رواية جريمة في الكبارية الفصل الأول بقلم ياسر عوده
-مع الفقره اللى كل الحاضرين مستنينها، ايوه هي اللى انتم بتفكروا فيها من اول الليل، جه اخيرا وقتها، الكل يستعد لخروج صاروخ الكره الارضيه، اجمد امراءه في مصر، معاكم الراقصه العالميه نوران.
ودا بالظبط اللى قاله مقدم البرامج على المسرح، وانا ماقصدش بكلمه المسرح دا بتاع المسرحيات والكلام ده، لا احنا هنا مالناش دعوه بالكلام ده خالص، احنا هنا عندنا مسرح خاص بينا، وطبعا اقصد الكباريه اللى انا شغال فيه.
الاول اعرفكم بنفسي، انا مسعد، وشغال في كباريه السهره الحمرا، ومافيش حد يعلق على اسم الكباريه، لان دي حاجه عاديه ان اسمه يبقى بالشكل ده، اكيد يعني مش هنسميه قصر الثقافه.
المهم لو حابين تعرفوا انا شغال ايه في الكباريه فحقيقي مش هعرف اقولكم شغال ايه، لا مش اللى جه في عقلكم، انا راجل محترم، انا بس اقصد اني شغال شغلانت كتير اوي، زي اني بتفق مع الفنانين والفنانات يجوا الكباريه يعملوا فقرات، وكمان بحل المشاكل الصغيره اللى بتحصل، فممكن تقولوا كده انا ايد الاستاذ منصور مدير وصاحب الكباريه.
وهقولكم على المشكله اللى حصلت لما مقدم البرامج علشان تطلع الرقاصه نوران ودي اشهر رقاصه عندنا، وبلاش حد يقول عليها رقاصه قدامه علشان بتدايق، عاوزانا نقول عليها فنانه استعراضيه، ولما قدمها مقدم البرامج او ممكن نقول عليه بالبلدي النباطشي، هي ماطلعتش على المسرح وفهمت وقتها ان اكيد في مشكله، احنا كل شهر متعودين ان نوران لازم تعمل مشاكل، اما مش عاجبها معاد فقرتها، او عاوزه تزود اجرها اللى مكتوب في العقد، فطبعا كنت لازم اتحرك واروحلها على اوضتها واشوف هي عاوزه ايه، وكالعاده هطاوعها لغايه لما تطلع على المسرح وبعد الفقره نروح للاستاذ منصور وهو يتصرف معاها يزودها يتخانق معاه يضحك عليها هو حر، ولما روحت للاوضه بتاعتها خبطت على الباب، بس هي ماردتش خالص، ولما خبطت اكتر من مره وماردتش شكيت انها مش في الاوضه، علشان كده فتحت باب الاوضه علشان اشوفها جوه ولا لا، ولما فتحت الباب ودخلت اتصدمت، اصل انا شوفت نوران وهي على الارض وغرقانه في دمها.
وقتها طلعت ازعق واستنجد بأي حد، وروحت على اوضه الاستاذ منصور علشان ابلغه بالمصيبه اللى حصلت، ولما دخلت عليه المكتب، وقتها شوفته هو وشوشو في وضع مش مناسب خالص، وشوشو دي تبقى رقاصه بردوا عندنا في الكباريه، بس مش زي نوران خالص، نوران حاجه تانيه وليها جمهورها اما شوشو رقاصه كويسه ممكن نقول مالهاش قبول وجمهور كبير.
واول لما شافني مدير الكباريه لما دخلت عليه من غير ما اخبط، وطبعا بسبب الوضع اللى هما فيه، وقتها قالي وهو متعصب:
-انت ازاي يا حيوان انت تدخل عليا المكتب من غير ما تخبط وتستأذن؟
طبعا مش عاوزكم تستغربوا انه شتمني وغلط فيا، مهو في الاخر صاحب كباريه مش راجل محترم اوي ولا حاجه، المهم اني عملت نفسي ماسمعتهوش وقولتله:
-الحق يا منصور بيه، نوران اتقتلت.
اول لما قولتله كده اتنفض من مكانه وزعق وقال:
-ايه اللى انت بتقوله ده، يعني ايه اتقتلت؟
-زي ما بقولك كده، انا روحت استعجلها لما جه وقت فقرتها ومطلعتش على المسرح، ولما روحت ودخلت اوضتها لقتها على الارض غرقانه في دمها.
وقتها لقيته جري بسرعه على اوضه نوران، ولما دخل ولقى ان كلامي مظبوط، وقتها قالي:
-كلم الشرطه بسرعه يا مسعد، وقلهم على اللى حصل.
وفعلا كلمت الشرطه، ومن وقتها الدنيا اتقلبت وماتعدلتش تاني، علشان اللى حصل في تحقيقات الشرطه كل حاجه اتكشفت، واللى مخبي سر طلعه، وعلشان كل واحد من اللى كان موجود في الكباريه وقتها كان كل اللى يهمه ان تهمه قتل نوران مايلبسهاش، وهتفهموا انا اقصد ايه لما تسمعوا اللى حصل.
طبعا بمجرد ان الشرطه وصلت طلبت ان ابواب الكباريه تتقفل ومافيش حد يخرج الا بأذنهم، وبعد شويه جه وكيل النيابه اللى هيحقق مع كل الموجدين، واول شخص هو اتكلم معاه كان انا وقالي:
-انت اول واحد شوفت المجني عليها صح؟
-ايوه يا فندم، انا كنت رايحلها الاوضه بتاعتها علشان استعجلها تطلع المسرح.
-تمام، قولي الكباريه فيه كاميرات طبعا؟
-ايوه بس مش في كل الاماكن، في قدام الكباريه وكمان على المسرح وفي الصاله، انما الغرف الداخليه مافيش أي كاميرات.
-انت تعرف المجني عليها من امتي؟
-من ساعه لما هي جت الكباريه يا فندم.
-حلو اوي، تقد تقولي حكايه نورا عبد المقصود؟
-حضرتك تقصد نوران؟
-ايوه هي، ايه حكايتها بالظبط.
-حضرتك نوران جت تشتغل في الكباريه من حوالي اربع سنين بالظبط، كانت وقتها مجرد بنت عاديه، وكانت جايه تشتغل ركلام، والركلام عندنا هما البنات اللى بتقعد على التربيزه مع الزباين علشان يفتحولها ازايز الخمره، طبعا علشان تزود من فتوره الزبون.
-والركلام عندكم بيطلعوا مع الزباين لشققهم الخاصه.
لما وكيل النيابه سألني السؤال ده اتبرجلت، اصل انا لو قولتله اه ساعتها ممكن يتهمني بتسير الدعاره، ولو قولتله لا مش هيصدق وقتها وممكن يفتكر اني بداري على حاجه، وبعدها وقبل ما اتكلم لقيته بيقولي:
-اسع يا مسعد، بصراحه كده انا مش هخبي عليك، انت المتهم الاول عندي في جريمه القتل، ويمكن المتهم الوحيد لان التحقيقات والتحريات اللى جمعتها الشرطه بتأكد ان كل واحد من اللى شغالين عندوا حجه غياب قويه، منهم اللى الكاميرات مصوراهم في مكان تاني، ومنهم اللى جابوا شهود انهم كانوا معاهم، يعني انت الوحيد اللى مافيش شاهد ليك او دليل يثبت انك ماكنتش في اوضه المجني عليها وقت وقوع الجريمه، وازيدك من الشعر بيت، معظم اللى استجوبتهم الشرطه قالوا ان كان في خلاف بينك انت والمجني عليها والسبب انك كنت عاوز تتجوزها عرفي وهي رفضتك، وفي اكتر من شاهد على الموضوع ده، وعلشان كده انا حبيت انبهك، لو حاولت تخبي حاجه عليا او تكدب وقتها، انا هوجهلك تهمه قتل مع سبق الاصرار والترصد، ودي حكومتها اعدام، ففكر كويس قبل ما تقرر أي قرار غلط.
لما وكيل النيابه قالي الكلام ده، وقتها حسيت اني مابقتش قادر اتمالك اعصابي، واستأذنته وقتها وقولتله:
-حضرتك ممكن اشرب مايه؟
-اوي اوي طبعا.
وطلب من واحد من العساكر يجبليك كوبايه مايه، ولما شربت وقتها قررت اني اقول كل حاجه، مش مهم لو اتهموني بأي تهمه المهم ماتبقاش تهمه بجريمه قتل، ووقتها انا قولتله:
-انا هقول لحضرتك كل حاجه يا فندم بصراحه، الركلام اللى عندنا بيطلعوا مع الزباين فعلا، بيروحوا شققهم او بيوتهم الخاصه، ومش بس كده يا فندم كل ده بيحصل بعلم اداره الكباريه، ومنصور بيه صاحب الكباريه بياخد نسبه التلت من أي ركلام بتاخد زبون من الكباريه، واللى ترفض تدفع او تحاول تسرق ويكشفها، وقتها بتضرب علقه موت وبتتمنع من دخول الكباريه مره تانيه.
نوران لما جت الكباريه ماكنتش جايه لوحدها، كانت جايه مع واحد اسمه سيد محفوظ.
-مين سيد محفوظ وشغال ايه؟
-دا بتاع كل حاجه، ممكن حضرتك تقول عليه سمسار، هو اللى بيوردلنا الركلام، وطبعا بياخد فلوس على الموضوع ده، بس احيانا لما بيجي وحده من الركلام وتكون اول مره شغاله الشغلانه دي، وقتها بيبقى ليه حساب خاص بيها، علشان طبعا البنات اللى شغالين الشغلانه دي من فتره اشكلهم بتتعرف والزباين اكيد قبلوهم في كباريه تاني وبيبقى وشهم محروق، اما بقى الوجوه الجديده دوول حاجه تانيه وديما الزبون بيحب الوجوه الجديده.
وفي يوم دخل علينا سيد محفوظ ومعاه نوران، من اول نظره تشوفها تعرف انها وجه جديد خالص، وعرفنا وقتها انها من الاسكندريه، بس مافيش حد كان عارف ايه حكايتها، بس كان واضح ان حكايتها حكايه، هي كانت جميله اوي واي راجل شافها كانت على طول بتعجبه، واول لما شافها منصور بيه قال انها ماتنفعش ركلام خالص، وقال انه لازم يستغلها صح، وعلشان كده قال انها هتشتغل رقاصه، وقتها هتكون مكسب اكبر للكباريه، ودا اللى حصل يا فندم، منصور جبلها حد يعلمها الرقص، وخلال شهر واحد نزلت على المسرح، والحقيقه انها من وقتها وهي مولعه الدنيا.
ـــــــــــــــــــــــــــــــــــــــــــــــــــــــــ
لغايه هنا وكيل النيابه أجل التحقيق معايا، وطلب سيد محفوظ علشان يحقق معاه لما عرف انه كان موجود في الصاله وقت الجريمه، وفعلا حقق وكيل النيابه معاه وسأله:
-انت اول واحد جبت المجني عليها تشتغل هنا في الكباريه، قولي انت عرفتها ازاي وامتي؟
-عرفتها في اسكندريه، سافرت لـ اسكندريه علشان السوق كان محتاج وجه جديده.
-سوق ايه؟
-سوق الركلام يا فندم، اصل معظم بنات الركلام كانوا خلاص وشوشهم اتحرقت وباقوا معروفين، وعلشان تجيب وجوه جديده قدامك 3 اماكن، اول مكان المناطق الشعبيه، ودي فيها سماسره كتير، يعني كل منطقه وفيها سمسار او اتنين بينقي الستات او البنات اللى ممكن تشتغل ركلام، والمنطقه التانيه الارياف، ودي منطقه خطر اصلك علشان تجيب وحده من الارياف تشتغل الشغلانه دي، ماتعرفش وقتها ايه اللى ممكن يحصلك لو اهلها عرفوا، وكمان البنت من الارياف ليها لهجه معينه بيبقى صعب انك تعلمها اللهجه بتاعتنا، وبتحتاج شغل كتير غير المخاطره، وعلشان كده روحت للمنطقه الاخيره، المدن الساحليه، واحسنهم طبعا عروسه البحر المتوسط الاسكندريه، وسافرت على هناك، وطبعا انك تقابل وحده عندها استعداد تخالط الرجاله والكلام ده مش حاجه سهله خالص، بتحتاج منك مجهود ووقت وصبر، وعلشان اصطاد نورا من الاسكندريه الموضوع خد مني حوالي 3 شهور.
الحقيقه ان الحظ خدمني اوي في موضوع نورا، اصلي لما شوفتها وعيني وقعت عليها، وشوفت جمالها اللى ماكنش عادي او طبيعي ابدا، وقتها قولت هي دي، ووقتها شوفتها في سوق كانت بتشتري شويه طلبات، وفضلت ماشي وراها اعاينها، ولقتها بصراحه عز الطلب، بس اتصدمت لما كان في واحد من البياعين بيعاكسها، اصلي شوفت حاجه غير الصوره اللى كنت رسمهالها في خيالي، مسكت البياع وضربته بالشبش لامؤخذه يعني، وعرفت وقتها ان هي مش هتكون سهله خالص، وفكرت اصرف نظر عنها بس قولت امشي وراها اعرف هي ساكنه فين، ولما روحت وعرفت مكان بيتها سألت عنها، وعرفت معلومه مهمه خلتني اتأكد ان لسه في امل، المعلومه دي ان نوران كانت لسه متطلقه من شهرين بس، وان جوازها يادوب مكملش سنتين، ووقتها قولت اني لازم اعرف عنها كل حاجه، وفضلت اسبوع كامل اعمل عليها تحريات زي الشرطه بالظبط، لغايه لما قدرت اعرف كل حاجه عنها.
