رواية ايام من رماد الفصل العاشر بقلم احمد
دمعة: ما طلعو مصطفى وميزر الا بطونا صارت توجعنا من الضحك وگمت بعدها بدلت ملابسي وتوجهت للنوم واني ابتسم على ذكريات الحفلة والي جانت.اخر حفلة حلوة بحياتي
بذيج الليلة ما ارتاحيت بنومتي لان وراي عرس وهوسة وفراگ اهلي بحيث كل شوية افز وارجع اغفي من التعب لحد صلاة الفجر
من صليت بعد ما اجاني نوم ومن گعدت ماما رحمة ومصطفى تريگنا وبالساعة 10 رحنا للصالون وجانت الزفة تجي بعد الغدا
بلشت ام الصالون ترتبني واني عيني عالمراية واراقب كل تفصيلة تسويها من اول ما گعدت عالكرسي لحد ما خلصت شغلها
شعري عافتو كلو نازل على كتوفي بس اخذت كم خصلة ثبتت بيهن التاج والمكياج جان وسط لا قوي يخفي وجهي ولا خفيف ما يبين
بس رسمة عيوني جانت خرافية بكل ما تعنيه الكلمة من معنى واني عجبني شغلها كلش وطلعت اخبل من كملتني
الساعة 1 الظهر سمعنا صوت السيارات اقتربت من الصالون احس صار عندي مغص من التوتر ولزمتني الرجفة واريد اسيطر على نفسي ماگدر
ماما رحمة بقت تهدي بي ونزلت الغشاوة على وجهي وگلتلي لا تتوترين اني راح ابقى وياج وخلال ثواني وگفن السيارات گدام الصالون
بقيت واگفة عند ماما رحمة ودخل ناظم واسمع صوت هلاهل وياه واني واگفة ومنزلة راسي من وصل يمي رفع الغشاوة وباسني على راسي
بعدها نزل الغشاوة واخذ العباية من ماما رحمة لفني بيها ومسكني من ايدي ومشيت وياه واحس كل ذرة بجسمي ترجف
اخذني للسيارة ركبت من گدام وصعد هو بمكان السايق وما جان اكو احد ويانا بالسيارة وانطلقت الزفة وطلعنا بوجهنا على للاستوديو
نزلنا وطگينا صور اني وياه وبعدها دخلو اهلو وگرايبو النسوان ومن كملنا تصوير رجعنا للسيارة واول ما مشت سحب ايدي وبقى ماسكها
اني ما اعترضت او سحبت ايدي رغم بعدني ما متعودة عليه بس اعتبرت الموضوع عادي وحاليا هو زوجي على سنة الله ورسوله
بقت الاغاني مشتغلة والناس فرحانة وتهوس واني تفكيري كلو عند اهلي هسا شدا يسوون يا ترا بغيابي والبنات راح يشتاقلي لو لا ومصطفى وينو هسا
من وصلنا البيت نزلني من السيارة ودخلنا سوا للبيت وجانو حاطين الكوشة بالصالون من وصلنا يمها اخذ العباية وانطاها لوحدة من خواتو وگعدنا بالكوشة اني وياه
بيومها جنت لابسة الذهب الي اشتروه اهلي الي باقي بس الحلقة مالت الزواج جابوهن النا لبسني الحلقة واني هم لبستو الحلقة وگعد خمس دقايق وطلع
اجت ماما رحمة گالت تعالي وياي واخذتني هي وبنت لوحدة من الغرف وجابولنا غدا تغدينا وارتاحيت شوية وتأكدت من مكياجي ماما رحمة ورجعت للكوشة
بلشن البنات يرگصن وفرحانات كلش وكل شوية وحدة تگوم والثانية تگعد وعلى هالمنوال هذا لحد ما صارت الساعة 9 بالليل
اخذتني ماما رحمة وام العريس ووياها كم وحدة من النسوان من دخلت انتبهت انو جنطي محطوطات بصفحة وماعرف منو جايبهن
وصرت اسمع صوت هوسات الزلم خارج وصار يقرب صوتهم لحد ما وصلو للدرج مال البيت وبعدها اختفى الصوت لان سكتو وباركو لناظم وراحو
من صعد الدرج بلشت الهلاهل من كل جهة واول ما دخل للغرفة صارت تهلهل امو وتباركلو وتدعيلو بالتوفيق والسعادة
رحمة: الف مبروك يمة وشايفين كل الخير
ناظم: الله يبارك بيج
رحمة: دمعة صارت زوجتك هسا واريدك تكون گد المسؤولية ولا تنسى هي يتيمة يعني كل ما تسعدها ربنا يسعدك
ناظم: بعيوني احطها
رحمة: تسلم عيونك وهسا اترخص وإن شاء الله ربنا يبارك الكم ويسعدكم طول العمر
ناظم: الله يسلمج ويسعدج
دمعة: طلعن النسوان وهنا گوة بقيت واگفة ناظم سكر الباب ونزع الساعة بايدو والجاكيت واجى رفع الغشاوة عن وجهي
من لاحظ اني متوترة سحبني من ايدي وگعدنا عالسرير مقابيل بعض واني مو گادرة ارفع راسي فحط اصبعو تحت حنجي ورفع راسي
ناظم: ماريدج تستحين مني من اليوم اني وياج واحد اني ملكج وانتي ملكي واي شي تحتاجيه تگليلي عليه واني البي كل طلباتج
دمعة: تمام
جان كل الي ببالي انو مثل ما گالت ماما رحمة انو نصلي ركعتين لوجه الله علمود الله يبارك بزواجنا وندعي ونقرا قران بس شو الوضع مختلف
ناظم فورا اخذ مني بوسة واني ماگدرت اگلو عالصلاة ماعرف بوقتها ليش ما حجيت بس الي اعرفو انو جنت خايفة ومتوترة بشكل لا يوصف
رغم جنت مسلمتو نفسي بس جان كلش عنيف وياي وكأنو اني مجرد تمثال ويشوفني گدامو اتوجع وابجي وما اهتم لتوسلاتي
مرت علي نص ساعة شفت بيها وجع لا يحتمل ولولا خجلي ان الناس تسمع صوتي جان صرخت من الوجع وبسبب همجيتو صار عندي نزيف
من شافني انزف وابجي مثل الي صحى على نفسو ولبس ملابسو وراح صاح امو وماما رحمة واجت ماما رحمة مخترعة ومن شافت الفراش دم تخبلت
امو اخذتو وطلعت واني ساعدتني ماما رحمة علمود البس ملابسي وهي تگول عزا العزاه شنو ثور هو ما يشوفج گدامو مفرفحة
لبست ملابسي عالسريع واخذونا للمستشفى واجت الدكتورة فحصتني ومن خلصت فحص گالت البنت متأذية لازم نخيط جرحها
وبعد ما خلصت جان وجهها احمر من الغضب ومن دخلو ناظم وامو وماما رحمة گاللها ناظم ها دكتورة شلونها
الدكتورة: انت زوجها مو
ناظم: باستغراب .. اي ليش
الدكتورة: شلون هيج تتعامل وياها شنو همجي انت البنية متأذية كلش وكأنو الي وياها ثور مو بشر وين جان عقلك من جانت دا تتأذى
ترا هي بشر مو جماد شوية خلي عندك وعي وثقافة ترا رجولتك مو بأذيتها بالعكس رجولتك بحمايتها وبالنسبة لزوجة ابوها ماگدر احجي لو امها جان عرفت شنو احجي وياها
ناظم بقى منخرس ما گدر يحجي كلمة وحدة والدكتورة ختمت كلامها بانو ممنوع يقترب منها منا لاسبوع كامل وبعد الاسبوع تجي مراجعة تشيل الخيط ونتأكد اذا تحسنت ولا لا
وكتبت العلاجات الي احتاجهن ومن طلع ناظم صارت توصي امو وماما رحمة انو ينبهونو يكون لطيف وياي ويتحكم بنفسو وياي
وشرحتلهن شنو ممكن يصير اذا اذاني مرة ثانية وبين ما كملت كلامها اجى ناظم وگالت الدكتورة خلوها ترتاح ساعة زمان واخذوها
اجت ماما رحمة گعدت يمي وصارت تمسح على راسي ولا تگدر تعتذر ولا تعرف شنو تحجي وناظم واگف بصفحة وساكت
رحمة: شلون عرفت اني مو امج
دمعة: هي سألتني اذا انتي امي گلتلها ماما متوفية وانتي مثل امي
رحمة: تمام اذا تعبانة نامي شوية وارتاحي
دمعة: مو نعسانة
رحمة: تمام
بقيت ساكتة وصافنة وبعد ساعة طلعنا ورجعنا للبيت واخذتني ماما رحمة للحمام وساعدتني علمود اغسل ورجعت للغرفة
طلعت ازار الصلاة من جنطتي ولبستو وصليت الصلوات الي فاتتني ومن كملت جان ناظم گاعد عالتخت وگلي كم صلاة صليتي
دمعة: الظهر والعصر والمغرب والعشاء
ناظم: وشلون يصير تصلينهن كلهن هسا
دمعة: هو غير اصلي الصلوات الي طافتني
ناظم: اقصد ان الظهر المفروض تصلينها ويا صلاة الظهر باجر يعني تصلين مرتين
دمعة: باستغراب .. هاي منو گالك هيج
ناظم: الي اعرفو هيج وحدة صلاة اليوم ووحدة صلاة باجر
دمعة: لا غلط هيج
ناظم: وشنو يأكدلج غلط
دمعة: من تفوتك صلاة ما يصير تأجلها اول ما يصير عندك وقت تصليها واذا فاتتك اكثر من صلاة تصليهن كلهن حسب الترتيب (الفجر-الظهر-العصر-المغرب-العشاء)
وبحالة وحدة ممكن يختلف عندك الترتيب على سبيل المثال فاتتك صلاة العصر والمغرب وجان باقي لاذان العشاء دقيقة او دقيقتين
فتصلي المغرب قبل ما ينتهي وقتها وبعدها تصلي العصر واذا جان عندك وقت ومتأكد اذا صليت بالترتيب ما يروح وقت صلاة المغرب فتصلي بالترتيب افضل
ناظم: زين لنفرض فاتتني صلاة العصر وطبيت لجامع اريد اصلي ولگيتهم دا يصلون المغرب بهالحالة شنو اسوي
دمعة: تصلي وياهم جماعة ومن يسلم الامام انت تگوم تكمل الركعة الرابعة وبعدها تصلي المغرب وبهالحالة حافظت عالترتيب وكسبت الجماعة
ناظم: اسف واعذريني ترا مو قصدي اذيج بس والله ما حسيت على نفسي من اذيتج وإن شاء الله ما يتكرر هالشي
دمعة: الله يسامحك ويسامحنا
ناظم: يلا تعالي نامي وارتاحي
دمعة: تمام
نزعت الازار مال الصلاة ورحت نمت وكلش ارتاحيت من اعتذر مني وحسيتو صادق باعتذارو لذلك سامحتو فورا
صحيح اذاني بس احنا صرنا متزوجين فلازم اني اسامحو اذا غلط بحقي وهو يسامحني اذا غلطت بحقو ونتحمل بعضنا بكل الظروف
ثاني يوم الصبح الساعة 8 اندگ الباب وگعدنا اني وناظم جانو اهلو جايبين الريوگ ووياهم ماما رحمة نزلو الريوگ وباركو النا وراحو
تذكرت انو اخذتني النومة وما صليت الفجر فگمت صليتها ورجعت تريگت ومن خلصت ريوگ ناظم راح للحمام واني بدلت ملابسي ولبست الشال ونزلت الصينية وياي
اول ما نزلت من الدرج شافتني وحدة من البنات واجت اخذت الصينية واني رحت للصالة سلمت عالنسوان الموجودات وگعدت بين ماما رحمة وام ناظم
وبقن النسوان رايحات وجايات الى ان صارت الدنيا ظهر وبقن بس الگرايب وحطولنا الغدا وتغديت ورحت للغرفة
اجى ناظم يرتاح واني فتحت جنطي وبلشت اسفط اغراضي وملابسي بالكنتور لحد ما خلصتهن وگلت بعدين ارتبهن بعد اكثر المهم هسا يفرغن الجنط
ورجعت حطيت الجنط بنص بعض وحطيتهن بواحد من الابواب جان فارغ وسفطت المكياج عالمراية وصارت الدنيا عصر
صليت العصر ونزلت تحت وهم سلمت عالنسوان الي اجن ورا الظهر وگعدت عند ماما رحمة گالتلي راح يجي مصطفى ياخذني
گلتلها تمام وقبل المغرب بشوية ترخصت وسلمت عليها وبوستها وراحت واحس راح الامان وياها بس گلت لازم اتعود لان هذا صار بيتي من اليوم
بقيت گاعدة يم ام ناظم لحد ما صارت الساعة 9 واجى ناظم راح للغرفة وامو گالت روحي ويا ناظم خاف يحتاجج ورحت فورا
جنت ميتة من التعب لان النهار كلو گاعدة وماگدر اروح لغير مكان لان كل شوية تجي مرة تباركلي وعيب تجي واني مو موجودة
من دخلت للغرفة جان ناظم متمدد عالتخت وصافن وعلى صوت الباب انتبهلي بس بقى ساكت ما حجى شي
دمعة :محتاجني
ناظم: ليش وين رايحة
دمعة: مو رايحة بس اسأل اذا محتاج شي
ناظم: لا مو محتاج شي تعالي ارتاحي
دمعة: تمام
ناظم: اريد احجي وياج بموضوع بس ماريدج تزعلين
دمعة: باستغراب .. شنو هالموضوع
ناظم: بالنسبة لاهلج
دمعة: شبيهم
ناظم: ماراح اگدر اخذج عليهم ايمتى ما حبينا
دمعة: ليش
ناظم: شوفي احنا عدنا سيارة وحدة وابوي دائما يطلع بيها بالليل يتعلل او يروح لجماعتو بالمختصر المفيد السيارة حدنا وياها لصلاة المغرب
وبهالحالة لازم بالنهار وبالنهار الشركة مليانة عمال وصعبة ادخلج بيها گدامهم والرايح والجاي يشوفج وانتي تعرفين الشباب ما يشيلون عينهم عن البنت
دمعة: والحل
ناظم: نروحلهم بس قليل مو دائما
دمعة: زين كل جمعة الشركة تكون استراحة ومابيها احد
ناظم: اذا صارت فرصة نروح ايام الجمعة ماعندي مشكلة واذا ماصارت اريدج تعذريني اذا قصرت بروحتج الهم
دمعة: بس ماريد اقطع بيهم كلش خصوصا هالفترة بعدني ما تعودت على غيابهم
ناظم: تمام
دمعة: هسا احجيلي عن نفسك وعن اهلك علمود اعرفكم
ناظم: انتي تعرفين اسمي وعمري واني خريج تربية بس هاي السنة تخرجت بعدني ما توضفت
اخوي الاكبر مني كاضم عمرو 25 هم خريج تربية قسم فيزياء يعني مدرس فيزياء للثاني متوسط حاليا وما يقبل يتزوج الا يكون نفسو
خواتي 3 ريما 27 سنة متزوجة وعدها اطفال ثنين ولد وبنية الولد سليم 5 سنوات والبنت سيدرة سنتين
ديما تزوجت قبل 5 شهور وبعدها ماعدها جهال واخرهن سما عمرها 20 سنة وهي المدللة واكثر وحدة بالبيت تفهمني وهسا عرفيني عنج وعن اهلج
دمعة: وابوك وامك شو ما حجيت عنهم
ناظم: اكلتهم البزونة
دمعة: هههههههههه
ناظم: بالله عليج شايفة واحد ينسى ابوه وامه
دمعة: اي انت
ناظم: المهم ابوي اسمو محمد عمرو 52 سنة
وامي نضال عمرها 47 سنة
دمعة: يعني اصغر من ابوك ب 5 سنوات
ناظم: اي
دمعة: تمام وبالنسبة لاهلي (حجيتلو عنهم كلهم)
ناظم: شلون ما تعرفين خوالج
دمعة: ماكو احد يعرف بس بابا وما فد يوم حجالي اذا عندي خوال ولا لا
ناظم: غريبة هاي
دمعة: يجوز هو وبابا ما يحبون بعض
ناظم: كلشي ممكن .. احجيلي شتعرفين بالدين
دمعة: ماعرف كلشي
ناظم: لعد ونصايحج البارحة عبالي فد عالمة انتي
دمعة: بالعكس ماعرف بس الصلاة والصيام وذني الاشياء تعلمتهن من ماما رحمة
ناظم: زين احجيلي كل الي تعرفيه
دمعة: اعرف الصلوات الخمسة واحكامهن واعرف الصيام والي يبطل الصيام والكفارة وبس وذني كلهن تعلمتهن من ماما رحمة
لان جانت من تروح لاهلها مرات تطوفنا صلاة الفجر او الظهر لان نكون نايمين وعلمتنا علمود ما نحتار
ناظم: زين تعرفين شنو عقوبة السارق والزاني
دمعة: الي اعرفو السرقة حرام بس ماعرف شنو عقوبتو وماعرف شنو معنى الزاني
ناظم: اكو بشر مايعرف كلمة زنا شنو
دمعة: صفنت اريد اتذكر اذا سامعتها من قبل بس ماتذكرت شي
ناظم: ها شو صفنتي
دمعة: ماتذكر سمعتها من قبل شنو معناها
ناظم: عوفيها هسا اريد اشرحلج شوية امور
دمعة: اشرحلي
احمد (الكلام ممكن ما راح يعجب البعض فالي يشوف نفسو انزعج لا يكمل الكلام)
ناظم: احنا ماطول تزوجنا يعني مسموحلنا نسوي ويا بعض اي شي حتى لو تبدلين ملابسج او ابدل ملابسي گدامج ماكو اي مشكلة
ثانيا انتي تعرفين ان البنت عندها كل شهر مدة اسبوع تبقى بدون صلاة وبهاي المدة حتى زوجها ممنوع يتقرب منها
دمعة: ليش ممنوع يتقرب منها لعد وين تنام
ناظم: خليني اكمل
دمعة: تمام كمل
ناظم: ومن تحمل وتولد 40 يوم بعد الولادة ممنوع يتقرب منها وهذا التقرب الي اقصدو يعني مثل الي سويناه البارحة
وبهاي الحالة الزلمة عندو احتياجات اذا هو يسويها حرام واذا تسويها الزوجة فحلال ومابيها شي فاريدج تساعديني بهاي الحالة
دمعة: مافهمت فهمني واكيد راح اساعدك
ناظم: تعالي وياي
دمعة: وين
ناظم: لغرفة كاضم
دمعة: رحنا لغرفة كاضم جان كاضم گاعد دا يتصفح بكمبيوتر بغرفتو گلو ناظم محتاج الكمبيوتر اريد اشوف دمعة الصور مالت العرس گال كاضم تمام وطلع من الغرفة
ناظم قفل الباب ونصى صوت الكمبيوتر عالاخير وحط قرص بالكمبيوتر وگلب شوية واني متحمسة اشوف الصور شلون طلعن وانصدمت بالي اشتغل
