رواية ايام من رماد الفصل السابع 7 بقلم احمد

سامر: بس اهدو البنية غلطت نعرف هالشي وابننا هم غلطان فاني اريد اطلب ايدها منكم على سنة الله ورسوله خلي نصلح الغلط بالصح مو بغلط اكبر منو 

الرجال: اي صح هذا بعد ما ابنك دنس شرفنا وبعد ما بنتنا خانت ثقتنا بيها 

سامر: الغلط انو نقتل روح واحنا عندنا اختيار ثاني 

الشاب: اقرو على ابنكم الفاتحة 

البنية: صاحت من يم البيت .. لا تقتلوه هو بريئ 

اخوها: وجه السلاح عليها 

ابوها: تعالي ويانا 

مصطفى: ميزر 

دمعة: من گال هيج مصطفى ميزر فورا سحبها وراه وصار هو گدامها علمود اذا ضربو طلق يحميها بجسمو 

ابوها: لاخر مرة اگوللكم انطونا بنتنا والا نقتل ابنكم 

مصطفى: لا تنطون البنت اذا ما يفكوني لانهم غدارين 

ابوها: احنا لو غدارين جان قتلناك من اجيتنا 

مصطفى: ههههههههه لو مو غدارين ما تكاثرتو علي 

اخوها: يابة خليني اقتلهم كلهم هي وياهم 

ابوها: احنا مو جايين نسوي مجزرة فكوه وخلي ناخذها ونروح 

اخوها: بس يابة

ابوها: بدون بس فك الولد 

دمعة: اجى الاخ الثاني فتح ايدين مصطفى ووگف على حيلو واندار عليهم والي شايل السلاح بقى مركز على مصطفى 

مصطفى اندار عليهم واحد واحد ويباوع عليهم من فوگ ليجوة وبسبب حركتو هاي توترو لا يعرفون شنو قصدو ولا يگدرون يقتلوه لان راح يتورطون 

مصطفى جان بتفكيرو يريد يعرف كم سلاح موجود وياهم ومن تأكد ان بس سلاح واحد بلمح البصر رفعو بايدو وطلعت منو طلقة 

سكرت عيوني من خوفي عليه وسمعت صوتو يگول لا تتحركون وفتحت عيوني لگيت الي جان عندو السلاح ماسك بطنو ويتوجع والسلاح صار بايد مصطفى 

ابوها: وتگول علينا غدارين 

مصطفى: باوع احجيها من الاخر هذا بيتنا وانتو اجيتو علينا مسلحين يعني اذا اقتلكم هنا راح يعتبر دفاع عن النفس وما تحصلون شي 

فالكم اختيار يا اما ترجعون لبيتكم وتعتبرون بنتكم ما انولدت او نصفي حساباتنا هنا 

ابوها: ماكو اي حساب بيناتنا واليوم او باجر او بعد مية سنة بنتنا جابت العار النا ولازم نغسل عارنا 

مصطفى: ميزر هم جابلنا العار بس احنا كلنا راضين يتزوجها ويصحح غلطو اما انتو فتريدون ترتكبون غلط اكبر من غلطها 

ابوها: الزلمة ما يعيبو شي 

مصطفى: هاي بتفكيركم انتم اما بالحقيقة ميزر يستاهل ينجلد حسب الشرع هو وبنتكم ولو متزوجين قبل فعلتهم ثنينهم ينرجمون 

فسالفة الزلمة ما يعيبو شي هاي ما يفكر بيها غير الشخص المتخلف او البعيد عن الدين فانت متخلف لو بعيد عن الدين 

ابوها: سكت ماعرف يجاوبو 

مصطفى: نزل السلاح .. باوع اني لا رايد اقتلكم ولا رايد تقتلوني بنتكم غلطت وراح تحاول تصلح غلطها واني اول الي راح يساندوها 

وماراح نسلمها الكم حتى لو قتلتونا كلنا فالاختيار الكم .. ذب السلاح عند رجلينو وتوجه للبيت 

اخوها اخذ السلاح وابوه حط ايدو عالسلاح بمعنى لا تقتلو من وصل مصطفى عند بابا واخواني صاح ابوها ..  من اليوم اذا شفناها هي او اي واحد منكم راح نقتلو 

مصطفى ما اهتم الهم وكمل طريقو والرجال ركب هو وولدو بالسيارة وراحو والبنت جانت من صدگ منهارة وحالتها حالة 

من دخلو داخل رجعت يمهم ماما رحمة اخذت البنية للكرفانة ومصطفى باوع لميزر گلو ما تشوفها ولا تشوفك لحد ما نعقد الكم 

ميزر: ايمتى نعقد 

مصطفى: من تستلم فلوسك شگد ما كانن تعتبرهن مهر الها ونعقد الكم ونفض هالسالفة 

ميزر: تمام 

مصطفى: يمة تعالي وياي اريد احجي ويا البنية 

رحمة: هسا احجيلي انت شلونك خوما اذوك 

مصطفى: مابي شي يمة بس احجي وياها وارجع احجيلكم كل الي صار 

رحمة: تمام .. ودخلو يمها 

مصطفى: اهدي خوية اريد احجي وياج 

البنية: احجي 

مصطفى: الي صار صار وبعد ما يرجع لذلك ركزي وياي بهالكلمتين راح نعقد الكم انتي وميزر اول ما يستلم فلوس شغلو 

وشگد ما كان المبلغ نعتبرو مهر الج ونعرف راح يكون قليل بس احسن ما يجي ابنكم او بنتكم للدنيا وانتو بعدكم مو متزوجين 

ثانيا حالج حالنا ماكو اي فرق بيناتنا راح تكونين حالج حال بنياتنا واخطاء الماضي نسيناها 

حاليا انتي وميزر ممنوع تلتقون او تحجون ويا بعض لحد العقد واهلج انطيج وعد رجال منا لفترة احاول اصالحج وياهم 

البنية: اهلي ما يصالحوني وانت شفت شلون حاولو يقتلوك 

مصطفى: انتي گلتيها حاولو مو نفذو ومن يهدون ويفتقدون مكانج راح يتغير رايهم 

البنية: تمام 

مصطفى: من اليوم يتغير لبسج گدامي اني واخواني ومكياجج يكون بغرفتج فقط وتتحجبين 

البنية: بس اني مو محجبة 

مصطفى: اعرف لذلك دا اگلج تتحجبين لا احنا ناقصين ذنوب ولا انتي ومثل ما تعودتي تكونين سافرة راح تتعودين عالحجاب حالج حال البنيات 

البنية: تمام 

مصطفى: يلا تصبحين على خير 

البنية: وانت بالف خير .. قبل ما يطلع .. شكرا الك لولاك جان قتلوني 

مصطفى: الفضل لله خوية يلا ارتاحي واهتمي باكلج وصحتج .. وطلع 

دمعة: اني والبنات من دخل مصطفى للبنية رحنا فورا للمطبخ جهزنا العشى وبين ما خلص كلامو جبنا العشى وحطينا لبابا والولد لحالهم واحنا حطينا عشانا ويا البنية 

بعد العشى تجمعنا كلنا علمود يحجيلنا مصطفى شنو الي صار وياه بس البنية بقت بالكرفانة وجانت تريد تنام لان تعبانة كلش 

مصطفى:(حجالهم الي صار بالسيارة) ونزلت رحت الهم واني الف حوار براسي وماعرف شنو راح احجي وياهم علمود يفهموني 

جانو اهل البنية وعمامها موجودين وكل واحد يحلف يقتلها والثاني يصلخها والثالث يگطعها ويذبها للجلاب من وصلت گلت السلام عليكم 

اخوها: باستغراب .. منو انت 

مصطفى: شخص غريب 

اخوها: شنو رايد 

مصطفى: بتفكيري عرفت ان اني الضعيف بينهم لان وحدي ووياهم كل الحق باي شي يسووه فگلت اجرب حظي واحجي الحقيقة 

مجرد گلتلهم اعرف وين بنتكم تجمعو كلهم علي هذا الي يسحب بي وهذا الي يريد يضربني اخير شي واحد صار وراي وحط ايدو على رگبتي من گدام 

اجى ابوها گال احجي وين بنتي گلتلو ما احجي واني بهالحالة وگللهم اربطو ايديه وجيبوه للاستقبال وربطوني واخذوني للاستقبال 

من دخلت جانو هو وعمامها بالاستقبال گلتلو ابقى لحالك واعترضو گلتلهم ترا لو تقتلوني ما احجي گدام احد غير ابوها 

وحاولو يخوفوني ومن شافوني عاندت طلعو عمامها وبقى بس ابوها حاولت افهمو ان البنية غلطت واحنا نحاول نصلح غلطها بس ما يفيد 

اخير شي عرفت ان ماكو حل غير ان اجيبهم هنا علمود اذا صار شي ووصلت للمحاكم يكون الحق عليهم لان اجو علينا مو احنا رحنالهم 

بقيت انتظر الى ان تأكدت ان الشركة فرغت من العمال ودليتهم عالبيت وجابوني هنا وانتو تعرفون الباقي 

بابا: وشنو موضوع الغدر 

مصطفى: اني جنت اريد حجة اخليهم يفكوني علمود اخذ السلاح منهم 

رحمة: ماجان اكو داعي تخاطر بنفسك هيج 

مصطفى: ماجان اكو اختيار ثاني گدامي لو متأخرين جان يمكن اجو هم وعمامهم وقتلوها وقتلونا وياها اعرف غلطت بس ما حبيت اجازف خصوصا بهيج وضع 

رحمة: يلا روح نام وارتاح اليوم تعبنا من الخوف 

مصطفى: هههههههه تمام يا خوافة 

دمعة: اني جنت يمين مصطفى مديت ايدي وگرصتو من فخذو الا فززتو وصار يفرك بيها 

مصطفى: هاي ليش ولج حية 

دمعة: علمود ما تخوفنا مرة ثانية 

مصطفى: شو تعالي 

دمعة: من گال هيج انهزمت منو وگال جيبوها الي وركضن وراي اية وسارة وبدون وعي صار صوت ضحكتي عالي ومسكني وسحبني يمو 

جان يرفع اصبعو السبابة ويگلي هذا شنو اگلو اصبع ويضغط عليه بصفحتي يخليني اختنگ من الضحك واصير ارافس بسبب الحركة 

وماتركني الا صارت بطني توجعني واحس عضلات البطن والحوض صار بيهن شد من كثر الضحك 

دمعة: اخ حتى عضلاتي صار بيهن شد 

مصطفى: ايباااااه من ايمتى عندج عضلات 

دمعة: باوع .. طلعت كتفي ورفعت ايدي وجانت العضلة بارزة بس كلش صغيرة لان عضلة بنت وطالعة من الشغل مو تدريب وبروتينات وهاي الاشياء 

مصطفى: باوعي لعد .. نزع التيشيرت جان لابس تحتو فانيلة تعلاگة وعصر ايديه كل ايد تعادل ايدي خمس مرات من كبرها 

وخلاني اوگف ومسكني من صفحتي ورفعني فوگ وخلاني اگعد على عضلة العضد (بين الكتف والكوع) وصاح اية 

نزل جسمو وگعدت هي على العضد مال ايدو الثانية ورفعنا ثنينا واحنا شبعانات ضحك لان حسينا حالنا طفلات واحنا بهالحالة 

بعدها نزلنا وراح ينام واحنا هم غسلنا مواعين العشى ورجعنا للغرفة نريد ننام وجانت البنية بعدها گاعدة حجت وياها شوية ماما رحمة وطمنتها 

من تمددنا شفتها تمددت وغمضت عيونها واني هم غمضت ونمت وگعدت ثاني يوم لگيتها متمددة بفراشها بس فاتحة عيونها 

البنية مبين عليها مسكينة بالوقت الحالي بس مانعرف منا لفترة راح تبقى مثل ما هي لو لا بس صار لازم نعتبرها زوجة ميزر انتهى الموضوع 

بابا حجى ويا المدير علمود فلوس ميزر والمدير گلو يومين والثالث يستلم فلوسو وخلال هاليومين طلعنا مرة وحدة للشغل 

البنية اجت ويانا بس ما اشتغلت لان مو زين عليها الشغل وبنفس الوقت هي مو متعلمة للشغل مثلنا فبقت بس گاعدة ويانا علمود لا تبقى لحالها بالبيت 

مرن اليومين والثالث استلم الفلوس ميزر مثل ما گال المدير وجانن فلوسو مليون فاعتبروهن مهر الها مثل ما گالو 

بابا وصل رسالة لابو البنية انو يحظر بس بوقت العقد علمود يتأكد ان بنتو تزوجت على سنة الله ورسوله وعلاقتها ويا ميزر ما تبقى زنا 

اجى وحدو بالليل ومصطفى جاب شيخ وعقدو الهم ومن راح الشيخ گاللهم ابوها اني حظرت علمود ابري ذمتي امام الله فقط 

من اليوم تبقى يمكم حالها حال الجلبة لحد يطلب مني عقد محكمة ومن اليوم لا اتشرف اشوفكم ولا اگعد وياكم ولا اگابل خلقتكم 

الكل بقى ساكت لان شما يحجي معذور الي صار وياه محد يتحملو وكلش زين منو ان وافق يجي عالعقد لو غيرو ما يجي 

ثاني يوم ماما رحمة ومصطفى جهزو جهاز للبنت وخلو وحدة من الكرفانات الها هي وميزر وهي ما جانت تعترض على اي شي 

مصطفى گاللها مانگدر نسوي عرس الج انتي وميزر مانريد احد يعرف بموضوعكم واهم شي تصلح خطأكم وتزوجتو بالحلال 

واخذ ميزر على صفحة وگلو انت هسا تزوجت يعني ما لازم تبقى دايح مثل قبل انضبط واهتم بزوجتك واطفالك ترا مو ناقص عائلة ثانية اهتم بيها 

ميزر وافق على كلام مصطفى ومجرد نقلنا البنية من كرفانتنا لكرفانتها هي وميزر وهاي هي بدون لا هوسة ولا خبصة ولا شي 

البنات المتزوجات تخبلن من عرفن ميزر تزوج بدون علمهن وكلهن شكن ان زواجو بيها شي مو صحيح ومستحيل زواج عادي 

لان اول شي جان مطرود من البيت من مدة طويلة ومعروف ان فلوس شغلو يذبهن كلهن على بنات الليل والسهرات والسوالف المكسرة 

بس احنا التزمنا الصمت من ناحية موضوعهم وما حجينا لاحد نهائيا حتى البنات گلنا الله هداه وشاف البنية وقرر يتزوجها ويستقر بحياتو 

وملاحظة اذا تتذكرون قبل فترة من راح مصطفى جابو وگال لگيتو فوگ الگ..ة مالتو ما جانت هي نفسها هاي لان ذيج بنت ليل 

هاي تعرف عليها بالفترة الاخيرة وگدر يلعب بعقلها ويورطها وياه واي بنت تنطي مجال للولد ممكن توصل الى نتيجة هي بغنى عنها 

ميزر سألتو زوجتو انو ليش طردها من عرف بحملها رغم انو هو مبين يحبها گاللها اني جنت مشرد لا بيت ولا مكان مستقر بيه 

ومن سمع بيها حامل خاف من اهلها وبنفس الوقت ماعندو مكان يتزوجها وياخذها عليه واهلو مستحيل يستقبلوه بهيج مصيبة 

وهي من زمان حاجيلها احنا وين عايشين وشارحلها عن حياتو ومن خلال حجيو گدرت توصل للشركة ووصلت النا وتعرفون الباقي 

مرت الايام بهدوء البنية تعودت علينا وتعودنا عليها وصارت تحجيلنا عن حياتها قبل ودراستها وصديقاتها واهلها وتعاملهم وياها 

من جانت تحجي احنا ساكتات ومصدومات شلون يعاملوها بهذا الحب والدلال وبالاخير كسرت ثقتهم علمود ميزر 

بس مثل ما يگولون الحب اعمى وميزر صحيح حلو بس جان داشر وفوگ هذا يعرف شلون يوصل لگلب البنت من خلال التصرفات والكلام المعسول 

وفوگ هاي جان واعدها بالزواج لذلك وگعت بشباكو بس المهم انو بالاخير اخذها ويعاملها معاملة كلش حلوة وما كرهها بسبب الي صار 

اهلها انقطعت اخبارهم نهائيا ومصطفى مايگدر يسأل عنهم لان مايريد يجيب شبهة لنفسو وبنفس الوقت مايريد يصتدم وياهم 

طبعا تعمدت اخفي اسم البنية طول البارت هذا والبارت القبلو علمود تكون مجهولة بس هسا صارت وحدة من العائلة فلازم تعرفون ان اسمها رونق 

جانت طالبة بصف السادس اعدادي من تعرف عليها ميزر وجانت عايدة سنة علمود تحسن معدلها بس بسبب ميزر حتى نجاح ما نجحت 

ومن اجت يمنا صارت اكثر طلباتها تطلبهن من مصطفى واقصد هنا مو الطلبات الخاصة لا مثلا تگول لميزر على شي ويرفض تجي تگول لمصطفى علمود يجبر ميزر 

وميزر جان يعصب وتطلع روحو وهي من تشوفو هيج تختل عند ماما رحمة وتضحك لحد ما يهدى وياخذها ويروحون لكرفانتهم 

وجان الحمل فايدها بانو مايگدر يزعلها لو يعاقبها وهي مكيفة وبصراحة ضافت اجواء كلش حلوة بالبيت بضحكتها وسوالفها 

وجانت كلش تنقهر من نحجيلها عن حياتنا وتعبنا بالشغل ومعاناتنا وتگول لو اني بمكانكن ماگدر اتحمل هاي العيشة بس فجأتنا من گالت احسدكن على حياتكن 

اية: على شنو تحسدينا 

رونق: احسدكن انو بقيتن مغمضات على الدنيا وما نزلتن راس اهلكن 

اية: الحمدلله بهاي ماگدر اختلف وياج 

رونق: تدرين يوميا احس نار تاكل بروحي واني اتذكر منظر بابا واخواني من جانو هنا ويباوعون علي بخيبة 

ولو يرجع بي الزمن مستعدة اموت مية موتة واخسر ميزر الف مرة ولا اسوي الي سويتو واحط نفسي بهيج موقف 

صحيح احجي وياكم واضحك بس وربي بكل ثانية تمر احس دا اشمئز من نفسي واحس انتو طاهرين ودا اوسخكم بوساختي 

تدرين من يحجي وياي مصطفى اموت من الخجل لان يعرف اني حملت بالحرام وخصوصا مصطفى هو اكثر شخص اخجل منو 

رغم عندكن اخوان غيرو وابوكن موجود بس مصطفى احسو هو صاحب البيت وكأنو هو الاب وانتن بناتو ولا كأنو اخوكن 

اية: حقهم اهلج الي صار مو قليل بس ادعي الله انهم يسامحوج والا مستحيل تتوفقين بحياتج واحنا معتبريج وحدة منا وبينا 

رونق: والله مستعدة ابوس رجلينهم واحد واحد بس المهم يسامحوني ويرجعلي احساس الامان الي افتقدتو .. وانهارت بالبجي 

الفصل الثامن من هنا