رواية درب العشك الفصل السابع عشر 17 بقلم شمس

اممممم رفيف .. اسمج ملفت للانتباه ..

تعرفين شنو معناه ..

بحثت بالگوكل هسا .. 

الرقيقه ..الخصبة  حسنةُ الأخلاق، المحبة للطعام والشراب، الساعية لخدمة الآخرين، الكريمة، العطوفة، المرتاحة، سقف البيت. 

الصراحة عجبتني كل المعاني .. بس محبه للطعام والشراب ماادري ..

لان انتي ضعيفه حيل .. 

بله تاركة الاكل الطيب كله حتى تسوين رجيم ههعه..

بس دا اتخيلج سمينه شويه يمكن تصيرين احلى بنيه ..

اعرفج تسمعيني لهذا اتمازح وياج ..

هههههه . اني فارس دكتور ومتزوج وعندي بنيه .

وانتي تعتبرين زميلتي بالمهنه ..

عايش حياتي بالطول والعرض ومااخلي احد ينكد عليه .

لان الدنيا فانيه ..

وكلام الناس مايخلص ..

لهذا اواجه العالم بتجاهلي لكل الالسن .

حتى اريح عقلي وعيش بسعاده ..

مع عائلتي الي تحبني واحبها ..

اكثر معنى الاسمج ينطبق عليج .. هو رقيقه . ورقيقه جدا وتكاد ان تكون ضعيفه من الرقه ..

لان الانسان مرات من گد ماضعيف يقرر يختار الهروب ع المواجهه ..

وانتي اختاريتي الهروب من الواقع ولجوء لعالم ثاني يبعدج عن كل الناس الي حولج ..

 انتي دكتورة . والمفروض تكونين قويه وصبورة وتتحدين المصاعب ..

لازم ماتوگعين ولاتستسلمين من اول مطب بحياتج ..

محد يستحق تضحين بروحج الحلوه وتتخلين عن عالمج لألجة ..

فكري بأهلج الي منتضرين برة وشوفي خوفهم عليج .

فكري بهذا الكائن الصغير .

الي بداخلج والي ديعيش معاناتج ..

مثل ماهو قوي ديتحدى وضعه وضعفج .

انتي صيري قوي ومديه بالقوه ..

لاتكونين ضعيفه ومهزومه . وتأذيه .

يگولون الطفل يشعر بأمة ..

وكلشي تحس بي هو هم يحس يتألم الألمها ..

ويفرح الفرحها ..

اعرف دوختج بالكلام ..

والمفروض الجلسه اليوم بس تعارف ..

بس لأن حالتج خاصه ..

مارة عليه ناس مصدومه ومكتأبه .

بس ممرت عليه انسانه متجاهله الواقع وداخله بلا وعي ..

حاليا ماراح اضغط عليج اكثر ..

بس اريدج تفكرين بينج وبين نفسج . بكلشي حلو مر بحياتج ..

بطفلج واهلج واحبابج وكل اللحظات الحلوه الي عشتيها وياهم ..

انس الزعل وانسي الهم وانسي الي وصلج الهاي الحاله 

واجهي طلعي غضبج وقهرج للخارج لاتكتميه وتخفيه بداخلج ..

ليش نزلت دموعج .. 

عبري عن الي بداخلج بالكلام بالابتسامه عيشي واقعج ولاتضعفين .

لاتخلين دموعج وحزنج يصيرون اقوى منج ..

وهسا راح اصيح اختج ..

اريد اشوف من تشوفيها شتحسين بداخلج ناحيتها .

حاولي تعبرين عن احساسج اتجاهه بأي تعبير تگدرين 

تبديه ..

رحيق ..

صاحني الدكتور بعد مابقئ لفترة طويله هو ورفيف جوه 

دخلت ..

شفتها نازله دموعها .

گال ها رفيف ..

منو هذي ..

بقت صافنه بوجهي وغمضت وفتحت عيونها .

تغيرت ملامحها ..

گال يله .

اليوم كافي هيج ..

اريد اشوفج الجلسه الجايه بغير وضع .

وقويه .

وحاولي تستعيدين نشاطج وحيويتج .

لان كلشي بإيدج . 

اسعي للي ترديه وخلي عندج ارادة .

طلعناها .

واجه رامي بوس راسها .. واخذها ..

گال . من رختص اختي ..

تفضل دكتور ..

اريد اعرف زوجها وين هو سبب الي صارلها ..

رحيق .. نوعا ما . اهله رادوا يزوجوه وهي ماتحملت الفكره انهارت ودخلت بصدمه بسرعه ..

دكتور .. هذا دليل على حبها القوي الها . خافت من خسارته ومااتحملت . كانت بين صراع قلبها يريده وعقلها وكرامتها انجرحت ورفضته .

لهذا حاولت تبتعد وتهرب عن واقعها حتى ماتفكر بلي راح يصير او الي صار ..

رحيق .. وهسا شنو تنصحني دكتور ..

فارس .. رجلها وين يگدر يجي . هو يتواصل وياها تشوفه او لا ..

رحيق .. لا صار خلاف بينه وبين اخواني وماااعرف منعوه من شوفتها ..

الدكتور .. زين . اذا عندج صور اله حاولي تذكريها بي خليها تشوفه .

احجيلها عنه .

بلغيها انه دا يجي ويحاول يشوفها والضروف منعته .

كلشي سولفيلها خلي تحس بأمل ولو قليل حتى تتجاوب .

واذا شفتيها تجاوبت وابدت اي رد فعل ..

گوليلي .

ورقمي موجود بالبطاقه .

ونحاول ندخله بجلساتنا ونخليه يحجي وياها .

لان اعتقد هو الوحيد القادر انه يرجعها الحالتها الطبيعيه 

رحيق .. بس دكتور اخوي مانع تقربه الرفيف واخاف تصير مشاكل ..

حاولي من غير ميدري اخوج .

واذا شفتي ردت فعل منها من تشوف صورة او من تحجيلها عنه . گوليلي واني اگلج شتسوين .

رحيق .. شكرا دكتور واني راح اسوي اي شي بس كون ترجع الطبيعتها ..

نزلت من العيادة . وشفت رامي واگف يم السيارة .

وين رحتي شگالج الدكتور.. 

رحيق .. ماگال شي . بس گال سولفوا وياها وطلعوها لاتخلوها بالبيت محبوسه ..

رامي .. اي اني هم مفكر ناخذها للزوراء . بلكي اذا شافت ناس تتغير نفسيتها ..

ماما .. اي صدگ خوش فكره ..

رحنا للزوراء .

واخذناها الحديقه الحيوان .

ونزهناها ..

كانت تباوع وتحس بالناس بس نفس ماهي بلا حركه ..

صار المغرب رجعنا ..

جبنا الممرض خلالها مغذي ..

وانطيناها العلاج .

جبت عصير وگمت اشربها بالگوه ..

خليتها نامت لان. تعبت .

رحت تعشينا واجن خالاتي يمنا .

شافنها وطلعن .

لنص الليل ..دخلت لگيتها مفتحة عيونها ..

گلتلها .صح النوم يحلو .

اني هم مانعسانه اجيت اشوفج ..

باوعت الماما نايمه .

طلعت موبايلي . وطلعت صور زواجهم وصور دبي ..

گعدت اتصفح واراويها .. 

الصور الي بيها صگر اتأخر يله ادورهن ..

حسيتها تغمض وتفتح وعيونها يدمعن ..

گلتلها اشتاقيتيله مو ..

هو هم اشتاق .. 

وكل يوم يجي يريد يشوفج واخواني ميخلوه .

يخافون عليج تضوجين ..

بس هو تعذب وماخله طريقه ماحاول بيها .

يمكن الصوج بيكم اثنينكم ..

لان ماتفاهمتوا . ولا تنازلتوا ..

دخلتوا الناس بينكم ..

وتالي محد تضرر غيركم ..

انتي هاي حالتج ..

وهو باقي يركض من مكان المكان حتى يشوفج ..

انطوا لرواحتكم فرصه رفيف ..

لاتخلون الناس تتدخل بينكم . 

عندج حجي گومي واجهي احجي عليه عيطي .

ابنكم. بحاجتكم ..

وطلع اقوى منكم .

حافظي ع زوجج . لو فعلا يريد يتزوج . هاي صارلج شگد تاركته جان تزوج. 

بس هو يحبج ومايشوف غيرج .

اخواني يخافون عليج ومتصورين هو السبب بلي صارلج .

وهو تايه ومايعرف شلون يشوفج ..

محد يگدر يحل هذي الشغله غيرج .

انتي بيدج تصحين وتوگفين ع رجلج ..

گومي خيتي گومي .

حسيتها اخذت نفس قوي ورجعت . عبالك دا تتنهد .

شلون واحد من يبجي وياخذ نفس قوي ..

بدت تبين ملامح البجي بوجهها .

تريد تصرخ وتبجي بس ماتگدر ..

بست راسها وگلتلها ماقصدي ااذيج بس ردت اوضحلج موقف صگر . خاف عبالج عايفج ومايسأل .

بلعكس هو حاله مايفرق عنج .

بست راسها وگلتلها ارتاحي ..

غطيتها . بس هي مثل الي تون گامت .

جان ونينها تعبير عن الي بداخلها ..

رحت انام . گال احمد وين جنتي .

گتله ع الي صار ..

احمد .. 

كو اخاف تنتكس ..

رحيق .. بعد هو دكتور واعرف . ودا احس كلامه صحيح .

لان گامت تون وتشهگ .

وهي كانت مثل الميته قبل ..

ردت انام .. گامت تبجي جنه .

گمت شربتها گلاص حليب ونيمتها مرات تجوع ..

رجعت نمت . وفزيت الصبح مخنوگه .

گمت اصلي .

شفت ماما طلعت ..

گالت يمه همزين گعدتي .

هاي اختج بس تون الليل كله وماادري شبيها .

خاف شي يوجعها ..

گلتلها لاتختفين گلبها الي يوجعها ..

روحي نامي كم ساعه وناخذها للعلاج الفيزيائي بعد ..

صليت ودعيتلها ورجعت نمت ..

گعدت الصبح سوينا ريوگ وتريگنا .

شكلت المغذي الرفيف ..

جبت حليب دااشربها بالسرنجه .

مااتحملته بسرعه استفرغت .. 

مسحتها وبدلت ملابسها ..

ومسحت وجهها وايديها وجسمها بالكلينكس الرطب ..

خليتلها بوطرة ام الريحة ..

ماگدرت اخليلها عطر او معطر . جسمها متحسس من النوم ..

بس صارت ريحتها تخبل مثل الطفل ..

رحت سويت الرامي ريوگ .

گال اني راح اروح باجر دوامي ..

كمل ريوگ وطلع . وجانت هاي فرصتي ..

احمد طلع للدوام ..

واني وماما شلنا رفيف خليتها بالكرسي .

اصلا وزنها خفيف حيل ..

ولبستها شالها ..

مرينا على بيت خالوا اهل احمد يمنا انطيتهم جنه لان مااگدر اخذها وياي للمستشفى اخاف تتمرض ..

بعدها رحنا للمستشفى.  

سوولها علاج . وكانت تون يمكن تتأذى .

خابرت دكتور فارس وسولفتله ..

گال جيد . اذا هي هم تريده بس كانت تتصور تركها .

لهذا دا تعبر عن اشتياقها بهيج طريقه ..

حاولي تتصلين بزوجها .. 

وتخبريه بوضعها ..

واذا يگدر يجي قبل الجلسه الجايه لهنا .

وجوده مهم بالعلاج ..

گتله صار دكتور.. 

خليت ماما مشغوله برفيف . 

واتصلت ع صگر . همزين كان رقمه عندي ..

اتصلت شگد بس كان مغلق ..

حاولت ماكو ..

اوووف هسا هذا شلون اوصله ..

رجعت الماما واخذنا رفيف ورجعنا للبيت .

بالطريق . نزلت يم مطعم مال سمك اخذنا سمك  واشتريت خبز حار وطرشي ..

لان وصلنا قريب الظهر .. 

حظرت السفرة وجهزتها . طبخت شويه تمن احمر يحبوه وي السمك وهم علمود جنه متاكل سمك ..

بس اني كل شويه اتصل بصگر بلكي يرد ..

والگاه مغلق ..

 صگر.. 

التمت الناس علينا .. واني عبالك جنت احلم .

شلون افترت السيارة شلون طلعت عايش ماادري .

راسي ينزف .

والناس تگلي لاتتحرك خاف اكو نزيف براسك ..

ايدي مااگدر احرگها تأذيني ..

گمت اگوم واوگع اريد اشوف صاحب السياره الي ضربتها شصار بي .

گلتلهم منو بالسياره هناك . اكو واحد تأذه .

گالوا رجال ومره .

الرجال زين بس المره متأذيه ..

اهل الرحم اخذونا للمستشفى.. 

احس راسي يريد يطگ من. الوجع .

عود الناس لافين راسي بوصله .

والدم يري على وجهي ..

دخلونا الطوارئ .

خيطوا راسي .

وجبروا ايدي ..

واخذوني للمفراز ..

وبعدين دخلوني تحت المراقبه خاف بيه شي .

طلعت موبايلي من جيبي .

باوعت همزين مابي شي .

خابرت مسلم وگتله ..

شويه والمستشفى انگلبت ..

ابوي تخبل من شافني ويبوس براسي .

ولك بويه طيب وكون مابيك شي ..

واني اجيبها الك لو اعرف اگلب الدنيا على راسهم ..

گتله يابه مو وكت هذا الحجي . روحوا شوف الجماعه الي ضربتهم .

يگولون عندهم مرة تأذت ..

راح ابوي وعمامي الهم ..

واني نمت منطيني مهدأ ..

صحيت بالليل .. احس وجهي مورم ..

گلتله مسلم اخذني للحمام .

جاب عربانه واخذني ..

من رجعنا .

شفت زلم هواي مگلوبه يم الردهه الثانيه .

وابوي يحجي ويفرفح ..

گتله شكو ومنو ذوله ..

مسلم . تعال للغرفه واسولفلك .

اخذني ونيمني .

گال ذوله ااهل الجماعه الضربتهم .

المرة حالتها خطرة .

ويردون يگاومون .

المخطط طلع عليك ..

صگر .. الله يشافيها .. شسويت اني .. اخ يابه جنت

بلا وعي اسوق وماادري وين اروح .

بس مو وكتها هاي السالفه ابد.

گتله وين مبايلي .

گال انطفى شحن وخليته بجيبي ..

گتله رحمه لهلك انطيني خلي اشوف وجهي .

احسه مورم ..

مسلم .. اي لاتشوفه احسن .

صاير نفاخة ومرسوم عليها خرايط ..

صگر .. ولك خوش لگيتها سالفه . وتضحك عليه ..

دخل ابوي ضايج .

گال . مسلم .. انت وكم واحد تبقون هنا .

ذوله يهددون ويتوعدون .

وراحوا اشتكوا . واخاف يسون شي الصگر .

تتناوبون عليه ..

باوعلي .. وگال ليش هيج وليدي لو صاير بيك شي شريد اگول .

وهاي المره بالانعاش وخاف تموت ونبتلي ..

صگر .. شكبرها المره ..

مسلم . جبيرة وبيها كل الامراض . بس تموت يذبوها براسك .

صگر .. حتى لو جبيرة ومريضه اسمها روح . وام .

وحقهم كلشي يسوون. 

الشيخ .. ان شاء الله تنحل. دير بالك على صحتك انت .

وخاف تجي الشرطه تاخذ اقوالك .

لاتذب التهمه على روحك ولا تكول امشي سريع .

گول ماانتبهت شلون طلعوا گبالي وانضربت سيارتهم وانت صدگ مامتعمد قابل بيدك الي صار ..

للصبح اجة شرطي وگف بالباب خاف اشرد ..

واجة ضابط. اخذ اقوالي وگتله مامنتبه ومااتذكر شلون طلعوا گبالي .

گال بس المخطط عليك .

گتله .. ماادري وحاليا اني بوضع مااگدر احجي بي .

گالوا سلامتك وطلعوا ..

بقيت كم يوم بالمستشفى . 

ورادوا يوقفوني بس حالتي ماتسمح ..

بعدها المحامي مالتي طلعني بكفاله ..

طلعت للبيت وگابلتني امي بالبواجي .. 

وحرگت دمي . بحجيها .

مارديت عليها . 

بس گلتلها اي حجايه اروح اگعد عند منى ..

سكتت ماحجت ..

گلتلها هيلين مبايلي جابه مسلم . شحنتوه .

هيلين .. اي خويه هسا اجيبه ..

راحت جابته واجت ..

فتحته ..

واجن عماتي وخالاتي يسلمن.. 

ودور زينب اجت جانت عند امها . بس امها مااجت عود زعلانه . 

اخواتي التمن. وفاطمه اختي هم اجت هاي متزوجه بالديوانيه اخذها ابن شيخ صديق ابوي ..

بدن ينحب يمي تگول متت ..

گلتلهن اريد انام . طلعن .

فتحت الموبايل ..

شفت مكالمات من رقم شكد .

ورساله . فتحتها .

كاتبه . صگر اني رحيق اخت رفيف ضروري تخابرني ..

تخبلت من شفتها گمت وگعدت على حيلي ..

صارلها يومين من دازة الرساله ..

خابرتها بسرعه ..

گالت الو هلو صگر شلونك ..

هلا اخيتي بشريني رفيف شلونها ووينها ..

رفيف مو زينه ومحتاجتك . وكم يوم اتصل عليك ماكو 

رقمج ماعندي . شگد دورته اتذكر مرة خابرتج رفيف مني بس مااعرفه ياهو منهن .

واني سويت حادث وجهازي مغلق ماادري .

سلامتك . خو مابيك شي .

لانعمه زين . طمنيني ع الغاليه ماصدگت من شفتها اخذت روحي وياها الله لاينطي كلمن فرقنا ..

مو وكت هذا الحجي صگر .تگدر تجي البغداد

اجي لو اعرف ازحف .بس انطيني العنوان 

اي هسا ادزه الك . بس مو للبيت .

جا وين 

عيادة دكتور . نريدك تجي لهناك باجر العصر موعدها 

وهو الدكتور يفهمك ويگلك ع حالة رفيف ..

اي دزيه وباجر غبشه اني اروح البغداد ..

ماصدگت راح اشوف مريتي باجر ..

واخيرا كتبتلي اشوفها يالهي ..

الله يساعد يعقوب شلون تحمل سنين يله شاف يوسف .

شو اني كم شهر واحس راح الصبر مني ..

گلت الابوي راح اروح البغداد باجر عندي شغله مهمه .

ماقبل . بس اني اصريت ومن شافني معاند .

گال جا اخذ مسلم وياك .

خاف يصير شي .

ثاني يوم من الصبح طلعت البغداد ..

وگلبي ملهوف الشوفتها ..

شلون راح اتحمل شوفتها بهيج منظر ..

الصوره الي شوفتها الي سوزان لسا ببالي ..

كل ساعه واگله مسلم استعجل ..

مسلم .. شبيك صگر ناوي تدعمنا ماتشوف شگد جاي امشي ..

صگر .. اح لو ماايدي مكسوره . جان اني الي اسوق ..

مسلم .. راسك مضبر وايدك مكسوره ووجهك مزورگ وبعدك تريد تسوق ..

صگر . دمشي بلا صوت .. وكت خلاني احتاج احد .

دخلنا بغداد تقريبا الظهر .

احس ريحة بغداد بيها ريحة رفيف .

اشم بهواها واگول ااااه يابغداد شلون انطاج گلبج .

حاظنه حبيبتي كل هاي الايام ومفرقتها عني ..

مسلم .. هسا وين نروح ..

صگر .. خلينا نتغدا بمطعم بالكاظميه .

ومناك اخذني الابو الجوادين . اريد افرغ همي يمه ..

رحنا تغدينا ومناك طلعنا للامام ..

دخلت الحظرته .. وعيوني غرغرت بالدموع ..

گتله ياالهي . هسا اني بحضرت اوليائك ..

احبابك ذوله وماترفض طلبهم ..

بجاهم. عندك برد الگلوب ورجع مرتي الي وشافيها .

انحرمت منها هواي وانحرمت مني .

وانت اعلم بگلوبنا ..

وانت يامولاي ولزمت بشباكه ..

اريد رفيف منكم..  اشفعلي عند رب السموات ورجع عافية مرتي واحفظ ابني ورجعهم الي . 

نذر عليه اذبح ذبيحة واوزعها بثوابك للفقرة .

واجيب مرتي واجيك اتشكر منك .

گعدت بالگاع وراسي ع الشباك سانده .

وجانت ناس هواي تزور .

بس الي يشوف حالتي مايضايقني يعوفني ويمشي 

اجه رجال جبير بالعمر مخلي غترة على راسه ..

طبطب على كتفي وگال ..

مقضيه حاجتك ان شاء الله. 

ودموعك وتوسلك ماتروح بلاش ..

گتله رحم الله والديك حجي ..

الله يسمع من حلگك ..

اجه مسلم گال يله گوم كافي .

رحت صليت بالحظره .

وگعدنا شويه ع البروده 

مسلم نام لان تعبان ويسوق .

بس اني گعدت قريت الزيارة ودعاء .

باوعت الساعتي .

گالت رحيق لازم اروح قبل الموعد .

گعدت مسلم ومشينا ..

رحنا للسيارة عدلت روحي جنت لابس بنطرون وتشيرت

ربع ردن لان مااگدر البس قميص لو دشداشه 

ايدي مجبره . 

خليت عطر .

ومسلم يگلي لو سابح بي مو احسن ..

گتله .. ولك راح اشوف مرتي تعرف شنو تلتقي بحبيبتك بعد الفراگ ..

مسلم .. ايباه والله شوقتني .. شلون اجيب اختك عندكم كم يوم زعلانه ووبعدين التقي بيها ..

صگر .. دمشي لا افلش وجهك . مو صوجك صوج الي يحجي وياك ..

وصلنا للعيادة .

گتله مسلم انت روح وين متريد . واني من اگلك تعال اخذني .

مسلم . اي جا اروح اشتري شو شنو للجهال يتلگوني .

راح مسلم واني صعدت ..

گلت للسكرتيره الدكتور منتضرني بس .

گليله زوج رفيف ..

تعجبت من عرفت دكتور نفسي .. معقوله رفيف هيج حالتها .

دخلت ورحب بيه . بس متت من شفته شاب وحليو ..

الصراحة غرت ..

گال . حمدا لله ع السلامة ..

صگر .. الله يسلمك . حادث سياره بس عدت الحمد لله .

فارس .. يعني اگدر اسميكم ضحايا الحب ..

صگر .. نعم مافهمت .

فارس .. اسف اذا تماديت . بس عملي يتطلب اكون صريح وياك وجريئ .

من شفت رفيف .وعرفت انتو مختلفين . اتهمتك بمرضها 

بس من شفت حالتك مااعتقد تفرق عنها بس انت جسديا وهي نفسيا .

صگر .. اي فعلا ضحايا الحب . واني عانيت هواي ويمكن لان رجال واتحمل واگدر اصبر . مامبين عليه .

المهم دكتور انت طلبت تشوفني .

فارس . اي صحيح.  رفيف حالتها صعبه ويمكن اصعب من اي حاله مرت بيه .

وسوينا تجربه عليها وبمساعده اختها ..

وشفنا جابت نتيجه وگدرت تبدي ردة فعلا بعد ماكانت شبه اسف ع اللفظ . شبه ميته .

صافنه ومتتحرك ولاتححي ولاتتجاوب حتى بنضراتها .

بس من شافتك بالصور تغيرت .

لهذا اريد اعرف ردة فعلها من تشوفك يمي هنا .

مو بأي مكان . حتى خاف تنهار او يصير بيها شي ..

صگر..  واني منتظر هاي اللحظه .

فارس . زين لعد انت ابقى يم السكرتيره .بس حاول متخليها تشوفك .

وهي موعدها قرب .

بين مااخذ حاله واكمل اتفرغ الكم ..

تشكرته ونزلت .

رحت شربت جكارة برة .

وعيني ع الساعه صارت شطولها ..

نص ساعه ..

وشفت رحيق بسيارتها .

نزلت وراحت فتحت الجنطه .

طلعت كرسي متحرك .

اني اراقب من بعيد ..

ودور هي وامها تعاونن ونزلها گعدنا بالكرسي ..

جان بودي اروح احضنها واشيلها بين ايديه ..

رجليه رادت تاخذني الها .

بس تذكرت كلام الدكتور من گال خاف تنهار. 

ابتعدت عنهم ودخلت محل .

وگمت اراقبهم الى ان دخلوا .

هاي مو رفيف اتسانه ثانيه ..

شسويت اني بيها .

شلون راح اخلي عيني بعينها .

شگللها وشلون ابرر ..

انتبهت ابو المحل يباوع .

اعتذرت منه وطلعت .

صعدت للعيادة بالگوه .

رحت يم السكرتيره .

شفت رحيق طلعت من غرفه الدكتور 

شافتني وسلمت .

گالت هاي شصاير بيك حمد لله ع سلامتك .

اوووف منكم اثنينكم راسكم يابس تالي وين وصلتوا .

گلتلها . كلشي مااريد بس تطيب . اعوضها عن كل الي شافته . 

من شفتها لسا اموت الف موته ..

شويه وطلع الدكتور .

صاح صگر تعال .

امها جانت بالمغاسل .

شافتني انصدمت .

رحت للدكتور .

گال تفضل ..

دخلت ومخلي ايدي على گلبي والدعاء مافارگ لساني .

شفتها نزلت دموعي وابتسمتلها ..

الفصل الثامن عشر من هنا