رواية السكن الجزء الثاني الفصل العاشر بقلم غدير الحيدري
لولا الملامة يا هوى لولا الملامة
لافرد جناحي عالهوى زي اليمامة
وأطير وأرفرف في الفضا
وأهرب من الدنيا الفضا
وكفاية عمري
كفاية عمري اللي انقضى
وأنا بخاف الملامة
وآه من الملامة
.....
صافنة ع الشارع
واسمع صوت وردة
وهي تغني
لولا الملامة..
كسر حاجز صفنتي زهراء
سدت المسجل وهي تكول
زهراء: بدال ما تفتحون قرأن دعاء اذكار الصباح، فاتحيلنا غنى
التفتت وباوعت الها
عقدت حاجبها وكالت بأستغراب
زهراء: شوكت لحكتي تبدلين وتكملين
كلت ببرود
كنز: كاعدة من وقت بدلت وكلت اتأمل الشارع وبغداد
زهراء: انتي بخير؟!
هزيت راسي بمعنى اي
خليت اللفاف ع ركبتي
لبست الكوت
وطلعت..
كان البرد حلو
اواخر شهر ال١٢
وما بقى شي وتخلص ٢٠١٤
نزلت ووكفت بباب العمارة
خليت ايدي بجيوبي
وباوعت للشارع
بقيت اتأمل المكان
درت وجهي
شفت غيث واكف امام سكنهم
كالعادة
بنطرون وبلوز اسود
ولفاف..
ايدة بجيوبة
بقيت اباوع الة
التفت وشافني
مشيت بأتجاهة
وصلت الة
باوعلي بصمت
كلت
كنز: صباح الخير
رد ببرود
غيث: صباح النور
تنهدت
كنز: شكراً الك
غيث: ع شنو؟
كنز: وقت اللي تخربطت انت انقذتني
نزل راسة
وكال
غيث: ما سويت شي، هذا واجبي
سكتت
كال
غيث: لازم تعالجين وتقوين قلبج
ابتسمت بأستهزاء
كنز: ليش؟
كالت بتردد
غيث: الحياة تسحق الضعيف، تحتاج قلب قوي
سكتت
كال
غيث: انتي بخير؟ اعتذر ع فضولي بس قبل ما تروحين لأهلج ما كنتي هيج
كنز: وشمدريك رحت لأهلي؟
كال بأرتباك
غيث: طلعتي بسيارة، كلت اكيد لأهلج
كلت بتعب
كنز: ما بقالي احد، امي ماتت من زمان وابوية ملتهي بعالمة
غيث: وانتي؟!
كنز: انا كنز ثمين امام العالم بس الحقيقة هالكنز ضايع
صفن
بعدها كال
غيث: الدوام بعدة، شمطلعج بهالوقت
كنز: ما كدرت انام
غيث: ليش؟
كنز: الهيت نفسي برواية، البطل خدع البطلة بأسم الحب
صفن ع الشارع
كلت
كنز: بقيت افكر طول الليل، اللي يحب ما يكدر يأذي، الاذية والحب ميجتمعون بقلب واحد
كال بأرتباك
غيث: ليش خدعها؟ شنو دوافعة
باوعتلة ببرود وكلت
كنز: ليش هالامور بيها دوافع؟! الانسان يبقى انسان لحدما يتجرد عن قلبة ويقرر يأذي غيرة او ينهي حياتة
سكت
باوعتلة وكلت
كنز: جربت الحب؟
هز راسة بمعنى لا
كنز: شعجب
غيث: احب الطبخ، الوحدة، كرة القدم والشعر
كنز: وليش مجربت الحب؟
باوعلي وكال
غيث: حتى ما ازرع الاذية
نصيت راسي
كال
غيث: وانتي؟
كنز: وقتي كلة بالبيت وي والدي، ما لحكت اعرف الحب
غيث: واذا جتج فرصة؟
كنز: الحب مو بالفرص، الحب شعور يسكن الانسان بدون ما يحس، هواي اللي يحبون وقليل اللي تكون نهايتهم سعيدة
تنهد
غيث: بس هو شعور حلو مو؟
كنز: مااعرفة
غيث: المحب يغار، غيرتة حلوة، يهتم واهتمامة حلو، يشتاق والاشتياق نصف الحب
بقيت اباوعلة
كال
غيث: امر غريب، اتشارك الحديث وياج عن الحب بالطرقات صباحا
كنز: والاغرب نتشارك الحديث دون سبب
مشيت وهو اجة وراية
كال
غيث: ليش احسج تغيرتي، قبل ما تروحين لبيتكم كنتي شغوفة بالحياة اكثر
ابتسمت وكلت بتعب
كنز: وليش تحس بية اساسا
سكت
كلت ببرود
كنز: غيث انت منو؟!
صفن بوجهي
كلت
كنز: ليش بكل مكان اشوفك؟، ليش كل مااحتاج مساعدة محد غيرك يساعدني
بقى يباوع لعيوني
تقربت اكثر
ووكفت كدامة
كلت وانا اباوعلة بعمق
كنز: ليش عايش حياة الفقراء وانت غني؟!
كلت بأستغراب
كنز: لبسك عطرك تصرفاتك كلها تدل انك من عائلة مرموقة، مو نقصا بالاخرين بس ليش تشتغل بالماركت؟
ما رد
كان صافن بعيوني
مديت ايدي وجريت معصم ايدة
وكلت
كنز: شنو اللي يخلي شخص ساعتة بورقة يعيش دور الفقير؟ انت جاي لهنا شنو غايتك؟
ما رد
كلت بشك
كنز: سكوتك يزيد الاتهام عليك
مشيت وعفتة
اجة وراية
سحبني من معصم ايدي وكال
غيث: اذا احجيلج تصدكين؟
باوعت لأيدة
وخرها
كلت بهدوء
كنز: شتحجيلي؟
صار يباوع للشارع بحيرة
بعدها كال
غيث: انا مو بخير، احس نفسي مخنوك منا
اشر ع ركبتة
عيونة صارت حمرة
والغصة وضحت ع ملامحة
كلت بقلق
كنز: اذا زعجتك انا اعتذر
كال بأرتباك
غيث: عادي نروح منا؟ نكعد بأي مكان قريب
بلعت ريك
حسيت بالخوف
باوعت لأيدة ترجف
كلت
كنز: نمشي
غيث: تمام
مشى كدامي
وانا امشي واباوع الة
كل شوي يمسح عيونة
اول مرة اشوف رجل منهار
او اوشك ع الانهيار
كعدنا بحديقة قريبة من الجامعة
كان يفرك وجهة وايدة ترجف
قدمتلة ماي
اخذة مني
بقى يباوع للماي
بعدها كال
غيث: مااريد
كنز: ما شاربة منة
غيث: لا مو هيج
كنز: لعد؟!
كال بخنكة
غيث: مااريد تكونين بريئة وياية لهالدرجة
باوعت بعيونة
امتلت دموع
كلت
كنز: اكو احد ضاغط عليك؟
هز راسة بمعنى اي
كنز: منو؟!
كال بغصة
غيث: اهلي
رمشت ببطئ
بلعت ريك
راح بالي ع ابوية
حسيت كلبي وجعني
وجع الاهل صعب
حسيت علية يكح
كلت
كنز: تروح للمستشفى؟
رفع ايدة وكال
غيث: لالا مابية شي
كنز: ليش يضغطون عليك اهلك؟
باوع بعيوني
وكال بنبرة خايفة
غيث: انا ابن سياسي
رفعت حاجبي بتعجب
كلت بصدمة
كنز: ها؟!
فرك وجهة
وصار يكول بأرتباك
غيث: بس انا مو مثلهم لالا، انا بعيد عنهم، انا كبرت بالموصل يم اهل امي
باوعت للشارع
كلبي صار يخفق بقوة
لـ لحظة حسيت بالخوف!
باوعلي وكال
غيث: خواتي خليتهم يم اقاربي ومجاي يتحملون العيشة هناك وجاي يخابروني يضغطون علية
يلع ريك
كال بأرتباك
غيث: يريدون يرجعون لحياتهم السابقة، وانا هالشي مو بأيدي
كلت بتوتر
كنز: اهلك وين؟!
باوعلي بضياع
وكال
غيث: بالسجن
امتلت عيوني دموع
احس نفسي ضاق
كمت من مكاني وانا اكول
كنز: تأخر الوقت، فاتتني المحاضرة
مشيت
وهو كال
غيث: خفتي مني!؟
توقفت
الدمعة بقت حايرة بعيوني
التفتت الة وكلت
كنز: ماادري
كام من مكانة
وكف كدامي وكال
غيث: بس انا مو مثلهم
ميلت راسي وكلت
كنز: وليش تكلي هالكلام؟
صار يتجنب النظر لعيوني
وهو يكول
غيث: ماعرف بس انتي لازم تعرفين حقيقتي وان انا مو مؤذي، ولا اكدر أذي
تكونت غصة ببلعومي
كلت بخنكة
كنز: باوع لوجهي
باوعلي بخوف
وكال
غيث: هالسر محد يعرفة غيرج، محد يعرف انا ابن سياسي
كلت بشك
كنز: انت تعرفني؟!
صفن بوجهي
وكعت دموعي وكلت بخوف
كنز: انت تحوم يمي لغاية مو؟
ما رد الي
تقربت الة وكلت
كنز: كول الحقيقة ومراح احقد عليك، كول الحقيقة وراح اصدكك، انت تعرفني؟
باوع لعيوني
وكال
غيث: لا ما اعرفج
كنز: متأكد؟
غيث: الموضوع اكبر منج، وانا ما اعرفج
كنز: وانا صدكتك لانك باوعت بعيوني وحجيت
مشيت وهو كال
غيث: انا سولفتلج حقيقتي لان انتي بالذات ما اريد اكذب عليج
التفتت الة
كال بأرتباك
غيث: من اول يوم شفتج حسيت نفسي محتاج كل يوم اشوفج، ولتسأليني ليش
احس كلبي فز
مشيت بسرعة
ودموعي توكع
كنت احس بالخوف
والضياع..
كنت احس بمشاعر هواي
بأن واحد
انجذبتلة..
شكلة وملامح وجهة
شعرة عيونة
تفاصيل ايدة
كلشي بي كان يجذبني الة
بس كلبي..
كان يوجعني منة
يمكن حبيتة
ويمكن مجرد اعجاب
بس ما متأكدة اذا كان هو الشخص الصحيح
مشيت بسرعة
كنت ابجي وامسح دموعي
مااعرف ليش اثر بية
ومااعرف ليش حسيتة خايف
كان حقيقي كدامي
ورغم حقيقتة المخيفة
احس حبيتة..
كان الاعتراف الخطير
اللي اعترفت بي لروحي
بكل صراحة..
دخلت للجامعة
صارت بوجهي حبيبة
كالت بأنزعاج
حبيبة: هاييي وينج كلبت الدنيا عليج
كلت بأرتباك
كنز: ليش شصاير؟
حبيبة: تعاي محتاجتج بشغلة
جرتني من ايدي
واخذتني لقسم الاعلام
وهي تكول
حبيبة: تتذكرين من كتلج احتاج عيونج حتى تشلعين دكمة قميص واحد؟؟
عقدت حاجبي
كنز: حبيبة بالي مو صافي هسة
وكفت ولزمت كتفي
وكالت بنبرة توسل
حبيبة: كنز فدوة لا تكسرين بيةةة
تنهدت
كالت بأنزعاج
حبيبة: دكتور المادة تمرض وراح رحلة علاج، اجة خطيبي تميم وكال انا راح اخذكم بدالة هالايام بين ما يرجع
كلت بأستغراب
كنز: اي وبعدين؟!
حبيبة: شو هذا باوع علية، انا والله كنت كاعدة كلشي ما مسوية وكان يكول انتي الكاعدة هنا الكل كاموا يباوعولي كتلة انا؟ كلي اي، كومي اطلعي برا
غصيت بضحكتي
وهي كالت بزعل
حبيبة: كنزززز والله صرت بكد النملة، احس متت فشلل، تخيلي بدون سبب وبدون سابق انذار طردني
كنز: يمكن يحبج
حبيبة: اكلها طردني تكلي يحبج
كنز: يخاف لا يتأثر ويضعف كدام الطلاب لهذا طردج
صفنت
بعدها كالت
حبيبة: لا تفرين راسي، امشي طكيلي الدكمة اللي يم بطنة
كنز: حبيبة ما بية، خليني ارجع لقسمي فاتتني هواي محاضرات
كالت بأستغراب
حبيبة: ليش تفوتج؟
كلت بأرتباك
كنز: لا ماكو شي، بس كنت تعبانة
حبيبة: بس اطلبج دكمة
كنز: خلاص ولا يهمج
رجعت لقسمي
وانا اتذكر غيث
مااعرف ليش يجي ببالي
شكلة الخايف
ورجفة ايدة
يا ترى بشنو يضغطون علية اهلة!؟
كملت محاضراتي وانا افكر
وبعدها رجعت للسكن
قبل لا ادخل للعمارة شفتة من بعيد
فز كلبي وحسيت بالخوف
هو شنو اللي يخلينا نحب اشخاص
واحنا مدركين ان نهايتنا سوداوية وياهم..
......
ومرات تكون اساسا ماكو نهاية
وماكو امل لهذا الحب..
مجرد حب فارغ
من طرف واحد
يعيش بقلب واحد
بدون سبب
وبدون نهاية..
هواي سألت نفسي هالسؤال
وهواي عاتبت روحي
ليش اغافل اهلي وادخل الو
وليش اباوعلو من بعيد
وليش ياخذني الفضول لحياتو
واحيانا احس بغيرة
من افكر مرات..
ان ممكن يكون متزوج
او يحب..
تساؤلات هواي
والفترة بسيطة
وهو غريب
وانتي صاحبة الدار
ليش ارخصتي نفسج ومشاعرج
وصرتي تتمنين نظرة؟!
كنت اباوع الو من بعيد
كاعد بالبستان وصافن
كوب الجاي برد
وهو ما حركو
ولا تحرك من مكانو
احيانا اتسائل..
شنو اسمو..
يا ترى اسمو حلو مثلو
او خشن مثل اطباعو
كان ابيض
شعرو مائل للبني
لحيتو بنية
عيونو كبار
خشمو عراقي
طولو مربوع
وضعيف..
او يمكن ضعف بسبب الحرب
مبين شكلو وقور
وابن ناس مرتبين
كعدتو وهدوئو وحركاتو
كلها تدل انه ابن ناس اجاويد
كنت اسافر يوميا برحلتي
وانا اتأملو
وهو صافن بعالمو
ومو داري..
كان ملتهي بذاكرتو المفقودة
وانا كنت اخزنو بعقلي ذكريات
مشيت وانا اتلفت
اخاف حد من هلي يجي ويشوفني
وصلت يمو
كلت
رهيفة: جايك برد
كال ببرود
: روحي حارة
رهيفة: انت بخير؟
باوعلي وكال
: لا
رهيفة: شنو اللي يخليك تكون بخير؟
: ارجع اتذكر
رهيفة: انا عرفت حقيقتك وانت بعدك تحاول تتذكر
عقد حاجبو
كال بأستغراب
: شعرفتي عني؟
رهيفة: مبين ابن عائلة محترمة، متزن ومرتب ونظامي، حقنة وما تنبلع، وما مبين عليك التعب يعني اتوقع انت بزر دلال وما تشتغل يمكن طالب جامعي او مدري
صفن بوجهي
بعدها دار وجهو
كلت
رهيفة: تنتبه لأسم خالد، اما انت اسمك خالد او هالاسم يعنيلك شي
كال ببرود
: شمكملة دراسة
رهيفة: سادس اعدادي وكعدت
: ليش
رهيفة: ما تشوف الامة محتركة، شيطلعني كلية
: هم صح
عم السكوت بينا
بعدها كال
: ليش ما تروحين؟
رهيفة: يزعجك وجودي؟ البستان بستان اهلي
: انا احترم ابوج واخوانج، ومااحب حركات اللكافة مالتج
ضحكت
رهيفة: ياااع انا ملكوفة
دار وجهو للبساتين
شلت كوب الجاي
وكلت
رهيفة: ما تحب الجاي
: من زمان ما احبة، من تسوي امي ما اشربة
رهيفة: اي؟
: كنت اكللهم استبدلوا الجاي بنومي بصرة مثلا
رهيفة: المن تكول؟
باوعلي وكال بصدمة
: انا كتلج مااحب الجاي!!؟
رهيفة: وذكرت امك
لزم راسو
ابتسمت وكلت
رهيفة: انا عفتك تسولف براحتك، السوالف هي اللي تخليك تعرف حقيقتك
ما رد الي
كلت
رهيفة: تكوم ترتاح؟
باوعلي وكال
: انتي ما تخافين؟!
رهيفة: من منو اخاف!؟
: مني، انا غريب عنكم
رهيفة: وشنو يعني
: يعني مو حلوة وكفتج هنا، بس الظاهر انتي متعودة
عقدت حاجبي
كلت بصدمة
رهيفة: متعودة ع شنو
كال بأرتباك
: مدري، يمكن يجوكم غربة هواي..
قاطعتو وكلت بغضب
رهيفة: احنا شيوخ ونكرم الضيف، وان ما تعرف الجبور اسأل عنهم وعن كرمهم وشرفهم، ويا غريب كون اديب
مشيت
احس نار كلبي ما بردت
التفتت الو
ذبيت كوب الجاي علية
شهك وبقى يباوعلي بصدمة
كلت بعصبية
رهيفة: امدة اللسان الما يحشم صاحبوا
ودخلت جوة وعفتو
ركعت الكلاص بالسنك
امدة التطلع وتحاجيك بعد
صلف..
.....
خالد: كلش اتفق
حازم: ع شنو تتفق
خالد: غيث اكو شي وراه
كلت بأنزعاج
حازم: عسى ما وراه عصابة، انا روحي طالعة
خالد: يمعود صار ساعة احجيلك وانت بالك مو يمي، اكلك غيث البارحة كان منهار
حازم: وبعدين
خالد: شمدريني خربط هواي بالحجي، ومن صحى ع روحو صار يكلي ها انا تعبان ومو واعي
حازم: اي؟
خالد: نطاني كاميرا وكلي خليها يمك
حازم: ما سألتة ليش؟
صفن خالد
كأن يستعيد ذاكرتة
خالد: يكلي عندة صدمة بطفولتة والكاميرا بيها صور اهلة واكو منهم ميتين وخايف، بعدين ذكر بنية اسمها كنز ويكلي مااذيها
كلت بأستغراب
حازم: كنز نفسها صديقة عطاء؟!
خالد: ماادري، يمعود هواي خربط البارحة وما فهمت منو شي كام يسويلي مابية شي تعبان بس ما اقتنعت احس اكو وراه شي
كلت بلامبالاة
حازم: يابة دعوفة خلي يولي
خالد: انت شبيك ضايج؟
حازم: ماكو شي
خالد: خلصنا من حبيبة النوب عطاء؟
باوعتلة بتعب
وكلت
حازم: انا ما عندي حظ وي البشر
خالد: ليش
حازم: خابرتني البارحة بالليل تصيح ومنهارة وتكلي ابتعد
خالد: يمعود النسوان بس حجي دون افعال
تنهدت
حازم: عطاء متأكدة من اللي تكولة
خالد: شلون؟
حازم: اكو ضغط عليها، مجاي اعرف شبيها، يمكن حبيبة تلومها يمكن صاير شي بينهم
صفن خالد
بعدها كال
خالد: الحجي بيناتنا هنة بالسكن وحدة تملخ الثانية
حازم: انا الدنيا طالعة من عيوني
خالد: يمعود كول يا الله
حازم: خالد انا حبيت عطاء وانا متأكد من هالشي
خالد: وحبيبة؟
حازم: حبيبة انفرضت علية فرض، وانا غبي وغلطان لان خاطرت وما سحبت روحي
خالد: هنة صديقات ويمكن بنظر حبيبة هاي خيانة
حازم: حبيبة من تزوجت تميم هم اعتبرتها خيانة؟
كمت وانا اكول بأنزعاج
حازم: الدنيا ماعدها غير حازم تشيل وتركع بي
خالد: لا تضوج، هسة تنحل بينكم
حازم: شتنحل بينا مجاي تداوم عطاء بسببي
خالد: لا تصير حساس، اذا تحبها صدك حاول اذا تكوم تدور كرامة لا تحب من الاساس
جريت نفس
دخل غيث للشقة
كان تعبان
كام خالد وراح الة
وهو يكول
خالد: شبيك هيج تعبان؟
غيث: مابية
دخل للغرفة وخالد لحكة
خالد: احجيلي شكو وراك
غيث: انهاريت وبس ماكو وراي شي
خالد: كلامك يحتاج تفسير
غيث: خالد عوفني
كمت وراهم
اباوع لخالد كال بعصبية
خالد: دحك يول راح يطك عليك العرج الانباري، كول العندك وفضها
كلت بأنزعاج
حازم: راح يطك العرج الجنوبي عليكم ثنينكم والطخ راس براس
خالد: حازم خلك بعيد
غيث: خالد انا تعبان لا تضغط علية انت هم
اباوع لايدة ترجف
سحبت خالد وانا اكول
حازم: عوفة تعبان
دخلنا للغرفة
وخالد يكول بأنزعاج
خالد: واذا سوالو بلية شلون
حازم: مراح يسوي شي، احسة مو قوي ولا مؤذي
خالد صفن بوجهي
وانا كعدت ع سرير حسين
كال
خالد: راح تبقى تعبان هيج؟
حازم: يمكن اختياري الها غلط
خالد: وليش هيج متأثر وتعبان؟
حازم: لان بسببي صارت متداوم
عم السكوت بينا
فركت وجهي
حازم: رغم كل اللي صار بيني وبين حبيبة ما انقهرت ربع القهر هذا
خالد: تعترف بلسانك انك ما حبيتها وحبيت عطاء
حازم: عطاء اختياري، اول مرة اختار شي بنفسي دون ما تفرضة الحياة علية
ابتسم خالد
بعدها كال
خالد: عرفت هسة ليش رحت للموت برجلي؟
ربت ع كتفي وراح للمطبخ
وهو يكول
خالد: رايح اسوي غدة، ارتاح انت
صفنت
شسوي بروحي
احسني تعبان
اتصلت عليها ما جاوبت
كمت وطلعت بسرعة
احس عقل ما ظل براسي
دخلت لعمارتهم
كتبتلها رسالة
حازم: انا بالباب
وصلت للسكن
دكيت الباب
شوي وفتحتها
باوعتلي بغضب وكالت
عطاء: اذا ما تهمك نفسك ع الاقل فكر بية، العمارة مال عمي وراح تأذيني بتصرفاتك
تنهدت بتعب وكلت
حازم: عطاء
دمعت عيونها
اجت تسد الباب لزمتها
حازم: لا تسوين هيج
عطاء: روح منا
حازم: عطاء ليش تأذيني؟
عطاء: انا بسببك خسرت صديقاتي وراحتي وانكلب المكان علية جحيم، روووح منا
دمعت عيوني
كالت بعصبية
عطاء: مااريدك بحياتي، خلوني اعيش حرام عليكم
بقيت اباوعلها وانا ساكت
كالت بخنكة
عطاء: انا مااريد اذيك ولا اذي نفسي
حازم: اعتبريني صديق وبس
صفنت بوجهي
كلت بتعب
حازم: انتي ساندتيني بفترة من فترات حياتي، خليني اساندج واروح، اعتبريني صديق عابر
نزلت ايدها من الباب
واحس اعصابها ارتخت
بقيت اباوعلها بكل خوف وامل واهي
ومن هنا ادركت
اسوء مراحل الحب
من انك تكون محب
لكن تقبل بالصداقة
بس حتى ما تخسر اللي تحبة
ويبقى بحياتك حتى لو صديق
بلكي يغير رأية..
بلكي يجي يوم ويحبك..
بقت تباوعلي واباوعلها
كنت تعبان
وهي منهارة
كلت بخنكة
حازم: احس شي بداخلي يرفض يعوفج عطاء، اعتبريني صديق اقبل
كالت بتعب
عطاء: روح حازم، انا احتاج ارتاح روح
مديت ايدي بخوف
وهي ابتعدت وانا اكول
حازم: انتي بخير؟!
عطاء: بخير بخير بس احتاج ارتاح
سدت الباب بوجهي
وانسدت بروحي الف باب..
مرات الخيارات كدامك هواي
بس تعلق نفسك بخيار وحيد
وهذه ازمتي الكبرى
.......
ومرات الحياة ما تسمحلك تختار
تفقد منك جزء مهم
وتتركك تترامى هنا وهنا
ضائع ع الطرقات..
مرات
تكون محصور بزاوية
وما تمتلك رفاهية الاختيار
تجيك فرصة خطرة
تغتنمها لانها فرصة نجاتك الوحيدة
وانا فرصة نجاتي
عيسى..
كان املي الوحيد بالحياة
والقمر اللي اضاء ليلي المظلم
لكن..
كلشي بهالدنيا يحاول ينتزعة مني بقوة
صرت احس بالخطر
وكل مكان اعيش بي
ما كان مكان امن..
تركت الجامعة فترة
صرت احرسة من كلشي
حتى من نفسي
وبكل يوم يجي عبدالله
ويحاول يستفزني بأمومتي
حالة حال اهلي
وكل يوم يتطور الموضوع
وانا ارفض..
واليوم..
غطيتة
عيوني امتلت دموع
عيسى..
يا اجمل عطايا ربي
ويا احلى هدية
عيسى
احلى الاسامي
شكد حلوة جيتك علية؟!
طلعت من الغرفة
صار بوجهي
اختفت البسمة
سديت الباب
قفلتها وضميت المفتاح بجيوبي
كال بنفاذ صبر
عبدالله: لازم نتفاهم
مشيت وعفتة
دخلت للمطبخ
لحكني وهو يكول بعصبية
عبدالله: الجاي تسوي غلط
التفتت الة
كلت
روناك: امشي اطلع برا
بلع ريك
عبدالله: روناك بطلي حركات الاطفال
روناك: داكلك امشي اطلع برا
كال بعصبية
عبدالله: اكدررر اخذة منج بالقوة، بس مااريد اسوي هالشي
ابتسمت
وكلت بأستهزاء
روناك: تودي الها؟
عبدالله: انتي فاهمة غلط
روناك: الطفل هذا هدية من مريم العذراء الي
خلة ايدة ع راسة
وكال
عبدالله: روناك بسبب هالطفل راح تنسجنين
ضحكت
روناك: محد ياخذة مني، امشي اطلع برا
جريتة من ايدة
كال بتعب
عبدالله: روناااك افهمي
طلعتة خارج البيت
وكلت
روناك: ششش، المثلك يسكت وما يحجي، قدري نفس عمتي صح، بس بدل ما اكره عبدالله وهو صغير راح اكرهة وهو جبير، وادلل ابني
سديت الباب بوجهة
طاحت دمعة من عيوني
مراح اضحي بأمومتي من جديد..
وعشت ليلة مليانة خوف..
خوفي لا افقد نفسي
واملي بالحياة
هو طفل
لكن روحي تعلقت بي
ومن الصبح
شلتة وشلت اغراضة
وطلعت من البيت دون ما عبدالله يدري
ماكان اكو مكان كدامي
سوى عطاء..
وصلت لشارع الجامعة
خفت يكونون طالعين للدوام
وسألت
وكالولي عطاء بالسكن
رحت الها وانا خايفة
عيسى بأيدي
وكلبي يخفق بقوة
دكيت الباب
وبعد مدة فتحتها الي
باوعتلي بتعب
بعدها انصدمت
عطاء: روناك؟؟ شبييج
دخلت للسكن
وانا ابجي واكول بخوف
روناك: انا مو بخير عطاء مو بخير، يريدون ياخذون عيسى مني
كعدتني وجابتلي ماي
خلت الجاي ع النار
وهي تكول
عطاء: اهدي، حيكون كلشي بخير
بجيت هواي
وهي تباوعلي وساكتة
بعد ما فرغت كل انهياري
كالت بهدوء
عطاء: عادي تفهميني شنو اللي صاير؟ وعبدالله منين جاب الطفل؟
كلت بخنكة
روناك: عبدالله حسب كلامة عندة علاقة غير شرعية ببنية ومن اجة للعراق هي تتواصل وياه ويهملها وبعد مدة عرف ان البنية حامل، من عرف حالتي اتفق وياها ياخذ الطفل منها ويعوضها بمبلغ مالي
كالت بتعجب
عطاء: وقبلت؟!
روناك: بالبداية وافقت وتم الاتفاق بينهم، وقت اللي شافوا اهلي تعلقي بالطفل صاروا يكولون ميصير تربين طفل مو ابنج وتعيشين حياة عمتج، راحوا ع الام ضغطوا عليها وعرضوا عليها راتب شهري وهي صارت تطالب بي ورفعت علينا دعوة خطف الطفل
باوعتلي بصدمة
عطاء: متأكدة ذول اهلج؟!
كلت بخنكة
روناك: هذا اللي صار
عطاء: وهسة؟!
روناك: عبدالله يكول راح تنسجنين ومدري شنو ويريد ياخذ الطفل وانا احس روحي صارت بي
بجيت
وعطاء تباوع علية وع عيسى
مدت ايدها ولزمت ايدي
وكالت بهدوء
عطاء: سامعة بقصة النبي موسى؟!
مسحت دموعي
عطاء: اكثر نبي انذكر بالقرأن هو النبي موسى لان قصتة كانت عظيمة وبيها ابعاد عميقة، انتي صح مسيحية بس انتي بشر وكل الاديان لله
يمكن الكلام اللي راح اكولة الج مراح يعجبج بس هذا هو الحل، فرعون كان يقتل كل ابناء بني اسرائيل ويترك البنات وهالشي سواه خوفا ع عرشة، ولمن انولد نبي الله موسى امة خافت علية هواي
خافت لا يقتلة وتخسر ابنها، وهنا تدخلت عناية الله، ورب العالمين اوحى الى ام موسى
بسم الله الرحمن الرحيم
{وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ}
رب العالمين امرها ان تلقي بالبحر وهي امتثلت لأوامر الله والقتة، انتي متخيلة ان طفل يعيش ببحر؟!
وتكتمل العظمة الالهية بوصف قلب ام موسى
﴿وَأَصْبَحَ فُؤَادُ أُمِّ مُوسَى فَارِغًا إِن كَادَتْ لَتُبْدِي بِهِ لَوْلَا أَن رَّبَطْنَا عَلَى قَلْبِهَا لِتَكُونَ مِنَ الْمُؤْمِنِينَ﴾
رب العالمين يعلم بقلب الام، ويعلم بمدى الالم لكن مرات حتى تحصل شي لازم تستسلم لأوامر الله وتتركة واذا كان الك نصيب بي راح يرجع
وتنختم قصة ام موسى وعظمتها برجوعة الها بأمر من الله
{فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ وَلَكِنَّ أَكْثَرَهُمْ لَا يَعْلَمُونَ}
..
بجيت بقوة
وانا اباوع لعيسى
اخذتني عطاء لحضنها وهي تكول
عطاء: كلشي بهاي الدنيا نصيب، اذا كان رب العالمين كاتب الج نصيب منة راح يرجع الج ويقر عينج، واذا كان هالطفل مو نصيبج صدكيني راح تتعوضين خير
مسحت دموعي
وهي تكول
عطاء: صيري قوية ودوسي ع جرحج، وصدكيني رب العالمين راح يعوضج خير، اتركي الطفل لأبوه وارجعي لحياتج وسلمي امورج لله وهو على كل شيء قدير
كلت بخنكة
روناك: واذا نطيتة الة وندمت
اشرت ع السماء وكالت
عطاء: رب الخير لا يأتي الا بالخير، ظني بالله خير وراح يكون عند حسن ظنج، وسلمي كل امورج لله وديربالج تكولين ماعندي مكان، اذا ضاقت بيج الدنيا تعالي لعطاء، اطلع منا وانطيج مكاني
حضنتها بقوة
وصرت ابجي
عطاء كانت نموذج عن الحنية والامان
والامل بوقت واحد..
اخذت عيسى
اجرت تكسي ورجعت للبيت
صار عبدالله بوجهي
دخلت للغرفة
سويت ممة لعيسى
رضعتة وانا اباوع لتفاصيلة
دموعي كانت تنزل بهدوء
بقيتة بحضني
مرت ليلة كاملة
ما فارقني عيسى ولو لحظة وحدة
لميت كل اغراضة واغراضي
وعبدالله يباوع الي متعجب
شلت الجنطة وخليتها يمة
شميت عيسى ومسحت دموعي
قدمت عيسى لعبدالله وكلت
روناك: هذا ابنك اخذة الك
باوعلي بصدمة
اخذة مني ومشيت
باوعتلة وكلت
روناك: انا طالعة من حياتك، عيشها براحتك وانتظر منك ورقة طلاقي
اخذت اغراضي وباوعت للمكان
صارت عيوني بعيون عبدالله
كان يباوعلي بقهر
سبحان اللي نزع من قلبي حبك..
طلعت برا
الدموع تتناثر مني
مشيت والجنطة بأيدي
رجعت غريبة مثل ما اجيت
ورجعت حياتي تنعاد من جديد
وهاي انا
بنقطة الصفر مجددا...
بقيت أشر للسيارات
لحد ما وكفت كدامي سيارة
صعدت جنطتي يمي
وصعدت وانا ابجي
كلت بخنكة
روناك: الشارع اللي يم جامعة بغداد، اكو هناك عمارات سكنية
كلت وانا امسح دموعي
روناك: امشي وانا ادليك
كنت اباوع للشارع
ودموعي مثل المطر
قدملي كلينكس وهو ساكت
اخذتة منة وما باوعت الة
مسحت دموعي
فتحت جنطتي
طلعت فلوس
قدمتها الة وكلت
روناك: تفضل الكروة
توقفت السيارة فجأة
والتفت الي شخص غريب
باوعلي وكال
: بس انا مو سايق تكسي
ضيقت عيوني وانا اباوعلة
كلت بخنكة
روناك: لعد شنو!
شكرا لزيارتكم عالم روايات سكيرهوم
