رواية نهر الحب الفصل الاول
تسللت اشعة الشمس من شباك غرفتها لتداعب وجه منى البرئ وتدعوها لبدء يوم جديد، فتستجيب للنداء وتفتح عينيها محدثة نفسها
مني : يوم زي كل يوم، حياة مفيهاش جديد، لكن النهاردة يوم مختلف، النهاردة عيد ميلادي حبيبي وقرة عيني.
تنهض من سريرها ثم ترتدي حذائها وتنادي على الخدم
مني : رقية . إبراهيم
تستجيب رقية للنداء وتأتي إليها وعلى وجهها ابتسامة هادئة
رقية : تحت أمرك يا منى هانم.
مني: تجهيزات الحفلة بتاعة خالد خلصت ولا لسة؟
رقية : فاضل حاجات بسيطة إبراهيم راح يجيبها، متقلقيش يا مني هانم.
مني: تمام رقية، خالد صحي ؟.
رقية : لا لسه يا هانم
مني: أنا هصحية بنفسي، روحي إنتي كملي شغلك.
تتجه مني لغرفة خالد وتدخل لتجده نائم ببراءة في سريره .
مني: اصحي يا حبيبي بطل كسل بقي.
خالد بكسل : صباح الخير يا ماما
مني تقبله : كل سنة وانت طيب يا حبيبي
خالد: وانتي طيبة يا ماما.فين هديتي بقي
مني: طب قوم من السرير الاول
خالد بضيق : خلاص يا ماما انا قمت اهو
مني : طب متزعلش يا سيدى هديتك اهي العجلة الي كان نفسك فيها
خالد يحضن مني : شكرا يا ماما
خالد: هو بابا مش هيحضر حفلة عيد ميلادي
مني: اكيد هيحضر يا حبيبي
خالد : اكيد مش هيحضر الحفلة ولا هيجيب لي هدية اصلا تلاقيه مش فاكر ان النهاردة عيد ميلادي
مني: لا يا خالد بابا فاكر عيد ميلادك، هو بس مشغول شوية . حبيبي انت عارف ان بابا محامي كبير وشغله كتير واحنا لازم نستحمل.
خالد ماشي يا ماما
مني : رقية يا رقية
رقية: نعم يا هانم
مني: خدي خالد، جهزي له الفطار وبعد ما يفطر خليه يلبس زي المدرسة.
رقية : حاضر.
تمسك منى بهاتفها المحمول وتطلب زوجها
مني: طاهر
طاهر بجفاء :صباح الخير يا مني. في حاجة مهمة
مني: كنت عايزة افكرك بعيد ميلاد خالد الحفلة النهاردة متتأخرش من فضلك
طاهر : أسف يا منى،أنا مشغول عشان الانتخابات قربت واكيد مش هعرف احضر
مني: يا طاهر الولد بيسأل عليك وكده نفسيته هتتأثر
طاهر: خلاص لما اجي هصالحه واجيبله هدية معايا هتعجبه اوي
مني باقتضاب: ماشي يا طاهر
طاهر: سلام دلوقتي عشان عندي اجتماع مهم
******
تشرب منى كوب من الشاي وتنظر دامعة العينين إلى النيل مستدعيًة ذكرياتها
تدخل مني مكتب أخيها ممدوح فتجده يجلس منهمكًا في العمل، يتفاجئ ممدوح بوجودها ويزفر مداعبًا إياها قائلاً: ايه الي جابك ؟!!
مني: يا سلام على الذوق يا اخي بدل ما تقولي نورتي المكتب، تشربي ايه .
ممدوح مبتسمًا: طيب، نورتي المكتب تشربي ايه.
مني : ولا اي حاجة . انا جيت اخدك عشان عارفة انك بتنسي نفسك في الشغل ولا انت نسيت انك عريس وكتب كتابك النهاردة وورانا مية حاجة لسه.
ممدوح: عارف يا ستي ومش ناسي، دقائق هسلم الشغل وأجيلك نروح سوا.
منى: طيب بس بسرعة متتأخرش.
بعد قليل يدخل رجل يبدو عليه الهيبة والوقار ببدلة سوداء وسيم لدرجة كبيرة ذو جسم رياضي وهيئة جذابة، شعره اسود يتخلله شعيرات بيضاء تزيد من وسامته.
طاهر: حضرتك ليكي قضية هنا
مني بتردد: لا حضرتك أنا أخت محامي هنا
طاهر : اممم..أكيد أخت ممدوح
مني بتعجب : تمام . بس عرفت منين؟
طاهر : شوية ملامح مشتركة بينكم، بس انت احلى بكتير منه طبعا
مني بخجل وابتسامة هادئة: شكرا لحضرتك
يعود ممدوح للمكتب ويقاطع حديثهم قائلًا: أستاذ طاهر انا اسف دي مني اختي جاية تاخدني عشان كتب الكتاب حضرتك عارف انه النهاردة
طاهر ينظر لمني :اسف علي ايه انا سعيد جدا اني اتعرفت عليها
مني بتردد: أنا الأسعد
طاهر مبتسمًا لمني : عن اذنكم
******
في حفل صغير يعقد ممدوح قرانه علي نهي ويحضر الحفل عدد من الاصدقاء وقليل من الاقارب
يقترب الحفل من الإنتهاء ويغادر الحفل غالبية الحضور.
ينفرد ممدوح بمنى محدثًا إياها بسرور: مبروك يا منى جالك عريس
مني: عريس ليا انا
ممدوح: اه مستغربة ليه هو انتي مش بنت وليكي يوم وتتجوزي
تنظر منى لأخيها نظرة ذات مغزى وتصمت.
ممدوح:بصي يا حبيبتي فكرى وبراحتك أنا عمري ما هغصبك علي حاجة.
مني: طيب ممكن اعرف مين العريس
ممدوح: طاهر الدندراوي
مني بدهشة: طاهر !!!
