رواية ايام من رماد الفصل الثامن بقلم احمد
اية: حقهم اهلج الي صار مو قليل بس ادعي الله انهم يسامحوج والا مستحيل تتوفقين بحياتج واحنا معتبريج وحدة منا وبينا
رونق: والله مستعدة ابوس رجلينهم واحد واحد بس المهم يسامحوني ويرجعلي احساس الامان الي افتقدتو .. وانهارت بالبجي
دمعة: الاحداث الي بلشت وياي من صار عمري 15 سنة بهذا العمر اخواني جانو بعدهم مو متزوجين بس ميزر وصارلو ولد من رونق
رونق بعدها ما شافت اهلها ومصطفى وعدها باقرب فرصة يصالحها ويا اهلها اما خواتي المتزوجات ماكو شي جديد بحياتهن مجرد ان رانيا صارلها بنت
باحد الايام جنا طالعين بالليل للشغل فتأخرنا للعصر يلا گعدنا واول ما گعدنا بابا گال اكو ناس جايينكم بالليل علمود موضوع خطبة
رحمة: يخطبون منو
بابا: ماحجولي وماگدرت اسألهم بس اكيد علمود اية
رحمة: هلا بيهم
دمعة: جهزنا نفسنا بين ما اجى الليل وماما رحمة بيومها ما گالت ل اية انهم جايين عليها خوفا منها انهم يقصدون غيرها وتتفشل گدامهم
من صارت الدنيا ليل جنا اني والبنات بالمطبخ واجو اهل الولد دخلو الولد واهلو ويا بابا واخواني والنسوان ويا ماما رحمة ونعمة
ورا دقايق اجت ماما رحمة گالت ماما دمعة جيبيلنا جاي وما جنت اعرف ليش طلبت مني بس اول ما راحت رونق گالت تعالي وياي
اخذتني لغرفتنا طلعتلي فستان من فساتيني وراحت ركض جابت علبة المكياج مالتها حطتلي حمرة ومسكارة وگالت هيج يكفي
رجعت للمطبخ واني افكاري متلخبطة ماعرف شسوي وماعرف شحجي صحيح شفت خواتي ينخطبن بس من وصل الموضوع يمي تخربطت
شلت الصينية ومن الرجفة الستكانات انگلبن بيها والبنات شبعن ضحك علي رجعتها وگلت ما دخلني ماروح
رونق: ههههه لج غبية شنو ماروح قابل هي لعبة غير جايين عليج
دمعة: والله ما دخلني
رونق: تعالي اخذلج الصينية لحد الغرفة وانتي دخليها قدميلهن وهاي هي
دمعة: والله لا اقدملهن ولا الي دخل
رونق: ههههههه لج اية راح تفضحنا هاي
اية: ههههههه يمة والله بطني صارت توجعني من الضحك
سارة: انطيني اني اخذها بلكي ينعجبن بعثوگي (كفشتي) ويخطبني
رونق: ههههههههه وربي اليوم فضيحتنا تصير بجلاجل من هالخبلات
مصطفى: شبيكن صوت ضحككن واصل خارج
رونق: اسفين خوية بس هاي دمعة ما تقبل تاخذ جاي للنسوان
مصطفى: باوعلي .. اكو سبب لو شنو الموضوع
دمعة: والله ما دخلني ماودي
مصطفى: غير اعرف السبب
رونق: متوترة وگلبت الستكانات قبل شوية وخايفة تتفشل گدامهن
مصطفى: سهلة سهلة
اخذ الستكانات للزلم وسمعناه صاح لماما رحمة وشوية واجت اخذت الستكانات وراحت واني ارتاحيت كلش لان مارحت
بس راحتي ما تأخرت لان ورا عشر دقايق تقريبا جابت الستكانات ماما نعمة وگالت تعالي وياي دمعة
دمعة: وين
نعمة: غير يشوفوج الناس
دمعة: ماروح
نعمة: ليش يمة
دمعة: مادخلني ماروح اني
نعمة: لج ماما عيب النسوان ينتظرن يشوفنج
دمعة: ماروح
سحبتني رونق غصب عني وصلتني للغرفة وحطت ايدي بايد ماما نعمة ورجعت وهي شبعانة ضحك واني متت من الخوف والتوتر والخجل
من دخلت للغرفة كأني داخلة لغرفة اعدامي وصاحتني ماما رحمة ورحت گعدت يمها واحس الدنيا نار من الحرارة
جانن يحجن وياها النسوان ومن التوتر ما ركزت شنو يحجن وورا ربع ساعة تقريبا گالتلي ماما رحمة روحي يمة عند خياتج
گمت وطلعت من باب الغرفة وطگيتها ركض للمطبخ اول ما دخلت جانت رونق واگفة والباب وراها دخلت وضربتها على علباتها الا فززتها
رونق: اخ ولج جلبة ليش هيج
دمعة: تستاهلين ليش جبرتيني اروح
رونق: غير علمود يشوفن جهرتج الزرگة
دمعة: عابتلج انتي وجهرتج
رونق: احجيلي شنو گالن
دمعة: مادري
رونق: باستغراب .. شنو ماتعرفين
دمعة: اي والله ماعرف دخلت يم ماما رحمة لحد ما گالتلي روحي ومادري شنو جانن يحجن
رونق: حطت ايدها على راسها .. ياربي شهالغباء هذا
اية: عوفيها خية هاي ماتعرف الله وين حاطها
رونق: اي والله
دمعة: من طلعت بقو شوية وبعدها راحو ولحد الان لا اني شفت الولد ولا هو شافني من راحو صاحني مصطفى وراح يم ماما رحمة وماما نعمة
لحگتو وگعدت وياهم والغريب ان بابا ما جان موجود وياهم وبصراحة هالشي افضل گلت لمصطفى ها صوفي
مصطفى: انتي عرفتي شنو يريدون الجماعة مو
دمعة: اي عرفت
مصطفى: شوفي للامانة الولد ماعرفو فماگدر احكم عليه لازم اسأل عليه واشوف شنو يگولون الناس عنو وبعدها ننطي قرار
بس بهاي الفترة انتي فكري بالموضوع استشيري امهاتج ثنينهن وشوفي شنو القرار الي يريحج اكثر وبلغيني بس اهم شي اخذي وقتج بالتفكير
وصحيح انتي بعدج صغيرة بس تعرفين انتي وضعج هنا لا دراسة ولا مسؤوليات فيجوز الله يرحم بحالج مثل سوسن ورانيا
دمعة: مصطفى اني ماعرف بهاي الاشياء ولا اعرف مصلحتي فالقرار الاول والاخير الكم انتو شنو تقررون اني من ايدكم هاي لايدكم هاي
مصطفى: لا بوية مايصير هيج هاي حياتج انتي وما يصير احنا نقرر بدالج
دمعة: ليش ما يصير
مصطفى: تعرفين كل ثنين ممكن تصير بينهم خلافات فاذا انتي والولد تزوجتو ولا وقدر الله اختلفتو راح تگولين انتو وافقتو عليه
دمعة: لا اذا تشوفوه مناسب ما اگول هيج بكل الاحوال اني ماعرف شنو القرار المناسب فشنو تقررون اني موافقة ومبريين الذمة من هسا
مصطفى: تمام بوية براحتج
رحمة: الله يحفظج ويشوفج ايام بيضة مثل گلبج
دمعة: آمين
رجعت عند البنات وحجيتلهن الي حجيناه گالت رونق خير ما سويتي خلي هم يقررون ومن صار وقت النوم رحنا نمنا وبيومها ماجان عندنا شغل
مصطفى من ثاني يوم بدا يسأل عن الولد وعن اخلاقو اخذولهم اهلي 4 ايام لحد ما تأكد مصطفى وما لگى احد يذم الولد وبلغوهم بموافقتنا
وابو الولد گلو راح يجي الولد ويانا اذا اتفقنا يشوفون بعضهم شوفة شرعية وبابا ما اعترض لان من حقي وحق الولد نشوف بعض
اني من حجولي رفضت وما قبلت نشوف بعض بس گعدت وياي ماما رحمة وفهمتني گالت يجوز شكلو مو حلو يجوز بيه عاهة
لازم تشوفيه وتأكدين انو مابيه شي وهو هم يشوفج ويتأكد من شكلج وهذا الشي حلال لان يعتبر من حقكم انتي وياه
وقبل ما يجي يشوفج تجين تگعدين يمي ولا تحجين اي شي مجرد شوفيه وخليه يشوفج وبعدها يرجع هو لمكانو وانتي تروحين للمطبخ
وبقت ساعة تحجي لحد ما انجبرت اوافق وجابلنا مصطفى ضيافة جهزناها اني والبنات وبعد اذان العشاء بشوية اجو
اول مرة اجن النسوان وحدهن وورا دقايق قليلة اجو الزلم بس هالمرة اكثر من اول مرة من اجو ودخلو يم بابا واخواني
اجى مصطفى اخذ الضيافة وانتبهت ان اخواني طلعو خارج لان الكرفانة ما بقى بيها مجال واني وديت الضيافة للنسوان ورجعت للمطبخ
جانو الزلم يتفقون ويا بابا عالمهر وصوتهم مو كلش واضح فما جنا نسمع شنو اتفقو وتقريبا نص ساعة واجى مصطفى گال روحي عند امي
طلعت واني ميتة من التوتر واحس ركبي يطخن بعض من الرجفة وگوة گدرت اوصل عند ماما رحمة گعدت يمها ولو بكيفي اختل وراها من الخجل
شوية واجى مصطفى ويا الولد بقيت گاعدة وافرك ايديني من التوتر وهو گعد شوية جنت منزلة راسي وگالتلي ماما رحمة بصوت ناصي ارفعي راسج
رفعت راسي بس ماباوعت عليه خليتو يشوف وجهي ورجعت نزلت راسي بس مو كلش وبدون ما ينتبه باوعت على وجهو
جان من النوع الي ما يربي لا لحية ولا شوارب ومبين بعدو بداية العشرينات بس جسمو خشن مثل مصطفى يعني يطبگني مرتين
شعرو خفيف عيونو حادات كلش وطولو تقريبا 180سم وزنو اتوقع يعبر ال 75 لان گلتلكم جسمو خشن كلش
مصطفى: دمعة هذا ناظم خطيبج .. ناظم هاي دمعة خطيبتك شفتو بعض
ناظم: اي خوية وگام من مكانو
اخذو مصطفى للغرفة الي بيها الزلم واني جنت اريد اگوم وبدون ما ينتبهن النسوان ماما رحمة حطت ايدها على ركبتي بمعنى لا تروحين
شوية واجى مصطفى گال الشيخ يريد يسمع موافقة دمعة خلوها توافق ان يكون ابوي وكيلها گالتلو ماما رحمة تمام
ومن راح گالت راح يسألج الشيخ اذا موافقة يكون ابوج وكيلج بس گليلو نعم وهزيتلها راسي وسكرو الباب واخذتني ورا الباب
ورا شوية اسمع شخص من صوتو مبين جبير بالعمر گال بابا دمعة تسمعيني
دمعة: نعم
الشيخ: توافقين يكون ابوج سامر هو وكيل عنج بالزواج بدون ضغط او اجبار
دمعة: نعم
الشيخ: موافقة
دمعة: نعم
الشيخ: موافقة
دمعة: باوعت لماما رحمة اريد اتأكد شنو اگول واشترلي براسها يعني نعم وگلتلو نعم
الشيخ: تمام
ومن راحو من گدام الغرفة رحت للمطبخ وگلبي احسو يوجعني من قوة دگاتو رونق حضنتني وصارت تگمز من الفرح
واهل الولد من كمل العقد سلمو المهر لبابا والي ما جنت اعرف شگد هو وبعدها راحو وگالو عود نتواصل غير مرة علمود نحدد العرس
بعد ماراحو جنا بالمطبخ وگبت العيطة عند اهلي ونسمع صوت بابا ومصطفى دا يتلاغون باوعت لاية وضحكت باستهزاء لان عرفت السبب
رونق: ياربي سترك شنو صاير
اية: ما يحتاج تروحين نعرف شكو
رونق: شكو
اية: بابا وصوفي تعاركو عالمهر
رونق: تعاركو عالمهر شنو قابل المهر الهم
اية: مصطفى يريد ياخذو علمود دمعة تشتري جهاز العرس وبابا يريد الفلوس بحجة هو ابوها ومن حقو ياخذهن رغم هو ما يصرف علينا
رونق: الله يهديه
اية: وربي صايرة اخجل اگول ذول اخواني وهذا بابا عدا مصطفى
رونق: وميزر
اية: احمدي ربج ميزر مو مثل قبل ولا جان كرهج بعيشتج
رونق: بصدمة .. ميزر هيج
اية: غير مصطفى طردو من البيت بسبب سوالفو المكسرة
رونق: اي والله نسيت بس تدرين رب العالمين رحم بحالكن وخلا مصطفى اخوكن لولا الله ثم هو جان تورطتن ورطة عويصة
اية: اي والله هو المنقذ من بعد الله عز وجل
رونق: لا تزعلين حبيبي دمعة اذا ابوج اخذ المهر اني احجي ويا ميزر واخليه هو ومصطفى يتشاركون ويشترولج جهاز
دمعة: ما يهمني اصلا تعودت على هالسوالف عند اهلي خوصا بابا وصفاء وبراء دينهم ومذهبهم الفلوس
سكتت رونق واني جذب اگول ماهتميت بالعكس تفشلت گدام رونق وبنفس الوقت خايفة بابا ياخذ المهر ومصطفى يشتريلي جهاز من فلوسو
من سكتت الاصوات رحنا علمود ننام وعرفت ان المهر 5 ملايين بدون ذهب وبابا اخذ مليون وانطى مصطفى 4 يجهزني بيهن
عركتهم جانت ان بابا يريد ياخذ 3 ملايين وينطي 2 لمصطفى ومصطفى متخبل يگلو 2 شسوي بيهن وماطول ما طلبت ذهب لازم احنا نشتريلها
وبعد الضغط من مصطفى وماما رحمة وميزر انجبر ينطي 4 بس المهم هو يحصل شي من الفلوس ولو اعرف وين يودي الفلوس جان ارتاحيت
تخيلو ياخذ راتب الحراسة وياخذ من فلوس شغلنا ومن المهر اخذ مليون ودينار واحد ما يصرف عالبيت وكل سنة حسنة يشتريلو شغلة
مرات مصطفى يگول ابوي اذا مات حتى الله يرضى علينا ورغم كلامو غلط لان رضى الله مو متعلق باحد بس احس صدگ بابا جايبلنا الفگر
المهم نمنا بعد ما انغثينا ومر اسبوع وبعدها قررو يبدون يجهزوني جان يوم الاحد ومصطفى وماما رحمة قررو يوم الاثنين نروح نجهز
بالليل اجت سوسن باركتلي وگالت جنت اريد اجي من اول ما سمعت بخطبتج بس جنت مريضة وماگدرت اجي گلتلها معذورة
بيومها باتت يمنا ويوم الاثنين رحنا للسوگ وجانت هاي اول مرة اوصل للسوگ من شفتو تخبلت من كمية الناس الي بيه
بلشنا نشتري اني وماما رحمة ومصطفى يشيل العلاليگ ومن صارن الغراض هواي اخذهن لمحل واحد صاحبو ضمهن يمو
ورجعنا نفتر ونشتري وما خلينا شي من ملابس واحذية واكسسوارات ومكياج وجنط وعبايات وشكو شي تحتاجو العاروس حتى مگراضة اشترينا
مصطفى: وهسا خلي نروح نتغدا
دمعة: وين نتغدا
مصطفى: بالمطعم قابل وين
دمعة: تمام
رحمة: ذكروني خوما نسينا شي
مصطفى: لحد الان ما اعتقد اكو شي ناسينو واذا تذكرنا شي بعد الغدا نشتريه
رحمة: تمام
مصطفى: باقي بعد الغدا بس نشتري ذهب وجنط وهاي هي
رحمة: لا الجنط بعدين السيارة ما تكفي
مصطفى: تمام لعد
رحمة: اريد اعرف شغلة وحدة ابوك ليش ما طلب ذهب
مصطفى: يمعودة عوفيني ساكت بالله العظيم ابوي راح يجلطني لو لاگينا بباب الجامع مو هيج
رحمة: هو خلي يصلي اول شي بعدين يروح للجامع
مصطفى: ابوي من يموت حتى الانبياء يتبرون منو
رحمة: دكافي كافي (ماتريد مصطفى يكسب ذنب)
مصطفى: يمة الرسول ﷺ قال العهد الذي بيننا وبينهم الصلاة فمن تركها فقد كفر يعني العهد بينا احنا والكفار الصلاة والي يتركها كافر يعني ابوي كافر
رحمة: ماگول غير الله يهديه قبل ما يموت ويتحمل ذنب هالمسكينات الي عاشن بالحرمان والضيم بسببو
مصطفى: انتي اول وحدة
رحمة: الحمدلله على كل حال شوفتك انت وخواتك هسا عندي بالدنيا كلها
مصطفى: الله يخليج النا ويعيني علمود اسعدج بقية عمرج .. يلا وصلنا المطعم تفضلو
دمعة: دخلنا للمطعم ما اگوللكم من افخم المطاعم ولا من اسؤهن يعني وسط بس اهم شي انو نضيف
دخلنا لجناح العوائل جان اكو كم عائلة والي انتبهتلو كل عائلة وياهم الاب والام الا احنا بدون بابا
طلبلنا مصطفى كباب كل واحد نفر بس ماما رحمة نص نفر وبصراحة جانت هاي اول مرة اكل كباب بيها وعجبني كلش طعمتو
بس استغربت انو بسرعة شبعت بحيث الشيش الثاني يادوب كملتو وممكن البعض يگول هواي شيشين كاملات
بس لا تنسون اني دا اشتغل يعني جسمي يحرق دهون ويحتاج اكل علمود تبقى بيه طاقة وقدرة تحمل فالشيشين يعتبرن لا شيء عند الاكل الي اكلو بالبيت
دمعة: اني شبعت ماگدر اكمل بعد
مصطفى: اخذ مني شيش .. اكلي بوية اكلي مو كل يوم تاكلين كباب
دمعة: وربي يخبل بس ماگدر اكمل بعد احس معدتي تريد تنفجر اول مرة اشبع بهاي السرعة اول ما شفتو حسيتو ماراح يكفيني
مصطفى: الف عافية
دمعة: الله يعافيك
مصطفى: وانتي يمة انزلج بعد
رحمة: لا يمة شتنزل غير گوة خلصت الشيشين
مصطفى: لا تحسسوني اكل هواي .. واخذ الشيش الثاني الي گدامي
دمعة: كم شيش صارن الي اكلتهن
مصطفى: 6 بس
دمعة: جذببببب
مصطفى: ههههههههه قابل مثلج تگول عصفور دا ياكل مو بشر
دمعة: بس والله هواي 6 مع ذلك الف عافية
مصطفى: الله يعافيج .. هسا على ستكانة جاي تعدل المزاج ويرجع الواهس فول
دمعة: اجى عامل المطعم اخذ الصحون ووصاه مصطفى على جاي وجابلنا كل واحد ستكانة وجان جايهم شوية ثگيل
اني بطبعي ماحب الثگيل بس هالمرة عجبني ومثل ما گال مصطفى من شربنا الجاي احس الطعمة مالتو وصلت لمخي من گد ما طيب
من خلصنا الجاي بقينا دقايق گاعدين نرتاح وبعدها راح مصطفى حاسبهم وطلعنا من المطعم ورجعنا للسوگ مرة ثانية
