رواية قاتلة ابي الفصل الثامن عشر بقلم بنت الشيخ ترابية
نِآريِّنِ في قلب واحدًا ...
H+A=❤️🔥
فاقد: الوو .. اي نعم تفضل .. شنوووووووو؟؟؟؟؟؟؟
زين: شكوووووو
فاقد: ايي؟.. وشوكت بلا؟؟؟؟.. انت صدككككك تحجيييييييييي
فهد: هسه شكو ابن الكلب
جعفر: ماحس هسه انا لا بگلبي ولا رجلي
فاقد: دروح روح هو صوجي وحق العظيم
فهد: تحجي لو اركعك بالكاع؟
فاقد: هذا ابو الفلافل وصيته على لفتين ابن المطي من الصبح وهسه يخابرني ويكلي خلصنا سيدي وماعندنا بعد عـ* بـ **** امك وخواتك صفح
جعفر: اي روح واشتري لفة غيرها او اكل شي ثاني
فاقد: لا والله ست جوجو؟
جعفر: اييي حبيبي شبيك هو داكلك روح واشتري لتبقى جوعان ففه
فاقد: هم ففه انا شلون بيه يا الله
اتصلو على فهد والكل وجهه نظره لفهد
فهد: الوو نعم... وعليكم السلام اهلا وسهلا تفضل خويه
شنوووووووووووووو
.
.
كاعدة واباوع مسلسل فاطمة وكريم التركي
اعتقد هذا البطل كراش كل بنت شايفه هذا المسلسل
حياتهم البسيطه وعاداتهم وتقاليدهم تجنن
خلص المسلسل وطلعت القناة الهندية وبدت مسلسلة
من النظرة الثانية كوشي وارناف يجننن بكل معنى الكلمة جنت مدمنة عليهم
طلع ايهم من الغرفة نصيت التلفزيون وعيني عليه
ايهم: اخخ راااسي
طفرت يمه هو باوعلي وابتسم
شبيك ايهم؟
ايهم: ولا شي
وراح كعد وانا رحت سويت جاي وخليت بسكت وكعك بالسمسم وخليت الجاي ورحت يمه
ايهم: عاشت ايدج اجه بوقته
صبيت اله وخليت الكعك يمه وانا كعدت اكل حلويات
واكرز حب وعيني على المسلسل يضحكون اضحك وياهم يبجون ابجي وياهم داخله بالجو وكأنو انا البطلة وكوشي رغم فاهيه مثلي بس تعرف تتصرف
انداريت لكيته ساند راسه بيده وكاعد صفح وصافن عليه ومبتسم رديت الابتسامه..
هاا شبيك؟
ايهم: وجودج بالكون بس ع كلمة شبيك ماعندج غيرها
هنادي: شو في شو مالك؟
ايهم: ههههههههههه ولا شي بس كومي للمراية
: وشسوي؟
ايهم: كومي وشوفي نفسج
عاد كمت انا ورحت لمراية الحمام اقربلي
وشفت وجهي عزززا ملطخ تلطخ ككو حتى واصل لركبتي شكد عيييييييب
ياااااربي غسلت ونشفت شكد فشلة وعييييييب
ومن اكول فاهيه محد يصدك
طلعت وامشي وعيني بالكاع وكعدت على القنفة
وهو ضحك بصوت عالي
ايهم: طولج اشبر واحد وتصرفات جهال معقوله انتي بنت شابه وبالغه؟
: تتنمر؟
ايهم: اكيد لا بس انتن الي طولجن تحت الـ 160 هم تشوفن النمل بالكاع بصورة واصحة؟
زين الاكبر والاطول منجن شلون تشوفنه؟
هنادي: هسه شلون انا شفتك؟ عادي عمود كهرباء شطوله وشفتك سهله
ايهم: منو عمود كهرباء ولج هو طولي كله 183؟؟؟؟
هنادي: زين انتو الي طولكم هلكد واكثر شلون تشوفون العالم؟ والقمر تحسو قريب عليكم؟
ايهم: ليش بويه نحس القمر قريب علينا شني ملائكة؟
ردت اجاوبه واتصلو عليه ورجعت اكرز حب وعيني عليه
ايهم: فاقد احجي عدل... شنييي شوووكتتتت.. ايي اييي جااايك روحو سبقوووني
كلبي وكف عبالي شغل
كام بسرعة للغرفة وانا خانسة بدل بسرعة كمت لزمت ايده
شكو؟؟
ايهم: ماهر مسوي حادث .. داعميه بالشارع ورايحين وهسه هو بالطوارئ
شهكت وصفنت بوجهه وماعندي أيّ حركه
ايهم: روووووحي بدلي وتعااااي يلا
رحت وماعرف شنو اللبس بسرعه اخذت العباية واخذت الشال وبالشارع لبستهن وصعدت بسرعه وتوجهنا للمستشفى
.
.
الدكتور: اعذروني مانكدر
فهد: دكتور ليش تخلينا نسبك؟
فاقد: دكتور اخته مموجوده ويردون يسوون عملية اله غير احنا نروح نبدله
الدكتور: اكو ممرضات وهم يقومون بالواجب
فهد: هسه من كل عقلك اثق بالسستر؟ ترى الي عندي عنده فـ وخر عن طريقي لا اجرم بيك جاي وتمسلت فوك راسي وانت من الاساس جاي تبطيق هنا دووووخر
دخلنا اله وجهه اصفر ودددددم مليياااان دم
نزعنا ملابسه بالكوه ولبسنا مال العمليات
وطلعنا واخذو لصالة العمليات بعد اكمال الاجرائات
دقايق ودخلو ايهم وهنادي
ايهم وراها وهي اجت تركض
: ووووينه وووووييينه
فهد: على كيفج خويه هسه دخلوو لصالة العمليات وماعنده غير العافية اطمني مامتأذي هواي
: يايمه گلبي
ايهم: هاا احجولي
فهد: هذا فد واحد كـ**** مكسرة تكسر ورايح
فاقد: شلشت البنية وثولتها توك تكول مابيه شي
فهد: اسكت فاقد اريد اروح واشرب من دمه بس مانعرفه بس ماهر اكيد يعرفه
جعفر: لازم گلبي بالعملية خايف يگصون ***
ايهم: تسكت لو ادوسك هنا
: ياحسين يامظلوم.. ياحسين يامظلوم.. يامهدي ادركني.. يا ام البنين اغيثيني.. يالعباس انا بظهرك
هلكلمات ابوي علمني عليهن وكال بوقت الشدة ردديهن وبسرعة تنحل وقبل لا تردديهن كولي النيه بداخلج ورددي وانا كعدت اردد
: ياحسين يامظلوم يامهدي ادركني ويا ام البنين اغيثيني ...
صفنت شويه على باب العمليات ورجعت رددت هذا الدعاء
فان تولو فقل حسبي الله لا اله الا هو عليه توكلت وهو رب العرش العظيم
جابلي ايهم جاي وجبرني اشربه حتى اصحصح وكعدت على الكراسي الموجودات يم غرفة العمليات وشربت الجاي وعيني على الباب
وهسه يطلعون وماكو لا ساعة ولا ساعتين ثلاث ساعات وطلع الدكتور وكلنا طفرنا يمه
ايهم: بشر دكتور
الدكتور: تمت العملية بنجاح بس تعرض لضربة قوية
وكسر بالقدم ومن العملية كدرنا نسيطر عليه بس صارت عنده اعراض باهتمامكم والعلاج يرجع طبيعي احنا مانكدر نشتغل عليهن
ايهم: وشنو هاي الاعراض؟
الدكتور: الضربة قوية وتعرض الى فطر بالجمجمة وفقر دم حاد وممكن نكول خفقان عام وضربة في مراية الظهر
هنادي: يممممه اخووويه ايهم
الدكتور: يتشافى بإذن الله عن طريق العلاج الي اكتبه الكم هسه .. الاقربله يتفضل وياي
راح ايهم وياه وانا وكفت وصفنت على الشباك ديركبون المغذي ويشيلون بعض الاجهزة وديجهزو حتى يطلعو للغرفة الخاصة .. وجهه اصفرررر ورجله كلها دم وخياط وايده نفس الشي
ايهم: هاا بويه
: هممم
ايهم: تعاي اكعدي
: خليني شويه هو بقى يمي دقايق واسمع صوت بنية تركض وتصيح
زينب: اخووويه وييينهه عموو ايهم فدوه اخووي وين
ايهم: هسه يطلعو بغرفة خاصة وشحلاته مابي شي تعالي شوفي
وكفت يمي وباوعتله وبجت
: سوده عليه بيوم فرحتك عساها بحظه وبخته كون حسبي الله ونعم الوكيل عليه
ايهم: جعفر تعال اخذ البنات بره شويه بالحديقة علما ينقلو للغرفة
جعفر: تعالن خوويه
رحنا وياه للحديقة بره كعدنا ع الكراسي بالحديقة
وجعفر كال دقايق واجي
شوي واجه صديق ايهم
: تفضلو
رفعت راسي شايل بيده جايات وعينه على زينب وزينب مدنكه
: تسلم اخويه
ندست زينب: الولد واكف اخذي منه
زينب: تسلم خويه ماريد
فهد: اخذي ايهم طلب
زينب: مشكور ماقصرت
وكعد كدامنا يدخن وكل شويه رافع راسه علينا
وكل شوي يجي يمنا
: محتاجين شي؟ تعبانين؟ تروحون للبيت؟ اجيبلكم غراضكم.. وهكذا
جعفر: نقلو ماهر للغرفة تكومون؟
هنادي: اييي اييي اكيد.. رحنا نمشي سريع وره جعفر ودخلنا للغرفة
الدكتور: غيبوبة مؤقتة بسبب البنج لتخافون
ايهم: تسلم دكتورنا ماقصرت
الدكتور: تدلل دكتور ايهم
وطلع .. واحنا بقينا يمه
زينب كاعده من الجهه وانا من الجهه الثانية ولازمين ايده حنان ماخذه الجهال ورايحه للبيت حتى مايفرغ
وبس زينب يمي وايهم وجماعته
مسحت دموعي ورفعت راسي ع ايهم
هنادي: اسراء تدري؟
ايهم: ماحبيت اكسر فرحتها خلي من يكعد ويصحصح ابلغها
هزيت راسي ورجعت اباوعله
هذا روحي من الدنيا بدونه ولا شي ياربي احفظه الي
صافنه بيه واردد ياحسين يامظلوم.. يامهدي ادركنا
زينب: شوكت يصحى؟
ايهم: غيبوبة مؤقتة ع غفلة يكعد مايطول لباجر
فهد: زين ايهم عندهم ملابس شي لو لا
ايهم: لا روح لبيتهم ام زينب هناك خلي ترتب جنطه وتدزها
فهد: خوش
زينب: لحظه اجي وياك خاف ماتندل واجهز غراضنا بيدي احسن واجيب كم شغله ضروري
فهد: اي يلا تعاي
كامت زينب وراحت وي صديق ايهم وانا بعدني مكابلته وكاعده
جعفر: زين وفاقد كومو نروح نجيب اكل شي للجماعه ونجي
فاقد: اي وعلي ميت جووووع لا حصلت الفلافل ولا طلبت
ايهم: جيبو شوربه وياكم
زين: تدلل
طلعو الشباب وبقينا احنا الثلاثه بالغرفة
هنادي: ايهم باوع وجهه شلون شاحب واصفر
ايهم: اي غير مسوي حادث ياعيني
هنادي: وتعبااااان حييل
ايهم: هسه يصحى كلشي مابيه بطل
هزيت راسي وبست ايده واردد بالدعاء بصوت مهموووس وخافت وبنية يصحى ويتشافى بأسرع وقت
فان تولو فقل حسبي الله لا اله الا هو عليه توكلت وهو رب العرش العظيم
.
.
فهد: بيا حي بيتكم كلتي؟
زينب: حي الـ ****
فهد: خووش ..
مشينا و وصلنا تقاطع واكو بنت صغيرة كلش واكفة وتمسح بالجام واكو الي ينطوها واكو لا
وصلت للسيارة مالتنا بسرعه أشر وصاحلها وانطاها فلوس
زينب: بلا زحمه انطيها بعد نيابة عني لانو مشايله
فهد: صار.. وانطاها نيابة عني والبنية فرحانة
فهد: تأخر الوقت لا تبقين بالشارع رجعي لبيتج
: هسه بس اشتري ماي لعائلتي وارجع شكرا عمو
وراحت واحنا مشينا بسرعه دمعت عيني من تذكرت حالنا بعد ماطلعنا من بيت ابوي وتذكرت شلون جانت حنان تهملنا وتخليني حتى اطلع اجدي علمود اشتري خبز للجهال
فهد: شبيج؟
زينب: مابيه بس خايفه ع ماهر
فهد: مابيه شي ولا راح يصيرله شي بطل ماهر
زينب: ان شاء الله.. دليته ع الفرع مالتنا ونزلت انا كلت اله انزل ماقبل
صعدت لغرفة هنادي اخذت ملابس الها واحتياجاتها وملابس الي ولماهر وكم شغلة مهمة النا واخذت فلوس وطلعت خليت الجنطة وره ورجعت قفلت الباب مبين حنان نايمه
وصعدت بالسيارة لكيته منتجي ع باب السيارة ويگلب بالتلفون
فهد:كملتي؟
زينب: ايي كملت.. شغل السيارة وانا طلعت الفلوس
: هذي الفلوس الي انطيتهم منك
باوعلي بطرف عينه
فهد: ويعني تنطيني هسه لانو انطيت نيابة عنج؟
زينب: ايوا ماحب احد يدفع عني
فهد: درجعيها بويه رجعيها
زينب: بس .. باوعلي وكال: مو كلنا رجعيها
سكتت انا ورجعتها ونزلت الجامه
ومشت السيارة بينا طريق المستشفى قريب ع المطار
فـ صاير ازدحام نوعا ما
فهد: اكو بني ادم يسافر بهل الزلك صدك جذب
زينب: السفر موجود بكل وقت عادي
فهد : مو هيج وازدحام ونظام ماكو ويجون ويكولون روحو للحكومه تنفذ انعل ابوكم لابو الحكومه وياكم
شفته اعصاب ويحجي بحركان دم عاد انا سكتت
مشينا شوي عن الازدحام وكال
فهد: ماقصدت اغلط بس ماكدرت الزم لساني عذريني
زينب: لا عادي مو مشكلة
فهد: ماكلتيلي شنو اسمج؟
زينب: زينب وانت؟
فهد: فهد .. انتي اخت هنادي؟
زينب: بنت زوج امها
فهد: مو اكول متتشابهون
زينب: ايوا.. هو سكت بعد ماحجه شي وصلنا للمستشفى ورحنا للغرفة الشباب ماكو بس ايهم وهنادي كاعدين نزلت الغراض وانطيت مفاتيح البيت لهنادي
شاورتني
هنادي: الخزنة لج زينب
زينب: هاج مفاتيحها
هنادي: بعد عمري شكد ذكية
ربع ساعة ودخلو الشباب ...
