت صدك لا سمح الله 

_انتي بيج دوده براسج كاعد تعم عليج وماترتاح الا لمن تنكتلين

_هههه اي والله لا عاب حلكج

_هففف انشاءلله تمر على خير وماتصير طلابه جبيره

_انشاءلله 

_مدام الوضع هده تدني خلي انام يمج صايره بسرعه ارجف وانهبط من تصير هيج مواقف كبالي بس لا يطلع ابني جبان نوب اشبعه كتل غير 

_هههه لا شلون غير سبع هوه على خاله

_اويلي شلون خال الله يستر عليه

_لا تحجين على حبيبي ماسمحلج

_ياااع حبيبي نوب والله اذا حجيتي هيج كبالي بعد اخلي واطلع من يمج لو اطردج عايزه لعبان نفس انه 

_لا يله ماكول حبيبي بعد اكول ابو علي

_ياهو هذا نوب ابو علي بس لا الشيباني 

_ههههه عابتلج ولج اخوج مرتضى هذا يصيحوله ابو علي 

_هاي شنو طلع عنده ولد بالخارج وانه مادري اليوم اهد عليه وين ابن اخوي اكله

_ولج دتعاي صايره خفه انتي وتحششين من حبلتي لهسه راح يطكن فيوزاتج منا لتجيبين 

_اي والله خيه مدري شمالني هو انه الفرح مايلوكلي يسويني تافهه وخفيفه

_دومج فاهيه اقصد دومج فرحانه يارب

_ام حلك تدني يله خلي انام انكسر ضهري

_اسم الله عليج 

سحبت المخده من الجربايه وخليتهه بصفي تمددت وبقت صافنه بالسكف لحضات وغفت وانه بقيت اتذكر الصار اليوم بيني وبين مرتضى وكلما اتذكر

خزرته وعياطه بوجهي مساع ينكسر خاطري وتدمع عيوني كلبت على صفحتي ولزمت زندي متوجعه شاغت روحي وكعدت نزلت طرف الدهداشه من كتفي وشفت شلون صاير مكان

اصابيعه زرك جا شكد جنت خايفه وشكد جان عصبي حتى لهل درجه ماحسيت بالوجع ..

تنهدت بحيره ورجعت تمددت ردت انام وضلت تتكلب شموخ واستغربت من سمعتهه تكول..

_لا جيبه راهب لا تضوجني

بقيت مفهيه منو هذا راهب وشلون كاعد تحجي وهيه نايمه من يمته هاي العاده بيهه كلت من تكعد بله اسالهه واخذ افادتهه منو هذا راهب وشلون تعرفه حتى ماخذه ميانه وياه بالحلم .. 

دخلت جمانه وامي وخالتي للغرفه اشرتلهن على شموخ نايمه حتى لا يسون صوت واجن نامن عل جربايه كلاثتهن وبقن يسولفن بهمس وانه طار النوم من عيني

بقيت اتكلب وضايجه من دوختهن ماكدر اطلع واشوف احد ويسالني عن العركه بقيت بمكاني منا لمرت ساعتين صار العصر وكلهه كعدت وشموخ همين كمنه طلعنه بره كلنه سويه غسلنه وجوهتنه

وكعدنه بالصاله ويه عمامي وولدهم ناكل جاي وكعك وفواكه ولاحضت ان سراج ومرتضى ماموجودين لهسه عبالك انقرضوا المهم يولون شلي غرض بيهم تحمحمت و التفتت على شموخ وسالتهه بهمس...

.

.

:- تعبت حيل من الصار اليوم والفره وكعده الفطاير كسرتلي ضهري من غير الهبطه الاخذتهه بسبب مرتضى وسراج وانه اشوفهم مدمايين كبالي ومكسره خشومتهم بقيت يم جنان شويه تالي نمت يمهه وغفيت بسرعه ذبيت روحي للنوم هلكانه كلهه

فتره وشفت منام حلو وغريب ومن بعد سنتين مرت من اخر مره شفت بيهه راهب بحلمي رجعت اليوم شفته حسيته وكان حقيقه تمنيت هل حلم مايخلص من حلاوته..

شفت وكاني بمزرعه ماعرف بستان اخضر وبي ورود ملونه باحمر ووردي واشجار عاليه حيل والعالي الله تكسر ركبه اليباوع لقمتهه جهال وعوائل تلعب من بعيد بس صورتهم مغوشه مشيت

بحدي خطوتين وانشمرت علي طوبه صغيره بيضه لزمتهه ورفعت راسي شفته راهب اشر علي ارجعله الطوبه وكتله مارجعهه ركضت كم خطوه وانكسر كعب حذائي الجنت الاسود الجنت لابسته اجه علي جدو محمود الله يرحمه وكأنه بعده شاب بمتوسط عمره

وبيده حذاء ابيض وبي رسمات مزخرفه باخضر كلش يجنن بعمري ماشفت هيج حذاء مثله .. اجه جدي كرفص كبالي واخذ رجلي نزعني الحذاء الاسود المكسور واشوف رجلي متاذيه منه وانه مادري ..

نكتهن من التراب ولبسني اول تك وثاني تكه اجه راهب اخذهه وركض بيهه وانه كمت اركض وراه بتك رجل واصيح عليه يجيبه وهو يضحك لحدما تعبت وكعدت ضايجه 

وهو من ذاته اجه كرفص كبالي راد يلبسنياهه وسمعت صوت طفل .. فزيت من الحلم على اثر صوت ابن محسن بس سرعان مارجعت تعمقت بنومي ومارجع بعد الحلم ..

فزيت بعدهه بفتره وشفتهه الساعه ب٥ العصر وجنان وخالتي وامي وجمانه كاعدات يمي يسولفن كمت فركت وجهي اصحصح تالي كمنه طلعنه كلنه بره غسلت ورجع الحلم لذاكرتي صفنت افكر بي

واتسائل شجابه لحلمي بعد هل سنتين وشنو معنى هل حلم معقوله صاير وياه شي .. تنهدت ونفضت افكاري اخذنه الكعك وصينيه الجاي وطلعنه للصاله يم عمامي كعدنه ناكل ونسولف شويه وسالتني جنان وصدمتني من كالت..

_اكول شموخ منو هذا راهب

_منو راهب شمعرفج بي

_عرفته بس كليلي منو هوه

_شلون عرفتي وليش كاعد تساليني عنه

_افف ام عقلين سمعتج تحجين بنومج وتكولين راهيييب جيببه لا تضوجنييي

_هههه ماحجي هيج بمياعه انه تره وبعدين صدك تحجين انه حجيت بنومي

_لا بالجاي مو بنومي يعني منين اعرف راهب لوماحجيتي بنومج

_وين ادري شجابه الحلمي ياخيه واصلا ولا بالي هوه

_اي منو هوه غير نعرف

_ابن خاله وفاء البقيت عدهه يوم ضعت بالانفجار

_هاااا شعدج وياه ولج حتى اجه لحلمج

_ماعدي شي وياه ولد ماخذ دربه وجايب دربه اصلا قله حاجيه وياه طول ضلتي عدهم وحتى من رجعت لا فكرت بي ولا خطر ببالي اصلا

_همم عجيب بله تعاي احجيلي الحلم وخلي نفسره باليوتيوب 

_ماينفهم اتذكر بس شمر علي طوبه بيضه لعبنه بيهه وبس

_وبعد

_تالي اخذتهه وشردت وبس

_همم جا ليش كتيله جيبه راهب 

_اي هيه يجوز عل طوبه كتله جيبهه 

_ اوك بله خل نشوف شنو تفسيره 

_ما أأمن بتفسير احلام هذولي العلماء حسب معرفتي ان الطوبه هو حدث بالحياة او شي نمتلكه وواحد كاعد ينطي للثاني نلعب يعني يجوز اغثاث احلام مو شي مهم لا تخلين بالج ويا

_ميخالف احب تفسير الاحلام بس خلي نشوف الشاب شنو بالحلم والطوبه شنو 

_تمام شوفي وانطيني كعكاتج خل اكلهن على ماتكملين 

_هههه اخذيهن عوافي بطنج وبطن ابنج

_غصبا عليج غير خالته انتي 

_يمه اروحله فدوا كتكوتنه يمته يجي

_شنو كتكوتنه عوزهه ويطلع مايع اشك هدومي

_هههه شجاج عل ولد هسه انتي

_شو من يمج تقررين ولد لو بنيه

_احس بيج ولد

_وامي تكلي بنيه من نساوتي هسه منو اصدك 

_هههه لا صدكي ام الخبره جا انه شنو وتصدكيني 

_بالحالتين انه اريده يطلع شجاع وكلبه قوي مو ضعيف مثلج يركض وره الحب والغرام 

_ايا شلبه ليش تجرحين مشاعري

_اويلي شلون مشاعر عاد هيه

_هههه..

ضحكت على سوالفهه والتفتت شفت مرتضى كبالي يباوعلي بخزره يمته اجه هذا يمته دخل وكعد كبالنه تحمحمت ونزلت عيني عنه بقيت اكلب

بنقالي حتى تفسير الاحلام بطلت بعد مافسر دخلت على لعبه كلاش وبقيت العب دخل سراج ورفعت راسي باوعتله وابتسم اجه وكف فوك راسي وكال وهو يباوع لنقالي..

_عندج كلاش ولج

_اي نزلتهه العب بيهه بوقت فراغي

_شنو اسم حسابج وشكد بي

_اسمه الازل ومابي هواي لان مالعبهه كل يوم

_تعاي خلي نلعب سويه وانطيج حصه من حسابي

_لا ماريد تولي انه مالعبهه هواي وحرامات مستواك يضعف 

_لا مالج شغل ..

طلع نقاله وباوع لمرتضى بنص عين يلي كاعد وطالع بركان احمر من عيونه واذانه ومن جهه بابا يباوعلهم يراقب حركاتهم اجه كعد كبالي مسافه مو بعيده ودزلي طلب باللعبه رفعت راسي متردده باوعت لمرتضى واشوفه شاد قبضه ايده

ويباوعلي ماحس الا سحب باكيت محسن وطلع جكاره خلاهه بحلكه وشغلهه وبقه يطحن بروحه نزلت راسي والتهيت العب وشموخ همست يم اذني..

_ابتسمي وضحكي ويه سراج لا تبينيله انج هامه بي ومعتبرته موجود..

ابتسمت على كلامهه لااراديا وفزيت من ركع الجداحه عل باكيت بعصبيه كال عمي باقر لابنه يروح يجيب الدومنه وكام جابهه وكعدوا كلهم

سويه وبقوا يلعبون دومنه وانه ومرتضى سراج ماخذيلنه صفحه شويه وقرب وجهه سراج علي وفزيت مبتعده هو ابتسم وكال..

_ههه شبيج فزيتي ردت اشاورج خاف ماتسمعين من الهوسه

رجعت قربت اذني وعيني على مرتضى الركع الصاي وراد يكسره همس سراج باذني وكال..

_اريد اطلب ايدج من عمي تقبلين لو لا

فتحت عيوني بصدمه وباوعتله صار وجهه مقابيل وجهي وهزيت براسي وايدي وكتله بتوتر..

_لا لا فدوا لا تسويهه لا تحجي لاهلك عني وتطلبني ماريد اتزوج انه وماريد ادخل بين الاخوه واخربهم 

_بالعكس راح تقوى علاقتهم اكثر لو تزوجنه وصدكيني اعيشج ملكه رغم بعدني توه متخرج بس انشاءلله الكالي وضيفه اكدر اعيشج بيهه

_لا سراج فدوا اذا تعزني وتعتبرني بنت عمك لا تسويهه وتتقدملي كتلك ماريد اتزوج انه وابد لا تحجي بهيج مواضيع وياي بعد انسه هل فكره وطلعهه من راسك

_مو بكيفك ياحلو راح احجي ويه عمي وانهي عليج

باوعتله بصدمه للحضه حسيت وكأن الدعوه الدعيتهه مساع استجابت نزلت دمعه حاره من خدي وراحت عيني على مرتضى يلي صفن بيه

وعكد حواجبه مستغرب رجعت عيني على سراج وانعقد لساني ماكدرت احجي شي كدام الموجودين ماكدرت غير ان انطق كلمتين ..

_تعال وراي 

كمت مخنوكه من المكان وشموخ بقت عينهه علي لانهه سمعت كلشي دار بيناتنه طلعت وصعدت بسرعه فوك السطح ولمحته لسراج اجه وراي فتحت باب البيتونه وطلعت بقيت افتر وافرك باديه بتوتر

وخوف ومحتاره شلون اقنعه واخلي ينسه هل فكره اخاف يسويهه شغله عناد ويتقدملي صدك ويصير الكالت عليه شموخ تالي .. اجالي صوته من وراي والتفتت عليه اجه وكف كبالي وكتله..

_سراج فدوا تحجي صدك انت لو تشاقه مساع 

_لا احجي صدك بس ليش خايفه هيج وترجفين ومن شنو خايفه

_ليش تريد تتقدملي ليش انه بالذات من دون بنات عمي الاصغر مني واحلى

_بعد شفتج خوش بنيه ومؤدبه وبت عمي وين اكو احسن من هيج وثانيا ياهي هاي الاحلى منج غير انتي شمعتهن

_بس انه مو هيج لا حلوه و لا مؤدبه انه ولا احسن من غيري وصدكني مالوكلك ولا ارهم وياك وانه اصلا شايله فكره الزواج من بالي ماريد اتزوج هسه

_اي عادي انتظرج هم انتي تستعدين وهم انه اتوظف واشوفلي شغله

_استغفرالله ربي اسمعني وافهمني سراج انه ماريد اتزوج لا انت ولا غيرك اريد اتفرغ لدراستي ومستقبلي والزواج اخر همي ومستحيل اتزوج شخص من اولاد عمامي لان اعتبركم كلكم اخواني ومامفكره يصير نصيب بيني وبين اي شخص بيكم

_ومرتضى 

_شدخل مرتضى

_شنو شدخله مو من اولاد عمامج يعني هوه

_مرتضى همين وياكم اعتبره اخ وصديق طفوله لا اكثر ولا اقل وماراح اقبل بي حتى لو هو تقدملي وتوسل 

_متاكده

_اي متاكده فرجاءا انسى هاي الفكره وشيلهه من راسك لاني معتبرتك اخ واريد تعتبرني اخت كذلك وماتشوفني بغير نظره وتحرمني من اللمه وياكم بعد

_لا خلاص هو انه هيج معتبرج اصلا بس اخت وبنت عم وحتى كلامي هسه وياج جان حتى اشوف موقفج اتجاه الزواج مو اكثر اعتبري ماصار كل هل نقاش بيناتنه وانسي وانه راح انسى الدار اليوم

_احلف براس ابوك وامك ماتفتح هل موضوع ويه اهلك او تفكر بي حتى

_وراسهم بعد لا افتح هل موضوع وياج ولا ويه اهلي وما افكر بي حتى بعد امري

_ مايامر عليك ظالم شكرا الك

_لا على شنو الشكر ولو حسستيني بنقص بس ميخالف اذا ماقبلتي بواحد من ولد عمامج معناهه مابيه عيب ونقص وانما هذا قرارج وبس فما راح اضوج بالنهايه

_لا صدكني هذا قراري وانت خوش ولد وماناقصك شي بس كتلك انه معتبرتكم خواني الربيت وياهم ولا ممكن اتعدى حدود هل مسمى

_همم تمام نشوف

_اي

_يله خلي ننزل لا يفتقدون وجودنه 

_تمام يله..

نزل هو وبقيت انه فوك السطح افتر مدري منين طلعتلي هل سالفه هاي ماستبعد من سراج بالمستقبل اذا تقدملي مرتضى او سمع بيه احبه حتى ان يقيم القيامه ويحاول يسوي مشاكل

وينهي علي او يكابلني ويكلي وين كلامج ان ماتقبلين باولاد عمامج .. نفخت بحيره ونزلت جوه لاكتني شموخ لزمتني من ايدي وكالت..

_وينج ولج شكو اخذتي ورحتي فوك

_شكو بعد صخمت حجيت وياه وكدرت اخذ منه وعد ان مايجيب سيره الزواج مني ولا يفكر بيهه حتى

_شكو بعد صخمت حجيت وياه وكدرت اخذ منه وعد ان مايجيب سيره الزواج مني ولا يفكر بيهه حتى

_متاكده ماراح يغدر بيج ويحجي 

_اي بعد حلف براس اهله هوه والله بعد

_تمام هاذهو تدرين وكف كلبي الا شوي من جاب سيره الزواج كلت لهل درجه جنان علويه ودعوتهه تستجاب بهل سرعه لو هيه فكر ماتصير وياهه الا السالفه الناقصه ههه

_عهه اي والله ياوالحظ 

_يله همزين خلصنه منه من دون مشاكل

_اي والله الحمدلله

دخلنه للمطبخ اخذنه صلاحيه ماي ورحنه للصاله مالكيت مرتضى موجود استغربت وسالت شموخ عليه وكالت ماعرف لان طلعت وراي لغرفه جمانه

هزيت راسي بحيره ومر الوقت اذن المغرب صلينه وسوينه عشه كعدنه كلنه سويه ومرتضى ماكو افتقدته خالتي سماء واتصلت عليه ورد عليهه وره دقايق واجه صوته يحجي بغصه وتعب..

_الو ها يمه 

_ها وليدي وين انت حبيبي ادخل تعشه

_رجعت للبيت انه راح ابقى يم سلام ادرسه 

_ياا جا ليش ماحجيت ماكلت وانه اكول وليدي وين راح

_بعد خابر سلام وكالي اجي ادرسه طلعت مستعجل نسيت انطيكم خبر المهم لا تخافين كاعدين بالبيت ماعلينه شي

_وعشاكم يمه شراح تاكلون 

_ناكل الموجود يمه واصلا ماجوعانين

_تمام يمه احنه راح نرجع اليوم جا و اجيبلكم وياي عشه 

_لا ليش لا تجون ابقوا هناك يم عمامي وباجر رجعوا على راحتكم واذا عل عشه هسه اخذ سلام ونتعشه بره طمني بالج

_هاا خوش جا ديرو بالكم على نفسكم وليدي لا تسهرون بره لوقت متاخر ونامو من وكت

_حاضر يمه يله خلي اكمل دراسه لسلام وانتي روحي كملي عشاج 

_تمام روح يمه مع السلامه

_الله وياج ..

سد الاتصال وبلعت ريجي بصعوبه ماردته يروح بعدهه ماشبعت عيني شوف منه شلون بيه يعني ماراح اشوفه بعد جم يوم يرجع يسافر ولو احصل

فرصه واروح اشوفه لو ماحصل .. اختنكت كلش وكمت من الاكل جيه الكشره هاي لا تهنيت بغدا ولا عشه ولا بكعده وضحكه طلعهه من خشمي استاذ

مرتضى خلي يرتاح .. كعدت بالمطبخ واجت شموخ لزمتني من ايدي وسحبتني مشتني وراهه بعصبيه كعدتني بمكاني عل سفره وهمست من بين سنونهه...

_اكعدي اكلي كافي فوك ما كلبج ضعيف تردين تضعفين جسمج هم من وراه شوفي وجهج شصاير بي من التعب والسهر والتفكير راح تصيرين جلده وعظم وهو متونس ومرتاح وشماجايه يضخم ويحلى انتي عجزتي وهو توه صار شاب 

_هفف مو بيدي

_اذا مو بيدج عيشي برجلج اهم شي ماتموتين روحج صدكيني تره الزلمه مايحب المره الضعيفه وماعدهه شخصيه وقوه حضور خليج واثقه من

نفسج وحبيهه حتى هو هم يحبج وينجذب الج اذا شافج هيج ضعيفه تره ينفر منج وباجر بس تجي وحده تلعلع كباله يتسرسح 

_ههه 

_ اويلي تضحك بعد

_جا شسوي الطم اشو عوفيني خلي اكل لابوج لابو اخوج وياج تعبتوني

_اكلي يله علفي من عابت لهيج كلوب ميته

_عابت كلبج الجامد

_جامد ولا ذبلان ويسرسح بروحه

_يله اكلي شكد تحجين هاي كلهه تاثير الحمل شطلعت هاي يمته تجيبين وتثكلين

_اثكل على كلبج كولي امين

_امين يارب

_ههه يله اكلي ام حلك

_اكلت..

.

.

:- كملنه اكل وكمنه رجعنه الماعين للمطبخ خليت البنات يغسلن بالماعين ورحت لغرفه جمانه تمددت حسيت ضهري انخسف فرد مره بعد ماكدر اتحرك اجتني جمانه وكالت..

_ها #شموخنه 💚💞سلامتج 

_ضهري موتني من الفره شلون بيه

_اي عادي بعدج وبعد هاي عود بعده بكد التفاحايه وهيج لو يصير بكبر البطيخه شتسوين 

_اي طبعا هسه انتي طفل وشيلي على بطنج شيصير بيج حتى رجليج تورم تالي ماتكدرين تمشين

_كل هذا

_ويجيج التشاليع يبووو الله لا يشوفهن لاحد يشلعن رحمج من ضهرج

_وماتصيرلهن مسكن شي

_لا بس المحضوضه يصير عدهه خفيف يعني الضهرهه قوي ماتحس بوجع هواي وبسرعه تزرك الطفل ماينشلع كلبهه 

_كالت الدكتوره ضهرج قوي يعني ماتجيلي تشاليع هواي

_اي انشاءلله بس اهم شي باخر ٣ اشهر ماتسوين شي ولا تفترين ولا تشتغلين هواي اذا تردين ماتعسرين لعبي رياضه مال حوامل لو يوغا ويطلع

ابنج مثل الماي منج لا وجع ولا شي انه بزيودي جنت صغيره وضهري ضعيف وافتر نهاركله بالبيت اشتغل وشلع العصعص ياله طلع بس بابني الثاني

حسن لا مو رحمي جبير من الحباله الاولى ومنا تزوج حماي صارت تعايني وماتخليني اشيل سلعه فرتاحيت كلش وبس العب رياضه واول مادخلت

شهري حصرتني طلكه رحت للمستشفى زرقولي ابره بالمغذي نص ساعه جبت لا تعب ولا وجع ولا مشقه 

_اي الحمدلله انشاءلله انه اسوي نفسج اذا تفيد هل طريقه 

_اي وانتي سباعيه ماينخاف عليج انه جنت جبانه ومن ضربه الابره ابجي انتي كلبج قوي ماشاءالله تحملين الوجع 

_هههه انشاءلله جا هو الولد شحلاته شوفي شلون نايم بعد امه وحيلهه جنه العافيه كون يصير عندج هيج وليد نفس حسوني

_ههه انشاءلله ولد بنيه كلشي الجان اهم شي صحته وسلامته 

_اي والله نامي هنا انتي اليوم تره بره صار مطبك لحم وحده بضهر الثانيه لا يطكنج على بطنج ومايدرن 

_لا اشوفلي مكان على كتر وانام زحمه ابقى هنا خاف يجي محسن يريد يرتاح ينام

_لا وين غير فرشنالهم بالديوانيه كلهم وناموا تره بس احنه بقينه كاعدين همه شربوا جايهم وناموا توه رحت اجيب الشاحن لكيتهم يشوخرون

_ههه تعبانين خطيه اليكول طابخين ومنضفين ومسوين

_هههه اي والله ماجنهم كضو اليوم اكل ونوم 

_بطرانين الزلم

_خيه الزلم بسرعه تتعب مو نفس النسوان المره اذا تعبت تتحمل تضل جم ساعه بدون نوم وراحه اما الزلمه بس يتعب لازم تنطينه مخده وينام واذا ضل جم ساعه تلكينه نايم بباب الحمام

_هههههه خرب شكلج على هل تشبيه

_ههههه وعلي كارثه دجاج الماي مو زلم 

_ههههه يابويه بطني ماتحمل وعلي جنت تعبانه ومالي خلك وضحكتيني 

_دومهه الضحكه يارب بس ديري بالج لا يزرك ابنج نوب نفس هاي العطست وطلع ابنهه طاير ولزك بكصه ابوه 

_ههههههه خرب والله قديم هو هذا الفيديو شفته وانه صغيره وكلما اتذكره لو احد يحجي بي اخرب ضحك 

_هههه حتى انه والله عليهم سوالف السودانين هواي اشوف مقاطع الهم بنقالي هسه تفتحينه تلكينه كله سودانيين ومقاطع مضحكه تلكيني

نهاركله مكابلتهم واضحك حتى محسن كال هسه تحبلين ويطلع ابني اسود منغل كتله يا خاله فلشك منين يجي اسود جان يكلي من هذول الكاعد تتابعينهم 

_ههههه يله بله من كل عقله يحجي هذا

_لا يحشش مرات هوه هم ينام بصفي ويضل نباوع سوه ونضحك 

_اي مو هل اكول وين اكو هيج تروح تنكلب جينات الطفل بس لان امه تباوع لسودانيين لو صينيين

_والله مادري خيه بس هواي ناس تكول هيج اذا ضليتي تباوعين على صوره شخص من تحبلين لحدما تجيبين يطلع شبه الصوره التباوعيلهه

_هاي شنو والله خوش راح اخلي صوره جاكي شان بلكي ابني يطلع يشبهه

_ههههه يله بله مالكيتي غير الصيني مدري الكوري هذا علمود يوهكون بابنج الصيني والصيني لحدما يسوون بي عقده

_يا شحدهم غير اطر مكفاه اليحاجي كلمه اي ابن شموخ هذا ابن شيوخ مو هين 

_هههه والله على شخصيتج هاي فعلا ابنج راح يطلع مستمد الشجاعه منج ومحد كده

_يكولون قوه الام تنتقل للطفل وهو ببطنهه اذا صدك هل حجي منا ورايح اكوم واكعد العب حديد حتى يطلع قوي وعنده عضلات فرد مره شرايج

_هههه اكعدي وسكتي خيبه لا تسوينهه جذب هل حجي الطفل بذره شما تسقينهه تنبت من هو بطنج لحدما تجيبينه ويكبر ويشيب ان تخلخل

الضعف والحزن بكلبج يطلع ضعيف وكئيب وان تخلخلت القوه بداخلج يطلع قوي وان تخلخلت الخباثه وباقي الاشياء السيئه يطلع خبيث تصوري

يعني اذا المره وهي حامل مدت ايدهه وباكت شغلات غيرهه وبقت كل فتره حملهه تسوي هيج معناهه الطفل راح يطلع حرامي 

_افاا 

_وداعتج وهذا الشي مجرب عد اقاربي

_يعني بالفطره يطلع حرامي مو الا شخص يعلمه

_اي بالفطره تشوفينه شكدوته وهو يجي ياخذ الشغله من ايدج ويوديهه لامه ويموت ومايرجعهه الج 

_زين اكو أطفال اشوفهم دائما وهمه صغار يطلبون من غيرهم وياخذون شغلات غيرهم خاوه وهمه صغار كلش يعني اكول مايفتهمون

_اي الام اذا عدهه نفس الطبع ياخذه الطفل بس اذا من اول مره منعته وضربته على ايده بعد مايعيدهه 

_زين عجيب شلون تنتقل الخباثه والشر من الام للطفل سبحان الله

_اكو هواي امهات خبيثات من يشوفون جهالهه يخبثون لو يسوون اشياء سيئه يعتبرن هل شي عادي وبالعكس يعتبرنه قوه شخصيه عند أطفالهن

مثلما موهمات نفسهن ان خباثتهن هيه قوه شخصيه وثقه فبهاي الحاله راح يسكتن عنهم واكو يشجعنهم على هل فعل وهيج تكبر بذره الخباثه بمساعده الاهل 

_واكو بعض الاهل تشوفينهم خبيثين بدون مايحسون على نفسهم بس اولادهم طيبين يخلونج تستغربين ان همه اهلهم 

_اي هذولي مثلا الام تدري بطبعهه خبيث وضايجه منه بس ماتكدر تغيره لان طبع بيهه من الصغر وماتريد اطفالهه يسوون مثلهه فمن تشوف الطفل

طلع منه تصرف او عاده سيئه منه راح تادبه وتحاسبه وتعلمه ان مايصير خبيث ولا شخص سيء وهيج يكبر الطفل ومزروعه بذره الخير بدال

بذره الشر بداخله ومرات عامل الاهل يلعب دور اليتربى ببيئه صحيه يطلع ابنهه صحي من الخباثه واذا بيئه العائله كره وحقد راح يطلع الطفل عليهم

_صدكتي ياخيه هيج همه البشر اثاريهم خوش معلومات همزين كتيلي بيهن حتى اعرف اربي طفلي صح واتجنب اهمال هل شغلات بتعليمه

_اي خيه الله ينبته نبات حسن وخير

_امين يارب 

_يله نامي خيه حتى يهدا وجع ضهرج

_اي يله هو اصلا بس التهيت بسوالفج راح الالم 

_عمري انشاءلله مابيج الا العافيه

_ربي يعافيج 

_يله تصبحين على خير حبيبتي

_اجمعين كلبي.

دارت من جهه الجربايه الثانيه وتمددت يمي ونامت شويه ودخلت جنان مكتئبه ذبت حجابهه واجت كعدت بصفي وسندت ضهرهه عل جربايه تنهدت وكالت..

_ #شموخ

_ها خيه

_اريد انام بحضن بابا شلون

_والله كلما اضوج واختنك انام بحضنه للصبح وهسه روحي محتاجه حضنه مخنوكه

_ومنين اجيبلج حضنه هسه خيه 

_هففف انطيني حضنج جا

_انه ابني مكفيني روحي لحضن امج 

_خبيثه 

_لا مو خبيثه يله تعاي لا يصير ابني خبيث نوب من وراج

_تدني شويه

_هفف منج ومن ضيمج

ابتعدت سويتلهه مكان واجت نامت بصفي حضنتني ونامت وحسيت زندي تبلل من دموعهه جريت حسره وبقيت امسد على راسهه لحدما ثكلت انفاسها ونامت بقيت جم ساعه اتكلب تالي انه هم نمت على اصوات الالعاب الناريه ...

ثاني يوم الصبح كعدنه تريكنه ولمينه جوالاتنه وطشينه كلمن لبيته احنه وبيت عمو ساجد رجعنه بالكيه الاجينه بيهه ذبينه بيت عمو بيتهم ورحنه

احنه لبيتنه وصلنه وفتحلنه الباب سلام دخلنه واشوف مرتضى كاعد بالحديقه ويدخن من الصباحيات.. شاف ابوي وذب جكارته يستحي يدخن كباله رغم هو مرات يدخن مو دائما ..

كام صبح علينه ودخلنه سويه للبيت كعدنه بالصاله شويه تالي رن نقال بابا باتصال ورد بقه يحجي وتغيرت ملامحه لعصبيه وبس اي واي مافهمنه شي منا لسد الاتصال تنهد وكال..

_القو القبض على اهل ثائر وعمامه وشكو واحد متورط بقضيه غير قانونيه

_اي الحمدلله ربي فكنه منهم 

_بس النذل ثائر شرد طلع مسافر للخارج وكاعد يدورون عليه

_منو كال طلع للخارج

_لاكين اسمه ضمن المسافرين لامريكا

_وهيج هو غبي يروح يسافر بجنسيته 

_هم فكرت بيهه بس يجوز يطلع فعلا غبي وماحسبلهه المهم بعدين هيه تبين انطوا خبر للسفاره ان هل شخص مطلوب قانونيا وبس يمر عليهم يسلمونه النه 

_تمام اذا هيج ويمته محكمتهم

_ماتضل هواي يومين هيج ويرفعون القضيه للمحكمه لان كل الادله عدهم يحتاجون فقط الاعتراف منهم وبضربتين يكتون الاخضر واليابس

_امه هم اخذوهه

_هيه اول وحده

_ليش

_غير المحاسب مالتهم هيه ولزموا عليهه فلاشين بتزوير السجلات العدهه

_يله بله طلعت صدك العائله الكريمه نصابين ومحتالين

_اي يابويه همزين الله نجاج منهم والا جا سحبوج وياهم لهل درب الاعوج

_الحمدلله يارب..

كمنه دخل كلمن بغرفته وانه رحت لغرفتي طلعتلي ملابس ودخلت للحمام قصص ماي هوبس سبحت ونشفت بدلت وطلعت مشطت شعري وتمددت عل جربايه اريح

ظهري وغفيتلي شويه فتره وفزيت على صوت الآذان لكيت نفسي على نفس وضعيتي نايمه رجليه نازلات من الجربايه ولا غطه ولا مخده ..

كمت ولزمتني رقبتي متشنجه ماكدر التفت طلعت بره وبوجهي للصاله لكيت بابا طالع شافتني امي وكالت..

_ها يمه شبيج 

_امي رقبتي تشنجت وين بابا يطكهه الي

_سوده علي يمه ابوج راح يرجع الكيه تعاي كعدي هسه يجي يسويهه الج

محمد : تعالي اسويهه انه 

_تعرف

_اي شسالفه شيرادلهه

_تمام بس مو تكطم رقبتي

_هههه مو رقبه عصفور هيه 

_هههه 

رحت كعدت كباله وهو كعد على ركباته وصار يدلك برقبتي ونازل على كتفي ويفر براسي لحدما رخت لزم وجهي بثنين اديه وطكهه بسرعه منا ومنا غمضت عيوني متوجعه وابتعد وهو يكول..

_هذا دواج ومن الله شفاج لا تنامين على مخده ناصيه بعد

_غفيت بدون مادري لا مخده ولا غطه هل تشنجت

_هسه بعدهه

_لا اكدر احرك راسي بس احس بالم بكتفي

_اي هسه يروح لا تهتميله

_تمام شكرا اخوي الكفو

_عفواا اخيتي

ابتسمت وكمت رحت توضيت وطلعت فرشت مصلايتي ووكفت يم امي وكلنه واكفين وصلينه سويه كملنه وكعدت قريت دعاء اليوم ورجعت

الكتاب لمكانه لفيت المصلايه رجعتهه لمكانهه ورحنه للمطبخ انه وامي نسوي غده وهيج مرت يومين وقرروا مرتضى ومحمد يرجعون رغم

تعودت عليهم بس ماحب ابين هل شي للمقابيل ودعناهم واخذهم بابا للمطار ورجع صار البيت وحشه ودعيت ربي يرجعهم سالمين ويلم شملنه مره ثانيه طول العمر يارب ..

وهيج تكون انطوت صفحتي ويه ثائر ونفقدت اخباره والعرفته ان مسافر وماطاحو بي لحد هسه دخل لامريكا واختفى تماما ماعرف غير جنسيته

ماعرف مات انقتل الله اعلم ماهمني وين يصير خلي يصير اهم شي ماشوفه بعد بحياتي ولا يتعرضلي .. رحت بعدها باسبوع للمحكمه خلعته

وانطيت سبب الخلع ان محتال ومطلوب قانونيا فما تعبوني بسرعه وقعوا على ورقه طلاقي منه بس يراد يوقع هوه وره ماولد ويلقون القبض عليه حتى تصير رسميه الشغله بعد .. امتحنت اخر امتحان جنت راسبه بي وبعدها كعدت

بالبيت تقريب ال٣ اشهر  و الحمدلله تممت الضهر السابع بس باذى وبده دوام المرحله الرابعه .. واستمرت الايام وانه احمد ربي واشكره بكل صلاة 

لان خلصني من ثائر وبهاي الدنيا ماهمني غير ان اهلي وبنيتي بامان يلي ماوسعتني الكاع من فرحتي لمن عرفت بيه بنيه وانه الجنت اتمنى عمري كله يصير عندي اخت هسه اجه من يعوضني ويملي علي وحدتي صح تعبني حملهه ومرت اخر شهرين من حملي مؤذيه بس كل هذا يهون لمن اسولف وياهه واحس بحركتهه بداخلي والالم  والتعب كله يخف لمن الازم فراشي واسوي يوغا الحوامل..

والتهيت بعدها اجهز بغرفتهه وملابسهه واي شغله اجيبهه الهه اضل مكابلتهه فرحانه واتخيل بنيتي بيهه رغم تعبي ووجع ضهري بسبب كعده الدراسه

الا ان كل الالم يروح لمن ادخل لغرفتهه عبالك داخله لعالمي الوردي انسى كل هم وتعب من ادخللهه .. حيل زاد الالم واضطريت اكمل بقيه

الشغلات بمساعده جنان هي تجيبهم وترتبهم حسب ما اوجهه انه صرت ماكدر اتحرك وامتحانات الشهر الاول بدت وصرت اكعد هواي بالقاعه

لان الامتحان يرادله تركيز وكعده عدله حتى اجيب الامتياز من اول شهر.. واخر امتحانين عندي واول مادخلت بالشهر الثامن زاد عندي المغص والتشاليع

ماخذت من الثامن غير ٥ ايام و حصرتني الطلكه وانه اطلع من القاعه الامتحانيهم مخلصه اخر امتحان الي لهل شهر .. وقتهه صارت ضجه علي وماعرفت وين اروح مالكيت نفسي الا

رايحه لغرفه الدكتورات واصرخ ابني راح ينزل وابني حتى من معرفتي انها بنيه بس لاطشه كلمه ابني بلساني اول ماحبلت لهسه.. خطيه وزميلاتي وياي

اخذني هنه والدكتوره بسيارتهه وطارت بيه للمستشفى وصلت وصعدوني للفحص واحس حيلي انهد لمن كالت الدكتوره..

_بيا شهر انتي ماما

_اول ٥ ايام من الثامن

_جؤ مايصير شمسويه بحالج عندج ولاده ومايصير يطلع هسه

_جا شلون دكتوره فدوا ماي الراس طكت بالجامعه واحسه راح يطلع

_مايصير ماما اليطلع بهيج شهر يكون ناقص لو كلبه لو رئته تطلع بيهه شي ولو يعيش لو يموت لا سمح الله 

_لا فدوا دكتوره ابني كلشي ولا يصير بي شي فدوا ساعديني

_خلاص راح اعلكلج مغذي حتى لا يلزم بضهرج واراقب وضعج 

_تمام دكتوره سوي التردي بس طلعيلي ابني بخير

_بيج ولد

_لا بنيه بس انه هيج لساني اخذ على كلمه ابني

_تمام جايبه جنسيتج شي 

_لا كلشي ماجايبه اااخ دكتوره دخيلج ابني راح يطلع

_لا مايطلع يتراوالج انتي اهدي واخذي نفس ولا تعصرين حتى يرد بمكانه

_ماكدر دكتوره وجع كاعد يدك بكلبي جيبولي امي اريد امي وياي خابروهه فدوا

_تحملي ماما هسه شويه وترتاحين بس خلي تره كل دقيقه هيه مفيده اله تكمل شي من جسمه فشما طولتي شما طلع باحسن حاله وبالنسبه لاهلج هسه اكول للاجه وياج يتصل عليهم

_تمام دكتوره انشاءلله 

_هسه رجعي راسج عل سديه ورخي جسمج هسه اروح اجيبلج الابره واجي

_تمام

راحت من يمي وانه رجعت راسي واحس جسمي كله يون علي لا اراديا لمن يجيلي الوجع تتقلص بطني وتدفع وحدهه بقيت اعاني وساده رجلي

بعد الابره مده تقريب الساعه امي وصلت بس ماخلوهه تدخل بقت تحجي وياي من وره الباب وانه بلعومي تجرح ماكدر حتى احجي كلهه لحضات اشبه بالموت علي حاوط جسمي

ماعرف روحي ماعرف وين الوجع بالضبط يمكن بكل انحاء جسمي بحيث جسمي كله تقلص ولا اراديا دفعت وحسيت شي طك جوه خليت ايدي

من الخرعه وجان الزم راس الطفله وهي مستمره تدفع بروحهه لبره ماجان بيدي غير ان الزمهه واسحبهه بنفسي ماهمني شي بوقتهه غير ان تطلع

وماتختنك ببطني وتشرب الدم لو تطيح بالكاع وتموت ماكدرت اصرخ احس انكتمت من لزمتهه وطلع صوتي وصرخت بجزع لمن سحبت بنيتي وطلعت بين اديه 

كلهه دم وتبجي بخنكه خليتهه على صدري والتمن الممرضات والدكتوره علي بقت ترزل بيه وتكلي ليش عصرت وانه متجاهلتهه اصلا ماسمعهه ولا

همني الهوسه الصارت فوك راسي ووضعي شردت بغير عالم انه وبنيتي خليتهه على صدري وكل هم بصدري طار حضنتهه بدمهه وكلشي بيهه وغمضت

عيوني حمدت ربي وشكرته واحس نفسي بحلم حلو لدرجه اني غمضت عيني نايمه ماعرف مغمى علي وماكعدت الا وانه بغرفه عاديه مخليني وامي

كاعده يمي تمسد على راسي وتقره قران حسيت وكأني جنت بحلم باوعت من حولي وايقنت اني بالمستشفى لزمت بطني رايحه رجعت عيني على امي وكتلهه..

_امي وين بنيتي وينهه جيبوهه الي اريد احضنهه ليش اخذوهه مني

_ اهدي يمه يبعد حيلي الحمدلله على سلامتج ولا تخافين بنيتج بيد امينه كالوا راح يسوولهه تحاليل واشعه ويرجعونهه للخدج لان مايصير تبقى يمج حبيبتي انتي 

_ليش يخلونهه بالخدج شفتهه انه مابيهه شي وتبجي وعين الله عليهه ليش اخذوهه هناك اخاف يبوكونهه امي خاف ثائر يجي ياخذهه فدوا جيبيهه الي 

_لا حبيبتي محد ياخذهه المستشفى امان وانشاءلله مابيهه شي بس راح يجيكون اعضائها اخاف لا سمح الله بيهن نقص

_لا يمه انشاءلله مابيهه شي بنيتي ربي فدوا اروحلك لا تفجعني بيهه ردلياهه سالمه دخيلك اجعلهه كامله والكمال لك وحدك يالله يارب اجعلهه سالمه وصحتهه زينه يارب

بقينه كاعدين انه وامي ندعي وهي تقره قران فوك راسي حسيت ريجي ناشف وخطيه راحت هيه جابتلي عصير وكيك وكعدت توكلني شويه واجت

الدكتوره فحصت ضغطي وسكري وكالت كلشي تمام سالتهه عن بنتي وكالت كاعد يفحصون بكلبهه لزمت كلبي بيدي وكلت من كلبي على كلبهه ومن

روحي على روحهه ومن عمري لعمرهه يارب .. مرت تقريب الساعه وكلش تعبت نفسيتي من التفكير والقلق اخيرا دخل بابا فزيت عليه لزمت ايده وهو باس راسي وباركلي وانه كتله..

_بابا فدوا بنيتي بس كون بيهه شي

_لا الحمدلله كامله والكمال لله بس رئتهه شوي تعبانه شكوا عدهه مشكله بالتنفس راح يخلونهه تحت المراقبه فد اسبوعين هيج تالي اذا ماصارت مضاعفات يطلعونهه تتجاوز الخطر يعني

_الحمدلله يارب الحمدلله والشكر بس بابا شلون اذا صارت عدهه مضاعفات لا سمح الله يعني شيصير

_بعد اذا صار عدهه مضاعفات معناهه رئتهه بعدهه ماكامله وظائفهه و يراد يخلونهه فد شهر على ماتكمل ياله يطلعونهه بس ماظن بيهه نقص لان ماطلع شي بالفحص بس للاحتياط يراقبونهه

_يعني بنتي ماراح يصير بيهه شي راح تبقى يمي يم امهه مو بابا 

_انشاءلله بنيتي مابيهه الا العافيه كلهه جم اسبوع وترجعلج بنيتج سالمه بحضنج

_انشاءلله بابا انشاءلله الحمدلله يارب ماطلع بيهه نقص الحمدلله 

_الحمدلله الا ماكلتي هسه على يا اسم راح تثبتين وتسمينهه بي يردون اسمهه بالبيان هسه ..

صفنت افكر بالاسماء يلي اقترحتهم العائله من "سلوى وبيان ونجمه وبيلين " بس جنت متردده وماكلش عاجبني هل اسماء تذكرت بنيتي لمن

طلعت من بطني شلون تبجي وخدودهه حمر فجاتا تراودلي ذكرى قديمه لمن اسراء بنت خاله وفاء تغزلت بخدودي وكالت جنهن ريانات يعني

الخدود المليانه واسم ريان اله معنى مميز ثاني وهو اكثر شي يوصف حالتي بعد ماولدتهه ولميتهه بحضني وهو انه اسم باب من ابواب الجنه يلي يدخل منه الصائمون .. اخذت نفس وكتله على اسم ريان وعجبهم وكبل بابا عرفه وكال ..

_كلش حلو هذا الاسم باب من ابواب الجنه 

_اي بابا ريان صارتلي باب ادخل من خلاله لجنه ايامي وحياتي عل ارض هيه الباب يلي راح يحجب عني النار وتكون الي الجنه بحياتي

_انشاءلله يبعد ابوج ربي يتمم الج على خير ويرد بنيتج جنتج لحضنج سالمه معافايه يارب

_الله يسمع منك بابا 

_يله رايح انه اسويلهه البيان وانتي ارتاحي لان فد شويه ويدزون عليج ترحين يمهه 

_انشاءلله بابا حبيبي

ابتسم ومسد على راسي وصه امي علي وطلع رجعت تمددت انه واحس جسمي كله ياذيني بقت امي تدلك بضهري ورجليه لحدما رجعت غفيت

كلهه ساعه تقريبا وكعدتني امي والممرضى كالت لازم اروح ارضع ريان كل ساعتين عاد كيفت انه كمت امشي على كيفي للحمام وامي ساندتني

غسلت وغيرت وطلعت لبستني امي ملابسي المجهزتهن الي طلعنه انه وامي وتقودنه الممرضه للمكان دخلت لغرفه منعزله صغيره بس بيهه تهويه مو خنكه كعدت وجابتلياهه خليتهه على صدري

كلش صغيره ماتنلزم مو مثلما طلعت من بطني شويه منفوخه سالت امي وكالت كل طفل يطلع جبير من بطن امه تالي وره ساعات يفش مثل النفاخه ههه .. اجت امي خلت جواهه مخده حتى اكدر ارضعهه ياله وصلت يم صدري بقت ترضع جوعانه والرحم احسه كطعني تكطع من الوجع بقيت لازمه ايد امي اعصرهه من الالم وامي كالت ..

_ عادي يمه تحملي كل مره هيج اول ماتولد وترضع ابنهه يضل الرحم يحن عليه يريده 

_بس وجع يموت امي عبالك كاعد اطلك ودي اوخرهه مني

_اي تحملي يمه جم يوم ويتعود الرحم على فراكهه ومايضل ياذيج

_تمام امي انشاءلله..

بقيت بالمستشفى يم ريان كل فتره وجودهه تقريبا ١٥ يوم بقت وبهاي الايام صار بيهه ابو صفار خطيه وبقوا كل يوم يحطونهه تحت الاشعه حتى تمص

الصفار منهه وهي تضل تصرخ يكرص بجسمهه والرضاعه مستمره كل ساعتين وامي وابوي الله يحفضهم ماعافوني ابد ويجيبون اكل وماملحكين

حتى يصير بصدري حليب للطفله لان حليب الام ضروري بهيج حاله .. صار يومين امي تبقى يمي ويومين تجي جنان بدالهه وبابا يوم هوه ويوم

سلام يبقى يمنه خاف نحتاج شي ماتركوني وحدي لحدما مرت هاي ال٢٠ يوم .. 

رحت باخر يوم ارضعهه كملت ودخل الدكتور حجه ويانه وكال..

_الحمدلله الطفله تحسنت احوالهه كلش زين وتكدرون تطلعونهه من باجر بس راح تلازمهه مشكله صغيره

_اي الحمدلله شنو هيه دكتور

_للاسف من خلال الفحص شكينه عندهه ربو قصبي خفيف وهذا الشي وراثي عدكم بالعائله شخص عنده ربو قصبي

_لا دكتور اهلي ماعدهم واهله كذلك بس اتذكر جد ابوهه كالو مات بسبب الربو بس هل شي مو وراثي

_صحيح اكو #ربو_وراثي واكو ربو مو وراثي وطفلتج الربو يلي عندها وراثي ميه بالميه ولا تخافين هو خفيف ويجي بس بفصل الربيع او يزيد

بي انه راح اكتبلج علاج بخاخ الهه للطوارئ وديرو بالكم عليهه من الركض والتعب والبجي ديربالج تخليهه تبجي لان تدخل نوبه وكلش خطره النوبات و هذا الربو اعراضه ماتبين هسه يجوز بعد شهر او سنه او اكثر

يعني فجاتا اذا تعبت او ركضت وصار عدهه خفقان بالكلب يحاوطهه الاختناق والكحه فانتي للاحتياط هذا البخاخ خلي مثل مفتاح البيت بايدج 

_تمام دكتور انشاءلله بس يعني مايصيرلهه علاج نهائي 

_لانه وراثي فما يصيرله اي علاج نهائي فقط العلاجات التخفف والتحد من حالاته المتكرره يفيدهه

_تمام دكتور

_الحمدلله على سلامتهه وانشاءلله ماتشوفون بيهه شر 

_تسلم دكتور شكرا الك

_العفو بابا واجبي..

طلع الدكتور واخذت الممرضى ريان رجعتهه للخدج منا لباجر وانه رجعتني امي لغرفتي وكلش اختنكت من كلام الدكتور عن مرضهه تمنيتهه تجي كامله

ومابيهه الا العافيه بس الحمدلله على كل حال خلي ربو خفيف ولا نقص وتضل تتعلعل بي العمر كله .. رضيت بيلي قسمه ربي الي وحمدته وشكرته

الف مره على كمال خلقه ..

 ثاني يوم الصبح دخلوهه اخر مره فحص تطمنه عليهه تالي كتبلنه بابا خروجيه وطلعنه من المستشفى مسافه الطريق

كمل ووكف سلم علي وباس ريان براسهه ودخلنه احنه جوه لكيت خالتي حلى موجوده هي وجنان سلمت عليهه هي وعمو ساجد باركولي انطوني

واجب و اخذتني امي لغرفتي خليت ريان بالكريكوت مالتهه وامي طلعتلي ملابس دخلت للحمام سبحت وبدلت وطلعت مشطتلي امي ولفت راسي بعصابه ولبستني ملابس هواي وجواريب حتى لا يدخل هوى للرحم ويضل منفوخ ومنا نهايه شته وبارد الجو بعده بحيث احس روحي صرت دبه من الملابس ..

تمددت يم ريان رضعتهه ونمت بصفهه.. مرت ٢٠ يوم ثانيه وطلعت الاربعين وريان حالتهه زينه الحمدلله وامي ماعافتني بالنهار تراقبهه وانه بالليل

اسهر عليهه لان اخذت اجازه كم يوم من الجامعه وبقيت ادرس بالبيت فابقى سهرانه والنهار انام لمن تراقبهه امي ..

 بيوم الاربعين سوينه مولد وعزمنه الكل عليهه بس للاسف مرتضى ومحمد ماكدروا ينزلون لان مرتضى عنده امتحانات وملتهي بضيمه .. اجو الكل سلموا

علي وانطوني واجب وبابا ماقصر وياهم معزب بعد حيلي حيله بيده يطبخ وينطي واول شي سواه وزع للفقره واليتامى القريبين على بيتنه والحمدلله كفى ووفه...

___________

__ #في_مكان_اخر__

في كَـبدِ الأشَّواكِ وعصْف الحياةِ،

تَبقىٰ في الفؤادِ كضياء للعتماتِ، تُهَوْن عليِّ مرارة الطَّريق؛

فبرفقتك الحيـاةُ تَلين، تُقاسـمني هُمومُ العواتقِ، ونَحلُّ مُعضلات المسائلِ، 

وتُغمـُر أناملي بكـف حنانك، نواجه معًـا صِـعاب الطريق ."

:- رن جرس المنبه باذني وكمت طفيته باوعت للساعه ب٥ الصبح وعبير كعدت على صوت المنبه مالتي سحلت روحي كوه للحمام غسلت وجهي

وطلعت لبست برموده ورحت عل جهاز مالت المشي صرت العب رياضه لان حيل احتاج الرياضه بفتره العاده الشهريه لان تخفف هواي من الالم ..مرت ربع ساعه واجالي اشعار لنقالي طفيت الجهاز واجيت اخذت بطل الماي ونقالي صرت اشرب واقره بالرساله ..

💬يا صباح الخير كله بانه

💬صباحو حب

💬شلونه الكبد مالتي

💬زينه انت شلونك 

💬تمام شنو رهبانو كعد

💬لا بعده يكعد ب٦ هو

💬اووف اووف يا بان يمته يفرجهه علينه ويقبل ينطيج الي

💬بيد الله اوس نصبر ونشوف تاليته بله

💬طكت روحي صارلنه ٦ سنوات على هذا حالنه جبت اهلي والشيوخ والعالم كله وماناوي يقبل لو كايلي بيك قصور جان عدلته وكتله تامر بس لا هو الكايلي روح ولا القابل ينطيج الي

💬ماعرف شنو سالفته بس ميخالف تعال انت هل مره والباقي على الله وعلي خليني انه اتصرف وياه

💬لا تسوين شي منا منا يمعوده شكلك اوس حرض اخت راهب عليه

💬لا ماعليك انه اعرف اخوي واعرف اتصرف سكتت هواي وكلت وياه حق معصب وكارهك هل فتره بس خلاص طفح الكيل مو بكيفه ولا اله حق يكطع بنصيبنه

💬مشكله ياحبيبي مشكله بس اذا تكولين هيج وواثقه انج تكدرين تقنعينه من عيني باجر انه واهلي وعشيرتي يمكم

ختمنه الرساله بباي وطلعت للمطبخ خليت النقال عل كاونتر ووكفت اسويلنه ريوك وصفنت افكر بيلي صار باخر سنوات وشلون بدت قصتي ويا اوس باول مرحله الي بالجامعه....

_  #قبل ٧ سنوات _

:- كالعاده كملت اول محاضره الي وطلعت كعدت بالكافتريا اجتي البنات صديقاتي سلمت عليهم وكعدنه نتغده سندويش وعصير ويسولفن سوالفهن المعتاده عن الولد والعلاقات شويه ووحده منهن شهكت وكالت بهمس..

_شوفن ولجن منو هذولي الشباب الصاكين اول مره اشوفهم

رفعنه راسنه كلنه سويه عليهم واشوف اشكالهم عاديه مجرد شباب مرتبين بس واحد بارز بينهم لفت انتباهي لان يشبه ممثل سوري اسمه محمود نصر نفس الشياكه والمشيه والشكل فهيت اول مره اشوف شخص يشبه المشاهير تحمحمت ونزلت عيني عنهم لا يلكطني

اباوعلهم بس صدك شجابهم لكليتنه همه مو من هاي الكليه .. شفتهم اخذوا غدا من الكافتريا مالتنه وطلعوا شويه ورجع الجنه محموده ماعرف شسمه راح اسمي محموده ..

رجع اخذ جزدانه وراد يطلع التفت علي وانه ناسيه روحي باقيه اباوعله اجت عيني بعينه وصفنه لحضه تحمحمت

ونزلت عيني عنه وهو بقه واكف شويه وراح يمشي ببطئ وعينه علي كلش استحيت منه وزودنهه صديقاتي لمن كالن..

_هاي شنو عيني نضرات وحركات وبركات شدعوه ما مالين عينه احنه كبل حط عليج

_اي مو عصفور هوه ويحط علي

_ ههه هو شاف جمالج ونسحر بس من يشوف طريقه كلامج يطير خطيه يخترع

_ليش عيني شبيهه طريقه كلامي ماعاجبتج

_انه شكو بس الولد مايحبون هيج باباتي

_وشمدريج هوه نفس باقي الولد

_تراهنين

باوعتلي بفشله وانه كلبت عيوني عنهه رغم هي صديقتي بس هيج احنه دائما نتناكر ونتراهن على اتفه الشغلات ولمن افوز انه لو هيه وحده تدفع

للثانيه غده للفايز لمده اسبوع .. مرت كم يوم ورجعت شفته يتمشى مقابيل الجامعه مالتنه بس واحد من جماعته وياه هو شافني واجه يمشي

باتجاهي من بعيد ويعدل بشعره باوعتلي ميس صديقتي الراهنتني وهزت حواجبهه واشرت عليه .. تنهدت والتفتت امشي باتجاهه كلشي ولا اخسر رهان وخاصه لو جان شي سهل وبنفس الوقت

خلتني اشك بروحي اذا فعلا الولد يشوفوني متكبره ومكروهه.. وصلت يمه وتعمدت اخلي كتبي تدحك بايده حتى يطيحن باوعتله وكتله متصنعه العصبيه..

_ايي شبيك ماتشوف ناقصنه بعد بس غربه يزعجونه خوش سالفه هاي

_العفو اسف مانتبهت جمالج عمى عيوني 

_عفوا شنو كلت

_لا هيج سلامتج خليني اساعدج

_لا مشكور بس كفيني شرك ماريد اكثر

_افاا يمته عرفتيني حتى شفتي شري

_مبين من شكلك عوذه مو راحه 

_ههههههاي خرب شكلك ياحظي شلون صادفت صدفه

_ليش شبيهه الصدفه ماعاجبتك روح منا لا تكابلني وتضل تباوعلي

_اويلي يابه لو كل صدفه هيج تمر وتجمعنه جان حولت اختصاصي من القانون للاعلام

صفنت بي وكلبت عيوني وهو رفع حواجبه بتفاجئ وابتسم لميت كتبي من الكاع وكمت عدلت تنورتي ومشيت كم خطوه وكال..

_على كيفك ياحلو تراك تمشي اعله كلبي..

ابتسمت وباوعت لميس من بعيد رفعت حاجبي بنصر ورحت يمهه كعدت وكتلهه..

_شوفي بله طار لو بعده من طريقه كلامي رغم طبيعتي مو هيج وقحه ومغروره بس سويت هيج حتى اوضحلج ان الغرور والتكبر مو من صفاتي وان اغلب الولد ينجذبون للمغرورات تمام حبي

_بعدنه ماكو شي بين هسه خلي تمر جم يوم وشوفي اذا مانقرض

_نشوف..

فتحت نقالي وصرت اكلب بي وهيج مرت الساعات من المحاضره للكافتريا لحدما خلص الدوام واجت علي عبير وراهب رجعنه للبيت .. دخلت سلمت

على امي واسراء ورحت بوجهي لغرفتي ذبيت ملابسي ودخلت للحمام بقيت جوه دفو الدوش فد ساعه حسيت التعب طلع من جسمي نهائيا

وبطريقي تخيلت جم حوار بيني وبين محموده مليان غرور وعجرفه ياله نشفت وبدلت وطلعت مشطت شعري وجابت اسراء صينيه الغدا كعدنه

سويه نتغده وراحت اسراء تصيح لشموخ اجت كعدت وتغدينه سويه ..وانتبهت على راهب وجهه احتقن احمر وكوه يبلع اللكمه خله وكام ماعرف

شبي فجاتا انكلب لونه وصار مثل الثور اوو مايهمني كل شخص بهل عايله ماخذله صفحه بحياته محتار بيهه .. ضاهريا عائله

عايشين وناكل ونشرب سويه بس داخليا كلمن عايش بوطن وحده خاص بي ومحد يدري عن الثاني شيصير بي بهل وطن ...

كملنه غده ورحت غسلت ودخلت لغرفتنه تمددت على جربايتي وصرت اكلب بالنقال لحدما غفيت ومرت يومين بالضبط وكالت ميس ان فعلا طار

الولد ومارح يجي لجامعتنه بعد مانكر اني ضجت وتحسست من كلامهه وحسيت نفسي فعلا مغروره ومحد يريدني بس تالي صار عكس كلامهه تماما رجع محموده وبقوه همين ..

ثاني يوم اول ماطلعت من الكافتريا اندعمت بي واجت اديه على صدره تقشعر بدني واحس وجهي جمر من الخجل والاحراج ابتعدت عنه بسرعه وهو كال..

_اسم الله بابا شنو ماتشوفين 

_العفو ماشفتك طلعت فجأة

_هذا انه بطولي كله تكليلي ماشفتك

_وهسه شتريد اصفك لطولك

_هههه لا شسالفه ماكو اشكال بيناتنه

_ممكن تبتعد عن طريقي اريد اطلع

_لا مو ممكن 

_عفوا

_ابتعد بس بشرط

_ايش

_يويلي عل ايش احم اريد اتقدملج

رفعت راسي وباوعتله بصدمه خلتني اعدل هدومي ورجع كال..

_هههه صدكتي شكلج

_احم لا جنت افكر شلون ارزلك كدام الناس 

_افا تالي وكت اليريد الحلال يترزل

_تريد اصفكلك مثلا

_شجاج اليوم وي التصفيك يابه اذا مصره ميخالف صفكي ماخليهه بنفسج

_افف ابتعد عن طريقي خلي اعبر بلا هل سفاهه

_تفضلي عيني ورمش عيني

_شكد قديم

_مو اقدم من غرورج..

التفتت عليه وكتله وانه عاكده حواجبي..

_العفو غرور وانه

_اي جا منو ابوي

_شكلك مخرف بابا روح لحك على روحك تعالج

_شكلنه راح نتخبل والله على هل لسان..

هزيت بايدي ورحت من يمهم بس بداخلي اضحك على ميس اريد اشوف وجهه لمن احجيلهه الصار هم ترجع تكول مغروره ومتكبره ومحد يريدج.. رحت للقاعه ولكيتهه كاعده اجيت كعدت يمهه وكتلهه..

_احزري شنو صار قبل شوي

_شصار طلبوا ايدج

_شمدريج

_صدك تحجين

_هههه ماعرف صدك لو جذب بس اي طلب ايدي الكلتي عليه طير ولابد يطير مني

_هاي شنو سولفيلي بله شصار 

_شوفي جنت اريد اطلع من الكافتريا ولطشت بي ورزلته ذيج الرزاله اشو هذا تسرسح وكال اريد اتقدملج ماعرف اذا يتشاقه لو يحجي صدك بس رديته وطلعت بغرور وانه الفزت بالرهان

_ لا عيني بعدج يجوز يضحك عليج يريد يكسر خشمج تره اكو ولد يسوون روحهم مسحولين علمود يكسرون خشوم 

_كولي ماريد اوفي بالرهان وهاي هيه ليش تتحججين ميوس

_زين تمام خلينه نتراهن على شهر اذا خليتي يحبج ويجي فعلا يتقدملج الج السنه كلهه انه ادفع عنج اكلج بعد شتردين

_اكلج انتي ترديني اتزوج وتفتكين مني شنو اذا خليته يجي يتقدملي وسواهه صدك شكله بله جنت متراهنه عليك 

_مشكلتج مو انتي لوتيه وذكيه انتي تصرفي وياه مو الا تكليله بلسانج تعال تقدملي خلي يحس ان انتي تردين هيج 

_همم تمام اجرب بله واشوف اشو حبيتهه لهل شغله هاي بس اكول خاف ينكسر خاطره تالي

_ومن كل عقلج باقي عليج هوه الف وحده عنده ترحين انتي يجن الف غيرج 

_هيج كولتج

_والله

_تمام لعد اتفقنا

_اوكي اتفقنا 

فتحت كتبي وبقيت صافنه بهاي الخطوه واذا غلط او صح نفضت افكاري من راسي وكلت فعلا كلام ميس هو ماباقي علي مجرد بنيه تعجبه ويكدر

ينعجب بغيري بسهوله دخل الدكتور وبدت المحاضره عدنه وتوالت بعدها المحاضرات لحدما خلص الدوام لميت ملازمي وكتبي وطلعت انه

وميس نسولف ونضحك التفتت وشفته واكف بالباب هو وجم واحد وياه وصافن علي عكدتله حواجبي باستغراب ودرت وجهي عنه رجعت

احجي ويه صديقاتي لحدما طلعنه من الكليه صعدنه بالسياره التفتت عليه وشفته قريب السياره صافن علي ومبتسم غمزلي ورفعت حواجبي

بتفاجئ وضهرت على وجهي شبه ابتسامه التفتت عنه وتحركت السياره وهو لحكنه بسيارته لزمت كلبي خايفه بس لا يريد يندل بيتنه ويجي صدك

يتقدملي بس همزين وصلنه قريب بيتنه ولف سيارته عل جهه الثانيه دخلنه بالفرع ونزلت من السياره دخلت للبيت بسرعه لا يطلع يراقبني من

بعيد ويشوفني بيا بيت ادخل .. فتحت باب بيتنه بالمفتاح ودخلت سديته والتفتت شفت راهب كبالي مكتف اديه وعاكد حواجبه باستغراب لزمت كلبي فازه منه وكتله..

_خرعتني شبيك واكف هيج جنك ابليس

_شبيج دخلتي تركضين

_شبيه بعد اخاف امشي بحدي مسافه من السياره لداخل بيتنه

_هممم تمام يله فوتي 

_هوه فايته 

عفته ودخلت جوه سلمت على امي واسراء وشموخ الكاعدات يتغدن ورحت لغرفتي بدلت ملابسي غسلت واجيت كعدت وياهم اكل كملت ورحت لغرفتي تمددت ردت انام واجالي اشعار على نقالي من حساب مجهول دخلت وشفته كاتب..

💬السلام عليكم عيني المغرور شلونك

💬منو

💬اوس

💬منو قوس

💬هههه القوس الانتي سهمه

💬هفف احجي منو انت

💬ماعرفتني المغرور 

💬 هاا عرفتك 

💬يالله اي شلونج

💬شنو شلونج اشو كاعد تحجي عبالك تعرفني وواحد من اهلي

💬عن قريب انشاءالله اصير واحد من الاهل بس انطيني موافقتج

💬انت الواحد من ينطيك مجال تضل تمسلت

💬انه امسلت نعم الله عليج

💬العفو بس ماريد اتجاوز اكثر يكون افضل لو ماتحاجيني بعد

💬ماكدر بالي يمج طلع بيتكم قريب علينه ومادري

💬منو كال بيتي قريب على بيتك

💬شفتج وصلتي نفس منطقتي بس تفارقت طرقنه للاسف

💬مدام طرق بيوتنه مفترقه يكون افضل لو المسافه بيناتنه تتفرق كذلك من رخصتك راح انطيك بلوك عادي

💬تساليني وتجرحين مشاعري ليش

💬عادي تلكه بالصيدليه لزكات جروح

💬هههه لا جديات اريد اتقدملج بانه

💬منين تعرف اسمي 

💬مو كتلج اسمي فلازم اعرف اسمج خو ماصيحلج يابنيه

💬اختصر شتريد

💬اريدج

💬وانه ماريدك 

💬ليش

💬كلمه ورد غطاها ماحاجه تعرف السبب

💬زين خلينه فتره نتعارف وساعتهه قرري اذا تقبلين او ترفضين مايصير ترفضين وانتي ماتعرفيني ولا تعرفين شنو اني

💬ماحب اتعرف ولا احب ولا اتزوج عن اذنك واخر مره اترخص مره اللخ يجيك بلوك من حيث لا تعلم

💬بان

💬هففف نعم

💬تصدكين من تسوين هيج تعجبيني اكثر

💬وانت كلما تلح اكرهك اكثر

💬افاا

💬والله

💬تمام لعد اخذي راحتج وانه اسف لان دخلتلج وراسلتج بس حبيت اتعرف على الشخص العجبني اكثر

💬لا عادي ماصار شي مع السلامه 

💬الله وياج عيني

طلعت من البرنامج وطفيت النقال خليته عل شحن وغطيت راسي محاوله انام بس شي بداخلي خانكني لان فشلته وكسرت خاطره بهل طريقه

بقيت اتكلب ماجاني نوم اخر شي تذكرت كلام ميس وان ممكن يشوف غيري نفضته من بالي وغطيت راسي ونمت .. ومر تقريب الاسبوع وانه ماشايفته ماهمني لو ما ميس تضحك علي تكلي

طفرتي الولد .. وبيوم طلعت من المحاضره وشفته كبالي يتمشه هوه وصديقه باوعلي ونزل عينه عني ومشه وكأني ماموجوده ماهمني كلت يولي ورحت للكافتريا كعدت يم صديقاتي وكالت ميس..

_اكلج هذا الطير وين يغيب تالي يطلع لا هو حاط ولا هو طاير 

_اعتبري طار ولا تجيبين سيرته عوفي الولد بحاله 

_شصاير بيناتكم 

_ماصاير تقدملي ورفضته وابوج الله يرحمه

_جا مو اتفقنا تخلينه يجي يتقدملج ليش رفضتي

_ماريد اكمل بهل رهان التافه ترديني اروح اعلكه بيه تالي اجرح مشاعره وارفضه علمود رهان يكفي خليته مرتين يركض وراي بعد مار..

قبل لا اكمل الحجايه فزيت من شمره الكرسي وراي التفتت وشفته هو وصديقه واكفين وراي مباشرتا وهو شايطه عيونه غضب وخازرني....