رواية لماذا انا الفصل السابع عشر بقلم عبير السراي
. ساعات وماكو اي خبر على علي كل العرفته انو نزف هوااي ...ومحتاج دم ...
تأنيب الضمير محاوطني .. ..
معقولة بسببي
...ياربي .. مااكدر انسة منظرة وهو السجينه برجله...والدم .يصب منه...وهو يحاول يتماسك كدامنه ...
مرت ساعه واجه محمد...مبين على عيون جان يبجي...
رحنه نركض عليه...
:: هاا بشر شلونة علي...
محمد؛؛ شبشر غير مخلص دمه...خلوله 3بطالة دم وهم بعد يحتاج...
ام عمار:: يم وليدي...بيه ولا بيك...
محمد:: اية فدوة انطيني ملابس لعلي .. ملابسة انتلفن ومنشفة...
اية::اي حاضر...
رحت اركض للغرفة ودمعتي على خدي .. طلعت ملابسة..حضنتهن وابجي ... واشم بريحته ...يارب رجعلياه سالم...مااريد شي ثاني...
خليت بجنطة صغيرة تراك وملابس داخلية ومنشفة...
ونزلت بسرعه... انطيت الجنطة لمحمد...
ام عمار:: يمه اخذني وياك مااكدر .بعد اريد اشوفه...
محمد:: يمه وين اخذج ...الردهة كلهة زلم ..وين تبقين انتي ...ان شاء الله للصبح نرجع...
طلع محمد..وصاحت علينه مها...
مها:: ترى البجي مابي فايدة... كومن نتوضى ونصلي ركعتين لوجه الله تعالى..ولسلامة علي...وان شاء الله يرجعلنه سالم...
كمنه اني ومنى ولمياء ورهف...ومها...
توضينه... وكلمن فرشت سجادة. وتصلي...
وقرينه قران .... صار الفجر...
صلينه الفجر .. ومنتظرين...محد بالبيت نام..
.بس الاطفال... طلع الصبح ...والدموع كلها مانشفت .
. صرنه وحدة تباوع بوجه الثانية...
منتظرين الفرج...
كولهة تعبانه من السهر والبجي...
صارت بالتسعة ... وسمعنه صوت السيارت تدخل.. اووف كانما ردت روحي ....وركضنه... عل باب. نزلوا الولد ...دخل عمي ... والولد دينزلو ... عيوني تدور على علي... اريد اشوفه...
وجان اشوف .. كيان ومحمد يحاولون ينزلونه... يمه شكله يقطع القلب...
حاولوا يوقفونه..ورجله مضمدة ...وميكدر يوقف عليهة ...
عمتي والبنات...ركضن عليه .. يبوسن بي...
واني بقيت اخر وحدة.لكن عيوني موكفت دموع....
عمتي حاضنته وتبجي والبنات ...باوع عليه....وتبسم ...بس كوة عليه...
تحت عيونه اسوود ووجهة ذبلان.واصفر...
دخله الولد للاستقبال... وتمدد عل كرويته...
كولهة محاوطته ...بقيت واكفه بالاخير .. اريد اشوفه..اريد قلبي يرتاح...
بداخلي. اريد اروح احضنه...وابجي على صدرة...لكن مترددة..
شوية ودخلوا عمامة... وطلعنه احنه...
بس قلبي بقة يمه....
حسيت مالي خلك حتى نفسي...
البنات بدن يسوون شاي ويقدمن للضيوف...
واني بعالم ثاني... مرت ساعتي ..ومنتظرة الخطار يروح .. كلت لازم اروح لعلي واحضنه .وارتاح لازم انهي كل خلاف بعد مااتحمل....
اجه كيان.... جايب معلاك ..ولحم وخضروات...
وصاح على عمتي...
كيان .:وينج يمه...
ام عمار:: هاا يمه...
كيان؛؛ اشوي معلاك لعلي وحضرله ريوك... لازم ياكل هسة ويعوض الدم ... .
اية:: انطيني يمه خلي اقطعه واحضرة..
كيان:: يله خلي احضر المشواية...
دخلت للمطبخ...قطعت المعلاك وغسلته وملحته.. واجه كيان خلى المشواية بالترك وبدة يشعل بيهة....
وشوه المعلاك .وياه طماطة ..وحضرت الصينية .. واخذهة لعلي...
استمر الخطار بلا توقف للليل... وان منتظرة بس اشوف علي ...صارت ب11 طلع اخر خطار..عمتي راحت تركض لعلي...
محمد نزل جربايته القديمه وخلاهة بغرفة عمتي ...حتى ينام عليهة علي لان ميكدر يصعد للغرفة...... فرشت عليه فراش وخليت مخدات وحضرت بطانية.
شوية ... ودخل علي ...لازمه كيان ومحمد..ويمشون بي على كيف.... وتمدد عل جرباية..بقيت واكفة قريبة عليه...
عمتي ام عمار طلعت عمي صاح عليها...
محمد وكيان.:: يله خوية ارتاح ...هاي مريتك هم تريد تشوفك ...
الولد طلعوا. وسدوا الباب وراهم ..بقيت واكفة بصفه ...
اية:: اغطيك بالبطانية ...؟
علي:: ياريت والله ...
غطيته بالبطانية.. دااوخر ولزم ايدي...
علي::يعني حتى كلمه حمد الله على سلامتك ..ماكو...
كدرت الزم دموعي...كعدت يمه...
اية:: علي اني اسفة ...كلة بسببي ...
علي وهو يمسح دموعي:: ليش انتي شعليج.. قدر وصار..
اية::ما ادري بس الخوفة من الموقف بعدهة بيه اول
مرة امر بهيج موقف...
علي:: هههه هذا الموقف لا شي بالنسبة الي.. شايف مواقف اصعب..واصعب...
خله ايده على خدي ويتلمسه برقة..لزم ايدي .. .وعينه بعيني سحبني على كيف ...ينتظر ردة فعلي ...سحبني لصدرة...وحضني ...حسيت اني محتاجة هالحضن غمضت عيوني ورحت بعالم ثاني
....حسيت اني ذبت بحضنه ...وهو يحضني بكل قوة..
انفتح الباب ودخلت عمتي...فزيت من مكاني ووقفت ..
ام عمار؛؛ هاا اعذروني.. ماانتبهت..
اية::لا يمه تعالي تفضلي...
علي؛؛ تعالي يمه تعاي...
ام عمار::شلون صرت يمه.. بعدك موجوع..
علي؛؛ لا يمه وجع شنو راحت وعدت.. بس نعسان اريد انام...
ام عمار:: شوف يمه انته نام هنا انته ومرتك واني وابوك انام بالاستقبال...
اية::..لا..لا..يمه انتي نامي هنا..واني....
ام عمار:: لا يمه غير تنامين بصف رجلج... خاف يحتاج شي ...وغمزتلي..
اية:: اووك على راحتكم...
ام عمار:: هااي الفراشات نزليلج فراش... ونامي .. اني رايحه اذا تحتاجون شي صيحولي...
اية:: تمام مشكورة ..
ام عمار:: ياله تصبحون على خير...
علي اية:: وانتي من اهلو...
نزلت فراش وفرشته بالكاع...
اية::اطفي الضوء حتى تنام...
علي::ليش تكدرين تنامين بالظلمه... ..
اية::هاا ....لا..بس انته... شلون عرفت ؟ ..
علي::يعني مبين.. لان متطفين ضوء الغرفة الا اذا شغلتي التيبلم..(الاضوية الجانبية للسرير) .. فمبين متعرفين تنامين بالظلام..
اية::بس تكدر تنام والضوء مشتغل ..
علي::نامي انتي ومعليج...
اية::لا شلون معلية... اني مو انانية حتى افكر بس بنفسي...
علي:: اخلي ايدي على عيوني...
اية::لا هذا مو حل...
علي:: اني اكولج الحل...انطيني حجابج ..انتي غير تنزعينه من تنامين ....؟
اية بتردد::هااا...ايي... انزعه..
علي::اي...يله انطينياه...
اية::نزعت الحجاب .. بس بتردد استحي منه...
انطيته اله لف الشال على عيونه...واشر بايدة...
علي:: تصبحين على خير...
اية:: بابتسامه.. وانته من اهل الخير...
تمددت بفراشي ..نمت كعدت الصبح سمعت هوسة براة ... اني مطية ضهري لعلي... درت وجهي لكيته كاعد .. ومايل راسه ويباوعلي ويتبسم...
من شافني استعدل...
علي:: صباح الخير..
اية:: هاا صباح النور... رفعت شعري وخليت القراصة...
اندك الباب...
اجيت افتح الباب .. تذكرت ملابسة الحجاب...
اية:: علي ..بسس حجابي...
علي:: انطانياه... جان لازمه بايدة .
اية::. لفيتة على راسه..وفتحت الباب...
عمتي ام عمار وكيان.. صباح الخير..
:: صباح النور...
كيان::هاا خوية شلون صرت...
علي:: الحمد لله تمام ...
كيان::يله تكوم بالاستقبال.. خابروا جماعتك جايين بالطريق...
علي:: يله مااشي .. خلي ابدل ..واغسل...
حاول يكوم...
اية:: لا .لا ابقى بمكانك... خلي اجيبلك الملابس .. دقائق
حتى تغسل ... بمكانك ليش تكوم...
علي:: لا يمعودة.. شنو اضل بمكاني ...مرة والدة هستوهة ..وخاف يضربني الهوى...
حاول يكوم ونوجع من الخياط مال جرح...
كيان :: اكعد يمعود لا تاذي نفسك... يله خوية معليج بي ..جيبيله الملابس...
رحت بسرعه جبتله الملابس... انطيتهن اله ... ورحت جبت معجنه صغيرة ومي وصابون...
لكيته نازع التيشيرت.. دخلت ..وتوقفت..
علي:: تعالي..يمعودة ترى اني زوجج .. حلالج ..
اية :: خليت المعجنه واصبله مي ويغسل ..
حاولت اغض النظر بس مكدرت مااشوف جسمه الضخم وتقسيم العضلات..ملفتت .
دخل احمد وعمتي. بعدين اجه محمد...وقفوه ...وراح للاستقبال..
وصاح علي ...
علي:: اية ...
اية::نعم...؟
علي: بلا زحمه ممكن تجيبيلي عطر من المجر مالتي ..
وفرشة الشعر...
اية:: حاضر..
صعدت للغرفة ..وفتحت المجر مالته ...اول مرة اشوفه .. لان اعرف بي بس غراضة فمااحب ادخل ولا اشوف غراضه...
عطوره كلها ماركااات...بولو ..ديوور.. بووس...
اووف شاخذ واحد احلى من الثاني...
اخذت ديوور.. وفرشة الشعر ..ونزلتله..
علي:: اي والله مشكورة...
اية:: لا ولو ...
احمد:: يمعود هاك تلفونك من البارحة رسائل دك ..ثول راسي...
علي:: وهو شجابة عندك... ؟
احمد :: البارحة نسيته بجيبي .صعدت وتعاجزت انزل انطي الك.....
.. اكلني الفضول... منين هاي الرسائل ...
كيان:: سوو درب اجوو... زلم...
دخلت اني وعمتي...بس بقى ابالي منو اليدزله رسائل... ؟
رحت للمطبخ ..البنات .. يشتغلن بالغدة.. ورهف وياهن...
اية::مرحبا يحلوات...
البنات::هلا والله شدعوة عيني ..
رهف.. ايي من لكه احبابة نسه اصحابة...
اية:: لا يمعودة..انتي البلقلب...هههه
مها:: 😉
اية:: هاا تغازليني .ههههه.
مها؛:اي معجبه...ههههه
منى:: مدام صارت السالفة مغازل اروح ادز رساله لحبيبي..
مها:: يمه منج...
شوية ودخل محمد يصيح...ويغلط واحمد يسكت بي...
ام عمار:: هاا يمه شكو شصاير..
محمد:: لا تخلوني اكفر . شنو يجون يعتذرن
احمد:: ابوي وافق شنو تعترض على كلامه...
محمد::اي اعترض...كتله لابوية من البداية .. اذا مااسويها طلابة.. هذا الشارب مو على زلمة..
ام عمار:: ولكم بس فهمونه شصاير..
أحمد:: يمه اهل الولد الضرب علي .. راح يجون عمامه واهله يعتذرون ويطيحون علينه...واستاذ محمد يريد يتلكاهم ويطردهم الناس اجوي للمستشفى واخذوا عطوة...وهسة خابروا ابوي كالو جايينكم..ابوي كاللهم هلا بيكم.. الاخ هنا معترض
محمد بصياح ::لك احمد يضربون علي سجينه .ونقبل اعتذارهم..غير ادميهم تدمي.. اااخ يالله لوما ابوي ....
احمد:: انته شبيك... خاف ماشفت الولد شصاير بي ... ترى اخوك مصكطه تصكط...
وهم يكدرون.يكاومونا...بس حاولو يفضون السالفة باعتذار .. والولد هسة بالتوقيف ...
محمد:: هاا وهسة يردون ..علي يتنازل..
دخل عمار...
عماربعصبية:: هاا شكو...
احمد:: لا ماكو شي سلامتك...
عمار:: محمد شبيك.. ؟... مو احجي وياك...
محمد:: يعني انته تقبل يجون يعتذرون... ويفضون السالفة هيج ..ودم علي الصار بالكاع شنو رخيص عدنه...
عمار:: لا مو رخيص ... ومراح تفض باعتذار...خلي يجون ونفاهم ...
وهذا الكلب اذا مااخيسة بالسجن ..لاعلمه شلون يرفع سجينه بعد .... اني وصيت جماعتي عليه ...وشايفين شغلهم وياه...
اية::احنه بقينه نتفرج بصمت ... لان الجو متوتر فول...
ام عمار:: يله يمه خلصن غداجن عيب من الزلم...
رحنه للمطبخ ...
شوية ودخل علي ولازمه محمد..وديوصله للغرفة ....بدون .وعي رحت اركض .. دخلت للغرفة وعبالي حينام... رفع الغطى...
محمد:: لا لا مو. ينام...
اية::لعد...؟؟
علي:: اريد البس.دشداشة من ابوي حتى ارتاح بيهة ...
ام عمار:: هاا يمه كون تعبت ...موجوع..؟
علي:: لا يمه ماكو شي ... .والله كولشي مابيه لا تطوخونهة .. لا موجوع ولا شي ... لوما هالخياط .. جان اخذت راحتي..
اريد البس من دشدايش ابوي..
انطته عمتي دشداشة بدة ينزع اني طلعت من الغرفة...
شوية وطلع علي لابس الدشداشة كريمية.. تجنن عليه...
بس قصيرة شوية ..
دخلوا الاستقبال ..ربع ساعه واجه احمد ...
احمد::حضروا شاي ..اجو الزلم..
اني ورهف بدينه نحضر الاستكانات ...ومنى خدرت الشاي...
صبيناه واخذة احمد .. مشت ساعتين والناس كاعدة.. ويتناقشون .. ساعه ندزلهم شاي مرة عصير..
لحد ما طلعوا الخطار بس بقه عمام علي وخواله....طبعا اني مثل الاطرش بالزفة.. ماادري شنو يصير ميصير مااحب ادخل بشي ميعنيني ..ولا اسئل .. كملنه الغدة .. وبدينه نصب ..احنه نصب بالمواعين ومحمد واحمد ..ياخذوهن يم الزلم...
كمانه غداهم.. وسوينه الشاي .. كملوا الغدة واني ورهف نغسل المواعين ومنى ومها يحضرن بالشاي والاستكاين ..
خلصنه الشغل وصبينه النه الغدة وكعدنه نتغدة ...
...كمل اليوم مابين خطار رايح وخطار جاي..
وعلي مشفناه لحد الليل..
من راد ينام دخل للغرفة... كلمن راح لغرفته ....
سديت الباب ...فرشت فراشي وردت انام شفت علي بدة يفتح بالضمادة
اية:: محتاج شي...
علي:: لا سلامتك...ااااه.
اية:: هاا شنو ..
طفرت يمه ::شدتسوي...؟
علي::اريد افتح الخياط...
اية:: تحجي صدك... (ولزمت ايدة اليفتح بيهة الخيط.)
انته ليش هيج تسوي...
علي بابتسامه خفيفة:: شسوي ...؟
اية:: ليش تفتح الخياط ... ليش تاذي نفسك...
علي::هو جرح بسيط بعد مخيطينه المن...
اية::يعني الدكتور ميفهم من خيط الجرح ..
علي:؛ ماتسوة خياط...... اريد اتحرك اريد امشي.الخياط مقيدني...
اية:: اني اصيح لعمتي...
علي:: عوفيهة يجوز نامت...
اية:: اووك لعد اصيح لعمار لو كيان...
علي:: عوفيهم .. اني اريد افتحهة ..
اية؛؛ لا والله خلي اصيحهم حتى همة يحجوون وياك ..
علي:: شكلولج عليه طفل وتهددينه بالاكبر منه مو.زلمه بعينج ...
اية::هاا...لا... اسفة مووو قصدي...
كمت ردت اروح لفراشي...
لزم ايدي...
علي:: اووكفي.... ..اسف .مو قصدي..
اية؛: لا عادي ..اني الاسفة تدخلت بشي ميعنيني...
علي؛؛ ميعنيج...؟
اية::اي ميعنيني ... محتاج شي ..
علي؛؛ لا..سلامتج...
اية:: اوك راح اصعد للغرفة...
علي::هاا ليش ...
اية:: اريد انام البارحة ماارتاحيت هنا...
علي:: كتلج اسف مو قصدي... اني...
اية:: علي مو يمك الموضوع اساسا...بس اني ممرتاحه هنا...
علي::واني مااخليج تنامين وحدج..فوك..
اية:: اشو انته بالدوام انام عادي وحدي شنو اليتغير...؟
علي::التغير ...اني هنا مو بالدوام... واكعدي لا تسوين سالفة بهالليل...رجاءا......
اية::كتلك ماارتاح هنا...
علي:: اووك باجر نصعد فوق .. استحملي بس اليوم....
اية::راح يخلص عمري واني بس استحمل ...بقت على هالليلة ....
رحت لفراشي غطيت راسي ... وكمت ابجي ... اني ليش هيج مهتمة بي... معقولة دخل لقلبي بس اني جنت اكرهة ومااطيق اسمه شنو التغير.
ليش تعلقت بي ليش اخاف عليه...ياارب اريدة يطلع من عقلي مااريد
مااريد افكر بي ... تعبت يارب ...
نمت .. كعدت الصبح قبل لا يكعد علي.. طلعت من الغرفة .. حتى ماباوعت عليه...
اية :صباح الخير ..
الكل:: صباح النوور...
ام عمار:: كعد علي لو بعدة .
اية::.لا بعدة ..
منى:: تعالي تريكي مدام الشاي حاار...
اية::لا والله اريد اسبح ...قبل لا يبدي الخطار.. وبعد مالكه وقت فراغ....
منى :: على راحتج.حبي...
صعدت طلعت رهف من الغرفة...
رهف:: صباح العسل ..ياعسل
اية::صباح الورد ياورد. هههه
رهف:: شلونج حبي ..علي شلون صار..؟
اية:: لا زين الحمد لله .. حبيبت قلبي .. محمد شلونه وياج
رهف:: لا زين ورردة مال الله .. فديته
متنزلين تتريكين...
اية؛؛لا والله اريد اسبح وانزل اتريك...
رهف ::اووك راح انتضرج...حتى نتريك سوة..
اية::اووك مااتاخر...
دخلت سبحت ولبست ملابسي .. ورتبت نفسي .. وميكاب خفيف ...مااحب اطوخ...
نزلت ..علي جان كاعد ويمه عمي عمتي والولد.. يسولفون وياه ويضحكون.. ...
اني طلعت بوجهي عل مطبخ ..
رهف:: حمام الهنا...
اية::الله يهنيج يعمري...
منى:: فدوة بنات .. عندي موضوع اريد اخذ رائيكم بي...
رهف واية:: ايي كولي حبي...
منى:: سجاد يريد يسوي العرس هذا الاسبوع وثبرني ثبيرة شسوي ويكول اليوم امي تجي وتنطيكم خبر ...
اية:: زين شنو الاشكال بالموضوع
منى::ليش وعلي .. اخوي متصوب وجرح برجله واني افكر بعرسي...
رهف::حبي قابل مضروب طلقة .اسم الله عليه ..مابي شي ان شاء الله .. لا تسوونه هذا الاسبوع خلي عل اسبوع الوراه..يكون علي كايم على حيله..
منى:: كتله عل اسبوع الوراه مقبل يكول اريده هذا الاسبوع...
اية:؛ حبي خلي امه تجي وشوفي عمتي وعمي شيقررون .. وان شاء الله تنحل بدون تعقيدات..
منى؛:ان شاء الله...هففف..
ام عمار:: هاا يمه اية سوي ريوك الج ولرجلج..
يله يمه
اية::حاضر ..
ام عمار:: وانتي رهف .. ماكعد محمد...
رهف:: مقبل يكعد.. كال عوفيني على راحتي .
ام عمار:: هاا خلي على راحته ...تريكي وية اختج ...
رهف:: لا انتضر محمد..
اية::ليش عيني مانعجب ...
رهف:: لا عيني تعجبين ونص ... بس غير اكل وية حبيبي ...
اية:: حبي الله يخليكم لبعض...
جهزت الريوك ووديته لعلي... لكيته وحدة بالغرفة...
اية؛؛صباح الخير...تفضل هذا الريوك...
علي:: صباح النور.. مشكورة ...
خليت الصينية...وجاي اطلع ...
علي:: وين ...؟؟ متتريكين...؟
اية::لا مااشتهي...
علي:: اووك تعالي اخذي الصينية...اني هم مااشتهي...
اية::ليش متشتهي... ؟
علي:: ماكو واحد يشتهي ياكل وحدة... لو شتكولين ....
اية::علي لا تسوي هيجي ... رجاءا..
علي:: انتي الي لا تسوين هيج رجاءا...
اية::اووك اذا كعدت اكل انته تاكل...
علي::اممم ماادري.... حسب اذا ابتسمتي عل اقل بوجهي ...اكل ....
اية:: (كعدت يمه)يعني ابتسامتي تفرق...؟
علي:: اذا ابتسامتج ماتفرق ...اووف يالله ... شوكت تحنين..
اية:: اكل هسة ... بعدين الحجي...
علي:: مدام هالعيون مقابلتني ... اكل..ليش مااكل
اية(بابتسامه)::امممم
بديت اكل بس علي عينه عليه...
اية؛؛ ترى مااعرف اكل واحد يباوع عليه ...
علي::بس اني مااباوع على حلكج شلون ياكل...اباوع على عيونج.. وجمالهن..
اية( بخجل):: علي اكل وراي شغل...
علي:: حتى النظر لعيونج حارمتني منه...
اية::مو اني الحرمتك ...
...دنك وحجه شي...
علي:: هذا هو الحمد لله ...
اية؛؛اشيل الصينية...
علي؛؛ ايي مشكورة..
«حسيته ضاج بس مهتميت اله اخذت الصينية وطلعت.. »
جوي علينه عمي و عمتي ومرت عمي.. يطمنون على
سلامة علي ...
عمي بقة يم الزلم .. عمتي ومرت عمي.دخلن يمنه...
اية:: اهلا وسهلا.. تفضلوا
عمتي ومرت عمي:: هلا بيج يعمري...باوستهم ودخلتهم...واجتي رهف عبالك سنه مشايفتهم ..تحضن بيهن وتبوس...اني اباوع عليهة واضحك ... لان اني تعودت على فراكهم...اجتي عمتي وكعدت يمهن .. وسوالف ...
ضلن كاعدات ساعة تقريبا وراحن...
مشه اليوم واجتي اخت عمتي ام عمار الهية ام خطيب منى... .واتفقن عل عرس بعد اسبوعين...
صارت الساعة ب10:30. .احنه مجتمعين بالصالة...وجان يكوم علي...
علي::يلة يابا ..تصبحون..على خير...
كيان:: وين مو كاعدين..
علي::لا والله نعسانه ..صار يومين منايم.. اريد اصعد للغرفة... ارتاح..
ام عمار::يمه خاف متكدر تصعد الدرج..
علي:: يمه قابل بطني مفتوحة ... هو جرح بسيط برجلي ..لا تخافين ماعليه شي...
ام عمار:: على راحتك يمه...
اية:: يله اني هم مرخصتكم ..تصبحون على خير...
الكل..::وانتي من اهلو..
صعد علي الدرج بس شوي شوي واني وراه ...
اية؛؛علي اذا ماتكدر ...نام جوة بالغرفة...
التفت الي..وكال
علي:: وانتي....؟
اية:: هاا....اصعد للغرفة..
علي::تئ تئ اصعدي....
صعدنه للغرفة..خلى جهازة عل ميز ...وراد ينزل الفراش
الينام عليه ...
اية::اووكف علي.
علي:: هاا شكوو.
اية:: نام عل جرباية ...لا تنام عل كاع....
علي:ّ معقولة حتخليني انام يمج...
اية::اممم منو كال يمي.. اني انام بالكاع...
علي::لا ..لا ..ماكو هيج شي..انتي نامي بمكانج واني بمكاني..
اية::علي لا تشلع قلبي ... «فرشت الفراش وكعدت..»
علي؛؛لا تعاندين.. كوومي...
اية::.. تصبح على خير...
اممم يعني عاجبتك الوكفة.. روح نام....
علي::مااشي... هالمرة حاعديهة ...
اية::اووك .. (تمددت وغطيت نفسي ونمت... اسمع تلفونه كل شوية يجي اشعار ..بس هو مكام يشوفه ..
تمدد عل جرباية نام واني هم نمت.. كعدت الصبح.. على صوته ديفتح الكنتور..يطلع ملابس....)
علي::صباح الخير..هاا بسببي كعدتي
اية::صباح النور... لا. عادي...
«طلع ملابس ودخل للحمام اني كمت. عل مراية امشط شعري .. واجه اشعار لجهاز علي ..حسيت بفضول ..فتحت الجهاز لكيت اشعار .واتساب...
المرسل {رقم ممسجل بس صورة بنية }::هلوو حبيبي شلون صرت اليوم ...جاوبني ارجوك...
اية:: معقولة ..يعني ايبين انو هو شريف.ونزيه . ويحبني
وكله كذب.....
رجعت الجهاز لمكانه ..وجسمي صار بركان...
اريدة يطلع حت. اثور بوجهة...
طلع من الحمام ...ويباوع عليه ويتبسم...
اية بتوتر :: علي...
علي::عيوني...
اية:: شوكت ننفصل...؟؟
علي::هااا...شنو ...
اية::شنو الشنو ...مو واضح من كلامي...شوكت ننفصل..
علي؛؛ لا واضح... بس...
اية::لا بس ولا شي ..
علي:: ممكن اعرف شنو سبب هالتغيير المفاجئ..؟ صار شي..
اية::لا شنو الممكن يصير...اني اريد ننفصل واليوم..
علي::اذا انتي هذا قرارج.... فأصبري هلي تطلع سبعه ..رهف .. عيب من الناس شيكولون .. اجتي وحدة وطلعت ..وحدة...
اية::طز بالناس .. شحصلت اني من الناس ... كولشي سويته .. دمرت نفسي وحياتي ..وارتبطت بيك .. من ورى حجي الناس...
علي:: طيب اصبري بعد عرس منى ..خطية تحبج.. لخاطرهة..
اية(بعصبية):: هاا ..بالبداية لخاطر محمد ورهف....هسة لخاطر منى..وبعدين ماادري لخاطر منو...
علي::اولا صوتج ميعلى فهمتي... ثانيا انتي الردتي يعدي عرس محمد حتى ننفصل مو اني تمام...
اية:: ايي صح ...بس هسة بعد مااتحمل.. اريد اعيش حياتي مثل ماانته عايش حياتك بالطول والعرض.. وممهتم لاكبر واحد...
علي:: منو العايش حياته ...هاا اني .... بشنو .عايش حياتي...هاا
اية::لا خطية انته ضحية.. تكسر الخاطر .. تصدك كسرت خاطري..
علي:: انتي ليش مدتفهميني ...يابنت الناس والله حبيتج ومااكدر افاركج..
اريد اعوضج على كل شي شفتي. بس انطيني فرصة..
اية::يااعيني ... خطية .. يحبني .. انته تخدعني.. لو تخدع نفسك...يعني هسة تفهمني ماكو وحدة بحياتك...
علي:: من يوم الدخلتي بحياتي .. واني قطعت علاقتي باي بنية...
اية:: اهاا ... لعد شوف جهازك .. وتاكد وبعدين تحجي... عفته..واجيت اطلع ...
لزم ايدي..
علي::اوكفي خلي افتهم...شنو تقصدين...
اية::كلامي واضح..ميحتاج اعيدة...
علي::كتلج اوكفي[جرني من ايدي واخذ جهازة وفتحه]
علي:: اووف ... على هذا الاشعار.
اية::عوف ايدي اريد اروح...
علي::اوكفي خلي افهمج...
اية::مااريد افهم.... عوفني اريد اطلع ..
علي:: مااعوفج الا افهمج...
اية:: اهاا عندك كذبة جديدة...
علي(بضحكة ):: اصبري خلي افهمج...
اية::شنو اليضحك..هاا... شنو
علي::مو اضحك لكن فرحت ... اول مرة احسج تغارين..
..وهذا الشعور ..يدل على انو اكو امل تحبيني هذا اذا.مو...
اية:: لا تكمل ..ولا تتوهم...مستحيل ... هذي مو غيرة. ....
علي:: اها لعد شنو..
اية::هاا. اي اييي شي بس مو غيرة...
علي::تمام مو غيرة بس خلي افهمج...
اندك الباب..
اية:: عوفني افتح الباب....
علي؛:بس لازم تفهمين ...
اية::ماافهم واليوم توديني لاهلي...
رحت افتح الباب ...
منى:: صباح الخير عيوني...
اية:: صباح النورر. حبي..
منى:: فدووة تعالي اريدج ترحين وياي للسوق نشتري ملابس وغراض للجهاز مالتي...
اية::هاا بس ...
منى::علي ماعندك مانع ...؟
علي:: لا حبيبتي روحن ...
منى :: يله فدووة يعمري ماما منتظرتنه جوة.. مااعرف اشتري وحدي ... وثانيا اذا ماتكوفين وياي بعرسي شوكت توكفيلي هاا....
اية؛:اداللي يعمري ...
منى::يله تعالي تريكي ... حتى نروح...
اية::يله امشينه... (نزلت وياهة حتى ماابقة ويه علي .نزلت تريكت ونزل علي وراي ... حضرتله ريوكه وكمت.. صعدت للغرفة غيرت ملابسي وكملت ونزلت ...رحنه اني ومنى وعمتي...للسوق اشترت ملابس للبيت ..وملابس نوم ..وميكاب ..واكسسوارات ولوازم العروس....
دنمشي وشفنه محل ملابس ..
عارض بدله رسمية نسائية..(تنورة سودة وقميص ابيض {اوفوايت} وسترة سودة } بس تجنن...
اية:: منى وج شوفي تجنن...
منى:: حلوة كولش .. ليش متاخذينهة...
اية::شسوي بيهة..
منى::ليش شتسوي بيهة...البسيهة بعرسي...
اية::هاا موو خاف مااكدر اروح بالعرس..
منى:: ليش يابا .. يعني شنو متحضرين عرسي لعد المن حاسبتج اختي ...عابتلج ...والله ازعل عليج ..
اية:: الله كريم
ام عمار:: ليش وكفتن...
منى:: يمه اية عجبهة هذا اللبس.. بس تستحي تشتري..
ام عمار:: لا يمه ليش تستحين ..امشي خلي ناخذهة..
اية:: لا يمه ...احنه غير دنجهز العروس ..
ام عمار:: لا يمه علي انطاني فلوس كلي خاف تردين شي تشترينه..
اية::لا يمه ليش اخذتي منه...
ام عمار::شلون ليش ..غير رجلج ..ومسئولة منه.. يله تعالي خلي نشتري..
اية::لا مااريد..
منى::لا تسوين هااي السوالف ...
دخلنه للمحل ..واشتريتهة .. وكملنه كل شي تقريبا ورجعنه للبيت تقريبا بالوحدة الضهر...
شكرا لزيارتكم عالم روايات سكيرهوم
