رواية حكاية هالة الفصل الاول
هاله: السلام عليكم، أنا هاله بنت ظريف. أبويا متوفي وعايشة مع أمي وأخواتي البنات هند وهدي. وعشان ظروفنا وحشة أوي، متعلمناش ولا حتى دخلنا مدارس، بس أمي بتشتغل في مشغل للخياطة. هو مشغل مش قد كده، بس الحمدلله، أهو ادينا عايشين يوم فيه ويوم مافيش، بس عايشين سعدا، كفاية علينا حنية أمنا علينا.
هاله: بقولكم إيه، متيجوا تتعرفوا على حكايتي بدل ما انتو قاعدين فاضيين كده؟ اتفضلوا ادخلوا. هيا شقتنا مش قد المقام بس سترانا. هيا مش شقة بالمعنى المفهوم، هيا أوضة وصالة بس، وإحنا مخلينها جنة العصافير على رأي أمي.
هاله: النهارده السبت، أول الأسبوع، والساعة حاليًا 8 الصبح. أمي صحيت عشان تروح شغلها، وأنا كمان صحيت معاها عشان أعمل لها الفطار وأديها علاج السكر.
الأم: روحي يا هاله يا بنتي، ربنا يسعدك إنتي وأخواتك ويستر عرضكم يا رب.
هاله: آمين، ربنا يخليكي لينا يا ست الكل.
الأم: خدي العشرين جنيه دول، هاتي بعشرة عدس أصفر على رز، ونص قوطه مستوية، وهاتي بصلتين تلاتة واعملي كشري إسكندراني.
هاله: حاضر يا ست الكل.
الأم: بس أوعي تنسي تصحي أخواتك وتهوي الفرشة على السطح.
هاله: حاضر، روحي إنتي شغلك ومتحمليش هم حاجة، ولما ترجعي بالسلامة يكون الغدا جاهز.
الأم: حقكم عليا يا بنتي، كان نفسي أشتريلكم حتة لحمة، لكن أعمل إيه؟ المرتب يا دوبك بيكفي.
هاله: طب إيه رأيك هاكلك لحمة النهارده، وكمان لحمة ضاني!
لتضرب الأم بيدها على صدرها.
الأم: منين إن شاء الله؟
هاله: متخافيش، لما تدوقي الأكلة دي هتعرفي.
الأم: أوعي يا هاله تاخدي حاجة من حد. إحنا يا بنتي على قدنا آه، بس مبناخدش حاجة من حد، وربنا ساترها معانا الحمدلله.
هاله: عيب عليكي يا هيومه، ده أنا تربية إيدك وبنتك بفضل الله، عمري ما أعمل الغلط.
هيام: أيوه كده، ربنا يراضيني فيكم يا رب.
هاله: ويخليكي لينا يا أما يا رب.
هيام: الحق بقى أروح شغلي عشان الريسة بتخصم حتى لو خمس دقايق تأخير.
هاله: ما أنا قولتلك سيبيني أشتغل وأساعدك.
هيام: وبعدين معاكي؟ طول ما أنا عايشة مافيش شغل ليكي. إنتي بس خلي بالك من نفسك ومن أخواتك.
هاله: حاضر يا أما، مع السلامة.
هيام: الله يسلمك من كل شر يا رب، إنتي وأخواتك.
هاله: اللهم آمين.
لتتركها هيام وتخرج في طريقها إلى المشغل الذي تعمل به.
الريسة سهير: إيه يا ست هيام؟ الساعة ٩ ونص، اتأخرتي ليه؟
هيام: حقك عليا يا ريسة.
الريسة سهير: طاب ياله اقعدي على مكنتك قبل الغلس ما بيجي ويعملك حوار.
هيام: أنا عارفة ماله ومالي.
سهير: طاب اشتغلي بقى، عايزاكي تخلصي الطريحة دي النهارده.
هيام: حاضر، ربنا المعين.
أما في منزل هيام، نجد أن هاله بدأت في ترويق المنزل.
هاله: تعالوا أعرفكم عليا أنا وأخواتي. أنا هاله، سني ١٧ سنة، وأخواتي هند وهدي توأم، وأبونا الله يرحمه كان راجل على قد حاله وتوفي وهو صغير في السن. هو مات موته عادية، كان سني وقتها عشر سنين، وهند وهدي سنهم خمس سنين بس. الغريب إني كل ما أسأل أمي عن أهلنا تقولي إحنا مقطوعين من شجرة، بس أنا الصراحة مش مصدقة. بس أمي لما بتكلم معاها بتزعل مني، وأنا بخاف أزعلها عشان عندها السكر، ربنا يشفيها، أصلها بتتعب أوي في الشغل.
هاله: يا الله، ده أنا رغايه أوي وأمي قربت تيجي من الشغل. أجهز الأكل بقى، بس أصحي أخواتي الأول. بت يا هند، يا هدي، اصحوا بقى، ده إنتوا خم نوم!
هدي: هنصحى نعمل إيه؟
هاله: اقعدوا معايا نتفرج على التلفزيون.
هند: تلفزيون إيه؟ ده ده مفيهوش غير تلت قنوات. متجيبولنا دش!
هاله: خلي عندك دم، ده إحنا يا دوبك عايشين.
هدي: طاب أنا جعانة.
هاله: في شويت فول عليهم طعميتين، كلوهم على ما أعمل الغدا.
هدي: نفسي أفطر جبنة رومي وفينو سخن كده.
هند: احلمي يا أختي، احلمي.
هاله: احمدوا ربنا، غيرنا مش لاقي اللقمة الحاف.
هند: طاب ما في ناس غيرنا بيفطروا كباب.
هاله: ملناش دعوة بحد، قولوا الحمدلله.
هاله: عاجبكم كده؟ قعدت أرغي معاكم ونسيت أشتري طلبات الغدا.
هدي: يعني هتشتري اللحمة؟
هاله: وبعدين معاكي؟
هند: خلاص روحي وأنا هنكمل ترويق.
لترتدي هاله فستانها الوحيد وتخرج إلى الشارع، لتصل إلى دكان الخاله أم عبده.
هاله: إزيك يا خالتي أم عبده؟
أم عبده: الحمدلله.
هاله: عايزة بعشرة جنيه عدس أصفر على رز.
أم عبده: من عيني.
لتزن لها أم عبده.
أم عبده: خدي يا حبيبتي.
هاله: بس دول كتير.
أم عبده: ما هم بالعشرة جنيه.
هاله: شكرًا يا خالتي.
ثم تذهب إلى بائع الخضار.
هاله: عايزة ربع بصل، ونص قوطه مستوية، ورأس توم، وبتنجانة رومي، وقرنين فلفل.
البائع: خدي يا قمر، بسبعة جنيه.
هاله: شكرًا.
لتحسب هاله حسابها.
هاله: كده فاضل تلاتة جنيه. أجيب بيهم إيه؟ أجيب تمر سايب وأعمل عصير لأمي وأخواتي، والحمدلله عندنا سكر التموين.
وبعد أن انتهت هاله من شراء لوازمها، ها هي تصنع الغداء، ويمر الوقت، والساعة الآن الخامسة، موعد رجوع هيام من العمل.
هيام: السلام عليكم.
البنات: وعليكم السلام.
هاله: ادخلي غيري يا أما، على ما أحط الغدا على الطبليه.
لتدخل هيام الغرفة لتستبدل ملابسها، أما هاله فكانت قد وضعت الغداء على الطبليه.
هيام: الله، إيه الروائح الحلوه دي؟ وإيه اللي في الطبق ده؟ شكله غريب.
هاله: ده بتنجان مشوي وعملتله طشة توم بالزيت، وطعمه زي اللحمة الصراحة. هو بيتعمل بالسمن البلدي، بس مافيش سمنة، والزيت مقصرش. وكمان عملتلكوا تمر هندي.
هيام: تسلم إيدك.
ليجلسوا جميعهم يتناولون وجبة الغداء.
هيام: الحمدلله، تسلم إيدك يا هاله.
هاله: بالف هنا.
هيام: أنا هدخل أريح شوية، أحسن ضهري واجعني.
هاله: ألف سلامة عليكي.
هند: عايزة حاجة حلوة يا أما.
هيام: بصي، خدي الخمسة جنيه دول وهاتي حاجة ليكي إنتي وأخواتك.
هدي: يا أمي، دي متجيبش حاجة خالص.
هاله: روحي هاتي درة فشار، وأنا أعملكم فشار، وبطلوا رغي وخلو أمكم ترتاح.
وده كان يوم من أيام حياتي، لكن لسه اللي جاي كتير، وكله مفاجآت.
هاله: السلام عليكم، ده يوم تاني من حياتي. صحيت طبعًا من النوم، فطرت أمي وراحت شغلها، بس قبل ما تروح الشغل ادتني ٥٠ جنيه وقالتلي:
هيام: اسمعي يا هاله، هتروحي يا بنتي تشتري أربع أجنحة فراخ وملوخية ناشفة وعيش، واعملي يا أختي لقمة لأخواتك. أنا عارفة إني مقصرة معاكم، بس يعلم ربنا والله لو احتكم ما أتأخر أبدًا.
هاله: ليه بتقولي كده يا أما؟ ده إنتي بتشقي علينا، ربنا يخليكي لينا. إحنا أهم حاجة عندنا، أنا وأخواتي، إنك معانا ومنورة حياتنا.
قامت أمي وقالتلي:
هيام: ربنا يستر عرضكم يا بنتي. ياله بقى أنا ماشية.
وبعد ما أمي راحت شغلها، خرجت أجيب الطلبات. وأنا رايحة أشتري الأجنحة، قابلت البت منال جارتنا. كان بقالي كتير مشوفتهاش، بس إيه ده؟ دي اتغيرت أوي! تكونش مش هيا؟ لا، إزاي؟ وربنا هيا!
هاله: بت يا منال، عاملة إيه؟
لقيتها بتكلم نفسها وبتشاورلي. وربكم والحق أنا قولت البت اتجننت! لكن إيه يا إخواتي؟ دي البت بتشتري ديك رومي!
خالت أم دولي: الديك خلص خلاص يا منال.
والبت مش معبراها وبتكلم نفسها، وفجأة لقيتها بتقول:
منال: إيه يا خالتي؟ كنت بكلم في التليفون.
قومت قولتلها:
هاله: تليفون إيه؟ إنتي كنتي بتكلمي نفسك!
راحت قالتلي:
منال: يا عبيطة، دي سماعة في ودني من غير سلك، اسمها مش عارفة إيه... بورص.
وبعدين بصتلي وقالت:
منال: إزيك يا هاله؟
هاله: لسه واخدة بالك مني؟ الحمدلله
منال: الحمدلله.
قامت مطلعة رزمة فلوس، وراحت محاسبة خالت أم دولي.
منال: خلي الباقي عشانك.
وراحت قالتلي:
منال: سلام يا هاله، أبقى خلينا نشوفك.
