رواية فصلية بديلة ( شموخ ) الجزء الثاني الفصل التاسع 9 بقلم ام ملكوت

هزيت راسي بوعيد واخذت جنطني وطلعت وراه اركض بس راح يمشي مثل الزيطه مدري شبسرعه وصل لخارج الكليه .. ركب سيارته وشخطهه وترب الدنيا 

تافافت وحسيت نفسي مسويه جريمه رجعت للكافتريا مالكيت ميس الخبيثه شارده .. خليت جنطتي عل ميز وكعدت اصفن وافكر بي تالي كلت

عادي بشنو يهمني ان انجرح او لا مو زين ومانفذت رهاني وعفته يروح بحال سبيله وانه اصلا مانطيته عين ولا سويت شي يخلي يحبني

وتصنعي للغرور والتكبر واللسان الطويل جان بس حتى اشرده او اختبر الولد اذا يحبون هل شي بيه لو يكرهونه فعلا اي مالي شغل انه ماسويت شي

اعترف ان غلطت بالرهان بس مو انه الراهنت وانما ميس .. فركت وجهي بحيره وماحس الا انشحطت ايدي التفتت وشفته هوه سحبني من ايدي وطلعني بره وره الكافتريا وكال وهو يوجه اصبعه بوجهي..

_شوفي لج لا انتي ولا الاكبر منج اليكدر يطخ راسي فاهمه وانه انعجبت بيج مو بسبب عجرفتج وغرورج بالعكس انعجبت بيج وردتج لان شفت

البراءه بعيونج واعرف هل غرور والاسلوب الحقير مالتج وياي هو تصنع وظنيت انج تخافين على نفسج او انج مربايه وثكيله لهذا السبب تتصنعين

هل شي حتى تبعدين اولاد الحرام عنج بس طلعتي مو هينه متراهنه انتي وذيج السلاله علي ومسوياتني مثل السلعه عدجن بس ماعاش والله اليسوي هيج باوس فاهمه

_مو قصدي اسوي هيج واساسا لو اريد جان نفذت الرهان وخليتك تتقدملي وارفضك بكل عين صلفه بس انه صديتك من بدايه وكتلك ماريد احب ولا اتعرف ولا اتزوج وقبل اسبوع هل كلام اذا تذكر وانه ما...

_خلاص ماحاجه تشرحين لان فهمتج وعرفت شنو انتي وفعلا ليكالو كيدهن عظيم وتدرين شنو انه اصلا جنت ناوي العب وياج لا اكثر ولا اقل ردت اكسرج واعوفج ذليله ومحتار.....

تخبلت من سمعت كلامه الاخير وماتحمل لا اراديا عصبت وجبته براجدي فر وجهه فر لزمته من ياخته وكتله..

_جان رهاني اخليك تحبني وبس ماجنت ناويه العب بمشاعرك ولا العب بشرفك واشوه سمعتك واعوفك بس كلمن يفكر حسب تربيته وانصحك روح لامك تعلمك تحترم المره وماتعتبرهه لعبه بيدك وتكسرهه وتجبرهه بكيفك فاهم..

تركت قميصه وهو يباوعلي بعصبيه وساكت عفته ومشيت بعصبيه دخلت للقاعه وشفت ميس رحت عليهه بسرعه وجهت اصبعي عليهه وكتلهه..

_معتبرتج صديقتي واحجي وياج بكلشي يخصني وتاليتج تغدريني هل شكل وتخلين الولد ياخذ عني نظره مو حلوه عيب عليج ومع الاسف بس بعد شبيدي عليج كلمن يتعامل حسب تربيته..

عفتهه تريد تحجي ورحت اتصلت على عبير وكتلهه تجي تاخذني لان محاضراتي خلصن والجامعه صارت خنكه بالنسبه الي بس ماكدرت تجيلي لانهه

بالدوام وماتكدر تطلع عاد طلعت كعدت بوحده من القاعات الفارغه خليت اديه على الرحله ونزلت راسي عليهن .. صفنت اتذكر كلامه من كلي ردت

العب عليج ماعرف اوصف احساسي لمن حجه هيج حسيت نفسي رخيصه واي شخص يكدر يستغلني ويضحك علي نزلت دمعتي مقهوره رغم

قوه شخصيتي وغروري الضاهر بس بداخلي طفله حساسه وبسرعه ينكسر خاطري .. غمضت عيوني واخذتلي غفوه فتحت عيوني وانصدمت من وجود

الطلاب بالقاعه كاعدين كلمن ماخذله صفحه يسولف ويشاقي ويه صديقه عبالي بحلم هاي يمته نمت وشلون محد كعدني دخل الدكتور وانحرجت

شلون اطلع هسه كمت تعذرت من الدكتور وطلعت وانه الفشله ماخذتني رحت لقاعتي وبقيت كاعده اكلب بنقالي بعيد عن ميس اجن صديقاتي يردن

يبررن الهه موقفهه وسكتتهن راحن من يمي وبقيت بس انه ووحده من صديقاتي كاعدين لحدما خلص الدوام اخذت شغلاتي وطلعت اتمشه

للسياره ردت اركب وشفت اوس طلع من جامعته المقابيلنه باوعلي ووكف شويه تالي دار وجهه عني وركب سيارته وانه كذلك ركبت بالسياره ورجعت

للبيت ومر تقريب الاسبوعين وانه اوس ماشايفته ابد ولا اعرف اخباره الا لمن بيوم صديقاتي راحن للجامعه مالتهم للمكتبه يلي انفتحت قبل يومين

عاد رحت وياهن على امل ان اشوفه مادري شصار بيه بهل اسبوعين فعلا افتقدت وجوده وحسيت بذنب وندم لان من بدايه راهنت على حبه صرت

افكر بي زياده وانجرح كلما اتذكر كلامه وياي رغم رحت لجامعتهم حتى اشوفه واطمن عليه بس الي هدف ثاني جنت اريد ارجع اتجاهله واحسسه بقيمته

واحسسه اني زعلانه وضايجه من كلامه اخر مره وياي .. وصلنه ودخلنه للمكتبه جانت كلش جبيره وحلوه ومليانه كتب تاريخيه وروايات جديده

وقديمه بقيت اكلب بكتب الروايات مديت ايدي اخذ كتاب وانمدت ايد وياي التفتت شفته اوس صفن بعيوني لحضه وابتعد تجاهلته واخذت

الكتاب ومشيت من يمه وهو بقه صافن علي رحت عل رف الثاني ولمحته يمشي مقابيلي يرتب بالكتب وعينه علي اجت ميس يمي تريد تحجي

وياي وتجاهلتهه ورحت من يمهه رحت كعدت على كرسي وخليت الروايه الاخذته كبالي وفتحتهه اقره بيهه فتره واجه سحب الكرسي المقابيلي وكعد

رفعت عيوني بلا راسي وباوعتله باستغراب وهو بادلني بنضره تردد وحيره صفن بيه وكأن يدور على حقيقتي من خلال عيوني .. نزلت عيني عل

كتاب وهو خله اديه المتشابكه عل طاوله وكال اسمي تجاهلته ولزمت الكتاب بيدي اقره بي رجع عاد اسمي مره ثانيه تافافت وردت اكوم لزم ايدي كعدني ونترتهه منه رفع اديه مثل المستسلم وكال..

_خلاص خلينه نوضح سوء التفاهم الصار

_ماكو داعي بالنهايه احنه غرباء ومو مهم نوضح اي شي

_انه اسف على كلامي الاخير وياج بس صدكيني حجيت هيج من حركه كلبي وابد ماجان عندي نيه ان استغلج او اكسرج مثلما حجيت هذاك اليوم

_والمطلوب شنو اصفكلك هسه لانك مانويت تستغلني

_لا بس ماريد تكرهيني بسبب كلامي بحاله عصبيه

_وليش اكرهك منو انت حتى احس بمشاعر الك بكلبي ان جانت كره او حب 

_يعني مو مهم عندج الصار ويانه

_لا مو مهم انتهى كلشي لمن راسلتني ورفضتك لا رهان بقى ولا اي نيه وياك ويكون افضل لو ماتكعد وتحجي وياي بدون رسميات بعد

_لحضه بان انه طنشت سالفه الرهان وتفهمت موقفج بس لان صديقتج اجتلي قبل فتره ووضحتلي الصار واجيت اعتذر لاني اعرف جرحتج بالكلام لا اكثر ولا اقل وهسه رايح انه اخذي راحتج..

باوعتله باستغراب ورفعت راسي باوعت لميس واكفه على كتر وتباوعلنه بتساؤل عرفت كلامه عنهه صدك كام من يمي وراح يتمشه لبره صفنت بي وهو يطلع وحسيت براحه خفيفه تخلخلت

لكلبي ماعرف لان اعتذر او لان ماجان عنده نيه باستغلالي من بدايه ماعرف بس ارتاحيت لمن حجه وياي اجت ميس كعدت بمكانه حجت وهي تلزم ايدي..

_بنونه حبيبتي والله ماجان قصدي يصير كل هل شي بس ردته يعرف ان تكدر وحده تكسر خشمه ببساطه 

_وليش تردينه يعرف هل شي شنو البينج وبينه

_جانت اختي التؤام تحبه وتركض وراه وتكله احبك بس هوه انغر عليهه ورفضهه اكثر من مره وجرح مشاعرهه حتى خلاهه تنتقل من الجامعه بكبرهه لهذا السبب ردته يحس بشعور اختي لمن رفضهه 

_واستغليتيني حتى تاخذين انتقامج مو 

_لا بس شفت انتي الوحيده الصرتي كبالي وتكدرين تذلينه لان اعرفج لو تخلين شي براسج تسوينه بس لمن كتيلي ماكمل بالرهان بعد استغليت فرصه وجوده وخليته يسمعج بس صدكيني ماجان الي نيه اضرج واشوه صورتج كدام احد

_تمام سدي الموضوع ميس خلي نرجع راح تبدي محاضرتنه

_ بعدج زعلانه مني

_لا عادي بس ماتنعاد مره ثانيه تمام 

_تمام وعد ماتنعاد 

_يله نرجع

_اوك..

كمت رحت للاستقبال اشتريت كتاب الروايه اسمها "الجريمه والعقاب" عجبني سرد الروايه باول ورقتين وحبيتهه عاد اشتريتهه ورجعت لجامعتي خلصت محاضرتي وطلعت للكافتريا اخذت غداي وكعدت اكل فجاتا انسحب الكرسي المقابيلي وكعد اوس وباوع للاكل وكال..

_ماكو تفضل

_عندك فلوس كوم جيبلك نفسه ليش حتى اكلك تفضل

_انتي دومج مغروره لو بعدج تتصنعين

_ماتصنع انه 

_بلا تصنعين هذا مو اسلوبج ولا هيج طبيعه كلبج

_هفف تريد تضل كاعد الزم الهدوء ماريد اسمع هيج كلام ينرفز منك والا طاولتي تتعذرك

_بان

_نعم

_بعدني اريد اتعرف عليج ممكن

_لا مو ممكن ماعدنه هيج احنه تريد ذاك بيتنه وروح اطلب ايدي 

_لا خاف اروح وترفضيني وتنفذين رهانج

_رجعنه على سالفه الرهان يعني مانخلص منهه

_مافكج منهه منا لتنطيني مجال نتعرف

_شلون مثلا نتعرف شنو يعني اذا كعدنه وسولفنه وجه لوجه وبالنقال عبالك راح اطلع حقيقتي وطبيعتي يمك لا عيني غلطان

_تسلم عينج

باوعتله بخزره وهو ضحك فرك لحيته بتوتر وخله اديه عل طبله وكال..

_لا صدك بان اريد هيج نصير اصدقاء نسولف باريحيه واذا ماتردين نتراسل تمام فقط بالجامعه نحصر سوالفنه ولقاءنه بوقت الغده شتكولين

_ليش احس عندك نيه مو خوش وياي

_هههه لا والله الله شاهد على ما بكلبي اتجاهج انه وليد بسيط وعلى نياتي ماعندي خباثه وسوء اتجاه احد

_زين سؤال شكم مره حبيت من قبل

_ولا مره انتي اول شخص احبه 

_هم رفضت حب وحده من قبل

_هواي مو وحده

_لا تنغر بروحك

_هههه مامنغر بس كتلج الصدك هواي بنات يحبوني ويعترفن الي بس بعد الله راد ان يسرسح كلبي عليج 

_هممم تمام

_شنو تمام

_اصدقاء 

_ صدك

_اي شبيك

_تمام لعد خلي اكوم اجيب اكلي ونتغده سويه ومنا ورايح نتغدا ونطلع ونمشي سويه

_لا مو لهل درجه وين كاعدين باوربا حدك بس وقت الغده نكعد سويه نتغده ونسولف غير الغده لا اعرفك ولا تعرفني

_تمام بس كلمن يدفع ثمن غداه مو تعاركيني اذا مادفعت عنج

_شنو شايفني انت 

_ههه لا اتشاقه وياج غداج على حسابي كل يوم وماريد اعتراض رجاءا خليني اشتغل على حبج براحتي

_يوم عليك ويوم علي

_يعني لازم تدفعين

_اي مايصير ولا احب احد يدفع عني

_بنونه علينه مو تراهنتي علي علمود الغده

_استغفرالله مانخلص من سالفه الرهان ساعه السوده القبلت بيهه اتراهن

_ههه لا يله كافي مانجيب سيرته بعد تمام

_يكون احسن ..

باوعتله وصفن بعيوني مبتسم وعيونه تلمع وكأن يباوع على شي عجيب حتى انحرجت وجمر وجهي من صفناته كوه خفيت ابتسامتي ونزلت

راسي.. رجعت اكل وهو راح جاب اكله ورجع كعد وضلينه نتغده سويه ومرت ايامنه وصرنه شوي شوي نتعود على بعضنا ونتعامل على طبيعتنه

وصار كلما يصادف استراحتنه سوه يجي للكافتريا نكعد ونسولف لحدما يصير وقت المحاضره عدا المراسله بالنقال ماراسله من اروح للبيت ماكدرت

اسويهه وهيج مرت سنه وصار اوس بالنسبه الي جزء مايتجزء من حياتي ويومي وهو كذلك ورغم طلب يتقدملي اكثر من مره بس رفضت لان بعدني احس مو كامله ثقتي بي رغم حبيته بس خايفه اامن بي ويغدر بيه

واصلا بعدنه جامعه فاقترحت ان نكمل السنه الثانيه ونخطب ماطاير الزواج ماجنت اعرف اعتراضي المستمر هذا راح يكلفني سنين .. 

وبيوم كاعده بالكافتريا ورفعت راسي على اثر صوت شباب شفته هو وجماعته والصدمني ان راهب بيناتهم باوعلي اوس وغمزلي وانه مادريت

وين اضم روحي من الخوف التفت راهب علي ونزلت راسي سويت نفسي اقره بالكتاب ومامنتبهه عليهم لحدما طلعوا وانه لازمه كلبي بيدي بس كون

اوس مايجيب راهب يعرفه علي لو يكله هاي الاحبهه شفتهم طلعوا من المكان ياله جريت نفس حسيت نفسي كاعد اسوي شي غلط من وره اهلي

واخوي بس شعرفه براهب صح همه نفس القسم بس شلون صارت هيج صدفه وهو من بين الف شاب بالجامعه صادقه .. اخذت نقالي ودزيت رساله لاوس..

💬هلو اوس اكول منو هذا الشاب الوياكم اول مره اشوفه

💬ها عمري قصدج راهب الشاب الطويل

💬اي

💬صديقي هذا بس ليش 

💬لا هيج بس استغربته 

💬صديقي من زمان هو بس مايجي دائما للجامعه بس اذا سحيناه سح 

💬هاا شعجب

💬ثكيل بعد اخو مايحب يجي لكليه البنات

💬وانت 

💬شنو انه

💬ليش تجي لكليه البنات

💬غير حبيبتي بيهه

💬وقبل ماصير حبيبتك ليش جنت تجي

💬نتغده حياتي

💬اوووس علينه

💬هههه حبيبي ندور على نصيبنه يعني لو ماجاي جان ماتعرفت عليج والحمدلله حاوطت كلبج وسيطرت عليه 

💬اي مو كلبي مسرح جريمه شهل وصف

💬هههههاي احبج

💬نعم الله عود الا اكول اوس

💬كولي بنونه

💬انت جماعتك بس كون كايللهم عن علاقتنه

💬لا لا ابد يدرون بيه احبج وافتر وراج بس ماكتلهم ان صرنه نتواصل

💬اي حباب لا تحجي لان عيب واستحي منهم انتظر لحدما نخطب ساعتهه اعلن وكلهم ان جنه نتواصل

💬اي  هوه هيج حياتي 

💬تمام قوسي يله خل اروح راح تبدي محاضرتي 

💬تمام سهمي روحي انه هم راح تبدي محاضرتي

💬بيباي

💬بايات بنونتي

طلعت من المحادثه وصفنت حايره بهاي السالفه شلون بيه اخاف يجفص ويحجي لراهب عني ويكله كاعد نتواصل وادخل سين وجيم وياه

وشلون انه اتفاهم بهيج سوالف بس اخاف اضل اجفص بسالفه واجني على روحي بس لا خلاص ماراح التقي باوس بعد ادري ماراح يقبل لهذا

السبب راح اتحجج بالمحاضرات والامتحانات ومالتقي بي واذا عارض اكله يجي يتقدملي قبل الامتحانات ويخلصنه من الفضايح احسن شي

رغم بعد تعارفنه خلينه الظروف بالوسط وقررنه مانتزوج الا لمن نتخرج من الجامعه لان اوس وراه مشوار طويل ومو مال زواج هسه وانه كذلك اريد

اكمل دراستي قبلما ادخل بعش الزوجيه وانحبس مادري ياربي حيره احسن شي اشوفلي يوم و اكعد ويه اوس واكله على راهب وساعتهه نحاول ندورلنه حل لان انه بحدي ماراح اكدر احلهه ..

ثاني يوم بقيت اتحجج بالامتحانات والناس بالجامعه وصرت التقي بي فقط كل خميس صرت احسه ينتبه علي اتشرد

وكل فتره يسالني اذا احبه واريد ابقى وياه وانه ابينله اني احبه عكس يلي باله واني ماريد اتركه فقط اريد اخفف من اوقات لقاءنه بس كل هل احتياطات مافادت و الخفت منه صار ..

بيوم الخميس الاسبوع البعده كاعدين كالعاده بالكافتريه نسولف وحدنه بس الطباخ وكم بنيه موجوده بوقت الصبحيه وماعرف شخطر ببال

اوس ولزم ايدي بين اديه وهو يسالني شيخلص السنتين الباقيه حتى يتقدملي ردت احجيله عن راهب وصار الموضوع بطرف لساني وماحس الا فجاة راهب حط فوك راسنه ..

هو شافنه هيج لو تخبل اجه بسرعه لزم ياخه اوس كومه عن الكرسي وجابه بكله بخشمه صرخت ورحت ابعده عنه وانه اتوسل

بي يتركه ومايسويله شي نتر بيه وتلازموا ثنينهم محد يعرف شسالفه لوما الشباب اجت من بره فاككتهم جان واحد كتل الثاني بعدوهم وهمه وجوهتهم مدمايه وجه راهب صبعه بوجه اوس وكال..

_اعتبرتك صاحبي ورفيق دربي هيج تخوني وتلعب بعرضي وشرفي يا بلا شرف 

_شنوو شبيك انت منو كاعد يلعب بعرضك شسامع عني

_ماحاجه اسمع شوفتكم بهذا الشكل جانت كافيه تبينلي شكد انت نذل وخسيس ..

ضل اوس مفهي مايعرف على شنو يحجي التفت علي راهب وهو معصب وصدره يصعد وينزل من العصبيه نتر روحه من اللازمينه واجه علي لزم

ايدي عصرهه حيل حسيتهه انخلعت وطلعني بره وانه اباوع لاوس اجه ورانه شكله فهم السالفه شنو وصلنه يم الباب ولزم ايد راهب وحجه بهدوء..

_لحضه راهب وين مودي البنيه شنو علاقتك بيهه وين موديهه 

_وخر منا اوس لا اجرم بيك واهينك فاحفظ كرامتك وروح منا ولو عندك ذره رجوله لا تشوفني وجهك بعد

_شتريد تحجي احجي مابتعد اذا مافهم السالفه وشنو علاقتك بالبنيه

_يعني كاعد ودك سوالف انت وياهه والله اعلم شنو بيناتكم بعد وماتدري بيهه اختي 

_شنووو بان اختك تحجي صدك انت راهب لو تقشمر علي 

_لا اقشمر جاهل انه كاعد العب اوس وخر من كدامي تره روحي كامزه لا تخليني اسوي بيك مصيبه 

_لحضه راهب والله العظيم مادري بيهه اختك ولا كلتلي هاي هيه كبالك اسالهه ولا مره كالتلي راهب اخوي او عندي اخ يداوم بجامعتك

_حتى لو ماتدري اوس هذا عرض مو لعبه لو تحبهه صدك جان اجيت دكيت باب بيت اهلهه ماتكعد وتسولف وياهه كبال الناس ترى راح اتخبل عليك روح منا 

_شتتخبل والحسين الشهيد مادري بيهه اختك واذا انه جذاب اسالهه كللهه يدري بيه اخوج لو لا وهي تجاوبك ..

باوعلي وانه رفعت راسي وحجيت ويه راهب..

_اي راهب مايدري بيه اختك وانه قصدا ماكتله حتى لا يحجيلك وتسوي هيج وانه الماخليته يجي يتقدملي لان بعده بالجامعه ومانكدر نتزوج هسه 

_انتي سكتي وانجبي حسابج بالبيت اليوم جهنم الحمره تمسي عليج وانت الثاني حسابك عسير وراح اخذه منك على مرامي لا عبالك تخلص بكم بوكس تره بعده غليلي ماشفى منك 

_راهب صدكني ياخويه والله لو ادري بيهه اختك فلا احجي وياهه ولا اباوعلهه اصلا وانت تدري وحاجيلك شكد انشلع كلبي حتى اخليهه تحاجيني 

_لكك مو بس الي انت لو عندك شرف ماتحجي بيهه كدام جماعتنه بس انت مو زلمه وماعندك غيره 

_لا والله من حجيت وياهه وتعرفت عليهه بطلت وماصرت اجيب سيرتهه لان حسبتهه صارت عرضي وشي خاص بيه

_هههههه شي خاص بيك مو تمام اريد اشوفهه شلون تصير شي خاص بيك بله 

_باجر جايب اهلي وجاي اخطب اذا توافق طبعا

_اي ليش لا تعالوا اهلا وسهلا بيكم..

رفعت راسي بصدمه مامصدكه معقوله راهب يسويهه ويوافق عليه ويزوجنياه بس ومستقبلنه شلون ولو عادي مو مهم اذا عنده وظيفه او لا

المهم مايفرقوني عنه بقه يباوعلي بتحدي لزم ايدي عصرهه حيل واحس شاغت روحي نتر بيه وطلعنه من الجامعه اشر لتكسي فتح الباب ودفعني

لداخله كعدت وصعد هوه كدام وتحركت السياره مسافه الطريق وهو قابض ايده ويباوعلي بعصبيه ويهز راسه بوعيد من المرايه الجانبيه .. فعلا بهل

وقت حسيت بالخوف من الاخ الجبير يلي بعمري ماحسيت بي بحيث انهد حيلي وكلبي مستمر يخفق بجنون وكأني رايحه لموتي وانه كل الطريق

ادعي تكون امي والبنات موجودات حتى احتمي بيهن ومايسويلي شي ادري بي مايسوي شي جبير بس اخاف احصلي جم طكه واذا طكني بوكس هاي هيه كبل اموت ..يموي يارب سترك يارب

استرني فوق الارض وتحت الارض ويوم العرض عليك دخيلك يارب اهدي كلب راهب ولا تخلي يسويلي شي خلي يهده لمن نوصل للبيت ويعوفني بسبيلي يارب ..

وصلنه للبيت دفع الحساب ونزل فتح الباب ونزلني وهو لازم زندي دك باب بيتنه وفتحته اسراء جريت نفس لمن شفتهه بعدت ايد راهب عني ورحتلهه اركض صرت وراهه وكتلهه..

_اسراء فدوا احجي وياه وفهمي ماسويت شي غلط انه 

_شنو شصاير شبيك راهب شمسويه بان وجايبهه هيج من الكليه..

بعد اسراء عني وانه مجلبه بذيالهه اجه لزم شعري من وره الحجاب وهمس بفحيح يم اذني..

_تلعبين من وراي لج بانه ماتعرفين اخوج شنو ماخفتي اشوفج وياه واجرم بيكم لججج ماخفتيييي مننن عيووون الناااس التراقببب بيكمممم 

_والله ماسويت شي غلط والله بس كاعدين ونسولف مثل الزملاء حتى ضحكه ماضحك وياه والله

_وشتفسرين لزمته لايدج لجج عوفي العيب مافكرتي عندج رب فوكاج يحاسبج ماتدريين اللمسه حرام من الشخص الغريب 

_والله مادري بي لزم ايدي فجاتا هو لزمهه وانت دخلت ومن عرفته لهسه ماتجرأ وسواهه بس حظي هذا جابك وخلاك تشوف شي اول مره يصير والله

_لو ماجيت شلون ها ولج جان بعد لزمه الايد هاي الله اعلم شراح يصير بيناتكم لجج تردين تنزلين راسي تردين الناس تحجي علي وتجي تكلي اختك تواعد بالكليات وتتمعشك ولج ماعاشت ولا جابتهه امهه التنزل راسي وتجيب معدلي ومعدل اهلي بالباطل فاهمه..

لازم بشعري ويعت بي واسراء تتوسل يعوفني تريد تفهم شسالفه ولمن حجه اخر كلامه لطمت على صدرهه وطلعت امي من المطبخ تركض علينه اخذتني من ايده وختلت وراهه ابجي وهي تحجي وتهدي بي..

_ولك يمه وليدي شبيك على اختك شمسويه وهيج هايج عليهه جاي وانت بعمرك ماضريت وحده من خواتك شصاير يمه احجيلي

_سالي بنتج الكاضيتهه تعشك وتتمعشك وتواعد بالكليات كدام الناس ولو ماشفتهم ماستبعد باجر يجيلي واحد يكلي اختك تواعد رفيقك والناس كلهه تدري بيهم لجج يووم لو ما الله جابهم وخلاهم كباال عيني لا تستبعدين باجر بتج تنهب لو تشرد ويه واحد حقير يووم..

_ياا يمه صدك تحجي ولج بانه منو هذا اليحجي عليه اخوج ولج تردين تسودين وجهنه من الله لا ينطيج ولج تردين يجيبون معدل امج واخوج ويكولون ماعرفوا يربون بتهم تالي عمره احنه ينجاب معدلنه بالعاطل ولج بان من غض...

_لا يمه فدوه لا تغضبين علي والله ماعدي شي وياه والله بس حجي عادي مثل الزملاء وماكو غير الكلام بيناتنه حتى مراسله ماقبلت اراسله لان ماكدرت اخون ثقتهم والولد ماعنده نيه عاطله

بالعكس هو يلح علي عل زواج وانه ارفض يجي يتقدملي هسه لان بعده جامعه واعرفكم ماتقبلون تنطوني اله الا اذا كمل دراسه وتوظف والله امي صدكيني

_ولج اذا تدرين بينه مانقبل بي هسه وانتي رفضتي بعد شكو تكعدين وتدكين فج وياه ولج بان تردين تلعبين وتسوين علاقات ويه الولد حالج حال بنات الحرام 

_امي والله انه احبه وماعندي نيه العب وياه بس ردت اتعرف عليه من خلال الكلام كل يوم وجنه مقررين اصلا بنهايه هاي السنه يجي يخطبني ..

حجيت هيج لو تخبل راهب اجه لزمني من فجي لزكني بالحايط وكال ..

_شنو كلتي عيني #بان شنو والله خوش انه هنا جلب حراسه بالبيت معتبرتني تكعدين وتسولفين وياه وتتعرفين وتقررين يوم الخطوبه والعرس بعد جان عرستوا واجيتي حطيتينه بالامر الواقع حتى اعرف شلون اذبحكم واشرب من دمكم 

_مو هيج والله جنت ناويه احجيلكم لمن يقرر يجي يتقدملي

_لا خاف تصير زحمه امشي روحي خابري خلي يجي ياخذج للمحكمه تزوجوا وتعالوا هنا عيشوا يمي بيتي مفتوح الكم ..

اخذني جر من شعري لباب الشارع وهو معصب ويحجي ماعرفت شسوي حسيت بضعف مو طبيعي وخوف ماخذ حيلي اول مره راهب يتعاكل ويه وحده من عدنه بهاي الطريقه بحيث امي

واسراء لازماته وماكدرن يدفعنه عني ابتعد شويه افتر بالمكان باوعلي ورجع علي لزمني من وجهي عصره وهو يحجي من بين سنونه..

_شوفي ولج جامعه بعد ماكو تنجبين وتكعدين بالبيت ومن باجر اجيبلج كل* يكبعج وياخذج والعنده مانع يطلع وياج مفهووم واريد اشوف شلون الناس تلعب بعرضي بعد

_لا راهب فدوا الا الجامعه لا تضيع مستقبلي هو مو كلك ووعدك يجي يخطبني مو كلك راح ازوركم باجر وااطلب ايدهه صدكني هو يحبني وراح يجي يخطبني مايضحك علي هوه مايلعب بعرض احد

_اي والمطلوب شنو المطلوووب تردددين اقبللل بييي وافتحللله بيتييي بعدمااا سرسححح واخذذذ راحتتته ويييه اختييي تردييين اقبللل حتى يعيرنييي ويكليييي

ضحكت على اختك وكسرت خشمك واخذتتتهه ولج لو يضل اخر واحدد بالدنيا لووو اعرفف منيتي لو هوه ماقبل ياخذج ولا اخليي يعتب باب البيت مفهوووم

_راهبب حباب والله هو يحبك وماجان يدري بيك اخوي وماردت اكله حتى لا يروح يحجي وياك ويطلب ايدي منك بدون مادري انه وهو صاحبك وتدري بي شنو

_اششش ولج لا تدافعين عنه كلمه زايده منج ادفنج هناا والخلقج فاهمممه..

زمخ بيه ونزلت راسي ارجف لزمته امي اجت اسراء اخذتني لداخل البيت وهيه تهدي بيه وانه احاول احجي وياهه تروح تقنعه يقبل باوس

بوقتهه متت من البجي عفتهه ودخلت للغرفه دخلت جوه البطانيه وبقيت ابجي لحدما خلصت دموعي وخلص حيلي وياهن وغفيت مستسلمه

للضلام يلي راح يعم على ايامي من بعد يلي راح يصير .. ثاني يوم التزم اوس بحجايته جاب اهله واجه يخطبني بقيت لازمه كلبي بيدي وخايفه

لمن شفت #راهب فتحلهم الباب ورحب بيهم وكأن ماصاير شي للحضه انزرع امل بداخلي ان راهب يقبل بي ونتزوج او يخلينه نخطب وتالي من

نتخرج نتزوج ضنيت ان مايهون عليه زعلي وراح يقبل بي حتى لو بقى زعلان مني ومنه بس غلطانه وحيل همين واحنه كاعدين متوترين ماحس الا

صار صوت عياط راهب واصل لاخر الشارع وهو يحجي على اوس ويتهمه ان ضحك علي ولعب بيه من وراه .. بقه هوه وابوه واخوه يهدون بي وهو ماله شغل

ضال يصيح واخر شي ختمهه بطرده هوه واهله دكيت على رجلي وبقيت ابجي واتوسل بامي تروح تهدي وتقنعه يقبل بس عبث امي واحنه كلنه ندري

بي لو ركب العناد راسه هاي هيه .. طلعوا الناس من البيت وهمه ضايجين ومعصبين باوعت من الشباك واشوف اوس طلع ورا اهله وهو يتلفت كل شوي على راهب ويحاول يحجي وياه وراهب

ياشرله عل باب حسيت كرامتي يلي انسحلت بالكاع مو كرامه اوس واهله انعصر كلبي على مضهره وهو يمشي بانكسار بس سرعان ما انتشلني من انكساري لمن اجتلي رساله منه بعدما طلعوا وشفته كاتب بيهه..

💬 السويته وياج جان غلطي واستاهل الرزاله والطرده من رفيق دربي بس لا تظنين لهنا وخلص عندي انتي ورفيقي اهم من كرامتي وكرامه عشيرتي وماراح امل ولا اكل من الجيه الكم لحدما الله يهدي ويقبل ينطيج الي احبج بان لا تيأسي حبيبتي

شفت رسالته لو عبالك كدامي واكف وفاتح حضنه ذبيت روحي عل فراش وتخيلت نفسي حاضنته وانطلقت دموعي تنزل بحركه وكسره خاطر لحدما

هدات شويه بعدها باسبوع من الاقناع من طرف امي واسراء وعبير ياله قبل يخليني اداوم بس نقلني لغير جامعتي وصار يروح ويرجع ويانه انه

وعبير واول ماحذرني ان بس يلمح اوس قريب من الجامعه اذبحه ومايرفلي جفن وبصراحه تهديده هذا خوفني وماخلاني افكر التقي باوس

حتى .. وهيج توالت الايام والاشهر وصار اوس يحاجيني كل يوم بالنقال واحس حبنه زاد عن قبل مانقص وفعلا ماجذب علي وصار كل فتره يجيب

اهله ويجي لو يجي بس هوه يطلب ايدي من راهب لحدما اخر شي راهب صار يستحي من اهله كليوم مطلعهم من بيتنه بخجله صار يهدد باوس اذا

جاب اهله بعد ينكتل كدامهم وينطرد واوس ماخله اهله يجون وياه بعد مو خوفا وانما احتراما لطلب راهب ولمن مرت السنتين وتخرجنه جاب اوس اهله

والعشيره كلهه واجه يطلب ايدي كلنه تفاجانه بتصرفه هذا وماتوقعناه منه وخفت كلش ان راهب يطردهم ويفشلنه بس الحمدلله ماطردهم وانما حجه وياهم حجي وكلهم..

_عمي اختنه بعدهه صغيره ولازم اخواتهه الاكبر يتزوجن ياله هيه خلي ينتظر منا ليتزوجن تالي يجي ياخذهه من هل عين 

_ياعمي البشر كلمن اله قسمته ونصيبه يجوز خواتهه يطولن لو مايردن يتزوجن ليش تكطع بنصيب اختهن والبنيه حرثه ياعمي مو كل يوم تجيلهه قسمه زينه وتكدر تخليهم يخطبون وتالي يمته ماتريد خلي يتزوجون

_لا عمي السموحه منك انه مقرر انطي خواتي بالسره يعني تقبلهه اختي الجبيره تضل تباوع وتشوف اختهه الصغيره تتزوج يعني باعتبار تصير

عانس ومحد يتقبل يتزوجهه بعد وانت تدري بالناس شنو وشلون يطلعون العيبه بالبنيه لو ماتزوجت والاصغر منهه تزوجن

_اي صحيح يا ابني بس تكدر تخليهم يخطبون

_لا عمي خليهه هسه هوه مامستعجل عل زواج بعده لا وظيفه لا بيت وانه الصراحه ماريد انطي اختي لواحد عطال بطال ايد وره وايد كدام

_وياك حق يابني وخير انشاءلله بقت هيه يمكم وابنه موجود يمته ماتسمح انت تلكانه ببابك طالبين المعروف منك

_والنعم منكم شيوخنه ماتقصرون واطلب السموحه منكم ترى جيتكم عزيزه وغاليه على كلبي واليوم كلكم معزومين على حسابي وماريد احد يكول لا 

_كرمك واصل يابني والله عدنه اشغال ومانكدر نضل اكثر

_وروح ابوي محد يروح بيكم لاشغاله الا اقدم الواجب الكم 

_الله يرحم ابوك ويهدي بالك على وليدنه وتحن عليه بالمعروف

_الله كريم شيخنه ..

سمعناهم كاموا واحنه طشينه من باب الدوانيه شي بالغرفه وشي بالمطبخ وشي بالصاله انه لبدت وره البرده لا يشوفني ويتخبل اجه دخل للصاله كال

لامي راح ياخذهم للمطعم ودخل جاب فلوس من غرفته وطلعلهم اخذ وياه بالسياره شكم واحد وطلع وهمه بسياراتهم ثنين طلعوا وراه جانو قلال

مو هواي يمكن بيهم ٨ نفرات امه وابوه واخوه وجم واحد معكل وهوه ماجاي حتى لا يعصب راهب من يشوفه .. طلعوا من البيت وطلعت امي

سدت باب الشارع وراهم حسيت بخنكه مو طبيعيه رحت للحديقه وره البيت بقيت واكفه وصافنه عل بستان وضوه القمر عاكس عل خضار

والهوى يشرح الصدر .. لزمتني رجفه من الهوى البارد ونزلت دموعي حاره على خدي محتاره شلون اقنع راهب يوافق عليه زودهه وتعبنه وخايفه اوس

يمل ويبطل مايريدني بعد.. جريت حسره ودخلت لغرفتي وبوجهي للحمام قفلت الباب واخذت نقال اتصلت على اوس وجاوبني بصوت مخنوك معناهه

وصله خبر رفض راهب لشيوخهم حجيت وياه شويه ومابينلي ان مل او تعب بالعكس شجعني ووعدني ماراح يبطل جيات الا لمن بوافق عليه

راهب وفعلا هذا السواه بهاي ال٦ سنوات كلهه ماتمر سنه او سنتين الا وهو متقدملي مرتين او اكثر وطارده راهب حتى اهله ملوا وتعبوا وماصاروا يجون وياه

غير بس امه لخاطر ابنهه تجي وكذلك يرفضهم ويكلهم بيتنه يتعذر واحد مثلك رغم اسراء تزوجت بعد مشكلتنه ب٣ سنوات وبقت بس عبير وكلتله انه

مالك علاقه بيه خليهه تتزوج بس هو ابد وكأن مايسمع .. ولهذا وقتنه وهو رافض رفض قاطع وحتى توسلات امي وخواتي البقيه مافادت وياه...

.

.

:-مرت السنوات وكبرت ريانه ام خدود سمره واليوم صار عمرهه ٣ سنوات سوينالهه حفله عيد ميلاد بيناتنه وكالعاده بس بيت عمو ساجد اجوي لحفلتهه ..

فاخذت ريانه اول ماكعدت العصر سبحتهه ونشفتهه وطلعت اخذت فستانهه الصغيرون الجويتي لبستهه ومشطت شعرها خليتلهه قراصات بلون الفستان 

وعطر ونزلت بالكاع راحت تركض لبيبيتهه .. مخبله الكل عليهه اول مابدت تمشي خطوات ملت البيت بصوتهه وركضهه وخربطتهه بالحجي وبهاي السنين صايره بس حالتين اختناق عدهه

بفصل الربيع من تغيير الجو والحمدلله اجتازتهه بخير وماعذبتهه فتره طويله صرت انطيهه البخاخ بكل وقت واسويلهه اللازم ماخليتهه تتاذه زايد من الكحه ..

اما تعليمي فاخيرا كملت اول خطواتي لهدفي كملت اخر سنه الي بالجامعه بعدما طلعت أربعين ريانه وكملت بعدهه دبلوم سنتين ودخلت دوره انضباطيه ٦ اشهر 

وبعد شهر انشاءلله تخلص واقدم على اختبار النيابه العامه ولو قبلوني اكدر اتوظف وابدي اتدرب بالدائره سنتين او سنه حتى اعرف طبيعه الشغل واتعود عليه والفضل لالله ولعائلتي كدرت

اتخطى كل هل سنين التعليميه بامتياز .. وربي يسهلي وانجح بهل اختبار لان هو يلي راح يعتمد عليه مستقبلي كمحققه جنائيه بالنيابه العامه وبس اذا اجتزته اكدر اتوظف باحدى دوائرهه ... 

واليوم وباحدى المقرات التعليميه العسكريه بالبصره لبست كفوفي وربطت الحزام على ضهري وتقدمت انه والفريق عل ميز الكدامنه يلي مليان اسلحه مديت ايدي اخذت بقايا السلاح ووكفت

اركب بي كملت وصوبنه عل هدف بقوه انطلق صوت الصافره واطلقنه النار كلنه سويه قسم من عدنه يلي صوب الهدف وقسم يلي صوب قريب عنه وقسم بعد خطوات عنه اما انه وللاسف اول

ماطلقت النار صارت رجفه بيدي وضيعت الهدف غمضت عيوني معصبه وانطانه المدرب استراحه قصيره بعد ٣ ساعات من التدريب .. عفت السلاح ورحت لجنطتي العسكريه شربت ماي وكعدت عل

مسطبه صفنت بالمكان وبمجموعه الشباب يلي وياي بالتدريب رغم خوفي القديم والفوبيا العندي من تجمع الزلم الا اني الحمدلله ماخليت الخوف والرهاب يسيطر علي ويجبرني استستلم بالعكس

خليت الرهاب هو يلي يخضع لقوه كلبي وينمحي تماما مني والفضل لالله ولبابا لان خلاني اواجه رهابي هذا واتغلب عليه .. صفنت وسرحت بذاكرتي لمن تخرجت من الجامعه وسجلت بالمعهد ...

_قبل ٥ اشهر_

توه كاعده والنومه بعدهه بعيني فجاتا اندك الباب دكتين ونفتح حتى مالحكت اصيح منو دخلت امي واجت لزمت ايدي سحبتني وحجت وهي تستعجلني..

_كومي شموخ ابوج يريدج بسرعه

_شكو شصاير يمه شيريد بابا 

_تعالي وياي هسه وانتي تعرفين

_اي خل اغسل وجهي عل اقل 

_بعدين غسلي كومي هسه..

باوعت للساعه ب٤ الفجر شفت ريانه نايمه بجربايتهه وكمت رحت ويه امي على عمى عيوني مادري شسالفه ومطفيه عل رئيسي دخلتني للصاله وبابا اجه انطاني ملابس وشفقه وكال..

_روحي بابا لبسي هذولي الملابس وتعالي

_شنو هاي الملابس وين رايحين

_هيج نفتر عندي شغله الج 

_بابا بس انت شغلك الفجر

_يله لج لا تطوخينهه امشي بدلي وتعاي بسرعه

_احح تمام ..

اخذت الملابس ورجعت للغرفه رفعتهن واشوفهن بنطرون وقميص رجاليه صفنت ورفعت اكتافي بحيره لبستهن ولفيت شعري بقبعه مال شال ولبست الشفقه وطلعت شافني بابا وكال موجه الكلام لامي..

_اكلج سمائي اشو طلع عندي ولد رابع ومادري 

_بابااا ليش تتنمر 

_هههه لا بنيتي اتشاقه وياج يله لبسي هذا الحذاء حتى نروح 

_ماناوي تكلي وين

_نلعب طوبه

_لا صدك بابا عن الشقه وين رايحين

_والله شبيج نلعب طوبه دام ولدي مو يمي اطلع بنيتي شكو بيهه

_مو عندك سلام ماتاخذه

_ماعنده رجوله مثلج

_ياا بابا شبيك وياي اليوم من الفجر

_ههههاي اروح فدوا لبنيتي يله امشينه بويه ابو الشباب غالبك اليوم بالطوبه

_هههه تمام انت جبتهه لروحك الا اخليك ترجع للبيت زعلان وتنضم بحضن مرتك

_اويلييي

_ههههه..

ضحكنه عليه وام الخجل ضربته على بطنه خفيف خله ايده على كتفي مثل عادته وطلعنه نمشي والجو يجنن شوي بي ضوه وهوى بارد وهدوووء

صار هل وقت والجو عشقي من هاي اللحضه ..

وصلنه للملعب اليبعد كم متر عن بيتنه لكيناه فارغ ومفتوح بابهم مكسور وماسادينه عاد دخلنه مثل الحراميه اخذ الطوبه بابا وابتعد صار بجهه وانه بجهه ثانيه وكال وهو يضرب الطوبه بالكاع وترجع عليه..

_خلينه نتراهن 

_اي ليش لا

_الشوط من ٥ واليفوز ساعه كامله يركض حوالين الملعب

_اليفوز؟

_اي اليفوز يفتر حوالين الملعب

_بس انت عندك ضيق تنفس ماتكدر اذا خسرت شوف غير هل رهان

_ هاي بقت يمج فوزي وعفيني من التعب

_اي ليش لا اتفقنا ..

تقدمنه ووكفنه بالوسط شمر الطوبه ليفوك وطفر ضربهه بصدره وراح يركضلهه تفاجأت من حركته هاي ورحت اركض وراه اراوغه لحدما مرت فتره

واحنه نتناوب عليهه لحدما مررتهه من يمه وشتتهه بالكول مالته رفعت ايدي اضحك بقينه نلعب تقريب الساعه متنه تعب ومره هوه يكول ومره انه كلت لبابا تعبت كافي ورجعت يم الباب درت وجهي وانصدم بكومه شباب لابسين لونين طقم اصفر واحمر متكتفين ويباوعون علينه مادري من يمته

تحمحمت وعدلت رداناتي باوعت لبابا لمن حجه وياهم ماعرف شنو بهمس وهمه هزوله راسهم راح وكف على صفحه وصاح علي..

_يله بويه جيبي الفوز مابيه حيل اركض..

باوعتله بتساؤل ومفهيه اجه واحد منهم كبالي وكال..

_شنو اسمك انت يا ولد

_هاا اسمي شم.. احم قصدي شاهين

_انت عراقي 

_ليش

_اشو بيك مياعه الكوريين 

_هاا اي هواي يكلولي هيج ههه ..

ابتسم وهو يباوعلي باستغراب جنه شك بامري ابتعد وهو يضرب بالطوبه بالكاع ويباوع بجديه شويه وكال..

_انت كد اللعب 

_اي يعني

_وريني شطارتك بله..

اشر باصبعه لواحد من فريقه واجه وكف كبال العمود مال كول وكال..

_راح نلعب شوتات تالي مراوغه اريد اشوف مستواك شلونه حتى هيج ابوك واثق منك ويريد يسجلك ويانه 

_اي كحاله خاصه قبلت طلبه بس شرطي تجيب ٤ كولات من اصل ٥ شوتات

_٤ من ٥ شوتات 

_اي عندك اعتراض

_احم لا عادي 

_وريني الشطاره يا ولد انت 

هزيت راسي ب اي واخذت الطوبه خليتهه عل دائريه البيضه وتراجعت خطوات عنهه غمضت عيوني واخذت نفس التفتت عليهم وانه اشوفهم اكثر من ٢٠ واحد واحد ويباوعلي توترت وحسيت بضيقه شديت قبضه ايدي وفهمت ليش بابا جابني هنا ولازم اتعاون واخلص نفسي من هل رهاب المسويلي عقده .. 

باوعت للعمود وتذكرت لمن جنه نلعب طوبه انه ومرتضى واحسان واراوغهم من عمر الابتدائيه ولحدما صرت بالثالث متوسط يعني عدي خبره بيهه وتذكرت بلعبات المنتخب شلون يشوتون واتخيل روحي بمكانهم اشوت ركزت عل طوبه وانطلقت الصافره .. 

هرولت بمكاني وراوغت برجلي بجهه وشتت الطوبه بجهه ثانيه وجبت كول .. ابتسمت وباوعت لبابا واشرت بصبعي نفس حركه الخلط وهو اشرلي جيد .. خليت الطوبه مره ثانيه وشتت

نفس الشوته بس عرف حركتي لزمهه وماخلاهه تفوت بس بالثالثه لا غيرت طريقتي و لان المكان جبير وبسهوله تدخل الطوبه.. وبالرابعه ابتعدت عن الطوبه واطلق الصفاره ركضت ورفعت رجلي

اشوتهه بشكل مستقيم وقوي بس لمن وصلت رجلي للطوبه خففت القوه وشتتهه بقوه مقبوله بحيث هو طفر يريد ياخذهه وهي عبرت من جواه ودخلت الهدف ورئيس الفريق

متكتف ويهز راسه وانه التهيت بالطوبه والفوز ونسيت او رخت اعصابي من وجود الولد بنفس مكاني احس تجاوزت اول خط من الرهاب بس بقيه الشوتات ماحالفني الحظ ودخلن للكول باوعتله واجه هوه وفريقه وكفو مقابيلي وكال..

_عفيه عليك رغم فوتت اهداف بس عندك حركات حلوه ومقبوله هسه اريد اشوف مستواك بالمراوغه

_مو كلش قويه بالمراوغه اخاف انكسر ومالك شغل بكلام ابوي ماريد ادخل للفريق راح اروح 

_لحضه وين تعال خل نتفاهم

_لا راح اروح ماريد ابقى اكثر اختنك..

وخرت من يمهم واجه بابا لزم ايدي ورجعني يمهم سحل وانه اتوسل بي يخليني اروح بهمس بس هوه ابد وكأن مايسمعني وكفني بمكاني وكله..

_ابني شوي ماعنده ثقه بنفسه ومايعرف الموهبه العنده اريد تتساهل وياه شويه

_تمام حجي انه اتدبر امره اشو تعال..

_راد يلزم ايدي وابتعدت صفن بوجهي وتافاف واجه من وراي لزمني من قوله القميص ومشاني للحايط خلاني اوكف وكلي اراقب لعبهم اجه بابا يمي وكتله..

_بابا ليش تضغط هل شكل علي خليني براحتي اتجاوز الرهاب شوي شوي 

_المعهد بعد شهر وهو مختلط مو متوحد نفس الكليه الرحتيلهه واذا رادوج للتدريب ويه الفريق شتكلليهم اسفه بس عندي رهاب منكم انطوني مجال اتعود عليكم شوي شوي حتى بنفس الساعه يفصلونج ويكلولج كعدي بالمطبخ احسلج

_بس بابا ماكدر ابقى هنا اكثر وهذا كلساع صفن بيه ياساعه يعرف انه بنيه

_ اعتبري نفسج ولد وتصرفي على طبيعتج وهمه مايشكون او يعرفون بيج بنيه 

_بس بابا

_بنتي شموخ اذا ماتواجهين مخاوفج وتضغطين على نفسج مستحيل تكدرين تتخطينهه وراح تدمرين مستقبلج وهدفج بيدج وانتي اكيد ماتردين يكون تعليمج وشغلج

ناقص ويكولون هاي المحققه تخاف من الزلم ويعتبرونهه نقطه ضعف بالنسبه الج ويستغلونهه بنيتي المجال يلي رايحتله بي هواي منافسين

وقضاياج ممكن تتطلب توكفين مقابيل عدد من المتهمين وتستجوبينهم بهاي الحاله راح يكولون عليج فاشله ووجودج بالدائره هوه واسطه مو موهبه وشطاره

_بابا مو بيدي احس بخنكه بمجرد ماشوفهم حوالي

_ميخالف بابا سيطري على خوفج هذا ولمن تترددين باوعيلي انه هنا يمج ماخلي احد يضرج واذا وكفتي بين الزلم مدام كلبج قوي محد يكدر ياذيج او يحجي وياج كلمه تذكرين شسويتي بثائر

_اي

_اعتبريهم نفس ثائر ولازم تواجهينهم وماتخافين منهم

_تمام بابا احاول 

_مو احاول الاريد اسمعه منج هو اي بابا راح اتغلب على هل رهاب والخوف 

_اي بابا باذن الله راح اسيطر على خوفي ورهابي وراح اكون كد ثقتك راح اصير اقوى من الخوف يلي بداخلي وانه بنت الشهم 

_والسبع تنعام منك وليدي

_ههههه

_يله باوعي تره صار ساعه يلعبون واحنه نسولف

_عادي اعرف شلون العب بس جنت خايفه وتحجج حتى اشرد

_افاا من يمته الشهم يخلف جبناء 

_حشاك بويه خلفتك تدوس الخوف وتمشي عل جبال مايهمهه فلان ولا علان

_كفووو ..

ابتسمت ورجعت اباوعلهم شلون يلعبون كملوا واشرولي اروح العب ويه جم شخص غمضت عيوني ورفعت راسي للسما ودعيت بكلبي 

"يارب اخرجني من حولي الى حولك ومن ضعفي الى قوتك " 

فتحت عيوني و رحت وتفاجأت من نفسي من سويت الكالي عليه بابا وشفت ان عادي اوكف بيناتهم وبالعكس اصلا حسيت بقوه كلب مو طبيعيه 

لمن تخيلتهم يدورون على نقطه ضعف الي وانهم نفس ثائر وطبعا هذا الانطباع ما اخذته فقط على هذا الفريق من الزلم وانما اخذته على جنس ادم كله

صرت لمن اشوف مجموعه احس بكره وحقد اتجاهم لا ارادي يخليني اضهر قويه وواثقه كدامهم وهل قوه والثقه صارت تغلب الرهاب والخوف يلي بكلبي اتجاهم واستمريت كل يوم اجي انه وبابا

اتدرب ويه الفريق على الطوبه الى ان كدرت اتغلب على خوفي بعد ٣ ايام فقط واخر يوم الي بالفريق لمن بلغتهم اني راح ابطل منهم وماكدر العب وياهم

شفتهم ضاجوا لانهم تعودوا علي كمنافس الهم الا رئيسهم حسيت ضاج وعصب من لا شيء حتى تجرأ ولزم ايدي اخذني على صفحه .. نترت ايدي منه وحجيت بعصبيه..

_منو سمحلك تلزم ايدي

_ليش مامسموحلي الزم ايدك مو انت ولد حالك من حالي لو عندك حجي ثاني

_حتى لو ولد مثلك مايصير تمد ايدك علي بدون اذني اكره شخص يلزمني

_اي وياج حق هم هوه حرام علي الزمج لانج بالنهايه بنيه ومايصير

_من يمته تعرف

_من الاول بس ردت اشوف وين تردون توصلون انتي وابوج وشنو سبب جيتكم وطلب ابوج مني حتى ادربج واضمج لفريقي 

_ماكو داعي تعرف واساسا اليوم اخر يوم بعد راح ابطل اعتبر ماعرفت شي ولا شفت شخص مثلي

_جؤ مو صغير انه وتجين وترحين على كيفج فاهمه شنو غايتج ليكون الفريق الخصم دازج علينه تعرفين خطتنه وطريقه لعبنه

_ههه الضاهر مكثر مسلسلات انت وفعلا بابا مانلام لمن كلي اعتبري الكل هنا مثل ثائر طلع الرئيس ماخذ هواي من عجرفته 

_منو ثائر هذا

_هيج شخص بلا اصل 

_يعني قصدج انه مثله بلا اصل

_لا العفو منك بس من كلامك وياي تحسسني انك محور الكون انت وفريقك و اني ملكك وتستجوبني على كيفك

_تردين تصيرين ملكي عادي كل مانع ماعندي

_تريد اطبع هاي الطوبه بوجهك

_احب النجرات

_وانه اكره قليلين التربيه..

عفته يريد يحجي ولفيت وجهي ورحت لبابا وهو واكف متكتف يراقبني شلون اتصرف وياه وصلت يمه وخله ايده على كتفي ومشه وهو يخزر بي من

يمي خفت وذاك بقى واكف يبلعم لحدما طلعنه من الملعب ومشينه للبيت وصلنه ودكينه الباب فتحه النه سلام ودخلنه وبابا يحجي بغضب..

_يعرف بيج بنيه من بدايه وساكت وجماله يتحرش عينك عينك كبالي وانه ابوج بسيطه وين يروح مني الا اطلع روحه و العين التنحط على عرضي افكسهه وانه الشهم 

_بابا عوفه يولي مايستاهل توصخ ايدك بي هذا زبا** من هذول المتربين بالشارع خليك عنه ولا تعصب مو زين على صحتك

_لا بويه هذا نوع من الزبا** يكون سام وخطر عل مجتمع لو ما يتصفى يسمم العالم 

_هههه ميخالف بابا لخاطري عوفه مايستاهل تتعب نفسك عليه وانه ماقصرت وياه خليت اخلاقه جوه رجلي

_ يكون احسن لو مايوريني وجهه بالمنطقه بعد

_لا بعد مايطلع كبالك خزرتك جانت كفيله توضحله ان هوه بخطر الا اكول بابا

_كولي بنيتي

_انت تاخذني باول يوم معهد الي مو

_اي بابا جا منو ياخذج غيري وانه ابوج

_الله يحفضك الي يا تاج راسي وسندي 

_ويحفضج بنيتي يله امشي نفوت ولا تجيبين سيره لامج تدرين بيهه شلون تضل قلقه وتضل توهوس

_تمام انشاءلله ماكلهه بس انت لا تتعب نفسك وياه ولا تسويله شي يدخلك بمشكله الهه اول مالهه تالي

_لا شتدريني ماوصخ ايدي انه بهيج مخلوقات بس اذا لعب بذيله لا تسمحيلي بويه هنا العب بي شناو

_اذا هيج حيل وابو زايد بي بس هسه عوفه

_اي بويه انشاءالله يله ندخل

_يله .....

فزيت من صفنتي على صوت صفاره المدرب ضميت بطل الماي بالجنطه ورحت اركض وكفت كباله ويه زملائي دكينه تحيه وكال بصوت عالي يعمم عل كل...

_يله خلصت الاستراحه رجعوا تدربوا على تصويب السلاح وماريد كسل مفهوم

الكل: مفهوم سيدي 

_يله ابدوا شموخ انتي بالمقدمه اريد اراقب وضعج ويه السلاح شنو

_سيدي انت كلتلي تدربي وحدج اسبوع منا لتسيطرين عليه واختبرج

_الضاهر تركج وحدج ماجاب نتيجه فخلاص اريد اشرف على تعليمج مباشرتا وهسه يله كلمن ياخذ موقعه بسرعه

_حاضر سيدي

رحت اخذت موقعي مثل البقيه واحد بصف الثاني وويانه كم بنيه همين والباقي كلهم زلم وكفنه نتدرب على تركيب السلاح والتصويب بنفس

الوقت طلع صوت الصفاره وانطلقنه بسرعه وخلال ثواني كون نركب السلاح ونصوبه على الهدف ونطلق نار كملت باقل من ١٠ ثواني ورفعت سلاحي

اطلقت بس رجعت ايدي رجفت وماصوبت الهدف التفتت باوعتله بتردد وهز راسه باسف واشر بيده معناهه عيدي .. رغم اني اجتازيت كل الاختبارات

بجيد جدا الا ان السلاح صارلي نقضه سوده على صفحتي البيضه وعقبه بالنسبه الي صرت ليل نهار اتدرب بالمسدس المزيف بس حتى ايدي ماترجف

وللاسف فشلت ايدي ترجف لا اراديا بس الزم السلاح واطلق النار ..من بعد محاولات عده اجه نتر المسدس من ايدي واطلق عل هدف وهو مخلي عينه بعيني بعصبيه وحجه بصوت عالي بوجهي..

_ شوفي هذا الاطلاق الصحيح الهدف لا شايفه ولا متدرب عليه وانما احس بي شغلي احساسج خلي عقلج وكلبج ويه السلاح مو بس عيونج الج يومين لو ماجبتي ممتاز سمعتي ممتاز اريد مو اقل منه والا اخذي شهادتج ورجعي لبيتج مفهوم

_حاضر سيدي 

خله المسدس عل ميز حيل وانه واكفه بانضباط رغم غثني بكلامه واحس اختنكت وتضايقت بس هيهات ابين خنكتي بعيوني اخذت السلاح ورحت

لوره المقر منطقه صحره يتدربون بيهه الطلاب مرات خليت بطاله كزاز وابتعدت عنهم مسافه ١٠ امتار ووكفت بصرامه ..بقيت اطلق وايدي ترجف

ماعرف شنو علتهه مره ومرتين وكلاثه وماصبت الهدف ضربت رجلي بالكاع وكعدت عل بلوكه رفعت راسي للسما كلت يااارب بحسره ونزلت

دمعتي ماتحمل بعد احس بضغط مو طبيعي وانه محتاره ليش ايدي ترجف وما تقبل ترتكز بمكانهه .. بقيت صافنه بالهدف وامسح بدموعي كلما غوشت

الرؤيه عندي فتره وكمت مسحت دموعي ورحت رجعت المسدس بمكانه اخذت جنطتي وطلعت بعدما طلبت اجازه نص يوم .. ركبت بالكيه لان

التكاسي تايبه منهن بعدني ماحس بثقه كامله بقوتي وبعدني ماعرف بالفنون القتاليه فماكدر اخاطر واركب تكسي .. نزلت يم العياده مالت

العظام والمفاصل كصيت باص ودخلت للدكتور حجيتله عن مشكلتي وطبيعه تعليمي وشغلي واخذلي اشعه الهه وطلعت مابيهه شي وحتى

والاوتار سليمه ومابيهن اي ضرر ممكن مايسمحلي ان اشيل سلاح .. تشكرت منه دفعت الحساب وطلعت رجعت لمقر التدريب وبوجهي

لقاعه الرياضه والحديد لكيتهه فارغه وهذا الشي ريحني نسبيا حتى اكدر اتدرب براحتي .. سويت احماء واجيت عل اثقال شلتهه بايدي نفسهه

وصرت ارفع وارجع بيهن منا لحسيت ايدي ماتت وماصرت احس بيهه من الالم اعرف هل شي غلط بس طكت روحي اريد اشوفلي صرفه وياهه لا

صدك يطردني المدرب تالي .. تركته من ايدي وكمت شربت ماي وصرت العب رياضه بغير اجهزه لحدما مر الوقت وخلص دوام المقر كلهم رجعو عل

ساعه ب٢ الظهر الا انه بقيت بالساحه اتدرب على السلاح حسيت بشخص واكف وراي التفتت بسرعه وشفته المدرب متكتف ويباوع على ايدي الشايله

بيهه السلاح بحده .. تافاف واجه تقدم علي لزمني من كتفي ودار وجهي عل هدف كلي انظبط ووكفت بمكاني زين لزم ايدي يلي بيهه السلاح من فوك الردن

ورفعهه صوب ناحيه الهدف وثبتهه كلي اطلق واطلقت النار بكل سهوله باوعت بصدمه والتفتت عليه وهو بعده مركز بالهدف ومخلي ايده جوه ايدي وانه لازمه السلاح باوعلي وكال...

_الشغله سهله لو ماتخلينهه براسج اعتبري البيدج مو سلاح وانما مسدس مائي واطلقي بي بعشوائيه وشوفي شلون ايدج راح تاخذ عليه وهسه ركزي عل هدف زين واطلقي بثقه حتى لو تخيب ميخالف نعيدهه ..

هزيت راسي بايجابيه وابتعد مسافه قصيره عني وسويت مثلما كال اخذت نفس وحبسته واطلقت بعشوائيه بدون ماخلي الهدف براسي بس عبث

كلش عصبت وتنرفزت من نفسي وحسيت بالفشل رجعت سويت نفس الشي وعدتهه تقريب ال١٠ مرات واخيرا صوبت قريب الهدف باوعت للمدرب وكال..

_هسه باوعي بعيوني واطلقي بنفس الطريقه 

خليت عيوني على جبينه لان ماكدر اخلي عيني بعين شخص من جنس ادم ان جان هو او غيره لان دائما النظره تؤدي لغير اشياء انه بغنى عنهه :

"نظره فابتسامه فسلام فكلام فموعد فلقاء "

المهم باوعتله واطلقت النار على الهدف التفتت وشفتهه قريب الهدف مو بي تماما بس هل شي فاجاني رغم ماشفت وركزت بي الا ان جبتهه قريب عليه..

طلعت الشغله فعلا تخص الثقه والاحساس مالهه علاقه بتركيز وعيون وغيرها على الرغم ان ايدي رجفت شوي بس مامنعت الرصاصه من ان تدخل قريب الهدف تحمحم المدرب وكال بتردد وهو بتقدم ناحيتي..

_احم شموخ 

_نعم استاذ 

_ليش ماترجعين لبيتكم هسه 

_خليني اتدرب اكثر اريد اتقوى

_لا خلاص كافي لليوم التدريب الزايد يضر ماينفع ضمي السلاح وجهزي نفسج حتى ارجعج بسيارتي 

_لا مايحتاج متفقه ويه سايق انه اصلا

_ميخالف كليله لا يجيلج وانج راجعه للبيت

_بس مايصير استاذ انت منطقتكم خاف مو يم منطقتنه 

_سمعي الكلمه هذا امر وبعدين عندي موضوع ويه ابوج اريد احاجي يعني اول تالي رايح لبيتكم عاد نرجع سويه

_تمام اذا هيج بس خلي اخذ جنطتي

_تمام انتظرج..

رجعت السلاح لمكانه ولبست جاكيتي اخذت جنطتي وطلعنه من المقر ركبت السياره ورحنه لبيت اهلي اعرف هل شي غريب بس الاستاذ حسن

صديق بابا وجان يشتغل عنده وهواي قدمله مساعدات ولهذا السبب وكله بابا وطلب منه يساعدني بالتدريب ويركز على نقاط ضعفي ومرات

يجي يزور بابا بالبيت لان سوده علي تعب باخر فتره بعد وفاة عمو باقر قبل سنه وحيله انهد عليه .. صار ملازم غرفته وانقطعت روحاته للمزرعه حتى لان يكول

"تذكرني باخوي حزام ظهري فقدت امي وابوي وهسه اخوي الجبير وصرت وحيد"

كلش ننقهر من يذكر جدو وبيبي وعمو باقر وتنزل دموعه الغاليه حيلي ينهد عليه بعد حيلي حيله.. بعدها صار عمو ساجد يروح بداله او عمو شعلان وهو لا يطلع ولا يمشي ومن القهر والتفكير صار بي

سكر وصارت ماما تعتني بي بكل اوقاتها ربي يرحم عمو باقر ويحفضلي بابا و يكتبله طوله العمر والله ماتحمل اذا صار بي شي وفقدته لا سمح الله ابوي روحي من الدنيا واليفقد ابوه يتيه ويضيع بهاي الدنيا ..

1 تعل

فاول ماوصلنه للبيت دكينه الباب وفتحه النه سلام الصاير شاب صاك على اخته سلمنه عليه ودخلنه طلعلنه بابا سلم على الاستاذ ودخله للديوان وانه

رحت للمطبخ يم امي دخلت ولكيتهه لازمه ريان وتوكل بيهه شافتني وصارت تصفك بحماس وتكول ماما وماما اجيت عليهه ركض اخذتهه لحضني

وشميتهه حيل يااا الله شكد اشتاقلهه لمن اروح لمكان ساعات بعيد عنهه وماشوفهه .. رجعتهه عل كرسي مالتهه وكعدت اوكلهه انه واسولف ويه امي ..

_بنيتي منو اجه وياج 

_ها امي هذا الاستاذ حسن صديق بابا اجه يشوفه

_هاا خوش يمه كومي جا وديلهم ماي جاي عيب 

_اي صدك راح من بالي بعد شفت ريانه كليبي ههه

باوعتلي ريانه وغمضت عيونهه ورفعت شنوفتهه عود تريد بوسه بستهه بحلكهه وودي اكلهه بس سيطرت على روحي الحمدلله بعدني لهسه

ماماكلتهه ههه ..كمت اخذت صلاحيه ماي بارد

وكلاص وديتهه الهم دخلت للديوان وسكتوا لمن شافوني وتوتروا عرفت السالفه بيهه ان مدامه كاعد يم ابوي ويبسبس بس كونه ماحجه لبابا عن مشكلتي ويه السلاح .. 

ضيفته الماي وتشكرني خليت الصلاحيه بالكاع وطلعت بس فضولي الجنائي مو انه خلاني اوكف واتسمع عليهم بالباب وصدمني كلام الاستاذ ويه بابا وهو يكله..

_هاا ابو محمد شكلت رايدهه من الله ومنك على سنه الله ورسوله واتمنى ماتردني وانت تعرفني وتعرف الفوكي والجواي وانه زلمه وحيد مرتي انطتك عمرهه من سنين وبناتي كلمن تزوجت وبقيت وحدي بهل بيت وانت تدري بالوحده شلونهه ابو محمد

_والله خويه مادري شكلك بس بنيتي صارت بيهه لجمه من زواجهه الاولي ومستحيل تقبل ماتدري شكد اجولهه ناس بهاي السنين وشلون رفضتهم يعني تصدك لو اكلك طلعت كابلت الوادم وطردتهم

وانه كلبي خلص وماتحمل اشوف بنيتي تتعذب مره ثانيه وتدمر حياتهه وانه اعرفك خوش رجال وتصون الامانه بس شبيدي ياخوي انه اب ورايد

راحه بنتي وشفت راحتهه بس ويه اهلهه ولو انه ماباقي العمر كله وياهه وقلقان عليهه بس ضلتهه يم امها واخوتهه احسن الهه من زواج هيه مجبوره عليه 

_يعني اذا هيه تقبل تزوج تخليهه

_اي جا اذا هيه اجت وكالت بابا انه احب فلان واريد اتزوجه بعد يوم سعدي هذا اقبل وانه الممنون لان اهم شي سعادتهه بالنسبه الي والباقي كله يجي بعدين

_تمام خويه بس اذا تسمحلي اريد افاتحهه هيه بالموضوع باجر لمن تجي للدوام واشوف رايهه بلكي اكدر اقنعهه شتكول يابو محمد

_ خويه انه اعرفك خوش زلمه وصاحب بنات واكيد تخاف على بنات العالم مثلما تخاف على بناتك وانت بكيفك بعد انه بنيتي اعرفهه واثق بيهه ماتقبل بالغلط بس ماريد تجيلي وتكلي رفيق دربك وصديقك ضرني بكلمه او فعل ساعتهه كلامك يصير مكابل وياي

_حاضر وتامر انت بنيتك مثل اختي وبنتي واكيد ماقبل عليهه الماقبله على بناتي وانشاءلله يكون بس الكلام بيناتنه واذا قبلت ابركهه من ساعه

_هاذهو خويه حسن توكل بالله بالنهايه هذا الشي يخصكم وانتو تقررونه بالطريق الصح

_انشاءلله ابو محمد انشاءلله يله خويه مدام حجيت العندي واخذت الرخصه منك اروح بعد انه بنياتي جايات اليوم ومنتظراتني بالبيت 

_تغده عدنه وروح شسالفه هسه رايح

_لا والله متغدي بالشغل الف عافيه عليكم مودعين بالله

_الله وياك خويه حسن 

فلتت من يم الباب ودخلت للصاله بسرعه شافتني امي وكالت وهي مخليه ايدهه على كلبهه .

_بسم الله الرحمن يمه شبيج اجيتي تركضين شصاير

_يمه هذا من كل عقله جاي يطلب ايدي من ابوي شنو مفكر نفسه بله شيباته براسه وبناته بعمري وجاي ياخذ رخصه من ابوي حتى يحاجيني بهل موضوع تهي بهي غير افرغ المسدس براسه شكله علمني استعمل المسدس حتى اقتله بي خلاص....