رواية سواد الاثمد الفصل الرابع والعشرون بقلم نورس
فاتت الممرضة گالت :- الممرض الخفر يگول مستلمين البنية من البارحة وطالعين
فزيت من مكاني بفزع اول مسمعتها
بان :- شلون يعني طالعين
- والله هذا العرفته گلولي أهلها طلعوها على مسؤوليتهم
وگفت گبالها أبجي :- شلون ماخذيها اني أهلها ولج اني أمها
تهسترت أبجي وأحجي بلا وعي والممرضة لازمتني
اجت الدكتورة تشوف شكو والممرضة وگفت تحاجيها
ضلن وحدة تباوع بوجه الثانية وعينهن عليَّ
الدكتورة گالت :- ماما ممعقولة عايفينج هالشكل بلا مرافق من البارحة ما عندج موبايل تخابريهم
- أخابر منو.. منو الألي اني أخذوا بنتي أخذوا ريحانة رجعولياها أريد بنتي
گمت وگفت أصرخ بوجهن :- والنبي أشتكي عليكم بالمركز وأحملكم المسؤولية شلون تخرجوها بلا علمي
- هم أهلها الأخذوها ماما احنا شعلينا
- ولج اني أهلها هاي بنتي اني هاي ريحانتي
اندارت الممرضة للدكتورة :- أصلاً ما عدنا بالخدج طفل حديث ولادة بهالأسم
ردتها :- اي بس هاي أعرفها البارحة جابت بنتها اجت ولادة مبكرة بالسابع
گعدت للگاع أضرب برجلي :- ياربي دخيلك شسوي بروحي
اني أبجي وأهذي وهذن فوك راسي انخبصن من سمعن كلامي بهالأثناء اجت نسمة فاتت شافتني بالگاع
اجت گومتني تحجي وياي واني فاقدة الدكتورة عرفتها لأن البارحة هي وياي وگعت عليها بالحجي وترزل بيها
شلون عايفيني لوحدي هنا وهي وگفت تبررلها وتتعذر
عاد طلعن وعافنا واني على وضعي دموعي مسكتت
روحي رايحة مالي طاقة صرت گوة أجر النفس
لزمتني گعدتني عالسدية :- بس أحاجيج اسمعيني شبيج
نترت ايدها :- وخري ايدج عني كلكم كذابين
- بشنو كذبت عليج مو گتلج راح نجيج الصبح اني وهمام وهيانا اجينا
- وبنتي وين ليش مطلعيها ومگايليلي
- عمتي أخذتها لغير خدج أضبط من اللي هنا حجت ويَّ الدكتورة علمود تنقلها وحتى هي قبلت على طلعتها بس گالت على مسؤوليتكم
- وليش ناقليها لغير مستشفى نسمة إذا بنتي بيها شي احجيلي لتضمين عليَّ وتخليني معمية على عيوني كُلشي ماعرف
- والله مو كُلش فهمت عمتي ملازمتها معافتها أبد گالت يصير عندها ضيق بالتنفس ومبقيها بالخدج
لزمت ايدها :- اخذيني إلها عليج النبي
- بان انتِ بيا حال شوفي ملابسج هاي نازفة خلي أصيحلج الدكتورة
- وخري ماريد مبية شي بس اخذيني لبنتي أريد أشوفها
- هسه بس دگومي جبتلج ملابس وياي
- نسمة حلفتج
- والله هسه بس دگومي انتِ همام هنا راح يكمل إجراءات الخروج ويجي أگله ياخذج
سدت الباب وغيرتلي ملابسي گمت وياها لازمتني
فات همام :- ها شلونج اليوم
- دسكت يمعود غير لگيتها دتعارك الدكتورة والممرضة وتهدد بيهم
- لا يابة
- والله ورحت أكلت رزالة من هاي التمام من الدكتورة
ابتسم :- حتى وهي نفاس ما تگعد راحة
- راح تاخذوني لبنتي مو
ضلوا واحد يباوع بوجه الثاني
انداريت لنسمة :- انتِ گتيلي حياخذج
همام :- آخذج بس انطي لروحج مجال باعي حالج
طلعنا من المستشفى لسيارته واني الطريق كله دايخة مغمضة عيوني وراسي على كتف نسمة گاعدات ليورى
بالي كله جان بالبنية وشوفتها
لحد موگفت السيارة فتحت عيوني وباوعت جايبني لشقتهم انداريت عليه سبقني ونزل اجه من جهتي
- اني مو گتلك تاخذني لبنتي شكو جايبني لهنا
- آخذج بس ارتاحي هسه مو وكتها
- مو بكيفك هسه تاخذني يلا
عاندت ماريد أنزل من السيارة نزلني غصب عني واني مجان عندي الحيل يخليني أعترضه مشوني للعمارة
دموعي مسكتت حتى فحطت واني أحاجيهم وأتوسل
وگفنا ين الدرج اندارلي :- تگدرين تصعدين لو أشيلج
نسمة :- لا همام عفية شوف الدرج شطوله شيخلصه إلها وهي توها نفاس تريد راحة لو تعاي اصعدي درج
شالني من الگاع وسط إعتراضي ما اهتم صعد فوك وگفنا گدام باب شقتهم أشر لنسمة على جيبه
- مدي ايدج طلعي المفتاح مال شقة
طلعته وفتحت الباب دخلنا جوة خلاني عالتخم
گعدت لازمة بطني مغمضة عيوني حيل
- شبيج شنو اليوجعج
فتحت عيوني لگيته واگف گبالي يباوعلي
نزلت دموعي بقلة حيلة :- أحلفك بروحه لأبوك تاخذني أشوف بنتي
هز راسه :- ميخالف منا للعصر ارتاحي ونروح اني وياج آخذج تشوفيها
سكتت وصارت حجايته ببالي گال العصر يعني العصر
صاح على نسمة طلعت من الغرفة مغيرة ملابسها
- محتاجة شي أجيبلكم
- لا عود إذا اعتازيت اني أخابرك
- راجع العصر عينج عليها لتخليها تطلع
عافنا وطلع من الشقة اجتني
گتلها :- نسمة ملابسي هاي هم اندمرت
- محضرتلج الحمام راح أشوفلج غيرهم فوتي انتِ وهسه أجي وراج
ساعدتني گومتني مشتني للحمام نزعت ملابسي شوي واجت وراي مقبلت تعوفني كاسرتلي المَي سوته دافي
وصارت تفرك جسمي بأيدها على كيف جوة المَي
بدلت وطلعتني رادتني أروح أنام بالغرفة مقبلت بقيت بالصالة متمددة عالتخم جوة راسي الكوشة
غيرتها إلي انطتني مخدة وغطى غطتني بيه وراحت
ضليت لوحدي بالصالة أسمع صوتها تتحرك بالمطبخ
ايدي على عيوني صارت دموعي تنزل
نسمة :- بان شبيج
وخرت ايدي باوعتلها :- ردت أشوفها وآخذها بحضني وأرضعها من صدري ليش هيج ديصير وياي
گعدت عالتخم الثاني :- شبيدج انتِ يا حبيبي بس تصير زينة تستقر حالتها ويطلعوها ترجعلج
- گلبي ممرتاح أحسكم ضامين شي عني
- ولا تحسين ولا غيره انتِ بس العليج ارتاحي هسه
- أريد ماما
- بس يجي همام العصر احجي وياه عالرقم
- معقولة كل هالفترة مگدر يوصللها
- ماعرف مسألته
- زين الباقين محد اتصل دك شاف مسجاتي الدزيتها
- نورجان أصلاً مختفية لحد هسه الطلب الدزيتيه إلها من ذاك اليوم معلق وزوجها حاظرني حتى مشايف المسج
- استغفر الله شبيه هذا
- تنتظرين الأكل يجهز حتى تاكلين لو تنامين يلا
- ماريد شي بس خليني أغمض تعبانة
- نامي وأگعدج عالغدة
غطتني زين قللت الأضوية بالشقة وعافتني
المكان جان هدوء يساعد عالنوم غمضت مدريت بروحي
ما تهنيت بالنومة جنت كل شوي أفز وأرجع أنام
لحد مگعدت على ايد نسمة وهي تهزني على كيفها
فزيت فتحت عيوني أباوعلها
گالت :- اسم الله شبيج
گعدت على حيلي خلت المخدة وراي جنت عرگانة حيل
لزمت صدري أفرك بيه مختنگة أحس المكان ما بيه هوى
أشرت لنسمة تگومني أخذتني للحمام غسلت وجهي لميت شعري ليورى طلعت صارت بوجهي
نسمة :- ها
- مبية شي اختنگت شوية
رجعتني لمكاني صبت أكل وجابته خلته گبالي عالطبلة گعدنا اثنينا ناكل وهي تسولفلي على ولادتي البارحة
أكلت شوي وعفت الخاشوگة من ايدي
باوعتلي :- شو مأكلتي
- شبعت
- مشتهية غير شي أسويلج اني ماعرف هواي بهالسوالف بس سألت صديقتي وگالت سويلها سوب لحم
- لا هذا هو شبعت والله
شالت المواعين ووگفت تغسلهن بالمطبخ سألتها على همام شوكت يجي جانت الساعة عابرة الأربعة
ضليت گاعدة على نار ورغم تعب جسمي ورغبتي بالنوم مگدرت أغمض عيني وبقيت منتظرته
صارت تروح وتجي تباوع على حالي ايدي على خدي كل شوي اسألها عليه إذا خابرته صرت ألوب بمكاني
لحد مأجتني بيدها تليفونها گعدت يمي
- خابرتيه
- اي مو گتلج هسه حيجي
- نسمة والله دا أحسج تحجين هيج بس حتى تسكتيني
- مو هيج بس باعي شريد أشوفج
تحجي ومدنگة بتليفونها تگلب بيه لحد ما استقرت على صور ومدتلياه وهي مبتسمة أخذته منها
شهگت من شفتها ودموعي صارت تنزل جهاز التنفس على وجها بيدها كانيولا جانت صغيرة حيل
باوعت لنسمة دموعي بعيني وأضحك :- شگدوتها
ضليت أگلب بين الصور ماخذيلها من بعيد أحس روحي فرفحت من شفت حالها وگلبي وجعني عليها
لأول مرة من وكت معرفت بخبر حملي لحد هاللحظة أحس بگلبي ديرفرف مثل الحمامة خوف عليها
من رجعتلها التليفون جيب بعد اللي يسكتني
نسمة :- يعني اني شوفتج صورها حتى تهدأين شوي لو ترجعين تبجين
- مو بيدي والله روحي فرفحت من شفت منظرها ايدها الترفة شلون تحملت الأبرة مال كانيولا
- مبيها شي والله كلها كم يوم ويطلعوها وعمتي گالت بدت ترضع
- خابريها
- أخابر منو
- عمتي خابريها اسأليها عليها ريحي گلبي عليج النبي
لحيت عليها شالت تليفونها خابرت على عمتي
شدني حجايتها وهي تگلها :- عمة شلونها لين شگالج الطبيب على وضعها شوكت تطلعوها
ضلت تحجي وياها وفاتحة سبيكر تسمعني من سدته
گالت :- ها هسه ارتاحيتي
- منو لين منو گلكم اسمها لين شنو بكيفكم تسمون بنتي إسمها ريحانة
سكتت مردت وجها صار ينطي ألوان عافتني وگامت
عرفتها دتشرد من اسألتي وبعد مصار شك هسه تأكدت اكو شي يصير من وراي مدا يرضون يحجوه إلي
باوعت وراها فاتت للغرفة گمت من مكاني جريت جنطتها من الطبلة طلعت فلوس منها خليت بجيبي
لبست حذائي من الباب ومشيت طلعت من الشقة
نزلت الدرج شوي شوي موصلت للشارع إلا واني منتهية
وگفت أجر نفس ومشيت للشارع وگفت تكسي انطيته عنوان بيت عمو فدار ومشى الرجال أخذني لمنطقتهم
طول الطريق راسي عالجامة عيني بالشارع أباوع للناس
لحد موگفت السيارة جانت الدنيا توها دتغرب
انطيته كروته ونزلت باوعت لبابهم مقفول
انتهيت بجي وگعدت بالباب منتظرة واحد بيهم يجي
الناس تفوت وسيارات تباوعلي واني على گعدتي
لهناك وطبگت سيارة همام گدامي ونزل منها بأتجاهي
فزيت من شفته
صحت :- بس تتقرب أصرخ وألم الناس عليك
همام :- شجابج هنا متگليلي گلبت الدنيا عليج مخليت مكان مدورتج
- معليك انتَ روح
- شمنتظرة بس فهميني
- هسه يجي فدار وأشتكي يمه عليكم وأخلي يرجعلي بنتي
- واحنا وين ماخذينها بنتج غير بالمستشفى الغضب
- لتصيح أگلك اخذني إلها متقبل ضحكت عليَّ گتلي العصر وما أجيت طلبت منك رقم ماما گتلي اني أجيبه إلج وهاي صار كم اسبوع بأسبوع تقشمرني
- مو اجيت وما لگيتج
- كذاب هاي نسمة خابرتك عليَّ يلا اجيت
مسح وجهه يستغفر ورجع باوعلي :- بابا گومي گعدتج هنا شيسموها عود
- والله ما أرجع وياك أضل أنتظر فدار بس يجي أول واحد أشتكي عليه هو انتَ
- رحم الله والديج امشي ديلا
- ما أروح گتلك لتلح
تخصر يباوعلي :- وتالي يعني
- هسه يجون واني أعلمك
- لج بابا لو هنا جان شفتي دورية الحماية مالتهم واگفة گدام الباب
- أدري مو بالبيت دا أشوف القفل عالباب مو عمية
صاح :- لعد شمگعدج هنا
- معليك هسه يجون
- والله ميجون لتعبين نفسج
- گتلك معليك يلا ولي
ما رد عليَّ وضل واگف واني عندت هم وضليت بمكاني
وعلى هالحال فوك الساعة والدنيا ليل اني واگفة وهو يروح ويجي من سيارته يحجي وياي يحاول يقنعني
اجاني وگف گبالي :- وتالي بان
- روح منو عاتب عليك توگفلي حراسة
- وأعوفج لوحدج شوفي الساعة بيش صارت
- معليك انتَ
- والله لو أدري بيهم يجون جان اني درت وجهي ورحت
ضليت ساكتة عيوني مغورگة اجة گعد ركبة ونص
- گومي يلا شفايدة گعدتج هنا بالله عاجبج الرايح والجاي يباوع عليج
- اريد أروح لماما
- ليش مو ردتي تشوفين بنتج
رفعت راسي بسرعة :- راح تاخذني
- بعيني والله تشوفيها أول ميطلعوها هسه إذا رحتي هناك ميدخلونج ترى
- شوكت يعني
- بس كم يوم ويكتبولها خروج ابقي هسه ارتاحي يمنا بالشقة قصرنا عليج بشي حتى تطلعين هالطلعة بالله
گام وگف ومدلي ايده :- گومي يلا امسحي دموعج
گمت وياه رجعنا للشقة ضليت عدهم أربعة أيام نسمة مقصرت گايمة بيَّ همام بس أول يوم بات هنا وباقي الأيام عافلنا الشقة حتى آخذ راحتي أكثر
جان يجي يشوف النواقص وشمحتاجين ويروح اني حالتي جانت أحسن من أول أيام أتحرك براحة
باليوم الخامس من اجه همام لزمته إلا تاخذني أشوف البنية جان معترض ورافض رفض قاطع
- انطيني اسم المستشفى اني أروحلها
- شلونج انتِ تروحلها هي
- دا أحجي صدك همام لو تاخذني لو تخليني اني أولي أشوف طريقي لا دتخلوني أطلع ولا دتسمعوني حجاية تريح گلبي عايفيني على نار
- يعني بنتج لو بيها شي أضم عليج
- لعد ليش متخليني أروح اشوفها
- مو وكتها غير بعد ما مطلعيها
عافني وگام للغرفة ونسمة واگفة تباوعلي مقهورة
راحت وراه باوعت عالباب مسدود مشيت وراهم
اذني عالباب أسمع صوتهم وهم يحجون
نسمة :- اخذها همام
وهو يردها :- وين آخذها كل عقلج
- خلي تشوف بنتها حرام عليكم تسوون بيها هيج گلب أم حسوا بحرگة گلبها
رد بنتر :- لا
- عاد مرة أخيرة والله إذا عرفت بعدين وصارلها شي الملامة تصير بوجهنا احنا
- شبيج انتِ ما سمعتي أمي شگالت
- وهاي المسكينة شذنبها تفرقوها عن بنتها وضالة يا غافلين إلكم الله
- خلي ببالج اني حتى ضلتها هنا بالشقة بعدني ما گايل لأحد عليها شلون ترديني آخذها إلهم بيدي
- وتالي شلون مدتشوفها شلون مفرفحة عالبنية
- ما أدري نسمة ما أدري لتسأليني مدري أخابر امها مدري أعوفها مدري أروح لبيت هذا الأنباري وهذول بس يعرفون بيها وبموضوع البنية يجيبولهم دروية ويجونا كلها تروح بيها من أبوج لأمي لخالتي أمجاد
- لعد خاطفين البنية من امها شتردوهم يسوولكم
- خاطفين شنو انتِ ليش متعرفين تحجين شتشوفيني اني قابل عالجاي يسوونه
- مدامك ساكت لهسه وقابل باللي ديصير انتَ وياهم
- وشترديني أروح اني للمركز أبلغ على أمي وأبوج وأگلهم خاطفيها
أحس گلبي صار بين رجلي ابتعدت من الباب دموعي عشرة عشرة صرت ما أشوف أريد بس ألبس حذائي
فتحت باب الشقة بسرعة تخردلت صار صوت
طلعت أمشي بسرعة أريد أوصل الدرج سمعت صوته يصيح وراي صرت أنزل بسرعة ملحگت اجاني لزمني
صرت أصرخ بوجهه وأوخر بأيده حتى يفلتني
خلى ايده على حلگي كتم صوتي ورجعني للشقة
دخلني وسد الباب يلا عافني
صحت :- افتح الباب همام وحق الله ما أعديها إلك
- دصبري بس أفهمج
- ماريد أسمع شي كلكم كذابين مينوخذ منكم لا حق ولا باطل وخر من الباب خليني أروح
- مو ردتي تشوفين بنتج امشي آخذج إلها
- ماريد عوفني اني أروحلها
- متندليها وين
- عند عمتي أمجاد وين مموجودة عمتي بنتي وياها
باوع لنسمة بحيرة جانت واگفة وراي
انداريت عليها :- ليش محجيتيلي مو ثقيت بيج
گامت تبجي :- مو بيدي بان هم گلولنا منحجي وحتى جيتنا إلج بيوم مطلعناج من المستشفى ميدرون بيها گالولنا نعوفج لوحدج وجان جاي عمو ستار ياخذج لبيتنا بس احنا سبقناه
- شيردون مني مكفاهم أخذوا بنتي
- والله بهاي مكذبت بنتج صدك جانت بالخدج واليوم يلا طلعوها أخذتها عمتي لبيتنا
- أريد أروح هناك
باوعت لهمام :- بيك وبلياك اني رايحة فوخر من الباب أحسنلك
سكت شوي يباوعلي بحيرة
گال :- امشي اني آخذج
فات للغرفة جاب سويچه ونزلنا اني وياه للسيارة
توه فتحها ودنصعد اتصل تليفونه شاله يجاوب
باوعلي عاقد حواجبه :- يلا منتظرج
سد التليفون گتله :- مراح تروح مو
- لج شبيج انتِ متنطين مجال هسه اصبري بس تنزل نسمة تروح ويانا
درت وجهي عنه انتظرناها نزلت ورحنا لبيت عمو سالم
فكري كله بيها عقلي مقفل فد مرة مدا أگدر أفكر بشي غير ببنتي شنو تشوفها مرة أخيرة ليش ميحجولي
وصلنا هناك طبك السيارة بالباب طفاها
گال :- لحد تنزل خلي أشوفهم موجودين لو لا
نزل وعافنا عيوني وراه من فات للبيت ويتخايلي يفوت ويلگاها بيد عمتي نزلت دموعي ميتة قهر
اندارتلي نسمة :- بان تسمعيلي وتاخذين بحجايتي
ضليت ساكتة أباوعلها ممفتهمة
گالت :- اشردي
سكتت شوي ورديت :- وين أشرد شنو شبيج
- والله أحجي صدك هالمرة ترى الي جوة كلهم كذابين منتظرين توگعين بيدهم ينهشون لحمج كل واحد بيهم رايد منج مصلحة شكل ويشمرج محد بحالج اسمعي مني وروحي اشردي لأمج
- وين جنتي ليش محجيتي هالحجي من زمان
- مو بيدي همام جان موصيني ما أفتح حلگي ترى بنتج متفقين يسجلوها بأسم عمتي أمجاد وزوجها حتى لغوا رجعتهم على تركيا لحد ميطلعون جواز للبنية وتكمل أوراقها يلا ياخذوها ويرحون
شعر راسي وگف من سمعت كلامها دنگت لجنطتها
ورجعت اندارت مدتلي بيدها فلوس :- هاج أخذي هالفلوس أجريلج تكسي وروحي لأمج وانتِ عود دبريها وفهميهم گليلهم خطفوها باگوها روحي اشتكي للشرطة ومراح يقصرون يجون يرجعولج بنتج
أخذت الفلوس من ايدها وايدي ترجف
گالت :- إذا همام سكت اني بعد ما أگدر أسكت خليهم ينسجون يتوقفون ميهمني لأن الديسووا ميرضي لا الله ولا رسوله
- وأعوف بنتي
- الإجراءات راح تاخذ وكت بعدهم حتى جنسية ممطلعيلها تلحگين ترحين لأمج وتبلغون الشرطة تجون تاخذوها
- بس ماعرف ماما وين
- مو گلتي عند نسابتها بالغربية
- ما أندلهم نسمة
باوعتلي بحيرة رجعت حجت :- روحي لعد لبيت هذا الأنباري الرحتيله ذاك اليوم وگليله بالصار ممعقول لهسه مراجع لبيته
باوعت للبيت گالت :- يلا بان شمنتظرة استعجلي
ضميت الفلوس بجيبي ونزلت من السيارة صرت أمشي سريع أريد ابتعد عن البيت بلا ما أندار وگلبي يدك سريع
استوقفني صوت همام من وراي وهو يصيح :- بان
انداريت عليه لگيته طالع من البيت شايلها بيده
تقدم عليَّ واجه بأتجاهي واني على وگفتي أحس رجلي بعد ميحملوني تقرب مني انطانياها شلتها بيدي
مگدرت أسيطر على رجفة جسمي وغواش عيوني من گد متجمعت بيها الدموع مسيطرت أخذها مني
همام :- تعاي لهنا من الشارع
- بس أشيلها
- متگدرين لتوگعيها تعاي هنا جوة
صار يمشي واني وراه عيني مشلتها منها وهي بيده لافيها بملحف صغير أبيض أباوعلها وأمسح بدموعي
من گد مناعمة وصغيرة تجي بگد چفه لهمام
دخلنا لبيت عمو سالم وگفت بالحديقة ونسمة واگفة تباوعلي دموعها بعينها مديتله ايدي ينطينياها
أخذتها منه أباوع لوجها حتى مگدرت أرمش ممصدگة هي بيدي وهاي الشايلتها بنتي اني صرت أضحك وأبجي مثل المخبلة دنگت على نحرها شميته وبستها
ريحة طفل نفاس
عقجت ملامحها تضايقت وصارت تبجي بيدي
گعدت تربعت عالحشيش وخليتها بحضني أغطي بيها ولامتها بحضني أريد أضمها بروحي ولا يوصلها بشر
سكتت بحضني تمصمص بشفتها طلعت لسانها
همستلها :- جوعانة يأمي ريحانتي روحها لأمج
همام :- باردة بان مو زين عليها
اندار :- تعاي نسمة اخذيها دخليها جوة
أخذتها لصدري وأباوعلهم
- ديربالكم واحد يتقرب متاخذوها مني
- امشي انتِ فوتيها جوة شرايدين منج
اجتني نسمة دنگت بمستواي
نسمة :- گومي حبيبتي فوتي مصدگنا يطلعوها من الخدج لترجع تتمرض مو زين عليها البرودة
گومتني والطفلة بيدي يردوني أفوت
باوعت لهمام گال :- ها شو تباعين
- اخذني لبيت فدار
سجود :- اني مو گتلك فد وحدة أدبسز درب أمها لو عايفها بحسرة شوفتها تريد تروح تركض للأنباري
اجت من ورى ابنها
گتلها :- وانتِ منو حتى تمنعيني آخذها وأطلع
- لا يابة منو اني هو انتن بعد حسبتن لأحد روحي يلا بحضن الأنباري خلي يلمجن يمه انتِ وأمج
- اي آخذ بنتي وأروح
- امشي لج صدگت تاخذها هاي بنت أمجاد وطارق مو بنتج
- لا مو بكيفج بنتي اني لوحدي
لازمتها حيل ما أريد أعوفها وأباوع عليهم واحد واحد
اندارت لعمتي أمجاد الجانت واگفة وراها
- امشي أخذيها منها
اجتني صارت گبالي مدت ايدها :- انطينياها بان
- لا وخري اني أمها
حجيتها ورجعت ليورى ضامتها لصدري
أمجاد :- جيبيها لتبرد مو زين عليها تبقى برة يلا بان
صرت أبجي :- ليش تسوين هيج ليش تردين تاخذيها انتِ مو تحبين بابا وبابا يحبني وميرضى على أذيتي لتأذيني ببنتي عمة لتحرگين گلبي عليها
- عوفيلي البنية اني أربيها وانتِ روحي ارجعي لأمج
- اي آخذها وياي
- وانتِ كل عقلج عبد يخليها عندج راح ياخذها منج رضيتي والما رضيتي وبالحالتين خسرانة عاد خلي البنية تضل عندي
صحت بيها :- بنتي هاي أگلها بنتي ما أنطيها لأي واحد لا أنتِ ولا عبد
سجود :- دخذي البنية من ايدها الثولة واگفة تترادد وياها
اجتني تريد تاخذها بالگوة واني لازمتها ما أنطيها
صاحت عمتي بهمام باوعلي متردد جان متضايق ما تحرك ولا سمع كلامها عاد اجتني من ورى لزمتني من شعري رجعت راسي مسيطرت أخذت البنية من ايدي
وعمتي سجودة لازمة بشعري متخليني أتحرك صارت عيني عليها وهي تاخذها وتفوت للبيت گمت أصرخ
نترتني من ايدها وگعت للگاع أريد بس أگوم اجاني همام لزمني يريد يگومني دفعت ايده ووگفت لحيلي
دا امشي أفوت ألحگها مخلتني رجعت لزمتني
- هاك إلزمها
دفعتني على همام لزم ايدي مخلاني أتحرك
- عوف ايدي وخر ولك أخذتها عوفني هي أغبر
همام :- بس اهدي هسه أحجي وياها أخليج تشوفيها
باوعتله أمه :- وين جانت كل هالوكت عندكم مو بالله
- وين أخليها لعد للشارع
- عرفتك أبو گلب الرچيچ
- يوم خليها تروح لأمها شتردين بيها شوفي حالها
- معليك انتَ شريد
- ليش تخليني اني أوديها إلهم بيدي
- حتى أكسر رجليك
- وشنو لبالج خايف
جرني من ايدي :- امشي وياي بان
- گتلك وخر ماروح أريد بنتي ما أعوفها هنا
جنت فاقدة ما على لساني غير هالكلمة بجيت توسلت مفاد نسمة وهمام يمي يقنعون بيَّ يردوني أمشي للسيارة
وعمتي تهدد بهمام بس يطلعني البيت توگفله الحراس
شافته ما مهتم إلها صاحت عليهم اجوها اثنين من برة
واحد منهم گلها :- گولي عمة
أشرتله على همام :- اخذ البنية من ايده وطلعهم برة
اجاني يريد يلزم ايدي ياخذني من ايد همام دفعه مخلاه يتقربلي خلاني وراه اندار على عمتي
همام :- وتالي وياج يوم
- وجع ومرض اخذ مرتك وانگلع منا يلا گتلك لتدخل
- آخذها وياي
- متطلع بان أريدها
- شتردين منها بس گليلي
- مو شغلك يلا اخذ مرتك وتوكل لتجبرني أخليهم يمدون ايدهم عليك وانتَ ابني زحمة
- ما أعوفها والله آخذها وياي گتلج يلا بان
اجت عليه لزمتني جرتني من ايده :- روح همام
- عوفيها
- ما أسويلها شي هي مو تريد بنتها هاي گدامك راح أطببها يمها
عافتني گالت :- امشي روحي طبي للبيت بنتج جوة
مصدگت حجت هيج عفتهم يتلاغون وفتت جوة للبيت
صارت بوجهي هنادي وگفت گدامي
شهربان :- وخري أريد أفوت
- وين تردين
- بنتي جوة دا أشوفها
ضحكت :- يا بنية هاي حبيبتي مالج بنية عدنا يلا منا
- وخري هيج
دا امشي مخلتني لزمتني رجعتني لمكاني
- ويامن أحجي متفوتين گتلج مو بنتج صارت بنت عمتي أمجاد
- مو بكيفكم وخري يلا
ابتسمت :- وسميناها لين عمتي اختارتلها الأسم
احترك گلبي باوعت يمنى يسرى صارت تحفية كبيرة مال ورد گبالي محطوطة عالميز جريتها وشمرتها عليها
لوما مدنگة وضامة وجها جان نومتها براسها
صاحت :- وجع وثول يالمخبلة
- وخري يلا لا الثانية أجيبها براسج
سجود :- اخذيها هنادي فوتيها للغرفة خلي تشوفها
انداريت عليها جانت توها فايتة للبيت
باوعتلي من فوك ليجوة ونترت :- امشي گدامي
أخذتني صارت تمشي واني وراها أخذتني لوحدة من الغرف الجوة وگفت تباوعلي
- فوتي يلا
- ريحانة هنا
- استغفر الله مصدگة روحها لج بابا اسمها لين
ما اهتميت وفتحت الباب وگفت أباوع الغرفة فارغة
انداريت عليها :- بنتي وين
دفعتني من چتفي دخلتني ليجوة رجعت ليورى اهتل توازني مسيطرت على روحي وگعت للگاع
دا أگوم ملحگت عليها سدت الباب بسرعة وقفلته برة
دگيت عالباب صرخت توسلت مفاد ولا أحد فتحلي
ساعتين واني مشتولة بنفس الغرفة أروح وأرجع بمكاني متهسترة ما أعرف شسوي رجلي تعبوا من الفرة
گعدت للگاع راسي عالباب دموعي مسكتوا
أبجي للحال اللي وصلتله حرگوا گلب ماما ومخلوها تشوفني ورجعوا حرگوا گلبي ببنتي وحرموني منها
ما أسكتلهم والله ما أطلع إذا ما أخذتها وياي
سمعت صوتها دتبجي فز گلبي ويَّ صوتها يعني قريبة
رجعت أدگدك عالباب حيل وأصيح عليهم أريد واحد يفتحلي بس أشوفها ايدي صارت حمرة من الدك
لميت رجلي وأذني عالباب صوت شهگتي عالي خليت ايدي على حلگي أكتم صوتي أريد بس أسمعها
بعدها تبجي حبيبتي صوتها يوصلني
لحظات واختفى الصوت سكتت ماعرف شگد مر من الوكت واني على حالي عيوني مورمة من گد البجي
سمعت صوت طگة القفل ابتعدت انفتح الباب وفاتت عمتي وراها عمو سالم رجعت ليورى اجتني
سجود :- فضيني مو تردين تشوفين بنتج
هزيت راسي شالت الأوراق وشمرتلي قلم
گالت :- هاج وقعي هنا واطلعج تشوفيها
ضليت ساكتة عيني تتنقل بينهم وبين الأوراق البيدها
- أوراق مال شنو هاي
سالم :- معليج مال شنو وقعي بلا أسئلة
- ما أوقع إذا معرفت هالأوراق لشنو
سحبتهن بسرعة ونترت :- دضلي لعد بحسرة شوفتها
دارت وجها تريد تطلع حجيت بسرعة
- لا عليج الله خليني أشوفها والله سمعت صوتها مساعة دتبجي
- واني گتلج مدامج ميبسة راسج مترضين توقعين إنسي أخليج تشوفيها
- أوقع انطيني هسه أوقعلج
باوعت لعمو سالم :- بس إذا شگيتيلج ورقة وحدة مثل ذاك اليوم متلومين إلا نفسج
انطتنياهن دنگت جبت القلم الأوراق بيدي ردت بس أفهم كلمة لشنو يردوني أوقع وهيج مستقتلين عليهن
اجت عيني على أسمائنا اسمي واسم نورجان وبابا
صاحت :- فضيني عليمن صافنة
جفلت من صوتها وگعدت للگاع هي تأشرلي واني أوقع
صبيت إنتباهي وتركيزي بكلامهم هي وأخوها
گلها :- ومتنكشف
- مدبرة يمي معليك
- شيضمن
- شو جنك خايف
- تزوير هذا سجودة تردين تعبريها عالدولة عليمن هيج مستعجلة
- مستعجلة شنو بيوتنا منگدر نتصرف بيهن لو عاجبك الدين العلينا والجماعة واگفيلنا وگفة منين تدفعلهم
- گتلج اصبري كم شهر يبلغن السن القانوني وجيبيهن هي وإختها لهنا گعديهن گبال كاتب عدل يرتبلنا السالفة
- وكل عقلك المثل شدن تخليهن هي من يوم الأخذت حارث وراسمة على فلوسه وانضربت بوري بيوم الطرده أبوي من البيت وتبرى منه بس آخ لوما سوايته الأخيرة
- هي حتى شدن إلها حصة تضحكين على منو انتِ
- لعد ليش أگلك اسكت ودسترها بيناتنا ومن تطلع عود إلنا حجي ثاني
شهربان :- كملت
حجيتها ومديتها إلها داروا وجهم اثنينهم بسرعة عليَّ صارت النظرات والمخازر بينهم مدري نسوا روحهم مدري حظهم نساهم اني وياهم بالغرفة ودا أسمع
گمت وگفت :- يلا أريد أشوفها
حجت وهي تگلب بالأوراق تتأكد
أشرتلي عالباب :- اطلعي منو لازمج
سوتلي مجال طلعت بسرعة مشيت للغرفة البصفي صوتها جان قريب من الغرفة الـجنت اني بيها متأكدة
فتحت الباب فارغة ما بيها أحد
بس شفت مهدها عالجرباية مشيتله بسرعة أباوع بيه
ما هي، بس لهاية صغيرة وملابس حديثي ولادة بالمهد
شلت ملابسها أشم بيهن جريت اللهاية وطلعت
صارت عمتي بوجهي :- وينها
سجود :- وجع لتصيحين
- بنتي وين
گعدت عالتخم تباوعلي
دا أمشي گالت :- لتعبين نفسج مو هنا
انداريتلها :- لعد وين وديتوها
- أخذتها أمجاد وراحت
آخر ذرة عقل جانت براسي طيرتها إلي بهالحجاية گعدت للگاع دگيت لطمت بجيت وهم يباوعون لحالي
فات ستار زوج عمتي للبيت گال :- ها شصاير
سجود :- تعال اخذها لأمجاد تشوف بنتها
رفعت راسي بسرعة أباوعلها من بين دموعي
اجت عينه عليَّ ورجع باوعلها :- صدك
- اي شنو مچذبة عليك قبل
عمو سالم جان ساكت ويسمع الحجي بس جان متضايق
سالم :- سجودة لتوديها هناك
- حجينا بالموضوع وانتهى
عافنا وگام طلع من البيت
باوعتلي صاحت :- فضيني تردين تولين لو لا
گمت بسرعة مسحت دموعي وأهز براسي
- اخذها ستار ووصيها عليها لتتقربلها لو تحجي حجاية زايدة وياها لحد ما اني أخابرها وأفهمها
- هذا هو اعتبريه صار
گام وگف وأشرلي :- يلا امشي
طلعت وياه صعدت سيارته ومشى مبتعد عن بيت عمو
الدنيا جانت نص الليل والشوارع شبه فارغة
چتفت ايدي لصدري أريد أتدفى متت برد والرجفة مگاعد تفارگني بليلتها الجو جان بارد والهوى عالي
وين يلا وگفت السيارة باوعت للمكان رجف گلبي
انداريتله :- وين جايبني
ستار :- مو ردتي تشوفين بنتج اگعدي عاقلة هسه أجي
حجاها طفى السيارة ونزل قفل السيارة عليَّ
راح للبيت اللي وگفنا گباله جان بيت كبير دخل من الباب واختفى من گدامي شوي وطلع
اجاني فتحلي الباب :- انزلي يلا
- بنتي وين ليش جبتني لهنا
- هي بنتج جوة
صحت :- لتكذب بنتي وين وديتوها
صاح بيَّ وجر ايدي نزلني السيارو غصب عني واني مراضية أمشي صار يمشيني بالگوة دخلني جوة البيت
وگفنا بالباب الداخلي جان واگفت واحد
گله :- شايل سلاح
ستار :- لا عفته بالسيارة گلت لفاطمة ستار نسيب سجودة هنا
- جوة تنتظركم
صرت أعيط أخذني سحل طببني ليجوة دفعني
أشرلي :- امشي گدامي وبلا صوت صيري عاقلة
- وخر أريد أطلع
فاطمة :- يابة الچلب العضك كتلناه وين هالغيبة
اندارينا اثنينا عليها وهي تفوت من الباب سلم عليها سلام حار وهي ترحب بيه مرة كبيرة تجي من عمر عمتي سجودة وهاي شكلها أضرب حواجبها داگتهم بيدها وشم رافعة ردانها ايدها طالعة بيضة ثلج
أشرتلنا :- تفضلوا اگعدوا ليش واگفين
ستار گعد واني على وگفتي جرني گعدني وياه
- خيرك گول شعندك شعجب تذكرتنا
أشرتله :- والبنية الوياك منو
- هو اني جاي علمودها
باوعتلي من فوك ليجوة :- گول أسمعك
- بنت أخوها لسجودة وتوصيج عليها
- بنت سالم
- لا بنت ذاك المات حارث
- وشسوي بيها
- بقيها يمج
گمت صحت بيه :- مو بكيفك رجعني يلا
من شفته ممعبرني مشيت اني للباب الدخلنا منه صار بوجهي نفسه الرجال التلگانا لزمني رجعني إلهم واني أصرخ ضل واگف لازمني
ستار :- طايحة الحظ مو گتلج اگعدي بلا صوت
- وخر انتَ عوفني هي أغبر لتلزمني
غير لو يهد ايدي دنگت عضيته گمز جابني براشدي لطشني للگاع رجعت رفعت راسي وگمت متجاهلة وجع خدي والحرارة الصارت تسعر بيه من گد مقوي
دا أمشي رجع لزمني چتف ايدي ليورى
فاطمة :- عرمة هاي شيگعدها عندي راح تعبني
- تعقل حالها حال القبلها
- شسمها گتلي
- شهربان
- بس ترى البنية صغيرة وحلوة واني اليجوني معروفين دوم يترددون لبيتي إذا شافوها العين راح تصير عليها لأن جديدة عالمكان
گعدت رجل على رجل :- واني ما أخفيك عيني ستار اليسألني أجاوبه واليدفع بيها أكثر أشمرها بحضنه
گام وگف :- هاي بعد بينج وبين سجودة انتظري منها تليفون اني بعد أروح عينج عليها ترى وكحة راح تشرد
ضحكت بصوت عالي :- منين تشرد يحسرة روح لتوصي
من طلع تخبلت أصيح وراه أريده بس يلتفت راح من گدامي اختفى موتت نفسي وهذا بعده لازمني
گامت اجتني وگفت گدامي لزمت وجهي تديره يمنى يسرى تباوع بيه عافتني وراحت للباب مدت راسها
صاحت :- تعاي رنا اخذيها لغرفة البنات
《 نورجان 》
مطشرة كتبي بالگاع وأفتر وگاعدة عالجرباية بيدي تليفوني در على مسافة مني على ميزها كتابها گدامها
در الزهراء :- وبعدين نورجان معتعوفين التليفون من ايدج
باوعتلها :- بس اطمأن عليهم اشوفهم راحوا لو لا
- شوكت خابرتج آخر مرة
- اليوم الصبح بس گالت من نوصل أرجع أخابرج وهاي صار بالتلث ساعات
- بعد وكت هسع يلا بالعشرة عطيهم مجال
- گلبي يمهم بالي كله ديفكر بيها من وكت مراسلتني بنت عمي ولهسه
عافت كتبها وحركت كرسيها گدامي :- شگلتلج
- گالت جانت عندي بالشقة واليوم أخذناها لبيتنا ولج در ماخذيها لبيت عمو سالم هذول إذا صارت بيدهم يحيرون شيسوون بيها كتل وغلط وهاي متتحمل تسكت تردلهم الغلطة وتلاسن
عفت التليفون من ايدي صارت دموعي تنزل
- والله معيفيد البجي دام الخال وأمج راحولها بردي گلبج ما ضل چم ساعة تايجيبوها ويردون لهين
- خايفة عليها ليطلعون مسويلها شي نسيتي تهديدهم لماما گلولها نهدر دمج انتِ وبناتج
- بس تا أفهم بنت عمج هاي وين جانت كل هالفترة ما خابرتج من گبل من جانت اختج عدها
- معليها البنية صوجي اني جنت سادة تليفوني من فتحته يلا شفت صفحتها وحاجيتها
دنحجي فاتت عمة شيخة للغرفة قلقانة أكثر مني
شيخة :- ها عمة ما خابرت أمج
- ماكو عمة مدا ترد
گعدت بصفي ضربت رجلها :- ويل حالي وهذا الآخر هم غالق تليفونو من البارحة عتصل عليه ميرد
در :- بابا
- اي من وكت ما خابرو خالو وبلغو بالحجي وهو مختفي أظنو رايحلهم للبيت وعالگة بينهم
- بابا لو رايحلهم جان جابها ورد للغربية گبل بوكت
- عجل شأخرو لهساع وهالتليفون الأگشر غير لو يشيلو تا يرتاح گلبي
ضلت در وبيني وبين عمة شيخة كل شوي تواسي وحدة
اني بالي يم ماما واختي وعمة بالها يم عمو تيم
گامت عمتي من عدنا ورجعنا نلهي روحنا بالدراسة بس أكذب على روحي لو ركزت على شي حتى در انشغل بالها وعافت كتبها صارت تصفّن
فزينا اثنينا على صوت صياح برة أخذتها وطلعنا الغرفة
لگيت عمة شيخة واگفة تتجادل ويَّ مرة الخال
فرحة :- تيم عيتراكض ورى حرمة متزوجة شيسموها عودين
- ومنيلج هالحجي انتِ تيم من زمان غاد ببغداد عندو شغل مو تعرفون انتوا بشغلو ويَّ ابن السادة
- لا تفرين الحجي شيخة بعد ماكو شي ينضم سمعت ولدي وهم عيتحاجون ويَّ أبوهم وهذا الزلمة هم من البارحة ماخذ ذيج ورايح غاد شصاير وهيج مشتولين
- ماكو شي إلا كل خير ان شاء الله
- يا خير هذا اليلفينا من يوم ما دحگنا وجه هالبغدادية وأمها هين واحنا ما عيجينا الخير
- البغدادية العتحجين عليها تصير حرمتو لوليدي لا تلوحيها بحجواتج ما أرضالها الحجاية المو زينة
- عجل مجذبة شو من يوم ما لفن الغربية واندار راس الزلمة علينا جان ما يفارك ولدو وولد اختو يجي كل چم يوم يشوف أخبارهم يگعد ويَّ العمام هسع حتى جيتو لهين صارت محسوبة بس لشدن يا هالشدن شگالت وشعملت انا أدري شنو مشربتو ودايرة راسو هيج
- لا تخافين مالها بهالسوالف هاي عمايل التسولف بيها
شهگت لطمت على صدرها :- شگصدج ولج
- الحليم تكفيه الإشارة وانا بعد ما أحجي وياج زايد حجواتج تكدر الخاطر وتجيب الهم ردي لبيتج واگعدي على عايلتج لا تضلين تدورين ورى شغل الزلم
- تطرديني ولج يشيخة هيّن صبرج عليَّ إن ما هججتج انتِ وياهن بليلة ظلمة ما أتسمى فرحة
دا تمشي فاتوا اثنين من عمام شبير للبيت صايرين نار
عمهم الجبير صاح :- تيم وينو
شيخة :- تيم ببغداد
اندار للثاني گله :- استلم وهذا هم مو بالبيت وخالهم مو ببيتو
- شصاير يا خوية غير عنفتهم شبلاكم تتصايحون
ناصر :- ولد عزام شبلاهم عيتراكضون ورى حرمة غريبة ومتزوجة صايرة دايرة هاي
- عليمن عتحجي
- على البغدادية وبنتها عمها مخابر سلطان عيتهدد بتيم رايحلو بعز الفجرية لبيتو لازملهم الباب يريد البنية من عمها
سلطان :- بكل عگلو هو تا يروح يهد على بيت ضابط بالداخلية عيطالبو ببنت أخوه بصفتو منو رايح عم ولد خال بنية
- المرة وبناتها دخيلة عند الخال وخالو الكفلو بالسالفة وگلو تا يرد البنية لأمها
- حجي جديد هذا احنا عش مالنا خبر
ناصر :- وهو فدار شحاسب روحو عيمشي وولد عزام يمشون وراه معمي على عيونهم هسع واحد يدحگها بروحو وبناتو يجيني واحد غريب يگفلي بالباب يطالب ببنتي غير تاسويها دموم
شيخة :- غير بنت حرمتو
- بس البت متزوجة شيخة يعني بحكم رجال وبغياب زوجها عمها موجود شايل أمرها بيدو فدار وولد أختو شعليهم حاطين روحهم بالسالفة
فرحة :- كلو من هاي الأخذها وحطها فوگاي وحسبها عليّ شريچة دارت راسو خلتو ما يدحك جدامو شتگلو يروح يركضلها من يوم الحطن رجلهن ببيوتنا واحنا ما عنشوف الراحة من حدر راسهن يا تهديد يا طلابة
- وينو هو هسع مو البارحة جان بالبيت
- طالع من الليل اجالو تليفون اخذ الأماية وراح رد لبغداد
- لا إله إلا الله هسع جيبي ليفضها
مرة خالهم تربعت بالگاع صارت تدك على رجلها وتنحب راح أبو بيتي وراح ابني والعمام صايرين أعصاب يتفاورون يردون بس واحد بيهم يشيل تليفون يرد
عمة شيخة خابرت على شبير گلتله :- عمامك هين بالبيت تعال بساع انا مو حمل ألاويهم بالحجي
هيام خلتهم يگعدون بالصالة وشافت عمة شيخة دارت وجها التهت تخابر اجتني لزمتني سحلتني سحل
وگعتلي ضرب هي ومرة خالهم گمت أصرخ وأبجي بس در گبالي تصيح بيهن تحجي ولا يمهن
اجت عمة من جوة تركض جرتني منهن خلتني بظهرها
صاحت بيهن :- يالما تخافن من الله هاليتيمة شعاملة ودرتن عليها تاتصفگن بيها
هيام :- مو من حدر راسها وراس أمها إخوتي راح يرحون بالرجلين لو صارلهم شي انا بشنو ربحي بشدن لو بناتها
- وهن شنو ذنبهن إذا الوكت مسلط عليهن وين الما يخاف الله بيهن يتلگنها من أهلهن الغمان لو منجن وحدتجن كل ما دارت راسها اجتي عالمسكينة هاي
فرحة :- خلك ساقطات لموهن من الشارع وانربطن بولدنا هسع دحگي يردون ذيج اللخ تا تندار على تيم ويروح خالو يخليه يعقد عليها مثل ما عمل بشبير
- شبير أخذها برضاتو مو بزر هو تايجبرو خالو عالزواج
- لا والله حجيتي باطل لا رايدها ولا مدحگها عش انتِ مو تدرين شبير حاجين ببنت عمو ناخذها إلو بس طرت علينا هالبنية بيوم وليلة وگلتو عقد عليها وسويتوها بينكم واحنا يا غافلين إلكم الله
عمهم واگف بالباب مال إستقبال يسمع لحجيهن
صاح :- وانتِ الصادگة عش من دون ولدنا شبير صار زواجو سكتة لا دحگنا عمام گعدوا ويانا من طرفهم ولا زفيناهم زفة عرسان
شيخة :- عجل احنا نضل نعيد بالحجي مو گلنا البت اجت أمانة وصارت بنفسو وصارت قسمتهم سوة
- احجي الصدك شيخة البنية شبلاها وهيج عمامهن ذابيهن وما رايديهن
- ظلام جايرين ما خافوا الله بيهن هاليتيمات وين تدير وجها المرة اجت لفدار تعرفو زلمة حوك وخيّر ما يرد دخيل أجتو وأمنت بنيتها عندو من جور أهلها
- ويگوم يخلي شبير تايعقد عليها
- عجل تضل البنت محرمة على ولدنا أحسن مو زين سوى وخاف الله بيها وخلاها على ذمتو
- انا فدار مالي حجي وياه أمرو من راسو يروح يتزوج يطلك هذا الشي راجعلو بس ولد عزام وراهم عمام وعدنا كومة مال ولد هاي سالفة كل يومين تهديد شكل انا ما جازتلي بس يجي شبير لهين أگلو تا يطلگها
فرحة :- حتى أمهن خليه يطلگها وتاخذ بنتها وتولي ما دامها فوك راسو للزلمة ما عنرتاح لا منها ولا من بناتها ولا من الطلايب العتجينا من حدر راسهن
- وهو هيج
حجاها ودار وجها أشر لأخوه وطلعوا اثنينهم من البيت
هيام :- يمة يوم المنى وأدحگهم مطلگيهن وعايفيهن لحالهن عشتو شحصلنا منهن من يوم اللفن علينا ولهساع
- يتطلگن وداعتج ما تدوم إلهن مو اليوم باجر بنات الفگر دحگن الخير والعز العايشين بيه جازتلهن العيشة هين وراحن دارن عالزلم
شيخة :- والله وتسونها ما دامجن انتن ورى السالفة تشحنن بهذا وذاك ما أستبعدها
- صيري حگانية شيخة وحدة لافية من الشارع بايگة زلمتج وهاجمة بيتج وكل يوم سالفة شكل جايتنا من وراها حطي روحج مچاني متخافين على زلمتج وعيالج
- انا وياج بهالحجي لو جانت صدك هي الدايرة راسو مثل متگولين لوما فدار هو العيركض وراها بكل طلابة صارت وياها لحد ما عقد عليها تايسلم من الحجي
- بعديش غير بعد ما وگعتو چفي على وجهي هو هذا حظ الساقطات يحون خيرة الزلم
نورجان :- انتن الساقطات لتتجاوزين
اندارتلي عمة شيخة خزرتني وايدها على حلگها تسكتني
هو اني حجيت هيج وفرحة عاطت گلبت البيت گلاب
تصرخ :- يبوو ولكم انا تالي عمر بزر بكبر زري تگلي ساقطة يبوو على حظج يفرحة
أشرتلي عمة شيخة :- امشي فوتي لغرفة درة
- لا ما أفوت كافي أسمع وأسكت وأعبر مليت عمة كل حجاية والثانية عيرونا كل حجاية والثانية وصاحن ساقطات شنو احنا جايات من الشارع
- اي والله تربية شوارع مبينة هاي وينها من طولة اللسان وتجاوزج عليّ
شيخة :- لا تكبرين السالفة ام مؤتمن ما تجاوزت إلا من انتِ تجاوزتي صار ساعة نازلة عليها وعلى أمها بالحجي حگها البت حجي ما يحملو الأفاد
- والله فلا أسكتلها بس تايرد زوجها وانا أعلمها
گتلها :- روحي شتردين تسوين سوي مراح يسمعلج وشبير أصلاً ميحبج يكرهج يموت منج وبس يحجي عليج وحتى يسميج الچلحة
عمتي تخلي ايدها تغمز تريدني بس أسكت انهديت بيها
دفعتني للغرفة صاحت :- در تعاي اخذيها لغرفتج
اجتني در لزمت ايدي
در الزهراء :- عليج الله امشينا للغرفة والله راسي گام يوجعني من الصياح والحجي
أخذتها أدفع بكرسيها ورحنا لغرفتها وگبت عياط ورانا بين عمة شيخة وبين مرة الخال صوتهن ملى البيت
فتت للغرفة وسديت الباب وراي ..
مشيت للمراية أباوع لوجهي صاير أحمر وشعري متكفش جريت مشط أعدل بيه والشهگة بصدري حاصرة دمهتي بعيني ودر على مسافة تباوعلي
اجاني صوتها من وراي :- شبلاج نورجان
عبالك جنت منتظرتها تحجي عفت المشط ودنگت أبجي
اجت يمي لزمت ايدي :- لا تكدرين خاطرج من حجيهن
- لشوكت دُر مليت والله هناك ببيتنا جانت هيام مستلمتنا لحد ما هججت ماما من البيت وهنا كل كم يوم جاينا واحد يذبلنا حجي شكل ليش هيج الطعن عدهم سهل اني أعرف عيشتنا مختلفة عنكم بس مو دتشوفونا عاشرناكم ودنحاول نتطبع بأطباعكم حتى لنجيب حجاية محلوة لعمو فدار لو لأبوج وشبير هذا من گاعه أصلاً مديخليني أختلط بيهن يعرف سوالفهن
انفجرت أحجي وأبجي أشكيلها وهي تصبر عليَّ
فرحة من طالعة من البيت فايت شبير صاير بوجها گايمة تبجي وحاجيتله گايلتله مرتك تجاوزت عليَّ وعمتك طردتني من البيت لخاطرها ومهددته بفدار
هو مناك جاي فاير من ورى تليفون عمه واجى سامع هالحجي ومرة خاله شلون تهدد بيه بولدها ورجلها
جاي بوجها فايت للبيت يدورني يصيح بأسمي
فتح الباب شافني بغرفة در اجاني جرني گومني خازرني
شبير :- شحاجية ويَّ حرمة خالي
فاتت عمة شيخة وراه :- ما حجت شي انا جنت واگفة
- عمة واليرحم موتاج بروحه لأبراهيم ما تدخلين
هزني حيل صاح :- أحاجيج شغالطة عليها
نورجان :- گالت علينا ساقطات ورجعتلها الكلمة
- وتگليلها شبير يكرهج ويحجي عليج بعگلج انتِ وهيج تحجين شعندي ويَّ المرة
ضليت ساكتة هزني حيل :- أحاجيج ردي
- شرد
حجيتها بنترة وعيني بعينه تخبل جابني براشدي
باوعتله فاتحة عيوني الدموع متجمعة بيها رفع إصبعه بتهديد :- والله ثم والله لسانج هذا إذا ما گضبتيه أگصو إلج بيدي كافي مليت أعبرلج جنت أگول جاهل بس مو مال عيني وأغاتي
حجاها وطلع باوعتلي عمة تنهدت بحيرة وطلعت وراه
گعدت أبجي بحرگة در تحجي وياي ما أرد أول مرة شبير يتعامل وياي بهالأسلوب ويمد ايده ويضربني
جنت ميتة قهر لأن مجنت غلطانة بشي هي البدت وراحت شكتله مني وصارت تتمسكن فرتها عليَّ
شبير مناك ورايح لبيت عمه يفتهم السالفة منه
واني ضليت على حالي حابسة روحي بالغرفة لحد العصر يلا خابرتني ماما رديت عليها مخنوگة
گتلها :- تعاي اخذيني
ردت صوتها مبحوح :- شبيج نورجان مالي حمل بعد أسمع حجاية
حجتها وبجت نسيت سالفتي ورديت بخوف
- شبيج ماما شصاير ملگيتوها
- عمتج تگول طلعت من البارحة و..
مكملت أسمع صوت شهگتها تبجي بصوت عالي
- ماما شكو بس فهميني وگفتي گلبي
- بان صايرة أم ولج حملت واني ما أدري جابت واني مو يمها أختج صايرة عندها بنية نورجان
سرت قشعريرة بكل جسمي اصطكيت معرفت شحجي
رديت :- منو گلج
جرت نفس :- نسمة هسه قبل شوي جنا بشقتهم جايبة حيصيرلها أسبوع وأمجاد ماخذة البنية منها ناقلتها لغير خدج ومن مطلعيها ماخذتها ورايحة لبيت سالم لحت على همام تروح تشوف بنتها وماخذها لهناك
- وهسه وينها
- عمج گال بليلتها ماخذة البنية ورايحة وماكو هسه لا هي ولا بنتها
- وخلوها تاخذ البنية وتطلع لوحدها عادي
- مو بلا غيرة بالله هسه هاي وين ألگاها مطلعيها بليل أظلم أحير بيها لو بالجاهل البيدها
- اخاف راحت لبيت عمو فدار نسمة گالتلي راحتله قبل كم يوم ولاگية الباب مقفول
- هو احنا لعد وين غير ببيت فدار رجعنا الكامرات وشفنا التسجيل بيومها صادف فدار هنا بالغربية جاية گاعدة بالباب وجاي وراها همام مرجعها للشقة
- ماما شو ممرتاحة أحس صايرلها شي وعمو ديكذب
- ولا اني ماما مغمضتلي عين من البارحة وحتى فدار ممصدك بكلامهم منتظر تمر 24 ساعة يبلغ عن فقدانها بالمركز وياخذ دورية يروح يفتش بيتهم أخاف ليطلعون حابسيها
- وهسه شراح تسوون
- ما أدري منتظرة فدار يرجع يگلي شصار وياه
- ماما عمو سالم يهدد بعمامهم من ورى عمو تيم
- هذا اللاخ هم انخبص ويانا من ساعة مگله فدار ولهسه موگفله جماعة بفرع بيت عمج مراقبين البيت يابة انطونا تسجيل الكامرات نشوفها من طلعت وين راحت مقبلوا هسه منتظرين بس يفوت الوكت ويرحون لبيتهم يفتشونه غصبًا عليهم يشوفونا التسجيلات
- هاي إذا مسبقوكم ومسحوها
- نورجان لتزيدين نار گلبي
- يعني انتِ متعرفين سوالف عمو وعمتي سجودة
- ماكو حتى سجودة مو هنا
- نسمة گالتلي جاية موجودة ببيت عمو سالم
- ما أدري هم گالتلي بس مدخلنا البيت من الباب طلع عمج حجى ويَّ فدار واني بالسيارة مخلاني أنزل
- ماما شيصير وياكم خابريني لتنسيني بالي وياكم
سديته منها ورحت حجيت لعمة شيخة الحجي الگالته
شيخة :- يا يمة وبت نفاس شيطلعها بالليل وياها جاهل بالله تعرضلها واحد ابن حرام من الشارع وين تعطي وجها
- هم هيج بيت عمو ميهتمون عشنا لو متنا
- بس سالفتهم ما تخش العگل چنو ملعوب منهم تايبنجوكم بيه
- عمو فدار هم هيج گال لماما وحيروح يفتشون بيتهم
- من سترج يأم الحسن على هالمسكينة هاية خلصت عمرها شاردة منهم
- اي عمة حبابة ادعيلها بان ما عندها أحد هناك
صرت أبجي أخذتني لحضنها :- سودة عليَّ يا عمة من يوم ما سمعت بسالفتها ولساني يلهجلها بالدعاء والله ما ناسيتها
شبير ما راجع من عمامه إلا لليل كُلش فات تعبان روحه بخشمه متعارك وياهم وجاي وگعد يسولف لعمة شيخة
اني ضليت بغرفة در ماريد أشوفه وهو بغرفة عمته
وكت النومة انطتني عمة المخاد حتى أصعدهن للغرفة
نورجان :- ماروح فوك راح أنام هنا
- ها ولج زعلانة منو
هزيت راسي :- حگج والله بس هو هم معذور جاي مناك متكدر من حجي عمامو واجت حرمة خالو چملتها عليه وصارت بعد بوجهج
- خلي يروح بعد لا أريده ولا هو رجلي ولا أعرفه
- دخيلك ربي تبرت من زلمتها
- اي
- عجل دروحي وديلو مخدتو تاينام من وكت ما اجى من شغلو وهو على هالفرة لهساع خليه يرتاحلو ساعة
أخذت المخاد وصعدت للغرفة فتحت الباب ما هو بس الفراش على مكانه مگابل الشباك والشباك جان مفتوح
الجو بالليل ديصير بارد وبيها هوى يجي للغرفة حتى السبالت طفيناها من زمان وصرنا ننام عالبنكة
شمرت المخدة عالفراش وانداريت صار بوجهي عالباب
لابس فانيلة داخلية سودة المنشفة على رگبته توه طالع من الحمام سد الباب واجاني ابتعدت بسرعة منه
رفع حاجبه :- هاه هيج صارت
- وخر شبير أريد انزل
باوعلي من فوك ليجوة عگد حاجبه
- هاي شلابسه ولج هيج جنتي تفترين جوة
باوعت لملابسي لابسة دشداشة قصيرة للركبة للنوم
- شبيها
- شنو الما بيها رجليج طالعة متنزلين هيج
- محد جوة وعلي اول مرجع من بيت عمته صعد نام بغرفته واني هم أريد أروح انام
- تنامين هين مالج نزلة
- مو بكيفك
- عجل بكيف منو
حجاها وهو يتقدملي صرت بينه وبين الحايط
رجفت شفايفي :- و..وخر
دنك راسه عليَّ
- زعلانة مني يالصفرة
- لا
حجيتها واختنگت غورگت عيوني بالدموع
- جعل ايدي انكسرت ولا انمدت عليج
نزلت دموعي ودرت وجهي منه لزمني رجع دارني عليه
شبير :- دحگيلي والله جانت أعصابي براسي ما هجست إلا رافع ايدي وضاربج تالي صرت أكل بروحي عليج
- وهاي انتَ كل مرة تصير أعصاب تجي تضربني
- يولي مو گصدي والله وهاي انا جدامج أتعذر منج
- ماريد إعتذارك فشلتني گدامهن واختك واگفة متشمتة
- وهاي انتِ الهمج اختي
- لتگلب الحجي وخر خلي أفوت نعست أريد أنام
- متنزلين گتلج واگف تاحجي وياج
- واني ماريد أحاجيك عوفني يلا
دا أمشي رجع دفعني للحايط لزم فكي بدون ليضغط
- يول لا تديرين وجهج عني هيج مرة اللخ وانا أحاجيج
لزمت ايده :- عوفني شُبيؤ
خزرني :- صوتج لج
دفعت ايده عني ووخرت منه وگفت على جهة دموعي تنزل وگف ثواني يباوعلي جر نفس قوي ومشى للمراية اللي عالكنتور ينشف بشعره
خليته يلتهي وتسحبت لحد موصلت للباب فتحته وركضت وأسمع صوته يصيح وراي نزلت الدرج وصوته يتقرب وگع گلبي مشيت بوجهي لغرفة عمة شيخة
طبيت صرت وراها وهو فات وراي فاتح عيونه خازرني
أشرلي :- تعاي جاي
شيخة :- شرايد منها شبلاك عليها اليوم
- نورجان تعاي گتلج
يحجي صاير عصبي عمة مخلته يتقربلي لازمة بيها من ورى حيل گلتله :- عوفها اليوم تنام عندي
- لا تصعد فوك
- ولك انا جاي أحاجيك تكسر حجايتي
گلها :- هيّن يصير خير بس لو دحگتها طالعة بهاللبس برة هالغرفة متلوم إلا نفسها
حجاها وطلع رگع الباب وراه
- يا يمة هبد الباب هبد
نمت يمها ليلتها خلصت هي الليل تصلي وتقرا قرآن واني نمت للفجر حسيت عليها وهي تگعد للصلاة
گمت أفرك بعيوني مشبعانة نوم طلعت تليفوني عايفته بالداخليات مالتي حتى إذا اجاني إشعار لو مسج أفز
شافتني عمة گالت :- گومي حبيبة توضي وصلي دامج گعدتي لا تخلين وكتها يفوتج
مكذبت خبر گمت للحمام حتى أتوضى واگفة عالمغسلة رفعت راسي وما أشوف إلا شبير بأنعكاس المراية
عطت بخوف سد حلگي بسرعة أباوعله فاتحة عيوني جسمي كله أحسه صار يرجف من الخوفة گلبي يدك
أشرلي بأصبعه على حلگه :- اششش لتطلعين صوت
طلع وجرني وراه لازم بيدي باوعت لغرفة عمة
نورجان :- شُبير والله أصرخ ترى وخر خلي أرجع
ما رد من حجيت هيج دنك شالني تعلگت ايدي برگبته
همست :- شبيك تخبلت نزلني
مشى طلع ليبرة واني احجي وياه ولا عبالك أخذني للسيارة فتحها وگعدني ورجع سد الباب عليّ
راح للگراج فتحه ورجع طلع السيارة ونزل سده
صعد بكرسي السايق وعيوني تراقب حركاته
نورجان :- شتسوي شبيك وين ماخذني
ما رد حرك السيارة ومشى طول الطريق أحاجيه ميرد مللني سكتت منه مسافة بسيطة ووصلنا لبيتنا وگفها
نزل فتح الباب دخل سيارته ليجوة يلا خلاني أنزل
نزلتله :- شُبير شبيك مو أحجي وياك
اشرلي بيده :- جدامي جوة
ضربت رجلي بالگاع بعناد :- ما أفوت رجعني يلا
احاني شالني بسرعة گال :- انتِ عجبتج الحركة تاما تتعب رجليج بالمشي
فات للبيت وصعد لغرفتنا نزلني عالجرباية سد الباب
گمت لحيلي أباوعله كل وبالي جايبني ديعاقبني على نزلتي من الغرفة لغرفة عمة وعنادي صار يتقدملي
نورجان :- شُبير والنبي بعد ما أعيدها
حصرتني البچية صار گدامي نزلت دموعي بسرعة
دنك راسه :- دحك نزلتهن بساع ام دميعة
شهگت :- والله بعد ما أعيدها
جرني لصدره حضني :- وهسع انا شمسويلج يا بوية گاضبلج سيف على رگبتج كافي عاد بلا بجي
هو يحجي واني أزيد منا مقهورة منه ومنا سالفة بان گعدنا للگاع واني بحضنه صرت أشتكيله منه وإله
رفعت راسي باوعتله من بين دموعي
گتله :- شُبير اني أتحمل حجيهم وغلطهم كلهم إلا انتَ ما أتحمل منك تعاملني هالشكل وبهيج إسلوب عودتني على إهتمامك وحنيتك لتغير تعاملك وياي
باس راسي رجعت نمت على صدره :- مالي غيرك هنا كلهم هذول مو بعيني من بعد ماما وبان بس انتَ تهمني
- أعرف يولي أعرف عش انتِ منو اليتحمل فلتات لسانج غير شبير
باوعتله مبوزة :- لتحجي هيج
ابتسم :- يول گضبوني عمامي اليوم لو تطلك الصفرة لو نتبرى منك
- عزة وشگتلهم
- عطيتهم زيج ميدرون انا متبري منهم من زمان
- ياا
- عجل بكل عگلهم تايردوني أطلگج منو اليصدك كلامي بعد غيرج كلهم عيچذبوني من أحجي إلا انتِ دحگتيني يتيم ومغلوب على أمري صرتي وياي عليهم
- سودة عليَّ معليك بيهم اني يمك
حجيتها وحضنته حيل جر نفس من شعري
- يا يمة يا يمة شمشتاگلج صار چم يوم راسي من رجلي ما أندلهم من گد ما ملتهي بالشغل ولاهي عنج
گمزت بسرعة من حضنه :- عززاا
گمز وياي :- شكو ولج
- مصليت
عض ايده :- أنا إلج گضي صلاتج وأستلمج على هالگمزة هاي
رحت جبت إيزار صلاة ووگفت صليت گدامه وهو منتظرني كملتها وسلمت ورجعت عدتها مرة ثانية
وهم كملت وسلمت باوعتله بطرف عيني بعده على گعدته وجارها صفنة گمت عدتها مرة ثالثة
بالرابعة رفعت ايدي :- الله أكبر
فز من مكانه
صاح :- الله أكبر على راسج تعاي لج
جرني نزعني الإيزار وحاوط خصري رفعني من الگاع دنك باس شفتي حاوطت رگبته بادلته بلهفة
جنت توني غافية راسي على صدره ايده تمسد بشعري
همست :- شُبير باردة
جر الغطى رفعه على كتفي العاري غطاني وضمني بيده
فزيت على صوت رنة الموبايل مد ايده للميز عگد حاجبه
شفت الدگة طولت فتحت عيوني :- شكو
شبير :- يول هذا تليفونج
- شنو يعني
- منو تايتصل عليج بهالوكت
باوعت رقم غريب مدلياه وأشرلي افتح خط واحجي
نورجان :- ألو منو
اجاني صوت رجال غريب
گال :- اختج وين نورجان
باوعتله بخوف عدل گعدته عاگد حاجبه أشرلي احجي
- منو
- حطي ببالج لو بان ما رجعت آخذج مكانها
جر التليفون من ايدي صاح :- منو اليحجي
انسد الخط بسرعة بوجهه شبير عيونه صارت براسه واني لزمتني الرجفة من الموقف سألني إذا أول نرة يتصل واني أحلفله هتي أول مرة گام من مكانه لبس ملابسه والتليفون بيده عافني وطلع
《 شهربان 》
ايد تهز بچتفي وصوت فوك راسي
گالت :- بان گومي يمعودة اگعدي
فتحت عيوني فزيت گعدت لحيلي عرگانة حيل صرت أمسح بوجهي وأوخر بشعري باوعتلها
رنا :- شهالنوم هذا گومي خلصيني عمة تريدج
- شتريد
- شمدريني گالت گعديها
گمت للحمام غسلت وجهي بمَي بارد وباوعت بالمراية
الهالات محاوطة عيوني وجهي شاحب وتعبانة حيل جسمي ما احس بيه كل طاقة گوة أحرك روحي الدوخة لازمتني وراسي بيه وجع الدنيا
ديحطولي شي بالأكل ديخليني أنام ساعات طويلة
گطعت الأكل يومين وتمرضت صرت اني والفراش سوة ومن عرفت چبيرتهم مدا آكل لعبت بحالي لعب وهددتني تطلعني بوحدة من الغرف وتفوتلي واحد
خفت حيل لأن المثلها ما عدها حلال وحرام ما أستبعد تسويها وهي لازمة بيت دعارة تشتغل عالبنات
ما أدري شگد صارلي عدهم ميخلوني أطلع من الغرفة حدي للحمام تاخذني البنية وترجعني الشردة مفادت
تليفون ممنوع حتى البنات الي وياي بالغرفة محد تحاجيني حتى لو اني حجيت وياها ميردن موصيهن
بس الأسمها رنا جانت تجيبلي الأكل وتلزملي الباب مال حمام من أحتاجه البيت كبير وغرفه هواي والبنات كومة تلاثة وياي بالغرفة والباقيات ببقية الغرف
نصهن ماعرفهن ألمحهن كل ليلة من الباب مبدلات ومتخضرات لسهرتهم وصوت چبيرتهم يلعلع عليهن
أغاني ورگص وصوت زلم من جوة وضحكهن ويجن لوجه الصبح يذبن روحهن عالنوم حالهن حال الموتة
كل السويته بهالكم يوم سكتت
جنت منتظرة بس اليوم اللي تطلعني بيه من الغرفة واجى هاليوم مسحت وجهي وطلعتلها باوعتلي
أشرت :- يلا امشي
مشت گدامي واني وراها طلعنا من الغرفة نزلنا جوة
وگفنا گبال وحدة من الغرف دگته صاحت :- فوتن
فتحته وأشرتلي أدخل طبيت للغرفة
صارت بخشمي ريحة الجگاير رفعت ايدي سديته مختنگة وعيني تدور عالغرفة كبيرة أثاث تركي ضخم وصورة إلها معلگتها فوك الچرباية الدخان تارس المكان
فاطمة :- عاش من شافج عيني
اجت عيني عليها جگارتها بيدها
- شرايدة مني
طفت جگارتها بالنفاضة :- كافي بعد نوم دللتج زايد وبدال الـ10 أيام خليتج 14 يوم واني ما أنطي وكت هالگد لوحدة بس انتِ وصوني بيج
- والمطلوب شنو
- تشتغلين بالبيت حالج حال البنات
- اي عادي انطيني أي شي أنضفلج
من حجيت هيج هاي رنا ضحكت بصوت عالي
صاحت بيها :- وقز القرط ووجع لهالصوت
سكتت بسرعة كاتمة ضحكتها
رجعت تحجي وياي :- ماما الشغل النشتغله احنا غير الي ببالج رنا عود تفهمج وتعلمج الأريده منج تحضرين روحج ويَّ البنات بالليل عندي سهرة بيها ناس كبار تلوك لهالوجه
گامت من مكانها مشت للكنتور حجلها يدك برجلها
گالت :- اخذيها رنا وعلميها مثل مفهمتج
- صار عمة
أخذتني من ايدي وطلعنا رجعنا للغرفة باوعت للبنات
رنا :- انتن اطلعن خاف تستحي
وحدة منهن ضحكت :- ها اجاها الدور
- نلصمي وگومي ولي
طلعن بسرعة وسدت الباب وواندارتلي :- انزعي ملابسج
- شتردين تسوين
- أشوف جسمج بيه شعر لا ولو جان المفروض گبل يومين أشوفج حتى جسمج ليتحسس بس عمة مقبلت
- وخري مبية شعر
- مو بكيفج شوفيني ترى أروح أگول لعمة تعاند
گوة لزمت روحي لا أسوي تصرف غبي أتندم عليه بعدين ويخربلي الموال الراسمته براسي
نزعت التيشيرت تباوع بجسمي گالت :- اي زين ناعم مو كُلش عندج مراح يتعبنا
استلمتني اليوم كله سوتلي شيرة لجسمي تحسس صار أحمر انطتني كريمات گالت :- منا لليل يخف الحمار
بالليل كلهن انخبصن هاي الي تسرح شعرها وهاي الي تتمكيج وذيج تلبسها واني گاعدة أباوع بيدي فستان انطتنياه رنا گلتلي ألبسه
رجعت رفعته للمرة المية أباوع بيه رغم اختاريت أستر واحد بيهم بس قماشه يفصّل ودلعته من الصدر واضحة
احت شافني شهگت :- عزة بعينج بعدج ملابسة خلصيني گومي دا أسويلج شعرج
باوعتلها لابسة فستان جلد نمر طويل يسحل وراها مفصل جسمها تفصال بيه فتحة من جهة وحدة طالعة رجلها لابسة بيها حجل ووجها تارسته مكياج ورغم كل هذا جانت طالعة عبالك لعابة گد محلوة
گومتني بالگوة خلتني ألبسه ومثل متوقعت اجى لطش على جسمي برزه باوعتلها ضايجة :- صدك تحجين شوفي شلون لاطش على جسمي
ضحكت :- بان أذكرج انتِ شتسوين باعي گدامج شتشوفين كلهن لابسات مثل لبسج وأضرب خلي ينسد عليج باب ويَّ واحد بيهم يبقى فستان تبقى ملابس والله بطرانة
اختنگت من حجيها ماريد حتى أتخيل روحي بهالمنظر
سرحتلي شعري ورجعت برمت أطرافه رادت تخليلي مكياج مقبلت ودگت رجل إلا تخليلي لحد مصاحت على چبيرتهم من جوة اجت عاطت بينا
كملت ووگفت أباوع لروحي عاقجة وجهي وخواجبي متطابگة گالت :- وحق الله طالعة تشگين شك دخلي يشوفونج إلا تصير مذابح عليج يفقدون عالجديدة
صاحولها راحت مني واني صافنة بروحي حصرتني البچية لزمت وايبس مسحت الحمرة الحطتها إلي
وگعدت عالچرباية مچتفة ايدي لصدري هن يرحن ويجن
لحد مصاحت عليهن من جوة نزلن يتراكضن ورنا جرتني نزلتني وياها وگفنا گدامها تباوعلنا وحدة وحدة
صارت عينها عليَّ ضحكت واندارت لرنا
فاطمة :- هاي شمسوية بيها گالبتها گلب
- القالب غالب عمة
- اي واحد يحجي ضميره هي حلوة
ضلت تحجي براسنا انتِ سوي هيج وانتِ جيبين هيج وحدة وصتها عالشرب واللخ ترتب بالگعدة والثانية تختار بالأغاني لازمة الديجي ورنا تفتر عليهن
وهن يتحركن شفتها دخلت من برة وياها رجال مشورب صرت بس اني گدامهم غير اخنلست خزرتني ركضت بسرعة لوحدة من الغرف وطبگت الباب عليه
شوي وانفتح الباب فاتت رنا :- هاي انتِ هنا واني أدور عليج تعالي امشي عاوني ويانا بالمطبخ
مشيت وراها طلعنا من الغرفة وخطفت بنظري عالصالة انترست زلم وصوت الأغاني تارس المكان وصلنا لهناك
حضرت صينية وخلتها بيدي :- هاج روحي قدمي شوفي روحج
عفت الصينية نترت :- شبيج انتِ شنو شوفي روحج
- استغفر الله بان لتبيعين شرفيات براسي يعني جاية لهيج مكان شمتوقعة اشتغلي بلا صوت يلا فضيني
انطتني الصينية ودفعتني للصالة مشيت رجل تجر رجل
گوة وصلت للباب مدنگة راسي حتى مرفعته
اجتني وحدة من البنات شاورتني :- عمة تصيحلج فوتي
رفعت راسي باوعت اجت عيني بعين مآب عاگد حاجبه
فتحت عيني على وسعها رجفت ايدي وگعت الصينية من ايدي تكسرت الگلاصات صارت العيون عليَّ
جرتني البنية ودفعتني لجوة رحت للمطبخ سندت ايدي عالكاونتر ايدي على صدري أجس دگات نبضي
صفنت على روحي أحاول أستوعب اني صدك شفت مآب لو يتخايلي وجهه يا ربي
اجتني رنا :- شبيج انتِ متگوليلي هي بس هالشغلة انطيتج مدبرتيها
- شفت واحد أعرفه هنا
صفنت بوجهي :- امشي روحي للغرفة هسه أگول لعمة
صعدت للغرفة الجنت بيها أحاول أتذكر ملامح وجهه أحس ممصدگة شفته يا ربي هو لو يتهيألي شسوي
گلت أرجع أنزل أشوفه واتأكد أحسن إذا هو لو لا
دا أطلع صارت بوجهي رنا متوترة :- فوتي وين رايحة
- هسه بس لحظة
دفعتني جوة للغرفة وقفلت الباب وخلته بصدرها
صحت :- شبيج وخري
- عمتي متقبل
سمعت صوت هوسة من جوة وتأكد اللي براسي صوته صار ببرة ركضت للشباك أباوع ليجوة حراسها مطلعينه يجرجرون بيه ليبرة انخمش گلبي من شفته ..
دا أفتح الشباك لزمتني رنا مخلتني نزلت دموعي
گعدت عالچرباية لامة أيدي وأضرب بفخذي
عزة بعينج بان وشافج على هالحال ؟
وشافج بهالشكل ؟ .. عمت عينج اي والله
ورى شوي اجتني فتحتلها الباب وفاتت
فاطمة :- شيعودلج هذا وديصيح يريدج
ضليت ساكتة مرديت جنت شبه فاقدة ايدي على حلگي
من شافتني ما انطي جواب اندارت لرنا :- لتخليها تطلع
سدت الباب حيل وگعدت بفراشي وخرت المخدة طلعت لهاية بنتي ضميتها لصدري صارت روحي بيها
يحجن وياي ما أرد يفوتن ويطلعن يشوفني أبجي وما على لساني غير آيتي أردد بيها :- لا إله إلا انتَ سبحانك إني كنت من الظالمين لا إلـ.....
ضليت على هالحال بالساعتين جسمي كله يرجف موگفتلي اثنين بنات بالباب ميخلني أطلع برة
سمعت صوت هوسة من جوة گمزت للشباك أشوف شكو وهذن وراي دورية مال شرطة واگفة بالباب طبك
وهوسة جو واگفين ضباط وبوجهه واگفة فاطمة تحجي ويَّ واحد بيهم تتصايح وياه بيدها أوراق تشوفه
اندفر الباب من ورانا جفلنا كلنا واندارينا نشوف شكو
اثنين زلم فاتوا واحد منهم لابس مدني والثاني ببدلته
صاروا يباوعون بالوجوه صاح :- بان ويييييين ؟
طلع مآب من وراهم شافني ورفع ايده أشرله بأتجاهي صارت عينه بعيني اجاني مدلي ايده خازرني
