رواية جثة صوفيا الفصل الأول بقلم محمود الأمين
للكبار فقط وحدثت بالفعل
البلاغ المرة دي كان جاي من زوج.. واحد متجوز واحدة أجنبية اتعرف عليها في الغردقة، سافر معاها بلدها، والجواز حصل هناك بالتحديد، وأخد الجنسية، وبعدها رجع بيها تاني على مصر واقنعها إنها تعيش معاه في بيت العيلة..
في البداية صوفيا، واللي هي مرات الراجل ده، كانت حابة الموضوع وشايفة إن العيشة وسط عيلة مصرية حاجة حلوة، ولكنها اتصدمت بالواقع المصري..
وبعد حوالي سنة تقريبًا، بيوصل بلاغ من الزوج، واللي كان اسمه صلاح التهامي، إنه رجع من شغله لقى مراته واقعة على الأرض وميتة.
ولكن اللي لاحظه إنها كانت لابسة روب فقط، وواضح إنها كانت لسه خارجة من الحمام، بس لما قرب شاف على رقبتها آثار خنق، وعرف إن مراته اتقتلت، وإن دي مش موتة طبيعية، ومش بس كده، ده لقى إن الدولاب مفتوح، وفي سرقة حصلت..
واتحركت رجال الشرطة فور استلام البلاغ على مسرح الجريمة عشان يبدأ التحقيق في جريمة مليانة تفاصيل وكواليس صعبة وغريبة.
....
#جثة_صوفيا
#الجزء_الأول
لما وصلنا لقينا نفسنا قدام عمارة مكونة من ست أدوار، فيها شقق ساكنة وشقق لأ، ولكن العمارة دي فيها العيلة كلها، عيلة التهامي..
والجريمة اللي حصلت حصلت في الدور الرابع، وأول ما وصلنا للشقة كانت العيلة كلها متجمعة، اللي كانت بتعيط واللي كان واقف مصدوم مش مصدق نفسه..
فطلبت منهم يوسعوا عشان نشوف شغلنا. الجثة كانت على الأرض لست في التلاتينات من عمرها، كانت لابسة روب حمام، وواضح إنها لسه كانت بتاخد دش.. آثار الخنق كانت واضحة على رقبتها، وواضح إن الخنق حصل بحاجة صلبة أشبه بسلك، وده اللي سبب جروح بسيطة في الرقبة، بجانب الآثار القوية للخنق.
ولقيت جوزها، الأستاذ صلاح، واللي بلغ عن الجريمة، واقف وباين عليه الصدمة. قربت منه، فشاور على الدولاب وقال إن اللي عمل كده سرق كل الفلوس والمجوهرات اللي كانت جواه.
وفي أغلب القضايا دي، الزوج بيكون هو القاتل.. بيقتل لسبب هو أعلم بيه، وبعدين يبلغ على أساس إنه دخل واتِفاجئ إن مراته اتقتلت، ولكن عشان ما أستبقش الأحداث، خلينا نشوف الجريمة دي مخبية إيه؟!
بصيت للأستاذ صلاح وقولتله:
_ حضرتك بتشك في حد معين إنه هو اللي ارتكب الجريمة دي؟!
= لا يا فندم.. هشك في مين؟ إحنا بيت عيلة، وكلنا بنتعامل كويس مع بعض. آه، صوفيا مش من هنا وأجنبية، ولكن إحنا عايشين هنا بقالنا سنة، وصوفيا عمرها ما اشتكت من أهلي، بالعكس، دي كانت حابة العيشة في مصر أكتر من عيشتها في أوروبا.
_ واضح إن اللي قتل كان مخطط كويس يا أستاذ صلاح. ده مش واحد داخل البيت وخلاص، ده واحد عارف إن الدولاب فيه فلوس ومجوهرات، وعشان كده خلص على مراتك وسرق اللي في الدولاب، وده اللي بيخليني أرجح إن القاتل من جوه البيت.. بيت العيلة.. يعني اللي عملها مش غريب.
...
بمجرد ما خلصت كلامي، كلهم بدأوا يبصوا لبعض، ولكن في الوقت ده كان وصل وكيل النيابة، منصور عبد الحميد، وفريق من الطب الشرعي والمعمل الجنائي لفحص الجثة ومسرح الجريمة..
والمعروف عن منصور عبد الحميد، وكيل النيابة، إنه شخص شديد الملاحظة، وده اللي اتأكدت منه لما اتكلم وقال:
_ وأنا داخل العمارة لاحظت إن في كاميرات. طبعًا هنحتاج نراجعها عشان نعرف إذا كان القاتل من جوه ولا من بره العمارة، بجانب إني لاحظت إن في سلم جانبي، والسلم ده بيوصل لباب خلفي للعمارة، والنقطة دي لازم ناخد بالنا منها كويس.
= تمام يا باشا.
_ ده الزوج اللي بلغ؟!
= أيوه يا باشا، أستاذ صلاح التهامي، والمجني عليها اسمها صوفيا. هي مش مصرية، القاتل خنقها بحاجة صلبة، وده سبب الجروح اللي في رقبتها، ده غير إنه سرق فلوس ومجوهرات من الدولاب.
_ كده القاتل بنسبة كبيرة من جوه العمارة.. أصل إشمعنا الشقة دي بالذات؟ أكيد كان عارف إن الدولاب فيه فلوس ومجوهرات.
= وده نفس الكلام اللي أنا قولته، حضرتك.
....
ولكن وإحنا بنتكلم، فاجأنا دكتور الطب الشرعي بكلام كان صدمة بالنسبة لكل اللي واقفين، لما اتكلم وقال:
_ الجريمة تمت باستخدام سلك رفيع وصلب، وواضح إن كان في مقاومة من المجني عليها، وده باين من آثار الجروح اللي على إيدها، ولكن في حاجة أنا شاكك فيها، وبنسبة كبيرة حصلت.. المجني عليها اتعرضت للاعتداء.
= أنت متأكد يا دكتور من الكلام ده؟!
_ بنسبة 90%.
....
أول ما الدكتور خلص كلامه، صلاح بص للعيلة كلها اللي كانت واقفة، كان مبرق ومصدوم من اللي قاله الدكتور..
الموضوع مش سهل، وصدمه كبيرة إن في واحد من العيلة كان عينه على مرات صلاح، وقرر إنه يعمل معاها الحاجة دي، وبعدين يقتلها ويسرق الدولاب..
وعشان أخفف من الأجواء اللي توترت حواليا، رديت على الدكتور وقولتله:
= وجايز يا دكتور يكون مجرد استنتاج، وإن شاء الله يكون كده.
_ أتمنى فعلًا يكون مجرد استنتاج ويكون غلط.
..
وكيل النيابة بدأ يتمشى في الشقة، وبعدها رجع واتكلم وقال:
_ زي ما قولت، اللي عمل كده من جوه العمارة.. مفيش آثار اقتحام، يعني معنى كده إن يا إما الباب كان مفتوح، أو صوفيا هي اللي فتحت للقاتل بنفسها.. هي مراتك يا أستاذ صلاح كانت بتسمح لأي حد يدخل شقتها ولا كانت منعزلة عن العيلة؟
= صوفيا كانت مختلطة أوي بالعيلة، وكانت بتسمح لأي حد منهم يدخل الشقة عادي.
_ يعني في خلال السنة دي مفيش أي مشاكل حصلت يا أستاذ صلاح؟ معقول الحياة كانت مثالية للدرجة دي؟
= لا، أكيد طبعًا حصل مشاكل.. ومشاكل كبيرة كمان، بس في النهاية كانت كلها بتتحل، والأوضاع بترجع تهدى.
_ طيب، والمشاكل دي كانت تخص صوفيا ولا مشاكلك أنت مع أهلك؟!
= في كده وفي كده.. بس أنا مش عارف أركز، حضرتك أكيد مقدر وعارف أنا دلوقتي حاسس بإيه.. أنا مراتي اتقتلت، والفحص بيقول إنها بنسبة كبيرة اتعرضت لاعتداء، والحاجات اللي كانت في الدولاب اتسرقت.. وحضرتك بتقول إن القاتل من جوه العمارة، يعني القاتل واحد من عيلتي.. واحد من عيلتي عينه كانت على مراتي وقرر يعمل كده فيها.. أنا لو عرفت هو مين، قسمًا بالله لأقتله ومش هستنى الحكومة تجيب حقي.
_ طيب اهدى يا أستاذ صلاح عشان نعرف نتكلم بالعقل.
....
في الوقت ده، وكيل النيابة سأل على الكاميرات، وعرفنا إنها في الشقة اللي في الدور الأرضي، واللي ساكن فيها الحاج التهامي، كبير العيلة..
ولكن عرفنا إن الراجل مصاب بالسرطان، والعياذ بالله، ربنا يشفيه..
نزلنا الشقة اللي تحت عشان نراجع ونعرف: هل في حد غريب دخل العمارة النهارده، ولا كل اللي دخل من العيلة؟
وطبعًا في الوقت ده، رجال الطب الشرعي والمعمل الجنائي كانوا خلصوا شغلهم، واتنقلت الجثة للمشرحة بعد رفع البصمات وجمع الأحراز..
وبدأنا أنا ووكيل النيابة نراجع تسجيلات الكاميرات، وكانت بحضور الأستاذ صلاح وأخوه الأستاذ مدحت..
وبعد ساعتين مراجعة، الوحيد اللي دخل من العمارة وكان غريب، كان عامل دليفري تابع لمحل بيتزا، واللي بيطلب البيتزا دي هو عمر، ابن مدحت، وشقة مدحت في نفس الدور اللي فيه شقة صلاح..
هل ممكن يكون عامل الدليفري لاحظ إن الباب مفتوح، فقرر يدخل يسرق، ولما شاف صوفيا حليت في عينيه وقرر إنه يعمل كده فيها ويقتلها؟ ولا اللي عملها من العيلة نفسها؟
...
المهم إننا بعد ما خلصنا، كل واحد فينا رجع على مكتبه عشان نبدأ التحريات عن عيلة التهامي وعن المجني عليها صوفيا..
وفي نفس الوقت كنت منتظر تقرير الطب الشرعي، واللي هيوضح حاجات كتير..
وبعد 48 ساعة، اتصل بيا وكيل النيابة عشان يبلغني بأغرب حاجة سمعتها في أي جريمة أنا حققت فيها.
_ تقرير الطب الشرعي طلع... ومش هتصدق دكتور الطب الشرعي عرف إيه أثناء التشريح؟!
= عرف إيه يا باشا؟!
_ في اعتداء فعلًا حصل، زي ما الدكتور توقع، ولكن الكارثة مش هنا.. الكارثة إن العلاقة دي حصلت بعد ما صوفيا اتقتلت، يعني القاتل عمل العلاقة مع جثة صوفيا...
لكن..
