رواية ايام من رماد الفصل الثاني عشر بقلم احمد
دمعة: رجعنا للبيت جانن امهم وسما يجهزن العشى ولان تاخرنا بالطريق ما لحگت اساعدهن بس من تعشينا حطيت الجاي عالنار واني غسلت المواعين
ومن شربو جاي ابوهم طلع وناظم وكاضم هم طلعو ويا جماعتهم واني غسلت ملابسي اني وناظم ورحت لغرفتي سفطت الغراض مرة ثانية وحطيت كلشي بمكانو المناسب
والجنط عفتهن لحد ما اجى ناظم وخليتو يحطهن فوگ الكنتور لان هو اطول مني وسحبني من ايدي للسرير ومع السحبة وگع هو واني وگعت فوگو
ناظم: شو من اجيتي من اهلج صرتي احلى من قبل
دمعة: بخجل .. شلون يعني
ناظم: يعني عيونج صارن احلى .. وباسني من عيني اليمين .. وخدودج صارن احلى وباسني منهن .. وشفايفج صارن احلى وباسني منهن
اني من جهة خجل ومن جهة فرحانة بتعاملو وياي وبسبب بوساتو الي صرت ماگدر ارفع ايدي بعدها مددني وصار فوگي
ناظم: توثقين بي
دمعة: اي
ناظم: الى اي درجة
دمعة: الى ابعد الحدود
ناظم: لعد ارخيلي جسمج علمود اخليج تعيشين احلى ليلة بحياتج
دمعة: تمام
اني سويت مثل ما هو گال ما حاولت اني اشنج جسمي او اتوتر وهو تكفل بكلشي وجان يعرف شلون يخليني مرتخية
(ماريد احجي بالتفاصيل اكثر بس اريد توصلكم فكرة انو بهاي الليلة تحديدا ناظم گدر يسيطر على نفسو وعلي بشكل مو طبيعي)
وماراح اگدر اگوللكم عن اكبر خطأ سويناه بحياتنا بس هذا الحديث يلخص كلشي بس ملاحظة هاي الفتوى من مذهب السنة الحنابلة تحديدا اذا اكو فتوى مخالفة بغير مذهب فما الي اي دخل بيها
(حديث أبي هريرة رضي الله عنه
قال ﷺ:
«ملعونٌ من أتى امرأتَه في دُبرها»)
اني بوقتها ما جنت اعرف هالشي خطأ وذنب الى هاي الدرجة وجنت متوقعة حلال لان بالبارت السابق گلتلكم خطأ ماما رحمة من گالت كلشي حلال بين الزوجين
ماعرف بوقتها ما اجى ببالها هالموضوع او ما توقعت ان ناظم يوصل لهالحد هذا وهذا هو الخطأ الي گلتلكم انتبهو عليه
من خلصنا گوة گدرت اسبح ورجعت لفراشي وراح ناظم هم سبح واجى تمدد يمي وسحبني لحظنو وباسني على راسي
ناظم: خوما تأذيتي
دمعة: كلش
ناظم: اسف يا روحي اوعدج بعد ما اذيج
دمعة: خايفة مثل وعد ذيج المرة
ناظم: لا هالمرة صدگ بعد ما اذيج
دمعة: اذا اسألك تجاوبني بصراحة
ناظم: اسألي
دمعة: من وين تعلمت كل هالاشياء
ناظم: مو گلتلج اكو فيديوهات للتعليم
دمعة: يعني ما سويت هالشي ويا بنات
ناظم: لا بابا قابل مخبل وثانيا وين اكو بنات يقبلن بهيج شي
دمعة: شلون يعني يقبلن بهيج شي
ناظم: اقصد تكون وياي مثل زوجتي
دمعة: وگفت گلبي
ناظم: ليش
دمعة: عبالي هالشي غلط
ناظم: ههههههه لا مو غلط وتذكري كلام امج كلشي بين الزوجين حلال
دمعة: تمام
ناظم: شرايج بفكرة
دمعة: شنو هي
ناظم: اجيبلج فيديوهات تتعلمين منها
دمعة: يععععع لا ماريد
ناظم: ليش
دمعة: احسن خلينا هيج انت تعرف وانت تتصرف
ناظم: تمام
طبعا بهاي الفترة جان ناظم يعرف ان الي سويناه غلط جبير ويعرف اني بسبب جهلي ما اعترضت وجان تذكيرو الي بكلام ماما رحمة هو تغطية عن فعلتو علمود ما اسأل عنها
ماعرف ربي راح يسامحني على هالذنب ولا لا بس ربي يعرف اني جنت جاهلة عن هالموضوع بوقتها واكيد راح يغفرلي هالذنب
ثاني يوم الوجع الي بجسمي راح گعدت الساعة 8 وبعدني مو مصلية الفجر صليتها وگعدت ناظم علمود يصلي ونزلت تحت
جانت العائلة كلها نايمة بس هم وقتهم من 8:30 لل 9 الصبح يگعدون فبلشت بالريوگ وگعدو اول شي الاب والام ومن كملت الريوگ صبحت عليهم ورحت اگعد البقية
جنت اريد اروح اگول لناظم يگعد سما وكاضم لان سما تكرهني وكاضم مايصير ادخلو لغرفتو وهو نايم بس من صرت گدام غرفتنا سمعت صوت كاضم بيها
كاضم: يعني شنو هسا
ناظم: اليوم اراضيها قابل ابقى هيج
كاضم: مو قصة تبقى هيج بس تعرف انت شگد متعلقة بيك حتى تحجيها الي دائما
ناظم: اعرف بس يا كاضم ترا زحمة ابقى بدون زواج وهي هم مصيرها تتزوج وتصير هالسوالف ذكريات
كاضم: المهم اني گلتلك وانت بكيفك بعد وتعرفها هي شگد حساسة تجاهك
ناظم: معليك اذا ما رجعتلكم تضحك اليوم اني مو ناظم
كاضم: ههههههه ما ينخاف عليك انت ذيب
دمعة: حسيت كاضم يريد يطلع ودخلت للغرفة سويت نفسي متفاجئة بكاضم وشفتهم مثل الي ارتبكو گلتلهم الريوگ جاهز
كاضم: عاشت ايدج .. وطلع من الغرفة
دمعة: وانت عايش .. كاضم بلكي بطريقك تصحي سما
كاضم: صار
دمعة: يلا خلي ننزل
ناظم: خلي ابدل ملابسي
دمعة: وين تروح
ناظم: اخذ سما اغيرلها جو شوية
دمعة: باستغراب .. تمام
ناظم: دمعة سما تبقى اختي ومن زمان ناخذها اني وكاضم بين فترة وفترة تغير نفسيتها وماريدها تحس انو بعد الزواج نسيتها
دمعة: صحيح حقك ويمكن علمود هالشي جانت زعلانة
ناظم: يمكن لان ما اخذتها صار شهر كامل لان ملتهي بالعرس وتحظيراتو
دمعة: تمام
ناظم: محتاجة شي اجيبلج وياي
دمعة: لا سلامتك بس احجي ويا سما وفهمها انو ماكو سبب تكرهني وانت راح تبقى اخوها قابل راح تعوفها علمودي
ناظم: تمام اليوم احجي وياها وافهمها
دمعة: تمام
طلعت من الغرفة وصارت بوجهي سما هم جانت طالعة من غرفتها باوعتلي وكملت طريقها واني ما اهتميت نزلت تحت وگعدت وياهم اتريگ
ومن سألت عمتي على ناظم گلتها جان يبدل ملابسو هسا يجي وتقريبا 5 دقايق واجى تريگ ويانا وباس سما من خدها وگللها اليوم نطلع نتونس اني وياج
هي فورا ابتسمت ومن خلصنا ريوگ راحت جهزت نفسها واني بديت انقل المواعين للمطبخ ورجعت وقبل ما ابلش اغسل سمعت ناظم يگول جيبي ماي
اخذت الگلاص ورحت جان ابوه يريد الماي ومن رجعت للمطبخ اجت من گدامي سما وباوعتلي وهي تضحك ضحكة خباثة وكملت طريقها
اني الله شاهد لا حاسدتها ولا ضايجة لان ناظم اخذها ولا ببالي اي شي مجرد اريدها تعوف حقدها الي مالو مبرر تجاهي
غسلت المواعين ورحت غسلت الملابس ورجعت تحت جانو عمي وعمتي وكاضم يحجون ويا بعض گلت عمة شنو نسوي غدا
نضال: تعرفين تطبخين
دمعة: مو كلش لان اية جانت تطبخلنا بالبيت
نضال: تمام روحي طلعي بيذنجان وقطعيه علمود نسويه مرگ ويا تمن
دمعة: تمام
رحت عالمطبخ وسويت مثل ما گالتلي واجت هي علمود تسوي الغدا واني اساعدها وصارت تعلمني شلون اسوي وشگد احط من كلشي
ومن خلصت بقى بس يتهدر التمن (يستوي على نار هادية) گلتلها هاي هي عمة اني اكمل گالت تمام وراحت واني بقيت اراقب التمن
بين ما استوى اذن الظهر صليت ورجعت اريد احط الغدا وسألتها عن سما وناظم گالت يتغدون خارج وحطيت الاكل وتغدينا
العصر اجو ناظم وسما جانت سما فرحانة بس ناظم تعبان كلش يگول فررتني السوگ كلو علمود بس تسأل وگال رايح انام لا تگعدوني
قبل المغرب جنت بالمطبخ گاعدة وصافنة واجت سما گالت السلام عليكم ورديت عليها السلام واني مستغربة لان اول مرة تحجي وياي
سما: شلونج
دمعة: الحمدلله وانتي
سما: الحمدلله .. اريدج تعذريني
دمعة: على شنو
سما: على غبائي وياج اني ما اكرهج بس عندي ناظم بالدنيا كلها وجنت ضايجة بالبداية عبالي راح ينساني بسببج
بس هو گلي اليوم ان انتي ضايجة لان دا اتصرف هيج وياج وعرفت اني غلطانة لهذا حبيت اعتذر منج ونفتح صفحة جديدة
دمعة: ماكو داعي تعتذرين انتي ما زعلتيني واحساسج طبيعي لان لو صوفي اخوي متزوج قبلي يجوز احس نفس احساسج
سما: شرايج نتعرف على بعض بما انو اول مرة نحجي سوا
دمعة: تمام
سما: اني عمري حاليا 20 طالبة جامعة وباقيلي اخر سنتين واتخرج اصير معلمة تاريخ
دمعة: حجيتلها عني وعن اهلي باختصار
سما: صحيح جنتي تشتغلين قبل
دمعة: اي
سما: بمزح .. شرايج تاخذيني اشتغل وياكم ههههههه
دمعة: هههههههه ما تتحملين لان ما متعودة
سما: اذا جسمي يصير منحوت مثلج ماعندي مشكلة
دمعة: باوعت على نفسي .. ترا جسمي عادي
سما: بالعكس والله جسمج يخبل شگد احاول اسوي رجيم واضعف بس احس جسمي مو متناسق
دمعة: لا جسمج كلش حلو بس يرادلج شوية ثقة بنفسج
سما: بفرح .. صدگ والله
دمعة: اي والله وثانيا الشغل موت جنا نرجع للبيت متفلشين من التعب
سما: الله يعينكم اني مگضيتها بشغل البيت وهم دا اتعب كلش
دمعة: شغل البيت متعب بس بالنسبة الي ما يتقارن ويا شغل العمال هناك تعرفين شنو معنى التعب
سما: تدرين امنيتي اجرب هالشعور
دمعة: گولي لاهلج يجيبون رمل وسيراميك وسمنت وانقليهن من مكان لمكان
سما: ههههههه هسا يگولون مخبلة
دمعة: باوعتلها ورفعت حاجبي
سما: ها شبيج تباوعين هيج
دمعة: ليش انتي متوقعة نفسج عاقلة
سما: ههههههههه عابتلج قصفتيني
دمعة: علمود مرة ثانية ما تزعلين علي بدون سبب
سما: لا هاي هي ما ازعل بعد
نضال: سما يمة سوي العشى دمعة اليوم الشغل كلو عليها
سما: تمام يمة
دمعة: من راحت .. ترا ما سويت شي مجرد ريوگ وغدا
سما: لعد شتريدين تسوين مثلا هو هذا شغل البيت
دمعة: غير شطف وطبخ وخبز واني لا طبخ ولا خبز
سما: معليج راح اگول لماما تقسم الشغل علينا شنو رايج
دمعة: تمام
ساعدتها بالعشى ومن تعشينا وخلصنا غسلنا المواعين ورجعنا للصالة
سما: ماما اريدج تقسمين الشغل بيني اني ودمعة
نضال: ما يحتاج كل وحدة تعرف شغلها
سما: لا ماما انتي حددي احسن علمود ما نختلف
نضال: دمعة انتي عليج تنظيف البيت وغسل المواعين وملابسج انتي وناظم وغرفتكم
وانتي سما عليج الخبز والطبخ وملابسج انتي وكاضم وغرفكم ثنينكم والي تريد تساعد الثاني بعد احسن والي تقصر مثل سما اليوم ترجع تعوض بنفس اليوم او ثاني يوم
دمعة & سما : تمام
بال11 گعد ناظم وحطيتلو عشى وبالليل نمنا مباشرة لان جان تعبان ومن يومها علاقتي بسما كلش تحسنت وصرنا صديقات
اني وناظم مرة اساعدو مثل ذيج المرة ومرة نرجع نسوي نفس الخطأ بالمرة الثانية وحياتنا هادئة الى ان اجى قبل العزيمة بيوم
جنا بالمطبخ العصر اني وسما وجنت كلش متحمسة للروحة گلت لسما ترا باجر راح ابات يم اهلي ما ارجع وياكم
سما: بدال ما تباتين روحيلهم غير يوم انتي وناظم
دمعة: باجر اخواتي المتزوجات كلهن يكونن موجودات وبصراحة مشتاقتلهن
سما: شوقتيني لشوفة اهلج
دمعة: گولي لعمتي اذا قبلت ابقي وياي ونرجع سوا
سما: ما تقبل اعرفها خصوصا ان اخوانج موجودين
دمعة: قابل اخواني راح ياكلوج وثانيا هم يطلعون من الصبح للمغرب للشغل يعني ماراح حتى تشوفيهم
سما: خلي اشوف باجر اذا عجبني الوضع هناك اگوللها بلكي تقبل
دمعة: تمام
كملنا اليوم طبيعي وبالليل كررنا نفس الخطأ اني وناظم وجنا متفقين من نرجع من اهلي نروح للمستشفى علمود مراجعة الدكتورة لان صارلي اسبوع
ثاني يوم گعدت من الفجر علمود اجهز نفسي وما خلصت لحد ما صارت الساعة 9 ونزلت حطيت الجاي عالنار وصعدت گعدت ناظم
وصيتو يگعد كاضم ورحت اني على سما گعدت گالت عوفيني نايمة وغطت وجهها بالبطانية ورجعت سحبتها مرة ثانية
دمعة: گومي ولج خبلة راح نتأخر
سما: بصوت تعبان .. ماروح
دمعة: باستغراب .. ليش
سما: راسي يوجعني ومعدتي تگلب وكاتلني البرد
دمعة: البارحة مابيج شي
سما: يمكن لان سبحت البارحة صخنت روحو انتو وعوفوني نايمة
دمعة: عفتها ورحت على عمتي جانت گاعدة بالصالة گلتلها سما مصخنة وتگول ماگدر اروح وراحت علبها عمتي
اني كملت الريوگ وحطيتو بالصالة وماكو احد.كلهم عند سما ورحت عليهم اريد اعرف شنو صار وياهم دخلت للغرفة واسمع سما تحجي ويا امها
سما: ماما والله مابي شي بس مصخنة ومالي خلگ واحس نفسي تعبانة روحو انتو عالعزيمة واني ابقى نايمة
كاضم: هاي هي يمة روحو انتو اني باقي هنا يمها عيب من الجماعة هسا دا ينتظروكم
نضال: تمام بس دير بالك على اختك ومن يصير وقت الغدا جيبلكم غدا من المطعم
كاضم: صار
نضال: يلا تعالو تريگو وعوفوها تنام وترتاح
دمعة: من طلع الكل .. خربتي واهسي
سما: ههههههه لج خبلة بشنو خربت واهسج
دمعة: مو جنت اريد اعرفج على خواتي
سما: خيرها بغيرها
دمعة: يعني ما تگدرين ابد تجين
سما: والله يا روحي تعبانة كلش وماريد اجي خاف اتخربط وتخرب العزيمة عود من تروحين غير مرة اروح وياج
دمعة: تمام عندج العافية
سما: الله يعافيج حبيبتي
دمعة: طلعت من الغرفة وسكرت الباب ونزلت تريگت وياهم وعمتي گالت لا تغسلين المواعين لا تخرب كشختج عوفيهم من نرجع
حطيت الاكل الزايد بالثلاجة ورحت ويا ناظم علمود اشوف اذا يحتاج شي ولا لا جان بالغرفة دا يلبس الجاكيت وجان كلش مرتب نفسو
ناظم: ها شنو رايج
دمعة: تخبل
ناظم: شو تعالي يمي
دمعة: رحت يمو حضني من كتوفي ووگفنا مقابيل المراية
ناظم: منو احلى
دمعة: اني
ناظم: ها هيج صارت
دمعة: ههههههه اي
ناظم: تعالي اليوم الا اخرب الروحة
وحضني يريد يبوسني وصرت اتوسل بيه گلتلو لا لا والله انت فدوة اسفة والله ماعيدها
ناظم: لا عيديها اني اريدج تعيديها
دمعة: لا لا فدوة بعد ما اعيدها اهم شي الروحة
ناظم: هههههههههه ديري بالج ترا الخباثة عندي فول
دمعة: لعد انهزم قبل ما تورطني بجفصة ثانية
ناظم: تمام
دمعة: عفتو وطلعت من الغرفة نزلت تحت وگعدت بالصالة الى ان تجمعو العائلة كلهم حتى سما نزلت تتريگ وبقينا نحجي الى ان صارت الساعة 10:30 وگال عمي يلا
طلعنا عمي ركب بمكان السائق ويمو ناظم واني وعمتي من ورا وانطلقنا باتجاه بيتنا واحس الثانية سنة من شوقي للبنات
وبسبب الازدحامات ولان عمي يمشي على كيفو تقريبا بال 11:30 وصلنا البيت ومن نزلنا شافنا مصطفى واجى سلم علينا
ومثل كل عزيمة هو الوحيد من اخواني القايم بكلشي بعدها اجو بابا واخواني هم سلمو علينا ام ناظم طلعت بوجها للكرفانة الي بيها ماما رحمة وماما نعمة
اني سلمت على بابا واخواني ولحگتها سلمت على ماما رحمة وماما نعمة ورحت للمطبخ جانن كل البنات بيها ومن شافني طارن من الفرح
سلمت عليهن كلهن واحس الدنيا ما توسع فرحتي واني بينهن وكل وحدة تسألني سؤال واني اجاوب الى ان صار وقت الغدا
هالمرة تساعدن سوسن وسناء بصبة الغدا واجى مصطفى هم وياهن علمود يتأكد ان ماكو شي ناقص ومن كملو بدا ينقل للزلم واجو اخواني ساعدوه
وجانو هم جايبين خاروف مدري نعجة وذابحيها علمود اهل ناظم ومن اخذو حصة الزلم نقلنا حصة النسوان لان الخير هواي ويكفي الزلم والنسوان بوقت واحد
وتغدينا وجانت عمتي كلش مرتاحة ويانا لان اهلي استقبلوها احسن استقبال ومن خلصنا غدا صار وقت الجاي واني اخذت الجاي للنسوان
وقبل العصر بشوية قررو يمشون اهل ناظم علمود سما وودعناهم واني بقيت يم اهلي وقبل ما يروحون اجى يمي ناظم
ناظم: ايمتى اجيج
دمعة: براحتك
ناظم: اذا براحتي اخذج هسا
دمعة: ههههههه لا مو هاي الراحة غيرها
ناظم: ههههههه باجر اجي لو بعدو
دمعة: امممممم ثواني وارجعلك .. رحت على سوسن ورانيا وسناء سألتهن ايمتى يروحن رانيا وسوسن گالن بعد باجر وسناء گالت باجر ورجعت عليه
ناظم: ها وين رحتي هسا ابوي يگلب الدنيا لان تأخرت
دمعة: بعد باجر تعال لان باجر يبقن خواتي
ناظم: سكت شوية ومبين انزعج .. تمام تمام
دمعة: راح يمشي وصحتو بصوت ناصي وبست ايدي ونفخت عليها على اساس دزيتلو بوسة وضحك هو وكمل طريقو
