رواية ايام من رماد الفصل العشرون بقلم احمد
اخو رونق: القاضي حكم عليك بسجن 5 سنين فمامجبور تبقى هنا وتنسجن
مصطفى: بصدمة .. لا انتو تخبلتو اكيد لو تخبلتو لو تتشاقون مستحيل هالشي
عافنا وراح يمشي باتجاه البيت وهو يردد مستحيل هالشي واحنا مدا نعرف شنحجي ومسك راسو وباوع علينا يريد يحجي وصار يتأتأ وفقد الوعي
ركضنا عليه كلنا وسندوه ناظم واخو رونق قبل ما يوگع عالگاع واخذوه عالسيارة ركض وبقينا اني وميزر لان السيارة ما تكفي
بوقتها احس الدم جمد بشراييني واني اشوف وگع من طولو وخفت خوف بحياتي ما حسيت بيه
حتى من ضربني براء علمود الريوگ ما خفت هيج خوف وبقينا اني وميزر ننتظر على نار وما نعرف شراح يصير وياه
مرت ساعتين من اصعب ساعات حياتنا كلها بس تطمنا من دخلو بابا ومصطفى وناظم وجان مصطفى وضعو شوية احسن
ركضت حضنتو من خوفي عليه وهو هم بادلني الحضن بس جانت تعابير وجهو باردة بشكل مو طبيعي وساكت ما يحجي ابد
عافني وراح داخل البيت وجنت اريد اروح وياه بس مسكني ناظم من ايدي وگال عوفيه يرتاح وجودج راح يبقى يذكرو بفقدانج
جان كلام ناظم صحيح بس گلبي دا يتگطع عليه اخير شي بابا وميزر گالو روحي انتي ما يصير تبقين هنا واحنا راح نبقى
وانجبرت اروح واخذني ناظم بس رحنا لبيت اهلو لان لازم ارتاح واذا رحت لاهلي ماراح ارتاح خصوصا بعد مصيبة المحكمة
سلمت عالسريع عالموجودين وصعدت لغرفتي وخليت ناظم يحجيلهم الي صار واول ما وصلت للغرفة دفنت وجهي بالمخدة وانفجرت بالبجي وبقيت ابجي الى ان غفيت
بنص نومتي حسيت احد دا يعدلني بس كابس على عيوني النوم فما گعدت لحد ما صارت الدنيا مغرب جانت بطني توجعني لان شوية جسمي ضاغط علبه من جنت نايمة
گمت صليت الصلوات الي طافتني واستغفرت ربي على هالتقصير هذا وبعدها نزلت تحت جانو العائلة كلهم بالصالة دا يتابعون التلفزيون
سلمت عليهم ورحت للمطبخ حطيتلي عشى وبين ما دا اتعشى اجت سما گعدت يمي گالت ها شلون صرتي
دمعة: الي اخوها ينظلم بهالشكل شتتوقعين تصير
سما: حقج والله بس ناظم گال عندي مفاجئة الها راح تفرحها
دمعة: وين ناظم هسا
ناظم: دخل للمطبخ .. هنا ناظم
دمعة: هلا بيك
ناظم: وبيج
جانت وياه علاگة طلع منها كرتون صغير وعليه صورة تيلفون فتحها وجان بيها تيلفون سامسونج من ذني القديمات كلش
بس بوقتها جان هو احدث موبايل بالسوگ وفوگها لمس واني اباوع عليه ومتعجبة شلون يضغط عالشاشة بدون دگم
دمعة: شنو هذا
ناظم: انتظري شوي
ماعرف شسوا بس طلعت صورتو بالتيلفون وصوت نغمة الانتظار مالت الاتصال وشوية وحط التيلفون گدامي وانصدمت من صارت صورة مصطفى گدامي
مصطفى: دمعة
دمعة: باوعت لناظم عبالي فيديو مشتغل
ناظم: احجي وياه
دمعة: شحجي
ناظم: هذا اخوج
مصطفى: بابتسامة .. ولج خبلة هذا اتصال فيديو يعني تحجين وياي وتشوفيني بنفس الوقت
دمعة: شلون هيج يصير
مصطفى: هاي يفهمج عليها ناظم بس المهم طمنيني شلون صرتي
دمعة: اني زينة وانت شلون صرت
مصطفى: كلش زين بس يوم الجمعة تعالو لبيت اهل رونق
دمعة: شنو السبب
مصطفى: راح اجي اشوفكم قبل ماروح
دمعة: وين تروح
مصطفى: راح اطلع لتركيا ومن تركيا لاوربا واشوفلي دولة بيها لجوء هناك
دمعة: بدموع .. يعني بعد ماشوفك
مصطفى: هاي دا تشوفيني وتحجين وياي احسن ما ادخل للسجن وانحرم من شوفتكم 5 سنين
دمعة: وشلون تدبر نفسك هناك
مصطفى: هاي شغلتها سهلة بس مثل ما گلتلج يوم الجمعة غداكم عند اهل رونق
دمعة: تمام إن شاء الله نتواجد هناك
مصطفى: يلا بوية نحجي بغير وقت ديري بالج على نفسج وعلى ناظم
دمعة: بعيوني .. الله وياك يا روحي
مصطفى: هلا بيج
سكرت منو وباوعت لناظم گال كملي عشاج وتعالي للغرفة اشرحلج لازم اودي التيلفون للشحن واخذ الكارتونة وصعد للغرفة
سما: شبيج مستغربة ترا هي مكالمة فيديو
دمعة: اول مرة احجي مكالمة فيديو بحياتي
سما: ايييي يا ترا منا ل 10 او 20 سنة شنو ممكن يطلع
دمعة: راح يطلع فضائيين وواحد منهم ياكلج ويخلصنا منج
سما: عابتلج شنو ماكلة حلال ابوج
دمعة: لا بس شگد ما احبج اريد اخلص منج
سما: الله يحرمنا من هيج محبة
دمعة: ههههههههههه
كملت عشاي وگمت غسلت المواعين وصعدت للغرفة جان ناظم متمدد وماسك التيلفون تمددت يمو وگلتلو احجيلي هسا
نزل التيلفون على الميز الي يم السرير وسحبني لحضنو وگال الي صار قبل شوية يسموه مكالمة فيديو وتگدرين بيها تشوفين الشخص الثاني
وهاي كلها عن طريق الانترنت الي هو مثل شبكة الاتصال بس بيها شوية اختلافات واني اشتريت هذا التيلفون رغم غالي بس علمود تحجين ويا مصطفى
وبهاي الحالة حتى لو سافر لاخر الدنيا مجرد يكون عندو نت تگدرين تحجين وياه فيديو وكأنو گاعد يمج واهلج هم اخذو تيلفون علمود يتواصلون وياه
وبنفس الوقت هذا الاتصال ارخص من اتصال الخط الدولي والتيلفون راح يبقى وياي ايمتى ما حبيتي تحجين ويا مصطفى گليلي
دمعة: تمام يسلمو
ناظم: الله يسلمج .. وهسا ما النا نصيب الليلة مشتاقلج هواي
دمعة: اني هم مشتاقتلك بس اكو مشكلة
ناظم: باستغراب .. شنو من مشكلة
دمعة: بطني توجعني من گعدت من النوم
ناظم: ليش ما گلتيلي علمود اخذج للدكتورة
دمعة: وجع خفيف لان من گعدت جنت مايلة عليها واني نايمة
ناظم: باوع علي .. هي بطنج وينها حتى مو مبينة
دمعة: قابل الا تكبر يلا تصير تتأثر
ناظم: شمدريني بس المهم مرة ثانية تحجيلي مباشرة
دمعة: صار
ناظم: وباجر نروح لدكتورة علمود نتطمن عالحمل وتلتزمين وياها هالتسع شهور
دمعة: يوووووو ناظم ما احب الدكاترة والعلاجات
ناظم: ضروري دمعة حاليا مانعرف شي عن حملج يجوز تحتاجين علاجات فيتامينات اشياء ثانية لازم نراجع الدكتورة
واني اعرف دكتورة ممتازة واذا ما تحتاجين علاجات ما تكتبلج يعني مو من الدكاترة الي يستغلون الناس
دمعة: بانزعاج .. اووووووف تمام
ناظم: بهمس .. لا تگولين اوف ترا اعاقبج
دمعة: هههههههه اسفة ماعيدها
ناظم: اعتذارج مو مقبول لازم تساعديني
سحب ايدي وحطها داخل ملابسو وعرفت قصدو وساعدتو علمود يرتاح ورحت غسلت ورجعت حطيتلو ملابسو بالحمام علمود يسبح
من خلص سبح بقينا نحجي اني وياه عن الايام الي فاتت ويحجيلي عن اشتياقو الي لدرجة حسيت انو دا يبالغ بكلامو
ولان النهار كلو نايمة ما گدرت انام لحد ما اذن الفجر وصليتها ورجعت تمددت جان ناظم دا يغفي وما صلى الفجر
دمعة: ناظم
ناظم: بنعاس .. همم
دمعة: اىى متى تبقى بدون صلاة
ناظم: لحد ما ربج يسهل
دمعة: بس حرام عليك هيج
ناظم: ادعيلي الله يهديني
دمعة: بس لازم انت تسعى علمود ربنا يهديك ويوفقك
ناظم: الله كريم
شفت ما منو فايدة فتركتو ونمت وبگلبي اگول الله يهديك وبوقتها ما جنت اعرف ان ترك الصلاة ممكن يوصل لدرجة اني ممكن اطلب الطلاگ منو
اعرف ذنب وذنب جبير كلش بس مو لهاي الدرجة ثاني يوم گعدت الظهر وحاولت ارجع لروتيني الطبيعي وبالليل هم حجيت ويا مصطفى
وفاجأني ناظم من اتصل على ميزر وحجيت ويا اهلي كلهم بس من ماما اخذت التيلفون هو ابتعد علمود ناخذ راحتنا بالكلام
وحجيت ويا خواتي ورونق وماما رحمة گالت لا تجين هالفترة هاي لحد ما يخلصون الناس واهتمي بصحتج ولا تتعبين نفسج وبعدها سكرت منها
دمعة: رجعتلو التيلفون .. صدگ مو على اساس نروح للدكتورة
ناظم: نسيت والله غير تذكريني بالنهار
دمعة: شمدريني عبالي انت اجلتها
ناظم: لا باجر نروح سوا
دمعة: عمة تجي ويانا
ناظم: ليش
دمعة: احسن ماريد اروح لحالي
ناظم: تمام هسا اروح اگوللها وارجع
دمعة: تمام
ناظم: بعد 5 دقايق .. گلتلها
دمعة: اي وشگالت
ناظم: راح تروح ويانا
دمعة: همزين
ناظم: بعد باجر نروح لاهل رونق راح اعوفج هناك وارجع
دمعة: ما تودع مصطفى
ناظم: بلى اودعو وارجع
دمعة: من هسا گلبي يوجعني عليه
ناظم: تريدين اريحج برايي
دمعة: اكيد
ناظم: مصطفى لحد اليوم شنو كسب من العيشة هنا
دمعة: شلون يعني
ناظم: مصطفى من اجى للدنيا وهو يشتغل لليوم وما استفاد كلشي حتى زواج ما تزوج ومستقبلو بالعراق معدوم هو اني الي خلصت دراسة ما استفاديت
فطلعة مصطفى مو بس يخلص من السجن بالعكس يشوف الدنيا بالخارج يحاول يستفاد بالدولة الي يروحلها يكون نفسو يعيش حياتو من جديد
يجوز هناك يرتاح ويستفاد اكثر من حياتو هنا هواي ناس طلعو من العراق وعاشو احسن بالف مرة من حياة العراق
صحيح راح يكون بعيد عنكم وراح يشتاقلكم ويشتاقولو بس بنفس الوقت تحجون وياه فيديو وكأنو گاعد بينكم
دمعة: بصراحة وياك حق وگلتلك اني مشكلتي بس اني اشتاقلو لان من انولدت عالدنيا وهو قريب مني ويحبني ويهتم بي فما اگدر اتخيل حياتي بدونو
ناظم: وهسا لازم تتعودين عالحياة وهو بعيد عنج لمصلحتو هو مو لمصلحتج
دمعة: تمام
ناظم: وبعد باجر خواتج وامج اكيد راح يبجن عليه اريدج انتي تكونين اقوى وحدة بيهن وما اريدج تبجين هناك اذا تريدين تبجين من تجين هنا تبجين
دمعة: ليش
ناظم: لان مصطفى مو يحبج بس لانج اختو لا يحبج لان يتيمة ويعتبر نفسو مسؤول عنج علمود يعوضج عن فقدان امج
فمن تبجين هناك راح تأثرين هواي عليه وممكن يروح منا وهو مشغول بالو عليج فما نريد نشغل بالو الي بيه مكفيه
دمعة: وياك حق
ناظم: بمزح .. وهسا ما تحن علينا اخت مصطفى وتخلينا نعوض الاشتياق
دمعة: بلى
صار يبوسني وهالمرة كملنا سهرتنا بدون فيديو او زعل مثل قبل جانت الامور كلش طبيعية بعدها سبحنا ونمنا
ثاني يوم الصبح تريگنا وكملنا وجهزنا نفسنا وقبل ما نطلع عمي گال نزلوني بالسوگ على طريقكم وباوع لكاضم گلو لا تعوف اختك وحدها وطلعنا
الدكتورة جان قريبة من السوگ بس لازم نعبر السوگ علمود نوصلها لذلك وصلنا عمي للسوگ وكملنا طريقنا للدكتورة
سجلنا اسمي وگعدنا ننتظر جان گدامي 5 نسوان بس مشكلة النسوان الي تدخل للدكتورة ما تريد تطلع يبقن ساعة كاملة يحجن
تخيلو اكثر من ساعة لحد ما اجى دوري ودخلنا بس انا وعمتي لان مايصير يدخل ناظم ويانا فبقى خارج الغرفة ينتظرنا
الدكتورة: ها خالتي شبيها بنيتكم
عمتي: هاي جنتي وتوها ببداية حملها فنريد نتطمن عليها وعلى الجنين
الدكتورة: بعيوني .. تعالي حبيبتي عالسرير
دمعة: تمام
تمددت عالسرير وطلعت بطني علمود تاخذلي سونار وحطتلي دهون خاص للسونار وبلشت بالسونار بس جانت حركتو على بطني تضحك
گوة كاتمة ضحكتي احس يدغدغني من يتحرك ومن خلصت انطتني كلينكس گالت امسحي الدهون ومسحتو مثل ما گالت
عمتي: ها دكتورة بشريني
الدكتورة: سوولها ذني الفحوصات علمود تكون النتيجة واضحة
عمتي: تمام
طلعنا اني وعمتي منها جانت عيادتها ببناية عبارة عن مجمع طبي وبالطابق الثاني جان المختبر فصعدنا سوينا التحالليل والي جان ادرار ودم
وتقريبا ساعة لحد ما خلصن التحاليل وخصوصا تحليل الدم كلش تأخر ومن كملنا رجعنا عالدكتورة ومن طلعت الي يمها دخلنا احنا جيكت الاوراق وفحصت ضغطي
الدكتورة: الحمدلله التحاليل كلش ممتازة وصحتها وصحة الجنين ممتازة وما تحتاج اي شي مجرد راحة واهتمام بنفسها وباكلها
عمتي: يعني علاجات ما تحتاج
الدكتورة: لا ما تحتاج بس اذا تريدون انطيها فيتامينات تفيدها هي والطفل خصوصا اذا جان اكلها قليل او ما يغذيها بشكل كامل
عمتي: اكتبيلها بس كون مابيها تأثيرات جانبية
الدكتورة: لا بالعكس هاي كلش مفيدة للحامل وحتى لو جسمها ما احتاجها فماراح تأثر عليها نهائيا
عمتي: تمام مشكورة دكتورة
الدكتورة: العفو هلا بيكم والله يتمملها على خير
عمتي: الخير يصيبج
طلعنا من يمها وانطت الورقة عمتي لناظم گاللها شنو هاي گالت بالسيارة نحجي جيبهن وتعال گال تمام وطلعنا انتظرناه عند السيارة لحد ما اجى وركبنا
ناظم: شنو هاي يمة
عمتي: هاي فيتامينات تفيدها هي والطفل
دمعة: لو مو ماخذتها احسن
عمتي: لا مو احسن هاي تفيدج خصوصا من تبدا عندج النساة راح يتخربط اكلج كلش ومثل ما گالت الدكتورة تفيدج ما تضرج
دمعة: تمام
رجعنا للبيت اول ما دخلنا جان فارغ مابيه احد واستغربنا سما وكاضم مو من عوايدهم يغيبون دائما سما بالمطبخ وكاضم بالصالة
صعدت فوگ هدوء مو طبيعي رحت على غرفة سما لگيتها نايمة على بطنها وحاضنة الفراش من الطرف للطرف الثاني وكفشتها اكبر منها
بوية منظرها يفطس ضحك وعلى صوت ضحكتي اجى ناظم ومن شافها صار يضحك بكل صوتو حتى هي گعدت على صوتو
وراح ناظم لغرفة كاضم لگاه نايم وضربو جلاق وطلع من الغرفة وبين ما بدلت ملابسي ونزلت لحگتني سما وبلشنا بالغدا
ولان تأخر الوقت جان عندنا لانشون حمسناه وسوينا وياه تمن (اني كلش احبو) ومن اجى عمي حطينا الغدا وتغدينا
بذاك اليوم جنت كلش متوترة بسبب موضوع مصطفى وكل ما يمر الوقت يزيد توتري حتى ناظم واهلو لاحظو هالشي
فعمتي گالت لا تشتغلين شي اليوم روحي لغرفتج ارتاحي وقبل ما اصعد طلبت من ناظم احجي ويا مصطفى وفورا اتصل عليه
اخذت التيلفون وصعدت لغرفتي وگعدت احجي وياه وجان فعلا كأنو گدامي گاعد وبقيت احجي وياه لحد ما اذن العصر
گلتلو اقفلو من يمك لان خفت ادوس شي واخرب التيلفون ومن راحت صورتو عرفتو سكرو وحطيت التيلفون عالميز وگكت صليت العصر
من خلصت شفت نفسي شوية نعسانة واخذتلي غفوة لقبل اذان المغرب من گعدت جان التيلفون مو موجود عرفت ناظم اخذو
نزلت تحت تعشيت وگضيت التعليلة وياهم وبالليل نمنا بوقت اني وناظم علمود اگعد من الصبح اجهز نفسي وفعلا بالسبعة گعدت
اخذتلي دوش وطلعت تريگت وكملت وبين ما مشطت وجهزت نفسي صارت الساعة بال 10 وانتظرنا لل 11 ورحنا لبيت اهل رونق
اني ما جنت شايفة بيت اهلها نهائيا بس ناظم اندلو حسب وصف مصطفى بس من وصلنا منطقتهم ضيعنا البيت مدا نعرف وين صار
وبين مدا نمشي بين الافرع عبرنا من گدام فرع وانتبهنا انو اهلي دا ينزلون گدام بيت ورحنا عليهم مباشرة ونزلنا وياهم
دخلت داخل جانو الكل موجودين بس رونق وميزر لان رونق ما تگدر تجي وميزر ودع مصطفى من جنا عندو وما يگدر يعوف رونق لحالها
شكرا لزيارتكم عالم روايات سكيرهوم
