رواية ايام من رماد الفصل الثامن عشر بقلم احمد
الولد: انجبي مالي خلگج قابل انجلينا جولي بالغرفة
انصدمت من وقاحتو بس ماجاوبتو مجرد رحت يم الباب وگفت علمود ما اسمحلو يدخل شو هذا مسكني من ملابسي وسحبني بكل قوتو وذبني بالممر
من وگعت جان بين راسي وحافة الكرسي مسافة اصبع واحد لولا ستر الله جان دخلت حافة الكرسي براسي وسمعت صوت اشياء وگعت بالگاع
انداريت وراي جان مصطفى واگف وبدون وعي مني نزلت دموعي واجى يركض والولد من شافو حاول ينهزم بس مصطفى جان اسرع منو
ركضو سوا ومن وصل عندو مصطفى سكر ايدو اليسار وضربو بصفحة وجهو ومن قوة الضربة انكسر باب غرفة ميزر ووگع بيها الولد
سندت نفسي ولحگتهم جان ميزر گاعد عالتخت ومو مستوعب شنو صاير ومصطفى گاعد فوگ الولد ويضرب بيه بهمجية
وخلال ثواني اجو الامن وواحد منهم جان بايدو عصى حاول يضرب مصطفى بيها على راسو وحطيت ايدي گدام راس مصطفى
من ضرب ايدي احس روحي شاغت وصرخت بكل صوتي من الوجع وگام مصطفى سحبني وراه وبلمح البصر ضرب الحارس بوكس
وتجمعو عليه الامن هم يضربوه وهو يضربهم بس صارت هوسة مو طبيعية اني ماسكة ايدي وابجي من الوجع وميزر صار يساعد مصطفى
اخير شي اتذكرو من شفت وجه مصطفى ازرگ تحت عينو اليمين وخشمو يصب دم لان انضرب عليه ودخلو اخوان رونق للغرفة واني فقدت الوعي
ماعرف شگد مر وقت الى ان گعدت لگيت نفسي بوحدة من الغرف مالت المستشفى وحاطيلي مغذي ويمي ناظم
دمعة: وين مصطفى
ناظم: اششش اهدي لا تتحركين
دمعة: مصطفى وينو
ناظم: مانعرف انهزم بعد ما تضارب ويا الامن
دمعة: شنو صار منو الي وگعني وليش الامن حاولو يضربون مصطفى
ناظم: هسا عوفي كل هالاشياء وخليني افرحج
دمعة: بشنو
ناظم: حط ايدو على بطني .. اكو هنا طفل النا اني وياج
دمعة: بصدمة .. جذب
ناظم: هههههه بلى والله قبل شوية گلولي
دمعة: صرت ابجي من الفرح وحضنت ناظم وهو حضني واحس الدنيا ما واسعتني من الفرح .. يعني راح اصير ام
ناظم: اي يا عمري راح تصيرين احلى ام بالدنيا
دمعة: بس لحظة مصطفى وينو اريد اتطمن عليه
ناظم: اخوان رونق ماعرف وين اخذوه بس انطو خبر لاهلج ان هو بامان وبس تهدا الامور يرجع للبيت
دمعة: گمت من مكاني وحاول يمنعني بس خايفة على مصطفى لان اخر مرة انجمع ويا اخوان رونق جان السلاح على راسو
طلعت خارج الغرفة لگيت الدنيا مگلوبة بابا وزوجاتو واخواني كلهم جايين والشرطة تارسين الممر ووياهم الامن الي ضربوهم مصطفى وميزر
جنت واگفة وانتبهلي ضابط جبير بالعمر وگال لواحد من الامن هاي البنت الي جانت وياه گالو اي وصاحلي الضابط بس ما رحت
اخير شي تقرب علي گلي ليش ما تجين گلتلو شيجيبني بنص الزلم گال اريد اعرف شصار بالضبط علمود اعرف اتصرف بالموضوع
ناظم: سيدي تفضل للغرفة علمود تحجيلك كلشي
الضابط: تحجين هنا لو بالغرفة
دمعة: بالغرفة .. اني ما جان عندي فرق بس لان ناظم گال بالغرفة طلبت بالغرفة
الضابط: من دخلنا .. احجيلي
دمعة: حجيت كلشي بالتفصيل لحد ما فقدت الوعي
الضابط: اقوالج تختلف عن الولد الي ضربو اخوج وعن الامن
دمعة: شنو گالو
الضابط: الولد يگول جنت ادور على غرفة اختي والبنت صارت تسبني والولد بدون ما يسألني ضربني حتى ما لحگت افهمو الموضوع
والامن گالو اجينا دا نبعدهم عن بعض شو هجمو علينا فورا وضربونا
دمعة: فكيت حلگي على وسعو من الجذبة
الضابط: ها شو ساكتة
دمعة: وربي كلها جذب بجذب
الضابط: شنو دليلج
دمعة: طلعت كوعي اليمين .. هاي من دفعني الولد بالممر وگعت عليها .. وطلعت ايدي اليسار .. وهذا مكان ضربة الامن من حاولت احمي اخوي
الضابط: شنو الي خلاج تتصرفين هيج وتحميه
دمعة: لان اخوي مو غلطان ولو مضروب على راسو هاي الضربة جان ممكن يموت تحت ايديهم
الضابط: اذا اخوج مو غلطان ليش انهزم
دمعة: ماعرف جنت فاقدة الوعي ومن صحيت گالو مصطفى مو موجود
الضابط: تمام
طلع الضابط وماعرف وين راح هو والشرطة وراحو وياه الامن والولد وميزر وجنت مثل الاطرش بالزفة مافهمت كلشي من الموضوع
دمعة: شنو الموضوع ناظم
ناظم: الولد الي دفعج جان حاط عينو على رونق من قبل ما يتزوجها ميزر وجانت هاي فرصتو انو ينتقم منهم بس ما كملت وياه
وهالحجي حجاه ميزر گدام الشرطة وگال تگدرون تسألون زوجتي من تصحى وهي تأكدلكم انها صدتو ومن يومها هو حاقد علينا
دمعة: واني هسا شنو مصيري
ناظم: راح توصل المشكلة للمحكمة ولازم تروحين تشهدين گدام القاضي بالي صار
دمعة: ومصطفى وميزر شنو مصيرهم
ناظم: ميزر ياخذون اقوالو بالمركز ويرجع ومصطفى تبقى عند القاضي اذا سقط التهم عنو يرجع اذا ما سقطهن ممكن ينسجن
دمعة: ياربي شهالمصايب هاي
ناظم: الله يستر
دمعة: دخلو يمي بابا وامهاتي يتطمنون علي وماما رحمة وصت ناظم ياخذني للبيت علمود ارتاح وگالت لا تجين للمستشفى الا تصحى رونق
نفذت كلامهم وطلعنا اني وناظم بس طلبت منو يوديني لاهلي علمود ابقى هناك واعرف الاخبار اول باول بدال ما يجيبني ويوديني يوميا
هو ما اعترض اخذني لبيت اهلي مباشرة جانن البنات كلهن مجتمعات واول ما دخلت بلشت الاسئلة من كل حدب وصوب
حجيتلهن كلشي بالتفصيل وهن يستقبلن الصدمات وحدة ورا وحدة وخصوصا من گلتلهن جان يريد ياخذ رونق الولد بس هي رفضتو وتزوجت ميزر
سناء: عوذة شنو من بشر هذا
دمعة: وهسا تجمعو كلكم كبار وصغار واخذو الصدمة الجبيرة
الكل: احجي ولج شكو
دمعة: بصوت عالي ... رااااااح اصييييير امممممممم
الكل: جذذذذذذذذذب
دمعة: وربي صدگ
سوسن: وربي يا دمعة احلى خبر بس فرحتنا ناقصة بسبب وضع رونق
دمعة: كأني صحيت على نفسي .. اي والله صحيح
سوسن: خطية وليد من يوم الحادث وهو يبجي على ابوه وامو
دمعة: ليش ما اخذتو وياها ماما نعمة من راحت
سوسن: وين تاخذو يا دمعة واذا ما قبل يرجع تتورط بيه
دمعة: صحيح والله وربي كل ماشوف وضع ميزر اموت من القهر على حالتو يمكن بجى على رونق اكثر من وليد
سوسن: والله رونق اكثر وحدة تستاهل البجي عليها
دمعة: اي والله بنت حلال
سوسن: الله يرجعها بصحة وعافية
دمعة: دريتو ان اهلها سامحوها
سوسن: اي حجولنا ماما وصوفي
دمعة: صدگ ما تعرفون وين مصطفى
سوسن: الي نعرفو ان اخوان رونق ضموه ومحد يعرف وينو بس هم
دمعة: معقولة يحاولون يأذوه
سوسن: اكيد لا ماطول سامحو رونق وخصوصا ان هو جان يحميها
دمعة: صحيح
مر الوقت واني احجي ويا البنات واجى يمنا وليد سألني على ابوه وامو ايمتى يجون وماعرفت شنو اجاوبو اخير شي گلتلو عد على اصابيعك ذني ويجون
وجنت اقصد ان كل اصبع يوم ومبين عليه كلش انقهر سحبتو يمي وحطيت راسو بحضني وبقى ساكت بس مبين عليه كسرت الخاطر
وبين ما هو حاط راسو بحضني دخلو ميزر وماما رحمة وگمز مثل الطلقة باتجاه ابوه وشالو ميزر بايدو السليمة وصار يبوس بيه
گمنا كلنا سلمنا عليه وتطمنا على سلامتو وبعد ما خلصنا سلام وتطمنا عليه اخذ وليد وياه وصعدو لغرفتهم وكلش فرحت بفرحة وليد
الدنيا جانت صبح لان الي صار كلو بالليل اني هم حطيتلي فراش ونمت لان جنت تعبانة ونعسانة كلش ما گعدت للظهر
گعدت صليت وتغديت وبقينا نحجي اني والبنات واجى ببالي ميزر ورحت اشوفو گعد لو بعدو نايم فتحت باب الغرفة جانو هو ووليد نايمين
منظرهم كلش حلو حاضنين بعض ونايمين نومة عميقة كلش گلت بگلبي ياربي تجمعهم برونق باقرب وقت ممكن ولا تشوفهم بيها سوء
سكرت الباب ورجعت عند البنات وللمغرب يلا گعدو وليد وميزر اجى ميزر تعشى ويانا وراح للمستشفى وشگد حاولنا نمنعو بس ما يفيد
بالليل اجو ناظم واهلو يتطمنون علي وهم يتطمنون على ميزر ورونق وكلش فرحت بجيتهم وسما جانت كلش فرحانة
تعرفت على خواتي واندمجت وياهن كلش وكل شوية تگول اذا تعاركتي وياهن معناها اني حسدتج على هاللمة الحلوة
سوسن: مو عندج خوات ثنين
سما: اي عندي بس جمعتنا مو مثلكم لان احنا بس ثلاثة ومن يجن يگضن الوقت بشغل البيت وياي ونگعد ساعة لو ساعتين بالليل
بس انتن لان هواي الله يحفظكن تخلصن الشغل عالسريع ويكون اكو هواي وقت علمود تگعدن ويا بعض وبصراحة گعدتكن احلى
احنا من ينجمعون ويانا ناظم وكاضم شوية نتونس لان يبقون يتشاقون ويحجولنا على مواقفهم والاحداث الي تصير وياهم
سوسن: ليش كاضم ما متزوج
سما: يگول اريد يزيد راتبي علمود ما اقصر على زوجتي
سوسن: بس هذا مو سبب هاي اخواني يريدون يتزوجون وهم حتى وضيفة ماعندهم
سما: التفكير يختلف من شخص لشخص وترا اذا نجي للواقع اخوانج اذا شغلهم مستمر يطلعون اكثر من كاضم بهواي
وثانيا زواج اخوانج احق من زواج كاضم لان وضيفة كاضم سهلة يگدر يداوم حتى لو صار شايب اما اخوانج ما يصير
من يكبرون بالعمر يصير الشغل صعب عليهم فاذا عندهم ولد يعينونهم بكبرتهم ويشيلون عنهم شوية من المسؤولية والمصرف
سوسن: اي والله بهاي وياج حق
سما: هسا بس اية وسارة مو متزوجات
سوسن: اي
سارة: ليش عندج رجل الي
سما: لا عندي خشم ههههههههه
سوسن: صخم الله وجهج سارة اقسم بالله راح تجلطني بطولة لسانها
سما: عادي دا تتشاقة
دمعة: هاي خبلة العيلة حتى صوفي يگول عليها مخبلة
سارة: ننننننننننننن
دمعة: ههههههههههه بربج هسا هاي عقلها عقل وحدة اكبر مني
سما: ليش انتي عندج عقل
من گالت هيج سارة ضحكت ضحكة الا صار حلگها يوجعها والبنات يريدن يسكتن ما يگدرن وعلى ضحكتهن صرت اضحك اني
وبذيج الليلة من صدگ ونستنا سما بسوالفها واندمجت ويا خواتي بشكل مو طبيعي خصوصا ان هي جانت متشوقة لشوفتهن من قبل
خلال الگعدة اجى صفاء گال ناظم يريدج وطلعت جان ينتظرني بالحوش سلمت عليه ورد السلام
ناظم: شلونج
دمعة: زينة
ناظم: ايدج شلون صارت
دمعة: بعدها توجعني بس شوية اقل
ناظم: خوش
دمعة: انت شلونك
ناظم: مشتاقلج
دمعة: رايدة اجي وياك بس خواتي كلهن هنا وهم موضوع مصطفى ورونق شوية متوترة الاجواء وماريد اضوجك وياي هالفترة
ناظم: لا بالعكس اني ما اضوج لان اهلج صارو مثل اهلي واذا اسمحلج تبقين مو لان متعاجز منج وانما تبقين يمهم وتوگفين الهم بهالمحنة
واني بالنسبة الي مو طاير مصيرج ترجعين الي واني ارجعلج بس اذا عفتي اهلج بهذا الضرف مو حلوة لا بحقج ولا بحقي
دمعة: اي صحيح
ناظم: ماعرفتو وين مصطفى
دمعة: بعد ما عرفنا
ناظم: عود من يجي وقت المحكمة انطيني خبر علمود اجي اخذج وارجعج
دمعة: عادي بابا او اي احد من اخواني ياخذني اني وميزر
ناظم: لا گليلهم ناظم گال اني اخذج انتي وميزر والي يريد يروح وياكم حياه الله
دمعة: تمام ماطول انت رايد هيج
ناظم: ديري بالج على نفسج بوية ما اوصيج لا تشيلين شي ثگيل ولا تتعبين نفسج نهائيا خواتج هواي وبيهن الخيروالبركة
دمعة: تطمن من اجيت ما خلوني اسوي كلشي كل الوقت گاعدة وساكتة
ناظم: لعد نصيحة ابقي هنا احسن ما تجين تكرفين هناك هههههههه
دمعة: اكو هيج فكرة براسي
ناظم: ههههههههههههه يلا بوية روحي صيحي امي وسما علمود نتوكل
دمعة: وين تروحون بعد وقت
ناظم: يا وقت الساعة 11:30 بين ما نوصل تصير 12 او تعبر ال 12
دمعة: والله متونسين كلش بوجودكم
ناظم: نجي غير مرة بلكي بوقتها تكون محلولة سالفة مصطفى وجنتكم
دمعة: إن شاء الله
ناظم: يلا صيحيهن
دمعة: تمام
دخلت گلتلهن وجهزن نفسهن وطلعن جانو طالعين كاضم وعمي سلمت عليهم وتحمدولي بالسلامة وبراكولي بالحمل وطلعو رجعت يم البنات گلتلهن اكو اوامر جديدة
سوسن: شنو من اوامر
دمعة: ناظم گال لا تشتغلين يخاف علي
سارة: دنجبي واغسلي المواعين لا اجي اسحلج لحد ناظم
دمعة: يخرب بيتج مو لسان رشاش
سوسن: وربي لسانها منفلت فد مرة سوتني بگد البگة گدام البنية
دمعة: لا تاكلين هم سما مخبلة بعد اكثر منها ما شفتيها تگول عندي خشم
سوسن: احجيلج الصراحة وما تزعلين
دمعة: اي احجيلي
سوسن: ما ارتاحيتلها
دمعة: باستغراب .. ليش
سوسن: البنية من كلامها حسيت انها مو طبيعية
دمعة: شلون يعني
سوسن: يعني كلامها وتصرفاتها مو مريحة
دمعة: يجوز لان عاشت حياتها بالمدينة وتروح للمدرسة فاكيد طبعها يختلف عننا
سوسن: كلشي ممكن
دمعة: دخلو بابا وامهاتي بعد ماراحو اهل ناظم واسمعهم بالصالة بابا گال اخوان رونق يگولون مصطفى بامان ويسلم عليكم
رحمة: الله يسلمو ليش ما اجى
بابا: يريدون يتأكدون من حكم القاضي لان مصطفى ضارب حراس الامن بوقت دوامهم والولد الي وياهم يگول ضربني بدون سبب
رحمة: بس هيج راح تلبسو التهمة وحتى ما يگدر يدافع عن نفسو
بابا: باجر اوكل محامي بالقضية واخليه هو يتصرف بلكي يگدر يطلعو منها
رحمة: الله يستر المصايب كلها تجمعت ويا بعض
بابا: شنسوي مابيدنا شي
رحمة: ميزر هاي الفترة لازم توگفون وياه ماراح يگدر يشتغل ويدبر نفسو
بابا: تمام نحاول نلگيلها حل
بيني وبين نفسي گلت من وصلت السالفة للفلوس صار يفكر بحلول بس لو اعرف شنو فايدة الفلوس اذا ما تنصرف بهيج وضع
بقو هو وماما رحمة يحجون واغلب حجيهم عن مصطفى وميزر واني رجعت التهيت ويا البنات والحمدلله سارة موجودة ويانا
جانت سوالفها وتصرفاتها تضحكنا غصب عننا وتنسينا شوية من الهم العايشين بيه باوعت لوليد جان گاعد بزاوية المطبخ
صحتو ومن اجى اخذت راسو بحضني وگلتلو شنو رايك تنام بحضن عمة اليوم رفع راسو باوعلي وهز راسو بمعنى اي
بستو بين عيونو وگلتلو يلا لعد خلي نروح اني وياك نجهز فراشنا قبل ما تجي سارة الخبلة وتاخذو مننا وطلعت من المطبخ وياه وانصدمنا بدخول ميزر علينا وهو يبجي
شكرا لزيارتكم عالم روايات سكيرهوم
