رواية ايام من رماد الفصل التاسع بقلم احمد
دمعة: اجى عامل المطعم اخذ الصحون ووصاه مصطفى على جاي وجابلنا كل واحد ستكانة وجان جايهم شوية ثگيل
اني بطبعي ماحب الثگيل بس هالمرة عجبني ومثل ما گال مصطفى من شربنا الجاي احس الطعمة مالتو وصلت لمخي من گد ما طيب
من خلصنا الجاي بقينا دقايق گاعدين نرتاح وبعدها راح مصطفى حاسبهم وطلعنا من المطعم ورجعنا للسوگ مرة ثانية
من وصلنا السوگ اخذنا مصطفى لمحل ذهب صرنا نشوف الاشياء الموجودة وجانت اكو هواي قطع حلوة بس المشكلة مانعرف احنا بالذهب
اخير شي خابر زوج سوسن گلو تجيني للسوگ محتاجك بشغلة ورحنا ندور جنط ولگينا تخم جنط 5 قطع لونهن ابيض وكلش حلوات
بين ما اتفقنا ويا صاحب المحل عليهن اجى حسام زوج سوسن وگلو مصطفى نريد ناخذ ذهب لدمعة واخوك مايعرف كلشي بالذهب
حسام: افه عليك هسا نروح ناخذلكم احسن ذهب وبانسب سعر
مصطفى: اني اعرف عندك معلومات عن الذهب لذلك خابرتك
حسام: تعال وياي لصاحبي الي اخذنا منو ذهب سوسن
مصطفى: يلا
دمعة: رحنا ويا حسام للمحل مال صاحبو وشفنا القطع الي عندو واختارينا گلادة سعرها صار 500 الف وتراجي 200 وحلقة 150 الف وخاتم منقوش 150 الف يعني المجموع مليون
ولا تنسون بوقتها جان الذهب رخيص مو مثل هسا الغرام الواحد ب 120 الف بين ما انطى الحساب مصطفى حسام حط العلب بالجيس وطلعنا
وجان حسام جايب سيارتهم فگال لمصطفى اوصلكم للبيت وحاولنا نمنعو بس اصر علينا وحطينا الغراض بسيارتو ورحنا للبيت
ملاحظة مصطفى ما يعرف بالذهب من راح ويا سوسن ورانيا جان مجرد مرافق الهن ما تدخل بموضوع الذهب لان جان على اهل العريس بس هالمرة لان احنا نشتري الذهب ماراد ننغش بيه
من وصلنا البيت نزلنا الغراض وحسام ما قبل يبقى لذلك راح واحنا جنا ميتين تعب لذلك اني فورا حطيتلي فراش وغفيت
گعدت ويا المغرب جانن البنات مجهزات العشى وبعد العشى شوفنا الغراض للبنات وسفطانهن بالجنط واخير شي بقى الذهب
بين ما طلعتهن ماما رحمة انتبهت ان العلب 5 مو 4 ووحدة منهن جبيرة جانت فتحتها ماما رحمة طلع بيها خصر (سوار)
رحمة: هاي منين اجت
دمعة: ماعرف اسألي مصطفى هو الي اشترى الذهب
سوسن: هذا هدية
رحمة: باستغراب .. شنو من هدية
سوسن: هاي هدية مني اني وحسام وحسام حطها بدون ما تنتبهون علمود لا ترفضون
رحمة: ياااااا شگد عيب ليش ولج خليتيه يسوي هيج
سوسن: اول شي دمعة تستاهل ثانيا من اجيتو گلي مادري بيه اني
رحمة: شگد عيب حسام يريدنا ما نخابرو مرة ثانية
سوسن: شدعوة يمة قابل شنو ماخذ غير هاي هدية دمعة خوما تريدينا نجيبلها بطانية حالنا حال الغريب
دمعة: يسلمو حبيبتي الله يعوضكم اضعاف مضاعفة
سوسن: ولج اروح فدوة للتفتهم شو تعالي ابوسج يولي
رحمة: يعني اني مافتهم
سوسن: لا ماما بس انتي انطيتي الموضوع اكبر من حجمو
رحمة: المهم خلي نشوف الذهب علمود نضمو
سوسن: تمام
دمعة: شوفتهن الذهب وبعدها ضمتو وضمت الجنط كلهن علمود لا يتوسخن او ينشخطن قبل العرس وبعدها كملنا تعليلتنا
ثاني يوم على اساس تروح سوسن بس اجن رانيا وسناء وبقت علمودهن وتونسنا كلش بيهن وثاني يوم راحن كلهن
ورا اسبوع تقريبا اجت ام الولد علمود تشوفنا اذا كملنا لو لا وماما رحمة گالت كلشي جاهز ونفس خواتي بدون حنة او حفلة تلبيس ذهب (نسميها نيشان)
ام الولد ما جان عندها اي اعتراض بس الحلقات مال الزواج نلبسهن بيوم العرس واتفقو من الصالون تطلع الزفة لان ما يگدرون يدخلون للشركة
بوقتها جنت اريد مثل سوسن اطلع من البيت بس ماما رحمة گالت ذول غربة مانمون عليهم مثل حسام وانجبرت اوافق
قررت ام العريس يكون العرس يوم الاثنين يعني بعد اسبوع بالضبط وثاني يوم نروح نعقد محكمة ونشتري بدلة العرس ونحجز الصالون
مصطفى خطية متورط بينا كل ما تصير شغلة لازم يعوف الشغل علمود يروح ويانا ولان جماعتو يعرفون وضعو فعادي عندهم من يطلب اجازة
ثاني يوم الساعة 8 الصبح تريگنا ورحنا للمحكمة وتلاگينا ويا العريس وابوه وجان وياهم محامي علمود يسهل الاجراء لان عمري 15 سنة
من دخل المحامي للقاضي طلب القاضي فحص طبي الي علمود يتأكد ان الزواج ما يأثر علي كاجراء احترازي لا اكثر
وطلعنا للمستشفى سوينا الفحص ومن كملنا رحنا للقاضي ودخلنا اني ومصطفى لان هو ولي امري وتأكد القاضي من كلشي وكمل عقد الزواج وطلعنا
من طلعنا جانت ماما رحمة تنتظرنا گاللها مصطفى هسا كملنا بس المفروض يجيب امو الولد علمود بدلة العرس والصالون
ناظم: دمعة
دمعة: باوعت عليه شفتو اشرلي بايدو على اساس تعالي ورجعت باوعت لمصطفى باستغراب
مصطفى: ها خوية سالمين قابل اني وامها شفافين ما تشوفنا
ناظم: ها لا بس اريد اگوللها علمود نروح نشتري البدلة
مصطفى: وشنو تروحون وحدكم غير احنا وياها
ناظم: اي اكيد هلا بيكم
مصطفى: وين والدتك
ناظم: شتريد منها
مصطفى: غير تروح ويا امي ودمعة قابل انت تفتر وياهن بين بدلات العواريس
ناظم: اي وشبيها
ابو ناظم: ها شنو الموضوع
مصطفى : ماكو شي عمي بس دا اگول لناظم يجيب الوالدة علمود تبقى ويا امي ودمعة بين ما ياخذون بدلة العرس ويحجزون بالصالون
ابو ناظم: اي عمي هسا تروحون ويا ناظم للبيت تاخذون والدتو وتطلعون للسوگ .. يلا ناظم اخذهم
ناظم: تمام يابة
مصطفى: بصوت ناصي الله يعدي هاليوم على خير
رحمة: اسكت لا تسويلنا مشكلة مو ناقصين فضايح
دمعة: سكت مصطفى بس مبين عليه مزعوج كلش رحنا ركبنا ويا ناظم بالسيارة واني صرت ورا مصطفى وتوجهنا لبيت اهل ناظم
جان ناظم يحاول يفتح اي موضوع ويا مصطفى بس مصطفى لان انزعج منو جان يجاوب على گد السؤال ودائما اجوبتو مختصرة
من وصلنا البيت گال ناظم شرايكم تنزلون ترتاحون وتشربولكم شي گالو مصطفى اعذرنا تأخرنا يادوب نلحگ نكمل شغلنا وراح ناظم يصيح امو
باوعت عالبيت من الجامة مالت السيارة جان مو مبين شي منو بس حايط الحوش ملبوخ سمنت بدون صبغ والباب لونو ابيض ومبين البيت قديم
شوية واجو ناظم وامو وطلعنا للسوگ ووجود امو شوية غير اجواء السيارة لان صارت تحجي ويا ماما رحمة
من وصلنا السوگ نزلنا كلنا وجانو ناظم ومصطفى يمشون گدامنا وانتبهت لمصطفى انو مو طايق ناظم وگوة كتمت ضحكتي
مصطفى من نوع الي من يضوج من شخص يباوعلو بنظرات غريبة وكانو مستغرب من هالشخص ونظراتو تجبر الي ينتبهلو عالضحكة
من وصلنا معرض البدلات صرنا نفتر بيه وكل شوية يصيحني ناظم على اساس شنو رايج بهاي البدلة وماما رحمة تگلو خلي نشوف الموديلات بعدين نختار
اني من يمي طگت روحي حتى ما لحگ يتعود على وجودي وكل شوية دمعة شوفي ودمعة شنو رايج بهاي من صدگ ضوجني
اخير شي سحبني مصطفى لصفحة وهو ضايج گال ابقي هنا لحد ما نشوفلنا حل ويا هالناقص هذا قسم بالله راح يخبلني
دمعة: حتى اني طگت روحي منو
مصطفى: لا يگول وياها اخوها خاف عيب او مو راهمة
دمعة: مجبورين نتحمل يجوز دا يسوي هيج بعفوية مو قصدو شي ثاني
مصطفى: اسكتي شرف حضرة جنابو
ناظم: ها مصطفى شو واگفين
مصطفى: ماكو شي خوية بس دمعة شوية تعبانة ودا ترتاح
ناظم: تمام
مصطفى: يلا دمعة روحي ويا امي .. ناظم تعال احجي وياك
دمعة: رحت لماما رحمة وانتبهت مصطفى دا يحجي ويا ناظم شو فجأة ناظم صار يتلفت وبعدها سكت وصار بس يفتر ويانا ما حجى ولا كلمة
حتى من يشوف شي ما يصيحني واستغربت شنو حجى وياه مصطفى وتغير هالتغير هذا المهم بقينا ندور الى ان لگينا البدلة المطلوبة
جان الفستان من النوع المستور والردن مالتو توصل لتحت الكوع بشوية والنقشة مالتو كلش حلوة واخذنا وياه عباية بيضة مالت عواريس
وبعدها رحنا للصالون حجزنا وصاحبة الصالون گالت جيبو البنية قبل العرس بيوم اجهزها علمود ثاني يوم ما تتأخر وماما رحمة گالت هو هيج
وبعدها رحنا اخذنا حلقات مالت العرس اني حلقتي ذهب وهو فضة وبعدها وصلونا للبيت وراحو ومن نزل مصطفى وهو يحجي عليه
رحمة: كافي ولك مصطفى
مصطفى: شكافي يمة شكافي يعني اني مو بعينو يصيح دمعة واني موجود
رحمة: عادي يمة الولد دا يتصرف بعفوية مو قصدو شي وبالاول والاخير راح يصير نسيبك عيب تحجي عليه
مصطفى: استغفر الله واتوب اليه
دمعة: شنو حجيت وياه من جنا ندور بدلة العرس
مصطفى: گلتلو ترا الناس دا يباوعون عليك باستغراب لان عيب العريس يختار بدلة العاروس والحمدلله سكت
دمعة: عاشت ايدك
رحمة: يا يا يا شوف هاي الثانية ولج غير فرحان بيج الولد
دمعة: ماما فرحان امنا بالله بس تصرفو مو حلو وانحرجت كلش بسببو المفروض من يشوفني تجاهلتو اكثر من مرة هو من يمو يسكت
رحمة: داسكتو اسكتو
نعمة: عوفيهم خية واحد اعند من الثاني
دمعة: سكتنا وباوعت على مصطفى رفع حواجبو وهز راسو بضحكة وضحكت وياه وماما رحمة مدت ايدها باتجاهنا على اساس تگول لماما نعمة شوفيهم وماما نعمة صارت تضحك
وعفتهم يحجون ورحت يم البنات حجيتلهن عن الي صار وياي خلال اليوم وسارة شبعت ضحك على مواقف مصطفى وناظم
مرت الايام بسرعة وكأنو الوقت صار يركض ركض رغم انو مكملة كلشي بس احس الوقت سريع لان راح افارگ اهلي
ما حسيت الا صار يوم السبت وجان لازم ثاني يوم الصبح نروح للصالون فبالليل اخذتلي دوش وجهزت ملابسي ومشطت شعري بدون ما احط زيت شعر
وثاني يوم الصبح جهزت نفسي وتريگت وطلعنا اني ومصطفى وماما رحمة اخذنا مصطفى للصالون ومن وصلنا هو ماعرف وين راح
اول شي ام الصالون سوتو حطتلي ماسك للبشرة وبلشت ترتب بشعري (ماراح ادخل بالتفاصيل لان تعرفوها كلش زين)
من كملت باوعت لنفسي بالمراية وصرت اضحك لان وجهي صاير طماطاية من الحف واحس بحرگة خفيفة بوجهي
رحمة: ها بنيتي شو تضحكين
دمعة: باوعي وجهي صار احمر
ام الصالون: ههههههه طبعا حبيبتي غير حفيتيه
دمعة: شكرا عالشغل
ام الصالون: تدللين حياتي
دمعة: جنت احجي ويا ام الصالون وطلعت ماما رحمة شوية ورجعت انطت لام الصالون الفلوس وگالت باجر نجي بنفس الوقت علمود العرس گالت كل الهلا بيكم
طلعنا جان مصطفى ينتظرنا واخذنا تكسي ورجعنا لگينا رانيا وسوسن موجودات بس سناء ما اجت وسمعت فيما بعد ان زوجها مو جايبها گايللها قبل اسبوعين جنتي يمهم
غسلت واجيت يمهن وماما رحمة گالت لسوسن اخذي خواتج وروحي سويلنا غدا من ايديج مشتاقين لطبخ گالت من عيوني
طبعا سوسن فهمت عليها بس اني ما فهمت من ردت اروح صاحتني گالت انتي ابقي ومن طلعن البنات گالت سكري الباب وتعالي
سكرت الباب واني مستغربة لان اول مرة ماما رحمة تتصرف هالتصرف گعدت گدامها وگالت افهميني كلش زين بنيتي وركزي وياي
بلشت تحجيلي عالحياة الزوجية واني فاكة حلگي لان اول مرة بحياتي احد يحجي وياي بهالموضوع وخصوصا انو يفصلياه هالتفصيل هذا
جنت بحالة يرثى لها خجل على خوف على توتر وفوگ كل هذا ماما رحمة تگول ركزي وياي وما خلصت كلامها الا اني ميتة من الخجل
رحمة: بنيتي هالشي هذا طبيعي وهاي سنة الحياة وكلنا النسوان الي تزوجنا قبلج مرينا بهاي الاشياء فلا تخافين وهذا حق زوجج عليج
دمعة: تمام
رحمة: ومن عدا هاي الاشياء انتي شطورة وما يحتاج اوصيج على شغل البيت والكلمة الحلوة وياهم وخصوصا عمج وعمتج لا ترفضيلهم طلب
ترا اذا گدرتي تكسبين عمج وعمتج ماراح احد منهم يگدر يحجي وياج كلمة وحدة وإن شاء الله ما تحتاجين فزعتهم الج
دمعة: آمين
رحمة: يلا روحي ويا خياتج ولا تنسين هالكلام
دمعة: اعتبريه انطبع بمخي
رحمة: عفية عليج معدلة من يومج
دمعة: الله يعافيج .. عفتها ورحت للبنات
سوسن: ها اخذتي المحاظرة
دمعة: انجبي
سوسن: ههههههه شبيج ولج خبلة
رونق: وربي مخبلة هالعجية
دمعة: انجبي انتي هم
سارة: هسا غير تنجب وتحجي شكو انجلبت علينا
دمعة: ليش عفتوني لحالي
سوسن: لان اخذنا المحاظرة قبلج
سارة: شنو من محاظرة ترا ما فهمت شي
رونق: انجبي انتي مو يمج الموضوع
سارة: وربي ماكو اجلب منج
رونق: ههههههههه تستاهلين وطلعت لسانها
دمعة: بقن سارة ورونق يتعاركن بيناتهن بس يتشاقن مو عركة من صدگ واني بقى يتردد بتفكيري كلام ماما رحمة
صحيح هو سنة الحياة مثل ما گالت بس اني كبنت تسمع هالشي لاول مرة بحياتها فيكون.الموضوع كلش صعب علي
حتى رونق من عرفنا بيها حامل ما جنا نعرف التفاصيل الي وصلتها للحمل بس نعرف انها غلطانة لان حملت من ميزر بدون زواج
بالليل سون حفلة صغيرة البنات ورونق جانت ترگص رگص يخبل بين ما دا ترگص اجى ميزر اتكئ عالباب وصار يباوعلها وهي مندمجة بالرگص
شلون اندارت وشافتو ومدتلو ايدها وهي تضحك وهو بقى واگف بمكانو ويضحك وتقدمت عليه وسحبتو غصب عنو علمود يرگص وياها
مسك ايدها بايدو اليمين والايد اليسار يطگ اصبع بيها 🫰🏻 مشابهة لهاي الحركة بس تصير بالابهام والوسطى والاصبع الوسطى يطلع الطگة
وهي ترگص وكل شوية يرفع ايدو وتفتر تحت ايدو وترجع تكمل رگص اخير شي مدري شنو شاورها وطلع وهي لبست شالها
شوية واجى مصطفى يركض حتى احنا خفنا من دخلتو ودخل وراه ميزر وقفل الباب
مصطفى: شنو صاير
رحمة: بخوف .. مو صاير شي شبيك انت
ميزر: ماكو شي نصبت عليك
مصطفى: شبيك ميزر جهال احنا
ميزر: ههههههههه
مصطفى: افتح الباب اريد اولي
ميزر: اخذ المفتاح وزتو لرونق گاللها ضميه يمج لا تنطيه لاحد
مصطفى: شبيك ميزر
ميزر: دموعتك باجر تتزوج وربي فلا تطلع الا ترگص وياي
مصطفى: خوية رونق انطيني المفتاح زوجج تخبل رسمي
رونق: الشرط انك ترگص وغير هالشي اعذرنا ههههههه .. يلا بنات
دمعة: انجمعن البنات وسحبن مصطفى وصار ميزر يرگص ويهز احسن من الف رگاصة هههههههه
مصطفى جان معاند بالبداية بس من شاف الاجواء وخصوصا ان مايگدر ياخذ المفتاح من رونق بالقوة انجبر يبقى وسوسن صارت ترگص وياه
صارت الحفلة حلوة بكل ما تعنيه الكلمة من معنى انگلبت من حفلة عادية لحفلة مليانة فرح وضحك ووجود ميزر ومصطفى جانو الو طعم ثاني
ميزر يمكن هاي اول مرة اشوفو هيج فرحان ويرگص من كل گلبو على گولة اهل الجنوب ذب لحم بالرگص (ضعف من كثر الحركة)
وبالاخير سحبوني وياهم ووصلت بيهم سحبو ماما رحمة وماما نعمة للرگص وهي يتراجعن ويضحكن اخير شي بس وگفن يصفگن والبقية يرگصون
مصطفى: من خلصت الحفلة .. بربكم زلمة شكبرني شگدني .. قاطعو ميزر
ميزر: بگد البعير
مصطفى:اليوم اسمط البعير الي ذكرتو وهجم عليه
جانو يتشاقون وميزر يضحك من كل گلبو اخير شي گلو بربك كمل سالفتك شكبرك بگد البعير وشنو انوب
مصطفى: اححم .. عدل شواربو .. زلمة مشورب تاليتي ارگص بين البنات
ميزر: ولك مصطفى طلعت تهز احسن من شاكيرا ههههههه
مصطفى: منو هاي شاكيرا
ميزر: هاي فد شگرة اجنبية تغني وترگص
رونق: ميزوووووووو
ميزر: انلاصت .. يمة رحمة داخل عليج اني
رحمة: ذيج امك روح ادخل يمها
ميزر: مو اذا ادخل يمها رونق تگول حتى امك ما تفكك مني
رونق: ههههههه عابت قابل انتي هالگد متوحشة
ميزر: لا عمري اتشاقة وياج
رونق: همزين
ميزر: متوحشة شوية اكثر ههههههههه
دمعة: ما طلعو مصطفى وميزر الا بطونا صارت توجعنا من الضحك وگمت بعدها بدلت ملابسي وتوجهت للنوم واني ابتسم على ذكريات الحفلة والي جانت.اخر حفلة حلوة بحياتي
