رواية سواد الاثمد الفصل الثالث والعشرون بقلم نورس
صارت وراي سيارة انداريت بسرعة وگفت بنص الشارع انتظرتها تتقرب وأشرتله يوگف بيدي وگفت
جان بيها رجال كبير رحتله :- عمو عادي توصلني بطريقك
أحجي وألهث فحطانة باوعلي من فوك ليجوة
أشرلي براسه :- اصعدي
صعدت بسرعة ومشى بالسيارة لساني مسكت بالدعاء وأقرة آيتي :- لا إله إلا انتَ سبحانك إني كنت من الظالمين
وضليت أردد بيها لحد ما ابتعدنا حيل عن البيت والمكان عاد الرجال استلمني اسئلة اسمج اهلج منين انتِ ليش طالعة لوحدج بهالليل
جاوبته على اسألته حتى ليشك
گال :- أهلج وين
- موجودين بالكرادة
- وين بالكرادة سميلياهم اني ساكن هناك
صرت أعددله اسم عمو سالم وخواته ونسابتهم ليش ما حظي يطلع الرجال يعرفهم وعنده علاقة بستار
گال :- وشلون يخلوج بهذا حالج وميسألون هسه أخابرهم الج
حجاها وهو يشيل تليفونه فزيت بسرعة
- لا عمو فدوة أبوس ايدك لتخابر أحد
- لا بنتي شلون حجي هذا ميصير يعوفونج لوحدج بهالوكت من الليل
أصّر إلا يتصل دنگت أبجي اني انتهيت
اتصل أسمع صوت الرنة لحد ما انفتح خط
25 تعليق
رفعه :- يابة السلام عليكم شلونك عمو همام شخبارك الأهل شلونهم
رفعت راسي من جاب اسم همام حجاله عني وسماني اله واتفق وياه ينتظرنا بمكان يوصلني اله
من سد الخط گتله :- هذا همام ابن سجود
هز راسه :- اي الولد أعرفه حق المعرفة يصير صديقه لأبني ويشتغل وياه بنفس الدائرة مدامه ابن عمتج هو يتكفل بيج بعد
شي بداخلي اطمئن من عرفت همام مو غيره
وصلنا للكرادة رجع خابره وصفله المكان وصلناله
لگينا همام واگفلنا هناك منتظرنا بسيارته
وگفنا ونزلنا وهو اجه بأتجاهنا أول مشافني خزرني تقدم عليَّ دنك يحجي بصوت ناصي
همام :- رجعتي شردتي منه
قاطعه الرجال وگف صافحه وسلم عليه تشكر منه هواي والرجال يوصيه بيَّ وديروا بالكم عليها
سلم وراح أشرلي عالسيارة صعدت وياه وقبل ليمشي
اندارلي باوعلي من فوك ليجوة :- وتالي وياج بان
شهربان :- همام إذا ماخذني لبيت عمو سالم نزلني هنا
أحجي وأبجي لاحظ رجفتي والخوفة الي بصوتي
گال :- ومنو ماخذج لبيت عمج زر**
شغل السيارة ومشى بيها حاول وياي هواي حتى أحجي مگدرت مجان عندي الطاقة حتى للكلام
مسافة الطريق ووگف السيارة گبال عمارة أشرلي انزلي
نزلني وهو طبك السيارة على جهة من الشارع طفاها ورجعلي أشرلي أمشي گدامه مشيت وراه بلا صوت
صعدنا الدرج وصلنا للشقة دك الجرس
واحنا واگفين سألته :- وين جبتني
بعدني أحجي انفتح الباب صارت بوجهي نسمة
عاطت :- بان
حضنتني حيل متحملت انفجرت أبجي بحضنها
باوعت لوجهي :- شبيج حبيبتي ليش البجي
همام :- فوتن جوة سولفن
دخلنا للشقة گعدنا بالصالة خلصتها بجي رادت بس تفهم مني جملة مفيدة همام حجالها مهزومة من عبد
وهذا الثاني وگع عليَّ بالأسئلة ليش وشعندج وشلون
من شافوني ما انطي جواب يروي فضولهم
90 تعليق
نسمة :- عوفها همام مدتشوف حالتها منتهية البنية
- غير أفتهم شمطلعها بهالليل
- دتگلك مهزومة أكو غيرها
- اي ليش انهزمت غير أعرف هيج كلما فرت راسها وعجبها لمتلها كم لبسة وطفرت وخلتهم يتراگعون وراها
- بداعتي أجل اسألتك لباجر شوف حالها خطية
سكت مني بس جان متضايق من وكت مشاف حالتي
أخذتني للغرفة أخذت مني الجنطة خلتها على صفحة
انتبهت لرگبتي گالت :- تسبحين حبيبتي أحضرلج الحمام
هزيتلها راسي راحت عني گعدت عالجرباية رجلي تأذيني بطني أحس بيها وجع خفيف ودايخة حيل
رجعتلي أخذتني من ايدي للحمام
وگفت :- أفوت أساعدج
- لا
سدت الباب حتى المَي مكاسرته الي مسويته فاتر وفاتحة الدوش نزعت ملابسي دخلت جوة المَي
أحس التعب كله ينزل وياه رخت عظامي حيل ضليت فترة جوة الدوش لحد مسمعت صوتها ورى الباب
مشيتلها فتحته جايبتلي ملابس أخذتهن منها سديت المَي ولبستهن طلعت راسي مبلل أخذتني من ايدي صارت تنشف بشعري وتسولف وياي متجاوبت وياها
عاد تنهدت وسكتت جانت روحي رايحة مالي خلك كُلش
انتبهت مغيرة فراش الجرباية خلتني أمدد وهي يمي
همام :- شلونها ما حجتلج شي
- ساكتة بس ..
- بس شنو
سكتت شوي وباوعتلي :- بان انتِ حامل
همام :- حامل
- شفت بطنها وماعرف إذا صدك لو لا
لزمت ايدها وضليت ساكتة صارت ايدها تلعب بشعري
عافنا همام وسد الباب ضلت وياي راسي بحضنها
رفعت راسي أباوعلها :- نسمة گوليله ليحجي لأحد عن مكاني
- وانتِ دتوصينا اني وهمام معليج حاسبين حساب
رجعت راسي غمضت عيوني بتعب أريد أنسى كُلشي
نمت ما أعرف شوكت فزيت الصبح غسلت وجهي وباوعت بالغرفة هاي غرفتهم
صور عرسهم جانت بكل مكان بالغرفة
طلعت صبحت عليهم گعدت أحجيلهم كُلشي شردتي وطلعة عبد الكريم من السجن والحرك الصار بالبيت
همام ضاج حيل ونسمة تسمع وعيونها مغورگة
رادوا ينسوني الصار ووگفوا يسوون ريوك وجروني وياهم للمطبخ يسولفون ويضحكون يتشاقون بينهم
فزينا على صوت الجرس ودك سريع عالباب
انخمش گلبي وفزيت من مكاني وهم فزوا وياي
همام أشرلنا عالغرفة :- فوتن جوة ولحد تطلع
اخذتني دخلتني لهناك وسدت الباب
لزمت بملابسها أبجي وأحجي :- اجاني نسمة اجاني عبد اندل مكاني جاي حتى ياخذني
نسمة :- اهدأي يا گلبي هسه بس يشوف همام منو عالباب
زادت رجفتي لازمة بطرف ملابسها حيل وهي تحجي وياي على كيف وبنبرة هادئة تحاول تطمأني
عيني متشكلة عالباب بكل عقلي هسه يفوت عبد علينا ويجرجرني وراه مثل كل مرة يرجعني منين مجيت
أسمع صوت حجي برة بس ما أميز الصوت لمنو وشدا يحجي صوتهم جان بعيد عن الغرفة اللي احنا بيها
دقايق مرت واني على أعصابي لحد ما اندك الباب
لزمت بيها حيل وصرت وراها
لزمت ايدي :- اهدأي والله ماكو شي
اجانا صوت همام من ورى الباب راحتله فتحته اله
ضلت واگفة تحجي وياه من ورى الباب اندارتلي تضحك
- مو گتلج ماكو شي هاي عمتي أمجاد جايتنا
گعدت عالجرباية لازمة راسي بين ادي بدوخة
گلبي گد ما دگاته جانت سريعة حسيته حيطلع من القفص الصدري من الهبطة الأكلتها ساعتها
بان :- الله ليوفقك عبد
اجتني صارت گبالي :- شبيج حبيبتي
رفعت راسي باوعتلها بعيون مغورگة وجريت نفس
- لتگولون لعمتي بان هنا أخاف لتروح تبلغهم
- عمتي أمجاد مو مثلهم صدگيني
باوعت للباب واندارتلي :- حروح أشوفها ابقي هنا انتِ
هزيتلها راسي عافتني وطلعت من الغرفة
مسحت العرق اللي صار يتصبب من وجهي رغم الغرفة مجانت حارة ايدي صرت ما أسيطر عليها
مسحت وجهي بتعب ورفعت شعري رجعته ليورى
صرت أخاف من خيالي من وراه
ورى شوي انفتح الباب وفاتت نسمة وراها عمتي
أمجاد :- تصخمتي يمعزاية رجعتي شردتي منه ولج
ضليت ساكتة دنگت راسي اجت صارت گبالي
گالت :- احجي بان شطلعج من بيته لهنا
من شافتني ما أحجي رفعت راسي بأيدها وشهگت
اندارت لنسمة :- هذا شمسوي بيها الخبل
- الله ليشوفج حالها من اجت شوفي ايدها من الليل ولهسه على نفس الرجفة
- جعل ايده بالكسر هالخبل هذا شنو وانطيه مرة
لزمت ايدي تهدي من رجفتي
سألتني :- شبيج حبيبتي بردانة
هزيتلها راسي رجعت اندارت لنسمة
- لج يمعزاية شملبستها مو تشوفيها عظامها تطگطك
- ما أدري عمة والله حتى الشقة دافية ممشغلين تبريد
- دمشي جيبيلها لبس ثگيل تدفى بيه
- هسه بعيني
توجهت للكنتور تدور بيه وعمتي عينها عليَّ متضايقة
اندارتلها :- عمة عندي بس هذا الباقي كله عازلته ويَّ الشتوي
- اي دجيبي وشوفيلها وياج جواريب دا تدفي رجليها
أخذته منها نزعتني البدي اللابسته ولبستني البلوز
انطتني بجامة أغيرها من دا أنزع بجامتي وگعت للگاع وانكشفت رجلي شافت أفخاذي
خلت ايدها على حلگها تكتم شهگتها
ضلت تردد :- عزة بعينك يالخبل
نسمة :- شكو
- تعالي ولج تعاي شوفي رجليها شمسوي بيها
گومتني لازمة ايدي دارتني تباوع من ورى
باوعتلي :- احجي ولج هذا الأثر جديد
هزيت راسي نزلت على عبد بالحجي والغلط
- هذا أثر مال كيبل
- اي مبين مشوه رجليها بيه ابن المطي
لبست البجامة وانطتني نسمة جواريب گعدت ألبسهم
- عمة ترى بان حامل
اندارت عليها بسرعة من حجت هيج ورجعت تباوعلي عيونها مفتوحة على وسعها :- حامل
جرتني من ايدي :- شو گومي أشوف
رفعت البلوز تشوف بطني اندارت لنسمة
أمجاد :- بس بطنها ممبينة
- هي گالتلي الصبح
باوعتلهن اثنينهن :- لتباعولي هيج
- تصخمتي يمعزاية هو المثل عبد أربط روحي وياه بطفل
- لتلوميني عمة أمري مو بيدي واني عنده كُلشي بالغصب كُلشي بالضرب والصياح معنده كل إسلوب بالتعامل وكلكم دتلوموني لأن شاردة منه
- الله يلوم اللي يلومج هو اني شفت حالج وكزبر جسمي شلون كملتي وياه كل هالمدة ما أدري
تنهدت بحسرة وكملت :- بس شگول الله يغفر ذنب اللي ببالي من شمرتج هالشمرة
اندارت لنسمة :- ميمي أكلت شي
- هسه جنا دنسوي بالريوك وانتِ اجيتي
- يلا لعد امشي كملي ريوگج اني هم مماكلة من الصبح گلت أجي أتريك وياكم وشتهيتلكم وياي گيمر وكاهي عالطريق خليته برة
- عليش كلفتي نفسج
- كلفتيش يمعودة عزمت روحي بروحي وجبت ريوگي وياي بس استعجليلنا فدوة شوفي وجها مبلوع بلع
ابتسمت :- صار بعيني
راحت طلعت من الغرفة بقينا اني وعمتي
گالت :- گومي حبيبتي غسلي وجهج ولمي شعرج
- مراح تحجين لأحد مو
- ما أحجي ليضل بالج ولو هسه تلگينه ديهوس عليهم بالبيت مثل ذيج المرة من شردتي
- ليش انتِ مجنتي هناك
- لا وين گاعدة عند حماتي وأمر لهنا بين فترة ولخ جيتنا هاي صارت فجأة علمود شغل طارق وبيتي هم ممنظف متروك صار فترة مصارلي مجال أشوفه
گمت للحمام غسلت وجهي بللت شعري بأيدي عالخفيف
رجعت للغرفة گعدت تمشطلي وتحجي وياي
- شعرج جان يخبل طول وكثافة لويش ولج باترته هيج
ضليت ساكتة أباوعلها من إنعكاس المراية ومرديت
لمته إلي ورفعته بماشات أخذتني من ايدي وكلعنا من الغرفة للصالة على صوت نسمة وهي تصيحنا عالريوك
فات همام للشقة جايب صمون حار والتمينا كلنا على ميز الطعام حاولوا ميفتحون موضوع وياي يخص عبد
والتهوا سوالف بيناتهم وعمتي تحجيلنا على تركيا والعيشة هناك وهمام يستفسر منها أكثر
گلها :- شلونها بلة الأسعار هناك
أمجاد :- كُلش مناسبة أغلى شي عندهم إسطنبول لأن السياحة بيها عالية وهم الأسعار هناك تلگاها معقولة مو خيالية عندك أنطاليا بعد أرخص منها وأنقرة هم رخيصة بس مبيها سياحة هواي مثل إسطنبول
- والعيشة شلونها
- كُلشي رخيص وسهل عندهم حتى الشغل هناك سهل يتحصل خاصة إذا عندك لغة تركية التجارة مطلوبة السياحة مطلوبة خاصة هالفترة تعتبر فترة ذهبية للتجار هناك اللي يشغل عقله ويشتغل صح ويحسبلها يعيش عيشة ملوك
شربت شوي من الچاي وسألته :- شو اسألتك هواي عليها گول شعندك
- جاي أفكر أعتزل شغل أمي وخالي فد مرة وأعوف كلشي وأحوّل لهناك أبدي بداية جديدة
- والله عفية عليك زين تسوي انتَ هم بعد مو لوحدك صارت برگبتك مرة باجر يصير عندك طفل تكبر عائلتك ليمتى تضل ذاب روحك بالنار على ساعة يدخلون عليك يكبسونك وتروح بين الرجلين ساعتها شيفيد الندم
- والعندي شيقنعها
- أمك بالعكس حتكيفلك هي أصلاً متريدك تبقى بهالشغل الما وراه بس وجع الراس
- ما أدري بعدني ما مقرر بس حجي
- ميحتاج إلها تفكير همام ابدي صفي شغلك هنا حتى من نرجع أخلي طارق يرتبلكم الأمور هناك ونشوفلكم شقة وندبرلك شغل حتى ميمي نشغلها وانتَ وياها تعاونوا
- اثنينا ما عدنا لغة شلون راح ندبرها
- عاللغة سهلة كلها كم شهر تگعدون تتعلمون تصيرون لبلبان بالتركي وأصلاً كومة عرب أكو هناك خاصة عراقيين وسوريين وين متندار تلگاهم بوجهك
- والله ما أدري بعدني محتار
- خرب يومك شگد ثگيل حتضل ما أدري ما أدري
ضحك :- شسوي لعد
- خليك لعد دتشتغل بهالدائرة الزبالة لو ذاب روحك بحلك الموت بشغل أمك وسالم وهاي مرتك المعزاية صار سنة من تخرجت گاعدة ايدها على خدها دتنتظر التعيين عشتو
نسمة :- انعم الله عليج عمة
- والله لعد مجذبة هي العيشة هنا تنراد
- شنو السالفة مو گدامج الناس عايشة شكو قابل
- انتَ تحجي هيج لأن مطالع وشايف اسألني اني فريت كومة دول وشفت الناس اللي من صدك عايشة عيشة بشر هنا شكو بطالة تعيينات ماكو حكومة فاسدة
الصحة صفر التعليم زبالة تعال وشوف العراقيين اللي ديجون هناك ناس دتشتغل على نفسها كونوا روحهم شوية شوية وهسه تشوف واحدهم شغل وعقار وسيارة
- واني شنو هنا عايز لهذن شو كلهن متوفرات عندي بس رايد أخلص من الجو اللي هنا أمي من جهة وخالي من جهة
- لعد اني ليش دا أحجي حط ببالك شغل سجودة وسالم هذا ما من وراه بس وجع الراس وانتَ تاليتك لو للموت لو للسجن
- انطيتيني جرعة تفاؤل عظيمة
- بكيفك ضل اضحك اني دا أحجي لمصلحتك ترى
- الله كريم عود
سدوا نقاشهم وگام همام شوي وطلع من الغرفة بيده سويچه گال :- رايح لبيت خالي أشوف شنو الوضع
أمجاد :- شيصير هناك خابرني همام
- ماشي
حجاها وطلع من الشقة اندارت شافتني
- انتِ شو ماعونج على مكانه متاكلين
- دا آكل
سحبت كرسيها خلته لزك يمي سوتلي لفة وانطتنياها بيدي ضليت صافنة عليها لحد محجت حتى آخذها
صارت هي تسويلي لفات صغار واني آكل وتسولف هي ونسمة اندمجت أسمعلهم وأخذني الواهس صدك أكلت
كملت وعتفن يحجن گمت غسلت ورجعت
لگيت نسمة دتنقل بالمواعين للمطبخ وعمتي ملتهية بيدها تليفونها تگلب بيه رحتلها وگفت يمها
شافتني اندارتلي :- ها حبيبتي گولي
- نسمة أريد تليفونج
- تردين تخاربين عمة شدن
هزيتلها راسي أشرتلي عالغرفة :- هناك تلگينه عالميز
مشيت للغرفة أخذته بوجهي عالفيس بحثت صفحتها لگيتها قافلتها رجعت على صفحة نورجان دزيتلها طلب
ضليت حايرة خطر على بالي شبير حسابه عام اتصلت عليه كم مرة ما رد عاد راسلته
كتبتله : ( اني بان من تشوف المسج خابرني )
عفت التليفون ومشيت للصالة يمهم نص ساعة واندك الباب راحت نسمة فتحته طلع همام فات للشثة
تلگته عمتي :- ها
همام :- ماكو شي بيتهم هدوء سألت الحراس لا أحد جايهم ولا واصلهم
- وخالك يدري بالصار
- ما مبين گعدت وياه سولفنا شوية بالشغل وطلع هو وستار عندهم شغل
- وسجودة شوكت ترجع
- گالت الثلاثاء تجي
- يلا هم زين
باوعت لهمام گتله :- متعرف رقم ماما
- لا والله ما عندي بس أدبرلجياه إذا تردين
- اي عليك النبي بالي يمهم من البارحة وأراسلهم محد مجاي يرد بيهم
هز راسه :- سهلة للعصر الرقم يمج
رفعت راسها عمتي من التليفون بالها مجان ويانا
- شنو يا رقم
- تريد رقم أمها
اندارتلي :- دگعدي يمعودة خليها امج حايرة بروحها هسه
- لعد شلون أوصللهم
- مو وكتها بان ضلي هسه هنا جري نفس دنشوف هذا الخبل عبد شحيسوي
- ما أگدر عمة ممرتاحة أريد أروحلهم
سكتت شوي وباوعت لهمام
گتله :- اخذني لبيت فدار
همام :- بكل عقلج تحجين
- اي والله هن عندهم بالغربية أخليه ياخذني لماما
- مو گلتي عبد لام جماعته وراحلهم للبيت
ضليت ساكتة
كمل كلامه :- تلگيهم حايرين بروحهم اتركي الموضوع هسه وضلي هنا لحد منشوف شنو الوضع يمهم
أمجاد :- لاحگة تشوفيها وتشبعين منها هم بس انطي مجال إذا عبد عرف بطلعتج من البيت أول واحد راح يروحله هو بيت فدار الأنباري يدورج عنده
ضليت بخوفي عليهم محد بيهم ديطمني وكل شوي أشوف التليفون بلكي واحد بيهم مجاوبني
فزيت ما أدري بالوكت لگيت روحي نايمة عالقنفة بالصالة مخلين فوگاي غطى والشقة هادئة حيل
محد موجود بالمكان بس اني الإضاءة جانت خافتة والشقة دافية الجو جان بالنهار دافي وبالليل يبرد
نزلت رجلي للگاع أفرك براسي نزيت على صوتها
نسمة :- صح النوم يحلو
رفعن راسي باوعتلها وابتسمت فتحت باقي الأضوية
گالت :- گومي يلا غسلي وجهج وتعالي وصيت على كيك جاهز من برة دنحلي بيها اني وياج
- محد هنا
- همام طلع ورى الغدة وعمتي راحت وياه لبيتنا
رحت غسلت وباوعت لوجهي صايرة أخوف حيل ذبلانة جوة عيوني أسود ووجهي لونه شاحب شفتي يابسة
عدلت شعري ورجعت رفعته بالماشات مثل مسوتلي عمة
رجعتلها للصالة لگيتها مخلية قالب الكيك عالطبلة گصت قطعتين انطتني بالماعون وأخذت إلها
- اشربي العصير طبيعي زين إلج
مشغلة التلفزيون طالع مسلسل أسميتها فريحة وهي جانت متابعته مندمجة وياه بس اني بالي مو يمه
لحد منزيت على صوتها :- ها وياج
نسمة :- وين وياي يمعودة بالج طاير بشنو دتفكرين
عفت الماعون من ايدي وجريت نفس طويل
- بالي يمهم مدا أگدر أبطل تفكير بيهم من البارحة
- لو صاير شي جان سمعنا
- محد بيهم رد
- نورجان مقابلة الطلب أتذكر صفحتها جانت عندي ضايفتها بحسابي القديم بس هاي بالجديد سويتها
- وشبير
- هم ماكو محد اتصل
خليت راسي بين ادي :- يا ربي شصاير وياهم
گعدت يمي حضنتني تطمني بس شيهدي خوفي عليهم
قللت صوت البلازمة وصارت تسولف وياي على علاقتها بهمام وشلون تزوجوا ساعة تختنك ساعة أشوف عيونها مليانة بدموعها بس تلزم نفسها گوة گدامي
نسمة حيل حساسة متستاهل اللي صار بيها
بان :- وهبة شخبارها شلونها هسه
حجيتها ورفعت الگلاص أشرب من العصير
ابتسمت :- هبة زينة وحتصير ام شهاب
غصيت بالعصير صرت أگح وهي تطبطب على ظهري
جريت نفس وباوعتلها فاتحة عيوني ممصدگة
- هاي الدگمة حتصير أم
ضحكت :- مو هيانج انتِ هم حامل وكلها كم شهر تصيرين أم فلان مثلها
- اي بس هي حيل صغيرة شومت تزوجت شوكت لحگت تحبل
- هاي بعد صارت
- عاد زينة ويَّ زوجها مرتاحة
- مدللها دلال اني هم جنت شايلة همها بس من صارت تخابرني وتحجيلي شلون معيشها اطمأنيت عليها البيت الگعدة بيه قصير مو بيت والخدم جوة ايدها صح هي الثانية بس ممقصر وياها بشي حتى مرته زينة وياها
- عاد هبة روح گلبها هالسوالف
ضحكت :- واختج ذيج اللخ وين وصلت
من حجيت هيج تلاشت ضحكتها وحسيتها غصت
گالت :- هنادي مقاطعتني من يوم متزوجت همام
- بس لا بعدها تحبه
- تحبه ورايدته ومحملتني اللوم وزاعلتني ودارن وجوهن عليَّ هي وأمي
- النوب ليش هيج
- أمي جانت رافضة زواجي بالبداية وتوسلت بأبوي وعمتي حتى يلغونه بس بعدين من طلبني همام وخلوا هبة بمكاني صارت هي تتوسل بيَّ حتى أقبل بعرضهم وحتى هبة لتروح بمكاني بس اني مقبلت ومن يومها هي متحاجيني حتى صرت ما أروحلهم قليل
- خفة يمعودة هم المثل أهلج يتعاشرون
باوعتلي نزلت دموعها :- بس هذول أهلي بان إذا هم دايرين وجهم مني لعد الغريب شلون
- ليش همام صار غريب
- اي مدامه ميحبني وزواجنا جان بالأتفاق حيضل غريب
- شلون عرفتيه ميحبج شفت شقاكم وضحكم سوية ممبين بينكم شي
- اي نشاقة ونضحك ونسولف سوية بس مدا أحس بمشاعره ولا عبالك متزوجين علاقتنا نفسها قبل بالبداية جنت مرتاحة عالوضع هذا بس بعدين
سكتت مكملت :- بعدين شنو
- ما أدري بان بس صرت أخاف من مشاعري إله
- حلو يعني حبيتيه وهو ضاربج بوري
من حجيت هيج ماتت بجي احتاريت بيها خلتني أتندم
هدأت شوية بيدها كلينكس تمسح بدموعها
بان :- آسفة ترى والله مو قصدي أحجي هيج
- لا مجذبتي اني صدك بديت أحبه وأتعلق بيه وهو على نفس وضعه ومشاعره وبالعكس شفته صار يتجنبني أكثر من قبل وحواراتنا صارت باردة
- صدك جذب تبجين عليه هم هذول يستاهلون ينحبون
- حاولت هواي أضحك على روحي وأكذب مشاعري بس مو بيدي
- أفتهمج اني هم اجتني فترة وتعلقت بواحد خيخة ميستاهل الله يقرضه
من حجيت هيج ضحكت عرفتني دا احجي على أخوها
ابتسمت :- والله شبيج كلهم دزاين واحد من تركضين وراه وتتعلقين بيه يشوف روحه ويصير بس هو وبس ومن تعوفيه وتضربينه بوري يگوم يركض وراج
- بس والله هو يحبج
- ووعدني وراح تزوج غيري وخلف بوعده بالوكت الجنت محتاجته أكثر من أي إنسان بهالدنيا
- لتلوميه لعبوا بعقله وهو هم هالسم اللي اخذه دمره
- بعده
تنهدت :- بعده شوكت يحس على روحه ما أدري كل فترة يگول گطعت يرجع ورى فترة نفس الشي
- ومرته شلونها وياه
- هاي كل فترة زعلانة عند أهلها وتروح أمي ترجعها والصدك غير حقها البنية شامرها بالبيت ميسأل عنها وهو مخلصها بتركيا طربگة
خلصت الوقت وياها من صار الليل فات همام وياه عمتي گعدوا يحجون سألته عالرقم باوع لعمتي
گال :- ما حصلته على باجر اجيبه الج
حجاها وگام للغرفة
أمجاد :- شبيج انگلبت خلقتج انطي مجال هسه انتِ گاعدة بالشارع
- ليش مگاعد تفهمون گلبي نار عليهم لا دا يردون تليفون ولا دا أسمع خبر عنهم يريح گلبي
- همام راح لبيت هذا الأنباري
عدلت گعدتي مركزة وياها :- اي
- لاگي دورية حماية گبال باب بيته بس ما تقرب ولا سأل
چتفت ايدي ورجعت راسي ليورى مغمضة عيوني
واني صافنة بأفكاري فززني كلامها
أمجاد :- بان ليش متجين وياي
باوعتلها :- وين
- يمي لبيت حماتي
- شسوي هناك عمة أريد أرجع لماما
- أعرف بس هالكم يوم هسه الوضع هادئ وعبد لهسه مجاي عليج انتظري منا لباجر وحيجي ينخل بيوتهم عليهم ميخلي لا بيت عمج سالم ولا بيت ستار ولا حتى شقة همام
- يعني شنو
- تجين وياي تگعدين هناك لا يندل البيت ولا يعرف أهله عاد نأمن عليج ليش يجي ياخذج گوة أحسن
- ما أدري
- مثل مگتلج حبيبتي وأمج ليضل بالج من ناحيتها كلها يومين تلاثة تعرف مكانج وتجيج تاخذج لو اني أخلي همام يوديج إلها
ضليت صافنة بكلامها من جهة خوفي على ماما ومن جهة خوفي من عبد لا يسويها صدك ويجيلي
همام :- اسمعي الحجي بان وروحي ويَّ خالتي خلي نشوف عبد شيسوي وراها نتصرف ووين متردين آخذج
- انتَ هيج تگول
- طبعًا لمصلحتج
مر الوقت ومن رادت تگوم عمتي گمت اني للغرفة أجيب الجنطة الأجيت بيها لگيتها بمكانها أخذتها
طلعت الصالة فارغة همام سبقنا جوة للسيارة سمعت صوت بالمطبخ مشيت لهناك أشوف وينهن
نسمة :- عمة ليش گلتيلهم
- لازم يعرفون لعد اعوفهم أطرش بزفة
- أخاف ليرجعوها إله
- لتخافين هي عمتج وصتني آخذها
وگفت بالباب شافوني قطعوا سالفتهم
باوعتلي عمتي :- ها كملتي
هزيت راسي سلمت على نسمة باوستني
گالت :- ديري بالج على نفسج أخابرج من عمتي
طلعنا من الشقة جنطتي على چتفي ونزلنا اني وعمتي لسيارة همام لگيناه منتظرنا شغل السيارة وحركت
《 نورجان 》
گاعدة عالتخم وعيني على ماما گاعدة گدامي
كل شوي ترفع راسها تباوع للساعة
عيني صارت على حركة رجلها اليسرى وهي تهزها سريع متوترة وكل احنا گاعدين على أعصابنا
طلع عمو فدار من الغرفة گاملته بسرعة
شدن :- وين صاروا فدار تأخروا والله
- تلگيهم على جية دگعدي انتِ عطي نفسج مجال جري نفس من الصبح وانتِ واجة نار كبرة عليها
- أدري انتوا غير متفقين عالثمانية وشوف الساعة هسه عبرت التسعة
- هدي أبوية هدي هسع يصلون جائز طريقهم بعيد
اخذها من ايدها گعدها عالتخم وگعد يمها طلع تليفونه وشاله يگلب بيه رفعه على اذنه يجينا صوت رنين
دك دك لحد منگطع الإتصال ومحصل رد
گال :- ماكو تيم ما يجاوب
- انتَ معندك رقم زوجها
- ما عندي هو بجهاز تيم متشوفيني أتصل عليه
ديحجي واتصل تليفونه وهو بيده رد بسرعة
فدار :- ها شبير يول أخوك وينو عتصل عليه ما يرد
سكت شوي وباوعلنا عاقد حواجبه :- شلون
حجاها وگام طلع برة للحديقة يحجي وياه
ماما حست صاير شي بسرعة خلت ايدها على گلبها
نورجان :- ماما شصاير
- ما أدري أمي ما أدري
رادت تگوم لزمتها :- وين رايحة
- اصبريلي بس دا أشوفه ليش طلع
من دا اتحجي فات عمو فدار للبيت وجهه مقتضب
أشرلنا :- امشن يولي البسن أحذيتجن جاي شبير ياخذجن
- وين ياخذنا
- هو يحجيلكم عالطريق بسرعة تهيروا بسسسرعة
وگفت ماما بوجهه لزمت ايده :- أحلفك بكل غالي عندك إذا صاير شي لبنتي تحجيلي
- والله ما بيها شي شبيج بس بسرعة تحركن راح يصل
- ضام عني شي وكلام الله مدا ترضى تحجيلي
صاح :- لا حوال ولا قوة إلا بالله شدن لا تطلعيني عن طوري فضيني تهيري تايجي شبير ياخذكم وياه
جان صاير أعصاب حجاها وفات للغرفة بأستعجال
ماما اندارتلي أشرتلي بيدها حتى أگوم
رحت جبت حذائي وگعدت ألبسها فات شبير للبيت
رفعتله راسي شافني بس اني بالصالة
شبير :- عجل امج وخالي وين
- هيانهم بالغرفة
- ديلا يلا فضيها تا يفرغ البيت
- ليش شكو
- راح يجون زلام من ربع خالي مو مال تبقن هين بعد
- وشعندهم جايين
- نورجان مو وكت اسألتج اندهي لأمج خلصيني السيارة عفتها مشتغلة
طلعت ماما من الغرفة جانت باجية عيونها حمر طلع وراها عمو فدار بيده سلاحه خلاه بحزامه
فدار :- شبير تاخذهن وبوجهك لشقة مآب تخليهن هناك تجيبو وتجولي لهين لتتعطلون وتيم إذا تحصلو گلو يخابرني من ساعة وانا أتصل ما يرد
- صدر الدين حدرو جان خابرت عليه
- هم ماكو ما جاي أحصل واحد بيهم سوي الوصيتك عليه وارجعلي وهذا السگط مآب جيبو وياك
- صار يالچبير
اندار علينا :- يلا يولن بسرعة السيارة واگفة برة
طلعنا وياه گعدت يمه وماما بالمقعد الخلفي شخط السيارة وداسلها بسرعة ابتعدنا عن بيت خاله
أباوعله هو صاير أعصاب تليفونه موگع من ايده وماما كل شوي أندارلها راسها عالجامة ودموعها تنزل بسكتة
ضجت محد بيهم ديفهمني شصاير ومن أحجي كلها تزمخ وتصيح بوجهي چتفت ايدي لصدري وانداريت
اجاني صوته :- شبلاج يالصفرة
باوعتله ورجعت انداريت عنه بنفور
گال :- ها ما راح تحجين يعني .. هيّن
- ليش محد بيكم ديحجيلي شصاير شنو اني غريبة لو مو من أهل البيت
- شتردين تعرفين
- وين ماخذنا
- مو سمعتي خالي شگال لشقة مآب
- وليش يعني مو عساس منتظرين بان وزوجها يجون
- تعطلوا عالطريق وخالي أخذلهم برميل گاز وراحلهم
انداريتله فاتحة عيوني :- عزة برميل گاز لويش عود
- مو اختج الدهيرة متحملها سيارة هي وفواينها جايبينها بلوري هي ليگدام وفواينها محمليها وراها
- عليك النبي عود صدك جابوها بلوري
- اي شبيج دحگي النوب حتى اللوري ما گدر يحمل فواينها گام عطل بيهم بنص الطريق
- زين ليش منبقى ننتظرها ببيت عمو فدار
- مو هذا خالي نفسيتو ضيگة ميحب خطار يبقى ببيتو خاصة من عرف بينا انا وياج جايين لهين
- عزة ليش والله مسويتله شي
- يكرهج على كرهي
تضايقت انداريت لماما بغير عالم ولا ويانا
هز راسه :- بس ولا يهمج هسع نروح لشقة مآب نطردو ونگعد احنا بيها خاوة عناد بخالي
- ماريد رجعنا لبيتنا
- هاه متأكدة
- اي
شفته ابتسم وعينه بالطريق رجعت انداريت للجامة
من گد مجان يمشي سريع ما طولنا بسرعة وصلنا هناك
وگف السيارة وأشرلنا ننزل صار يمشي واحنا وراه صعد للعمارة وصلنا للشقة وگف يدك الباب
طول وما فتح باوعت للباب
گتله :- هيانة الجرس دگه اخاف نايم ميسمع الباب
حرك الجرس عليه حرك هم مفتح شال ايده دك الباب حيل صرت أباوع داير مدايرنا واحد من الشقة الثانية فتح الباب مد راسه يشوف شكو وصار يباوعلنا
لزمت ايده جريت ملابسه :- شُبير شوف ذاك ديباوعلنا
من حجيت هيج بسرعة اندار :- وينو ولج
- هذاك
أشرتله عليه اندارله خزره بسرعة الولد سد الباب
شدن :- شبير عوفه يجوز مو بالبيت العالم منا زحمة
- لا موجود هين بس ما ادري شنو فلمو ما عيفتح
شال تليفونه يخابر عليه رجعت لزمته من ملابسه
باوعلي :- ها يولي
- شُبير خاف أبوه خابره ووصاه ميستقبلنا بشقته
شدن :- يا ليش ولج هو فدار گله يجيبنا لهنا
دا احجي شبير خلى ايده على حلگي وخزرني يسكتني
انفتح الباب صار بوجهنا مآب حسيته انصدم بشوفتنا
مآب :- ها هاي انتوا هين
صاح بيه شبير وهو يفوت ليجوة
- صگعة وعثر يول صار ساعة أدك بالباب فلشتو حتى الجيران طلعوا وانتَ ما طلعت
سوالنا مجال گال :- تفضلوا مدامات عش واگفات
دخلنا ليجوة گعدنا بالصالة عيني تدور بالشقة
گعدت يم ماما :- اني عبالي مآب ينام ببيت أبوه وياكم
- هو من يجي من الشغل يخلص وكته هناك بس بالليل يجي لهنا
حجتها ورجعت راسها ليورى ايدها على عيونها لحظات وصرت أسمع صوت جر النفس مالتها گامت تبجي
نورجان :- شبيج حبيبتي
باوعتلي وتنهدت مسحت عيونها أشرتلي انطيها كلينكس
باوعت للمكان گالت :- وين الحمام أريد أغسل وجهي
- دقيقة هسه أشوفلج
گمت منها أمشي وأباوع بالمكان الصالة كبيرة بينها وبين المطبخ مسافة بسيطة تقربت اجاني صوتهم
شبير :- طاح حظك اي والله ويحجي على أخلاقي يول تندار فدوة لأخلاقي الساقطة
- اهووو خلصني شوفلي صرفة غير تخابرني بالأول تگلي جايين
- هو انتَ اعمل المكسورة وتعال الحگني شبير شنو مخلفك وناسيك انتَ دبر روحك بروحك
- بالقرآن إذا مشيت هسع أشهرك وأخزيك جدام حرمتك وامها
- مو گبل لا انا أفضحك وأخلي أبوك يلعب البسطال على راسك
- ديلا يمعود خلصني لا وحدة بيهن تحس
- آخ تمنيتك توگع بلسان الصفرة والله لتشهرك وتفين حظك بالغربية بكبرها مو بس العشيرة
سكتوا شوية شبير گله :- راح أفوتهن جوة وانتَ تصرف بساع
حسيت عليهم حيطلعون هرولت بسرعة صار الحمام بوجهي دخلت بيه وطبگت الباب حيل أتنفس سريع
لزمت گلبي يدك حيل سمعت صوت الباب يدك
وصوته يصيح :- منو هين
فتحته ومديت راسي طلعت بس عيوني
شبير :- هاي انتِ شعتعملين
- ماما رادت حمام اجيت أشوف
- دمشي اندهيها
طلعت گدامه رحت لماما گتلها على مكان الحمام راحت غسلت وجها ورجعت شالت جنطتها طلعت تليفونها
شبير وضعه جان مو طبيعي يباوعلنا ويباوع ليجوة
لزمت ايده :- شبيك
باوعلي :- يول تعالوا اگعدوا بهاي الغرفة ارتاحوا بيها تاخذن راحتجن أكثر عش ضالات مكسرات عالتخم
شدن :- لا عادي مرتاحات هنا
- دحگي نورجان شلون نعسانة عتمدد بالغرفة
دا أحجي قاطعني ولزم وجهي يباوع بيه
گال :- شو يول وجهج أشوفو يا يابة سودة عليَّ
أخذني من ايدي ومشينا طلعنا من الصالة وماما ورانا
أخذنا لغرفة صغيرة بيها سرير أبو نفر بس مبينة الغرفة متروكة أثاثها صاير تراب اختنگت صرت أگح
ماما ما اهتمت گعدت وشبير واگف يحجي وياها وگفت بالباب أشتم هوى نظيف رفعت راسي فتحت عيوني
شفت بنية طلعت من الغرفة اللخ وللصالة ومآب وراها يستعجلها اندارت مدري شنو حجت وياه وضحكت
دفعها لباب الشقة طلعت بسرعة وسد الباب وراها
انداريت گعدت يم ماما لطشت روحي يمها
وعيني على شبير وهو يحاجيها گلبي يدك يدك سريع
اني التنفس عندي قفل فد مرة صرت گوة أجر النفس وبس أعاطس باوعلي :- شنو السالفة شبلاج
شدن :- اختنگت من ريحة التراب
باوع برة الغرفة واندار علينا
- گومي يولي امشي اطلعي للصالة اختنگتي
طلعت لهناك وهو وماما وراي ديسولفون بصوت ناصي
لشوي وطلع مآب من الغرفة هذيج مغير ملابسه
گال :- يلا شبير تأخرنا أبوي ورني ور بالأتصالات
باوعلنا شبير :- محتاجات شي تاجيب الجن گبل لا نروح
- لا بالسلامة بس شيصير وياك خليني على بالك وخابرني لتخليني بقلق
- هذا هو ليضل بالج
طلعوا اثنينهم وانسد باب الشقة ضلينا بس احنا
اندارتلي :- ها ماما شلون صرتي
رفعت راسي عيوني گامت تدمع
نورجان :- زينة
- دگومي غسلي وجهج شو دا أشوف
رحت غسلت بسرعة ورجعتلها لزمت ايدها أهزها
- ماما باعي دا أحجي وياج
جانت عينها بتليفونها رفعت راسها بشرود
- بعدين نورجان مالي خلك وكلام الله
- ماما شفت بنية بشقة مآب
سدت تليفونها وباوعتلي بتركيز
- شنو شفتي ولج
- دا أگلج شفت بنية قبل شوية هنا بالشقة
صفنت بكلامي :- متأكدة
- والنبي حتى طلعت من الغرفة اللخ وبسرعة طلعت من الشقة
حذرتني ما أحجي شي ولا أگول لأحد ولا كأني شفت
ما أدري بروحي شوكت نمت فزيت على صوت دك عالباب شلت راسي من حضن ماما وهي هم فزت
جانت نايمة گعدة
شدن :- هاي الباب دا يدك
- اي
لميت شعري وگمت أشوف منو انخبص الجرس
فتحته صار بوجهي مآب
شافني أشرلي ليجوة :- فوتي يولي انتِ وامج للغرفة جايين زلام ويَّ أبوي تايدخلون هين
انداريت لماما جانت وراي سمعته أخذت جنطتها ومشينا للغرفة وسدينا الباب دقايق وصار صوتهم بالشقة
الساعة جانت 4 الفجر
نسمع صوتهم العالي وهم يحجون سوالفهم جانت متداخلة منگدر نميز على شنو ديتناقشون
باوعتلي ماما :- أگلج هذا مو صوت تيم لو اني متوهمة
خليت اذني عالباب ركزت وصدك سمعته يحجي وياهم
- اي هذا صوت عمو
اجاني صوته وهو يگول :- ول يابا مو گتلك واحد سگط غيرة سز ما عندو حرمة لأحد شنو هو ويلعب علينا مضحك احنا جدامه
فدار :- انطر وشوف للصبح أروح للمركز أشتكي عليه كاميرات المراقبة تارسة الفرع والتصوير صار بيدي إن ما جرجرتو للمحاكم وسبيتو سباية هيّن
- گتلك هذا واحد ميتصدك بكلامو من يوم ما سحب التليفون من ايدها وحاجاني جنت ماخذلي دورية ومصبح عليه انا وصدر الدين نشلعها من عيونو
- هو بعد مو مال ينسكت عنو شحاسب روحو مالو رداد
صدر الدين :- السالفة أصلاً كبرت ما صارت تخص بس
البنية زوجته صار بيها تكسير روس ومبينة ما راح توگف بس على هاي إله جيات ثانية تتلاطمون وياه وبقت يمكم لو تگعدون ويَّ جبيرهم تحلوها بيناتكم لو تشوفونه حك الله شلون يصير
- يخسى والله هو واليطلع وراه أگعد وياهم بگعدة وأفوتها إلو بچم چلمة جايني تا يتعدى على حرمة بيتي بليل أظلم سوايتو ما عيعملها غير المخنث السگط مثلو
- ايدنا بيدك أبو مؤتمن تليفون واحد تلگى الربع يمك
هم يسولفون واني أسمع وأنقل لماما كلامهم
لهناك عاد هدئ الصوت وصرت ما أسمع شي گعدت يمها لحد ما انفتح الباب صار عمو فدار گدامنا گاملته ماما
عقد حاجبه من شاف حالها :- شبلاج يولي شنو هذا حالج
شدن :- بنتي فدار بنتي
استغفر وتنهد :- گولي يا الله وامسحي دموعج تانشوف دربنا
طلعنا للصالة جانوا الزلم رايحين بس عمو فدار والولد شبير ومآب موجودين وگفت يم شبير لزمت ايده
باوعلي دنك راسه :- ها
- لعد وين عمو تيم مو جان هنا
- وينو هالعطل بس نافخ روحو ووكت العركة ما دحگناه
- والله توني سمعت صوته وياكم
- لا متوهمة هذا قرينو
- أهووو دتضحك عليَّ
ضحك وحاوطني من كتفي :- هسع راح هو وابن السادة
- عليمن دتحجون منو هذا المتعاركين وياه
- واحد زعطوط من الجيران لام جهال المنطقة واجونا فلشوا الجام مال بيت خالي بالطابوك
- عزة ليش عود
- عود شوفوني انا نچر وسبع
لزمت ايده :- والنبي يخوف
- دخيولي هالعطل هو غير من يريد يفوت للتواليت
ينزع بجامتو بالباب
مآب سمعه ضحك وهز ايده مشيت گعدت يم ماما
شدن :- راح أتخبل والله كلما أتقدم خطوة إلها وأگول لگيتها يرجع يسويله سالفة يرجعنا بيها ألف خطوة لورى
- هاي هي محلولة تيم وصدر الدين مصبحين عليه لبيتو ببلاغ رسمي وبنتج ترد لحضنج وهذا السگط يصير بيدنا نشتغلو بالسجن
- گطعت الأمل برجعتها ما أريدها بعد ترجع مطالبة بس شوفتها والله خلاني بحسرتي عليها
- گليلي شبيدي أسوي وما سويت مو تشوفينا عنركض بدينا ورجلينا تا نردها إلج
ضلت تبجي وهو يسكت بيها عاد يلا طخت عندي ديحجون على عبد زوج بان بوكتها صدك خفت
عرفت شغلتهم كبرت وعركتهم ما راح تفض مدام صارت بيها شكاوي وبلاغات وعمو يتهدد بيه
شبير مطفي مرجع راسه للتخم وساد عيونه تعبان
نده عليه خاله فز رفع راسه بسرعة
شبير :- گول خالي
- يمتى راد للغربية
رفع ايده يباوع للساعة :- والله كون هسع أطلع خاطر أصل من وكت ألحك على دوامي بس كون طاقتي تعيني قفلت من النعاس
مآب :- أرجع وياك اسوق مجانك
- لا عليمن انا أدبرها ما دام الصفرة وياي ميلوحني نوم
- خلو يروح وياك واخذ ام بان وياكم
باوعتله ماما متفاجئة :- لا تدحگين هيج ردي وي بنتج شيضمنلي هذا ما يدز جماعتو للبيت وانا عندي دوام تبقين انتِ لحالج
منطاها مجال تعترض ورجع اندار على شبير
گله :- اسمع خالي الأهل وديهم لبيت تيم انتَ بيتك بعيد عن عمامك عاد يصير ما يصير عمامنا وإخوتك موجودين داير ما دايرهم
شبير :- هو المثل هالسگط يسوى نحسبلو حساب ونعوف بيوتنا خوف منو
- عش تاكل تبن خوف شنو انا مأمن حرمتي عندك لأن بيتي فارغ وانتَ هناك هم ملتهي بدوامك يبقن وحدهن أحسن واحد بلا غيرة مثل هذا شمدرينا ما يجيك للبيت تا ياخذ الأماية ويكسر عينّا
- طلقة براسو وأشمرو بصحراء الأنبار منو اليدري
- لو يسوى توصخ ايدك بدمو جان انا گتلك سويها بس والله واحد مثلو فلا يسوى
شي بداخلي اطمأن من عرفت حترجع ماما وياي لهناك
صعدنا سيارة شبير ورجعنا للغربية
مآب ساق الطريق كله شبير جان كُلش تعبان وشايل هم لدوامه شلون راح يخلصه اليوم وصلنا هناك وجه الصبح
أخذنا للبيت أول مرة نزلت جبتلي ملابس وهو نزل أخذ دوش سريع وطلع بدل لبس ملابس الشغل هم يلا يروح
رجع أخذنا لبيت عمو تيم وهم مناك وطلعوا هو ومآب
دخلت للبيت جانوا عمة گاعدة وعلي ودر متحضرين لدوامهم وگاعدين ديتريگون سلمنا وگعدنا
صارت ماما تسولف لعمة شيخة عالمشكلة علي اندمج وياهم وگعد يشارك بالحجي لحد مصاحت بيه عمة حتى يگوم ويوصل اخته بطريقه لمدرستها
من وكت معلموه على سياقة السيارة صار هو يوصلها
باوعتلنا عمة :- شو ما أكلتن أسويلكم غير شي
شدن :- لا فدوة لگلبج بس دا آخذ دوش أذب بيه تعب جسمي ولزميني المخدة حتى أنام كُلشي ماريد
دخلت سبحت انطتها عمة ملابس منها وفاتت نامت واني دخلت وراها غيرت ملابسي ونمت بغرفة در
لهناك وحسيت على ايد تحاوط بطني من ورى ظهري صار لازك بصدره عرفته هو من ريحة عطره رجعت غمضت وجريناها نومة اني وياه للمغرب
صرت أحرك اصبعي على عيونه وحواجبه أضوجه بالحركة حتى يگعد عقج ملامحه متضايق ودار وجهه
گمت نمت على ظهره وأهز بأيده
نورجان :- شُبير گوم
- ااممم
55 تعليق
- ولك گوم
- هسه بس شوي
ولا فتح عينه ولا قلدلي عفته وگمت غسلت وجهي لگيت عمة شيخة بغرفتها لابسة إيزار الصلاة
وماما گاعدة عالجرباية مگابلتها دموعها تنزل وتسولفلها
غطى عالمكان منظر در بإيزارها وهي گاعدة تقرا قرآن
شيخة :- گولي يا الله حبيبة والله انا گلبي بارد عليها ما دام الولد وخالهم ورى السالفة تايجيبوها ويردوها إلج
- ليمتى شيخة خلص گلبي واني أنتظر هاليوم
- گومي خيتي توضي ومدي سجادتج توجهي لرب العالمين بالدعاء واشكيلو همج وهذا وكت غروب ويوم خميس ساعة إستجابة ان شاء الله
صدك شفتها گامت حتى تتوضى ورجعت عمة انطتنا إيزار صلاة من العندها وفرشتلها سجادة ووگفت تصلي
جانت هاي أول مرة أشوف ماما بهالمنظر واگفة بكامل حشمتها مطالع منها غير وجها وكفوف ايدها وجها گد مضاوي أحسه ديطلع نور جابلي السكينة
جنت واگفة بالباب أباوعلهم كلهم ديصلون انتبهتلي در
در الزهراء :- وانتِ مالج نية تردين تصلين
مشيت يمها گعدت للگاع گبالها
حجيت بصوت ناصي :- ترى والله اني أصلي من وكت معلمتيني بس مشكلتي مملتزمة ومرات أنسى
- انا أذكرج بيها بس لا تگطعيها والله حرامات
- ترجعين تعلميني
ابتسمت :- بعيني
- بس در مو گدامهم
عقدت حاجبها مستغربة :- عش هيج
- أستحي
طلعت منها ضحكة هادئة هزتلي راسها رحنا اني وياها لغرفتها شبير جان مموجود توضيت ووگفت يمها
صلينا اثنينا سوية هي على كرسيها والطبلة گبالها تربتها عليها واني وراها مچتفة ايدي على سجادتي بلا تربة
من كملنا هي گعدت تسبح بأصابعها واني رفعت ايدي دعيت بگلبي رب العاملين يرجعلنا بان سالمة إلنا
اندارتلي مبتسمة ابتسمتلها لا إرادي ضحكتها تجيب السكينة على گد مهادئة وملامحها ناعمة
ورى العشا تطشروا ناس بغرفتها وشبير طلع من البيت وماما يم عمة صايرات ميتفارگن ونظرات هيام وراهن
جنت دا أسولف لدر على الصار ويانا البارحة وگمزنا على صوت صياح من برة گمنا اثنينا طلعنا نشوف
عمهم نفسه الأجانا لبيتنا بذاك اليوم واگف بالأستقبال ديحجي هو وعمة شيخة بس صاير عصبي ويصيح
صاح :- انا مو گلت الغريبة هاي بعد مالها ضلة عند ولد عزام عش تعاندوني وتكسرون چلمتي
شيخة :- خوية مو هيج الحجي المرة مو غريبة هي ام بنيتنا حرمة شبير
- إلا غريبة ونص وحدة خالهم لفاها من الشارع لا نعرفلها أصل ولا فصل شنو هي ويجيبها تا يخليها گاعدة ببيوتنا
- اتعوذ الشيطان خوية هالحجي لو وصل لفدار ما راح يسكت والله تصير علج بحلگو شيفكك من لسانو ما عيرضى لحركتو الچلمة المو زينة
- يولي تعلميني انتِ بفدار هسع چم يوم ويطلگها حالها الگبلها ويردها منين ما جابها حطي براسج يشيخة لساني ما يطخ لسانج دام هالحرمة عندج هين بالبيت ومستقبلتها
علي جان واگف يسمع لكلامهم وعاقد حواجبه من سامع عمهم هيج گال فتح الباب وفات عليهم
علي خيبر :- جدي البيت بيت أبوي وحرمة خالي خطار هينا وعمرو أبوي ما سد بابو بوجه خطار عودين ساعة التجيك لبيتك وتدوس بساطك اطردها بس ما دامها عدنا نخليها على روسنا ولو مو جانت حرمة خالي تبقى تعود إلنا لو نسيت إحنا نسابتها وبنتها حرمتو لعمي
عمهم من سامع هالحجي من علي متخبل اندار لشيخة
- حتى بزرانكم صارت عترد بوجهي ولج شيخة
رده :- مقبولة منك انا بزر بس حط ببالك ما دام أبوي مو هين أنا صرت أبو البيت بمچانو وهاي انا أگلك ام بان مالها طلعة مناه
- وأنا گلت العندي يا أنا يا هالغريبة الحاسبيها من أهل بيتكم وانتَ إلي حساب وياك من يرد أبوك
لف عبايته واندار بنتر طلع بهمة من البيت وجهه محتقن
اندارت عمة لعلي بلوم
- ما يصير تكدر بخاطر جدك عليك انا واگفة أحجي وياه
- جدي سلطان تجاوز حدودو زايد بيتنا هذا نگعد بيه اللي نريدو بكيفنا محد إلو عدنا شي
- يا يمة حجوات تيم وأعصابو شتطلع قابل
فاتوا جوة يحجون بالصار وماما معلقت زايد على حجي عمهم جانت ساكتة طول مجانوا يحجون
لحد معرفت بيها رايحة مخابرة خالهم وخالهم داز على ابنه مؤتمن اجانا للبيت حتى ياخذها وياه لبيتهم
مؤتمن :- تفضلي ام بان السيارة برة
شيخة :- ولك أبوك دزك
- يابا بالقرآن هو الدزني بعد
- عيب عليه والله المرة خطار ببيتي ما تطلع من هين
- خابرني عمة وأكد عليَّ آخذها وياي لبيتنا ما يقبل
- اتركو أبوك انا أخابرو أحجي وياه
حجتها ومشت تجيب تليفونها
طلعت ماما لابسة ملابسها الأجت بيهم بيدها جنطتها
لزمت ايدها :- لترحين حبابة
شدن :- مالي گعدة هنا ماما عمهم حاد سنونه ومرايده يتخاربون بينهم شگلك من وراها أروح عاد لبيت فدار هناك گاعدة ببيت رجلي محد إله كلمة عليَّ
لزمت بأيدها أكثر :- عليج النبي لترحين وتعوفيني
عمة شيخة تحجي بالتليفون وماما تحجي من جهة واني أحبي وأتوسل بيها من جهة لخ صار بوجها علي
علي خيبر :- متطلعين من هين والله امشي نورجان اخذيها فوتوا للغرفة
ضحكت :- شلون يعني تحبسوني عندكم
- دفوتي فوتي بعدين نحجي
اندار لمؤتمن :- عمي افتر وروح رد لبيتكم ام بان متجي
- ها ولك تطردني
ضحك :- يابا حتى انتَ ابقى هنا بس عوفلنا حرمة خالي دحك بنتها شلون تبجي وراها
- عمي انا ما أتدخل خابروا أبوي ويگول أسوي
حجاها وگعد عالتخم فات شبير للبيت شافنا ملتمين من عرف بالصار أخذ التليفون من عمة وحجة ويَّ خاله
سده وباوع لمؤتمن :- روح خوية توكل من يجي خالي للغربية أنا أجيبها ونجي لبيتكم
- اي هيج الحجي معدل
حجاها وگام سلم وطلع أخذت جنطتها من ايدها
نورجان :- شوفي مو گتلج حتبقين
7 تعليق
تنهدت :- حكم القوي عالضعيف شحجي بعد
اندارت لشبير :- خالك حيجي
- اي الليلة جاي بس يخصلون شغلتهم
- شصار بموضوع عبد
- رايحين أبو علي وصدر الدين وماخذين دورية لبيتو وياهم بلاغ من المركز لاگين البيت فارغ طالعين رادين لبيت عمو وهذاك ناكر يگول ما أعرف عنو شي ولا عندو علم بروحتو لبيت خالي
- وتالي
- عاد ماخذينو للتوقيف تايحجي ما حصلو منو شي وهسع گبل ساعة خابرني مآب گال طلعناه
- وين اختفوا هم رجع وغير سكنهم
- لا شارد والظاهر مجرجر بنتج وياه إلا هيج
ضربت رجلها بقهر :- ديلا هسه هاي وين نلگاها
- يلگونو طفرتو ما مطولة هالمرة خالي قدم شكوى عليه وصار يمشي بيها بنفسو بس يگضبونو ويوگع بيدهم بنتج تردلج
ضلوا گاعدين على گعدتهم لهدعش بالليل يسولفون بالصار لحد ما خابر خالهم على شبير گله جيبها وتعالي
گام شبير أخذ ماما وراحوا لبيت عمو فدار
عمة شيخة أخذت در لغرفتها وعلي صعد لغرفته ضليت اني على گعدتي بالصالة لازمة جنطتها بيدي مخليتها تاخذها شبير گلي أرجعها وياي ما تضل هناك
انلزمت من شعري انجريت ليورى عطت بوجع
هيام :- رديتي وجبتيها وياج لهين ولج
- وخرري شبيج عوفي شعري
- هيّن طلاگج وهجمان بيتج لو ما صار على إيدي انا مو بنت أبوي
نترني وخرت منها دموعي بعيني
قبل لتوخر گرصتني بمتني حيل گالت :- أنا إلج
حجتها وراحت واني بمكاني أگمز من الوجع لازمة أيدي
طلعت للحديقة گعدت على حافة النافورة أبجي شهگتي شگت صدري گد متطلع قوية
انفتحت البوابة وفات شبير اول ما صارت عينه عليَّ
اجاني فاتح عيونه :- شبيج عش تبجين
من حجى هيج انفجرت بحضنه عبالك گلي ابجي
شبير :- شبيج ول أبوية شو أشوف وجهج
رفع راسي بيده :- احجي شبيج
شهگت :- أريد ماما
- انا مو گتلج ترد ما تضل بس اليوم خالي ببيتو وخلاها عندو الباجر هو يردها لهين
لزم ايدي مكان الگرصة عطت بوجع مكانها صاير أحمر
لزمها يباوع بيها عاگد حواجبه :- شبلاها ايدج
سكتت مبوزة عرفني من حركاتي نتر بوجهي
- نورجان تحجين لو شلون
- هيام گرصتني
- وعش سوت هيج
- ما أدري
حجيتها واختنگت رجعت أبجي أمسح بدموعي وتنزل
- وهيج هيام عملت بدون سبب
مسحت دموعي بطرف رداني :- لو بان موجودة مجان خلتها تسوي هيج وتوصلني
- هاا تتسبعين على أختي بالكلفه يعني
رجعت أشهك ضاج حيل گال :- اگفي هين هسع أجيج
باوعتله مشى ليجوة شوي وطلع هيام تمشي وراه
وصلوا عندي گلتله :- خيرك خوية
شبير :- والله خير اللي يصيبج أگدر أعرف عداوتج وياها عليمن
أشرت على روحها :- أنا
- اي انتِ شعندج ويَّ حرمتي بالله مأذيتج يمج گرباج
- شعندي وياها قابل بالعكس نورجان أحبها
رفع ايدي يشوفها :- عجل اللي يحب هيج يسوي
شهگت :- يا عاباني الله إن جان أنا عملت بيدها هيج
گامت تبجي واني فاتحة عيوني مصدومة بيها
- أنا ردت أحجيلك من زمان بس أگول لا تضل حرمة أخوي ما رايدة أخرب بينهم حرمتك ما تودني خوية ولا عندها كل إحترام إلي وعتملي براس عمتي عليّ
شال ايده يفرك بعيونه :- اسمعي اسمعي هيام أنا مو صاحب طويلة حرمتي أعرفها طينة مالها بهالسوالف وحجي المراوغ مالتجن
رفع اصبعه يحذرها :- نورجان جوزي منها لا تخليني أشوفج تصرف مني ما يسرج هاي أنا گتلج
- انعم الله عليك خوية صرت عتهادد على أختك لهاخر حرمتك امدة الوكت
حجتها وراحت تبجي تجاهلها واندارلي بس جان ضايج
شبير :- امشي فوتي نامي الوكت تأخر
أخذني من ايدي وطبينا للبيت غسلت وجهي وانداريت عليه لگيته يصفّن ولازم جگارته يدخن
نورجان :- شُبير وين راح ننام
- بكيفج روحي يم در
- وانتَ
- بعدني گاعد
لزمت ايده :- خلينا نروح لغرفتنا القديمة
سكت شوي يباوعلي جر نفس أخير من جگارته وكفاها بالمغسلة مدلي ايده وگال :- امشينا
صعدنا فوك الغرفة فارغة مبيها غير الجرباية والكنتور والجررباية بلا دوشك جابلنا فراشات فرشناهن بالگاع
واني نزلت لعمة أخذت منها مخدتين ورجعت صعدتله
شمرتهن بالگاع وسديت الباب فتحلي ايده مشيت نمت بصفه ايده لامتني بحضنه واللخ تلعب بشعري
مرت فترة جان هادئ حيل محجى شي رفعت راسي
- وين صافن
باسني برگبتي وما جاوبني :- شُبير انطيني موبايلك
جريته من يم راسه انطيته إله
رفعلي حاجبه :- أمر هذا لو طلب
ضحكت فتحه إلي وصرت بحضنه وأگلب بيه ألعب بألعابه انداريت باوعتله لگيته مغمض نايم
طلعت رحت للفيس طلبات صداقة كومة مراد عليهن وناس متصلة عليه ومراسلات نصهم بنات
هزيته من كتفه :- شُبير گوم
فتح عينه :- ها
- شوف
خليت الشاشة بوجهه :- شنو هاي
- انتَ گلي شنو هاي لويش هواي بنات عندك بالحساب
- دنامي نامي عبالي شكو
ورجع خلى ايده على عيونه يريد ينام وخرتها
- دا أحجي صدك شُبير يعني اني متخليني أقبل طلبات على صفحتي وانتَ لامهن كلهن عندك
لزم فكي :- ولج لامهن عندك شنو غير صفحة عامة وهن يراسلن
وخرت ايده :- سويها خاصة لعد
- انتِ سويها تعبان عوفيني أنام
حجاها ورجع لوضعيته لزمت المحادثات والحسابات العنده استملتهن حظر آخر شي قفلت صفحته وسديته
خليت التليفون يم راسه وحشگت روحي بحضنه
فتح عينه باوعلي :- ها سويتي البراسج
جرني لصدره ونمنا لثاني يوم لوكت متأخر
《 شهربان 》
صار يومين من اجيت ويَّ عمتي لبيت حماتها
حماتها جانت منفصلة وگاعدة هي وبناتها وابنها الصغير
المرة مقصرت وياي ولا استثقلت گعدتي عندها خاصة من عرفت اني حامل جانت كُلش حبابة وبناتها مثلها
گاعدة بالغرفة فتحت الباب واجتني بنتها
مدتلي التليفون :- شوفي بان هذا انطاني حظر
- شو بلة
أخذته من ايدها أباوع بالتليفون
عضيت شفتي :- اشتعلت روحك شبير وكت إستشرافك هسه
ضحكت وگعدت يمي
23 تعليق
صبا :- شبيج تحجين عليه مبين خوش شاب وحلو
- ها وين رحتي ترى المتزوجها اختي
زاد ضحكها :- لا عاد الصدك مبين يحبها مرضى يراسل وحدة من وراها
- واني وحدة لو اخت زوجته غير ديرد أگله ينطيهم خبر يجولي
صوت امها صاح من برة :- أجيتج ماما
دارتلي :- هسه اجي
أخذت تليفونها وطلعت فاتت عمتي وراها
أمجاد :- ليش گاعدة گومي هناك يم البنات
- تعبانة عمة مالي خلك
- شبيج خما يوجعج شي
- ميوجعني شي بس فهميني الرقم الوصيت عليه همام وين صار مو هو گلي اني أجيبه إلج
- والله ما أعرف مسألته
تنهدت ولزمت راسي :- وهذول أراسلهم محد بيهم يرد راح أتخبل وحق الله
- ماكو شي لتخافين
- شلون ما أخاف مليت واني أنتظر گتلكم عوفوني اني أروح متخلوني
- بكل عقلج أخليج تطلعين لوحدج
- لعد اخذوني انتوا
- انطينا مجال بس دنشوف شنو الوضع يمهم
- ليش هو شصاير
- متمشكلين جماعة عبد والأنباري وواحد رافع سلاحه بوجه الثاني وصايرة بينهم شكاوي وسجون
46 تعليق
فتحت عيوني :- لزموه
- عبد لا وين مختفي ووضعه يخوف متعرفين شوكت يطلع وعلى شنو ناوي
- شلون عرفتي
- عمج سالم سولفلي
- عمة مگلتي لأحد على گعدتي هنا مو
- لا محد يدري
طبطبت على ظهري :- ليضل بالج بس اصبريلنا كم يوم
اخذتني من ايدي گومتني غصب عني طلعتني من الغرفة يم البنات وامهن وإلتهيت وياهن وبسوالفهن
سألتني :- مجوعانة مشتهية شي أجيبلج
سكتت شوي گالت :- هاا
- أريد شعر بنات
- هسه أوصيهم يجيبولج غيره شنو مشتهية
- ماريد بس هذا صار يومين مشتهيته
ضحكت حماتها گالت :- يگولون نساوة الحلاة بنية
- اوي وشفايتلنا تصير عدنا بان صغيرونة
72 تعليق
ابتسمت مديت ايدي لبطني من أتلمسها أحس بيها بس ممبينة كبيرة حيل للگدامي عبالك بأشهري الأولى
بالليل گام يصير عندي نزف بالبداية خفت بعدين شفته انگطع ما اهتميت ومحجيت لأحد ثاني يوم صبحت هم شفت ملابسي متلطخة أخذت ملابس وركض للحمام
وضل النزف طول اليوم يجي وينگطع سولفت لعمتي
عمتي گالت حجزتلج موعد عند دكتورة نسائية أعرفها
وصدك للعصر أخذتني إلها رحنا بس اني وياها بسيارتها
وصلنا لهناك ودخلنا للدكتورة من فحصتني صارت تحجي على عمتي :- وين جنتوا عنها البنية دمها مصفر
كتبتلي نقل دم وحولتني رأسًا للمستشفى عمتي مكذبت خبر منها وطلعت أخذتني لهناك استلمتني الدكتورة النسائية هناك تحاليل وعادت علينا نفس الحجي
نايمة عالسدية ايدي على عيوني وايدي اللخ مادتها
اجتني عمتي :- ها شلونج
وخرت ايدي باوعتلها :- زينة انتِ مبينة دايخة
130 تعليق
لزمت راسها :- اي والله أشو لزمتني الدوخة من الصبح گاعدة وعلى هالفرة راح أخابر حماتي تجي لنروح نصير اثنين
خابرتها واجتنا بالليل يلا خلوني أطلع بعد مفحصتني الدكتورة مرة أخيرة وكتبتلي لستة مقويات
رجعنا للبيت رأسًا نمت واستمر هالحال اسبوعين روحات دكاترة ومستشفيات كل كم يوم كاتبيلي نقل دم
تعبت حيل هالفترة نسيت حتى ماما وأهلي
حملي حسيته ثگل وصار يجيني ألم بظهري اكثر من مرة ألاحظ بالداخليات صاير عندي نزف بسيط حيل
لحد ما بيوم فزيت بالليل على وجع فضيع ببطني
صرت أبجي وأصيح بأسم صبا فزت من نومها شغلت الأضوية واجتني خايفة من شافت حالتي
صبا :- شبيج بان
- صيحي عمتي وجع راح أموت
- عزة حتجيبين
صحت بيها :- ولج روحي
راحت تركض من الغرفة دقايق وفاتت عمتي وحماتها
اجتني شافتني أبجي تخبلت :- شبيج حبيبتي شنو اليوجعج
- وجع ببطني عمة مدا ايهدئ
گامت مخبوصة :- صبا حبيبتي بس بدليلها رايحة أجيب سويچ السيارة دا آخذها للمستشفى
حماتها گالت :- وتاخذيها وترحون لوحدكم
- اي لعد شسوي مدتشوفين البنية منتيهة
41 تعليق
- دوگفيلي بس أغير ملابسي أجي وياكم
- بسرعة سعاد استعجلي
أخذتني بليلتها للمستشفى الوجع جان يروح ويجي الألم يشبه ألم الدورة بس هذا بشكل أقوى
الدكتورة هناك گالت :- إحتمال تصير عندها ولادة مبكرة وهالشي مو بصالحها لا هي ولا الطفل بعدها شهرها السادس ممكملته
انطوني مهدئات حتى يقللون التقلصات ويمنعون يصير عندي طلق مبكر ضليت بالمستشفى يومين وبالثالث يلا كتبولي خروج وطلعت رجعت للبيت منتهية
ايدي تزرفت من گد ميچكچكون بيها ابر
مر اسبوع وانعادت روحاتنا للمستشفى من ورى التقلصات واستمرينا متابعة ويَّ الدكتورة النسائية
لحد ما استقرت حالتي ورحنالها للعيادة
سوتلي سونر وعمتي يمي تسألها على وضعي
گالت :- لا الحمدلله وضعها مستقر إذا استمرت هالشكل اهمشي تلتزم بالعلاج وبمراقبة مستمرة نتجنب الولادة شهر السابع
- هسه هي دخلت شهرها السابع صار كم يوم بس بطنها أبد ممبينة كُلش صغيرة
- هي حتجي كتكوتة ناعمة مثلها
فزيت :- بنية
- اي بنوتة ان شاءالله شعجب ممسوية سونر قبل
- لا مسوية بس وقتها دكتورتي گالت ممبين ومعدته بعد
عمتي باركتلي أحسها فرحانة أكثر مني من گد ممركزة بحملي وحالتي الدكتورة شافت تحاليلي وطمنتنا
طلعنا منها واني مرتاحة بعد أيام من المراجعات والفرة
112 تعليق
جانت دنيا الليل وگفت عمتي جابت عشا من برة
ورجعنا رحنا لبيت حماتها شفت سيارة واگفة بالباب
انخمش گلبي باوعت عليها بخوف :- منو هنا
هي هم مجانت أقل حيرة مني بس هدأتني
أمجاد :- لتخافين ماكو شي شبيج
نزلتني أخذتني وفتنا للبيت صاروا بوجهي عمتي سجودة وعمو سالم گاعدة يمهم حماة عمتي
وعلى جهة گاعد رجال غريب
انداريت عليها صحت :- گتيلهم مو ؟ ولج وصيتج گتلج لتگولين لأحد على مكاني
- بس اهدأي خلي أفهمج
- وخري مني لتلزميني
نترت ايدها وأريد أمشي للغرفة آخذ جنطتي وأروح
مخلوني گام عمو اعترض طريقي ولزمني واني أنفض بجسمي وأصرخ حتى يعوفني وگفني گبال عمتي
لزمته عمتي أمجاد :- على كيفك وياها سالم البنية حامل
سالم :- خلي توگف شرايدين منها قابل
وگفني غصب عني لازم ايدي ميخليني أتحرك
سجودة :- شلونها
جانت موجها السؤال لعمتي أمجاد
گلتلها :- زينة الدكتورة طمنتنا على حالتها وحالة البنية وگالت كل متأخرت الولادة أحسن إلها متأملين تكمل لشهر التاسع
باوعتلي :- عالخير تتربى بعزج
نزلت دموعي ولزمت ايد عمو :- شتردون عوفوني خلوني أروح ما أسويلكم مشاكل والله ولا أگول لأحد
تجاهلتني واندارت تحجي ويَّ الرجال الغريب
عمتي أمجاد واگفة يم عمو سالم وحماتها تباوعلي مقهورة أشوف بنظراتها تعاطفها وياي واني بيدهم
گامتلي عمتي بيدها محبرة وأوراق انطاها إلها الرجال
سجودة :- انطيني ايدها
جر ايدي عمو غصب عني وبصموني على الأوراق
رجعت أخذت قلم لزمتنياه :- وقعي هنا فضيني
شمرته من ايدي للگاع خزرتني ونزلت جابته رجعت انطتنياه لزمتنياه ورجعت وگعته عناد بيها
ضربتني راشدي صارت بوجها عمتي تمنعها
أمجاد :- سجودة شبيج مو دا أگلكم البنية حامل
- طبها وجع خلي توقع الأوراق هاي لا أشوفها النبي العربي هالساقطة هاي
- هسه توقع هسه
اندارتلي عمتي تتوسل بيَّ :- وقعي بان اخلصي وخلصينا
رديت من بين سنوني :- لو تموتون
لزمني عمو من شعري رجع راسي ليورى
سالم :- توقعين لو أحط هسه طلقة براسج وأخلص عليج
صرخت بوجع :- شيل ايدك وخر عوفني
دفعني لزمتني عمتي بسرعة مخلتني أوگع
أمجاد :- سالم صدك تحجي هو هيج
- خلي تبطل عناد وتوقع
اندارت سجودة للرجال گلتله :- ميصير تكملهم بصمة
ردها :- لا اثنينهن لازم
اجتني :- وقعي لج فضيني يلا مگاعدتلج الليل بطوله
حاولوا وياي رادوا مقبلت لحد مجريت الورقة شگيتها
تهسترت عليَّ ضربتني راشدي وصار عمو فوك راسي كملها عليَّ جرني من شعري ضربني على حلگي
گوة جروني أمجاد وحماتها من ايده
عمتي صارت تحجي عليهم وحماتها هم مسكتت
گلتلهم :- اني محسبة خاطر لأمجاد وضليت ساكتة إلا لو عليَّ والله أبلغ الشرطة ميصير هالشكل استلمتوا البنية كفخ وهي مريضة
اندارت سجودة لعمتي :- لزميها وعقليها اگبريها عندج هنا واقفلي الباب عليها لتخليها تطلع لحد ما أجي باجر
لموا أوراقهم وطلعوا هي وعمو والرجال وياهم
لزمتني :- انتِ زينة خما متأذية
دفعت ايدها :- وخري
گمت مسحت الدم من حلگي وعدلت شعري المكفش
مشيت للغرفة أدور على جنطتي اجتي وراي
أمجاد :- بان وين تردين
- انتِ معليج
جنت أحجي وأمسح بدموعي وعيوني تدور بالجنطة بحيث مستوعبت هي گدام عيني بس مشفتها
- مراح أخليج تطلعين
باوعتلها :- مو بكيفج
- انتِ جبرتيني أتصرف هالشكل
حجتها وسدت الباب عليَّ وقفلت الباب
وگفت ثواني ممستوعبة الصار مشيت للباب أفتح بيه مثل المخبلة وأصرخ عليها أريدها تفتحلي
گمت أباوع داير مدايري اجت عيني عالشباك مسحت وجهي وأخذت جنطتي لبستها ومشيت لهناك فتحته رفعت نفسي صرت عالحافة وشلت رجلي من الگاع
عبرت عالجهة الثانية حسيت بوجع طعن بطني عضيت شفتي من الألم طلعت مني صرخة غصب عني
سديت حلگي دموعي نزلت ردت أمشي مگدرت شاغت روحي نزلت للگاع أبجي طلعوا عالصوت شافوني
جنت أتلوى بالگاع ولازمة بطني والوجع يزيد أكثر
لزمتني عمتي شالتني حازلت تمشيني مگدرت أتحرك
صرت أصرخ وأبجي بلا وعي أخذوني هي وحماتها صعدوني السيارة وطلعت بيَّ للمستشفى فحصتني الدكتورة گالت عندها ولادة الطفل نازل
لبسوني ودخلوني لصالة الولادة
انخطف لوني من سمعت العياط لزمت ايد الممرضة
توستلها واني أبجي :- عليج النبي طلعيني ماريد أجيب
- دمشي ماما صدك جذب
أخذتني نومتني عالسدية الأكثر من الوجع جان إحساس الخوف والغربة العشته ساعتها طول فترة ولادتي واني أصرخ بأسم بابا وماما
واجت بنتي
اجت ريحانة للدنيا
اجت كسرة گلبي
أسمع صوت بجيها واني شبه فاقدة تناوشوها الممرضات أخذوها مني غمضت عيوني محسيت بشي
وين يلا فتحت لگيت نسمة يم راسي لازمة ايدي
اول مشافتني ضحكت :- الحمدلله عالسلامة
بجيت :- بنتي وين
- أخذوها للخدج ليضل بالج
- عليج الله مبيها شي كاملة
- والله زينة شبيج عمتي يمها هناك لازمها مراقبة والدكتورة گالت حتبقى هناك أيام لحد منتأكد من إستقرار حالتها لأن جبتيها بالسابع
ضلت نسمة يمي وشفت همام اجاني تحمدلي عالسلامة وباركلي على ولادة بنتي مخلوني أشوفها أبد
ضلت نسمة يمي وكلتني گوة عني وسألتها على ماما
بان :- مجاب الرقم
- ما أدري بان همام ميحجيلي شي واني هم من اسأله على عمة شدن يتهرب مني
- صيحيلياه
- عاد اكلي
- نسمة صيحيه لتشلعين گلبي
تنهدت وگامت مني طلعت جانوا اثنينهم گبالي الباب مفتوح أشوفه يحجي وياها وأشرلها بأصبعه على حلگه
رجعتلي :- يگول محصلته
- ليش ما احاني أحجي وياه
سكتت مردت ونظرتها إلي خوفتني ما ريحت گلبي
نوموني بس ليلة ولثاني يوم عساس يكتبولي خروج همام ونسمة راحوا گالوا الصبح نجيج ضلن الممرضات يروحن ويجن يم راسي يغيرلي المغذي نمت ليلتها
ثاني يوم فتحت عيوني بصعوبة أصيح أي أحد يجيني
فاتت الممرضة شالتلي الكانيولا
گتلها :- عفية بس صيحيلي واحد من أهلي
- ماكو أحد برة
صفنت بوجها :- لا گالوا حيجوني الصبح
- ماكو أحد حبيبتي الممر فارغ
- زين عمتي هنا ويَّ بنتي بالخدج شوفيلياها عفية
ما أعرف انقهرت على حالتي شافتني صغيرة راحت واني گاعدة على أعصابي أغمض وأفتح بثگل
شوي رجعت فاتت الممرضة
گالت :- الممرض الخفر يگول مستلمين البنية من البارحة وطالعين...
