رواية سر الجثة المجهولة في القبر الفصل الأول بقلم ياسر عوده
-الو الشرطه، انا عاوز ابلغ عن جثه غريبه لقناها في المدفن.
-انت مين وجثه ايه؟
-انا عوض التربي، ولقيت جثه في مدفن عائله حسانين.
-خليك عندك وهنبعتلك الشرطه.
وفضلت مكاني لغايه لما وصلت الشرطه، وقابلت حضره الضابط واللى عرفت ان اسمه احمد بيه، وسألني:
-احكيلي على اللى حصل؟
-حضرتك انا شغال تربي في القريه من حوالي 20 سنه، ومسئول عن المدافن اللى موجوده كلها، والنهارده اتصل عليا صابر ابن الحاج حسانين وقالي ان امه ماتت، وطلب مني افتح المدفن واجهزه علشان هيجيبوا المرحومه امه بعد صلاه الضهر على طول، ودا اللى انا عملته، جبت المفتاح بتاع المدفن علشان افتحه واهويه، وارش مايه قدام المدفن، الشغل المعتاد بتاعي، ولما فتحت المدفن ودخلته علشان اوسع مكان للمرحومه شوفت حاجه صدمتي، شوفت ان في جثه موجوده ماعرفش عنها حاجه، وشكلها مدفونه من زمان لانها عباره عن هيكل عظمي، وانا فاكر اني مادفنتش الجثه دي.
-انت متأكد انك مادفنتهاش، يمكن دفتها وناسي؟
-يا باشا دي مدفونه بهدومها، انا شوفت هدوم على الهيكل العظمي، ازاي انا هدفن جثه بهدومها.
لما قولت كده لحضره الضابط وقتها لقيته سكت خالص، وطلب انه يدخل المدفن بنفسه ويشوف الجثه، ودخلته المدفن ودخلت معاه طبعا، وشاف اللى انا قولتله عليه، الجثه كانت لابسه هدوم عاديه مش كفن، بس مقدرناش نحدد الهدوم دي حريمي ولا رجالي، والسبب ان الهدوم دبلانه والتراب مضيع ملامحها، وطبعا ماقدرناش نلمس حاجه علشان الضابط كان محرج عليا اني المس أي حاجه في المدفن، وخرجت من المدفن انا والضابط اللى لقيته بيتصل بالاداره بتعته وبيطلب انهم يبعتوله فريق المعمل الجنائي والطب الشرعي، وطلب مني اني اتصل بصاحب المدفن علشان يجي، ودا اللى عملته واتصلت بـ صابر وطلبت منه يجي وفعلا جه، ووقتها سألني قدام صابر وقالي:
-في حد تاني معاه مفتاح المدفن غيرك؟
بصيت لـ صابر قبل ما اجاوب على الضابط وبعدها جاوبته وقولتله:
-أي مدفن موجود في المقابر ليه مفتاحين، واحد معايا، وواحد تاني مع صاحب المدفن.
وقتها الضبط بص لـ صابر وقاله:
-تعرف حاجه على الجثه الموجوده في المدفن؟
-لا يا فندم انا ماعرفش عنها حاجه، انا اصلا مستحيل افتح المدفن بتاعي، ولو احتجت افتحه لازم اقول لـ عوض يبقى معايا.
-كله هيبان في التحقيقات.
ولما وصل المعمل الجنائي والطب الشرعي وابتدوا شغلهم، وفضلت انا وصابر في المكان لغايه لما تخلص الشرطه شغلها، وسمعت رئيس فريق المعمل الجنائي وهو بيتكلم مع الضابط وبيقوله:
-للاسف احنا ماقدرناش نستخرج أي بصمات من على الجثه نهائي، واضح ان الجثه مدفونه من مده طويله وكل البصمات ممسوحه، وحتا مالقناش أي بصمات اقدام غير الترب يلانه بيدخل المدفن.
لما فتشنا الهيكل العظمي وبواقي الملابس اللى موجوده لقينا في حلق دهب وكمان خاتم دهب وغويشه، واحنا استنتجنا ان الجثه دي لوحده ست، بس طبعا الطب الشرعي هو اللى هيحدد الموضوع ده.
اما بالنسبه للملابس الموجوده فمقدرناش نحدد ان كانت ملابس حريمي ولا رجالي لانها كانت دبلانه جدا ومتقطعه.
ووقتها رد عليه الضابط وقاله:
-تمام، انا كنت متوقع انكم مش هتقدروا توصلوا لمعلومات كتير لان واضح ان الجثه مدفونه من وقت طويل، على العموم شكرا.
وبعد ما خلص كلام معاه، اتكلم مع دكتور الطب الشرعي وقاله:
-خير يا دكتور، ممكن تعرفني المعلومات اللى وصلتلها؟
-انا قدرت اوصل لمعلومات اظن انها هتبقى مفيده اوي في التحقيقات، اول حاجه الجثه لـ وحده، وهي انسه مش مدام، وكمان سنها ما بين ال 20 وال 22 سنه، اما بالنسبه لوقت الوفاه فتقريبا من 3 سنين، اما سبب الوفاه فالمجني عليها ماتت بالخنق.
-شكرا يا دكتور.
وبعدها لقيت الضابط طلب من رجالته انهم يجهزوا علشان هيخدونا ويروحوا على القسم، وفعلا خلال نصف ساعه كنا في القسم وهناك رجع الضابط يحقق معايا انا وصابر مره تانيه، وفضل يسألنا اسأله كتير، وحسيت من كلامه انه شاكك فيا انا اكتر، ولقيته بيقولي:
-اسمع يا عوض، انا مش هخبي عليك وضعك في التحقيقات صعب اوي، انت اكتر واحد مشتبه فيه بالنسبالي، وعلشان كده انا عاوز اديك فرصه تحكيلي كل حاجه، يعني لو مخبي حاجه فعاوز اقولك ان دي فرصتك، احكيل وانا هساعدك لاني بد كده مش هقدر اساعدك خالص، قولت ايه؟
وقتها جالي احساس اني انا اللى هشيل الليله كلها مش عارف ليه، معقول لو مالقوش الجاني هيشيلوهالي؟
ماكنش عندي حاجه اقولها للضابط غير اني قولتله:
-انا ماعملتش حاجه يا باشا، انا راجل بسيط وشغال الشغلانه دي من سنين، وعمري ما عملت حاجه مخالفه للقانون، وبعدين انا اللى بلغت الشرطه لما شوفت الجثه في المدفن، معقول ابلغ الشرطه عن حاجه انا عملتها، كان الافضل اركنها في أي جنب او انقلها لمدفن تاني مثلا من غير ما حد يعرف او يشوف، بس انا اللى بلغت.
سكت الضابط وقتها وهو بيحاول يقلب كلامي في دماغه، انا كنت حاسس انه مصدقني وابتدي يقتنع ببرائتي، بس للاسف وقتها حصلت حاجه عمري ما كنت اتخيلها، لما دخل العسكري مكتب الضابط وقاله:
-في وحده ست بره بتقول ان اسمها تهاني، وبتقول انها مرات عوض التربي وعاوزه تقابل حضرتك يا فدم.
اول لما سمعت اسم مراتي استغربت، ايه اللى جابها هنا، معقول خافت عليا وجايه تتحايل على الضابط علشان يسبني، مع ان بقالنا فتره بنا مشاكل، بس الحقيقه تهاني بنت اصول واكيد جايه علشان خافت عليا.
دخلت تهاني مع العسكري، ولما بصتلها لقتها ماحطتش عنيها في عيني، وكأنها مش شيفاني خالص، ولما الضابط سألها:
-ايوه يا مدام، العسكري قالي انك عاوزاني، خير؟
-انا عارفه الجثه اللى لقتوها جوه المدفن بتاعت عيله حسانين بتاعت مين.
انا اتصدمت لما سمعتها بتقول كده، ايه الكلام اللى هي بتقوله ده اصلا، وقتها الضابط اتكلم بسرعه وقالها:
-جثه مين؟
وانا اتكلمت بعديه وقولتلها:
-ايه الكلام اللى انتي بتقوليه دا يا تهاني، انتي حصل لعقلك حاجه؟
بس هي تجاهلتني تماما وماردتش عليا، مش بس كده دي ردت على ضابط الشرطه وقالتله:
-الجثه اللى لقتوها في المدفن تبقى جثه بنتي وفاء.
مش عارف اوصفلكم صدمتي لما سمعتها بتقول كده، ولقيت نفسي قومت من مكاني وانفعلت وبقولها:
-انتي اتجننتي يا تهاني، ايه الكلام اللى بتقوليه ده؟
وقتها لقيت الضابط اتكلم معايا بانفعال وقالي:
-انت تسكت خالص مش عاوز اسمع صوتك.
وبص لـ تهاني وقالها:
-اتكلمي وقولي كل اللى تعرفيه، ومش عاوزك تخافي من حد خالص، واحكيلي كل حاجه بالتفصيل.
وابتدت تهاني مراتي تحكي وقالت:
-انا وعوض مخلفين 3 اولاد وبنت، وديما كن عوض بيدلع بنتنا وفاء مع ان معظم الناس بيحبوا خلفه الولاد، وكنت ديما بقوله انت هتخيبها بدلعك ليها، بس هو كان بيقولي خليها تدلع وايه المشكله.
وفاء كملت تعلمها ودخلناها الجامعه، مع ان اخواتها الولاد ماكملوش تعلمهم وكلهم خدو دبلوم، هي كانت اشطر منهم في التعليم، وكان عوض بيقول ان وفاء هتخليه يرفع راسه في القريه كلها، وانها عملت اللى ماعملهوش اخوتها الولاد، بس انا ماكنش عاجبني التصرف اللى بيعملوا، اوقات الدلع الزياده بيكون خراب على البنت، وده اللى حصل فعلا مع وفاء واللى كنت خايفه منه حصل.
البدايه لما ابتديت الاحظ ان وفاء تصرفتها متغيره عن الاول، هي كانت بتهزر وبتضح كتير في البيت، بس بطلت تعمل كده وديما اشوفها مسهمه، واوقات كتير لما ادخل عليها الاوضه الاقيها قافله باب الاوضه عليها بالترباس، ودي حاجه ماكنتش متعوده عليها، ولما سألتها وقتها عن اللى مخليها تقفل الباب بالترباس ردت عليا وقالت:
-انا كبرت خلاص يا ماما، ولازم يبقى ليا خصوصيه، وكمان انا بنت وحيده على 3 صبيان، لازم اقفل عليا الباب علشان مافيش حد يدخل عليا الاوضه ويمكن ابقى لابسه لبس خفيف او بغير مثلا.
كان كلامها غريب وقتها وماقتنعتش بيه، بس سكت مع اني كنت اوقات بحس اني سمعاها بتتكلم مع حد في التليفون، ولما كنت بسألها لو كانت بتتكلم في التليفون كانت بترد وتقولي انها مابتتكلمش مع حد خالص واني بيتهيألي مش اكتر، وكنت بسكت ومابقولش حاجه.
في يوم جالنا عريس لـ وفاء، وماكنش حد غريب دا حمدي ابن اختي، وحمدي معروف في القريه كلها، صاحب فرنتين، وعنده عربيه دا غير الارض والبيت الكبير، واي بنت من بنات القريه تتمني تتجوزه، ولما جه واتقدم لبنتي وفاء انا فرحت اوي، وكنت انا واخوتها موافقين عليه والوحيد اللى ماكنش موافق هو عوض، ولما سألناه مش موافق ليه قال انه مش مرتاح لـ حمدي، كان كلامه مش مقنع وانا واخوات وفاء رفضنا الكلام اللى بيقوله، وحتى لما سألت وفاء نفسها قالت:
-اللى تشفوه وتوافقوا عليه، المهم ان بابا يكون موافق على الجوازه، لو هو موافق انا هبقى موافقه.
ومن يومها المشاكل ماسبتش بيتنا، انا واخوات وفاء من ناحيه، وعوض من ناحيه تانيه واللى كان مصمم ان وفاء مش هتتجوز حمدي مهما حصل، وفضلنا على الحال دا حوالي 3 شهور، لغايه لما في يوم حصلت حاجه مافيش حد فينا كان فاهم سببنا، لما صحينا من النوم لقينا ان وفاء خدت شنطه هدومها وهربت من البيت، احنا كنا هنتجنن ليه هي عملت كده، ازاي تهرب وليه تهرب اصلا، وكل اللى سابته وقتها رساله بعتتها لتليفون ابوها وكاتبه فيها سامحوني كلكم سامحني يا بابا انا كنت لازم اعمل كده.
ماكناش فاهمين حاجه وعوض وعيالي خرجوا يدوروا عليها في كل مكان، واختفي عوض لمده 3 ايام، وكنا بنتصل بيه وماكنش بيرد علينا خالص، واخيرا رجع ظهر بعد 3 ايام وقال:
-خلاص مافيش حد يدور على وفاء تاني، مافيش حد هيلقيها تاني ابدا.
لما قال الكلام ده سألته معناه ايه؟، وكمان لو لقي وفاء هي فين، وقتها رد عليا وقالي:
-انا عملت اللى يعمله أي اب في الموقف ده، خلاص انسوها هي مابلقهاش وجود في البيت بتاعنا ومافيش حد يسأل عليها.
ومن وقتها ومش عارفين هي عايشه ولا زي ما فهمنا من عوض انه قتلها، وكل اللى حصل كان من حوالي 3 سنين، ولما عرفت انكم لقيتم جثه وحده في قبر ومتعرفوش هي بتاعت مين، وقتها انا فهمت اللى حصل من 3 سنين، وفهمت ليه عوض طلب مننا اننا نسي وفاء ونعتبرها مش موجوده، عوض قتل وفاء بنتي ودفنها في المدفن بتاع عيله حسانين.
