رواية من قلب العتيك الفصل الأول بقلم جمانه السعيدي
علي اني اسمي علي عائلتي تتكون من خمس ولد وخمس بنات وامي وابوي
يعني احنا ١٢ نفر
اني مواليد ٨٢ اني ترتيبي الثالث قبلي ولد وثنيين بنات اختي الجبيره حنان وبعدها جنان وبعدها اخوي
كرار ومن بعده اني وبعدي صلاح بعدين
ساره زهراء وحوراء وامجد وحسون
بيتنا ملك حالته الماديه متوسطه
ابوي شرطي وامي خياطه
العيشه دابره عايشين على البساطه
بيت بسيط يلمنا وخلاص
تقريبا ماعدنا اثاث بلبيت غير طباخ وكاونتر
وبوفيه تلم ملابسنا وعليها نضيده وتلفزيون
هاي كل ملكيتنا
كلنا ما مكملين دراسه كلنا ولا واحد متخرج
الولد للابتدائيه هم ما مكملينها شي للرابع
او الخامس واكو راسب بلسادس وطلع
اما البنات الكبار مخلصات متوسطه
والزغار ابتدائيه قبل الناس ما تهتم للمدرسه
ضروف المعيشه صعبه وحنا هوواي
والمدرسة تريد مصرف
راضين بوضعنا وعايشين اصلا ما نفكر بلمدرسه
بس نوصل عشر سنوآت نطلع ندور شغل
وهذا القرار كان الزامي من ابوي اطلعو اشتغلو وشيلو نفسكم اني مااكدر على عيشتكم
وهو كله جذب نشتغل وياخذ فلوس شغلنا
لان زغار نشتغل شغلات بسيطه
نبيع علاليك بلسوك اخوي الجبير يشتغل عماله
اختي الجبيره تشتغل تحوك سجاد ويا الجوارين وتأخذ
منهم حق تعبها بعد ما تخلص السجاده
نشتغل مجبورين لان ابوي عصبي ما ينحمل
واذا شد ويا واحد من عدنا
ما يخلص منه ابد
موهنا المشكله المشكله الحقيقيه
بين امي وابوي ابوي رجال نسونجي درجى اولى
يموت عل النسوان
والناس كلها تعرف هذا الشي عنه
ااكثر مشاكله ويا امي علمود هاي السالفه
نص راتبه ويمكن أكثر يروح على صاحباته
وعايف ااكثر المسؤليه على امي تخيط وتعيشنا
امي حلوه وشاطره وأم بيت كل الصفات الحلوه بيها
بس بيها شغله مخلي ابوي هو المسيطر
ودائما يعيرها بيها
جمانه السعيدي
امي وحده من عيونها بيضه
متعرضه الحادث بلطفوله واكعه على حديده
الحديده زغيره وثابته بلكاع من وكعت دخلت لحديده بعينها
صار عدها نزف من نقلوها للمستشفى الدكاتره
اكدو عينها انتهت وبعد مستحيل تشوف بيها
هسه عينها وحده بيضه ووحده عين عاديه
عين وحده وخياطه محترفه يخبل خياطها
هيه الي قايمه بمسؤليتنا
امي قريبه علينا ااكثر من ابوي
تحاول ما تنقص علينا شي شكد تعبانه علمودنا
ابوي شكله كلش حلوو ااكثر النسوان هنا يتحرشن بي
وهو هم ما مقصر ابد
الي تعجبه مستعد يصرف كل فلوسه عليها
ومستعد يتقرض علمودها
هذا الشي جان يزعج امي حيل
لان عايف كل المسؤليه عليها وملتهي بنفسه
مرات اكعد بليل
الكاها كاعده على المكينه تخيط
بس حتى لا ينقص علينا شي
تشكي من تعب الخياط ومسؤولية البيت بس محد يرحمها
اما ابوي كل همه يتونس ويعيش حياته
احنا وطلباتنه مو مهم
جمانه السعيدي
لذالك كان يطلب من عدنا نعوف المدرسه ونشتغل
مو حتى نشيل المسؤليه عنا اقصد مسؤلية البيت
لا علمود ياخذ شغلنا وتعبنا يتونس بي
بسبب تصرفات ابوي جانت امي تتعارك ويا كل يوم
كل يوم اكو مشكله
اولا مجانت قابله نعوف المدرسه بس الضروف الصعبه
جبرتها تقبل
وثانيا ما تقبل ابوي ياخذ شغلنا ويصرفه على صاحباته
مهما يكون يبقى زوجها وتغار علي
كانت تتمنى يقدر تعبها ويراضيها بكلمه حلوه
كل يوم تتعارك ويااا
بس هو ابد مايرحمها يبقى يحجي عليها
ويفشر ويعيرها بعينها
كلمه والثانيه وكال عنها ام عين العوره
هيج بشر جاحد اني مشايف ابد متحملته وشايله المسؤليه عنه ومايقبل يرحمها
يحاول يذلها بكل الطرق
تمر الأيام علينا صعبه وما تنطاق
بس تمر وجاي نكبر وحنا نشوف ضلم ابوي الامي
ونشوف دمعتها ما تنشف على خدها
بس مابيدنا نغير شي
مابيدنا نغير الواقع
اختي الجبيره قبلت بأول واحد تقدملها
بس حتى تخلص من هاي الحياة المتعبه
واخوي الجبير التحق بلجيش وخلص من هذا الضلم
على الاقل مايسمع صوت امي وهيه تبجي كل يوم
واني وصلت عمر ١٧ سنه
اشتغل عماله من ارجع يوكفلي بلباب جيب الفلوس
بس اني ماانطي
مايستاهل ياخذ تعبي
يتعارك وياي ويبقى يضربني ويغلط عليه
بس ماانطي فلوسي مايستاهل
انطيهن الامي حتى اساعدها على العيشه
انكسر ضهرها وهيه تخيط وهو ما يقبل يرحمها
باقي على نفس طبيعته لايرحم ولا يقبل يخلي رحمة الله تنزل علينا
اني اكثر واحد احجي علي و ارده اذا حجا على امي
يكول انت ابن امك
لان ادافع عنها ومااقبل يتعارك وياها
اول يومين اشتغلت ما قبلت انطي شغلي
كام يحجي عليه ويغلط بس ما قبلت ابد
ثالث مره ما نطيته بس شافني انطيت شغلي الامي
وهو هجم عليه
يضربني بقوه حاقد عليه شلون تنطي الفلوس الامك
وما تنطينياهن اني ابوك
علي...كلشي ما انطيك ما تستاهل
ابوي...حيوان اني مااستاهل انتي الي ما تستاهل
تكعد بلبيت لحظه وحده امشي اطلع برا
علي...مااطلع
ابوي...تطلع وغصبا ما عليك هذا بيتي ومااريدك تبقى بي
علي....مااطلع اذا تريد انت اطلع
وخلصنا من شرك
امي...يمه علي اسكت
ابوي...لا مايسكت شلون يسكت غير يريد يفور دمي
علي....انت تفور .دمنا عادي بس ممنوع نزعج حضرتك
ابوي...انجب مااسمع صوتك
علي...اسكت واني اسكت
اجا يريد يضربني بس ماكدرلي اني صرت جبير
مو علي الزغير الي يخاف منه
شاف نفسه مايكدرلي رجع على امي ضربها وكللها جيبي الفلوس
اني شفته ضربها على راسها هيه دنكت وعاطت
لان الضربه وجعتها
اني دمي فار طفرت علي دفعته عنها بقوه
وكع بلكاع شلت الكرك وضربته على راسه
امي...لا يمه لا ابوك لا علي لا تضربه
اني شفت الدم نزل من راسه خفت حيل خفت
خفت لايموت
امي...اشرد اشرد وبعد لا ترجع للبيت
اشرد يمه علي اشرد اذا عاش ما تخلص منه
واذا مات تبتلي بي اشرد يمه وبعد لاترجع
