رواية ايام من رماد الفصل التاسع عشر بقلم احمد
دمعة: باوعت لوليد جان گاعد بزاوية المطبخ صحتو ومن اجى اخذت راسو بحضني وگلتلو شنو رايك تنام بحضن عمة اليوم رفع راسو باوعلي وهز راسو بمعنى اي
بستو بين عيونو وگلتلو يلا لعد خلي نروح اني وياك نجهز فراشنا قبل ما تجي سارة الخبلة وتاخذو مننا وطلعت من المطبخ وياه وانصدمنا بدخول ميزر علينا وهو يبجي
رحمة: بسم الله الرحمن الرحيم شبيك يمة
ميزر: يمة كعدت رونق گعدت يمة
رحمة: بفرح .. صدگ والله
ميزر: اي والله
رحمة: خلي نروحلها
ميزر: لا تعالو باجر الصبح بس دمعة جهزيلي وليد اخذو وياي
دمعة: تمام
اخذت وليد عالسريع بدلتلو ملابسو ومشطت شعرو واخذو ميزر وراح وما تتصورون شگد فرحنا بهالخبر هذا بقى بس فرحتنا بمصطفى
من الفرح بقينا لل 2 بالليل گاعدين وواحد يحجي للثاني عن فرحتو ويتخيل شنو موقف ميزر واهل رونق من گعدت
بعدها رحت نمت بس نومتي صارت متقطعة لان نمت واني افكر بيها وثاني يوم گعدنا من الصبح وجنت متأملة اني اروحلها
بس بابا گال نروح احنا بالبداية (هو وامهاتي) ونشوف شنو الوضع وبعدها نقرر منو يروح وبيومها ما اجى ناظم علمود اطلب منو يوديني
الظهر رجعو بابا وامهاتي ووياهم وليد گالت ماما رحمة باجر يطلعوها ونجيبها هنا ماكو داعي تروحون اليوم
حطينا الغدا ووليد تغدا وياي ومن خلصت غدا جنا ثنينا نعسانين واخذتو حطيت فراش ونمنا سوا ما گعدت للعصر على صوت وليد
وليد: عمة عمة يلا اگعدي
دمعة: ها يا روح عمة انت
وليد: يلا گومي كافي نوم
دمعة: شتريد يا روحي
وليد: تعالي العبي وياي
دمعة: بابتسامة .. شنلعب
وليد: جان گدامو سيارتين لعبات .. هاي سيارتي وهاي سيارتج
دمعة: خلي اصلي وارجع العب وياك
وليد: اي
گمت صليت العصر ورجعت يمو وصرت العب وياه مرة بالسيارات مرة بباقي الالعاب مرة ادغدغو مرة اركض وراه بالغرفة
وبين مدا اركض وراه وثنينا طالع صوت ضحكنا دخلت سوسن وباوعت علينا وگالت عشتو طلع هو دا يلاعبج بدال ما انتي تلاعبيه
دمعة: مسكتو وبستو كل قوتي .. تروحيلو فدوة هو ولعباتو
سوسن: ايا جلبة احمدي ربج الي ببطنج شفعلج
وليد: شنو ببطنج عمة
دمعة: ماكو شي
سوسن: ولك وليد اكلت ولد ذاك النهار وهسا راح تاكلك
وليد: عادي .. وطلع لسانو لسوسن
بوية من سوا هيج صوت ضحكتي ترس البيت ترس وحتى البنات اجن على صوت ضحكتي وكل ما وحدة تسأل واحجيلها تشبع ضحك على سوسن
بعدها رحنا تعشينا واحنا ننتظر باجر بفارغ الصبر علمود ترجعلنا رونق ومرت ذيج الليلة بدون اي احداث تذكر مجرد انو اني ووليد نمنا سوا مثل العصر
جانت نومتو كلش هادية وحتى من يگعد ما احس بحركتو من گعدنا الصبح بلشنا اني والبنات بتنظيف البيت لان راح يجون علينا زلم ونسوان يسلمون على ميزر ورونق
اني جنت اشتغل الشغل الخفيف علمود ما اتعب وباقي الشغل عالبنات ومثل ما گالت سما خلصنا شغلنا بسرعة لان كلنا نشتغل سوا
قبل الظهر صار البيت يلمع وجانو مقررين يجيبوها العصر فتغدينا وراحو بابا وامهاتي ثنينهم ووياهم اخواني علمود يساعدون ميزر
ورا اذان العصر بشوية سمعنا صوت ميزر دا يفتح باب الحوش ويگول لواحد ارجع بالسيارة لداخل الحوش علمود تصير المسافة قريبة
واني والبنات دخلنا للمطبخ وسكرنا الباب ودخلوها ميزر وبراء وصفاء ووياهم واحد من اخوانها حاطينها على دوشگ وكل واحد من جهة شايلها
هذا الدوشگ جان من النوعية القوية بحيث رغم وزن رونق نازل شي بسيط كلش علمود لا يتأذة حوظها بس رغم هالشي جانت تتوجع
من دخلوها اخوها تطمن عليها وطلع خارج ودخلنا يمها اني والبنات والفرحة بشوفتها ما تنوصف صرت بس انتظر دوري علمود اتطمن عليها
جانت گوة تحجي بستها وتحمدتلها بالسلامة ومو مصدگة عيوني بشوفتها بعد الحالة الي وصلتها وانتبهت انو امها واگفة عند باب الغرفة من داخل
سلمت عليها ورحبت بيها وگلت لخواتي يسلمن عليها لان ما جانن منتبهات الها وعرفن انها ام رونق
رونق: وين وليد
دمعة: جان ملتهي ويا الجهال ورحت جبتو الها
جانت ماتگدر تتحرك بس سحبت راسو لحضنها وبلشت تنزل دموعها لان ماتگدر تحضنو واحنا صرنا نبجي على موقفها
وليد بحكم انو صغير ماجان يعرف شكو بس من شاف امو تبجي واحنا هم نبجي وياها صار يبجي من الخوف عبالو صاير شي
رحمة: توكلو بالله شبيكم هاي بدال ما تفرحون بانو رونق رجعتلكم ومنا لفترة إن شاء الله ترجع احسن من قبل
ميزر: دخل وشافنا نبجي .. سكتو واطلعو اكو نسوان اجن عليكم
رونق: ميزر الشروب مالي ما اخذتو بعد
ميزر: تمام
جابلها الشروب انطاها ووراه طلعلها من العلاگة بطل ماي صحة فتحو وحط بيه گصبة وشربت ماي وگاللها لا تقاومين من تنعسين نامي مباشرة
ومن طلع دخلن النسوان سلمن عليها واني والبنات رحنا للمطبخ والتهينا بالجاي والماي للنسوان والزلم وفجأة البيت انترس ناس
منين اجو وشعرفهم بالي صار ماعرف وبقينا على هالحالة للمغرب وانقسمنا قسمين نص يسوون العشى ونص عالجاي والماي
وقت العشى مابقى احد غريب بس عائلتنا وبعض النسابة (ازواج سوسن وسناء ورانيا) واهل رونق وبين ماجهزنا العشى رونق غطت بنومة عميقة
ميزر گال لا تگعدوها من تگعد تتعشى وحطينا العشى للكل لان ورا العشى اكيد راح يجون نسوان وزلم مرة ثانية
وفعلا قبل صلاة العشاء بلشو يجون الناس وورا صلاة العشاء بشوية دخلت علينا سما للمطبخ وگالت جايين هي واهلها كلهم
فرحت كلش بجيتهم لان ما اعتبرو الجية الاولى كافية وبين ما احنا بالمطبخ اجى وليد گال ماما گعدت ورحنا الها اني وسما
سما: السلام عليكم الحمدلله على سلامتج
رونق: الله يسلمج حبيبتي
دمعة: هاي حماتي سما
رونق: كل الهلا بيج
سما: وبيج اكثر
رونق: دمعة شوفيلي ميزر وين
دمعة: اكيد بالاستقبال هسا ادز وليد يصيحو
رونق: تمام
قبل ما اطلع اجن النسوان يسلمن عليها لان عرفن بيها گاعدة واني رحت للممر الي بين الصالة والحوش لگيت صفاء يريد ياخذ الجاي
وصيتو يصيح ميزر وبقيت انتظر الى ان اجى ميزر گلتلو رونق تريدك بس هسا النسوان يمها گال روحي شوفيهن من يخلصن گليلي
رحت للغرفة انتظرت وجنت اشوف تعبيرات وجه رونق مبين انها متوجعة وطلعن النسوان بس بقن ثنين منهن كبار بالعمر
رونق: صيحي ميزر راح اموت
دمعة: اشرتلو بايدي وانتبه اني خايفة واجى ركض
ميزر: ها بوية شكو
رونق: ظهري يوجعني ومكان الكسر يوجعني مو گادرة اتحمل
ميزر: تمام
مسكها من ايدها اليمين ورفع جسمها شوية عن الفراش وحط رجلو گدام ظهرها علمود يبقى ثابت ظهرها وبدا يفرك ظهرها
من سوا هيج بدت تتحسن شوية شوية ويروح منها الوجع خصوصا ان ميزر يفرك عضلات الظهر علمود يروح منهن التشنج بسبب النوم عليهن
(ملاحظة: الطريقة فعالة مع رونق فقط لان كسر الحوض يختلف من شخص لشخص واحيانا تحريك الشخص اي حركة يكون غلط)
ميزر: دمعة حطيلها عشى عالسريع
دمعة: تمام
رحت عالسريع حطيتلها عشى وجبتو الها وگعد ميزر على كرسي يم السرير بعد ما عدلها وصار يوكلها شوية شوية الى ان گالتلو شبعت
ميزر: دمعة اكو حليب جبتو من اجينا من المستشفى جيبيلها گلاص بس دفيه عالطباخ
دمعة: تمام
ميزر: لا تنسين الگصبة
دمعة: تمام
رحت للمطبخ حميت الحليب وجان ويا الحليب گصبات حطيت وحدة بالحليب واخذتو للغرفة واخذو مني ميزر
شربها لحد ما خلصت الحليب وطلع كلينكس مرطب وصار يمسح بايديها ووجهها والثانية فرك بيها رجلينها ثنينهن
وبعدها انطاها علاجها وبقى ماسك ايدها وصافن بيها خاف تحتاج شي وبقى لحد ما غفت وباسها على راسها وطلع من الغرفة
اني طول الوقت صافنة عليهم وبگلبي اگول لو اني بمكانها يا ترا ناظم راح يهتم بي مثل ميزر لو لا بس ماتوقع لان ميزر مجنون برونق اكثر من اي شخص ثاني
رغم ايدو مكسورة وصعبة يتصرف بايد وحدة بس مدا ينسى اي تفصيل او يقصر اي تقصير برعايتها والاهتمام بيها وبعلاجها واكلها ونظافتها
رجعت عند البنات وما خلصو الناس للساعة 12 بالليل وعالسريع نظفنا البيت وكل وحدة راحت لفراشها ورونق بقو يمها ميزر وامها
ثاني يوم وثالث يوم نفس الحالة الناس ما انگطعت نهائيا عننا لليوم الرابع بدو ينقصون شوية شوية وخصوصا الزلم لان تطمنو ان ميزر مابيه شي
لو لا قدر الله وهو المتأذي يبقون الي يعرفوه يزوروه خلال الايام الاولى علمود يتطمنون عليه اول باول بس ماطول بس ايدو مكسورة فما يحتاج
باليوم الخامس المحامي گال باجر الجلسة مالت المحكمة وصادف بيوها ناظم وابوه يمنا وگال ناظم لبابا باجر الصبح اني يمكم اخذكم وارجعكم بسيارتنا
واتفقو على هالشي وانطوني خبر علمود اجهز نفسي باجر من الصبح وگضيت الوقت كلو افكر شراح يصير باجر وشنو راح احجي
ثاني من گعدت الصبح جهزت نفسي وميزر هم تجهز هو وبابا واجانا ناظم ورحنا وياه وللمعلومة بس اني وميزر شاهدين عالصار
اخوان رونق محد يدري بيهم حتى الامن ما يدرون لان بعد ما انضربو اجو اخوان رونق واخذو مصطفى وراحو
اما الامن والولد الي وياهم فما الهم غير شهادتهم وحسب الموقف القاضي راح يتخذ الاجراء بس فقدان مصطفى ممكن يأثر عالحكم
من وصلنا المحكمة جان المحامي ينتظرنا وگاللنا من يسألكم القاضي احجو مثل الي حجيتوه بالمستشفى بالضبط اي تغيير او محاولة تبرير تنگلب ضدكم
من بلشت الجلسة دخلنا وگعدنا اني وميزر والمحامي بصفحة والامن والمحامي مالهم بصفحة والي راد يدخل لرونق وحدو
بلش القاضي يحجي وبدا اول شي ياخذ اقوال الي راد يدخل لرونق
الولد: سيدي القاضي اني جنت ازور مريض بالمستشفى واشتبهت بالغرفة ومن ردت ادخل للغرفة البنت ذيج صار تسبني وتهجمت علي
اني دفاعا عن النفس بعدتها عني واجى اخوها ضربني
القاضي: وين اخوها
المحامي: سيادة القاضي موكلي مو موجود
القاضي: شنو السبب
المحامي: بيوم الواقعة اختفى ومانعرف وينو ودا نحاول نبحث عنو
القاضي: باوع للولد .. شنو اسم المريض الي ردت تزورو
الولد: ........... (ذكرلو اسم ثلاثي)
القاضي: استريح .. باوع للامن .. وانتو شنو الي صار وياكم
جان جوابهم واحد
الامن: سيادة القاضي احنا وصلنا بلاغ انو صاير مضاربة بالممر ورحنا علمود نعرف السبب بس الولد الي مو موجود تهجم علينا
حاولنا نهديه او نشرحلو ان احنا من الامن بس ما فاد وياه وبالتالي ساعدو الولد هذا (ميزر) ولان ما جان بنيتنا نأذيهم تأذينا احنا
القاضي: باوع علي .. وانتي بابا شنو صار وياج
دمعة: حجيتلو كلشي بالتفصيل الممل ومثل ماصار بالضبط
القاضي: بس الولد يگول غلطان بالغرفة
دمعة: لا سيدي مو غلطان لان يعرف ان جنتنا بالغرفة وماعرف شنو جان يدور ببالو بس الي اعرفو ما جان ناوي على خير
وهو من قبل جان يريد يتقدملها بنية زواج او غير نية ماعرف بس هي رفضتو وتزوجت اخوي ومن ذاك اليوم هو حاقد عليهم
اني ما تهجمت ولا سبيت مجرد وگفت گدام باب الغرفة علمود ما يدخل عليها وسحبني وذبني بالممر وبيومها حتى ايدي تأذت
المحامي : سيادة القاضي .. هذا التشخيص من المستشفى من دفعها الولد ومن ضربوها الامن
القاضي: الامن ضربوج لان دافعتي عن اخوج
دمعة: لا سيدي اني ما دافعت عنو اني شفتهم يريدون يضربوه على راسو ومن خوفي عليه حطيت ايدي فوگ راسو
وهو من ضرب الامن جان دفاع عن النفس وعني لان ما انطوه مجال فورا هجمو عليه واخوي هذا يتذكر التفاصيل
القاضي: اگعدي .. باوع لميزر .. وانت شنو اقوالك
ميزر: حجالو كلشي صار وجان كلامو مطابق الي بالضبط
القاضي: ذكر اسم الولد الثلاثي .. بريئ بعد اثبات ادلة محاولة زيارة مريض مقيم بالمستشفى بنفس الليلة ونفس الوقت
اعضاء الامن المكون من (ذكر اسمائهم) بريئين من اي تهم توجه لهم خلال الحادثة بسبب محاولة التفريق بين المتشاجرين
دمعة وميزر سامر لا وجود لاي تهم ضدهم
مصطفى سامر حكم عليه بالسجن لمدة 5 سنين بسبب الاعتداء على عناصر الامن خلال تأدية واجبهم ومحاولة الفرار من العدالة حتى يثبت غير ذلك
جان يحجي واني صدمة ورا صدمة تجيني من ايمتى صار البريئ مذنب والمذنب بريئ شنو هالقانون وشنو هالقاضي هذا
اذا بالمحكمة انظلمنا لعد وين ناخذ حقنا يعني لازم يصير ويانا شي اكثر من الضرب والاذية علمود نثبتلهم برائتنا ومحاولة دفاعنا عن نفسنا
وكلشي كوم وال 5 سنين مالت مصطفى كوم ثاني والمذنبين صارو ثعالب ونكرو الحقيقة كلها واختارو الجذب بجبن عن الحقيقة بشجاعة
طلعنا من المحكمة وضحكة الاستهزاء عالمسخرة الي صارت ما تفارگ وجهي وبنفس الوقت دموعي ما توقفت من قهري على مصطفى
من طلعنا جانو يحجون المحامي وبابا وميزر اني تجاهلت كلشي ورحت صعدت بالسيارة وحطيت ايديني على وجهي وانفجرت بالبجي
من اجو حجى وياي ميزر گال مصطفى ماراح نسلمو ونخليه ينظلم نطلعو من العراق احسن كلشي وهسا راح نروح نشوفو
من گال نشوفو احس ردتلي روحي ورحنا لبيتنا جانو اخوان رونق موجودين اجى واحد منهم ويانا بالسيارة ورحنا وجان هو يدلي ناظم عالطريق
طلعنا بطريق خارجي بعيد عن المدينة وبعدين دخلنا بطريق ترابي تقريبا 15 دقيقة ووصلنا عند بيت موجود بمنطقة معزولة ما يمو كلشي
اخو رونق: عمي هذا البيت بالربيع نأجرو اني والشباب ونبقى بيه كم يوم نتونس وما لگيت افضل من هالمكان
سامر: بارك الله بيك ابني خلي ندخل نشوف مصطفى
اخو رونق: تمام تعالو
دمعة: فتح الباب اول ما دخلت اجت عيني بعين مصطفى الي گاعد بطرف الحوش مال البيت ومبين عليه هموم الدنيا كلها
ركضت باتجاهو وهو هم ركض علي واول ما تقربت عليه گمزت بحضنو وهو حضني واحتواني بحضنو الحنون والدافي
صار يبوس بي وكأنو صارلو عمر كامل مو شايفني واني مگضيتها بواجي من شوقي الو وقهري على الظلم الي تعرضلو
مصطفى: يا روح اخوج شلونج طمنيني عنج خوما متأذية شلون صارت ايدج
دمعة: اني كلش زينة
مصطفى: ليش تبجين فهميني شصاير وياج
دمعة: ماصاير شي
اخو رونق: صوفي لازم تطلع من العراق
مصطفى: بصدمة .. شنو شدتحجي انت
اخو رونق: القاضي حكم عليك بسجن 5 سنين فمامجبور تبقى هنا وتنسجن
مصطفى: بصدمة .. لا انتو تخبلتو اكيد لو تخبلتو لو تتشاقون مستحيل هالشي
عافنا وراح يمشي باتجاه البيت وهو يردد مستحيل هالشي واحنا مدا نعرف شنحجي ومسك راسو وباوع علينا يريد يحجي وصار يتأتأ وفقد الوعي
شكرا لزيارتكم عالم روايات سكيرهوم
